सत्कर्मं करत राहिल्यामुळे पुढे चांगलं आयुष्य जगता येईल का?

शेकडो वर्षांपासून बऱ्‍याच लोकांना असं वाटतं, की आपण जर सत्कर्मं केली आणि लोकांशी चांगलं वागलो, तर आपलं भविष्य चांगलं होईल. पूर्वेकडच्या देशांमधले बरेच लोक कन्फ्यूशियस (इ.स.पू. ५५१-४७९) नावाच्या एका विचारवंताचं तत्त्व मानतात, ज्याने म्हटलं: “इतरांनी तुमच्याशी वाईट वागू नये असं जर तुम्हाला वाटत असेल, तर तुम्हीही त्यांच्याशी वाईट वागू नका.”a

बरेच जण काय करतात

आजही बरेच लोक असं मानतात, की तुम्हाला जर चांगलं आयुष्य जगायचं असेल तर तुमचं आचरण चांगलं असलं पाहिजे. म्हणून ते इतरांशी आदराने वागतात, चांगल्या सवयी लावून घेतात, समाजातले जबाबदार नागरीक म्हणून वागतात आणि आपलं मन साफ ठेवायचा प्रयत्न करतात. व्हिएतनाममध्ये राहणारी लीन म्हणते, “मी नेहमी असा विचार करायचे की मी जर इतरांशी प्रामाणिकपणे वागले तर माझंही भलं होईल.”

तीच स्त्री गरीब आणि बेघर लोकांना जेवण देत आहे.

काही जण आपल्या धार्मिक विश्‍वासामुळे इतरांशी चांगलं वागायचा प्रयत्न करतात. तायवानमध्ये राहणारा शू-यून नावाचा माणूस म्हणतो, “मला असं शिकवलं होतं की एखाद्याने त्याच्या आयुष्यात जी कर्मं केलीत, त्यांवरून मेल्यानंतर तो आनंदी असेल की यातना भोगत राहील हे ठरतं.”

अनेकांनी काय अनुभवलं आहे

तीच स्त्री संध्याकाळी पार दमून गेली आहे, आणि हताश चेहऱ्‍याने आपल्या बाळाला झोपवत आहे.

हे खरं आहे की इतरांचं भलं केल्यामुळे आपलंही भलं होतं. पण बऱ्‍याच जणांनी अनुभवलं आहे, की असं नेहमीच होत नाही. हाँगकाँगमध्ये राहणारी शीऊ पिंग नावाची एक स्त्री म्हणते, “मी माझ्या कुटुंबाची काळजी घ्यायचा आणि चांगलं ते करायचा नेहमी प्रयत्न केला, पण माझा नवरा मला आणि माझ्या मुलाला वाऱ्‍यावर सोडून गेला. आपण इतरांचं चांगलं करतो तेव्हा आपलंही चांगलं होईलच असं नाही हे मी प्रत्यक्ष अनुभवलं.”

अनेकांनी असं पाहिलं आहे, की सगळेच धार्मिक लोक चांगलं वागतात असं नाही. जपानमध्ये राहणारी इत्सुको म्हणते, “मी एका धार्मिक संघटनेची सदस्य बनले आणि तिथल्या एका युवा मंचाची अध्यक्ष बनले. पण तिथली ढासळलेली नैतिकता, अधिकार मिळवण्यासाठी होणारी चढाओढ आणि मिळालेल्या वर्गणीचा गैरवापर पाहून मला धक्काच बसला.”

“मी माझ्या कुटुंबाची काळजी घ्यायचा आणि चागलं ते करायचा नेहमी प्रयत्न केला, पण माझा नवरा मला आणि माझ्या मुलाला वाऱ्‍यावर सोडून गेला.”—शीऊ पिंग, हाँगकाँग

श्रद्धेच्या भावनेने केलेल्या चांगल्या कामाचं चीज होत नाही असं जेव्हा काही जणांना जाणवतं, तेव्हा त्यांची निराशा होते. हीच गोष्ट व्हिएतनाममधल्या वॅन नावाच्या एका स्त्रीला जाणवली. ती म्हणते, “मी दररोज माझ्या मृत वाडवडिलांना फळं-फुलं वाहायचे आणि नैवेद्य दाखवायचे. असं केल्यामुळे पुढे मला त्यांचा आशीर्वाद मिळेल असं मला वाटायचं. पण बरीच वर्षं हे सगळं करून आणि धार्मिक रीतीरिवाज पाळूनसुद्धा काहीच उपयोग झाला नाही. माझे मिस्टर खूप अजारी पडले आणि बाहेरच्या देशात शिकत असलेली माझी तरूण मुलगी अचानक वारली.”

फक्‍त सत्कर्मं करणंच पुरेसं का नाही

सगळ्यांसोबत चांगलं वागणं एक चांगली गोष्ट आहे. पण सुंदर भविष्यासाठी तितकंच पुरेसं नाही. का बरं? पवित्र शास्त्रात त्याबद्दल काय म्हटलं आहे ते पाहा.

सगळेच जण चांगलं वागतील असं नाही

“एक पापी माणूस पुष्कळ चांगल्या गोष्टींचा नाश करू शकतो.”—उपदेशक ९:१८.

तुम्ही इतरांशी कितीही चांगलं वागायचा प्रयत्न केला, तरी इतर जण तुमच्याशी चांगलं वागतीलच असं म्हणता येणार नाही. काही स्वार्थी लोक तुमच्याशी वाईट वागतील आणि त्यामुळे तुमच्या आयुष्यावर त्याचा वाईट परिणाम होईल. उदाहरणार्थ, कोरोना महामारीच्या काळात सरकारी अधिकाऱ्‍यांनी इतरांच्या संपर्कात येऊ नका असं सांगितलं असेल. आणि या गोष्टीचं तुम्ही काटेकोर पालन करत असाल. पण इतर काही जण ते पाळत नसतील तर काय? त्यांच्या अशा वागण्यामुळे आपल्या जिवालाही धोका निर्माण होऊ शकतो.

योग्य काय आणि अयोग्य काय या बाबतीत लोकांचा गोंधळ होऊ शकतो

“माणसाला एक मार्ग योग्य वाटतो, पण तो मार्ग शेवटी मृत्यूकडे नेतो.”—नीतिवचनं १४:१२.

इतिहासात अशी बरीच उदाहरणं आहेत जी दाखवून देतात की काही जणांनी, आपण चांगलं करत आहोत असं समजून काही गोष्टी केल्या. पण नंतर त्या गोष्टी चुकीच्या होत्या हे त्यांना समजून आलं. त्यामुळे आपला हेतू जरी चांगला असला, तरी आपण केलेल्या चुकांचे परिणाम आपल्याला भोगावेच लागतात.

आयुष्यात कधी काय होईल सांगता येत नाही

“उद्या तुमचं जीवन कसं असेल, हे तुम्हाला माहीत नाही.”—याकोब ४:१४.

एखादी व्यक्‍ती कितीही चांगली असली तरी अवेळी तिचा मृत्यू होऊ शकतो. उदाहरणार्थ, कोव्हिड-१९ महामारीच्या काळात इतरांची सेवा करायला पुढे आलेल्या कित्येक लोकांनी आपला जीव गमावला. चायनामध्ये राहणाऱ्‍या लीटींग नावाच्या स्त्रीने एका कार ॲक्सिडेंटमध्ये आपल्या वडिलांना गमावलं. ती म्हणते, “एका चांगल्या व्यक्‍तीच्या बाबतीत असं कसं घडू शकतं, हे मला समजत नाही. माझे वडील खूप कष्टाळू, नम्र आणि प्रामाणिक होते. त्या कारमध्ये इतर जणही होते, पण तेच कसे गेले कळत नाही.”

जर सत्कर्मं करूनसुद्धा चांगल्या भविष्याची गॅरेंटी मिळत नसेल तर मग कशामुळे मिळेल? या प्रश्‍नाच्या उत्तरासाठी आपल्याला एका भरवश्‍यालायक मार्गदर्शनाची गरज आहे. मग ते कुठे मिळेल? याबद्दल जास्त माहिती आपल्याला पुढच्या लेखात दिली आहे.

a कन्फ्यूशियसच्या शिकवणीचा लोकांवर किती प्रभाव आहे हे जाणून घेण्यासाठी यहोवाच्या साक्षीदारांनी प्रकाशित केलेल्या मॅनकाईन्ड्‌स सर्च फॉर गॉड  या पुस्तकातला अध्याय ७, परिच्छेद ३१-३५ पाहा. हे पुस्तक www.jw.org या वेबसाईटवर उपलब्ध आहे.