Bɩ y gũus ne y sẽn kelgd to-to wã

1-2. a) Bõe la a Zeova maand n kõt a nin-buiidã rũndã-rũndã? (Yɩɩn-sõamyã 23:1, 2, 5) b) Bõe yell la d na n gom sõs-kãngã pʋgẽ?

RŨNDÃ-RŨNDÃ, a Zeova kõta tõnd bũmb wʋsg d tẽebã kengr yĩnga. Rẽ n so tɩ d tõe n yeel t’a Davɩɩd sẽn yeel bũmb ningã yaa sɩda. A yeelame: “A Zeova yaa mam pe-kɩɩma. Bũmb pa na n paoog maam ye.”—Karm-y Yɩɩn-sõamyã 23:1, 2, 5.

² Bũmb a ye a Zeova sẽn tũnugd ne n zãmsd tõnd yaa tigissã. Tigissã sasa, d wae n lebgd n tẽegda bũmb toor-toor d sẽn zoe n miẽ. Baa d sã n “kɩ yẽg sõma sɩdã pʋgẽ,” bõn-kãens yaa tɩlɛ ne-do. (2 Pɩy. 1:12) La rẽ yĩnga, d sã n wa gomd bũmb d sẽn zoe n zãms naoor wʋsg yelle, yaa toog ne-y tɩ y maag y yĩng n kelg bɩ? Sã n yaa woto, sõs-kãngã na n sõng-y lame. A na n tẽeg-d-la bũmb ning sẽn kɩt tɩ tar yõod tɩ d maagd d yĩng n kelgd tigissã sasa wã. D leb n na n yãa sẽn wɛgsd-b sõssã sẽn tõe n maan to-to n sõng neb a taabã tɩ b kelg sõma. Sẽn paase, d na n yãa d ned kam fãa sẽn tõe n maan to-to n tõogd n kelgd sõma tigissã sasa. La d na n deng n baoo sokr leoore: “Sɩd-sɩda, yaa ãnd n zãmsd tõnd tigissã sasa?”

TẼEG-Y TƖ YAA A ZEOVA N GOMD NE TÕNDO

3. Wãn to la a Zeova gomd ne tõndo, la wãn to la wẽn-tũudbã tũnugd ne Biiblã n zãmsd neb a taabã?

³ A Zeova tũnugda ne Biiblã sẽn yaa a Gomdã n gomd ne tõndo. (2 Tɩm. 3:16, 17) A Zeezi ra mii rẽ. A bãng n talla Wẽnnaam Gomdã n zãms nebã sõma, hal t’a kɛlgdbã sok yaa: “Ra-kãngã maana wãn n mi Gʋls-sõamyã woto, n yaool n pa kẽ karengo?” (Zã 7:15) Pʋ-peelem-dãmbã sã n da kelgd a Zeezi sẽn bilgd Wẽnnaam Gomdã võor to-to wã, ra noom-b-la wʋsgo. Pipi kiris-nebã ra rɩkda a Zeezi togs-n-taare. Wala makre, a Poll ne a Apolos. B ra wae n lebgd n togsda goam sẽn be Gʋls-sõamyã pʋgẽ, sẽn na yɩl n sõng nebã tɩ b bãng a Zeova sẽn dat tɩ b maan bũmb ningã. (Tʋʋ. 17:2, 3; 18:24, 28) Tõnd a Zeova Kaset rãmbã miime tɩ bũmb nins sẽn be d sɛbã pʋsẽ wã, jw teledifiziyõ sõssã, d sõssã pãlã-rãmb la d video-rãmbã tika Biiblã zugu. Neb nins sẽn wat tõnd tigissã pipi wã sã n mi n yã d sẽn tʋmd ne Biiblã to-to wã, wae n lingd-b lame. Neb nins sẽn tar sõss tigissã sasa wã tikda b zãmsgã Biiblã zugu. B pa karemd Biiblã sẽn yetã bal ye. B sõngda kɛlgdbã tɩ b wʋmd Biiblã goamã võore. La b wilgd-b b sẽn tõe n tũ rẽ to-to.—Luk 24:32.

4. Biiblã pʋgẽ b sã n mi n gomd “kelg” la “wʋm” yelle, a võorã tõe n yɩɩ bõe?

⁴ Biiblã pʋgẽ b sã n mi n gomd “kelg” la “wʋm” yelle, a võorã tõe n yaa sake. D sã n wa karemd Biiblã tigissã sasa, yaa a Zeova n gomd ne tõndo. D sã n kelg sõma n bãng a sẽn dat tɩ d maan bũmb ningã, la a sẽn dat tɩ d maan dẽ wã võore, yɩta nana tɩ d sak-a. D tõe n kɩsa sɩd tɩ d sã n maagd d yĩng n kelgd sõma tigissã sasa, n tũud bũmb nins d sẽn bãngdã, a Zeova sũur yaa noogo.—Yel. 27:11.

BÕE YĨNG TƖ D SEGD N MAAGD D YĨNG N KELGD TIGISSÃ SASA?

5. D sẽn nong a Zeova wã kɩtame tɩ d maand bõe? (Zã 4:23, 24; 1 Zã 5:3)

⁵ D kelgda sõma tigissã sasa bala d nonga a Zeova. (Mat. 22:37) D sã n bãngd a Zeova n paasdẽ, d sẽn nong-a to-to wã pãng me na n paasdame. Nonglem-kãng kɩtame tɩ d rat n kelg-a, n sak-a la d waoogd-a tɩ zemsd a sẽn wilg a Gomdã pʋgẽ wã.—Karm-y Zã 4:23, 24; 1 Zã 5:3.

6. Wãn to la tigissã tõe n sõng-d tɩ d bãng n sõng neb a taabã?

⁶ D kelgda sõma tigissã sasa, bala d nonga d taabã. (Mat. 22:39) D tigissã sasa, b wilg-d-la d sẽn tõe n sõng d tẽed-n-taasã la neb nins sẽn nan pa tũud a Zeova wã to-to. Wala makre, Nong-y nebã: Sõng-y-b tɩ b lebg a Zeezi karen-biisã borsiirã sõngda tõnd tɩ d bɩɩsd zʋg-sõma sẽn nafd tõnd koɛɛgã mooneg pʋgẽ. Yãmb getame tɩ yaa toog ne-y tɩ y sɩngd sõsg noog-noog ne nebã bɩ? Sã n yaa woto, bɩ y maagd y yĩng n kelgd y tẽed-n-taasã, b sã n wa maand mak-n-wilg Kiris-nebã vɩɩm la b tʋʋma tigsg sasa.

7. Bõe yĩng tɩ tar yõod tɩ d ket n kelgd a Zeova?

⁷ D kelgda sõma tigissã sasa, bala d nonga vɩɩmã. D sã n dat n paam vɩɩm sẽn tar bark masã la d wa paam vɩɩm sẽn ka sɛtã, d segd n kelgda a Zeova. Yaa woto la a yeel neb nins sẽn da tũud-a pĩnd wẽndẽ wã. (Tõo. 32:44-47) D sã n kelgd sõma tigissã sasa d paamda sagls sẽn na n sõng-d tɩ d kell n tõog toog n gũ dũni-paalgã sẽn watã. (Rom. 8:25) Tara yõod wʋsg tɩ d kelg a Zeova masã menga, bala d bee yaoolem wakatã n segd n kell n gũ.—Mat. 24:42-44; Vẽn. 1:3.

D SẼN TÕE N SÕNG NEB A TAABÃ TO-TO TƖ B KELG SÕMA TIGISSÃ SASA

8. Bõe yĩng tɩ saam-biis nins sẽn lʋɩt taoor n wɛgsd sõssã tigissã sasa wã segd n modgd n paasd b minimã?

⁸ Saam-biis nins sẽn lʋɩt taoor n wɛgsd sõssã segd n modgdame n paasd b minimã nebã zãmsgã wɛɛngẽ, sẽn yɩɩd fãa sẽn wɛgsd-b sõss zãma wã yĩnga. Saam-biig sã n bao sẽk n segl a sõsg sõma, la a wɛgs-a tɩ yɩ vẽeneg t’a goamã yita Biiblã pʋgẽ, tõe n sõnga sẽn nan pa-b a Zeova Kaset rãmbã tɩ b rat n bãng sɩdã, la sõng sẽn zoe n be-b sɩdã pʋgẽ wã tɩ b wʋm Biiblã goam võor n paase, la b ket n tũud a sẽn yetã. Rẽ n so tɩ b sã n wa kõ-y sõsg tigsg sasa bɩ y pa segd n yĩm tɩ y sõsgã tõe n nafa neb a taabã wʋsg ye. D na n goma sagls a wãn yelle. Yaa sagls sẽn tõe n sõng-y tɩ y paas y minimã sõssã wɛgsg wɛɛngẽ. Yaa sɩd tɩ yaa sẽn wɛgsd-b sõss zãma wã yĩngã la b kõ sagl-kãense, la b tõe n sõnga kiris-ned buud fãa, b sã n wa kõ-a sõsg t’a wɛgs tigsg sasa.—2 Tɩm. 4:2; Tɩt 1:9.

9. Bõe la y tõe n maan tɩ y sõsgã võor wʋmb yɩ nana?

⁹ Wɛgs-y sõsgã babs ball-balle. Y sã n wa wɛgsd sõsga y ratame tɩ y kɛlgdbã tõog n wʋm y sõsgã võor nana-nana. Y sã n gom bũmb wʋsg yelle, tõe n yɩɩ toog ne y kɛlgdbã tɩ b wʋm y sõsgã võore. Bõe la y tõe n maan n sõng y kɛlgdbã tɩ b wʋm y sõsgã võor nana-nana? Ad sagls a wãna: 1) Y sõsgã sɩngrẽ bɩ y wilg bũmb nins yell y sẽn na n gomã pʋdg-pʋdga. 2) Y sã n wa gomd bũmb yelle, bɩ y maag y yĩng n gom n sa, n yaas bilfu, la y wilg tɩ y rat n goma bũmb a to yelle. 3) Y sõsgã baasgẽ, bɩ y lebg n kʋms bũmb nins yell y sẽn gomã.

10. Bõe yĩng tɩ tar yõod tɩ y nong bũmb ning yell y sẽn gomdã?

¹⁰ Nong-y bũmb ning yell y sẽn gomdã. Y sã n na n gom bũmb y sẽn nong yelle, y na n goma ne yẽesem. (Yel. 2:4, 5; Tʋʋ. 4:20) Y sã n maag y yĩng n bʋgs bũmb nins yell y sẽn na n gomã, la vɛrse-rãmb nins y sẽn na n karem y sõsgã sasa wã zugu, na n sõng-y lame tɩ y wa nong bõn-kãense. Etazĩni saam-biig a ye sẽn tar yʋʋm pis-yopoe la zak ket n tẽra sõsg a sẽn kelg a bi-bɩɩlem wakatẽ. A yeelame: “M ket n tẽra sõsdã sẽn sagl tõnd to-to tɩ d sã n wa karemd Wẽnnaam Gomdã bɩ d bʋgsdẽ wã. A goma ne yẽesem, n wilg tõnd d sẽn tõe n maan dẽ to-to wã vẽenega. A sõsgã toeema m vɩɩmã. Sõng-m lame tɩ m sã n wa karemd Biiblã bɩ m wʋmd a võor sõma, la kɩt tɩ maam ne a Zeova zoodã pãng paase.”

11. Y sã n wa wɛgsd sõsga, bõe yĩng tɩ yaa sõma tɩ y kõ sagls sẽn yaa takɩ? (1 Tɩmote 4:13-16)

¹¹ Tags-y kɛlgdbã yelle, n kõ-b sagls sẽn yaa takɩ. Y pa segd n wilg kɛlgdbã Biiblã sẽn yetã bal ye. Y segd n sõng-b lame tɩ b bãng b sẽn tõe n tũ Biiblã saglsã to-to. Wala makre, tẽn-tʋmd a Poll wilga a Tɩmote a sẽn tõe n maan to-to n sõng a tẽed-n-taasã Efɛɛze, la a modg t’a tẽebã kell n tall pãnga. (Karm-y 1 Tɩmote 4:13-16.) Tags-y kɛlgdbã yell n bao n bãng bũmb ning sẽn sɩd na n naf-ba, la y sõng-b tɩ b bãng b sẽn tõe n tũ sagls nins y sẽn na n kõ-bã to-to.

12. Y sã n wa wɛgsd sõsga, bõe yĩng tɩ yaa sõma tɩ y gomd wa raasenkamã?

¹² Y sã n wa segend y sõsgã bɩ y togs n yɩlme, n wa tõog n gomd wa raasenkamã. Y sã n gomd wa raasenkamã n pa karemd sebr zugu, yɩta nana ne y kɛlgdbã tɩ b maag b yĩng n kelge, n wʋm y goamã võore. Modg-y n paas-y y minimã karengã la nebã zãmsg wɛɛngẽ borsiirã pʋgẽ, b yeelame yaa: “Gom-y wa raasenkamã, la ne pʋ-peelem, tɩ wilg bũmb ning yell y sẽn gomdã sã n noom-y lame bɩ pa noom-y-yã, la wilg tɩ y kɛlgdbã yell pak-y lame.” Y sã n gomd wa raasenkamã, y kɛlgdbã na n maaga b yĩng n kelge. Y sẽn gomd bũmb ning yellã na n yɩ-b-la noogo, tɩ b rat n tũ y saglsã.

13. Y sã n wa segend y sõsgã, bõe yĩng tɩ yaa sõma tɩ y kos sõsd sẽn tar minim saglse? (Ges-y fotã me.)

¹³ Kos-y sõsd sẽn tar minim saglse. Wãn to la y tõe n maan dẽ? Y sã n wa segl n sa, y tõe n wilg-a-la y sẽn magd n na n wɛgs sõsgã to-to wã, n yeel-a t’a ges tɩ bũmb sã n be be n dat manegr bɩ a togs-yã. A sã n kõ-y sagls bɩ y tũ. Sẽn paase, y tõe n wɛgsa sõsgã t’a kelge, tɩ rẽ poor t’a wilg-y y sẽn tõe n maan to-to tɩ yɩ sõma n paase. (Yel. 1:5) Pa wakat fãa la d mi zĩig ning d sẽn segd n demsã ye. Rẽ n so tɩ saam-biigã sã n kelg y sõsgã bɩ a tõe n wilg-y y sẽn tõe n maan to-to tɩ y goamã võor wʋmb yɩ nana n paase, tɩ kɛlgdbã bãng b sẽn tõe n tũ saglsã to-to. D raabã yaa d paas d minimã nebã zãmsgã pʋgẽ, n tõog n sõng d taabã tɩ b wʋm Biiblã goamã võor sõma, n tõog n tũ a saglsã.a

D SẼN TÕE N MAAN TO-TO N KELGD SÕMA TIGISSÃ SASA

14. D tagsg segd n yɩɩ wãn ne Wẽnnaam saglsã? (Yɩɩn-sõamyã 119:24, 111, 167)

¹⁴ D sã n ning d yamẽ tɩ Wẽnnaam saglsã tara yõod wʋsgo, na n sõng-d lame tɩ d kelgd sõma tigissã sasa. Rũndã-rũndã sẽn yaa yaoolem wakatã tɩ yɛlã yaa kãn-kãe “hal tɩ vɩɩmã lebg toogã,” d rata Wẽnnaam saglsã sẽn na yɩl n tõog n mao ne zu-loeesã. (2 Tɩm. 3:1) Rẽ n so tɩ baa d sã n wa zãmsd bũmb d sẽn zoe n wʋm tɩ b gom a yell naoor wʋsg bɩ pa sãamd d sũur ye. D modgd n talla Yɩɩn-sõamyã 119 soabã gʋlsd yamã buudu.—Karm-y Yɩɩn-sõamyã 119:24, 111, 167.

15. Bõe n tõe n sõng-d tɩ d ket n getẽ tɩ bũmb nins d sẽn zãmsd tigissã sasa wã tara yõod wʋsgo?

¹⁵ Yɩta sõma tɩ d ket n get zãmsg ning d sẽn paamd tigissã sasa wã wa kũun sẽn yit a Zeova nengẽ. Israyɛll nebã manesem sẽn yɩ to-to a Zeova sẽn wa n kõt-b maandã we-rasempʋɩɩgẽ wã tõe n sõng-d-la zĩ-kãng wɛɛngẽ. (Yik. 16:15, 31) Yaa vẽeneg tɩ sɩngrẽ wã Israyɛll nebã sũur da nooma ne mannã. Ra yaa rɩɩb sẽn yit a Zeova nengẽ, rɩɩb sẽn noom la sẽn da kõt b yĩnsã pãnga. La bilf-bilfu, b yamã wa n yii mannã b sẽn da rɩt daar fãa wã. (Sõd. 21:5) Rẽ wilgda tõnd bõe? Wilgdame tɩ baa bũmb nins d sẽn zãmsd tigissã sasa wã kẽer sẽn yaa bũmb d sẽn wʋm naoor wʋsgã, d pa segd n wa get-b wa bũmb sẽn pa tar yõod ye. D ningda d yamẽ tɩ tigissã yaa kũun sẽn yit a Zeova nengẽ. Bũmb nins d sẽn zãmsd tigissã sasa wã tara yõod wʋsg ne-do. D segd n ninga d yamẽ tɩ tʋm-tʋmd sẽn tũud sɩd la sẽn tar yamã maagda a yĩng n yãkd bũmb nins d sẽn na n zãms tigissã sasa wã. Bũmb nins d sẽn zãmsdã tõe n sõng-d lame tɩ d bãngd n yãkd yam la d wa paam vɩɩm sẽn ka sɛtã.—Yel. 3:13, 16-18; Zã 17:3.

16. Bõe n sõngd neb sẽn sɩng n tũud a Zeova hal sẽn kaoos tɩ b ket n kelgd sõma tigissã sasa? (Ges-y zĩ-gũbrã me: “Sagls sẽn na n sõng-y tɩ y kelgd sõma.”)

¹⁶ D tõe n maana bũmb kẽer tɩ sõng-d tɩ d kelgd sõma tigissã sasa. Ad d tẽed-n-taas sẽn sɩng n tũud a Zeova hal sẽn kaoos sẽn maand to-to n tõogd n maagd b yĩng n kelgd tigissã sasa. A Asle sẽn sɩng a Zeova tũubã yaa yʋʋm pis-tã la zak masã. A yeelame: “M sã n segl tigsgã sõma, sõngd-m lame tɩ m wa tõog n maag m yĩng n kelge. M sã n pa segl m menga, yaa toog tɩ m zẽk m nug n leok sokre. Sẽn paase m yamã mi n gõodame.” A Zozɛf sẽn sɩng a Zeova tũubã yaa yʋʋm pis-nu la a yiib masã. A yeelame: “M sã n kelgd sõsg sẽn gomd bũmb m sẽn zoe n mi yelle, noom-m lame, baa b sã n goma rẽ yell naoor wʋsgo. Bala nebã sẽn bilgd yɛlã to-to wã yaa toor-toore, tɩ kɩt tɩ m bãngd bõn-paal wakat fãa.” A paasame: “Baa saam-biig sẽn pa mi sõsg wɛgsg sõma sã n wa wɛgsd sõsga, m maagda m yĩng n kelgdẽ. Bala m miime t’a sẽn yetã tika Biiblã zugu, la tɩ yita a Zeova nengẽ.”

17. Bõe me la y tõe n maan tɩ sõng-y tɩ y kelgd sõma tigissã sasa? (Ges-y fotã me.)

¹⁷ Ad bũmb a taab y sẽn tõe n maan tɩ sõng-y tɩ y maagd y yĩng n kelgd sõma tigissã sasa. 1) Y sã n na n dɩ la y yaool n kẽng tigsg bɩ y ra rɩ wʋsgo, sẽn na yɩl n da wa suusdẽ ye. 2) Kẽng-y pĩnda, n bao zĩig n zĩnd nand tɩ tigsgã sɩnge. 3) Ning-y y portaablã wall y tablɛtã silencieux, la y ra bas t’a tiis-y tigsgã sasa ye. 4) Reng-y n tags-y sõsdã sẽn na n gom bũmb ning yellã zugu. 5) Get-y sõsdã la y ra bas tɩ bũmb tiis-y ye. 6) Gʋlsd-y bũmb nins y sẽn bãngdã koɛɛg-koɛɛga, wall y maan desẽ-rãmb sẽn bilgd rẽ. 7) Tags-y vɛrse-rãmb nins a sẽn karemdã zug n bao n bãng b sẽn lokd taab to-to. 8) Sok-y y meng yaa: ‘Wãn to la m tõe n tik bũmb ning a sẽn yetã zug n sõng ned tigingã pʋgẽ wall koɛɛgã mooneg zĩigẽ?’ 9) Nand tɩ y kẽng tigis-kãseng bɩ y reng n karem na-kẽndrã, daar fãa gom-zugã, sõss nins b sẽn na n wɛgsã la sõsg fãa sẽn tik vɛrse ning zugã. 10) Zĩnd-y sɩɩ n kelg mizikã la y ges video-rãmbã sẽn na yɩl tɩ sõssã sã n wa na n sɩng bɩ mik tɩ y seglame n sa n na n kelg a Zeova zãmsgã.

KELL-Y N KELG-Y-YÃ A ZEOVA

18. Bõe yĩng tɩ y segd n ket n kelgd sõma tigissã sasa?

¹⁸ D segd n ket n kelgda sõma tigissã sasa, bala d sã n maand woto, d basdame t’a Zeova sõngd-d tɩ d ket n kẽnd “tɩrlem soayã zutu.” (Yɩɩn. 23:3; 31:3) Sẽn na yɩl n ket n maand sẽn yaa tɩrga, a Zeova saglsã yaa tɩlɛ ne-do. Rẽ n so tɩ y segd n “gũusd ne y sẽn kelgd to-to wã” la y tũud sagls nins y sẽn paamd tigissã sasa wã. (Luk 8:18) Neb nins sẽn kelgd a Zeova wã paamda sũ-noog masã menga, n na n paam vɩɩm sẽn tar bark beoog sẽn wate.—Yɩɩn. 119:2, 14.