Karemdbã sogsgo

Wakat-bʋg la buud toɛy-toɛyã na n yeel tɩ “laafɩ la bãane”?

Sẽn nan pa kaoose, Gũusg Gasgãa pʋgẽ d paama “Karemdbã sogsgã” sõsg a ye. Sõs-kãng pʋgẽ b wilgame tɩ ka la bilfu, a Zeova na n ninga ‘a tagsg’ “yɩɩl piigã” (bɩ politik pãn-soaadbã fãa) sũyẽ tɩ b rɩk b naamã la b tõogã n kõ “we-rũng sẽn yaa miuugã,” rat n yeel tɩ Nasiõzĩni wã. B boonda rũn-kãng tɩ “we-rũngã bõn-naandgã” me. (Vẽn. 13:14, 15; 17:3, 16, 17) Rẽ poore, “yɩɩl piigã” ne we-rũngã sẽn paam pãng paalmã na n menesa ziri tũudmã dũniyã gill zugu. La wakat-bʋg la buud toɛy-toɛyã na n yeel tɩ “laafɩ la bãane”?b Na n yɩɩ nand tɩ b sãam ziri tũudmã bɩ, bɩ na n yɩɩ rẽ poore?—1 Tes. 5:3.

Koɛɛg-koɛɛga, d pa mi sẽn na n yɩ wakat ning takɩ la b na n yeel tɩ “laafɩ la bãanã” ye. D sã n da mi sẽn na n yɩ to-to wã vẽenega, ra pa na n yɩ tɩlɛ tɩ d yɩ gũusdb ye. La a Zeezi sagla a karen-biisã naoor wʋsg tɩ b “kell n gũ.” (Mat. 24:42; 25:13; 26:41) Bɩ d gom bãngr-gomd ning Wẽnnaam sẽn vẽneg tẽn-tʋmd a Poll t’a gʋls lɛtr ning a sẽn tool Tesalonik kiris-nebã pʋgẽ wã yell masã.

A Poll yeelame: “Wakat ning b sẽn na n yeele: ‘Laafɩ la bãane!’ Wakat kãnga, sãoong na n ling-b lame n wa b zut zĩig pʋgẽ.” (1 Tes. 5:2, 3) Tõnd sɛbã pʋsẽ, ad b sẽn wae n bilgd a Poll goamã võor to-to: B na n yeelame tɩ “laafɩ la bãan” bilf nand tɩ to-kãsengã sɩnge, tɩ to-kãsengã sɩngd ne Babilon-kãsengã bɩ dũni gill ziri tũudmã sãoongo. B sẽn na n yeel tɩ laafɩ la bãanã n yaa yaoolem bãnd sẽn wilgd tɩ to-kãsengã na n sɩngame.

La d sẽn maag d yĩng n zãms bãngr-gomdã poore, d yãame t’a võorã wʋmb tõe n yɩɩ toore. Tõe tɩ na n yɩɩ ziri tũudmã sãoong poor la b na n yeel tɩ “laafɩ la bãanã.” Bõe yĩng tɩ d tõe n yeel woto? D gom bũmb a wãn yelle.

Bõe la ziri tũudmã maand zabã wɛɛngẽ? Biiblã yeelame: “Yaa [“pʋg-yood-kãsengã” nengẽ, bɩ Babilon-kãsengã] pʋgẽ la b yã . . . neb nins fãa b sẽn kʋ tẽngã zugã zɩɩm.” (Vẽn. 17:1, 5; 18:24) Hal pĩnd wẽndẽ n tãag masã, pʋg-yood-kãsengã pirsa buud toɛy-toɛy tɩ b zab taaba, la a mi n kɩt tɩ nebã tʋm nen-kɛglem tʋʋma, wall b kʋ neb milyõ-rãmb menga. Ziri tũudmã yaa sabab tɩ zab la nen-kɛglem tʋʋm beẽ, a pa wat ne laafɩ la bãan ye. Rẽnd tõe tɩ yaa buud toɛy-toɛyã sã n wa tõog n sãam Babilon-kãsengã poor la b na n yeel tɩ “laafɩ la bãane,” la d pa tõe n kɩs sɩd tɩ na n yɩɩ woto ye.

B sã n yeel tɩ “laafɩ la bãanã” poore bõe n na n maane? A Poll yeelame: “Wakat kãnga, sãoong na n ling-b lame n wa b zut zĩig pʋgẽ.” (1 Tes. 5:3) Buud toɛy-toɛyã sã n na n yeel tɩ “laafɩ la bãan” nand tɩ b sãam ziri tũudmã, rẽnd na n kaoosa bilf tɩ bãmb meng sãoongã yaool n ta. La a Poll yeelame tɩ sãoongã na n ling-b lame, la tɩ na n yɩɩ zĩig pʋgẽ. Rẽnd tõe tɩ buud toɛy-toɛyã na n yeelame tɩ “laafɩ la bãan” ziri tũudmã sãoong poore.

A Zeova nin-buiidã manesem na n yɩɩ wãn ne bãngr-gomdã pidsgu? A Poll yeelame: “M saam-biisi, yãmb pa be lik pʋgẽ, tɩ ra-kãng na n wa ling yãmb wa beoog vẽegr sẽn na n ling wagda ye.” (1 Tes. 5:4) Tags-y n ges-y-yã: B sã n yeel tɩ “laafɩ la bãan” ziri tũudmã sãoong poore, a Zeova nin-buiidã na n bãngame tɩ buud toɛy-toɛyã sãoong ta n saame. La sã n yaa ne buud toɛy-toɛyã, b yam na n gãee bãane, hal tɩ sãoongã wa ling-b wa wagdre.

Woto wã, bõe la d gũuda? Ka la bilfu, “yɩɩl piigã” ne we-rũng ning b sẽn na n kõ b pãngã la b tõogã na n sãama ziri tũudmã. Rẽ n na n yɩ to-kãsengã sɩngre. D miime me tɩ wakat n na n wa zĩnd tɩ buud toɛy-toɛyã yeel tɩ “laafɩ la bãane.” Rẽ na n yɩɩ wakat-bʋgo? D yãa bũmb a yiibu. Pipi, tõe tɩ na n yɩɩ nand tɩ b sãam ziri tũudmã. Yiibu, tõe tɩ yaa politik pãn-soaadbã sã n wa sãam ziri tũudmã zãng la b na n yeel tɩ laafɩ la bãane. Wakatã sã n ta la d na n bãng yɛlã sẽn na n yɩ to-to. Naoor wʋsgo yaa Biiblã bãngr-goam pidsg wakat bɩ b pidsgã poor la d wʋmd b võor sõma.—Ges-y Zã 12:16.

La bũmb ning sẽn tar yõod n yɩɩd ne tõnd pa bãng wakat ning buud toɛy-toɛyã sẽn na n yeel tɩ “laafɩ la bãanã” ye. Yaa kell n maan sɩd ne Wẽnnaam. D segd n ‘kell n gũume la d modg tɩ d yamã ket n vẽenẽ’ sẽn na yɩl n segl d meng n sa, baa yɛlã sẽn na n yɩ to-to.—1 Tes. 5:6.