Ket-y n paasd-y yãmb ne y pagã wall y sɩdã zoodã pãnga

1. Bõe yĩng tɩ d tõe n yeel tɩ zo-rãmb hakɩɩk yaa a Zeova kũuni?

D SÃ N tar zo-rãmb hakɩɩka, yaa a Zeova kũuni. (Zak 1:17) B nonga Wẽnnaam, la b nong tõnd me. D sũur sã n yaa noogo nooma bãmb me. D sã n wa koms raoodo, b belsda tõndo. Sã n wa yaa tɩlɛ me, b kõt-d-la saglse. B teend-d-la wakat fãa, tɩ d tõe n kɩs-b sɩda. Zo-rãmb a woto sɩd “noogda sũuri”!—Yel. 27:9.

2. Bõe yĩng tɩ tar yõod tɩ pag ne a sɩd modg tɩ b zoodã kell n tall pãnga? (Matiye 19:6)

² Pag ne a sɩd tog n yɩɩ zo-rãmb hakɩɩka. B segd n tẽegame tɩ yɩl tɩ b zoodã kell n tall pãng baooda modgre. B sã n pa maand bũmb nins sẽn paasd b zoodã pãngã, b ned kam fãa tõe n wa tagsdame t’a to wã toog ka be ne-a tɩ sãamd a sũuri, wall yikd a sũur menga. La b sã n maand bõn-kãense, b zoodã tõe n talla pãnga, n yɩɩd zood buud fãa sẽn tõe n zĩnd neb a yiib sʋka. (Karm-y Matiye 19:6.) Sõs-kãngã pʋgẽ, d na n yãa sẽn kẽ-b kãadmã sẽn tõe n maan to-to tɩ b zoodã kell n tall pãnga. La d na n deng n yãa kiris-neb nins sẽn nan pa kẽ kãadmã sẽn tõe n maan to-to n paam ned sẽn zems ne-b n kẽ kãadem, tɩ b yɩ zo-rãmb b vɩɩmã tõre.

Y SẼN TÕE N MAAN TO-TO N PAAM NED T’A YƖ Y ZOA HAKƖƖK Y VƖƖMÃ TÕRE

3-4. Bõe n tõe n sõng ned t’a paam pʋg-sõng wall sɩd-sõngo? (Yel-bũnã 18:22)

³ Nand tɩ d yãk yam bũmb sẽn tar yõod wʋsg wɛɛngẽ, d segd n deng tagsa d yam-yãkrã sẽn tõe n wa ne yɛl ninsã, la a sẽn tõe n naf-d to-to. Yam-yãkr a woto tõe n nafa tõnd wall a wã-d d vɩɩmã tõre. Rẽ n so tɩ d segd n deng n tags tɩ bɩ.

⁴ Ned ning d sẽn na n kẽ kãadem ne wã yãkrã naaga bũmb nins wɛɛngẽ d sẽn tõe n yãk yam tɩ tar yõod n yɩɩdã sʋka. Bala ned ning d sẽn na n yãkã segd n yɩɩ d zoa d vɩɩmã tõre. Sẽn mik tɩ yaa a Zeova n lugl kãadmã, zemsame tɩ d tũ a saglsã n bãng n yãk ned ning d sẽn na n kẽ kãadem ne wã. A ratame tɩ rao paam pʋg-sõngo, tɩ pag me paam sɩd-sõngo. A Zeova mii sẽn yaa sõma ne tõnd wakat fãa. (Karm-y Yel-bũn 18:22; Eza. 48:17, 18) Sagls nins sẽn be a Gomdã pʋgẽ wã tõe n sõnga kiris-ned t’a bãng ned ning a sẽn na n kẽ kãadem ne tɩ zemse.

5. Y sã n wa rat ned n kẽ kãadem, bõe yĩng tɩ y segd n bao ned sẽn deeg lisgu?

⁵ D sẽn deeg lisgã tɛka, d lebga a Zeova zo-rãmba. (Yɩɩn. 25:14) Rẽ n so tɩ y sã n wa rat n kẽ kãadem bɩ y segd n bao ned a Zeova Kaset rãmbã sʋka. (1 Kor. 7:39) Y sã n maan woto, y wilgdame tɩ y tũuda a Zeova noyã. Leb n na n kɩtame tɩ y wa get y pagã wall y sɩdã wa a Zeova kũuni. (Yel. 19:14) Sẽn paase, na n sõngame tɩ y gil zu-loees nins sẽn bao-b “lagem-n-taar sẽn pa zems ne sẽn pa-b tẽedbã” sẽn paamdã. (2 Kor. 6:14) Baa y sã n pa paam ned a Zeova Kaset rãmbã sʋk y sẽn tõe n kẽ kãadem ne, bɩ y ra wa tugd n tagsdẽ tɩ y tõe n kẽe kãadem ne ned sẽn pa tũud a Zeova ye. Y pa segd n tags me tɩ y tõe n baoo ned a woto, y sẽn saagd t’a na n wa saka sɩdã yĩng ye.

6-7. Y sã n wa baood ned n na n kẽ kãadem, sogs-bʋs la y tõe n sok y menga?

⁶ Pa ned sẽn deeg lisg bal n kɩt t’a na n yɩ pʋg-sõng bɩ sɩd-sõng ye. Y sã n yã ned tɩ y yamã kẽ-a, yɩta sõma tɩ y sok y meng sogsg kẽere. Wala makre: ‘A manesem yaa wãn ne a zakã rãmba? A wilgdame tɩ neb a taabã yell pak-a lame, la a mi neb waoogr bɩ? A zo-rãmbã yaa nin-bʋs buudu? Mo-yõsr sã n wa be yẽ ne ned a to sʋka, a manesem yaa wãna? A ratame tɩ b maand yɛlã wa yẽ sẽn datã wakat fãa bɩ, bɩ a sakda neb a taabã raabo, sã n pa wa n mikame tɩ kɩɩsda Biiblã noore? A tara tagsg sẽn zems ligdã wɛɛngẽ bɩ?’

⁷ Y leb n tõe n soka y meng yaa: ‘Ned ning mam yamã sẽn kẽ wã nonga a Zeova ne a sũur fãa bɩ? A modgd n yeelgda “nin-paalgã” bɩ? A na n sõnga maam tɩ m kell n tũ a Zeova sõma bɩ? D sẽn dat n maan bũmb nins a Zeova tʋʋmdã pʋgẽ wã yaa a ye bɩ? Wõnda d na n wa lebga zo-rãmb hakɩɩk sẽn nong taab wʋsg bɩ?’ (Kolo. 3:9, 10) Y sã n yaa saam-bi-poak bɩ y sok y meng yaa: ‘Rẽ yĩnga, saam-biigã na n yɩɩ mam zoa hakɩɩka, la a tʋm a zak sobendã tʋʋmd me sõma bɩ?’ (1 Kor. 11:3) Y sã n yaa saam-biig bɩ y sok y meng yaa: ‘Saam-bi-poakã na n teela maam m yam-yãkr toor-toorã pʋgẽ, baa m sẽn na n mi n tudgdẽ wã bɩ?’ Yɩl n paam sogs-kãensã leoorã baooda sẽka. Rẽ n so tɩ y segd n bao n bãng y to wã sõma y sẽn wat n dood taabã sasa.

8-9. Neb sã n wa rood taaba, bõe n tõe n sõng-b tɩ b bãng n yãk yam? (Ges-y fotã me.)

⁸ Y sã n bao n bãng ned ning y yamã sẽn kẽ wã sẽn sɩd yaa ned ning buudu, y bãngd n yãka yam. Bao-y n bãng-y neb a taabã sẽn get-a to-to. Y tõe n soka neb a taab n bãng zʋg-sõma kẽer a sẽn tare, la tigingã neb sẽn get-a to-to. Wala makre, a yaa sik-m-meng soaba, nin-sõng la ned sẽn pa dem-dem bɩ? A Saara sẽn yaa saam-bi-poak sẽn be Guyannã wilga a sẽn maan to-to n bãng a sɩd a Dãniyɛll sẽn yaa ned ning buudã, n yeel yaa: “Mam soka neb a taab n bãng b tagsg sẽn yaa a soab a Dãniyɛll zugu. Wala makre, mam sõsa ne saam-biig ning sẽn da naag a Dãniyɛll tɩ b be ro-yɛngã, ne b tigingã kãsem-soab a ye, la ne d tẽed-n-taas sẽn mi maam ne a Dãniyɛll sõma. M leb n sõsa ne a Dãniyɛll tigingã saam-bi-pogse.” Sẽn paase, y tõe n yeela ned ning y yamã sẽn kẽ wã tɩ bũmb sã n bee y sẽn segd n bãng bɩ a togs-yã. Tõe n yaa bũmb sẽn maan pĩndã, wall bũmb sẽn be rũndã-rũndã. Yɩta sõma tɩ y bãng bõn-kãense, bala bũmb kẽer tõe n waa ne zu-loees y kãadmã poore.

⁹ Tõe tɩ y yãa yɛl kẽer y to wã nengẽ tɩ kɩt tɩ y sãmbd a sã n na n yɩɩ pʋg-sõng wall sɩd-sõngo. Pa rẽ bɩ yaa y tẽed-n-taas tẽeb sẽn bɩ n togs-y t’a tara zʋg-wẽns kẽere. Sã n yaa woto bɩ y ra maan wa yell kae ye. Y sã n tũ sagls nins d sẽn yã wã, y na n bãnga y sã n tõe n yãka yam n kẽ kãadem, bɩ y segd n basame tɩ sa.a Masã, d na n bao n bãnga sẽn zoe n kẽ-b kãadmã sẽn tõe n maan to-to tɩ b zoodã kell n tall pãnga.

NAAGD-Y TAAB N MAAND BŨMB KẼER SẼN PAASD Y ZOODÃ PÃNGA

10. Bõe yĩng tɩ yaa sõma tɩ pag ne a sɩd mi n be ne taaba?

¹⁰ Pag ne a sɩd sã n dat tɩ b zoodã la b kãadmã kell n tall pãnga, b segd n baooda weer n mi n be ne taaba, baa b sã n tara tʋʋm wʋsgo. Woto b paamd n sõsa ne taab tɩ b ned kam fãa togs a to wã bũmb nins a sẽn maan daarã pʋgẽ, bũmb ning sẽn be a sũurẽ, n wilg a to wã a nonglem, la b naag taab n maan bũmb kẽer sẽn noom-ba.

11. Bõe n tõe n sãam pag ne a sɩd zoodo?

¹¹ Pag ne a sɩd sẽn yaa zo-rãmb hakɩɩk pa na n dat n zãag ne taab ye. Yaa sɩd tɩ b pa tõe n be ne taab wakat fãa ye. La b sã n zãag taab n kaoose, tõe n waa ne yelle. Wala makre, kẽer tɩ bee tẽng a to n tʋmdẽ, n tõe n kaoos wʋsg n pa yã b zakã rãmb ye. Tõe tɩ rẽ kɩtame tɩ b paamd ligd wʋsgo, la b sẽn zãag ne b pagã wall b sɩdã n kaoosã tõe n waa ne zu-loees b kãadmã pʋgẽ.

12-13. a) Bõe la kiris-neb kẽer sẽn kẽ kãadem maand sẽn na yɩl n paamd sẽk n be ne taaba? (Ges-y fotã me.) b) Yãmb ne y pagã wall y sɩdã zoodã yõod segd n taa zĩ-bʋg ne-yã? (Ges-y zĩ-gũbrã: “Yãmb pagã bɩ y sɩdã sẽn segd n tall yõod to-to ne-yã.”)

¹² Bõe la d tẽed-n-taas sẽn kẽ kãadem maand sẽn na yɩl n paamd sẽk n be ne taaba? A Leya sẽn be Guwammã yeelame: “Maam ne m sɩdã nong n naagda taab n maand bũmb toor-toore. D pa wae n yit d yembr ye. D zo-rãmb sã n bool-d me, d tũuda taab n kẽnge.” A Rogsan sẽn be Etazĩni wã me yeelame: “D tʋʋmã sẽn tar paasgã, d wa n yãkda wakat takɩ tõnd d yiibã sẽn na n be ne taaba, wa d sẽn yãkd wakat takɩ bũmb a taab sẽn tar yõod wʋsg yĩngã.” (Ges-y Amos 3:3.) Ad a Damiyẽ sẽn be Fãrensã sẽn yeele: “D ned kam fãa bao n bãnga bũmb kẽer a to wã sẽn nong bũmb ninsã zugu. Bilf-bilfu, d ned kam fãa wa n nonga bũmb nins a to wã sẽn nongã.” (Mat. 7:12) A Kati me sẽn be Etazĩni wã yeelame: “D mi n yãka wakat n dɩgl d portaabl-dãmbã kɛɛnga, sẽn na yɩl n sõs ne taab tɩ bũmb da tiis-d ye.”

¹³ Sẽn yɩɩd fãa, tara yõod tɩ sẽn kẽ-b kãadmã naagd taab n maand bũmb nins sẽn paasd b tẽebã pãngã. A Miryam sẽn be Fãrensã yeelame: “Yibeoog fãa d ned kam fãa karemda Biiblã, tɩ rẽ poor bɩ d sõs ne taaba, n togs bũmb nins sẽn yɩ-d noogo, la d sẽn tõe n tũ bũmb ning d sẽn bãngã to-to. D sẽn maand woto wã nooma maam wʋsgo.” A paasame: “Bũmb a to sẽn noom maam wʋsg yaa d sẽn mi n naag taab n pʋʋse, tɩ m neẽ tɩ m sɩdã nonga a Zeova ne a sũur fãa wã.” A Kati sẽn yaa saam-bi-poak ning yell d sẽn zoe n gomã yeelame: “Bũmb sẽn noom maam ne m sɩdã wʋsg yaa d sã n wa naag taab n moond koɛɛgã. D ned kam fãa sã n kelgd a to wã sẽn gomd bũmb nins d sẽn tẽedã yelle, paasda d nonglmã pãnga, la paasd d bãngrã koɛɛgã mooneg wɛɛngẽ.”—Yel. 27:17.

Y SÃ N WA TAR ZU-LOEES BƖ Y KELL N GÃD TAABA

14-15. Pag ne a sɩd sã n wa tar zu-loees b kãadmã pʋgẽ, bõe yĩng tɩ b segd n maan b sẽn tõe fãa n welg-ba? Rɩk-y makre.

¹⁴ Pag ne a sɩd sẽn yaa neb sẽn pa zems zãngã yĩnga, b pa tõe n pa paam zu-loees b kãadmã pʋgẽ ye. Biiblã yeelame tɩ sẽn kẽed-b kãadmã “na n paama zu-loeese.” (1 Kor. 7:28) Neb sẽn kẽ kãadem sã n wa tar zu-loeese, b segd n maana b sẽn tõe fãa n welg zu-loeesã, la b kell n gãd taaba.

¹⁵ D rɩk makr ne neb sẽn na n tar roog wall bũmb sẽn tar yõod wʋsg ne-ba, tɩ sãame. Yaa vẽeneg tɩ b na n yãka yam n lebs n maneg-a. Tõe tɩ b na n kẽesa ligd la sẽk wʋsg n lebs n maneg-a, baa tʋʋmdã sã n na n dɩka yʋʋma. Bõe yĩnga? Bala roogã bɩ bũmbã tara yõod wʋsg ne-ba. Woto me, kãadem fãa tara yõod wʋsgo. Baa sẽn kẽ-b kãadem tɩ b zĩnd-n-taarã noom wʋsgã mi n tara zu-loees la mo-yõsa. La neb sẽn kẽ kãadem zĩnd-n-taar sã n pa noomẽ, bũmb bee b sẽn tõe n maan tɩ le yɩ noogo, wa b sẽn tõe n lebs n maneg roog bɩ bũmb a to sẽn sãamã. Yaa sɩd tɩ lebs n maneg kãadem baooda sẽk la modgre. La a Zeova sã n ne pag ne a sɩd sẽn maand b sẽn tõe fãa sẽn na yɩl n paas b zoodã pãng la b kell n zĩnd ne taaba, noom-a-la wʋsgo. (Mal. 2:16) B sã n maand woto, b pa wilgd tɩ b nonga taab la b waoogd taab bal ye. B wilgdame me tɩ b nonga a Zeova sẽn yaa kãadem Lugundã, la b waoogd-a.

16. Pag ne a sɩd sã n wa tar zu-loe-kɛgems b kãadem pʋgẽ, wãn to la 1 Korẽnt rãmb 13:4-8a tõe n sõng-ba? (Ges-y fotã ne zĩ-gũbrã me: “Bõe n tõe n sõng-y tɩ y paas y zoodã pãnga?”)

¹⁶ Zu-loees sã n wa be y kãadmã pʋgẽ bɩ y ra yɩ tao-tao n welg taab ye. (1 Kor. 7:10, 11) Sok-y y meng yaa: ‘Bũmb pa be m sẽn tõe n maan n paas d zoodã pãng sɩda?’ Lebg-y n ges-y Biiblã sẽn yet bũmb nins d sẽn tõe n maan n wilg d nonglmã, la y ges y sẽn tõe n tũ 1 Korẽnt rãmb 13:4-8a goamã to-to n maneg n wilg y to wã y nonglem. (Karm-y-yã.) Ra baood-y y sẽn na n maan to-to n bas y pagã bɩ y sɩdã ye. Maand-y y sẽn tõe fãa sẽn na yɩl tɩ y nonglmã le paam pãng wa pĩndã. Ra tagsd-y bũmb nins y to wã sẽn segd n toeemã yell wʋsg ye. Tagsd-y yãmb mengã sẽn tõe n maan bũmb ning tɩ y kãadmã le yɩ noogã yell n yɩɩda. Pʋʋs-y-yã a Zeova n kos t’a sõng-yã. Tõnd sɛbã pʋsẽ la d video-rãmbã pʋsẽ, y tõe n paama sagls sẽn na n sõng-yã. Y leb n tõe n kosa kãsem-dãmbã wall kiris-neb a taab tẽeb sẽn bɩ sõngre. Biiblã maka kãadmã ne wĩir sẽn kal a tãabo, t’a Zeova yaa wĩir ning sẽn tar pãng n yɩɩd b tãabã sʋka. Rẽ n so tɩ yaa y sẽn na n maand yɛlã wa a Zeova sẽn datã bal la y kãadmã na n tall pãnga.—Koɛ. 4:12.

17. Bõe la neb nins sẽn dat n wa kẽ kãadmã ne sẽn zoe n kẽ-b kãadmã tõe n maan n paam sũ-noogo?

¹⁷ A Zeova ratame tɩ neb nins fãa sẽn tũud-a wã paam sũ-noogo, b rat n wa kẽe kãadem tɩ b zoe n kẽe kãadem me. Woto wã, y sã n nan pa kẽ kãadem la y magd n na n wa kẽ kãadem bɩ y maag y yĩng n bao pʋg-sõng wall sɩd-sõng t’a yɩ y zoa y vɩɩmã tõre. La y sã n zoe n kẽe kãadem bɩ y ket n paasd yãmb ne y pagã wall y sɩdã zoodã pãnga. Zu-loees sã n wa be y kãadmã pʋgẽ bɩ y kos a Zeova t’a sõng-y tɩ y welg-ba. Y sã n maan bõn-kãensã fãa, y na n tõog n ‘nooga y sũur’ ne y pagã wall y sɩdã.—Koɛ. 9:9.