यहूदा याचं पत्र

१ देवपित्याला प्रिय असलेले आणि येशू ख्रिस्तासाठी राखून ठेवलेले+ असे जे बोलावण्यात आलेले आहेत,+ त्यांना येशू ख्रिस्ताचा दास आणि याकोबचा भाऊ यहूदा+ याच्याकडून:

२ देवाची करुणा, शांती आणि प्रेम तुमच्यावर भरपूर प्रमाणात असो.

३ माझ्या प्रिय बांधवांनो, खरंतर आपल्या सगळ्यांच्या तारणाबद्दल तुम्हाला लिहायची माझी खूप इच्छा होती.+ पण त्याऐवजी, पवित्र जनांना सर्वकाळासाठी सोपवण्यात आलेल्या विश्‍वासाचं रक्षण करायचा तुम्ही आटोकाट प्रयत्न करावा, असं उत्तेजन या पत्राद्वारे तुम्हाला द्यायची मला गरज वाटली.+ ४ याचं कारण म्हणजे, शास्त्रवचनांप्रमाणे पूर्वीच न्यायदंडासाठी नेमलेली काही माणसं, नकळत आपल्यामध्ये शिरली आहेत. ही अधार्मिक माणसं देवाच्या अपार कृपेचं निमित्त देऊन निर्लज्ज वर्तन* करतात+ आणि आपला एकच मालक आणि प्रभू, येशू ख्रिस्त याचा विश्‍वासघात करतात.+

५ तुम्हाला या सगळ्या गोष्टी माहीतच आहेत. तरी, मला तुम्हाला आठवण करून द्यावीशी वाटते, की यहोवाने* इजिप्तमधून* आपल्या लोकांना वाचवलं असलं,+ तरी ज्यांनी विश्‍वास दाखवला नाही अशांचा त्याने नंतर नाश केला.+ ६ आणि ज्या स्वर्गदूतांनी आपल्या नेमलेल्या सेवेत टिकून राहण्याऐवजी आपलं योग्य निवासस्थान सोडून दिलं,+ अशांना त्याने त्याच्या मोठ्या दिवसाच्या न्यायदंडासाठी सर्वकाळाच्या बंधनांनी घोर अंधारात जखडून ठेवलं आहे.+ ७ तसंच, सदोम व गमोरा आणि त्यांच्या आसपासच्या शहरांतल्या लोकांनी मोठ्या प्रमाणात अनैतिक लैंगिक कृत्यं* केली आणि ते अनैसर्गिक शारीरिक वासनांच्या मागे लागले.+ सर्वकाळाच्या अग्नीचा न्यायदंड भोगलेली ही शहरं आपल्यासाठी इशारा देणारं एक उदाहरण आहे.+

८ इतकं असूनही, ही माणसं स्वप्नांत रमतात, शरीराला दूषित करतात, अधिकाराला तुच्छ लेखतात आणि देवाने ज्यांचा सन्मान केला आहे त्यांची निंदानालस्ती करतात.+ ९ प्रमुख स्वर्गदूत*+ मीखाएल+ याचा सैतानासोबत* मोशेच्या मृतदेहावरून वाद झाला,+ तेव्हा त्याने सैतानाविरुद्ध अपमानास्पद शब्दांत न्यायदंड घोषित करण्याचं धाडस केलं नाही.+ तर “यहोवा* तुझा न्याय करो,”* असं तो म्हणाला.+ १० पण ही माणसं, त्यांना समजत नसलेल्या सगळ्या गोष्टींबद्दल अपमानास्पद बोलतात;+ आणि बुद्धिहीन प्राण्यांप्रमाणे ज्या गोष्टी त्यांना उपजत बुद्धीने समजतात,+ त्या सगळ्या गोष्टींनी स्वतःला दूषित करत राहतात.

११ या माणसांची किती दुर्दशा होईल! कारण ती काइनच्या मार्गाने चालत आहेत+ आणि आपल्या फायद्यासाठी ती बलामच्या वाईट मार्गाचं अनुकरण करायला मागेपुढे पाहत नाहीत.+ शिवाय, कोरहप्रमाणे+ त्यांनी अधिकारपदावर असलेल्यांच्या विरोधात बोलून नाश ओढवून घेतला आहे.+ १२ तुमच्या मेजवान्यांमध्ये* तुमच्यासोबत खातपीत असलेली ही माणसं पाण्याखाली दडलेल्या खडकांसारखी आहेत.+ ती निर्लज्जपणे स्वतःचंच पोट भरणाऱ्‍या मेंढपाळांसारखी,+ वाऱ्‍याने वाहणाऱ्‍या कोरड्या ढगांसारखी;+ हंगामात फळ न देणाऱ्‍या, पूर्णपणे सुकलेल्या* आणि समूळ उपटलेल्या झाडांसारखी आहेत. १३ जशा बेफाम लाटा समुद्रातली घाण किनाऱ्‍यावर आणतात, तशी या माणसांची लज्जास्पद कामं उघड होतात;+ ज्यांच्यासाठी कायमचा काळाकुट्ट अंधार राखून ठेवला आहे, अशा भटकणाऱ्‍या ताऱ्‍यांसारखी ही माणसं आहेत.+

१४ आदामपासून सातव्या पिढीतला पुरुष हनोख+ यानेही त्यांच्याबद्दल अशी भविष्यवाणी केली: “पाहा! यहोवा* आपल्या लाखो पवित्र स्वर्गदूतांसोबत आला;+ १५ सर्वांचा न्याय करायला+ आणि पापी लोकांनी केलेल्या दुष्ट कामांमुळे आणि आपल्याविरुद्ध बोललेल्या सर्व धक्कादायक गोष्टींमुळे तो त्यांना दोषी ठरवायला आलाय.”+

१६ ही माणसं कुरकुर करतात,+ स्वतःच्या परिस्थितीबद्दल सतत तक्रार करतात, आपल्या वासनांप्रमाणे वागतात,+ मोठमोठ्या बढाया मारतात आणि स्वतःच्या फायद्यासाठी इतरांची वाहवा* करतात.+

१७ पण, माझ्या प्रिय बांधवांनो, तुम्ही आपला प्रभू येशू ख्रिस्त याच्या प्रेषितांनी पूर्वीच सांगून ठेवलेल्या गोष्टी* आठवा. १८ ते तुम्हाला सांगायचे: “शेवटल्या काळात, स्वतःच्या दुष्ट वासनांप्रमाणे चालणारी थट्टेखोर माणसं येतील.”+ १९ हीच माणसं फूट पाडतात+ आणि त्यांच्यात देवाची पवित्र शक्‍ती* नाही. ती फक्‍त शारीरिक गोष्टींचा विचार करतात.* २० पण, माझ्या प्रिय बांधवांनो तुम्ही आपला परमपवित्र विश्‍वास मजबूत करा आणि पवित्र शक्‍तीच्या मदतीने प्रार्थना करा.+ २१ आणि सर्वकाळाच्या जीवनासाठी आपल्या प्रभू येशू ख्रिस्ताच्या कृपेची वाट पाहत असताना,+ देवाच्या प्रेमात टिकून राहा.+ २२ तसंच, ज्यांच्या मनात शंका आहेत+ त्यांना दया दाखवत राहा.+ २३ त्यांना नाशाच्या आगीतून बाहेर ओढून काढा आणि वाचवा.+ पण, इतरांना दया दाखवत असताना सावधगिरी बाळगा आणि त्यांच्या वाईट कामांमुळे डागाळलेल्या कपड्यांचीही घृणा करा.+

२४ शेवटी, तुम्ही अडखळून पडू नये म्हणून जो गौरवशाली देव तुमचं रक्षण करायला आणि तुम्हाला आपल्यासमोर मोठ्या आनंदाने निष्कलंक असं उभं करायला समर्थ आहे,+ २५ त्या एकमेव तारणकर्त्या देवाला, आपला प्रभू येशू ख्रिस्त याच्याद्वारे गौरव, वैभव, सामर्थ्य आणि अधिकार पूर्वी, आता आणि पुढेही सदासर्वकाळ मिळत राहो. आमेन.