अनुवाद
२५ दोन माणसांमध्ये वाद झाला आणि ते न्यायाधीशांपुढे आले,+ तर न्यायाधीश त्यांचा न्याय करतील. ते नीतिमानाला निर्दोष आणि दुष्टाला दोषी ठरवतील.+ २ दुष्ट माणसाला फटक्यांची शिक्षा द्यायची असेल,+ तर न्यायाधीश त्याला पालथं पडायला सांगेल. मग न्यायाधीशासमोर त्या माणसाला फटके मारले जातील. त्याला किती फटके मारायचे, हे त्याने केलेल्या दुष्ट कामाच्या हिशोबाने ठरवावं. ३ त्याला जास्तीत जास्त ४० फटके मारले जावेत.+ त्यांपेक्षा जास्त मारू नयेत. नाहीतर, तुमच्या भावाचा तुमच्या डोळ्यांदेखत अपमान होईल.
४ धान्याची मळणी करणाऱ्या बैलाचं तोंड बांधू नका.+
५ भाऊभाऊ एकत्र राहत असतील, आणि त्यांच्यापैकी एकाचा मृत्यू झाला आणि त्याला मुलगा नसेल, तर त्याच्या बायकोने आपल्या कुटुंबाबाहेर कोणाशी लग्न करू नये. तिच्या दिराने तिच्याशी लग्न करून, दिराचं कर्तव्य पूर्ण करावं.+ ६ त्याच्यापासून तिला जो पहिला मुलगा होईल, तो त्याच्या मेलेल्या भावाचं नाव पुढे चालवेल.+ अशा रितीने त्या मेलेल्या भावाचं नाव इस्राएलमधून पुसलं जाणार नाही.+
७ पण जर त्याला आपल्या वहिनीशी लग्न करायचं नसेल, तर तिने शहराच्या फाटकाजवळ वडीलजनांकडे जावं आणि म्हणावं, ‘माझा दीर आपल्या भावाचं नाव इस्राएलमध्ये पुढे चालवायला तयार नाही. त्याने माझ्याशी लग्न करून दिराचं कर्तव्य पूर्ण करायला नकार दिलाय.’ ८ मग त्याच्या शहराच्या वडीलजनांनी त्याला बोलावून समजवावं. पण तरी तो असं ठामपणे म्हणाला, की ‘मला तिच्याशी लग्न करायचं नाही,’ ९ तर त्याच्या वहिनीने वडीलजनांसमोर त्याच्याजवळ जाऊन त्याच्या पायातला जोडा काढावा+ आणि त्याच्या तोंडावर थुंकून असं म्हणावं, ‘जो आपल्या भावाचा वंश चालवणार नाही त्याच्यासोबत असंच करावं.’ १० तेव्हापासून इस्राएलमध्ये त्याच्या कुटुंबाचं नाव,* ‘पायातला जोडा काढलेल्याचं कुटुंब,’ असं पडेल.
११ दोन माणसं एकमेकांशी मारामारी करत असताना, त्यांच्यापैकी एकाची बायको आपल्या नवऱ्याला मारणाऱ्यापासून वाचवण्यासाठी मध्ये पडली आणि तिने आपल्या हाताने त्या माणसाची गुप्तांगं पकडली, १२ तर तिचा हात कापून टाका. तुम्ही* तिला दयामाया दाखवू नका.
१३ तुमच्या थैलीत एकाच मापासाठी, एक मोठं आणि एक लहान अशी दोन वेगवेगळी वजनं ठेवू नका.+ १४ तसंच, तुम्ही आपल्या घरात एकाच मापासाठी एक मोठं आणि एक लहान अशी दोन वेगवेगळी भांडी* ठेवू नका.+ १५ तुम्ही अचूक आणि प्रामाणिक वजनं व मापं वापरा, म्हणजे तुमचा देव यहोवा जो देश तुम्हाला देणार आहे, त्यात तुम्हाला भरपूर आयुष्य लाभेल.+ १६ कारण बेइमानीची कामं करणाऱ्या माणसाची, तुमचा देव यहोवा याला घृणा वाटते.+
१७ तुम्ही इजिप्तमधून बाहेर निघालात, तेव्हा अमालेकी लोक तुमच्याशी कसे वागले हे विसरू नका.+ १८ त्यांनी तुम्हाला मार्गात गाठलं आणि तुमच्यापैकी जे थकूनभागून मागे राहिले होते, त्या सर्वांवर त्यांनी हल्ला केला. त्यांनी देवाचं भय मानलं नाही. १९ म्हणून, तुमचा देव यहोवा जेव्हा आसपासच्या राष्ट्रांतल्या तुमच्या सर्व शत्रूंपासून तुम्हाला विश्रांती देईल आणि जेव्हा तुमचा देव यहोवा याने तुम्हाला वारसा म्हणून दिलेल्या देशाचा तुम्ही ताबा घ्याल,+ तेव्हा तुम्ही आकाशाखालून अमालेकी लोकांचं नामोनिशाण मिटवून टाका.+ विसरू नका.