अनुवाद
१४ तुम्ही तुमचा देव यहोवा याची मुलं आहात. म्हणून एखाद्या मेलेल्या माणसासाठी आपल्या शरीरावर वार करून घेऊ नका+ किंवा आपल्या भुवया काढू नका.*+ २ कारण तुम्ही तुमचा देव यहोवा याच्या नजरेत एक पवित्र राष्ट्र आहात.+ तुमचा देव यहोवा याने तुम्हाला स्वतःचे लोक, म्हणजेच आपली खास प्रजा* होण्यासाठी, पृथ्वीच्या पाठीवर असलेल्या इतर सर्व राष्ट्रांमधून निवडलं आहे.+
३ तुम्ही कोणतीही किळसवाणी गोष्ट खाऊ नका.+ ४ तुम्ही हे प्राणी खाऊ शकता:+ बैल, मेंढा, बकरा, ५ हरीण, सांबर, भेकर, रानबकरी, काळवीट, रानमेंढा आणि डोंगरांतला मेंढा. ६ ज्याचे खूर दुभागलेले आहेत आणि जो रवंथ करतो असा प्रत्येक प्राणी तुम्ही खाऊ शकता. ७ पण जे फक्त रवंथ करतात किंवा ज्यांचे फक्त खूर दुभागलेले आहेत, त्यांपैकी हे प्राणी तुम्ही खाऊ नका: उंट, ससा आणि बिजू,* कारण ते रवंथ तर करतात, पण त्यांचे खूर दुभागलेले नसतात. ते तुमच्यासाठी अशुद्ध आहेत.+ ८ त्याचप्रमाणे डुक्करही खाऊ नका, कारण त्याचे खूर दुभागलेले असतात, पण ते रवंथ करत नाही. ते तुमच्यासाठी अशुद्ध आहे. यांपैकी कोणत्याही प्राण्याचं मांस खाऊ नका किंवा त्याच्या मेलेल्या शरीराला स्पर्शही करू नका.
९ पाण्यातल्या जीवजंतूंपैकी ज्यांना पंख आणि खवले आहेत असे कोणतेही प्राणी तुम्ही खाऊ शकता.+ १० पण ज्याला पंख आणि खवले नाहीत, असा कोणताही जीव तुम्ही खाऊ नका. तो तुमच्यासाठी अशुद्ध आहे.
११ तुम्ही कोणताही शुद्ध पक्षी खाऊ शकता. १२ पण तुम्ही हे पक्षी खाऊ नका: गरुड, काळं गिधाड, मासेमारी घार,*+ १३ लाल घार, काळी घार आणि सर्व प्रकारच्या घारी. १४ सर्व प्रकारचे कावळे, १५ शहामृग, घुबड, कुरव,* सर्व प्रकारचे ससाणे, १६ पिंगळा,* लांब कानांचं घुबड, हंस, १७ पाणकोळी, गिधाड, करढोक,* १८ करकोचा, सर्व प्रकारचे बगळे, हुदहुद* आणि वटवाघूळ. १९ पंख असलेला व घोळक्यात राहणारा प्रत्येक जीवसुद्धा* तुमच्यासाठी अशुद्ध आहे. तुम्ही तो खाऊ नका. २० कोणताही उडणारा शुद्ध जीव तुम्ही खाऊ शकता.
२१ मेलेल्या स्थितीत सापडलेला कोणताही प्राणी तुम्ही खाऊ नका.+ तुम्ही तो तुमच्या शहरांमध्ये* राहणाऱ्या विदेश्याला देऊ शकता किंवा त्याला विकू शकता. तो विदेशी तो प्राणी खाऊ शकतो. कारण तुम्ही तुमचा देव यहोवा याच्या नजरेत एक पवित्र राष्ट्र आहात.
तुम्ही बकरीच्या पिल्लाला त्याच्या आईच्या दुधात उकळू नका.+
२२ तुम्ही पेरलेल्या बियांपासून तुमच्या शेतात दरवर्षी जे काही उगवेल, त्याचा दहावा भाग* तुम्ही न चुकता द्या.+ २३ तुमचा देव यहोवा आपल्या नावाच्या गौरवासाठी जे ठिकाण निवडेल, तिथे तुम्ही त्याच्यासमोर आपल्या धान्याचा, नवीन द्राक्षारसाचा आणि तेलाचा दहावा भाग, तसंच, तुमच्या गुराढोरांच्या वा मेंढराच्या कळपात पहिल्या जन्मलेल्या प्राण्यांचं मांस खा;+ म्हणजे तुम्ही तुमचा देव यहोवा याचं नेहमी भय मानायला शिकाल.+
२४ पण तुमचा देव यहोवा आपल्या नावाच्या गौरवासाठी जे ठिकाण निवडेल, ते फार दूर असेल आणि जर तुम्ही तुमचा देव यहोवा याच्या आशीर्वादामुळे तुम्हाला मिळालेला उपज तिथपर्यंत नेऊ शकत नसला,+ २५ तर तो भाग विका आणि मिळालेले पैसे घेऊन, तुम्ही तुमचा देव यहोवा याने निवडलेल्या ठिकाणी जा. २६ मग तुम्ही त्या पैशांनी गुरंढोरं, मेंढरं, बकऱ्या, द्राक्षारस आणि इतर मद्य, यांपैकी तुमची इच्छा असेल त्या वस्तू विकत घ्या; त्या तुमचा देव यहोवा याच्यासमोर आपल्या घराण्यासोबत खा आणि आनंद करा.+ २७ पण तुमच्या शहरांत राहणाऱ्या लेव्यांना विसरू नका,+ कारण त्यांना तुमच्यासोबत जमिनीचा वाटा किंवा वारसा देण्यात आलेला नाही.+
२८ दर तीन वर्षांनी तुम्ही त्या वर्षाच्या तुमच्या उत्पन्नातला संपूर्ण दहावा भाग आणून, तो तुमच्या शहरांमध्ये जमा करा;+ २९ म्हणजे तुमच्या शहरांत राहणारे विदेशी, अनाथ मुलं,* विधवा, तसंच ज्यांना तुमच्यासोबत जमिनीचा वाटा किंवा वारसा देण्यात आलेला नाही ते लेवी येऊन पोटभर खातील,+ आणि यामुळे तुमचा देव यहोवा तुमच्या सगळ्या कामांमध्ये तुम्हाला आशीर्वाद देईल.+