‘लवकरात लवकर वाद मिटवा’

या उदाहरणाचा विचार करा. जर आपलं हाड मोडलं आणि आपण लवकरात लवकर इलाज केला नाही, तर आपला त्रास वाढू शकतो. इतकंच काय, तर आपल्याला हालचाल करणं शक्य होणार नाही आणि आपलं कायमचं नुकसानही होऊ शकतं. पण जर आपण लगेच इलाज केला, तर आपलं दुखणं कमी होईल आणि आपल्याला बरं वाटेल.

मोडलेल्या हाडासारखंच बिघडलेलं नातं पुन्हा जोडण्यासाठीही लवकरात लवकर पाऊल उचलणं खूप गरजेचं आहे. येशूने म्हटलं होतं: ‘लवकरात लवकर वाद मिटवा.’ (मत्त. ५:२५) जर आपण असं केलं नाही तर आपल्यातला दुरावा आणखी वाढू शकतो आणि भाऊबहिणींसोबतची आपली मैत्री आपण कायमची गमावू शकतो. त्यामुळे मतभेद होतात तेव्हा आपण आपल्या मित्राशी प्रेमाने आणि मनमोकळेपणे बोललं पाहिजे. पण हे नेहमीच सोपं नसतं. का बरं? याची दोन कारणं आहेत.

पहिलं, झालेल्या गोष्टीबद्दल काही न बोललेलंच बरं असा आपण कदाचित विचार करू.b पहिल्या शतकातल्या युवदीया आणि सुंतुखे या बहिणींच्या बाबतीतही हेच झालं होतं. त्यांच्यात मतभेद झाले होते आणि त्यांनी ते लवकर सोडवले नव्हते. असं दिसतं, की त्यांच्यातला वाद बराच काळ राहिला. कारण दूरवर राहणाऱ्‍या प्रषित पौललासुद्धा याबद्दल समजलं. म्हणूनच त्याने त्यांना त्यांच्यातला वाद मिटवून ‘एक मनाचे’ असण्याचा सल्ला दिला. (फिलिप्पै. ४:२) त्यांचं नातं पुन्हा जोडण्यासाठी त्यांना नम्रता दाखवायची, मनमोकळेपणे बोलायची आणि मोठ्या मनाने एकमेकांना माफ करायची गरज होती.

दुसरं, समोरच्या व्यक्‍तीने त्याची चूक कबूल करावी असं आपल्याला कधीकधी वाटतं. पण लक्षात असून द्या आपला उद्देश कोण चूक कोण बरोबर हे ठरवणं नाही, तर आपली मैत्री पुन्हा घट्ट करणं हा आहे. मोडलेल्या हाडाचा इलाज करणारा डॉक्टर हे सगळं कसं घडलं याबद्दल बारीकसारीक माहिती विचारण्याऐवजी, आपल्याला लवकरात लवकर कसं बरं वाटेल याकडे लक्ष देतो. तसंच, वाद सोडवताना चूक कोणाची होती यावर चर्चा करण्याऐवजी, तुमची मैत्री किती मोलाची आहे आणि ती पुन्हा घट्ट कशी करता येईल याकडे लक्ष द्या.

म्हणून वाद होतात तेव्हा ते सोडवायला लवकरात लवकर पाऊल उचला आणि मैत्रीचं नातं घट्ट करायचा निश्‍चय करा. “सूर्य मावळेपर्यंत तुमचा राग राहू नये” या सल्ल्याचं पालन करा. (इफिस. ४:२६) नातं पुन्हा सुधारण्यासाठी लगेच पाऊल उचलल्यामुळे, शांती आणि एकता टिकवून ठेवता येते.—इफिस. ४:१-३.