Segl-y y menga, zu-loees nins y sẽn tõe n paam y lisgã poorã yĩnga

1-2. Bõe la y tõe n maan n segl y meng zu-loees nins y sẽn tõe n paamã yĩnga? Rɩk-y makre.

D MIIME t’a Sʋɩtãan dũniyã pʋgẽ, d pa tõe n pa paam zu-loees ye. A Zeezi yeela a karen-biisã yaa: “Bũmb nins sẽn tõe n kɩt tɩ ned lak n lʋɩ wã pa tõe n pa zĩnd ye.” (Mat. 18:7) Rẽ n so tɩ d segd n segl d menga, zu-loees nins d sẽn tõe n paamã yĩnga. Zu-loees kẽer tõe n tũu ne d tẽed-n-taasã sababo.

² D rɩk makre. B sagenda a Zeova Kaset rãmbã wakat fãa tɩ b segl b mens sabab-wẽns yĩnga. Wãn to la d tõe n maan dẽ? Pipi, d rengd n tagsa sabab-wẽns nins sẽn tõe n wa tõnd babgẽ wã yelle. Tara yõod tɩ d maan dẽ, sẽn yɩɩd fãa d sã n yaa sãan tõnd sẽn beẽ wã. D sã n bãng sabab-wẽns nins sẽn tõe n wa wã poore, d na n bao n bãnga d sẽn tõe n segl d meng to-to sabab-wẽng fãa yĩnga. (Yel. 21:5) Woto me, d na n bao n bãnga zu-loees nins d sẽn tõe n paame, d sẽn lebg a Zeova Kaset soabã poore, la d segl d meng masã meng sẽn na yɩl tɩ zu-loe-kãens sã n wa, bɩ mik tɩ d mii d sẽn segd n maanega. D sã n maan woto, zu-loe-kãens pa na n nams tõnd wʋsg ye. B leb n pa na n sãam tõnd ne a Zeova zoodã ye. (Yɩɩn. 17:5) Rẽ n so tɩ d na n gom zu-loees a tãab d sẽn tõe n paam yelle, la d bao n bãng d sẽn tõe n segl d meng to-to zu-loɛɛg fãa yĩnga.a

Y TẼED-N-TAAG N MAAN BŨMB N SÃAM Y SŨURI

3. Zu-loe-bʋg la d tõe n paam tigingã pʋgẽ?

³ Yãmb ket n tẽra y sẽn wa tigsg pipi, n yã nonglem ning sẽn be a Zeova nin-buiidã sʋkã bɩ? Rẽ kɩtame tɩ y kɩs sɩd tɩ y bãnga tũudum hakɩɩkã n bak bɩ? (Zã 13:35; Kolo. 3:12) Yɩɩ woto ne a Balãndin.b La a lisgã poore, bũmb a sẽn da pa tẽed n maane. A yeelame: “Saam-bi-poak n maan bũmb n sãam m sũuri. M mikame me t’a nong n wɩta neb a taabã. Rẽ linga maam wʋsgo. M Biiblã zãmsg sasa la tigissã sasa, m bãngame t’a Zeova Kaset rãmbã yaa neb sẽn nong laafɩ, la maan-neer dãmba.” Yaa sɩd tɩ y tẽed-n-taasã modgdame n bɩɩsd zʋg-sõma, la b yaa neb sẽn pa zems zãnga. (Efɛɛ. 4:23, 24; 1 Zã 1:8) Rẽ n so tɩ b nin-yend tõe n yeel gomd wall a maan bũmb n sãam d sũuri. (Zak 3:8) Bʋko, yɛl a woto kɩtame tɩ neb kẽer bas a Zeova tũubu.

4. Bõe la d tõe n maan n segl d menga, d tẽed-n-taag sẽn tõe n wa maan bũmb n sãam d sũurã yĩnga? (Efɛɛz rãmbã 4:32)

⁴ Bõe la y tõe n maan masã meng n segl y menga, y tẽed-n-taag sẽn tõe n wa maan bũmb n sãam y sũurã yĩnga? Tũ-y sagl ning sẽn be Efɛɛz rãmb 4:32. (Karm-y-yã.) Y sã n maand y sẽn tõe fãa n maand neb a taabã neer la y kʋmd-ba, na n sõngame tɩ y gil zu-loees wʋsgo. Sakd-y n kõt-y y taabã sugri, b sã n wa beeg-yã. Bõe la y tõe n maan tɩ sõng-y rẽ wɛɛngẽ? Tagsd-y yãmb sẽn kot a Zeova sugr y beegr toor-toorã yĩng t’a sakd n kõt-y sugrã yelle. (Mat. 6:12) Y sã n tẽeg a Zeova sẽn kõ-y sugr naoor wʋsgã yelle, na n yɩ nana tɩ y sakd n kõt y taabã sugri.

5. Ned sã n maan bũmb n sãam d sũuri, bõe la Biiblã yeel tɩ tõe n sõng-do? (Yel-bũnã 19:11) (Ges-y fot-rãmbã me.)

⁵ Karm-y Yel-bũn 19:11. Biiblã yeelame tɩ ned sã n maan bũmb n sãam d sũuri, yam-vẽenemc tõe n kɩtame tɩ d sũurã pa yik tao-tao ye. Gom-kãensã sõnga a Rita sẽn deeg lisg yʋʋm a wãn sẽn loogã. A yeelame: “M sã n wa yã tɩ saam-biis wall saam-bi-pogs maanda bũmb sẽn tõe n sãam m sũuri, m tẽegda Yel-bũn 19:11 goamã. M tagsda b yɛlã sẽn yaa to-to wã yelle, la b yɛlã sẽn da yaa to-to pĩndã me yelle, n bao n wʋm b sẽn maand woto wã võore. Sẽn paase, m kot-b lame tɩ d naag taab n moon koɛɛgã. Rẽ sõngd-m lame tɩ m bãng-b n paase.” A Rita sẽn maand woto wã yaa sõma. Y tõe n bao n bãnga y tẽed-n-taasã neere. Y sã n mi-b sõma, b sã n wa maan bũmb sẽn tõe n sãam y sũuri, yɩta nana tɩ y kõ-b sugri.

6. Bõe la d tõe n maan tɩ zems-n-taar zĩnd tõnd ne d tigingã neb sʋka?

⁶ Bõe la y tõe n maan tɩ yãmb ne y tigingã neb moor noomẽ? Y sã n wa be ne y tẽed-n-taasã bɩ y get b zʋg-sõma wã n yɩɩda. (Ges-y Yel-bũn 10:12; Rom. 12:10; Fili. 2:2, 3) Ges-y saam-biig a ye sẽn deeg lisg sẽn nan pa kaoos t’a yʋʋr boondẽ t’a Mark sẽn maan woto tɩ naf-a to-to. A lisgã poore, a ra wae n bee ne a tigingã nebã, n yã tɩ b tara zʋg-wẽns kẽere. Bõe n sõng-a t’a pa bas tɩ rẽ kɩt t’a bas a Zeova tũubu? A yeelame: “M wa n bãngame tɩ m tagsda b kong-bõonesã yell wʋsgo, la tɩ m sã n dɩk rẽ n mak ne dũniyã neb sẽn maandã, pa zem baa fʋɩ ye. M bãnga vẽeneg tɩ m pa segd n tagsd m tẽed-n-taasã pãn-komsem toor-toorã yell wʋsg ye. Rẽ n so tɩ m toeem n tagsd b zʋg-sõma wã yell masã.” Yãmb me sã n maan woto, yãmb ne y tigingã neb moor na n noomame.

Y TAGSDA BŨMB NINS Y SẼN BAS POORẼ WÃ YELLE

7. Bõe n tõe n wa kɩt tɩ y tagsd bũmb nins y sẽn bas poorẽ wã yell wʋsgo?

⁷ Y sẽn wa n bãng sɩdã paalmã, yaa vẽeneg tɩ y sũur da yaa noog y sẽn yi n bas a Sʋɩtãan dũniyã. Tõe tɩ y sok y meng yaa: ‘Yɩta wãn tɩ ned wa rat n leb dũniyã pʋgẽ?’ La y sã n wa maood ne zu-loe-kɛgemse, y tõe n wa tẽegda bũmb kẽer y sẽn bas sẽn na yɩl n tũ a Zeova wã yelle, hal n tõe n dat bõn-kãens ne y sũur fãa menga. (Ges-y Sõdb 11:4-6.) Wala makre, saam-biis kẽer basa tʋʋmd sẽn da kẽesd-b ligd wʋsgo, a sẽn da rɩt b sẽkã wʋsg yĩnga. Tõe tɩ sãnda ra tara zo-rãmb tɩ b lak n bas-ba, b sẽn sɩng Biiblã zãmsgã yĩnga. Tõe tɩ kẽer basa bũmb toor-toor sẽn pa sõma, tɩ b yaool n da maand rẽ tɩ noom-ba. Kiris-ned sã n bas tɩ bũmb a sẽn da maand pĩndã kɩt t’a zãag a meng ne a Zeova, yaa kaeto! Bõe la y tõe n maan masã menga, tɩ baa sẽn wa n yaa a soab bɩ y ra lebg n babs bũmb nins y sẽn bas poorẽ wã?

8. Yam-bʋg la d tõe n dɩk a Abrahaam ne a Saara mak-sõngã pʋgẽ?

⁸ Biiblã pʋgẽ, b gomda neb sẽn bas bũmb kẽer n tũ a Zeova ne b sũy fãa yelle, n da tõe n le wa tagsd bõn-kãens yelle. Wala makre, a Abrahaam ne a Saara saka a Zeova noorã n yi n bas Ʋʋr tẽngã sẽn da gũbg ne lalsã, n tɩ be fu-rot pʋsẽ. (Ebre. 11:8, 9) Yaa vẽeneg tɩ b ra mi n tẽega Ʋʋr tẽngã pʋgẽ vɩɩm sẽn da noom to-to wã yelle. La b sã n da “ket n tẽegd” rẽ yelle, n maand b bãngẽ bũmb nins b sẽn bas be wã yĩnga, ra tõe n kɩtame tɩ b lebg n leb Ʋʋre. La yaa sẽn da wat beoogã yell la b ra tagsd n yɩɩda.—Ebre. 11:15, 16.

9. Tẽn-tʋmd a Poll tagsg ra yaa wãn ne bũmb nins a sẽn bas poorẽ wã? (Filip rãmbã 3:7, 8, 13)

⁹ Tẽn-tʋmd a Poll basa bũmb kẽer sẽn na yɩl n tũ a Zeova. Nand t’a lebg kiris-neda, a paama zãmsg a Gamaliyɛll sẽn da yaa tõogã karen-saamb nebã sẽn da nand wʋsgã nengẽ. (Tʋʋ. 22:3) A Poll ra tõe n lebga nin-kãseng Zʋɩf-rãmbã tũudum pʋgẽ. (Gal. 1:13, 14) La a sẽn wa n wʋm koe-noogã, a yãka yam n bas bõn-kãensã fãa. A sẽn lebg kiris-nedã poore, a vɩɩmã yɩɩ nana bɩ? Ayo. B pãb-a lame, b yõk-a lame n pag bãens roogo, t’a buudã nebã me ra kis-a. (2 Kor. 11:23-26) A sã n da tagsd a zu-loeesã yell bala, la a rɩk a vɩɩmã n mak ne a yɛlã sẽn da yaa to-to pĩndã, a ra tõe n yeelame tɩ nand t’a lebg kiris-nedã a vɩɩmã ra yaa sõma n yɩɩda. La a Poll ra tagsda a sẽn paam n tũud Kirist Zeezi tɩ yaa zu-zẽkrã yell n yɩɩda, la keoor ning a sẽn na n paam beoog-daar tɩ yaa kãsengã yelle. A Poll ra kɩsa sɩd t’a sẽn paam n lebg a Zeezi karen-biigã yõod yɩɩda bũmb nins a sẽn bõnã.—Karm-y Filip rãmb 3:7, 8, 13.

10. Bõe yell la d segd n wae n tagsdẽ? (Mark 10:29, 30) (Ges-y fot-rãmbã me.)

¹⁰ Yam-bʋg la y tõe n dɩk a Poll nengẽ? Y sã n wa tagsd bũmb nins y sẽn bas sẽn na yɩl n lebg kiris-nedã yelle, bɩ y tẽeg bũmb ning sẽn kɩt tɩ y bas-bã me yelle. (Koɛ. 7:10) Rɩk-y bũmb nins y sẽn bas poorẽ wã n mak ne bark nins y sẽn paamde, y sẽn lebg kiris-nedã yĩngã. Y paam n lebga yĩngr la tẽng Naabã zoa. (Yel. 3:32) Y tara tẽed-n-taas sẽn nong-y wʋsgo. (Karm-y Mark 10:29, 30.) Sẽn paase, a Zeova pʋlm-y-la bõn-sõma tɩ y na n paam beoog sẽn wate. (Eza. 65:21-23) Y sã n wae n tagsd bõn-sõma nins y sẽn paamd y sẽn tũud a Zeova wã yĩngã yelle, na n sõng-y lame tɩ y ra tagsd bũmb nins y sẽn bas poorẽ wã yell wʋsg ye.

11. Yam-bʋg la y rɩk a Rooz-maari kibarã pʋgẽ?

¹¹ Saam-bi-poak a ye yʋʋr sẽn boond t’a Rooz-maari reega lisg a sẽn wa n tar yʋʋm pis-nu la zaka. Ges-y-yã a sẽn maan to-to n pa tagsd bũmb nins a sẽn bas poorẽ wã yell wʋsg ye. A yeelame: “Sɩngrẽ wã, mam sẽn bas Nowɛllã maanegã nams-m-la wʋsgo. Bala m da naagda m zakã rãmb n maand rẽ tɩ noom-ma. M sẽn da kõt-b kũunã noom-m-la wʋsgo. Sẽn paase, m sã n da get m kambã ne m yagensã sũy sẽn noom to-to, b sã n wa reeg b kũunã noom-m lame.” Bõe n sõng a Rooz-maari? A yeelame: “M baoo wakat a taab n mi n be ne m zakã rãmbã. Yʋʋmdã pʋgẽ, m mi n yãka daar n tigim m zakã rãmb n kõ b ned kam fãa kũuni, la m wilg-a bũmb ning sẽn kɩt tɩ m nong-a wã.” Zu-loɛɛg a to la a Rooz-maari ra tara. A yeelame: “Mam sẽn bãng sɩdã poore, mam zo-rãmbã lak n basa mam. M da mi n tẽega b yell tɩ m sũur sãame, tɩ m tagsdẽ tɩ m yaa m yembre.”d Bõe la a maan tɩ sõng-a? A kota saam-bi-pogs toor-toor tɩ b naagd taab n moond koɛɛgã. A yeelame yaa: “M sẽn maand woto wã, m paama zo-rãmb m sẽn nong la m sẽn nande.” Yam-bʋg la d tõe n dɩk a Rooz-maari mak-sõngã pʋgẽ? Baa y sã n bõn bũmb y sẽn da tar tɩ kõt-y sũ-noog nand tɩ y bãng sɩdã, y tõe n ledga bõn-kãng ne bũmb sẽn tõe n kõ-y sũ-noog hakɩɩka. (Fili. 4:8, 9) Tẽeg-y-yã: Wakat fãa, a Zeova kõta tõnd tɩ yɩɩd bũmb nins d sẽn bõnã.

NED SÃ N BAS A ZEOVA TŨUBU

12. Zu-loe-bʋg n tõe n zĩnd tigingã pʋgẽ tɩ nams tõnd wʋsgo?

¹² Yaa vẽeneg tɩ y sẽn wa n lebg a Zeova Kaset soaba, y sũur yɩɩ noog y sẽn paam n yi dũni-kãngã sẽn yaa wẽngã pʋgẽ, n naag neb sẽn modgd wʋsg n maand sẽn yaa tɩrgã. (Eza. 65:14) Baa ne rẽ, y tõe n mi n wʋmame tɩ tigingã ned n maan yel-wẽn-kãsenga. B mi n yiisa ned tigingã pʋgẽ menga. (1 Kor. 5:13) Ges-y yell a woto sẽn nams saam-bi-poak yʋʋr sẽn boond t’a Samaar to-to. A yeelame: “Mam lisgã poor bilfu, kãsem-soab n maan yel-wẽn-kãseng tɩ b yiis-a tigingã pʋgẽ. Kellẽ-la bilf tɩ m lak n lʋɩɩ, bala m da pa tagsd tɩ kãsem-soab tõe n beega a Zeova ne tigingã neb ye.” Yaa sɩd tɩ d segd n kɩsa sɩd wakat fãa tɩ d tẽed-n-taasã nonga a Zeova, la tɩ b rat n kell n maana sɩd ne-a. (1 Kor. 13:4, 7) Bʋko, yʋʋmd fãa d tẽed-n-taas kẽer la b yiisd tigingã pʋgẽ. D zoa, d zakã ned wall ned d sẽn nand wʋsg sã n yãk yam n bas a Zeova tũubu, tõe n yɩɩ toog wʋsg ne-do.

13. Bõe la d tõe n maan n keng d tẽebã masã menga, tɩ ned d sẽn nong sã n bas a Zeova tũub bɩ ra kɩt tɩ tõnd me bas a Zeova?

¹³ Bõe la y tõe n maan n segl y meng masã menga, tɩ ned y sẽn nong sã n bas a Zeova tũub bɩ ra kɩt tɩ yãmb me bas a Zeova? Ket-y n paasdẽ yãmb ne a Zeova zoodã pãnga. (Zak 4:8) Tẽeg-y tɩ y yãka yam n na n tũ Wẽnnaam, la tɩ rẽ pa be ne neb a taabã manesem sẽn yaa a soab ye. Wala makre, baa d sẽn naagd d zakã rãmb la d tigingã neb n maand bũmb kẽer n waoogd a Zeova wã, tõnd ned kam fãa segd n yãka wakat n pʋʋsd Wẽnnaam la a zãmsd Biiblã a ye.—Yɩɩn. 1:2; 62:8.

14. Yam-bʋg la d tõe n dɩk tẽn-tʋmd a Pɩyɛɛr mak-sõngã pʋgẽ? (Zã 6:66-68)

¹⁴ D leb n tõe n dɩka yam tẽn-tʋmd a Pɩyɛɛr nengẽ. A Zeezi karen-biis wʋsg sẽn wa n bas a pʋgbã, a Pɩyɛɛr pa maan woto ye. Tõe t’a Pɩyɛɛr me ra pa wʋmd a Zeezi goamã võor sõma wakat kãng ye. La a kell n paa ne a Zeezi wã Zã 6:66-68 sẽn wilgdã. (Karm-y-yã.) A Pɩyɛɛr pa tags bũmb ning neb a taabã sẽn maanã yell wʋsg ye. A tagsa a Zeezi sẽn zãms-a bũmb ninsã yelle. Rẽ kɩtame t’a Pɩyɛɛr tẽebã pa koms ye. Rũndã-rũndã me, neb a taabã manesmã pa kɩtd tɩ bũmb nins Wẽnnaam siglgã sẽn sõng tõnd tɩ d bãngã pa le tar yõod ye. Kell-y n gãd-y bũmb nins y sẽn bãngã kãn-kãe! A Samaar sẽn yaa saam-bi-poak ning yell d sẽn zoe n gomã yeelame: “M tẽegda wakat fãa tɩ nin-yɛng sã n maan wẽnga, pa rat n yeel tɩ tigingã nebã fãa maanda woto, wall tɩ siglgã sẽn zãmsd tõnd bũmb ninsã pa sɩd ye. Leb n pa a Zeova la d segd n ning taale, bala a zãmsda tõnd sẽn yaa tɩrg wakat fãa.”

15. Yam-bʋg la y tõe n dɩk a Emili kibarã pʋgẽ?

¹⁵ D gom a Emili yelle. A sẽn deeg lisgã semen poor bala, a ma wã loog n bas a ba wã tɩ b yiis-a tigingã pʋgẽ me. A yeelame: “M da zɩ n tags tɩ m ma tõe n maana a buud ye. M zɩ n paam zu-loɛɛg tɩ nams-m n ta woto ye. M ma sẽn pa le be ne tõndã sãamda m sũur wʋsgo.” Bõe n sõng a Emili? A yeelame: “Mam da ka m yembr ye. M baaba sõnga maam wʋsgo. La pa yẽ bal ye. Tigingã neb yɩɩ wa d zakã neba, n sõng-ma. Nebã fãa tara zu-loeese. Yaa rẽ yĩng la sẽn tar yõod tɩ d mi n be ne taab n kengd taab raoodã.” (1 Pɩy. 5:9) Y pa segd n bas n wa paam zu-loɛɛg n yaool n bao y tẽed-n-taasã zood ye. Maan-y woto masã mengã. Woto, baa sẽn wa n yaa a soaba, y pa na n getẽ tɩ y yaa y yembr ye.

16. Bõe la d segd ning d yamẽ? (Ges-y fotã me.)

¹⁶ Tẽeg-y me t’a Zeova kibinda neb nins a sẽn nongã. (Ebre. 12:6) A ratame tɩ neb nins fãa b sẽn yiis tigingã pʋgẽ wã lebg n wa. (2 Pɩy. 3:9) Woto wã, b sã n yiis ned y sẽn nong tigingã pʋgẽ, y tõe n kɩsa sɩd tɩ kãsem-dãmbã na n maana b sẽn tõe fãa sẽn na yɩl n sõng-a t’a lebg n wa a Zeova nengẽ.—2 Tɩm. 2:24, 25.

17. D tõe n basa d yam ne bõe?

¹⁷ D goma zu-loees a wãn y sẽn tõe n paam y lisgã poor yelle. Yaa sɩd tɩ zu-loees kẽer tõe n kẽesd-y-la rabeem, la y pa segd n yɛɛs ye. Bũmb wʋsg bee y sẽn tõe n maan n segl y menga. Sẽn paase, ra tol n yĩm-y tɩ y tara sõangd sẽn yaa kãseng ye: Yaa Wẽnnaam a Zeova. A zoe n sõnga yãmba, n dat n kell n sõng-y wakat fãa yĩnga. (1 Pɩy. 5:10) A na n kõt-y-la pãng wakat fãa, la a sõng-y tɩ y tõog toog zu-loɛɛg buud fãa taoore. Y sã n kell n sak t’a Zeova sõng-yã, zu-loɛɛg baa a ye pa na n tõog tɩ y lak n bas-a ye.—Yɩɩn. 119:165; Rom. 8:38, 39.