D sẽn segd n deeg lisgã võore

1. Bõe n wilgd tɩ lisgã naaga bũmb nins Biiblã sẽn gomd b yell tɩ b tar yõod wʋsgã sʋka?

D SÃ N mi n yã neb sẽn deegd lisgu, d sũur pa noom wʋsg sɩda? Pipi kiris-nebã paama sũ-noog a woto buud yʋʋmd 33 Pãntekotã daare, neb wʋsg sẽn deeg lisgã yĩnga. Daar-n-kãnga, tẽn-tʋmd a Pɩyɛɛr wilga lisgã reegr sẽn tar yõodã võore. (Tʋʋ. 2:38, 40, 41) Tẽn-tʋmd a Poll yeelame tɩ “lisg toɛy-toɛyã zãmsg” naaga “bũmb nins d sẽn zãms pipi Kirist zugã.” (Ebre. 6:1, 2) Rẽnd d tõe n yeelame tɩ lisgã reegr naaga bũmb nins Biiblã sẽn gomd b yell tɩ b tar yõod wʋsgã sʋka, tɩ d segd n bao n wʋm a võore. Bõe yĩnga?

2. Bõe yĩng tɩ d segd n bao n bãng lisgã reegr võor sõma?

² Roog yẽbgr sã n yaa sõma, tõe n kɩtame tɩ roogã tall pãnga. Woto me d sã n wʋm lisgã reegr võor sõma, tõe n kɩtame tɩ d tẽebã tall pãnga. D reega lisg n maan yʋʋm wʋsg tɩ d modgd n na n wa reega lisg me, d segd n bao n wʋma lisgã võor sõma. Rẽ n so tɩ d na n leok sogsg nins sẽn pʋgdã sõs-kãngã pʋgẽ. Lisgã võor yaa bõe? Wãn to la ned reegd lisg n lebg kiris-neda? Bõe yĩng tɩ d reegd lisg ne Ba wã la Biigã la vʋʋsem sõngã yʋʋre?

LISGÃ REEGR VÕORE

3. Lisgã makda bõe?

³ Y sã n deeg lisgu, y wilgda nebã fãa taoor tɩ y sak n deega bũmb nins y sẽn zãms Wẽnnaam a Zeova la a Zeezi Kirist zugã. Y wilgdame tɩ y teka yam n kos sugr y yel-wẽnã yĩnga, n toeem n tũud a Zeova noyã masã. Y sak n deegame tɩ yaa ne a Zeezi maasem yĩng la Wẽnnaam fãagd tõndo. Y wilgdame me tɩ y pelga y pʋg n pʋʋs Wẽnnaam n wilg-a tɩ y rat n naaga a siglgã n maan a raabã. Y sã n pʋlma a Zeova woto n dɩk y meng n kõ-a n deeg lisgu, y sɩnga a Zeova tũub n tõe n wa paam vɩɩm sẽn kõn sa.

4. B sẽn bõrd neb nins sẽn deegd lisgã koom pʋgẽ wã võor yaa bõe? (Ges-y fot-rãmbã me.)

⁴ Y sã n na n deeg lisgu, b bõrda y yĩngã tõr koomã pʋgẽ n lebg n yiis-yã,a tɩ yaa wa y kɩɩme tɩ b mum-y tɩ y lebg n vʋʋge. (Ges-y Kolos rãmb 2:12.) Lisgã reegr wilgdame tɩ y toeema zãng fasɩ. Wãn to? Y sã n wa lis koomã pʋgẽ, wilgdame tɩ y kii y pĩnd vɩɩmã wɛɛngẽ. Y sã n wa yi koomẽ wã, wilgdame tɩ y vʋʋgame n na n vɩ Wẽnnaam daabã maaneg yĩng masã.

5. Bõe yĩng tɩ d tõe n yeel tɩ bũmb nins y sẽn segd n maan n wa tõog n deeg lisgã yaa wa tʋʋmd ning a Nowe sẽn tʋm koglgã kaab yĩngã? (1 Pɩyɛɛr 3:18-21)

⁵ Karm-y 1 Pɩyɛɛr 3:18-21. D tõe n yeelame me tɩ bũmb nins y sẽn segd n maan n wa tõog n deeg lisgã yaa wa tʋʋmd ning a Nowe sẽn tʋm koglgã kaab yĩngã. Y sẽn sɩng Biiblã zãmsgã sã n nan pa kaoose, y tõe n getame tɩ bũmb nins y sẽn segd n maan n wa tõog n deeg lisgã yɩɩda y nugu. Y tõe n getame meng tɩ yaa tʋʋm-kãseng wa a Nowe koom-koglgã kaabo. Modgr a woto yaa tɩlɛ bɩ? Ra yaa tɩlɛ ne a Nowe. Wẽnnaam meng a toor n wilg koglgã sẽn segd n yɩ to-to wã, t’a Nowe ra segd n ka koglgã tɩ yɩ woto bal kɛpɩ sẽn na yɩl n põs sa-kãsengã sasa. Ne tẽebo, a Nowe tõog n kaa koglgã, bala a saka a Zeova, t’a sõng-a. Yãmb me tõe n maana “Wẽnnaam sẽn yeelã” fãa wa a Nowe, n tõog n deeg lisgu.—Sɩng. 6:22.

6. Bõe yĩng tɩ d tõe n yeel tɩ lisgã fãagda yãmba?

⁶ Vɛrse 21 wã pʋgẽ tẽn-tʋmd a Pɩyɛɛr yeelame tɩ lisgã “fãagda yãmba.” Pa rat n yeel tɩ y sã n deeg lisg bala y na n paama fãagr ye. Pa rat n yeel me tɩ lisgã yiisda y yel-wẽnã ye. Yaa a Zeezi zɩɩmã bal n tõe n pek yãmb n yiis y yel-wẽnã. (1 Zã 1:7) La lisgã reegr tara yõod wʋsgo. Bala yaa a Zeova n yeel tɩ d segd n deega lisgu. Sẽn paase, y sã n deeg lisgu, y kota Wẽnnaam “sũur-kaset sẽn yaa sõma,” t’a Zeova na n kõ-y rẽ ne sũ-noogo. Yaa rẽ yĩng la d sẽn tõe n yeel tɩ lisgã “fãagda yãmb” bɩ a kɩtdame tɩ y tõe n wa paam fãagrã.

WÃN TO LA NED REEGD LISG N LEBG KIRIS-NEDA

7. Wãn to la ned reegd lisgu?

⁷ Biiblã wilgame tɩ ned sã n na n deeg lisgu, b segd n bõr-a-la koomẽ. La a pa togs bũmb a taab n paas ye. Baa ne rẽ, Gʋls-sõamyã tõe n sõng-d lame tɩ d bãng sẽn zems tɩ d maan lisg sasa. Wala makre, Biiblã saglsã tõe n sõnga sẽn dat-b n deeg lisgã tɩ b bãng fut nins b sẽn tõe n yeelge, la sõng neb a taabã tɩ b bãng b manesem sẽn segd n yɩ to-to lisgã sasa. (1 Kor. 14:40; 1 Tɩm. 2:9) Naoor wʋsgo yaa kãsem-soab n lisd nebã. La d pa waoogd kãsem-dãmb nins sẽn lisd nebã tɩ loog noor ye. (1 Kor. 1:14, 15) Sẽn paase, pa neb nins sẽn zĩnd lisgã sasa wã sõor n tar yõod ye.—Tʋʋ. 8:36.

8. Sogs-bʋs la b sokd neb nins sẽn dat n deeg lisgã, la bõe yĩnga? (Tʋʋma 2:38-42) (Ges-y fotã me.)

⁸ Biiblã yeelame tɩ d segd n “kõo kaset nebã taoor sẽn na yɩl n paam fãagre,” rat n yeel tɩ d segd n wilga d sẽn tẽed bũmb ninsã nebã taoore. (Rom. 10:9, 10) Dẽnd zemsame tɩ d maan dẽ d sã n wa reegd lisgu, lisgã sẽn yaa tɩlɛ sẽn na yɩl tɩ d paam fãagrã yĩnga. Rẽ n so tɩ b sokd sẽn dat-b n deeg lisgã sogsg a yiibu. Pipi sokrã yaa: “Rẽ yĩnga, yãmb teka yam n kos y yel-wẽnã sugri, n dɩk y meng n kõ a Zeova, la y sak tɩ yaa ne a Zeezi Kirist maasem la a fãagd nebã bɩ?” Sok-kãngã wilgda bũmb nins ned sẽn maand n segl a meng lisg yĩnga, n le zems ne saglg ning a Pɩyɛɛr sẽn kõ kʋʋngã Pãntekotã daarã. Sokr a yiib-n-soabã yaa: “Rẽ yĩnga, yãmb miime tɩ y sẽn na n deeg lisgã, wilgdame tɩ y lebga a Zeova Kaset soaba, la a siglgã ned bɩ?” Sok-kãngã tẽegda tõnd tɩ d sã n dat n pids bũmb ning d sẽn pʋlem a Zeova n dɩk d meng n kõ-a wã, d segd n sakdame t’a siglgã wilgd-d sore, la d naag d tẽed-n-taasã n tũ-a wa pipi kiris-nebã sẽn maanã. (Karm-y Tʋʋm 2:38-42.) Yaa neb nins sẽn tõe n pelg b pʋs n leok sogs-kãensã tɩ n-ye wã bal n tõe n deeg lisgu.

9. Bõe ne bõe la ned segd n maane, a sã n dat n ta Wẽnnaam yam?

⁹ Baa nand tɩ y sɩng Biiblã zãmsgo, tõe tɩ y ra tʋmda tʋʋm-sõma, n zɩ n maan yel-wẽn-kãseng ye. Tõe me tɩ y roagdbã yaa kiris-neba, n sõng-y tɩ y nong a Zeova. Sã n yaa woto, yaa tɩlɛ ne yãmb me tɩ y tek yam n kos sugr la y reeg lisg sẽn na yɩl n ta Wẽnnaam yam bɩ? N-ye. Baa d sẽn da vɩ to-to fãa, d segd n sak n deegame tɩ d roga ne yel-wẽndã tɩ kɩt tɩ d zãr ne Wẽnnaam. (Yɩɩn. 51:5) La d sẽn wa n bãng a Zeova wã, d yãka yam n na n lʋɩɩs a raabã taoor la d lebs tõnd raabã poorẽ. D sũur sãama wʋsg d sẽn da vɩ to-to wã yĩng tɩ d tek yam n bas bũmb nins sẽn pa noom d Ba sẽn be saasẽ wã maanego, n na n maan sẽn noom-a masã. Yaa rẽ poor la d tõe n deeg lisgu.—Tʋʋ. 3:19.

10. Bõe la y segd n maane, sã n mik tɩ y ra zoe n deega lisg tũudum a to pʋgẽ?

¹⁰ Baa y sã n deega lisg tũudum a to pʋgẽ, y sã n dat n lebg a Zeova Kaset soaba y segd n le reega lisgu. Bõe yĩnga? Bala wakat kãng tɩ y ra pa tar bãngr hakɩɩk Wẽnnaam a Zeova la a Zeezi zug ye. Baa y sã n pʋʋsa Wẽnnaam n dɩk y meng n kõ-a, y maana rẽ n yaool n da pa mi a raabã sõma ye. Tẽn-tʋmd a Poll sẽn wa n kẽng Efɛɛz n tɩ yã rap sẽn deeg lisg n yaool pa wʋmd kiris-nebã sẽn tẽed bũmb ninsã võor sõma wã, a kɩtame tɩ b le reeg lisgu.b (Tʋʋ. 19:1-5) Rũndã-rũndã me, ned sã n deeg lisg n yaool n pa tar bãngr hakɩɩk Wẽnnaam raabã zugu, a lisgã pa tar yõod ye.

“NE BA WÃ LA BIIGÃ LA VƲƲSEM SÕNGÃ YƲƲRE”

11. Reeg lisg “ne Ba wã la Biigã la vʋʋsem sõngã yʋʋr” rat n yeelame tɩ bõe? (Matiye 28:18-20)

¹¹ A Zeezi yeelame tɩ neb nins sẽn dat n lebg a karen-biisã segd n deega lisg “ne Ba wã la Biigã la vʋʋsem sõngã yʋʋre.” (Karm-y Matiye 28:18-20.) Rat n yeelame tɩ bõe? Biiblã pʋgẽ, b sã n gomd ned yʋʋr yelle, wae n bilgda a soabã sã n tara yʋ-sõng bɩ a pa tar yʋ-sõngo. Leb n tõe n bilgda a soabã naam bɩ a tõogo. Rẽnd d sã n maan bũmb ne ned wall bũmb “yʋʋre,” wilgdame tɩ d sak n deega yʋʋrã soab sẽn tar tõog ningã. (Ges-y Matiye 10:41.) Bɩ d bao n bãng d sẽn tõe n wilg to-to tɩ d sak n deega naam la tõog ning Ba wã ne Biigã sẽn tarã, la tʋʋmd ning vʋʋsem sõngã sẽn tʋmdã.

12. Reeg lisg ne Ba wã yʋʋr rat n yeelame tɩ bõe? (Vẽnegre 4:11) (Ges-y fotã me.)

¹² Ne Ba wã yʋʋre. Woto rat n yeelame tɩ d sak n deegame t’a Zeova la d Ba sẽn be saasẽ wã, la tɩ yẽ la vɩɩmã kõata. Yẽ n yaa Wẽnnaam Sẽn-tõe-a-fãa wã la bũmb fãa Naanda. (Karm-y Vẽnegr 4:11.) D sak n deegame tɩ yẽ la soab ning sẽn wʋmd pʋʋsgã, la d pʋt a yʋʋrã ne waoogr la bas-m-yam d sã n wa n pʋʋsd-a, wall d sã n wa gomd a yell ne neb a taaba. (Yɩɩn. 65:2) La reeg lisg ne Ba wã yʋʋr pa tek woto bal ye. Neb nins sẽn da kelgd a Pɩyɛɛr Pãntekotã daarã ra zoe n mi a Zeova, la b ra segd n sak n deegame me tɩ yaa ne a Zeezi Kirist maasem yĩng la a fãagd ninsaalbã, a sẽn yaa nonglmã yĩnga.—Rom. 5:8.

13. Reeg lisg ne Biigã yʋʋr rat n yeelame tɩ bõe? (Ges-y fotã me.)

¹³ Ne Biigã yʋʋre. Wilgdame tɩ d sak n deegame t’a Zeezi n yaa Wẽnnaam Bi-ribl-yendã. D kɩsa sɩd t’a Zeezi n yaa “sorã,” rat n yeel tɩ yaa ne yẽ maasem yĩng bal la d tõe n paam a Zeova zoodo. (Zã 14:6) A Zeezi yaa tõnd fãagd me, soab ning sẽn ki sẽn na yɩl tɩ d paam vɩɩmã. D sẽn mi rẽ wã kɩtame tɩ d rɩkd a naoor daar fãa, pa d lisgã daar bal ye. (1 Zã 2:6) Rẽ n so tɩ d moond koɛɛgã ne yẽesem wa a Zeezi sẽn maanã, n pa basdẽ tɩ bũmb tiis-d ye. (Luk 4:43) D sakame meng n na n nams Wẽnnaam daabã maaneg yĩng wa a Zeezi. (2 Tɩm. 3:12) D sak n deegame t’a Zeezi n yaa “tigingã zu-soaba,” n sulgd d mens n sakd neb nins a sẽn yãk tɩ b lʋɩ d taoor la b ges d yellã.—Efɛɛ. 4:8, 11, 12; 5:23.

14. a) Reeg lisg ne vʋʋsem sõngã yʋʋr rat n yeelame tɩ bõe? (Ges-y fotã me.) b) Sẽn paam-b vʋʋsem sõng zaeebã reegda lisg a taab me. Bãmb la bʋse? (Ges-y zĩ-gũbrã: “Lisg toor-toor sẽn paam-b vʋʋsem sõng zaeebã sẽn deegde.”)

¹⁴ Ne vʋʋsem sõngã yʋʋre. D sak n deega Biiblã sẽn yet bũmb nins vʋʋsem sõngã wɛɛngẽ wã. D bãngame tɩ vʋʋsem sõngã yaa Wẽnnaam pãngã, a pa Wẽnnaam n naag tãablem pʋgẽ ye. D sak n deegame tɩ yaa vʋʋsem sõngã n da vẽnegd no-rɛɛsdbã la Biiblã gʋlsdbã, tɩ kɩt tɩ d karemd Biiblã n pa vaandẽ, la d tũud a sẽn yet bũmb ninsã. (2 Pɩy. 1:20, 21) Sẽn paase, d modgda sẽn na yɩl n da maan yel-wẽn-kãsengã, bala d miime tɩ rẽ tõe n kɩtame tɩ d pa le paamd Wẽnnaam vʋʋsem sõngã, la kɩt meng tɩ vʋʋsem sõngã pa le sõngd tigingã sõma ye.—Efɛɛ. 4:30.

15. Bõe la y rat n maan ne y sũur fãa?

¹⁵ Y sã n zoe n deega lisg n yaa kiris-neda, bɩ y modg n wʋm “lisg toɛy-toɛyã zãmsg”c võor sõma la y modg n pids pʋleng ning y sẽn pʋlem a Zeova n dɩk y meng n kõ-a n deeg lisgã. La y sã n nan pa reeg lisgu, bõe la y segd n maane? Bũmb n gɩdg yãmb bɩ? Sõsg ning sẽn pʋgdã na n wilga y sẽn segd n maan bũmb nins n wa tõog n deeg lisgu.