स्तोत्र

९१ जो सर्वोच्च देवाच्या गुप्त ठिकाणी आश्रय घेतो,+

तो सर्वसमर्थाच्या सावलीत राहील.+

 २ मी यहोवाला म्हणीन: “तू माझा आश्रय, माझा दुर्ग आहेस,+

तू माझा देव आहेस, तुझ्यावर मी भरवसा ठेवतो.”+

 ३ कारण तो तुला फासेपारध्याच्या सापळ्यापासून;

जीवघेण्या रोगापासून वाचवेल.

 ४ तो आपल्या पंखांनी तुला झाकेल

आणि त्याच्या पंखांखाली तुला संरक्षण मिळेल.+

त्याचा विश्‍वासूपणा+ तुझ्यासाठी मोठ्या ढालीसारखा+

आणि संरक्षण देणाऱ्‍या भिंतीसारखा* असेल.

 ५ तुला रात्रीच्या वेळी घडणाऱ्‍या भयानक गोष्टींची,+

किंवा दिवसा सुटणाऱ्‍या बाणाची भीती वाटणार नाही.+

 ६ काळोखात पाठलाग करणाऱ्‍या साथीच्या रोगाला,

किंवा भरदुपारी होणाऱ्‍या नाशाला तू भिणार नाहीस.

 ७ तुझ्या बाजूला हजार माणसं

आणि तुझ्या उजव्या हाताला दहा हजार माणसं मरून पडतील,

पण तुझ्यावर मात्र यांपैकी कोणतंही संकट येणार नाही.+

 ८ तू फक्‍त आपल्या डोळ्यांनी हे पाहशील;

दुष्टांना तुझ्या डोळ्यांदेखत शिक्षा* मिळालेली तू पाहशील.

 ९ कारण “यहोवा माझा आश्रय आहे,” असं तू म्हणालास;

सर्वोच्च देवाला तू आपलं निवासस्थान* मानलं आहेस.+

१० तुझ्यावर कोणतंही संकट कोसळणार नाही+

आणि कोणतीही पीडा तुझ्या तंबूजवळ येणार नाही.

११ कारण तू जिथेही जाशील, तिथे तुझं संरक्षण करावं,+

अशी तो आपल्या स्वर्गदूतांना+ तुझ्याबद्दल आज्ञा देईल.

१२ तुझ्या पायाला दगडाची ठेच लागू नये,+

म्हणून ते तुला आपल्या हातांवर उचलून घेतील.+

१३ तू तरुण सिंहावर आणि नागावर पाय देशील;

तू आयाळ असलेल्या सिंहाला आणि मोठ्या सापाला पायांखाली तुडवशील.+