Koe-noog sẽn be Wẽnnaam Gomdã pʋgẽ: Neb nins sẽn zoe n bas b zagsã tõe n tẽe manegre

Yʋʋmd fãa neb milyõ-rãmb n zoet n basd b zagse. Yell a woto buud namsda yãmb bɩ? Sã n yaa woto, bɩ y bas y yam tɩ ne a Gomdã maasem, Wẽnnaam sõngd-y lame tɩ y tẽ tɩ beoog na n yɩ neere.

A Christos Stylianides sẽn tʋmd Iniyõ eropeyɛnnãa yeelame yaa: “Neb nins sẽn zoe n bas b tẽngã rata sõng-vẽenega. La pa rẽ bal ye. B ratame me tɩ d sõng-b tɩ b bãng tɩ beoog na n yɩɩ neereb.” Sɩd me, yaa nana ne neb nins sẽn tẽed manegrã tɩ b maoo ne zu-loees nins b sẽn paamdã. La neb nins sẽn zoe n bas b zagsã ratame me tɩ b bels-b bũmb nins sẽn paam-bã yĩnga.

“Yɩɩ tɩlɛ tɩ m zoe n yi d tẽngã n bas m zakã rãmba. M zakã rãmb sẽn da pa be ne maamã ra yaa toog ne maam. Rabeem ra mi n yõk-m lame, m sũurã ra sãamdame tɩ m da maand yɩɩr me.”—A Emmanuel, Haiti.

Yãmb me bee yell a woto buud pʋgẽ bɩ? Yãmb sã n zoee n basa y zakã, yaa vẽeneg tɩ y na n datame tɩ b sõng-y tɩ paam belsg la y tẽ manegre. Wãn to la Biiblã sẽn yaa Wẽnnaam Gomdã tõe n sõng-yã?

Belsg ning Wẽnnaam Gomdã sẽn kõte

Biiblã yetame yaa: “A Zeovac . . . nonga sãana.”—Tõodo 10:17, 18.

Biiblã yetame yaa: “A Zeova pẽe neb nins fãa sẽn boond-a wã.”—Yɩɩn-sõamyã 145:18.

Biiblã yetame yaa: “Wẽnnaam pa tol n tõe n maan sẽn yaa wẽng ye. . . Sẽn-tõe-a-fãa wã pa kaood bʋʋd kɛgr ye.”—Zoob 34:10, 12.

Woto rat n yeelame tɩ pa Wẽnnaam n kɩt tɩ y namsd ye. A pa sɩbgd yãmb bũmb y sẽn maand yĩnga, wall a kɩt tɩ y vɩɩmã lebg toog sẽn na yɩl n mak-y ye.

Wẽnnaam Gomdã kɩtame tɩ d tẽed manegre

Biiblã wilgda bũmb ning Wẽnnaam sẽn na n maan beoog sẽn wate. Bɩ y ges rẽ sẽn sõng sẽn zoe-b n bas b tẽngã to-to.

Biiblã yetame yaa: “Wẽnnaam na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye.”—Vẽnegre 21:4.

Woto rat n yeelame tɩ namsgã na n wa saame. Wẽnnaam pʋlmame t’a na n kɩtame tɩ zu-loees nins fãa sẽn kɩt tɩ y pa le tẽed manegr rũndã-rũndã wã sa.

“Ka la bilfu, Wẽnnaam na n kɩtame tɩ yel-kɛgã la wẽng buud fãa sa. Woto sõngda maam tɩ m tagsd wakat ning namsgã sẽn na n wa sa wã zug n tɩ yɩɩda.”—A Karla, Salvador.

Biiblã yetame yaa: “B pa na n tẽeg pĩnd yɛlã yelle, la bõn-kãens pa na n rãms sũur me ye.”—Ezayi 65:17.

Woto rat n yeelame tɩ d pa na n le tẽeg bũmb nins sẽn sãamd d sũurã yell ye. D tõe n basa d yam tɩ Wẽnnaam na n wa kɩtame tɩ d ra le tẽeg bũmb nins sẽn nams tõndã yell ye.

“Biiblã wilgame tɩ d pa na n le tẽegd tood nins d sẽn paamã, la bũmb nins d sẽn bõnã yell ye. Woto sõngda maam tɩ m maood ne zu-loees nins m sẽn segdã, bala m miime tɩ yɛlã na n wa toeemame.”—A Natalia, Ikrɛn.

Biiblã yetame: “Saasẽ Wẽnnaamã na n lugla rĩung . . . A na n wãa rĩun-kãensã fãa, n kɩt tɩ b meneme.”—Dãniyɛll 2:44.

Woto rat n yeelame tɩ Wẽnnaam na n lugla goosneema sẽn yaa sõma sẽn na n dɩ naam tẽngã zugu. Wẽnnaam na n ledga ninsaalbã goosneema-rãmbã ne goosneema sẽn be saasẽ. Goosneema-kãng na n wa kɩtame tɩ laafɩ hakɩɩka, bãane, tɩrlem la sũ-noog zĩnd tẽngã gill zugu.—Mise 4:3, 4.

“Mam sẽn bãng tɩ Wẽnnaam Rĩungã na n wa kɩtame tɩ bu-welsgã, wẽgbã, la neb sẽn pa basd b yam ne b taabã na n saame wã, kengda m raoodo.”—A Mustafa, Moyẽnoriyã.

Biiblã saglsã sẽn tõe n sõng-y to-to

Biiblã saglsã tõe n sõng-y lame tɩ y tall yam-sõng n tõog n mao ne zu-loees nins y sẽn paamã. A tõe n sõng-y lame tɩ tõog n vɩɩmd ne y yɛlã sẽn yaa to-to masã wã baa y sẽn bõn y paoongã. Sagls nins sẽn pʋgdã sõnga neb sẽn zoe n bas b zagse.

Biiblã yetame yaa: “Baa ned sã n tar bũmb wʋsgo, pa bũmb nins a sẽn tarã n kõt-a vɩɩm ye.”—Luk 12:15.

Sagl-kãngã sẽn tõe n sõng-y to-to: Yaa sɩd tɩ y sã n bõn teedo, sãamda sũur wʋsgo. La y sã n tẽeg tɩ y vɩɩmã yõod yɩɩda teedã, na n sõng-y lame tɩ y sũurã ra sãam wʋsg ye.

“Vɩɩmã yõod yɩɩda teedã. Wakat ninga, bũmb nins d sẽn tarã bɩ ligdã pa tõe n sõng-d ye.”—A Natalia, Ikrɛn.

Biiblã yetame yaa: “Da sok tɩ bõe yĩng tɩ pĩnd são rũndã ye.”—Koɛɛg soaba 7:10.

Sagl-kãngã sẽn tõe n sõng-y to-to: Tõe tɩ y yɛlã sẽn yaa to-to masã wã pa nana ne-y ye. La y sã n pa rɩk rẽ n mak ne y vɩɩmã sẽn da yaa to-to pĩndã, na n sõng-y lame tɩ y sũurã ra sãam ye.

“Mam sẽn sak n deeg tɩ m yɛlã toeemame wã, sõng-m lame tɩ m tõog n tall yam-sõngo.”—A Eli, Ruwãnda.

Biiblã yetame yaa: “D sã n tar rɩɩb la futu, d na n maana sũ-noog ne bõn-kãense.”—1 Tɩmote 6:8.

Sagl-kãngã sẽn tõe n sõng-y to-to: Maand-y sũ-noog ne bũmb nins y sẽn tarã. Woto na n sõng-y lame tɩ y ra maan yɩɩr wʋsgo, tɩ rẽ sõng-y tɩ y yamã gãand bãane.

“Biiblã sõng-m lame tɩ m tall yam-sõngo, n pa tagsd bũmb nins d sẽn bõnã yell wʋsg ye. Maam ne m pagã sũur nooma wʋsg d sẽn põsã yĩnga.”—A Ivan, Ikrɛn.

Biiblã yetame yaa: “Yãmb sẽn dat tɩ nebã maan bũmb nins yãmb yĩngã, yãmb me segd n maana bãmb bõn-kãense.”—Matiye 7:12.

Sagl-kãngã sẽn tõe n sõng-y to-to: Y sã n tall bʋgsem la y maan sũ-mar ne neb a taabã, y moorã na n noomame. Woto na n sõngame tɩ yãmb sẽn zoe n kẽng tẽng ningã neb nand-yã, la b sak n deeg-yã.

“Nebã sũur nooma d sã n maand-b neere, la d wilgdẽ tɩ d waoogd-b lame. Woto sõngdame tɩ yãmb ne tẽngã nebã wʋmd taab sõma.”—A Angelo, Sirlãnka.

Biiblã yetame yaa: “Wilg Wẽnnaam bũmb nins y sẽn kotã, tɩ rẽ la Wẽnnaam laafɩ wã. . . na n gũ yãmb sũyã la y tagsa wã.”—Filip rãmbã 4:6, 7.

Sagl-kãngã sẽn tõe n sõng-y to-to: Pʋʋs-y Wẽnnaam bũmb nins sẽn namsd yãmb la bũmb nins sẽn yaa tɩlɛ ne-yã yĩnga. Woto na n sõng-y lame tɩ yɛlã ra loog-y ye.

“Mam sã n tar zu-loɛɛg fãa, m pʋʋsda Wẽnnaam. La a leokd-m lame. Mam sẽn bãng bũmb nins Biiblã pʋgẽ wã sõngd-m lame tɩ m yam gãand bãane.”—A Yol, Sudãdisiid.

“Biiblã sagls sõngda maam tɩ m paam sũur pʋgẽ bãane, n tõog n maoo ne zu-loees nins m sẽn segdã.”—A Valentina, Ikrɛn.

“Mam sẽn bãng t’a Zeova pʋlma tõnd vɩɩm sẽn tar barkã kengda m raoodo.”—A Emmanuel, Haiti

Biiblã wilgame tɩ beoog na n yɩɩ neere, la tɩ y tõe n kɩsa sɩd ne a sẽn yet bũmb ningã. Y rat n bãnga bũmb a taab n paas rẽ wɛɛngẽ bɩ? Kos-y-yã a Zeova Kaset soab t’a wa kaag-yã. B na n sõng-y-la ne yamleoogo.