Bõe la Biiblã yet bõmb nikleyɛɛr-dãmbã wɛɛngẽ?

Dũniyã pãn-soaadb tara nikleyɛɛr zab-teed wʋsgo, la b ket n maand a taab n paasdẽ. Woto kɩtame tɩ zab tõe n wa yik wakat buud fãa. Rẽnd zemsame tɩ nebã maand yɩɩre, b sẽn ne tɩ nikleyɛɛr zab-teedã tara paasgo, la tɩ zab tõe n yika wakat buud fãa wã. Nebã yɛɛsda tẽng a ye sẽn na n dɩk nikleyɛɛr zab-teoog n zab ne tẽng ninga, tɩ tẽns a taab me wa kẽes b toog zabrã pʋgẽ ne nikleyɛɛr zab-teedo, tɩ woto wa ne dũniyã sãoongo. Sebr a ye yeelame tɩ “zab b sẽn zabd ne bõmb nikleyɛɛr-dãmb tõe n yika wakat buud fãa.” (Bulletin of the Atomic Scientists observes)

Zab b sẽn zabd ne bõmb nikleyɛɛr-dãmb sɩd tõe n zĩndame bɩ? Sã n sɩd yɩ woto, tõnd tẽngã na n sãamame bɩ? Bõe n tõe n sõng-d tɩ d ra maan yɩɩr wʋsgo, d sẽn mi tɩ zab b sẽn zabd ne bõmb nikleyɛɛr-dãmb tõe n waame wã? Bõe la Biiblã yet rẽ wɛɛngẽ?

Ad bũmb kẽer yell d sẽn na n gom sõs-kãngã pʋgẽ:

• Biiblã yeelame tɩ zab b sẽn zabd ne bõmb nikleyɛɛr-dãmb na n zĩndame bɩ?

• Wẽnnaam na n basame tɩ zab b sẽn zabd ne bõmb nikleyɛɛr-dãmb zĩnd bɩ?

• Tẽngã na n sãamame bɩ?

• Bõe n tõe n sõng-y tɩ y ra maan yɩɩr wʋsgo, y sẽn mi tɩ zab b sẽn zabd ne bõmb nikleyɛɛr-dãmb tõe n waame wã?

• Biiblã bãngr-goam yeelame tɩ Armagedõ zabrã na n yɩɩ ne bõmb nikleyɛɛr-dãmb bɩ?

• Zabã na n wa saame bɩ?

• Vẽnegr sebrã gomda zab b sẽn zabd ne bõmb nikleyɛɛr-dãmb yell bɩ?

Biiblã yeelame tɩ zab b sẽn zabd ne bõmb nikleyɛɛr-dãmb na n zĩndame bɩ?

Yaa sɩd tɩ Biiblã pa yeel vẽeneg-vẽeneg tɩ zab b sẽn zabd ne bõmb nikleyɛɛr-dãmb na n zĩndame ye. La a wilga nebã manesem sẽn na n yɩ to-to la yɛl kẽer sẽn na n zĩndi, tɩ woto tõe n kɩt tɩ zab b sẽn zabd ne bõmb nikleyɛɛr-dãmb zĩndi.

Ges-y Biiblã vɛrse-rãmb nins sẽn pʋgdã la y mak-b ne yɛlã sẽn yaa to-to rũndã-rũndã wã:

Biiblã sẽn yete: A Zeezi karen-biisã sok-a lame yaa: “Bõe n na n yɩ bãnd n wilg tɩ yãmb waame, la tɩ dũniyã rabda a saabẽ?” T’a Zeezi leok-b yaa: “Buud na n yika zabr ne buud a to, tɩ rĩung yik zabr ne rĩung a to.”—Matiye 24:3, 7.

Yɛlã sẽn yaa to-to: Tẽns wʋsg sẽn tar nikleyɛɛr zab-teed n kẽes b toog zab pʋsẽ n yɩɩd pĩndã.

“Yʋʋmã noorã, nen-kɛglmã lebga wʋsg tɩ zabã sõor paase.”—The Armed Conflict Location & Event Data Project.

Biiblã sẽn yete: ‘Saabã wakate, goabg rĩmã na n yikame tɩ yẽ ne rɩtg rĩmã teeg taaba.’—Dãniyɛll 11:40.

Yɛlã sẽn yaa to-to: Wa Biiblã sẽn pĩnd n togsã, tẽns nins sẽn zabd taabã ne b poorẽ dãmbã baoodame n na n paas b naamã pãnga. Tẽns nins sẽn tar nikleyɛɛr zab-teed n tɩ yɩɩdã pa zabd taab ye. La b paasda b zab-teedã pãnga.

“Yʋʋm piigã sẽn loogã, tẽnsã sẽn zabd taabã sõorã paasame, tɩ tẽns nins sẽn tar pãng n tɩ yɩɩdã teend-ba.”—The Uppsala Conflict Data Program.

Biiblã sẽn yete: “Yaoolem wakatã, yɛlã na n yɩɩ kãn-kãe hal tɩ vɩɩmã lebg toogo. Bala nebã na n yɩɩ. . . neb sẽn pa baood laafɩ, tẽn-kãn-neba, neb sẽn pa tar yõk-m-menga, nen-kɛglem dãmba.”—2 Tɩmote 3:1-3.

Yɛlã sẽn yaa to-to: Rũndã-rũndã, neb wʋsg yaa neb sẽn pa baood laafɩ. Dũniyã pãn-soaadb me yaa woto. Wall tɩ b welg b mõ-yõsã ne laafɩ wã, b bugsda taaba. Woto fãa kɩtame tɩ zab b sẽn zabd ne bõmb nikleyɛɛr-dãmb tõe n yiki.

“Tẽnsã sã n pa bãng b sẽn na n maan to-to n wʋm taaba, zabã na n tara paasgo.”—A S. Saran ne a J. Harman, World Economic Forum.

Wẽnnaam na n basame tɩ zab b sẽn zabd ne bõmb nikleyɛɛr-dãmb zĩnd bɩ?

Biiblã pa gom rẽ yell ye. La a yeelame tɩ “nebã na n yãa bũmb toor-toor sẽn kẽesd rabeem” tõnd wakatã. (Luk 21:11) Wala makre, dũni gill zabr a yiib-n-soabã sasa, b tʋma ne bõmb atomik-rãmba. Biiblã wilga bõe yĩng tɩ Wẽnnaam bas tɩ zabã beẽ. Y sã n dat n bãng n paase, bɩ y ges video ning gom-zug sẽn yaa: Bõe yĩng tɩ Wẽnnaam bas tɩ namsgã beẽ?

Tẽngã na n sãamame bɩ?

Ayo. Baa ninsaalbã sã n zabd ne nikleyɛɛr zab-teedã, Wẽnnaam pa na n bas tɩ b sãam tẽngã ye. Biiblã wilgame tɩ tẽngã pa na n sãame, la tɩ nebã na n vɩɩmda a zug wakat fãa yĩnga. Ad vɛrse-rãmb sẽn wilgd rẽ:

Neb kẽer tagsdame tɩ beoog sẽn wate, yaa neb bilf bal n na n kell tẽngã zugu, n mao ne zu-loees nins zab b sẽn zabd ne bõmb nikleyɛɛr-dãmbã sẽn na n wa ne wã. La Biiblã wilgame tɩ Wẽnnaam na n manega bũmb nins fãa zabã sẽn sãam tẽngã zugã.

Wẽnnaam naana tẽngã t’a tõe n lebg n maneg a toore. A na n tũnuga ne a pãngã n kɩt tɩ tẽngã le lebg neere, tɩ ninsaalbã vɩɩmd a zug wakat sẽn kõn sa.—Yɩɩn-sõamyã 37:11, 29; Vẽnegre 21:5.

Bõe n tõe n sõng-y tɩ y ra maan yɩɩr wʋsgo, y sẽn mi tɩ zab b sẽn zabd ne bõmb nikleyɛɛr-dãmb tõe n waame wã?

Neb kẽer maanda yɩɩr wʋsgo, zabr b sẽn zabd ne bõmb nikleyɛɛr-dãmb sẽn tõe n wa yikã, la a sẽn tõe n wa ne zu-loees ninsã yĩnga. La Biiblã pʋlemsã ne a saglsã tõe n sõnga nin-kãens tɩ b ra le n maan yɩɩr wʋsg ye. Wãn to la a tõe n sõng-ba?

Biiblã wilgame tɩ beoog-daarã na n yɩɩ neere, tẽngã la neb nins sẽn na n vɩɩmd a zugã yĩnga. D sẽn bãng tɩ beoog na n yɩɩ neerã yaa wa “baar tõnd vɩɩmã yĩnga,” tɩ woto kɩt tɩ d pa maand yɩɩr wʋsg ye. (Ebre-rãmbã 6:19, notã) Y sã n pa tagsd bũmb nins sẽn tõe n paam-y beoog-daarã yelle, na n sõng-y lame tɩ y yɩɩrã ra yɩ wʋsg ye. Sɩd me, a Zeezi yeelame: “Daar fãa tara a meng yɛl tɩ seke.”—Matiye 6:34.

Tara yõod tɩ y ges y mensã yell sõma. Woto, na n sõng-y lame tɩ y tar tagsa sẽn zemse. Bũmb a ye y sẽn tõe n maane, yaa y sẽn na n modgd n da kelgd kibay sẽn tõe n kɩt tɩ y wa maand yɩɩr wʋsg ye. Wala makre, sõss bɩ kibay sẽn gomd bõmb nikleyɛɛr-dãmb yelle. La rẽ me pa rat n yeel tɩ y na n vɩɩ woto bal wa yell ka be ye. Y tõe n maanda bũmb toor-toore, sẽn na yɩl n da tagsd bũmb y sẽn pa tõe toeeme, bɩ sẽn pa na tol n wa mengã zug ye.

Y sã n tagsd bõn-sõma nins y sẽn tarã yelle, na n sõng-y lame tɩ y ra le tagsd kiba-beedã yell wʋsg ye.

Y sã n bao n bãng bũmb nins Wẽnnaam sẽn pʋlem tɩ watame wã, tõe n sõng-y lame tɩ y paam sũ-noogo, sũur pʋgẽ bãane, la y tẽ tɩ manegr n wate.

Biiblã bãngr-goam yeelame tɩ Armagedõ zabrã na n yɩɩ ne bõmb nikleyɛɛr-dãmb bɩ?

Neb kẽer tagsdame tɩ Armagedõ zabrã na n yɩɩ dũniyã gill zabr b sẽn na n zab ne bõmb nikleyɛɛr-dãmba. Sãmbg sẽn kae, b tagsda rẽ sẽn tõe n wa ne sãoong ningã yelle.

La Biiblã sã n wa gomd “Armagedõ” yelle, a gomda zabr sẽn na n zĩnd Wẽnnaam ne “dũniyã gill rĩm-dãmbã” bɩ ninsaalbã goosneema-rãmbã sʋka.a (Vẽnegre 16:14, 16) Armagedõ zabrã pa na n yɩ zabr b sẽn na n zab ne bõmb nikleyɛɛr-dãmb sẽn na n sãam ninsaalbã la tẽngã ye. Zab-kãng sasa, yaa nin-wẽnsã bal la Wẽnnaam na n menes la a kɩt tɩ laafɩ la bãan hakɩɩk zĩndi.—Yɩɩn-sõamyã 37:9, 10; Ezayi 32:17, 18; Matiye 6:10.

Zabã na n wa saame bɩ?

A Zeovab na n kɩtame tɩ zabã sa, la a sãam zab-teedã fãa. A na n tũnuga ne a Rĩungã sẽn yaa goosneema sẽn be saasẽ wã n ges ninsaalbã yelle.—Dãniyɛll 2:44.

Wẽnnaam Rĩungã na n sõnga nebã tɩ b bãng b sẽn tõe n maan to-to n tõog n vɩɩmd laafɩ la zems-n-taar pʋgẽ. Sẽn mik tɩ yaa goosneem a ye n na n ges ninsaalbã fãa yellã, mo-yõsã sẽn mi n be tẽn-tẽnsã sʋkã pa na n le zĩnd ye. Sẽn paase, b pa na n le zãms zabr meng ye! (Mise 4:1-3) Wãn to la rẽ na n naf-ba? Biiblã yetame tɩ “b ned kam fãa na n zĩi a viyn tɩɩg tẽngre, la a kankang tẽngre, tɩ ned kae n na n kẽes-b rabeem ye.”— Mise 4:4.