Yɩ kiris-ned rat n yeelame tɩ bõe? Bõe la Biiblã yet rẽ wɛɛngẽ?

Rũndã-rũndã, neb wʋsg yetame tɩ b yaa kiris-nebã. La b manesmã pa wilgd rẽ ye. Wala makre, b yaa yão-be-neba, zãmb dãmb la wẽnem-dãmba. B kẽer me zãmbda b pagbã wall b sɩdbã. Woto fãa kɩtame tɩ neb kẽer sokd b mens yaa: ‘Yɩ kiris-ned sɩd rat n yeelame tɩ bõe?’

Yɩ kiris-ned sɩd rat n yeelame tɩ bõe?

Yaa nana tɩ ned yeel t’a yaa kiris-neda. La yeel tɩ f yaa kiris-ned bal pa sek ye. Biiblã wilgame tɩ kiris-ned yaa ned sẽn yaa a Zeezi Kirist karen-biiga. (Tʋʋma 11:26) A Zeezi meng yeelame yaa: “Yãmb sã n kell n sak mam goamã, yãmb sɩd yaa mam karen-biisi.” (Zã 8:31) Yaa vẽeneg tɩ ned baa a ye pa tõe n tũ a Zeezi goamã kɛpɩ ye. La kiris-ned modgd n tũuda a Zeezi goamã a vɩɩmã nens fãa pʋgẽ. Bɩ d ges bũmb a wãn kiris-ned sẽn segd n maane.

Kiris-nebã nonga b taaba

A Zeezi yeelame: “Mam kõta yãmb tõ-paalga: Bɩ y nong taaba. Nong-y taab wa mam sẽn nong yãmb to-to wã. Yãmb sã n nong taaba, nebã fãa na n bãngame tɩ yãmb yaa mam karen-biisi.”—Zã 13:34, 35.

A Zeezi sẽn maane: A Zeezi ra nonga neba fãa. A ra pa get b tarem wall b sẽn yitẽ ye. A sãooga bãad-rãmba, n rɩlg neb la a sak meng n kõ a vɩɩmã neb a taabã yĩnga.—Matiye 14:14-21; 20:28.

Kiris-nebã sẽn maande: Kiris-nebã wilgdame tɩ b nonga b taabã n kõt-b sugri, n yaa kõatb la b pa bakd ned n sõng ye. B sõngda neb nins sẽn dat sõngrã, la b sakd n mongd b mens bũmb wʋsg b taabã yĩnga.—1 Zã 3:16.

Kiris-nebã yaa pʋ-peelem dãmba

A Zeezi yeelame: “Yaa maam la . . . sɩdã.”—Zã 14:6.

A Zeezi sẽn maane: A Zeezi goamã la a tʋʋm-tʋmdɩ wã fãa wilgame tɩ b ra tõe n kɩs-a-la sɩda. A zɩ n maan sɩlem n belg nebã sẽn na yɩl tɩ b maan a sẽn datã, wall n kɩt tɩ b tẽ goam sẽn pa sɩd ye. Nebã ra miime t’a yaa sɩd soaba. A ra togsda sɩda, baa a sã n da mi tɩ tõe n wa ne yelle.—Matiye 22:16; 26:63-67.

Kiris-nebã sẽn maande: Kiris-nebã pa yagd ziri ye. B yaooda b lampo-rãmba, b pa zuud me ye. B tʋmda sõma b tʋʋmã zĩigẽ. (Rom dãmbã 13:5-7; Efɛɛz rãmbã 4:28) B pa yagd ziri sẽn na yɩl n paam bũmb kẽere, wall n maan zãmb ɛgzame sasa ye. B leb n pa yagd ziri minim nins b sẽn tarã bɩ bũmb a taab wɛɛngẽ sẽn na yɩl n paam tʋʋmd wall bũmb a to ye.—Ebre-rãmbã 13:18.

Kiris-nebã yaa maan-neer dãmba

A Zeezi yeelame: “Bɩ y wa mam nengẽ, yãmb fãa sẽn yɛ la sẽn tʋk zɩɩbo, la mam na bels yãmba. Rɩk-y mam yubl-balgdgã n pidi, la y rɩk yam mam nengẽ, bala mam yaa sũ-maasem soab la sik-m-meng soaba. Dẽ, y na paam yolsgo. Bala mam yubl-balgdgã yaa bʋgsgo, tɩ m zɩɩbã yaa faasga.”—Matiye 11:28-30.

A Zeezi sẽn maane: A Zeezi ra yaa ned pẽnegr sẽn yaa nana la sũ-bʋgsem soaba. A ra sakdame tɩ kamb wat a nengẽ. A ra belsda sũ-sãams rãmba, la a waoogd neba me.—Mark 10:13-15; Luk 9:11.

Kiris-nebã sẽn maande: B gomda ne b taabã ne bʋgsem la pa ne toolem ye. (Efɛɛz rãmbã 4:29, 31, 32) Neb a taabã yell pak-b lame, tɩ b baood segb buud toor-toor n na n sõng-ba.—Galat-rãmbã 6:10.

Kiris-nebã maanda sɩd b kãadem pʋgẽ

A Zeezi yeelame: “Bũmb nins Wẽnnaam sẽn lagem taabã, bɩ ned ra welg-b ye.”—Mark 10:9.

A Zeezi sẽn maane: Baa a Zeezi sẽn pa kẽ kãadmã, a sagla sẽn kẽ-b kãadmã tɩ b maand sɩd ne taaba. (Matiye 19:9) A wilgame tɩ b segd n gũusa ne bũmb nins sẽn tõe n sãam b kãadmã.—Matiye 5:28.

Kiris-nebã sẽn maande: Kiris-neb nins sẽn kẽ kãadmã zãagda b mens ne bũmb ning fãa sẽn tõe n kɩt tɩ kãadem pa tall waoogrã. (Ebre-rãmbã 13:4) B wilgdame tɩ b nonga taab la b waoogd taaba.—Efɛɛz rãmbã 5:28, 33.