Ninsaalbã sẽn lugl sigls nins laafɩ wã baoob wɛɛngẽ wã tõeeme tɩ laafɩ zĩnd bɩ?

Zabã yaa wʋsg dũniyã zugu. Rẽ n so tɩ Nasiõzĩni wã la sigls a taab maand bũmb toor-toor n sõngd tẽns nins zabã sẽn beẽ wã. B raabã yaa b tõog tɩ laafɩ zĩnd zĩ-kãense. A António Guterres sẽn yaa Nasiõzĩni wã sekertɛɛr zenerallã yeelame tɩ Nasiõzĩni wã teega b sodaasã, sẽn na yɩl tɩ laafɩ zĩnd dũniyã zugu.

Na maan yʋʋm wʋsgo, ninsaalbã sẽn modgd sẽn na yɩl tɩ laafɩ zĩndã woma biisi. Wala makre, b tõog n kogla neb zab sẽn beẽ, la b sõng neb sẽn da zoe n bas b tẽng tɩ b leb b zagsẽ. B tõog n sõnga neb me tɩ b paam bũmb nins sẽn yaa tɩlɛ ne-bã, la b maneg rot sẽn sãame. La ninsaalbã siglsã segda zu-loe-kɛgemse, tɩ kɩt tɩ b pa tõe tɩ laafɩ zĩnd dũniyã zug wa b sẽn magdã ye. Rẽ n so tɩ d tõe n sok d mens yaa: Laafɩ hakɩɩk na n wa zĩnda dũniyã zug bɩ? Bõe la Biiblã yet rẽ wɛɛngẽ?

Bũmb nins sẽn kɩt tɩ laafɩ wã paoong yaa toogã, la Biiblã sẽn yete

Zu-loɛɛgã: sẽn baood-b laafɩ wã pa wʋmd taab ye. Yaa toog ne sigls toor-toorã tɩ b naag taab n tʋm tɩ yãk nenga, bala b pa wʋmd taab zĩis kẽer wɛɛngẽ ye.

Biiblã sẽn yete: “Saasẽ Wẽnnaamã na n lugla rĩung. . . A na n wãa rĩun-kãensã fãa, n kɩt tɩ b meneme, tɩ yẽ a ye pa wakat fãa.”—Dãniyɛll 2:44.

Zu-loɛɛgã: sigls nins sẽn maood sẽn na yɩl tɩ laafɩ zĩndã tõogã tara koaka. Pa wakat fãa la sigls-kãens paamd tʋm-tʋmdba, ligdi, la bũmb a taab tɩ seke, sẽn na yɩl n tõog tɩ laafɩ zĩnd ye. Sẽn paase, yɛlã mi n kenga zĩis nins b sẽn maood tɩ laafɩ zĩndã. Woto kɩtame tɩ yɛlã yɩɩd b pãnga.

Biiblã sẽn yete: “Tõnd Zu-soab a Zeezi Kirist Wẽnnaamã. . . zĩndg-a [a Zeezi] a nug-rɩtg saasẽ, t’a yɩɩd naam buud fãa, pãn-soaad buud fãa, pãng buud fãa.”—Efɛɛz rãmbã 1:17, 20, 21.

Wẽnnaam a Zeovaa sẽn yaa Pãng sẽn ka to soabã kõo a Zeezi sẽn yaa a Rĩungã Rĩmã bũmb nins fãa sẽn yaa tɩlɛ, sẽn na yɩl t’a tõog n rɩ a naamã sõma. (Dãniyɛll 7:13, 14b) Wẽnnaam kõo a Zeezi pãn-kãsenga, bãngre, yam la yam-vẽenem sẽn yɩɩd ninsaalbã goosneema-rãmbã bɩ siglsã rẽndã. (Ezayi 11:2) Sẽn paase, malɛgs sẽn tar pãng wʋsg n sõngd a Zeezi. (Vẽnegre 19:14) Dẽnd zu-loɛɛg kae a sẽn pa tõe n welg ye.

Zu-loɛɛgã: Ninsaalbã laloa wã. Laloa wã kɩtame tɩ neb nins sẽn dat tɩ laafɩ zĩndã pa tar tõog n tõe n maan b sẽn datã fãa ye. Neb nins sẽn baood tɩ laafɩ zĩndã pa tõe n tʋm wa b sẽn datã, bala laloa kẽer sẽn yetã pa vẽenega, tɩ laloa kẽer me kɩt tɩ b pa tar tõog n tõe n maan b sẽn dat fãa ye.

Biiblã sẽn yete: ‘Wẽnnaam kõo [a Zeezi] noor t’a ges bũmb fãa yell saasẽ la tẽngã zugu.’—Matiye 28:18.

Wẽnnaam kõo a Zeezi noy sẽn yaa vẽenega, la tõog sẽn na yɩl tɩ laafɩ zĩnd tẽngã zugu. (Zã 5:22) A Zeezi maanda sẽn zems wakat fãa. (Ezayi 11:3-5) Rẽ n so tɩ Biiblã pʋgẽ, b boonda a Zeezi tɩ “Laafɩ naaba.” A na n dɩ a naamã ‘ne tɩrlem la ne zemsgo.’—Ezayi 9:6, 7.

Wẽnnaam Rĩungã bal n tõe n kɩt tɩ laafɩ hakɩɩk zĩndi

Sigls nins sẽn maood sẽn na yɩl tɩ laafɩ zĩndã mi n tõogame tɩ zab sa zĩis kẽere. La b pa tõe n kɩt tɩ bũmb ning sẽn wat ne zabã sa, rat n yeel tɩ b pa tõe tɩ nebã sẽn kis taabã sa ye.

“Yɩlẽ tɩ b gom laafɩ kogl yelle, yaa tɩlɛ tɩ laafɩ deng n zĩndi.”— A Dennis Jett, Etazĩni Ãmbasadɛɛr.

La Wẽnnaam Rĩungã n tõe tɩ laafɩ hakɩɩk zĩndi, bala a sõngda nebã tɩ b nong taaba. Wala makre, a Zeezi sẽn wa be tẽngã zugã, a zãmsa a karen-biisã ne a no-goamã la a tʋʋm-tʋmdɩ wã. A wilg-b-la b sẽn tõe n maan to-to tɩ laafɩ zĩnd bãmb ne b taabã sʋka, la b sẽn tõe n wilg to-to tɩ b nong-b lame. Ad vɛrse a wãn sẽn wilgd rẽ:

A Zeezi yeelame tɩ yaa nonglmã n na n kɩt tɩ b bãng Wẽnnaam Rĩungã poorẽ dãmbã. Biiblã wilga vẽeneg tɩ Wẽnnaam pa na n bas tɩ neb nins sẽn kis b taabã ket n be ye. Ad vɛrse a wãn sẽn wilgd rẽ:

Wẽnnaam a Zeova sẽn naan ninsaalbã bal n mi bũmb ning sẽn tõe n kɩt tɩ laafɩ zĩnd tẽngã zugu. Wẽnnaam Rĩungã na n tõog n maana bũmb nins ninsaalbã sẽn mak n pa tõogã. Wala makre, a na n kɩtame tɩ laafɩ zĩnd tẽngã zugu.