Kell-y n modg-y n wa n deeg-y lisgu

1. a) D sã n deeg lisgu, bark-bʋs la d na n paame? b) Bõe yell la d na n gom sõs-kãngã pʋgẽ?

YÃMB dɩka y meng n kõ a Zeova, la y reeg koom lisg n wilg tɩ y maana rẽ bɩ? Sã n yaa rẽ, y kosa Wẽnnaam t’a kõ-y sũur-kaset sẽn yaa yɩlemde. (1 Pɩy. 3:21) Y sã n maana woto, y kõo y tigingã kom-bɩɩsã la nin-paalã sẽn wat tigissã mak-sõngo. Y yãka yam sẽn yaa sõma wʋsgo. La y sã n nan pa reeg lisg yẽ? Sãmbg kae tɩ y nonga a Zeova n dat n maan a raabã ye. Y miime tɩ y sã n dat n paam y yel-wẽnã sugr la y ta a Zeova yam, y segd n deega lisgu. (Tʋʋ. 2:38-40) Baasgo, tõe tɩ y ket n nan pa yãk yam n deeg lisg ye. Sã n yaa woto, bõe n tõe n sõng-yã? Sõs-kãngã pʋgẽ d na n leoka sogsg a tãabo: 1) Bõe n kɩt tɩ kẽer pa rat n deeg lisgu? 2) Bõe yĩng tɩ yaa sõma tɩ d tẽegd wakat fãa tɩ saabã kolgame? La 3) y sã n modg n deeg lisg n pa bas tɩ kaoose, wãn to la na n naf-yã?

BÕE N KƖT TƖ KẼER PA RAT N DEEG LISGU?

2. Bõe n kɩt tɩ neb kẽer pa rat n deeg lisgu?

² Neb kẽer pa rat n deeg lisgu, bala b yɛɛsdame. Wala makre, baa b sẽn dat n tũ a Zeova wã, b yɛɛsda b pa na n tol n tõog n ta a yam ye. Sã n yaa woto yãmb nengẽ bɩ y karem Biiblã vɛrse-rãmb sẽn tõe n sõng-y tɩ y bas y yam t’a Zeova pa rat tɩ y yɩ ned sẽn zems zãnga, la tɩ y sã n maand y sẽn tõe fãa n tũud-a, noom-a lame. (Yɩɩn. 103:13, 14; Kolo. 3:23) Y sã n yɛɛsda b na wa n nams-y y tũudmã yĩng bɩ y kos a Zeova t’a kɩt tɩ y bas y yam wa yɩɩn-gʋlsdã. A yeelame: “A Zeova bee ne maam. Mam pa na n zoe rabeem ye. Ninsaal tõe n maana maam bõe?”—Yɩɩn. 118:6.

3. Bõe n tõe n kɩt tɩ kẽer pa rat n deeg lisgu? (Ges-y fotã me.)

³ Sãnda nonga a Zeova n yaool n pa rat n deeg lisgu, b sẽn tagsd tɩ b bãngrã pa sekã yĩnga. La yaa tɩlɛ tɩ y bãng bũmb fãa Biiblã zug n yaool n tõog n deeg lisg bɩ? Ayo. Ad Biiblã kibar sẽn wilgd rẽ. Daar a ye b yõka tẽn-tʋmd a Poll ne a Sɩlaas n kẽes bãens roogo, tɩ tẽngã rigimd tɩ b tũnug ne rẽ n moon bãens roog gũudã ne a zakã rãmb koe-noogã. Yaa vẽeneg tɩ bãens roog gũudã ne a zakã rãmb bãngame tɩ tẽngã sẽn digimd t’a Poll dãmb paam b mensã yaa yel-solemde. Sẽn paase, b bãnga bũmb wʋsg yʋn-kãnga. Rẽ kɩtame tɩ b yãk yam n “deeg lisg n pa bas tɩ kaoos ye.” (Tʋʋ. 16:25-33) Yãmb sã n mii a Zeova, n nong-a ne y sũur fãa, n wʋmd Biiblã zãms-nana wã võore, n tek yam n kos sugr y yel-wẽnã yĩng la y yãk yam n na n ket n tũud a Zeova noyã, y segl n saa lisgã yĩnga.—Mark 12:30.

4. Bõe yell la neb kẽer tagsd wʋsgo, tɩ kɩt tɩ b pa rat n deeg lisgu? (Ges-y fotã me.)

⁴ Neb kẽer dat n taa Wẽnnaam yam, la b tagsdame tɩ yɩl n tõog n toeemã na n yɩɩ toog wʋsgo. Yaa sɩd tɩ nand tɩ d maan bũmbu, yɩta sõma tɩ d reng n geelg n gese. (Luk 14:27-30) La sãnda tagsda bũmb nins b sẽn segd n mong b mens n tõog n tũ Wẽnnaamã yell wʋsgo. Yɩɩ woto ne a Kãndas. A sẽn wa n yaa bilfã b zãms-a-la Biiblã, la a pa yãk yam n na n tũ a Zeova ye. A sẽn wa n lebg kãsmã, a le sɩnga Biiblã zãmsgo. A yeelame: “Mam da mii bũmb nins m sẽn segd n maan a Zeova yĩngã, la m yamã ra ket n bee bũmb nins m sẽn maand dũniyã pʋgẽ tɩ noom-mã. M da miime tɩ bõn-kãens basg na n yɩɩ toogo.” Kẽer yɛɛsdame, n tagsdẽ tɩ b pa na n tõog n tũ noy nins sẽn deeg-b lisgã sẽn segd n tũ wã ye. B yɛɛsda b na wa n maan yel-wẽn-kãseng b lisgã poor tɩ b yiis-b tigingã pʋgẽ. Sã n yaa woto yãmb nengẽ, bõe la y tõe n maan tɩ sõng-yã?

5. Y sã n maanda sãmbs n pa rat n deeg lisgu, bõe yell la y segd n tagse? (Matiye 13:44-46)

⁵ D sã n dat n da bũmbu, d pa tagsd a ligdã yell bal ye. D geta a sõmblmã me. Naoor wʋsgo, sã n yaa bũmb sẽn na n naf tõnd wʋsgo d sakd n daame, baa a ligdã sã n yaa toogo. Woto me, y sã n wa rat n yãk yam lisgã reegr wɛɛngẽ, bɩ y ra tags bũmb nins y sẽn segd n toeemã sẽn yaa toogã yell bal ye. Tags-y bark nins y sẽn na n paame, y sẽn na n lebg a Zeova zoa wã yĩngã yell me. A Zeezi wẽe yel-bũn a yiib n wilg rẽ. (Karm-y Matiye 13:44-46.) Yel-bũn a yiibã fãa pʋsẽ, ned n sak n koos bũmb nins fãa a sẽn tare, n da bũmb sẽn tar yõod wʋsg a sẽn yã. Yãmb me yãa bũmb sẽn tar yõod wʋsgo. Yaa y sẽn bãng Rĩungã koe-noogã. Woto wã, y sã n maanda sãmbs ne y sã n segd n toeemame n tõog n deeg lisgu, bɩ y tags a Zeezi yel-bũnã zut neere. Y tõe n soka y meng yaa: ‘M kɩsa sɩd tɩ Rĩungã koe-noogã yaa bũmb sẽn tar yõod wʋsg bɩ? M kɩsa sɩd tɩ paam a Zeova zoodo, paam n wa vɩɩmd wakat sẽn kõn sa, la paam tẽed-n-taas tɩ d nong taab wa zag-yɛng nebã tara yõod wʋsg bɩ?’ Y sẽn na n leok sogs-kãensã to-to wã tõe n sõng-y lame tɩ y bãng tɩ y segd n maneg n nonga sɩdã, wall sõng-y tɩ y bãng bũmb ning sẽn kɩt tɩ y nan pa rat n deeg lisgã.

6. Bõe la d tõe n maan tɩ d sũurã yɩ wa zĩ-sõngo?

⁶ A Zeezi yel-bũnd ning pʋgẽ a sẽn gom ka-koaad sẽn fẽrg bõn-buud yellã pʋgẽ, a wilgame tɩ neb kẽer sũy sẽn yaa to-to wã kɩtame tɩ b pa tũud bũmb nins b sẽn bãng Wẽnnaam Gomdã pʋgẽ wã ye. La a wilgame me tɩ sãnda na n kelga Rĩungã koɛɛgã ne “sũur sẽn yaa sõma wʋsgo,” n sak n tũ. (Luk 8:5-15) Y sã n maanda yɩɩr y yam sẽn yuusd yĩnga, bɩ y ra koms raood n bas ye. Ne Wẽnnaam sõngre y tõe n paama “sũ-paalle,” sũur sẽn na n kɩt tɩ y rat n tũ a noyã. Pʋʋs-y-yã a Zeova n kos t’a sõng-y tɩ y sũurã lebg bʋgsgo, sẽn na yɩl tɩ Rĩungã koɛɛgã y sẽn wʋmã tõog n wom biisi.—Eze. 18:31; 36:26.

7-8. Bõe n kɩt tɩ kom-bɩɩs kẽer pa rat n deeg lisgu? (Ges-y fotã me.)

⁷ Kom-bɩɩs kẽer nonga a Zeova n yaool n pa rat n toeem n deeg lisgu, neb a taab no-goam la b manesem yĩnga. Wala makre, karen-saam-dãmb kẽer tõe n sagenda karen-biisã tɩ b sak n deeg tɩ manesem kẽer yaa sõma, baa rẽ sẽn pa zems ne Wẽnnaam noyã. La sagls a woto tũub tõe n waa ne yel-beedo. (Yɩɩn. 1:1, 2; Yel. 7:1-5) Y sã n dat n gil yel-beed a woto, y tõe n dɩka yɩɩn-gʋlsdã togs-n-taare. A yeela a Zeova yaa: “Mam yamã wekame n yɩɩd m karen-saam-dãmbã fãa, bala mam bʋgsda yãmb saglsã zutu.”—Yɩɩn. 119:99.

⁸ Kibay n wilgd t’a Zeova Kaset rãmb kẽer maandame tɩ yaa toog ne b kambã tɩ b reeg lisgu. B tõe n maanda yɩɩr wʋsg b kambã karengã la tʋʋm nins b sẽn tõe n wa tʋmã wɛɛngẽ, wall b pa sõng-b tɩ b yãk bũmb b sẽn tõe n modg n maan tɩ paas bãmb ne a Zeova zoodã pãng ye. Kom-bɩɩse, yãmb tagsdame tɩ bũmb bee y roagdbã sẽn tõe n maan n sõng-y tɩ y tõog n deeg lisg bɩ? Sã n yaa woto y tõe n goma rẽ yell ne-ba. Bas-y y yam tɩ y tõe n lebga a Zeova zoa, baa y yʋʋmã sẽn yaa to-to.—Yel. 20:11.

9. Bõe yĩng tɩ kẽer nan pa rat n deeg lisgu?

⁹ Neb kẽer segl n saame n tõe n deeg lisgu, la tõe tɩ b pa rat n maan dẽ, neb a taab yĩnga. Tõe meng tɩ b gũuda ned a to, n dat tɩ b naag taab n deeg lisg daar-n-yɛnga. Wala makre, b tõe n datame tɩ bãmb ne b zoa wall b zakã ned naag taab n deeg lisgu. Yaa sɩd tɩ pa gɩdg tɩ yãmb ne ned y sẽn nong naag taab n deeg lisg daar-n-yɛng ye. La zemsame tɩ y bas tɩ kaoosd rẽ yĩng sɩda? Tẽeg-y tɩ rɩk y meng n kõ Wẽnnaamã yaa yãmb ne yẽ sʋk bala. Y pa segd n ges ned n yaool n yãk y sẽn na n deeg lisg daar ningã ye.—Rom. 14:12.

TẼEGD-Y WAKAT FÃA TƖ SAABÃ KOLGAME

10. Tõe tɩ bõe n kɩt tɩ neb kẽer nan pa rat n toeem n deeg lisgu?

¹⁰ Bũmb nins yell d sẽn zoe n gomã sẽn yãk b toogo, neb kẽer tõeeme n pa rat n toeem n deeg lisg tao-tao, b sẽn tagsd tɩ saabã ket n zãrame wã yĩnga. Tagsg a woto zemsame sɩda? A Zeezi keooga a karen-biisã n yeel yaa: “Bɩ yãmb me segl y mens n gũ, bala Ninsaal biigã wata wakat ning y sẽn pa tẽede.”—Luk 12:40.

11. Sã n yaa ne Yɩɩn-sõamyã 119:60, d sã n bãng a Zeova, d tagsg segd n yɩɩ wãn ne a noyã?

¹¹ Yaa nonglem n segd n kɩt tɩ d rɩk d meng n kõ a Zeova. D sã n bãngd d Wẽnnaamã sẽn yaa nonglmã n paasdẽ, d manegd n nonga a noyã, tɩ d sã n bãng a noor fãa bɩ d yãgd n na n tũ. (Karm-y Yɩɩn-sõamyã 119:60.) Karen-biig a Zak wilga bũmb a to sẽn kɩt tɩ d segd n yɩt tao-tao n tũud a Zeova noyã. Yaa tɩ d ned baa a ye pa mi sẽn wat beoog ye. Rẽnd d segd n modgda daar fãa n maand “sẽn yaa tɩrga,” rat n yeel tɩ n maand bũmb nins d sẽn mi t’a Zeova ratame tɩ d maanã.—Zak 4:13-17.

12. A Zeezi sẽn wẽ yel-bũnd n gom tʋm-tʋmdb sẽn tʋm viyn pʋʋg pʋgẽ yellã wilgda tõnd bõe?

¹² Tẽeg-y yel-bũnd ning a Zeezi sẽn wẽ, n gom tʋm-tʋmdb sẽn tʋm viyn pʋʋg pʋgẽ yellã. A pa wilg tɩ neb kẽer n tʋm lɛɛr a ye bala, n yaool n paam yaood a ye ne neb nins sẽn tʋm daarã tõrã sɩda? Yaa sɩda. La bõe n kɩt tɩ neb nins sẽn tʋm lɛɛr a ye balã pa sɩng pĩnda? B yeelame: “Yaa ned sẽn pa rɩk tõnd tʋʋmã yĩnga.” Nin-kãens pa kʋɩɩmb ye. B ra rat n tʋma daarã tõre, la ned pa rɩk-b tʋʋm ye. B sẽn wa n bool-bã, b sɩnga tʋʋm zĩig pʋgẽ. (Mat. 20:1-16) Rũndã-rũndã, a Zeezi boonda tõnd tɩ d wa lebg a karen-biisi, n tʋm Rĩungã tʋʋma. D sã n wʋm boolã, d segd n yɩɩ tao-tao n sake.

13. A Lot pagã kibarã wilgda tõnd bõe?

¹³ Neb kẽer tõeeme n pa rat n toeem tao-tao n tũ a Zeova, bala b tagsdame tɩ saabã sã n wa kolge b na n tõog n toeema zĩig pʋgẽ. La y sã n bas tɩ kaoose wat n lebga toog tɩ y toeeme. A Zeezi ra mii rẽ, tɩ kɩt t’a keoog a karen-biisã n yeel yaa: “Tẽeg-y-yã a Lot pagã yelle.” (Luk 17:31-35) A Lot pagã ra mii vẽeneg tɩ wakat ning Wẽnnaam sẽn na n sãam Sodom la Gomoorã taame. La wõnda a ra ket n nonga bũmb nins a sẽn bas poorẽ wã. (Sɩng. 19:23-26) A kibarã wilgdame me tɩ wakat ning a Zeova sẽn yãk tɩ nebã tõe n toeem n tũ-a wã tara tɛka. Wakat ning Wẽnnaam sẽn yãkã sã n ta a tɛka, na n yɩɩ wa a paga kʋɩlengã tɩ sẽn maand ka le beẽ ye.—Luk 13:24, 25.

14. Biiblã bãngr-goam nins sẽn gomd saabã yellã segd n kɩtame tɩ y maan bõe?

¹⁴ Beoog sẽn vẽeg fãa, d neeme tɩ bũmb nins sẽn maand dũniyã zugã wilgdame tɩ Biiblã bãngr-goam nins sẽn gomd dũni-kãngã saabã yellã pidsdame. Baa Biiblã sẽn pĩnd n gom bũmb nins yellã kẽer sã n pa maand yãmb sẽn beẽ wã, y sẽn ne tɩ b maanda zĩis wʋsg dũniyã zugã segd n kɩtame tɩ y toeem tao-tao, n deeg lisgu. Tẽeg-y tẽn-tʋmd a Pɩyɛɛr sẽn yeel kiris-neb kẽer bũmb ningã yelle. A sagl-b lame tɩ b “yɩ gũusdba,” bala rẽ tɩ “bũmb fãa saab kolgame.” (1 Pɩy. 4:7) Wõnda “saab” ning yell a sẽn gomd vɛrse-kãngã pʋgẽ wã yaa Zerizalɛm ne a wẽnd-doogã sãoongã. Kiris-neb nins a Pɩyɛɛr sẽn gʋls a lɛtrã n toolã ra zãra ne Zerizalɛm, n pa na n zĩnd be a sãoongã wakat ye. (1 Pɩy. 1:1) La b sã n wa yã tɩ bãngr-gom-kãng pidsame, na n kɩtame tɩ b maneg n kɩs sɩd t’a Zeova na n pidsa a pʋlems a taabã. Woto me, y sã n ne bãngr-goam nins sẽn gomd saabã sẽn watã yellã sẽn pidsdã, na n kɩtame tɩ y modg n wa reeg lisgu, n wilg tɩ y yaa gũusda.

15. Bõe la d tõe n maan n segl d mens a Zeova daarã yĩnga? (2 Pɩyɛɛr 3:10-13)

¹⁵ A Pɩyɛɛr lɛtr a yiib-n-soabã pʋgẽ, a wilga d sẽn tõe n segl d mens to-to a Zeova daarã yĩnga, rat n yeel tɩ dũni-kãngã saabã yĩnga. A Pɩyɛɛr sẽn wa n gʋlsd a lɛtrã t’a Zeova daarã ket n zãrame. Baa ne rẽ, a yeela kiris-nebã tɩ b ‘ningd daar-n-kãng b yamẽ,’ bɩ n ‘dat daar-n-kãng ne b sũur fãa.’ (Karm-y 2 Pɩyɛɛr 3:10-13; notã) Tõnd me tõe n ninga daar-n-kãng d yamẽ d sẽn na n segl d mens n sa n gũud-a, la d rat t’a wa ne d sũur fãa. D tõe n wilgdame tɩ d ratame t’a wa ne d sũur fãa, d sẽn na n yaa ‘neb sẽn tar yel-manesem sẽn yaa sõngo, la d tʋmd wẽn-sakr tʋʋma.’ A Zeova sã n neẽ tɩ y tʋmda “wẽn-sakr tʋʋma,” y pa tagsd t’a sũur na n yɩɩ noog sɩda? Yaa vẽeneg tɩ y sã n dɩk y meng n kõ-a n deeg lisgu, a sũur na n yɩɩ noog wʋsgo.

SẼN NA N NAF-Y TO-TO, Y SÃ N DEEG LISG TAO-TAO

16. Bõe yĩng tɩ yaa masã la y segd n deeg lisgu? (2 Korẽnt rãmbã 6:1, 2) (Ges-y fot-rãmbã me.)

¹⁶ Yaa masã meng la y segd n modg n deeg lisgu. (Karm-y 2 Korẽnt rãmb 6:1, 2.) Etiyopi nin-naab ning a Filip sẽn sõs ne wã bãngame t’a segd n deega lisg zĩig pʋgẽ. A sẽn wa n wʋm koe-noogã võore, la a yã zĩig a sẽn tõe n deeg lisgã, a pa tags t’a segd n basame n wa wʋm koe-noogã võor n paas ye. A pa tags me tɩ tõe tɩ koom zĩig a to n be taoor ye. A soka a Filip yaa: “Bõe n gɩdg maam ne lisg reegre?” (Tʋʋ. 8:26, 27, 35-39) A sɩd kõ-d-la mak-sõngo! Etiyopi nin-naabã sẽn deeg lisgã poore, a “le rɩka a sore, n kɩdemd sũ-noogo.”

17. D tõe n basa d yam ne bõe?

¹⁷ Y sã n nan pa rat n deeg lisgu, y tõe n basa y yam t’a Zeova rata ne a sũur fãa n sõng-y tɩ y lebg a zoa. (Rom. 2:4) Sẽn wa n yaa bũmb ning n kɩt tɩ y yɛɛsdẽ wall y maand yɩɩre, pa rẽ bɩ sã n yaa neb a taabã manesem wall b no-goam n kɩt tɩ y nan pa rat n deeg lisgu, a Zeova tõe n sõng-y lame. Y sã n deeg lisg n paam sũur-kaset sẽn yaa sõma Wẽnnaam taoore, sãmbg sẽn kae, y na n mikame tɩ “bũmb nins sẽn be poorẽ wã” pa le tar yõod ne-y ye. (Fili. 3:8, 13) Rẽ poore, y tõe n gũu “bũmb nins sẽn be taoorã” ne yãgbo, rat n yeel tɩ bũmb nins a Zeova sẽn pʋlem neb nins sẽn dɩk b mens n kõ-a n deeg lisgã pidsgu.—Tʋʋ. 3:19.