Kambã yaa “kũun a Zeova sẽn kõte”

NED zoe n kõo yãmb “kũun” tɩ yɩ-y noog wʋsg bɩ? Tõe tɩ yaa ned y sẽn nong wʋsg n kõ-y kũunã. Y manesem yɩɩ wãn ne kũunã? Yaa vẽeneg tɩ y na n gesa a yell neere.

Biiblã yeelame tɩ kambã yaa “kũun a Zeova sẽn kõte.” (Yɩɩn. 127:3) Yaa vẽeneg tɩ kiris-neb nins sẽn tar kambã getame tɩ b kambã yaa kũun sẽn tar yõod wʋsgo, b Ba sẽn be saasẽ wã sẽn kõ-ba. B maanda b sẽn tõe fãa sẽn na yɩl tɩ b paam bũmb nins sẽn yaa tɩlɛ ne b vɩɩmã. B geta b kambã laafɩ yell la b sõngd-b tɩ b tar sũ-noogo. B sõngd-b lame me sẽn na yɩl tɩ b bãng a Zeova sõma.

La bʋko, roagdb kẽer pa get b kambã wa kũun sẽn yit Wẽnnaam nengẽ ye. (Eza. 49:15; 2 Tɩm. 3:1-3) Sãnda rata ne b sũur fãa n ges b kambã yelle, la yaa toog ne-ba, b sẽn maood ne zu-loees toor-toorã yĩnga. Zu-loe-bʋs n kɩt tɩ yaa toog ne roagdbã tɩ b ges b kambã yell sõma? Bõe la a Zeova rat tɩ roagdbã maane? La bõe la roagdb nins sẽn yaa kiris-nebã tõe n maan n tõog n wub b kambã sõma?

ZU-LOEESÃ

Roagdbã la neb a taabã pẽdgrã. Tẽns kẽer pʋsẽ, nebã waoogda roagdb nins sẽn tar kamb wʋsgã. Rẽ n so tɩ neb kẽer getẽ tɩ yaa tɩlɛ tɩ b rog kamb wʋsgo, baa b sã n pa tõe n ges b yell sõma, b zakã rãmb bɩ neb a taab sẽn pẽdgd-b yĩnga.
B tõe n maanda yɩɩr beoog-daarã wɛɛngẽ. Tẽns kẽer pʋsẽ, komã, bãasã la tɩbsg paoong sẽn yaa toogã kɩtame tɩ kambã kiid wʋsgo. Rẽ kɩtame tɩ kẽer yãkd yam n dogd wʋsgo, n tagsdẽ tɩ woto la kamb kẽer na n põs n lebg kãsemba. Sãnda yãkda yam n dogd wʋsgo, n saagdẽ tɩ b sã n wa kʋʋle b kambã na n gesa b yelle. Wae n yaa woto tẽns nins pʋsẽ goosneema wã sẽn pa sõngd sẽn kʋʋl-bã.
Rogmã yaagrã. Tẽns kẽer pʋsẽ yɩl n paam tɩt nins sẽn sõngd ne rogmã yaagrã yaa toogo. Kẽer tõe n paama tɩ-kãense, la tɩt nins sẽn be bãmb babgẽ wã sẽn pa maaneg n yaa sõma wã kɩtame tɩ b yɛɛsd na wa n wa ne bãase. Sãnda pʋd n pa tõe n yaag rogmã, bala tɩta ligd yaa toogo.a

BÕE LA A ZEOVA RAT TƖ ROAGDBÃ MAANE?

Zak rãmb sẽn yi n na n kok pemsem. Ba wã maaga a yĩng n kelgd b bi-puglã t’a gomda, tɩ ma wã reemd ne b bi-riblã. — Baood-y weer n be ne biig fãa

Ges-y tɩ y kambã paam bũmb nins sẽn yaa tɩlɛ ne-bã. A Zeova wilgame tɩ yaa roagdbã n segd n ges tɩ b kamb nins sẽn nan pa kãsembã paam bũmb nins sẽn yaa tɩlɛ ne-bã. A ratame tɩ roagdbã wɩsg b mens n tʋme, sẽn na yɩl tɩ biig fãa paam rɩɩbo, fut la gãag zĩiga. A Zeova ratame me tɩ roagdbã wub b kambã sõma. Rẽ n so tɩ kiris-nebã pa na n kɩt tɩ b kambã loog n bas-b n tɩ be zĩig a to n karemdẽ ye. B ratame tɩ b zĩnd ne-b hal n wa bɩ. B getame tɩ b kambã paam minim la bãngr sẽn na n wa sõng-b b vɩɩmã tõre. Sẽn paase, b wae n bee ne b biig fãa, sẽn na yɩl t’a yã tɩ b nong-a lame, la t’a paamda koglgo. La a Zeova pa baood tɩ roagdbã yɩ rakãag-rãmb ye. Sɩd me, neb nins a Zeova sẽn yãk tɩ b ges a Bi-nongrã yellã ra pa rakãag-rãmb ye. La b wɩsga b mens n tʋm n ges a yell sõma.—Mat. 13:55, 56; Luk 2:24.

Biiblã sẽn yete: “Sɩd-sɩda, ned sã n pa ges a neb yelle, sẽn yɩɩd fãa, a meng zak rãmb yelle, a kɩɩsa tẽebã, la a yaa wẽng n yɩɩd ned sẽn pa tar tẽebo.”—1 Tɩm. 5:8.

A Zeova miime tɩ roagdbã sã n wa kʋʋndẽ, wat n yaa tɩlɛ tɩ b paam tɩ ned ges b yelle. Sɩd me, bũmb a ye kambã sẽn tõe n maan n wilg tɩ b nonga b roagdbã, yaa b sẽn na n ges tɩ b paam sõngr ning b sẽn datã b kʋʋlmã wakate. (Yik. 20:12; 1 Tɩm. 5:4) La roagdbã sã n tagsd b sẽn tõe n sõng b kambã to-to wã yell n yɩɩd b kambã sẽn tõe n sõng bãmb to-to wã, nooma a Zeova.—2 Kor. 12:14.

Sõng-y y kambã tɩ b bãng a Zeova. Roagdb nins sẽn yaa kiris-nebã segdame me n sõng b kambã tɩ wa nong a Zeova la b tũud-a. A Zeova nifẽ, rẽ n yaa bũmb ning sẽn tar yõod n yɩɩd b sẽn segd n zãms b kambã.—Tõo. 6:6, 7.

Biiblã sẽn yete: “Bɩ y kell n wub [y kambã] a Zeova kiblgã la a saglsã pʋsẽ.”—Efɛɛ. 6:4.

A ZEOVA RAT N SÕNG-Y LAME TƖ Y TÕOG N WUB Y KAMBÃ SÕMA

Pag ne a sɩd sẽn zĩ b roogẽ n sõsda. B laka Biibl n dɩgl b taoorã. — Reng-y n sõs-y ne taab n yãk kamb nins sõor y sẽn dat n dogã

Reng-y n segl-y y mense. Y sã n magdame n na n wa rog kamba, bɩ y reng n tags y yɛlã sẽn yaa to-to wã zug neere. Wala makre y sã n dog kamb wʋsgo, y na n paama ligd sẽn sek b rɩɩbo, b fut la b karengã yell gesg sɩda? Y sã n pa na n tõoge, yɩta sõma tɩ y sõs ne y pagã wall y sɩdã n yãk kamb nins y sẽn na n dogã sõore. Y sã n wa sõsd bɩ y tẽeg tɩ y segd n wuba biig fãa tɩ zems ne a Zeova sẽn datã. Yaa sɩd t’a Zeova miime tɩ pa wakat fãa la yɛlã yɩt wa y sẽn da magã ye. (Koɛ. 9:11) La y sã n maand y sẽn tõe fãa n wubd y kambã, a na n ning-y-la barka.

Biiblã sẽn yete: “Sãmbg sẽn kae, sẽn tʋmd-a sõma magb kɩtdame t’a yɛl yãkd nenga, la sẽn yaa-b yãg-yãgã fãa na n baasa ne naongo.”—Yel. 21:5.

“Ãnd n be yãmb sʋk n dat n me gasgo, n pa na n deng n zĩnd n geelg ligd ning a sẽn segd n yiisã, n ges a sã n tara sẽn sek a baasgo?”—Luk 14:28.

Lʋɩɩs-y-yã a Zeova raabã maaneg taoor y zakã pʋgẽ. Lʋɩɩs-y-yã a Zeova tũudmã taoor y zakã pʋgẽ. Y sã n zoe n tara kamba, bɩ y modg n sõng biig fãa t’a nong a Zeova. Sõngd-y-b tɩ b kelgd tigissã sasa tɩ b bãngrã paasdẽ. Modgd-y n maand-y y zak pʋgẽ Biibl zãmsgã semen fãa. Zãms-y y kambã koɛɛgã moonego. Ra bas-y bõn-kãens maanegã ne y kamb nins sẽn zoe n bɩ wã, wall ne neb a taab ye. Yaa zɩɩb sẽn dog yãmb a roagdbã zutu. Yɩl n sõng y kambã tɩ b wa nong a Zeova baooda sẽk la modgre. La y sã n wa ne y kambã sẽn tũud a Zeova ne b sũy fãa, na n kõ-y-la sũ-noog wʋsgo.

Biiblã sẽn yete: “Bũmb ka be sẽn kõt maam sũ-no-kãseng n yɩɩd mam sẽn na n wʋm tɩ mam kambã ket n kẽnda sɩdã pʋgẽ ye.”—3 Zã 4.b

Teeg-y-yã a Zeova. Y sã n magd n na n wa roga kamba, pa rẽ bɩ y sã n zoe n tara kamba, bɩ y kɩs sɩd t’a Zeova sẽn dat tɩ y wub y kambã to-to wã la sõma n yɩɩd yãmb babgẽ wã neb sẽn minim n maand to-to wã.

Fot-rãmbã: 1. Pag ne a sɩd la b biig sẽn naag taab n zĩ tigsg sasa. Biigã zẽka a nug n na n leok sokre. 2. Zak rãmb sẽn naag taab n moond koɛɛgã. Ba wã moonda ne b bi-kãsengã, tɩ ma wã moond ne a yaop a yiibã. — Yɩl n sõng kambã tɩ b wa nong a Zeova baooda sẽk la modgre

Y sã n yãk yam n na n dog n zemse, bɩ y bas y yam t’a Zeova na n sõng-y-la y kʋʋlmã wakate. Baa neb a taabã tagsg sẽn yaa a soaba, ra ges-y tɩ yaa tɩlɛ tɩ y rog kamb sẽn na yɩl tɩ b bao ligd n ges y yell y kʋʋlmã wakat ye. Ra maand-y yɩɩre, n tagsdẽ tɩ y pa na n wa paam ned sẽn na n ges y yell ye. A Zeova pʋlmame t’a na n gesa y yelle, la a pidsda a pʋlemsã wakat fãa.—Zoz. 23:14.

Biiblã sẽn yete: “Teeg a Zeova ne f sũur fãa, la f ra teeg f meng bãngr ye. Fo sẽn maand fãa pʋgẽ bɩ f tags a yelle, la a na kɩt tɩ f soayã yɩ tɩrse.”—Yel. 3:5, 6.

“Mam da yaa bi-bɩɩga, la masã mam kʋʋlame, la mam zɩ n yã tɩ b raag nin-tɩrg n base, wall nin-tɩrg kamb sẽn bõosd rɩɩb ye.”—Yɩɩn. 37:25.

“Bɩ y rengd n baood Wẽnnaam Rĩungã ne a tɩrlmã wakat fãa, tɩ b na paas yãmb bõn-kãens fãa sẽn ketã.”—Mat. 6:33.

Kambã yaa kũun sẽn tar yõod wʋsg a Zeova sẽn kõ roagdbã. A Zeova sã n neẽ tɩ kiris-nebã wubda b kambã wa a sẽn datã, noom-a-la wʋsgo. B geta b kambã yell ne nonglem. B sõngd-b lame tɩ b paamd bũmb nins sẽn yaa tɩlɛ ne b vɩɩmã, n sõngd-b tɩ b bãngd a Zeova la b sõngd-b tɩ b tar sũ-noogo. B rogdame n zemse. B kɩsa sɩd tɩ noy nins Wẽnnaam sẽn gãneg kambã wubr wɛɛngẽ wã n yaa sõma n yɩɩd bãmb babgẽ wã neb sẽn minim n maand to-to wã. Roagdb nins sẽn yaa kiris-nebã sã n maand woto, b wilgdame tɩ bãmb nifẽ kambã yaa kũun sẽn tar yõod wʋsgo, “kũun a Zeova sẽn kõte.”

B pa maand b bãngẽ ye

Roagdb sã n pa rog kamb wʋsgo, vɩɩmã wat n yaa toog ne-b bɩ? Tẽns nins sẽn pa yidg laogã wɛɛngẽ wã pʋsẽ, roagdb wʋsg mi n sokda b mens sok-kãngã. Ad zak soben-dãmb kẽer sẽn be tẽns a woto pʋsẽ sẽn yet rẽ wɛɛngẽ.

B pẽdgda yãmb n dat tɩ y rog kamb wʋsg bɩ?

“N-ye. Baa tigingã neb kẽer maanda woto. Daar a ye, pag ne a sɩd n yeel tõnd yaa: ‘Bõe yĩng tɩ yãmb dog bi-ribl-yɛng bala? Afirik ka, f sã n tar bi-yɛng bala yaa wa f sẽn pa tar biiga. F sã n tar kamb a yiibu, yaa wa f sẽn tar bi-yɛng bala.’ Baa d sẽn wa n dog bi-pugl n paasã, nebã ra ket n pẽdgda tõndo.”—A Zeremi

Y kambã sõorã sẽn pa waoogã mi n namsda yãmb bɩ?

“Ayo. Pʋd n sõnga tõndo. Maam ne m pagã sẽn yãk yam n pa rog kamb wʋsgã kɩtame tɩ d tõog tɩ d zakã ned fãa paam bũmb nins sẽn yaa tɩlɛ ne a vɩɩmã, la sẽn yɩɩd fãa, d tõogame tɩ d fãa tẽebã kell n tall pãnga. Mam roagdbã ra tara kamb wʋsgo. Mam yãa sẽn da yaa toog ne-b to-to tɩ b tõog tɩ d paam bũmb nins sẽn yaa tɩlɛ wã, la b ges d lekollã yelle.”—A Zeremi

Y kambã tagsg yaa wãn ne y yam-yãkrã?

“Tõnd kambã sũy yaa noogo. Bala b neeme tɩ zu-loees kẽer la b pa tare, tɩ kamb nins sẽn tar ba-biis wʋsgã yaool n tarẽ, b roagdbã sẽn pa tõe n ges b yell sõma wã yĩnga.”—A Filip

“D kambã sẽn wa n bɩtẽ wã b sũy ra yaa noogo, bala b ra neeme tɩ d kogend-b lame, la tɩ d nong-b lame. D ra wae n boonda saam-biis la saam-bi-pogs tẽeb sẽn bɩ d zakẽ wã, tɩ b sagend-d tɩ d tʋm a Zeova tʋʋmã ne d sũur fãa. Rũndã-rũndã, d neeme tɩ d kambã rɩkda b togs-n-taare.”—A Karlos

Y sẽn yãk yam n pa rog kamb wʋsgã nafa yãmb bɩ?

“D sẽn yãk yam n pa rog kamb wʋsgã sõngame tɩ d ges d zakã rãmb yell sõma. Mam da tara tʋʋm-sõngo, tɩ sãam yʋʋm a tãab rũndã. D yɛlã sẽn toeemã pa nams tõnd wʋsg ye. Bala d zakã rãmb sẽn pa waoogã yĩnga, yɩl n ges b yell pa baood ligd wʋsg ye.”—A Zeremi

“D sẽn yãk yam n pa rog kamb wʋsgã sõngame tɩ d tõog tɩ d kambã paam bũmb nins sẽn yaa tɩlɛ wã, la d sõng-b tɩ b nong a Zeova. D tõogame n tɩ sõng zĩis koe-moondbã sẽn pa waooge. D kambã sõorã sẽn pa waoogã kɩtame tɩ d ra tõe n paam sẽk n sõs ne biig fãa, la d ges a yelle. D kambã fãa tũuda a Zeova, la b kẽes b mens sõma a tʋʋmdã pʋgẽ.”—A Lenadi

Bõe la y tar n na n yeel roagdbã n keng b raoodo?

“Mam yãame tɩ Yɩɩn-sõamyã 34:10 sẽn yetã yaa sɩda. Be, b yeelame: ‘Bõn-sõng pa na n paoog neb nins sẽn baood a Zeova wã ye.’ A Zeova gesame tɩ maam ne m zakã rãmb paam bũmb nins fãa sẽn yaa tɩlɛ ne-dã.”—A Rafayɛll

a Pag ne a sɩd n yãkd kamb nins b sẽn na n dogã sõore, la b sẽn na n dog wakat ninga. Bãmb n yãkd tɩɩm ning b sẽn na n tall n yaag rogmã. La pa segd n yɩ tɩɩm sẽn basd tɩ pʋg kẽ t’a sãam-a ye. Ned baa ye pa segd n ning-b taal b yam-yãkrã wɛɛngẽ ye. (Rom. 14:4, 10-13) Sẽn paase, kiris-neb nins sẽn kẽ kãadmã tũuda sagls nins sẽn be 1 Korẽnt rãmb 7:3-5 pʋgẽ wã.

b Kamb nins yell b sẽn gomd vɛrse-kãngã pʋgẽ wã yaa kiris-neb kẽer a Zã sẽn sõng tɩ b bãng sɩdã. La roagdbã me sũy yaa noogo, b sã n neẽ tɩ b kambã tũuda a Zeova.