यहेज्केल
२ तो मला म्हणाला: “मनुष्याच्या मुला!* उठून उभा राहा, म्हणजे मी तुझ्याशी बोलेन.”+ २ तो माझ्याशी बोलला, तेव्हा पवित्र शक्ती* माझ्यामध्ये आली आणि तिने मला माझ्या पायांवर उभं केलं.+ त्यामुळे जो माझ्याशी बोलत होता त्याचं बोलणं मी ऐकू शकलो.
३ मग तो मला म्हणाला: “मनुष्याच्या मुला, मी तुला इस्राएली लोकांकडे पाठवतोय;+ मी तुला त्या बंडखोर राष्ट्रांकडे* पाठवतोय ज्यांनी माझ्याविरुद्ध बंड केलंय.+ त्यांच्या वाडवडिलांसारखंच ते आजपर्यंत माझ्याविरुद्ध अपराध करत आलेत.+ ४ मी तुला मगरूर आणि कठोर मनाच्या लोकांकडे पाठवतोय.+ त्यांच्याशी बोलताना, ‘सर्वोच्च प्रभू यहोवा असं म्हणतो’ असं बोलून सुरुवात कर. ५ खरंतर ते बंडखोर घराणं आहे.+ त्यामुळे ते तुझं ऐकोत किंवा न ऐकोत, पण त्यांना निदान एवढं तरी समजेल, की त्यांच्यामध्ये एक संदेष्टा होता.+
६ हे मनुष्याच्या मुला, तुझ्या अवतीभवती काटेरी झुडपं आणि काटेकुटे जरी असले*+ आणि तू विंचवांमध्ये जरी राहत असलास, तरी त्यांना भिऊ नकोस.+ त्यांच्या बोलण्यामुळे घाबरू नकोस. ते एक बंडखोर घराणं आहे. ते जे बोलतात त्यामुळे घाबरून जाऊ नकोस.+ त्यांच्या चेहऱ्यावरचे भाव पाहून भिऊ नकोस.+ ७ ते बंडखोर लोक आहेत. ते तुझं ऐकोत किंवा न ऐकोत, पण मी जो संदेश तुला सांगितलाय तो जाऊन त्यांना सांग.+
८ मनुष्याच्या मुला, मी तुला जे सांगतोय त्याकडे लक्ष दे. तू या बंडखोर घराण्यासारखं बंडखोर होऊ नकोस. आता आपलं तोंड उघड आणि मी तुला जे देतोय ते खा.”+
९ मग, मी एक हात माझ्याकडे येताना पाहिला.+ त्या हातात एक गुंडाळी होती आणि त्या गुंडाळीवर काहीतरी लिहिलेलं होतं.+ १० त्याने ती गुंडाळी माझ्यासमोर उघडून ठेवली, तेव्हा मी पाहिलं की गुंडाळीच्या मागे आणि पुढे अशा दोन्ही बाजूंवर लिहिलेलं होतं.+ त्यावर शोकगीतं, दुःख आणि आक्रोश यांबद्दल लिहिलेलं होतं.+