Bao-y n wʋm-y Biiblã makr toor-toorã võore

Biiblã pʋgẽ, b mi n dɩka makr n na n sõng tõnd tɩ d wʋm bũmb võore. La mak-kãens võor wʋmb yaa toog ne neb kẽere. (Mat. 13:13) Bõe la y tõe n maan tɩ sõng-y tɩ y wʋm Biiblã makr toor-toorã võor sõma? Ad bũmb a wãn y sẽn tõe n maane:

• Bao-y n bãng-y bũmb ning võor b sẽn dat tɩ d wʋmã, la b sẽn mak-a ne bũmb ningã. Wala makre, Vẽnegr 3:3 pʋgẽ, a Zeezi yeelame t’a wata wa wagdre. A sẽn dat tɩ d wʋm bũmb ning võorã yaa t’a watame, n dɩk rẽ n mak ne wagdr sẽn wat to-to wã.

• Bao-y n bãng-y bũmb ning sẽn kɩt tɩ bũmb a yiibã wõnd taabã. Bao-y n bãng-y bũmb nins sẽn kɩt tɩ b rɩk bũmb n mak ne a to wã, la b yiibã sẽn wõnd taab zĩis ninsi.

• Kɩs-y sɩd tɩ y wʋmda makrã võor sõma. Wakat ninga, ned tõe n tagsdame t’a wʋmda makr võore, tɩ yaool n pa woto ye. Wala makre, a Zeezi sẽn yeel t’a wata wa wagdrã, pa wagdem yell la a ra gomd ye. A ra rat n yeelame bal t’a na n waa wa wagdr sẽn pa togsd la a yaool n wa wã.