Bõe la Biiblã yet zabrã sẽn be Moyẽnoriyã wã wɛɛngẽ?

Dũniyã gill zugu, neb wʋsg maanda yɩɩr zabr sẽn be Etazĩni ne Israyɛll la Irã sʋkã yĩnga. Rẽ n so tɩ y tõe n sok y mens yaa: Zabrã na n yãngame hal tɩ tẽns a taab kẽes b toog a pʋgẽ bɩ? Goosneema-rãmbã tõe n kɩtame tɩ zabã sa, tɩ laafɩ zĩnd tẽngã gill zug bɩ?

Neb nins sẽn karem Biiblã bãngr-goam nins sẽn be Vẽnegr sebrã pʋgẽ wã tõe n sokda b mense, sã n yaa Armagedõ zabrã sɩngr la d sẽn ne Moyẽnoriyã wã.

Bõe la Biiblã yet rẽ wɛɛngẽ?

Goosneema-rãmbã tõe n kɩtame tɩ zabrã sa Moyẽnoriyã bɩ?

Biiblã yetame yaa: “Ra teeg-y nanambse, wall ninsaalb sẽn pa tõe n wa ne fãagrã ye.”—Yɩɩn-sõamyã 146:3.

D pa mi goosneema-rãmbã sã n na n wa tõog n kɩtame tɩ laafɩ zĩnd Moyẽnoriyã tẽnsã ne taab sʋk ye. La Biiblã wilgda vẽeneg tɩ politik taoor dãmbã, ninsaalbã goosneema-rãmbã wall ned baa a ye pa tõe n kɩt tɩ zabr sa, tɩ laafɩ zĩnd tẽngã gill zug ye. Wẽnnaam bal n tõe n kɩt tɩ “zab sa dũniyã gill fãa.”—Yɩɩn-sõamyã 46:9.

• Y sã n dat n bãng n paas bɩ y karem Gũusg Gasgã sõsg ning gom-zug sẽn yaa: “Zabã na n saame: Wãn to?”

Zabrã sẽn be Moyẽnoriyã wã pidsda Biiblã bãngr-gomd bɩ?

Biiblã yetame yaa: “Yãmb na n wʋma zab rãamde, la y wʋm tɩ b gomd zab yelle. . . . Buud na n yika zabr ne buud a to, tɩ rĩung yik zabr ne rĩung a to.”—Matiye 24:6, 7.

Zabrã sẽn be Moyẽnoriyã wã naaga bũmb nins sẽn wilgd “tɩ dũniyã rabda a saabẽ,” la tɩ d vɩɩ “yaoolem wakatã.” (Matiye 24:3; 2 Tɩmote 3:1) Zabã sẽn be dũniyã gill zug rũndã-rũndã wã wilgdame tɩ ka la bilfu, Wẽnnaam na n kɩtame tɩ zabã la zu-loees a taabã sẽn namsd ninsaalbã sa.

• Y sã n dat n bãng n paas bɩ y karem sõsg ning gom-zug sẽn yaa: “‘Yaoolem wakatã’ bɩ ‘dũniyã saab’ bãndã yaa bõe?”

Armagedõ zabrã na n sɩnga Moyẽnoriyã bɩ?

Biiblã yetame yaa: “B tigma rĩm-dãmbã zĩig b sẽn boond ne Ebre tɩ Armagedõ.”—Vẽnegre 16:16.

Armagedõ zabrã pa na n sɩng Moyẽnoriyã ye. Yaa zabr sẽn na n zĩnd ninsaalbã goosneema-rãmbã ne Wẽnnaam sʋka.

• Y sã n dat n bãng n paas bɩ y karem sõsg ning gom-zug sẽn yaa: “Armagedõ zabrã yaa bõe?”

Bõe n tõe n sõng tõnd tɩ d yam gãand bãan toog wakate?

Biiblã yetame yaa: “Da maan-y yɩɩr baa fʋɩ poorẽ ye. La bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã.”—Filip rãmbã 4:6.

A Zeovaa ratame tɩ d pʋʋs-a. A na n kelga d pʋʋsgã la a sõng-d tɩ d yam gãand bãane, bala a geta tõnd yelle. (1 Pɩyɛɛr 5:7) Bũmb a ye a sẽn maand n sõngd tõnd yaa a sẽn wilgd tõnd bũmb nins sẽn kɩt tɩ zabã ket n beẽ wã. A leb n wilga a sẽn na n maan to-to tɩ zabã, namsgã la toogã sa.—Vẽnegre 21:3, 4.

• Y sã n dat n bãng n paas Wẽnnaam sẽn sõngd tõnd to-to wã zugu, bɩ y karem sõsg ning gom-zug sẽn yaa: “M tõe n yãa belsg goam Biiblã pʋgẽ bɩ?”