2026, SA-SIK RASEM 24-30
YƖƖLL 65 Wɩng-y ne Wẽnnaam tʋʋmã!
Y sẽn be koe-mooneg sull pʋgẽ wã sẽn nafd-y to-to
“Mam na n pẽga a Zeova ne m sũurã fãa, nin-tɩrsã sull pʋgẽ.”—YƖƖN. 111:1.
D SẼN NA N BÃNGE
D na n yãa d sẽn be koe-mooneg sull pʋgẽ wã sẽn nafd-d to-to.
1-2. Neb kẽer tagsg yaa wãn ne b sẽn paam n be koe-mooneg sull pʋgẽ wã?
YÃMB tẽra daar ning b sẽn kõ-y sor tɩ y tõe n lebg koe-moond sẽn nan pa reeg lisgã bɩ? Yɩɩ sũ-noog daar ne yãmba, bala y neeme masã tɩ y naaga neb ka tɛkã sẽn pẽgd a Zeova yʋʋrã. (Yɩɩn. 148:1, 2, 12, 13) La daar-n-kãng tɛk me, tõe tɩ y lebga sul-bil neda. Yaa y koe-moonegã sulli. A Zeezi kõo a karen-biisã fãa noor tɩ b moon Rĩungã koe-noogã “dũniyã tɛk fãa,” tɩ d sẽn be koe-mooneg sull pʋgẽ wã sõngd-d wʋsg tʋʋm-kãng pʋgẽ.—Mat. 24:14.
2 Y tagsg yaa wãn ne y sẽn paam n be koe-mooneg sull pʋgẽ wã? Saam-bi-poak yʋʋr sẽn boond t’a Wẽndia yeelame: “Mam sẽn paam n be koe-mooneg sull pʋgẽ wã nafd-m-la wʋsgo. Wala makre, m paama minim koɛɛgã mooneg la nebã zãmsg wɛɛngẽ, m paama sõngr tɩ maam ne a Zeova zoodã pãng paase, la m yõg zood sẽn tar pãng ne d koe-moonegã sull neba.” Saam-biig a ye yʋʋr sẽn boond t’a Risaar yeelame: “M sẽn paam n yaa koe-mooneg sull yel-gɛtã yaa zu-zẽkr tɛkẽ! Koe-moondb kẽer paam n sõnga neb hal tɩ b wa reeg lisgu. La koe-mooneg sull yel-gɛt paam n tõe n sõnga ned a lisgã poor t’a tẽebã pãng paase, la a sõng-a t’a paam minim a Zeova tʋʋmdã pʋgẽ.” Saam-bi-poak yʋʋr sẽn boond t’a Dina yeelame: “M sũur yaa noog wʋsg m sẽn paam n be koe-mooneg sull pʋgẽ wã. M geta d sullã neb wa m zakã rãmba.”
3. Bõe yell la d na n gom sõs-kãngã pʋgẽ?
3 Sõs-kãngã pʋgẽ, d na n deng n goma koe-mooneg sull yel-gɛt ne a sõangd tʋʋmd yelle, la d bao n bãng b sẽn tõe n ges b sullã neb yell to-to. Rẽ poore, d na n bao n bãnga d ned kam fãa sẽn tõe n teel a koe-moonegã sull to-to. Sẽn na n baase, d na n yãa koe-moonegã sull sẽn nafd tõnd to-to.
KOE-MOONEG SULL YEL-GƐT NE A SÕANGD TƲƲMDE
4. a) Koe-mooneg sull yel-gɛt tʋʋmd yaa bõe? b) Sagl-bʋs la koe-mooneg sull yel-gɛt tõe n tũ n ges a sullã neb yell sõma? (Ges-y zĩ-gũbrã: “Saglse, koe-moonegã sull yel-gɛt yĩnga.”)
4 Koe-mooneg sull yel-gɛt yaa kãsem-soabb b sẽn yãke, t’a sõngd saam-biis la saam-bi-pogs nins sẽn be a sullã pʋgẽ wã tɩ b tẽebã pãng paasdẽ, la b paamd minim koɛɛgã mooneg la nebã zãmsgã wɛɛngẽ. Yaa kãsem-dãmbã sull n yãkd-a. Wãn to la a tʋmd a tʋʋmdã? Pipi, a wilgdame t’a sullã ned kam fãa yell pak-a lame. (Yel. 27:23) Koe-mooneg sull yel-gɛt mii a sullã neb sõma, n nong n sõsd ne-b sẽn na yɩl n bãng b keelem. Woto, a tõogd n sõng-b lame tɩ b kell n tall zood sõma ne a Zeova. B sã n wa tar zu-loees wall b maand yɩɩr me, a na n tõog n bels-b lame la a sõng-b sõng-vẽenega. (Yel. 12:25; Eza. 32:2; Zak 2:15-17) Yiibu, a sõngda sullã koe-moond fãa sẽn na yɩl t’a moond koɛɛgã sõma. Yẽ mengã lʋɩta taoor n moond koɛɛgã ne yẽesem, sẽn yɩɩd fãa wɩkɛn-dãmbã. A modgdame me n moond koɛɛgã ne a sullã ned kam fãa sẽn na yɩl n kẽng a raood la a sõng-a t’a minimã paase. A sã n wa pa na n tõog n yi koɛɛgã moonego, a na n kosa a sõangdã wall saam-biig a to sẽn tar minim t’a lʋɩ taoore. Tãabo, a sõngda saam-biis nins sẽn be a sullã pʋgẽ wã tɩ b paamd minim la b bɩɩsd zʋg-sõma sẽn na yɩl n tõog n tʋm tigingã tʋʋm n paase. (1 Tɩm. 3:1) B sã n maan bũmb tɩ yaa sõma, a pẽgd-b lame. A kõt-b-la sagls sẽn tik Biiblã zugu, la a sõngd-b sẽn na yɩl tɩ b wa tõog n lebg kãsem-sõngdb la kãsem-dãmba. Koe-mooneg sull yel-gɛt tʋʋmd tara yõod wʋsgo. Rẽ n so tɩ kãsem-dãmbã sã n wa baood saam-biig sẽn na n yɩ koe-mooneg sull yel-gɛta, b yãkda kãsem-soab sẽn tar minim n tõe n tʋm tʋʋm-kãng sõma.
5. Bõe maaneg n tõe n yɩ toog ne koe-mooneg sull yel-gɛta?
5 Bũmb wʋsg n tõe n kɩt tɩ yɩ toog ne koe-mooneg sull yel-gɛt t’a tõog n sõng a sullã neb fãa. A Zorz sẽn yaa koe-mooneg sull yel-gɛt n be Alemayn wã tara tʋʋm wʋsg wa kãsem-dãmb a taabã. A yeelame: “Yɩl n tõog n yɩ koe-mooneg sull yel-gɛt la f tʋm tʋʋm a taab tigingã pʋgẽ pa nana ye. Rẽ n kɩt tɩ yaa toog ne-m tɩ m tõogd n sõsd ne d sullã ned kam fãa.” Ugãnda kãsem-soab a ye yʋʋr sẽn boond t’a Abɛll n tar yʋʋm pis-yopoe wã yeelame: “Tõnd tigingẽ wã, kãsem-dãmbã la kãsem-sõngdbã sõor pa waoog ye. Rẽ n so tɩ koe-moonegã sul neb yaa wʋsgo. Kɩtame tɩ yaa toog ne-m tɩ m tõog n moon ne b ned kam fãa, la m keng b raood wa m sẽn datã.” A Obɛɛd sẽn yaa kãsem-soab n be Surinammã yeelame: “Sõng neb a taabã tɩ b paam minimã nooma maam wʋsgo. La baooda modgr la sẽka. Sẽn paase, kaoosdame tɩ f yaool n wa n yã rẽ sẽn wat ne nafa ninsã. Rẽ n so tɩ m pa wae n sõngd neb a taabã sẽn na yɩl tɩ b paam minim, bala m tara tʋʋm a taab n segd n tʋme.” Bõe n tõe n sõng koe-moonegã sul yel-gɛtb nins sẽn maood ne zu-loees a woto buudã?
6. Koe-mooneg sull neb sã n pa waoogẽ, wãn to la sõngd yel-gɛtã?
6 Sã n tõe, b segd n gesame tɩ koe-mooneg sull fãa neb ra yɩ wʋsg ye. Woto, yɩta nana tɩ yel-gɛt fãa bãng a sullã neb sõma, n tõog n sõng-b tɩ b tẽebã kell n tall pãnga. La sã n mik tɩ tigingã kãsem-dãmb sõor pa waooge, y maanda wãna? Baa sã n yaa woto, kãsem-dãmbã sull pa na n ning neb wʋsg koe-moonegã sul pʋsẽ ye. Sã n pa rẽ na n yɩ toog ne yel-gɛtbã tɩ b tõog n tʋm b tʋʋmdã sõma. B tõe n yãka kãsem-sõngd t’a get koe-mooneg sull yelle. Woto, koe-moonegã sul yel-gɛtb tõogd n sõnga b sulã neb tɩ b kell n maan sɩd ne a Zeova, la b tõog toog zu-loees sasa.
7. Yãmb tigingã kãsem-dãmb sõor sã n pa waoogẽ, bõe la koe-mooneg sull yel-gɛt tõe n maan n tõog n ges a sullã neb yell sõma? (1 Pɩyɛɛr 5:2) (Ges-y fotã me.)
7 Y sã n yaa koe-mooneg sull yel-gɛta, tɩ y tigingã kãsem-dãmb yaool n pa waoogẽ, bɩ y modg n sõng y sõangdã t’a paam minim n sõng-y n ges Wẽnnaam bãgrã yelle. (Karm-y 1 Pɩyɛɛr 5:2.) Kõt-y y sõangdã tʋʋma. Wala makre, y tõe n mi n yãka daar n kos-a t’a maan tigsg koe-moonegã yiib yĩnga, la a lʋɩ taoor koe-moonegã sasa. Yɩta sõma me tɩ y mi n zĩnd n sõse, n bao n bãng y ned kam fãa sẽn tõe n sõng y sullã neb to-to tɩ b tẽebã kell n tall pãnga, la b paas b minimã koɛɛgã mooneg pʋgẽ. Y sã n mi n na n tɩ kaag ned n keng a raood bɩ y kɩt tɩ y sõangdã yãag-yã. Nand tɩ y kẽnge, y tõe n kõ-a-la saglse. Y sã n tɩ kaag a soabã poore, y tõe n wilg-a-la bũmb nins a sẽn maan tɩ yaa sõma wã, tɩ bũmb sã n dat remsg me bɩ y togs-a. Bilf-bilfu, y sõangdã tõe n wa paama minim tɩ b tõog n yãk-a t’a lebg koe-mooneg sull yel-gɛta. (2 Tɩm. 2:2) Y leb n tõe n kosa kiris-neb nins tẽeb sẽn bɩ wã tɩ b sõng sullã neb a taabã tɩ b paam minim koɛɛgã mooneg wɛɛngẽ. Wala makre, so-pakdbã ne koe-moond nins sẽn tar minimã tõe n sõnga nin-paalsã ne koe-moondb nins minim sẽn pa waoogã. B tõe n sõng-b lame tɩ b bãng b sẽn tõe n tɩʋʋs sõsg to-to, b sẽn tõe n lebg n tɩ kaag ned la b zãms ned Biiblã to-to tɩ wom biisi. Masã, d na n goma bũmb a tãab d sẽn tõe n maan n teel d koe-moonegã sull yelle.
Sull yel-gɛt tõe n sõnga kãsem-sõngd sẽn be a sullã pʋgẽ t’a minimã paase. Wala makre, a tõe n mi n kos-a lame t’a lʋɩ taoor koe-moonegã yiib tigsg sasa (Ges-y sull a 7)
Y SẼN TÕE N TEEL Y KOE-MOONEGÃ SULL TO-TO
8. Wãn to la y tõe n teel y koe-moonegã sulli? (Rom dãmbã 1:12)
8 Naagd-y y sullã neb n moondẽ. Y sã n naagd y saam-biisã la y saam-bi-pogsã n moond koɛɛgã, y na n paam n kenga b raoodo, tɩ bãmb me keng yãmb raoodo. (Karm-y Rom dãmb 1:12.) Y sã n naagd neb a taab n moondẽ, tõe n sõngame tɩ y basd y yam n sõsd ne nebã, la kɩt tɩ y paam koglg zĩis kẽere. La sã n mik tɩ y tʋʋmdã kɩtame tɩ y pa wae n paamd n naagd y koe-moonegã sull neb n moondẽ, y maanda wãna? Y tõe n kosa y tʋʋmdã taoor soab t’a toeem y sẽn tʋmd wakat ningã. A tõe n sakame hal tɩ ling-yã. (Nee. 2:4-6) Sã n mik tɩ yaa bãag wall y yʋʋm sẽn vẽsg yĩng n kɩt tɩ y pa tõe n naagd y koe-moonegã sull neb n moondẽ, y tõe n goma rẽ yell ne sullã yel-gɛta. A tõe n sõng-y lame tɩ y paamd n tũnugd ne videokõnferãns maasem n naagd y sullã neb n maand koe-moonegã tigsga. A leb n tõe n gesame tɩ y naagd sullã neb kẽer n gʋlsd lɛta la y moond koɛɛgã ne telefõn maasem. La y sã n yaa bi-bɩɩga, n tar laafɩ tɩ yaool n yaa toog ne-y tɩ y yit n naagd y sullã neb n moond koɛɛgã, bõe la y tõe n maane? Y tõe n yãka yam tɩ wɩkɛn fãa bɩ y kos y koe-moonegã sullã ned a ye tɩ y naag taab n moon koɛɛgã. Tõe tɩ y segd n toeema bũmb nins y sẽn lʋɩɩsd taoorã, wall y ges y sẽn tõe n maan to-to n da sãam y sẽkã ye. (Rom. 12:11; Kolo. 4:5) Y sã n modgd n yit n moond koɛɛgã ne y sullã neba, na n nafa y ned kam fãa. Pʋʋs-y-yã a Zeova n kos sõngre. A tõe n kõo yãmb “raab la tõog sẽn na yɩl tɩ y maan sẽn noom-a wã.”—Fili. 2:13.
9. Bõe la d tõe n maan tɩ nonglem la zems-n-taar zĩnd d koe-moonegã sull neb sʋka? (Rom dãmbã 12:13)
9 D kɩt tɩ d sullã neb yɩ wa zag-yɛng neba. D sã n kɩt tɩ ‘sãamb-reegr lebg d minungu,’ d sõngdame tɩ nonglem la zems-n-taar be d koe-moonegã sull neb sʋka. (Karm-y Rom dãmb 12:13.) Wala makre, d tõe n sakame tɩ d sullã neb segd taab tõnd zakẽ wã n maand koe-moonegã yiib tigsga. Tigims kẽer pʋsẽ, b yãka yam tɩ saam-biig sã n yi tiging a to n wa wɛgs sõsg bãmb tigingẽ wã, bɩ yɩ koe-moonegã sull a ye neb n na n deeg-a sãando. Sulã maanda woto n deesd taaba. Sul sãnda neb yãka yam tɩ sã n wa yaa bãmb n segd n bool sõsdã, b na n tigma taab n dɩ la b keng taab raoodo, baa a sã n pa na n tõog n naag-ba. Saam-bi-poak a Saara sẽn yaa zall so-pakdã yeelame: “M sã n wa bool neb tɩ b na n wa rɩ m zakẽ wã, m wae n maanda yɩɩr wʋsgo. Rẽ n so tɩ m pa segend rɩbd wʋsg ye. M modgdame tɩ sẽn pak maam n yɩɩdã yaa bao n bãng m taabã n paase, pa rɩɩbã na n yɩ noogã ye.” D sã n sõng tɩ d koe-moonegã sull neb yaa wa zag-yɛng neba, na n kɩtame tɩ d maneg n nong a Zeova la d nong taaba.—Nee. 8:10; Tʋʋ. 20:35.
10. D sã n dat n paas d minimã koɛɛgã mooneg la nebã zãmsg pʋgẽ, bõe la d tõe n maane? (Yel-bũn 1:5; 27:17) (Ges-y fotã me.)
10 D paas d minimã koɛɛgã mooneg la nebã zãmsg wɛɛngẽ. D minimã sã n paas koɛɛgã mooneg la nebã zãmsgã wɛɛngẽ, d na n maneg n nonga koɛɛgã moonego, tɩ kɩt tɩ d rat n yit n naagd d sullã neb n moond koɛɛgã. La bũmb n be y sẽn tõe n maan n paas y minimã. Y tõe n kosa so-pakd wall koe-moond a to sẽn tar minim n be yãmb sullã pʋgẽ sõngre. (Karm-y Yel-bũn 1:5; 27:17.) Y leb n tõe n goma ne y koe-moonegã sull yel-gɛta. A tõe n yãka yam n sõng-yã, wall a kos ned a to t’a sõng-yã. Saam-bi-poak a ye yʋʋr sẽn boond t’a Ayida n yaa yãn-zoɛt kosa sõngr tɩ naf-a. A yeelame: “M kosa so-pakd a ye t’a sõng-m tɩ m bãng m sẽn tõe n maan to-to n lebg n tɩ kaag ned tɩ wom biisi. A sõnga maam ne nonglem la bʋgsem. A maana na-kẽndr tɩ d ra yit n moond koɛɛgã ne taaba. A sõng-m lame meng tɩ m sɩng Biiblã zãmsg ne ned a ye m sẽn da kẽnd n kaagdẽ. M sũur nooma wʋsg m sẽn kos sõngrã. Bala masã, m le nonga koɛɛgã moonego.” Sɩd-sɩda, bũmb wʋsg n be d sẽn tõe n maan n teel d koe-moonegã sulli.
D koe-moonegã sull neb sẽn pa waoogã kɩtame tɩ d tõe n bãng taab sõma, la d naagd taab n moond koɛɛgã (Ges-y sull 10)
Y KOE-MOONEGÃ SULL SẼN NAFD-Y TO-TO
11-12. Wãn to la y koe-moonegã sull neb tõe n sõng-yã, a Zeova tũubã pʋgẽ? Rɩk-y makre.
11 Y sullã neb tõe n sõng-y lame tɩ yãmb ne a Zeova zoodã kell n tall pãnga. D sẽn paam n naag koe-mooneg sullã nafda d fãa. Wala makre, pʋg-kõapã, kɩɩbsã la sẽn kʋʋl-bã sẽn yaa neb a Zeova sẽn nong wʋsgã paamda raood kengre. (1 Tes. 2:8; Zak 1:27) Sẽn paase, d sẽn naagd d koe-moonegã sull neb n moondẽ wã paasda d minimã koe-moonegã la nebã zãmsgã wɛɛngẽ. Saam-biis nins sẽn kõt mak-sõngã paamdame tɩ b sõngd-b tɩ b paamd minim, la b bɩɩsd zug-sõma n tõe n tʋm tʋʋm a taab tigingã pʋgẽ.—1 Tɩm. 3:10.
12 D ges a Wẽndi sẽn yaa saam-bi-poak ning yell d sẽn zoe n gomã sẽn paam sõngr a koe-moonegã sull pʋgẽ to-to. A yeelame: “M baaba sẽn da pa rat tɩ tõnd tũ a Zeova wã yĩnga, ra yaa toog ne m ma t’a yi n naag koe-moonegã sull neb n moon koɛɛgã wɩkɛn-dãmbã. La m baaba ra sakdame tɩ mam kẽnge. Saam-bi-poak a ye yʋʋm sẽn vẽsge, n le yaa so-pakd n sõng maam wʋsgo. A sõng-m lame tɩ m paam minim sẽn nafd-m koɛɛgã mooneg wɛɛngẽ la tigingã pʋgẽ. M tẽrame tɩ naoor wʋsgo, tõnd sullã yel-gɛt tika Biiblã zug n kõ-m sagls ne nonglem, tɩ ket n nafd maam hal baa rũndã.”
13. D sẽn paam n be koe-mooneg sull pʋgẽ wã tõe n sõng-d lame tɩ d paam zo-rãmb hakɩɩka. Wãn to? (Ges-y fotã me.)
13 D tõe n paama zo-rãmb hakɩɩk d koe-moonegã sull pʋgẽ. Tõnd ne d sullã neb sã n naagd taab n moond koɛɛgã, d zoodã pãng paasdame. (Fili. 1:27) D koe-moonegã sull neb sẽn pa waoogã kɩtame tɩ baa yãn-zoɛtbã ne sẽn pa nong-b zãma zĩigẽ wã tõe n yõg zood ne neb a taabã nana-nana. (2 Kor. 6:13) D sullã neb tõe n sõng-d-la zu-loees sasa. Wala makre, d sã n wa bẽedẽ, d yam sã n wa kae d menga, wall d ned sã n wa maan kaalem. (1 Tes. 5:14) Yaa vẽeneg tɩ to-kãsengã sẽn kolgdã, d na n maneg n data zo-rãmb a woto buudu. (Mat. 24:21) Yaa sɩd tɩ d tẽed-n-taasã pa tõe n kɩt tɩ d zu-loeesã sa ye. La d sẽn mi tɩ b nong-d lame, la tɩ b na n teel-d lame wã tõe n sõng-d lame tɩ d tõog toogo.—Yel. 17:17.
Saam-bi-pogs a yiib sẽn be sul-yɛng pʋgẽ sẽn tũud taaba, n dabd koɛɛgã moonego (Ges-y sull 13)
14. D sã n wa tiig n lʋɩ bãaga, pa rẽ bɩ yaa sabab-wẽng n maane, wãn to la d koe-moonegã sull neb tõe n sõng-do?
14 D sullã neb tõe n sõng-d-la sõng-vẽenega. D ned kam fãa tõe n wa tiig n lʋɩɩ bãaga, n dat sõngre. Pa rẽ bɩ yaa bã-loangdg n puki, wall sabab-wẽng n maane. Tẽngã taoor dãmb me tõe n wa yik n namsda tõnd d tũudmã yĩnga, wall yaa zu-loees a taab la d paam-yã. Yell a woto sasa, d koe-moonegã sull yel-gɛt na n yɩɩ tao-tao n sõng-do. Wala makre, sabab-wẽng sã n maane, a na n bao n paama a sullã zak fãa neb kibare, n ges b sã n data sõngre. B tõe n data tɩto, rɩɩbo, koom, gãag zĩig wall futu. A sã n bãng a sullã neb nins sẽn dat sõngrã, a na n gesame tɩ b paam sõngre. A na n sõsa ne kãsem-dãmbã sull ning sẽn get koe-moonegã yellã, n wilg-b neb nins sẽn be a sullã pʋgẽ n dat sõngrã, tɩ b ges b sẽn na n maan to-to n sõng-ba. D koe-moonegã sull neb sɩd tõe n sõng-d-la sõng-vẽeneg yel-pakr wakate!
15. Bõe la sẽn tũud-b a Zeova wã fãa rata?
15 D zoe n yãame t’a Zeova zakã rãmb sõor yaa wʋsgo. Sẽn be-b saasẽ wã yaa malɛgs milyõ kobs sẽn maand sɩd ne a Zeova. Tõe tɩ b yaa milyaar-dãmb menga. Sẽn be-b tẽngã zugã yaa neb milyõ a wɛ la zaka, tɩ b sõorã tar paasg daar fãa. (Zaka. 8:23; Vẽn. 5:11) Sẽn be-b saasẽ wã ne sẽn be-b tẽngã zug n tũud a Zeova wã fãa raab yaa neb wʋsg na wʋm Rĩungã koe-noogã. (Vẽn. 14:6, 7) Bɩ d maan d sẽn tõe fãa n teel d koe-moonegã sulli, bala a sõngda tõnd tɩ d pẽgd a Zeova ne d sũur fãa.—Yɩɩn. 111:1.
YƖƖLL 61 Wẽnnaam Kaset rãmbã, nang-y pãnga!
a D toeema yʋy kẽere.
b Kãsem-soab sã n kae, b tõe n yãka kãsem-sõngd t’a tʋm tʋʋmdã hal tɩ b wa paam kãsem-soaba. La kãsem-sõngdã sẽn pa yel-gɛt tigingã pʋgẽ wã yĩnga, b na n boond-a lame tɩ sullã sõangda. La tigingã kãsem-dãmb na n wilgd-a-la sor a tʋʋmdã pʋgẽ.