योहानला झालेलं प्रकटीकरण
१३ आणि तो* समुद्राच्या वाळूवर उभा राहिला.
आणि एक जंगली पशू+ समुद्रातून+ वर येताना मला दिसला. त्याला दहा शिंगं आणि सात डोकी होती आणि त्याच्या शिंगांवर दहा मुकुट होते. पण, त्याच्या डोक्यांवर देवाची निंदा करणारी नावं होती. २ मी जो जंगली पशू पाहिला तो एका चित्त्यासारखा होता, पण त्याचे पाय अस्वलाच्या पायांसारखे आणि तोंड सिंहाच्या तोंडासारखं होतं. अजगराने+ या पशूला आपली शक्ती, आपलं राजासन आणि मोठा अधिकार दिला.+
३ त्याच्या एका डोक्याला जणू जीवघेणी जखम झाल्याचं मला दिसलं; जखम जीवघेणी असली, तरी ती बरी झाली होती,+ आणि सगळं जग आश्चर्य करत त्या जंगली पशूच्या मागे गेलं. ४ त्यांनी अजगराची उपासना केली, कारण त्यानेच जंगली पशूला अधिकार दिला होता. आणि “जंगली पशूसारखं कोण आहे आणि त्याच्याशी कोण लढू शकेल?” असं म्हणत त्यांनी जंगली पशूचीही उपासना केली. ५ त्याला मोठमोठ्या गोष्टी बोलणारं आणि देवाची निंदा करणारं तोंड देण्यात आलं आणि ४२ महिने+ आपल्या मनासारखं वागण्याचा अधिकार त्याला देण्यात आला. ६ आणि त्याने आपलं तोंड उघडून देवाची, म्हणजे त्याच्या नावाची आणि त्याच्या निवासस्थानाची, इतकंच काय तर स्वर्गात राहणाऱ्यांचीही निंदा केली.+ ७ त्याला पवित्र जनांविरुद्ध लढण्याची आणि त्यांच्यावर विजय मिळवण्याची परवानगी देण्यात आली.+ तसंच त्याला प्रत्येक वंश, लोक, भाषा आणि राष्ट्र यांवर अधिकार देण्यात आला. ८ पृथ्वीवर राहणारे सर्व जण त्याची उपासना करतील. जगाच्या स्थापनेपासून, यांच्यापैकी एकाचंही नाव वधलेल्या कोकऱ्याच्या+ जीवनाच्या पुस्तकात*+ लिहिण्यात आलेलं नाही.
९ ज्याला कान आहे त्याने ऐकावं.+ १० जर कोणाला कैद केलं जाणार असेल, तर त्याला कैद केलं जाईल. जो कोणी एखाद्याला तलवारीने ठार मारेल,* त्याला तलवारीने ठार मारण्यात येईल.+ म्हणूनच, पवित्र जनांना+ धीराची+ आणि विश्वासाची+ गरज आहे.
११ मग, आणखी एक जंगली पशू पृथ्वीतून वर येताना मला दिसला. त्याला कोकऱ्यासारखी दोन शिंगं होती, पण तो अजगरासारखा बोलू लागला.+ १२ तो त्या पहिल्या जंगली पशूचा+ सर्व अधिकार त्याच्यासमोर चालवतो. आणि ज्याची जीवघेणी जखम बरी झाली होती, त्या पहिल्या जंगली पशूची उपासना करायला तो पृथ्वीला आणि तिच्या रहिवाशांना भाग पाडतो.+ १३ आणि तो मोठमोठी चिन्हं करतो; लोकांसमोर आकाशातून पृथ्वीवर अग्नीचा वर्षावही करतो.
१४ त्याला जंगली पशूसमोर जी चिन्हं घडवून आणण्याची परवानगी देण्यात आली होती, त्यांद्वारे तो पृथ्वीवर राहणाऱ्यांना फसवतो. त्यासोबतच, पृथ्वीवर राहणाऱ्यांना तो त्या जंगली पशूची मूर्ती बनवायलाही सांगतो,+ जो तलवारीचा घाव सोसूनसुद्धा वाचला होता.+ १५ आणि त्याला जंगली पशूच्या मूर्तीमध्ये श्वास फुंकण्याची परवानगी देण्यात आली. हे यासाठी, की जंगली पशूच्या मूर्तीने बोलावं आणि जे जंगली पशूच्या मूर्तीची उपासना करत नाहीत त्या सर्वांची हत्या घडवून आणावी.
१६ तो लहान-मोठे, गरीब-श्रीमंत, स्वतंत्र आणि गुलाम अशा सर्व लोकांना बळजबरी करतो. हे यासाठी, की त्यांनी आपल्या उजव्या हातावर किंवा आपल्या कपाळावर खूण करवून घ्यावी.+ १७ आणि ज्या व्यक्तीवर ती खूण, म्हणजे जंगली पशूचं नाव+ किंवा त्याच्या नावाची संख्या+ आहे, त्या व्यक्तीशिवाय कोणीही खरेदी किंवा विक्री करू नये. १८ ही गोष्ट समजून घेण्यासाठी बुद्धीची गरज आहे: ज्याच्याकडे सखोल समज आहे त्याने जंगली पशूच्या संख्येचा हिशोब करावा, कारण ती एका माणसाची संख्या* आहे, आणि त्याची संख्या ६६६ आहे.+