लेवीय
१७ यहोवा मोशेला पुढे म्हणाला: २ “अहरोनला, त्याच्या मुलांना, तसंच सर्व इस्राएली लोकांना सांग, ‘यहोवाने अशी आज्ञा दिली आहे:
३ जर इस्राएलच्या घराण्यातल्या कोणत्याही माणसाने छावणीत किंवा छावणीबाहेर एखादा बैल, मेंढा किंवा बकरा कापला; ४ आणि जर त्याने तो भेटमंडपाच्या प्रवेशाजवळ, यहोवाच्या उपासना मंडपासमोर, यहोवासाठी अर्पण म्हणून आणला नाही, तर त्याला रक्तदोष लागेल. त्याने रक्त सांडलं आहे म्हणून त्या माणसाला ठार मारलं जावं. ५ हे यासाठी की, इस्राएली लोकांनी यापुढे रानात बलिदानं अर्पण न करता, ती यहोवासाठी, भेटमंडपाच्या प्रवेशाजवळ याजकाकडे आणावीत. त्यांनी ती शांती-अर्पणं म्हणून यहोवाला अर्पण करावीत.+ ६ याजक भेटमंडपाच्या प्रवेशाजवळ यहोवाच्या वेदीवर रक्त शिंपडेल व चरबी जाळेल आणि या सुवासाने यहोवाला आनंद होईल.*+ ७ ते अविश्वासू होऊन ज्या बकऱ्यांसारख्या दैवतांची* उपासना करत आहेत,*+ त्या दैवतांना यापुढे त्यांनी बलिदानं अर्पण करू नयेत.+ हा तुमच्यासाठी पिढ्या न् पिढ्या एक कायमचा नियम असेल.’
८ त्यांना असं सांग, ‘जर इस्राएलच्या घराण्यातल्या कोणत्याही माणसाने किंवा तुमच्यामध्ये राहणाऱ्या कोणत्याही विदेश्याने होमार्पण किंवा बलिदान दिलं, ९ आणि जर त्याने ते यहोवाला अर्पण करण्यासाठी भेटमंडपाच्या प्रवेशाजवळ आणलं नाही, तर त्याला ठार मारलं जावं.+
१० जर इस्राएलच्या घराण्यातल्या एखाद्या माणसाने किंवा तुमच्यामध्ये राहणाऱ्या एखाद्या विदेश्याने, कोणत्याही प्रकारचं रक्त खाल्लं,+ तर मी रक्त खाणाऱ्या त्या माणसाला* नाकारीन आणि त्याला ठार मारीन. ११ कारण प्राण्याचा जीव* त्याच्या रक्तात आहे+ आणि तुम्ही आपल्यासाठी* वेदीवर+ प्रायश्चित्त करावं, म्हणून मी ते तुम्हाला दिलं आहे. रक्तात जीवन* असल्यामुळे रक्तानेच प्रायश्चित्त होतं.+ १२ म्हणूनच मी इस्राएली लोकांना सांगितलं आहे: “तुमच्यापैकी कोणीही* रक्त खाऊ नये आणि तुमच्यामध्ये राहणाऱ्या कोणत्याच विदेश्यानेही+ रक्त खाऊ नये.”+
१३ एखाद्या इस्राएली माणसाने किंवा तुमच्यामध्ये राहणाऱ्या एखाद्या विदेश्याने शिकार करून, खाण्यासाठी असलेला एखादा जंगली प्राणी किंवा पक्षी पकडला, तर त्याने त्याचं रक्त जमिनीवर ओतावं+ आणि मातीने झाकावं. १४ कारण रक्तात जीवन* असल्यामुळे, प्रत्येक प्राण्याचं रक्त म्हणजेच त्याचं जीवन* आहे. म्हणूनच मी इस्राएली लोकांना असं सांगितलं आहे: “कोणत्याही प्रकारचं रक्त खाऊ नका, कारण प्रत्येक प्राण्याचं रक्त म्हणजेच त्याचं जीवन आहे आणि जो कोणी रक्त खाईल त्याला ठार मारलं जाईल.”+ १५ जर कोणीही,* मग तो देशातला रहिवासी असो किंवा विदेशी, जर त्याने मेलेल्या स्थितीत सापडलेल्या किंवा एखाद्या जंगली जनावराने फाडून टाकलेल्या प्राण्याचं मांस खाल्लं,+ तर त्याने आपले कपडे धुवावेत, अंघोळ करावी आणि संध्याकाळपर्यंत अशुद्ध राहावं;+ मग तो शुद्ध होईल. १६ पण जर त्याने कपडे धुतले नाहीत आणि अंघोळ केली नाही तर त्याला त्याच्या चुकीची शिक्षा मिळेल.’”+