D sẽn tõe n maan to-to tɩ tõnd ne d tẽed-n-taasã zoodã kell n tall pãnga

1. Yɛ la d tõe n paam zo-rãmb hakɩɩka?

“TÕND zoa sã n wa rat sõngre, tõnd na n maana d sẽn tõe fãa n sõng-a. Yell sã n pak-a bɩ d kʋm-a, la d teel-a ne d pãngã fãa. . . . D nong taab ne d sũyã fãa.” Gom-kãensã bee yɩɩll 109 soabã pʋgẽ. A gom-zugã yaa: “Bɩ d nong taab ne d sũyã fãa.” A Zeova miime tɩ d rata zo-rãmb a woto buudu. (Yɩɩn. 119:63) Rẽ n so t’a sõngd-d tɩ d paamd zo-rãmb hakɩɩk a nin-buiidã sʋka. D yaa wa zag-yɛng neb n tũud a Zeova la d nong taaba.

2. D ratame tɩ tõnd ne d tẽed-n-taasã zoodã yɩ wãn-wãna?

² D pa rat tɩ tõnd ne d tẽed-n-taasã yɩ zood bal ye. D ratame tɩ d zoodã tall pãnga. D yaa wa zag-yɛng neb n nong a Zeova la a Zeezi, tɩ nonglem-kãng kɩt tɩ d zemsd taaba. (Zã 13:35) La d pa wat n yaa zo-rãmb woto bal ye. Baooda modgre. Tõnd sẽn yaa neb sẽn pa zems zãngã yĩnga, d mi n paamda zu-loeese, tɩ kɩt tɩ yaa toog tɩ d kell n yɩ zo-rãmba.

3. Bõe yĩng tɩ mi n yaa toog tɩ d kell n yɩ zo-rãmba?

³ Sɩd-sɩda, d mi n nonga neb kẽer n yɩɩd sãnda. Bõe yĩnga? Tõe tɩ yaa d sẽn nong bũmb ninsã n yaa a ye, wall yaa d zʋgã sẽn wõnd taab yĩnga. La tõe tɩ tigingã pʋgẽ, d tẽed-n-taas n be tɩ yaa toog tɩ d yõg zood ne-ba. Tõnd ne d tẽed-n-taag tõeeme n wa pa wʋm taab bũmb ning wɛɛngẽ, tɩ kɩt tɩ yaa toog tɩ d nong-a. Tõe me tɩ tõnd ne d tẽed-n-taagã zʋg yaa toor fasɩ, tɩ kɩt tɩ d pa baood a zĩigẽ ye. Pa rẽ bɩ yaa bãag wall bũmb a to n namsd d tẽed-n-taagã, t’a tar manesem sẽn kɩt tɩ yaa toog tɩ d kell n yɩ a zoa. Sõs-kãngã pʋgẽ, d na n goma mak-sõng ning a Zeezi sẽn kõ wã yelle, n bao n bãng a mak-sõngã sẽn tõe n sõng-d to-to, tɩ d mao ne zu-loees nins sẽn tõe n sãam tõnd ne d tẽed-n-taasã zoodã. La d na n deng n yãame tɩ d sã n dɩkd a Zeova togs-n-taare, tõe n sõngame tɩ tõnd ne d tẽed-n-taasã kell n yɩ zo-rãmb hakɩɩka.

D SÃ N DƖKD A ZEOVA TOGS-N-TAARE, NA N SÕNG-D LAME TƖ D KELL N YƖ ZO-RÃMBA

4. Bõe la d tõe n maan n paas d zoodã pãnga?

⁴ D sã n dat tɩ tõnd ne d tẽed-n-taasã zoodã pãng paasdẽ, d segd n geta b zʋg-sõma wã n yɩɩda. D sã n wae n be ne d tẽed-n-taasã, na n sõngame tɩ d neẽ tɩ b tara zʋg-sõma. Tẽn-tʋmd a Poll ra rat n zĩnda ne a tẽed-n-taasã ne a sũur fãa. A yeela Tesalonik kiris-nebã yaa: “D modga wʋsg sẽn na yɩl n yã yãmb mensã.” (1 Tes. 2:17) D tẽed-n-taas wʋsg gũus n gesame tɩ yaa b sã n be ne b saam-biisã la b saam-bi-pogsã tɩ b sõsd ne taab la b zoodã pãng paasda. D tõe n paam n sõsa ne d tẽed-n-taasã koe-moonegã wakate, tigissã la tigis-kãsemsã sasa. La mo-yõsr sã n wa be tõnd ne d tẽed-n-taag sʋka, d sã n be ne taab bala pa sek d na welg zu-loɛɛgã ye.

5. Bũmb sã n wa rat n sãam d zoodo, bõe la d tõe n maane? Rɩk-y makre. (Kolos rãmbã 3:12)

⁵ D sã n dɩkd a Zeova togs-n-taare, tõe n sõngame tɩ d zoodã ra sãam ye. (Karm-y Kolos rãmb 3:12.) Wala makre, d sã n bɩɩsd sik-m-menga, sũ-mare, sõmblem la nimbãan-zoeere, d na n tõog n kell n yɩɩ zo-rãmba, baa sẽn wa n yaa zu-loɛɛg ning fãa la d paam-yã. D rɩk makre: B sã n ning montɛɛr kaam, a kẽnda sõma. Woto me, d sã n dɩkd a Zeova togs-n-taare, tõnd ne d tẽed-n-taasã moor na n noomame. Masã, d na n goma zu-loees a tãab sẽn tõe n sãam d zood yelle. D na n yãame tɩ d sã n dɩkd a Zeezi togs-n-taar sik-m-mengã wɛɛngẽ, sũ-marã, sõmblmã la nimbãan-zoeerã wɛɛngẽ, d na n tõog n kell n yɩɩ zo-rãmb hakɩɩka.

Y SÃ N WA PA WƲM TAAB BŨMB NING WƐƐNGẼ

6. Wãn to la mo-yõsr tõe n sãam zoodo?

⁶ Sẽn yaa toogã võore. Neb a yiib sã n wa pa wʋm taab bũmb ning wɛɛngẽ, ned kam fãa tõe n kɩsa sɩd t’a sẽn get yɛlã to-to wã la sõma. Wala makre, saam-biis a yiib tõeeme n wa kɩɩsd taab b koe-moonegã sull neb sẽn segd n moon koɛɛgã zĩig ningã wɛɛngẽ. B ned kam fãa tagsdame t’a bee bʋʋm. Tõe n yɩɩ nana tɩ b sẽn pa wʋm taab bõn-kɩdg wɛɛngẽ wã wa lebg yel-kãsenga, tɩ lebg toog tɩ b kell n yɩ zo-rãmba. B ned kam fãa tõe n wa getame tɩ wilg t’a tara bʋʋmã tara yõod wʋsgo. B sã n pa sõs ne taab n welg zu-loɛɛgã, b ned kam fãa tõe n wa tara sũ-kẽk ne a to wã. Tar-n-tarẽ, b tõe n wa zãaga b mens ne taaba, n pa le rat n yɩ zo-rãmb meng ye. Woto fãa sɩnga ne bõe? Ne bũmb sẽn pa zem baa fʋɩ.

7. Wãn to la a Zeezi wilg a karen-biisã tɩ b sã n dat n welg b mo-yõsa, sik-m-meng yaa tɩlɛ?

⁷ D rɩk a Zeezi togs-n-taar sik-m-mengã wɛɛngẽ. A wilga a karen-biisã tɩ b sã n dat n welg b mo-yõsa, sik-m-meng yaa tɩlɛ. A karen-biisã ra wae n wẽeda no-koɛɛm n dat n bãng sẽn yaa-a kãseng n yɩɩd bãmb sʋkã. A Zeezi ra rat n sõng-b lame tɩ b bas tags-kãng sẽn kɩ yẽg b sũyẽ wã. Rẽ n so t’a wilg-b tɩ b segd n getame tɩ neb a taabã yɩɩda bãmba. (Mat. 20:25-28) A ra ratame tɩ b bɩɩs sik-m-menga. Baa a yõkrã yʋngo, a sika a meng n maan bũmb sẽn da yaa tʋʋm-biig n segd n maane, n “bas mamsg” a karen-biisã yĩnga: A waasa b naoã. (Zã 13:3-5, 12-16) A sẽn maan woto wã, a wilg-b-la b sẽn tõe n maan to-to tɩ b zoodã kell n tall pãnga. B ned kam fãa sã n getẽ t’a taabã yɩɩda yẽ, baa yẽ ne a to sã n wa pa wʋm taab bũmb ning wɛɛngẽ, yɩta nana t’a bas yẽ rẽnda n sak a to wã raabã. Leb n na n yɩɩ nana tɩ b kell n yɩ zo-rãmba, baa b sẽn get yɛlã to-to wã sã n wa yaa toor-toore.

8. Wãn to la sik-m-mengã tõe n sõng-d tɩ d kell n yɩ zo-rãmba, baa d sã n wa kɩɩsd taab bũmb ning wɛɛngẽ? (Kolos rãmbã 3:13) (Ges-y fot-rãmbã me.)

⁸ Y sẽn tõe n maan to-to tɩ yãmb ne y tẽed-n-taasã zood kell n tall pãnga. Y sã n yaa sik-m-meng soaba, na n yɩɩ nana tɩ y basd y tẽed-n-taasã kong-bõonegã taale, la y sakd n kõt y taabã sugri. (Karm-y Kolos rãmb 3:13.) Y sã n yaa sik-m-meng soaba, na n sõngame tɩ baa yãmb ne y tẽed-n-taag sã n wa pa wʋmd taab bũmb ning poorẽ bɩ y ra yik y sũur ye. Rẽ na n sõngame tɩ y kell n yɩ zo-rãmba. (Yɩɩn. 4:4) Baa y zoa sã n wa yeel gomd n sãam y sũuri, bɩ y tẽeg tɩ tõnd fãa mi n tudg n yeela gomd n wa maand d bãngẽ. (Koɛ. 7:21, 22) Sok-y y meng yaa: ‘Bao n wilg tɩ maam n tar bʋʋmã yõod yɩɩda tõnd zoodã sɩda?’ Y tõe n yãka yam n bas yãmb rẽndã la y sak y to wã raabo, la y ra le gom rẽ yell me ye. Y sã n maan woto, na n sõngame tɩ y yam gãand bãane.

9. Sã n wa yaa toog tɩ y welg mo-yõsre, wãn to la sik-m-mengã tõe n sõng-yã? (Yel-bũnã 17:9)

⁹ Sã n wa yaa toog tɩ y welg mo-yõsr me, sik-m-mengã tõe n sõng-y lame. Ra pẽdgd-y n dat n wilg tɩ yãmb n be bʋʋm ye. (Karm-y Yel-bũn 17:9; 1 Kor. 6:7) Yɩta sõma tɩ y tẽeg tɩ sẽn tar yõod n yɩɩd yaa y sẽn na n kell n yɩ zo-rãmba. Saam-biis la saam-bi-pogs wʋsg tõog n maana woto, b sẽn maag b yĩng n sõs ne b to wã n bao n welg yellã yĩnga. (Yɩɩn. 34:14) Y tõe n yeela y to wã yaa: ‘M pa rat tɩ d zoodã sãam ye. Wa tɩ d gom bũmb ning sẽn maanã yelle.’ Y tõe n sak n deegame tɩ y kongame, n yeel y zoa wã tɩ y miime tɩ y sẽn maanã sãama a sũuri, la y kos-a sugri. Yẽ me sã n kos sugr bɩ y sik y meng n sak n deege. (Luk 17:3, 4) Tẽeg-y tɩ y bõn-daabã pa y wilg ãnda n be bʋʋm tɩ ãnda ka bʋʋm ye. Yaa welg mo-yõsrã, tɩ y zoodã ra sãam ye.—Yel. 18:24.

Y ZƲGÃ SÃ N WA YAA TOOR-TOORE

10. Bõe n kɩt tɩ mi n yaa toog tɩ d kell n yɩ zo-rãmba?

¹⁰ Sẽn yaa toogã võore. D tẽed-n-taas kẽer zʋg yaa toor fasɩ ne tõndo. Tõe n yɩɩ toog tɩ d yɩ bãmb dãmbã zo-rãmba. Kẽer tõe n tara manesem sẽn pa noom tõnd ye. B sẽn nams sãnda b yãadmẽ yĩnga, pa rẽ bɩ b sẽn wub-b neb sẽn nong goam sʋka, wall neb sẽn pa nong goam sʋk yĩngã tõe n kɩtame tɩ b tar manesem tɩ d pa wʋmd a võor ye. Pa rẽ bɩ d yaa toor-toore, d nin-yɛng sẽn nong neb wʋsg zĩigẽ tɩ d to wã yaa yãn-zoɛt yĩnga.

11. Bõe n wilgd t’a Zeezi yõga zood ne neb zʋg sẽn da yaa toor ne-a?

¹¹ D rɩk a Zeezi togs-n-taar sũ-marã wɛɛngẽ. A Zeezi yõga zood ne neb zʋg sẽn da yaa toor ne-a. Wala makre, tẽn-tʋmd a Zak ne a Zã kosa naam zĩis Rĩungã pʋgẽ, tɩ wilgdẽ tɩ b ra yaa neb sẽn nong naam. (Mark 10:35-37) La a Zeezi yẽ ra yaa sik-m-meng soaba. A basa naam la ziir ning a sẽn da tar saasẽ wã, n sig tẽngã zugu. (Fili. 2:5-8) A Zeezi sẽn maan bũmb ningã yaa toor fasɩ ne a Zak la a Zã sẽn maanã. Baa ne rẽ, a Zeezi maana sũ-mar ne a Zak la a Zã, n paas neb a taaba.

12. Bõe n sõng a Zeezi t’a maan sũ-mar ne a zo-rãmbã?

¹² A Zeezi ra miime t’a zo-rãmbã pa tõe n maan sẽn yaa tɩrg wakat fãa ye. A ra miime t’a karen-biisã wʋsg nonga naam wa a Zak ne a Zã. (Mark 9:34) Hal a Zeezi yãadmẽ, a zĩnda ne neb sẽn nong naam wa sẽn da yaa to-to ne a karen-biisã. Rẽ n so t’a ra wʋmd a karen-biisã sẽn get yɛlã woto wã võore. A ra maanda sũ-mar ne-ba, n miẽ tɩ b sẽn zĩnd ne neb sẽn nong naam n maan yʋʋm wʋsgã, b pa tõe n toeem zĩig pʋgẽ n lebg sik-m-mens rãmb ye.—Mark 10:42-45.

13. Wãn to la sũ-marã tõe n sõng-d tɩ d kell n yɩ zo-rãmba? (Efɛɛz rãmbã 4:2)

¹³ Y sẽn tõe n maan to-to tɩ yãmb ne y tẽed-n-taasã zood kell n tall pãnga. Y sã n modg n ket n nong y tẽed-n-taasã baa b sã n wa tar manesem sẽn pa noom-yã, y sũ-marã paasdame. (Yel. 14:29) D fãa zʋgã yaa toor-toore, tɩ kɩt tɩ d mi n tar manesem sẽn pa noom neb kẽer ye. La naoor wʋsgo, pa manesem-wẽng ye. D sã n paam tɩ neb a taabã ket n nong-d baa ne rẽ fãa, pa noom-d sɩda? (Karm-y Efɛɛz rãmb 4:2.) Yɩta sõma tɩ tõnd me ra baoodẽ tɩ d taabã maand sẽn noom tõnd wakat fãa ye. Sẽn paase, d sã n tags modgr ning d tẽed-n-taasã sẽn maandã yelle, tõe n sõng-d lame. Wala makre, ned sẽn yaa yãn-zoɛt sã n dat n sõs ne neda, pa nana ne-a ye. La d segd n maana sũ-mar me ne neb nins sẽn nong goamã. Yaa sɩd tɩ d pa tõe n yɩ tigingã neb fãa zo-rãmb hakɩɩk ye. La d segd n tẽegame tɩ baa kiris-neb zʋg sã n yaa toor-toore, b tõe n naaga taab n tʋm a Zeova tʋʋmdã sõma.

14. D sã n yaa sũ-mar soaba, bõe la d na n get d tẽed-n-taasa nengẽ n yɩɩda?

¹⁴ Sũ-marã na n sõngame tɩ d get d tẽed-n-taasã zʋg-sõma wã n yɩɩda. D sã n maand woto, d zʋgã sẽn yaa toor-toorã pa na n kɩt tɩ d pa yɩ zo-rãmb ye. Wala makre, a Zak ne a Zã tagsa b mens yell bal n kos naam zĩisi. La b sẽn maan woto wã wilgame tɩ b kɩsa sɩd tɩ Wẽnnaam Rĩungã na n waame. A Zeezi yãame tɩ b tara tẽeb tɩ yɩ-a noogo. Tõnd me sã n get d tẽed-n-taasã zʋg-sõma wã n yɩɩda, d rɩkda a Zeezi ne a Ba a Zeova togs-n-taare.

15. Ãnda n tõe n sõng tõnd tɩ d kell n yɩ neb nins zʋg sẽn yaa toor ne tõndã zo-rãmba?

¹⁵ Sẽn yɩɩd fãa, d tõe n pʋʋsa a Zeova n kos t’a sõng-d tɩ d kell n yɩ neb nins zʋg sẽn yaa toor ne tõndã zo-rãmba. Reng-y n tags-y y tẽed-n-taag sẽn tõe n wa maan bũmb ning tɩ pa yɩ-y noogã yelle, n pʋʋs a Zeova n kos t’a sõng-y tɩ sã n wa yaa woto bɩ y tõog y menga. Tẽeg-y tɩ d Naand a Zeova miime tɩ d fãa zʋgã yaa toor-toore. Rẽ n so tɩ y sã n wa pʋʋsdẽ bɩ y tõe n bas y yam t’a mii yãmb sõma, n tõe n kõ-y sõngr ning y sẽn datã. Bũmb ning sã n wa maan tɩ y getẽ tɩ yaa toog ne-y tɩ y yõk y menga, y tõe n pʋʋsa a Zeova n kos-a a vʋʋsem sõngã tɩ sõng-yã.—Luk 11:13; Gal. 5:22, 23.

D TẼED-N-TAAG SÃ N WA TAR ZU-LOEESE

16. D tẽed-n-taag sã n wa tar zu-loeese, bõe yĩng tɩ tõe n yɩ toog tɩ d kell n yɩ a zoa?

¹⁶ Sẽn yaa toogã võore. D tẽed-n-taag sã n wa bẽedẽ wall a tar zu-loɛɛg a to, a tõe n wa tara manesem tɩ pa noom-d ye. Wala makre, a tõeeme n pa rat ned zĩigẽ, a sũur tõe n yikda tao-tao, a leb n tõe n maana bũmb tɩ ling-du. A tõeeme meng n wa yeel gomd wall a maan bũmb tɩ yik d sũuri. (Zoob 6:2, 3) D sẽn pa mi zu-loees nins d tẽed-n-taasã sẽn maood ne wã yĩnga, d tõeeme n wa rat tɩ b maan bũmb sẽn yɩɩd b pãnga.

17. A Zeezi manesem sẽn yɩ to-to ne zoang a Bartime wã wilgda tõnd bõe?

¹⁷ D rɩk a Zeezi togs-n-taar sõmblmã la nimbãan-zoeerã wɛɛngẽ. A Zeezi ra maanda neb nins sẽn namsdã neere, la a zoet b nimbãanega, baa b rãmb nins a sẽn da pa mi wã. Wala makre, d ges a manesem sẽn yɩ to-to ne zoang a Bartime wã. A sẽn wa n wʋm tɩ yaa a Zeezi n watã, a ra zẽkda a koɛɛg n tãsdẽ sẽn na yɩl t’a Zeezi wʋme. La kʋʋngã sʋka, neb kẽer yeela a Bartime t’a sĩndi. A sẽn da rat t’a Zeezi sõng-a ne a sũur fãa wã yĩnga, a maneg n zẽkda a koɛɛgã n tãsdẽ. Tõe tɩ kʋʋngã neb kẽer ra getame t’a manesmã pa zems ye. La a Bartime “nimbãaneg yõka a Zeezi,” t’a rat n sõng-a. (Mat. 20:34; Mark 10:46-52) A goma ne-a ne bʋgsem, n pẽg-a a tẽebã sẽn tar pãngã yĩnga. Rẽ poore, a Zeezi maana yel-solemd n kɩt t’a ninã puki.

18. D manesem segd n yɩɩ wãn ne d tẽed-n-taas nins sẽn namsdã? (1 Tesalonik rãmbã 5:14)

¹⁸ Y sẽn tõe n maan to-to tɩ yãmb ne y tẽed-n-taasã zood kell n tall pãnga. Yɩ-y sõmblem soab la nimbãan-zoɛta. Zʋg-sõma-kãens na n sõng-y lame tɩ y “gomd goam sẽn belsd” ne y tẽed-n-taas nins sẽn namsdã. (Karm-y 1 Tesalonik rãmb 5:14.) Tẽeg-y tɩ zoa hakɩɩk sẽn dat yaa a sõng a zoa wã, sẽn yɩɩd fãa “yel-pakr wakate.” (Yel. 17:17) Ned a woto pa zoet a zoa wã nimbãaneg bal ye. A na n maana a sẽn tõe fãa sẽn na yɩl t’a yam gãand bãane. A na n togs-a-la goam sẽn kengd raoodo, la a sõng-a sõng-vẽenega.

19. Wãn to la d tõe n maan d tẽed-n-taasã neere, la d wilg tɩ d zoeta b nimbãanega? (Ges-y fot-rãmbã me.)

¹⁹ Wãn to la y tõe n maan y tẽed-n-taasã neere, la y wilg tɩ y zoeta b nimbãanega? Yaa sɩd tɩ y pa tõe n maan yel-solemd tɩ bũmb sẽn namsd y tẽed-n-taag sa ye. La y tõe n kʋm-a lame. (Mat. 7:12; 1 Pɩy. 3:8) A sã n wa togsd bũmb ning sẽn be a sũurẽ wã bɩ y maag y yĩng n kelg-a. Sã n mik tɩ zemsame bɩ y togs-a goam sẽn na n bels-a. (Yel. 12:25) Ra yɩ-y tao-tao n tags tɩ y wʋmda a yellã vɩʋʋg ye. (Yel. 18:13) Maan-y sũ-mar ne-a, la y ra bao t’a maan bũmb fãa tɩ zems kɛpɩ ye.—Efɛɛ. 4:32.

20. Y rat n yɩɩ zo-bʋg buudu?

²⁰ D sẽn tar zo-rãmb hakɩɩk a Zeova siglgã pʋgẽ wã noom-d-la wʋsgo. La d fãa yaa neb sẽn pa zems zãnga. Sẽn paase, d sʋkã neb wʋsg namsa wʋsg b yãadmẽ, wall wakat a to. Rẽ n so tɩ d fãa mi n maan bũmb wall d yeel gomd n sãam d to sũuri. Baa ne rẽ, d tẽed-n-taasã sikda b mens ne tõndo, n maand sũ-mar ne-do, n maand-d neere, n zoet d nimbãanega, la b sak tɩ d ket n yaa b zo-rãmba, tɩ noom-do. Rẽ n so tɩ tõnd me rat n maan d sẽn tõe fãa, n yɩ zo-rãmb a woto buudu.