D rɩk “belsg fãa Wẽnnaamã” togs-n-taare

1. Bõe yĩng tɩ d segd n bels taaba?

D FÃA paamda “zu-loees toɛy-toɛya,” tɩ mi n kɩt tɩ d rat belsg la raood kengre. (1 Pɩy. 1:6) D sã n paam tɩ neb a taab bels-do noom-d lame. Rẽ n so tɩ d segd n yɩt tao-tao n belsd neb nins sẽn tar zu-loeesã. (Mat. 7:12) A Zeova sẽn yaa “belsg fãa Wẽnnaamã” wilgda tõnd d sẽn tõe n “bels neb a taab zu-loees buud fãa pʋgẽ” to-to. D tõe n dɩka a togs-n-taare, “n belsd taaba.” (2 Kor. 1:3, 4; 1 Tes. 4:18) La d pa belsd d tẽed-n-taasã sẽn yaa tɩlɛ wã yĩng bal ye. D maanda woto d sẽn nong-bã yĩng me. Sõs-kãngã pʋgẽ d na n yãa Biiblã sẽn yet bũmb ning belsgã wɛɛngẽ, d sẽn tõe n bels d taabã to-to, la d sẽn tõe n maan bũmb ning n paam belsgo.

BIIBLÃ SẼN YET BŨMB NING BELSGÃ WƐƐNGẼ

2. Biiblã sẽn yeel tɩ d belsd taabã võor yaa bõe?

² Gɛrkã gom-bil ning b sẽn lebg Biiblã pʋgẽ tɩ “belsã” võor yalmame. Tõe n dat n yeelame tɩ “togs gomd n keng ned raoodo,” wall “sagl-a t’a maan bũmbu.” (Rom. 12:8) Gom-bilã võor meng-meng yaa “bool ned t’a wa f sɛɛgẽ.” Rẽ kɩtame tɩ d tagsd ned sẽn na n yɩ tao-tao n kẽng a zoa sẽn namsd nengẽ n tɩ sõng-a yelle. Bũmb toor-toor n be ned sẽn tõe n maan n bels a to. La wakat fãa, belsg hakɩɩkã yaa sẽn na n keng a soabã raoodo.

3. Yam-bʋg la d tõe n dɩk a Barnabaas nengẽ? (Ges-y fotã me.)

³ D tẽeg ned a yembr sẽn zĩnd pipi kiris-nebã wakatẽ tɩ b ra boond-a t’a Zozɛf yelle. A ra kengda neb a taabã raood la a belsd-b wʋsgo, hal tɩ tẽn-tʋmdbã pʋd-a yʋʋr t’a Barnabaase, sẽn dat n togs tɩ “Belsg biiga.” (Tʋʋ. 4:36) Yʋ-kãng ra zemsa ne a sẽn yaa to-to wã, hal tɩ b pa tol n le bool-a Biiblã pʋgẽ t’a Zozɛf yɛs ye. B ra boond-a lame bal t’a Barnabaase. Biiblã wilgame t’a Barnabaas ra wae n sõngda a tẽed-n-taasã b sã n wa rat sõngre. Wala makre, a Soll sẽn lebg kiris-nedã poor bilfu a lebg n waa Zerizalɛm, n da rat n tɩ naag kiris-nebã. La kiris-nebã ra zoet-a lame, b sẽn mi t’a ra namsd-b lame wã yĩnga. La a Barnabaas tẽe a Solle, n tall-a n kẽng tẽn-tʋmdbã nengẽ.—Tʋʋ. 9:26-28.

D SẼN TÕE N BELS D TAABÃ TO-TO

4. Bõe la d tõe n maan n keng d taabã raood n tɩ yɩɩda? (Rom dãmbã 1:11, 12)

⁴ Sã n tõe bɩ y tɩ kaag-ba. A Zeova tũnugda ne malɛgs la ninsaalb sẽn tũud-a n kengd nebã raoodo. Wala makre, no-rɛɛs a Eli sũur sẽn wa n sãam wʋsgã, a Zeova tʋma malɛk t’a tɩ keng a raoodo. (1 Rĩm. 19:4-7) Tẽn-tʋmd a Poll me ra rat n tɩ kaaga a tẽed-n-taasã, bala a miime tɩ rẽ ra na n paka sor tɩ b tõog n keng taab raoodo. (Karm-y Rom dãmb 1:11, 12.) Y sã n kẽng n na n tɩ kaag ned bɩ y sõs n kaoos bilfu, n tõog n paam weer n keng a soabã raoodo. (1 Kor. 16:7) La y sã n pa tõe n tɩ kaag ned sẽn dat raood kengre, y tõe n boola a soabã ne telefõnne, n gʋls lɛtr wall mesaaz n tool-a tɩ na n sõng-a-la wʋsgo. Y sã n dat n sõng y tẽed-n-taasã, a Zeova tõe n tũnuga ne-y n bels-ba.

5. Bõe n kɩt tɩ mi n yaa toog tɩ d bels d tẽed-n-taasã?

⁵ Yaoolem wakatã, vɩɩmã lebgda toog n paasdẽ. Rẽ n so tɩ tõe n mi n yɩ toog tɩ d tɩ kaag d tẽed-n-taas nins sẽn dat belsgã. D tõe n dɩka yam a Onezifoor sẽn yaa Efɛɛz nedã nengẽ. B sẽn wa n yõk a Poll n pag bãens roog Rommã, a Onezifoor da rat n bels-a lame. Rẽ n so t’a gẽes-a zĩig fãa hal n tɩ yã-a, baa rẽ sẽn da tõe n kɩt tɩ b yõk yẽ me n pag bãens roog wall b kʋ-a mengã. (2 Tɩm. 1:16-18) A Zeova Kaset rãmb nins sẽn be Risi wã me maanda woto, n kengd b tẽed-n-taas nins b sẽn namsd b tũudmã yĩngã raoodo. B sã n mi n tall b nin-yɛng n wa n na n kao a bʋʋdo, a tẽed-n-taasã kẽngda bʋʋdã kaoob zĩigẽ n na n wilg tɩ b teend-a lame, baa rẽ sẽn tõe n kɩt tɩ b yõk bãmb me n kẽes bãens roogã. Bõe la y tõe n maan n segl y menga, n wa tõog n keng y tẽed-n-taag sẽn be yell a woto buud pʋgẽ raoodo? Y tõe n karma kibay sẽn gomd wẽn-tũudb sẽn keng taab raood rũndã-rũndã la pĩnd wẽndẽ yelle, n bao n bãng b sẽn maan to-to n kell n tall sũ-noogo, baa b sẽn wa n namsd-bã.

6. D sã n wa rat n bels d to, wãn to la d tõe n dɩk a Zeova togs-n-taare? (Ges-y fotã me.)

⁶ Maag-y y yĩng n kelge. No-rɛɛs a Eli sẽn wa n yɛɛsdẽ tɩ b na n kʋ-a lame wã, a pelga a pʋg n togs a Zeova bũmb ning sẽn be a sũurẽ wã. Tõnd Wẽnnaamã sẽn yaa nonglmã kelga a goamã sõma, baa ne a sẽn da zoe n mi bũmb ning sẽn namsd-a wã. A Zeova kell n maaga a yĩng n kelg a Eli, baa a sẽn wa n togsd bõn-yɛng n yɩlemdẽ wã. (1 Rĩm. 19:9, 10, 14) A Zeova leb n kelga no-rɛɛs a Habakuk t’a wilg-a namsgã la wẽnemã a sẽn ne wã sẽn namsd-a to-to wã. A maaga a yĩng n kelg-a n pa yik a sũuri, baa a sẽn wa n gomd tɩ wõnd a paoogd-a lame wã. (Hab. 1:2, 3) Rũndã-rũndã me, a Zeova kelgda tõnd pʋʋsgã sõma, baa a sẽn zoe n mi bũmb ning tõnd sẽn datã. Tõnd me tõe n dɩka a Zeova togs-n-taare, n maagd d yĩng n kelgd d tẽed-n-taasã ne waoogre. Wãn to la d tõe n maan dẽ? B sã n wa gomda d pa segd n kʋʋg b goamã ye. Baa b sã n wa togs gomd sẽn pa sɩda, d pa segd n yik d sũur ye. Baa b sã n wa togsd bõn-yɛng n yɩlemdẽ, d “segd n wɩnga ne kelgre.”—Zak 1:19; Koɛ. 7:9.

7. D maanda wãn n bãng bũmb ning sẽn na n sõng d to wã n tɩ yɩɩda?

⁷ Bao-y n bãng-y bũmb ning y sẽn tõe n maan tɩ sõng y to wã n tɩ yɩɩda. D pa tõe n bãng sẽn be ned sũurẽ wa a Zeova ye. La d sã n maag d yĩng n kelg-a, d bãngda d sẽn tõe n maan to-to tɩ sõng-a n yɩɩda. Ra tags-y tɩ y zoe n mii bũmb ning sẽn na n sõng-a wã ye. Tẽeg-y tɩ bũmb ning tõe n kenga yãmb raood yell a woto buud pʋgẽ, n yaool n pa keng yẽ soabã raood ye. D yaa toor-toore. Woto wã, maag-y y yĩng n kelg-a, la y sok-a sogsg ne yam n bãng sẽn be a sũurẽ wã.—Yel. 20:5.

8. Wãn to la a Zeezi bels a Mart ne a Maari, a Lazaar kũumã poore? (Ges-y fot-rãmbã me.)

⁸ D tẽeg a Zeezi sẽn bels a Mart ne a Maari to-to, b tão a Lazaar kũumã poorã yelle. B yiibã fãa sũur da sãama wʋsg b tãoã kũum yĩnga. La a Zeezi sẽn bels-b to-to wã yɩɩ toor-toore. A Mart sẽn wa n gomd ne a Zeezi wã, a Zeezi goma kũum vʋʋgrã yell ne-a, n sõng-a sẽn na yɩl t’a maneg n kɩs sɩd ne rẽ. La a Maari sẽn wa n yãb n wa a Zeezi nengẽ wã, a pa gom kũum vʋʋgrã yell ne-a ye. A naaga a Maari n yãbe, la a sok-a b sẽn mum a Lazaar zĩig ninga. (Zã 11:20-35) Yam-bʋg la d tõe n dɩk a sẽn maan to-to wã pʋgẽ? Neb a taabã belsg wɛɛngẽ, d segd n baood n bãngda bũmb ning sẽn sɩd na n naf-bã. D pa segd n belsd b fãa ne manesem-yɛng ye.

9. Wãn to la d tõe n tũnug ne Biiblã n bels d taabã? (Rom dãmbã 15:4, 5)

⁹ Tũnugd-y ne Biiblã n belsd y taabã. Y sã n tall “Gʋls-sõamyã” n bels ned sẽn namsde, tõe n sõngame t’a saag tɩ manegr n wate. (Karm-y Rom dãmb 15:4, 5.) A sã n kɩs sɩd tɩ manegr n wate, na n kenga a raood n paase. (Eza. 40:31) Y sã n wa rat n keng ned raoodo, y maanda wãn n bãng Biiblã vɛrse-rãmb y sẽn tõe n karme? Neb kẽer gʋlsda vɛrse-rãmb n bĩngi, tɩ b sã n wa rat bɩ b rɩk n gese. Y tõe n yãa vɛrse-rãmb a woto D sẽn tõe n tũ Biiblã sagls to-to sebrã pʋgẽ, zĩig ning b sẽn gʋls tɩ “belsgã.” Y tõe n pʋʋsa a Zeova n kos t’a sõng-y tɩ y bãng y sẽn tõe n tũnug ne a Gomdã to-to n keng ned raood sõma. Y sã n wa rat n bels neda, a vʋʋsem sõngã tõe n tẽeg-y-la vɛrse-rãmb sẽn kengd raoodo.—Zã 14:26.

10. Y sã n wa rat n keng ned raoodo, bõe yĩng tɩ y segd n gom ne bʋgsem?

¹⁰ Gomd-y ne bʋgsem. Gɛrkã gom-bil ning b sẽn lebg Biiblã pʋgẽ tɩ “belsã” tõe n dat n yeelame me tɩ “sagl ned t’a maan bũmbu.” Wakat ninga y sã n wa belsd neda, tõe n yɩɩ tɩlɛ tɩ y sõng-a t’a toeem a tagsg sẽn yaa a soab ne a zu-loɛɛgã. Sã n wa yaa woto bɩ y tags sõma la y yaool n gome, sẽn na yɩl tɩ y goamã naf-a sõma, n da sãam a sũur ye. (Yel. 12:18) A Zeova kõo mak-sõng zĩ-kãng wɛɛngẽ, a sẽn wa n gomd ne a Eli wã. A Eli ra tudgame n tagsdẽ tɩ yaa yẽ a ye bal n tũud a Zeova, la t’a tʋʋmdã pa wom biis ye. La a Zeova maaga a yĩng n kelg a Eli goamã, n pa gom a sẽn tudgã yell ye. (1 Rĩm. 19:15-18) Yãmb me sã n wa rat n bels y tẽed-n-taag bɩ y tags n yaool n gome, la y gom ne bʋgsem. Tigsg sasa, y sã n wa wɛgsd sõsg wall y zẽka y nug n na n leok sokr n keng y tẽed-n-taasã raoodo, bɩ y gom ne bʋgsem, la y ra ning-b taal ye.

11. Naoor wʋsgo, bõe la neb nins sẽn namsdã baooda? (1 Zã 3:18)

¹¹ Sõng-y-b sõng-vẽenega. Naoor wʋsgo, neb nins sẽn namsdã ratame tɩ b sõng-b sõng-vẽenega, pa tɩ b keng b raood ne noor goam bal ye. (Karm-y 1 Zã 3:18.) A Barnabaas kõo mak-sõng zĩ-kãng wɛɛngẽ. Bala a koosa a pʋʋgo, n dɩk ligdã n kõ tɩ b sõng a tẽed-n-taas nins sẽn nan deeg lisg paalem n dat sõngrã. (Tʋʋ. 4:36, 37) Rũndã-rũndã, d tẽed-n-taas wʋsg rɩkda a togs-n-taare, n sõngd neb nins sẽn dat sõngrã ne sõng-vẽenega. A Gabriyɛlla sẽn be Poloyn wã paamame tɩ b sõng-a woto, saag sẽn ni n sãam a zakã poore. A yeelame: “Rabeem yõka maam wʋsgo, tɩ m da maand yɩɩr me. Yɩɩ woto ne m doagdbã sẽn da be ne maamã me. M da pa mi m sẽn na n maaneg ye. La tigims sẽn pẽ tõnd saam-biis n wa n tʋm wʋsgo, n maneg yellã daar-n-yɛng bala. Rẽ kɩtame tɩ m maneg n kɩs sɩd t’a Zeova wilgda a nin-buiidã sore, tɩ b belsd neb nins sẽn namsdã.”

12. Y sã n tõogd toog zu-loees sasa, wãn to la sõngd y tẽed-n-taasã?

¹² Tõog-y toog zu-loees sasa. Tẽn-tʋmd a Poll yeela Tesalonik kiris-nebã t’a sẽn bãng tɩ b tõogda toog n ket n maand sɩd ne a Zeova wã, bels-a lame la keng a raood wʋsgo. Bõe yĩnga? A bãngame t’a sẽn tʋm wʋsg n sõng-bã pa yɩ zaalem ye. (1 Tes. 3:5-8) Sẽn paase a Poll bãngame t’a sã n kell n maan sɩd ne a Zeova zu-loees sasa, yẽ me na n kenga a tẽed-n-taasã raoodo, baa b rãmb nins sẽn zɩ n yã-a wã. (Kolo. 2:1, 2) Woto me, d tẽed-n-taasã sã n ne a Zeova sẽn sõngd tõnd to-to tɩ d tõogd toogã, kengda b raood wʋsgo.

13. D sã n wa rat n keng ned raoodo bõe n yaa tɩlɛ?

¹³ Tall-y sũ-mare. D tẽed-n-taag sã n koms raood tɩ d bao n na n bels-a, a sũ-sãamsã tõeeme n pa sa zĩig pʋgẽ ye. La Biiblã yeelame tɩ d “ket n kengd taab raoodo.” Woto rat n yeelame tɩ pa bũmb d sẽn tõe n maan vugr bal ye. (1 Tes. 5:11) Rẽ n so tɩ d segd n tall sũ-mare, n bels ned ning raood sẽn komsã. (1 Tes. 5:14) La tõnd ned kam fãa mi n data belsgo. Sã n wa yaa woto tõnd nengẽ, bõe la d segd n maane?

Y SÃ N WA RAT BELSGO

14-15. D sã n wa tar zu-loees tɩ sãamd d sũur wall kɩt tɩ d maand yɩɩre, bõe la d segd n maane?

¹⁴ Pʋʋs-y-yã a Zeova n kos sõngre. Y sã n wa tar zu-loees tɩ sãamd y sũur wall kɩt tɩ y maand yɩɩr bɩ y pʋʋs a Zeova, n kos t’a sõng-y tɩ y yam gãand bãane. (Yɩɩn. 94:19) Pelg-y y pʋg n togs a Zeova bũmb ning sẽn namsd-yã vẽenega. (Yɩɩn. 62:8) Yaa sɩd t’a Zeova zoe n mii y zu-loɛɛgã sẽn namsd-y to-to wã nand meng tɩ y pʋʋs-a. La y sã n pelg y pʋg n pʋʋse, wilgdame tɩ y kɩs-a-la sɩda. Sẽn paase a Zeova leokda neb nins sẽn tẽed-a wã pʋʋsg wakat fãa, baa a sẽn leokd to-to wã sẽn tõe n yɩ toor ne sẽn pʋʋs-a wã sẽn datã. (Mark 11:24) Filip rãmb 4:6, 7 sagenda tõnd yaa: “Wilg[-y] Wẽnnaam bũmb nins y sẽn kotã, tɩ rẽ la Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã la y tagsa wã.”

¹⁵ Kos-y neb a taab sõngre. Sõs-y ne y zoa tẽeb sẽn bɩ, wall ne kãsem-soab y sẽn kɩs sɩda, n wilg y yellã sẽn namsd-y to-to wã. Y tẽed-n-taasã tõe n bels-y lame, la b pa tõe n bãng yellã sẽn namsd-y to-to wã wall bũmb ning y sẽn datã tɩ pa yãmb n togs-b ye. (Yel. 14:10) Y tõe n kosa b nin-yend t’a maag a yĩng n kelg-yã, wall t’a wilg-y vɛrse bɩ sõsg a sẽn tagsd tɩ na n kenga y raoodo.

16. Y tẽed-n-taag sã n wa belsd-yã bõe n tõe n maane, la bõe la y segd n tẽege?

¹⁶ Tall-y sũ-mare, la y yɩ sug-kõata. Y tẽed-n-taag sã n wa belsd-yã, a tõe n tudgame. Wala makre, a tõe n yeela gomd wall a maan bũmb tɩ maneg n sãam y sũuri. Sã n wa yaa woto bɩ y maan sũ-mar ne-a. (1 Kor. 13:4, 7) Tẽeg-y tɩ Zak 3:2 yetame: “Ned sã n pa tudgd ne a no-goama, a soab yaa ned sẽn zems zãnga.” Ra yĩm-y tɩ y tẽed-n-taasã rat n sõng-y lame ye. Tẽeg-y me tɩ “sũurã tʋllame, la yĩn-nemsã ka pãng ye.”—Mat. 26:41.

17. Bõe la d rat n maan ne d sũur fãa?

¹⁷ D fãa rata belsg la raood kengre. Bala yaoolem wakatã yɛlã na n ket n tara zẽnebo, tɩ Wẽnnaam bɛɛbã me na n ket n zabd ne tõndo. Woto wã, bɩ d maand d sẽn tõe fãa n belsd taaba.