Y tẽrame bɩ?

Yãmb karma Gũusg Gasg nins b sẽn yiis rõandã wã sõma bɩ? Bɩ y ges y sã n tõe n leoka sogsg nins sẽn pʋgdã:

Bõe n kɩt tɩ d rat n kõ a Zeova ziiri?

D maanda woto, bala d nanda a Zeova wʋsgo, la d nong-a ne d sũur fãa. D leb n waoogda a Zeova, d sẽn dat tɩ neb a taabã bãng-a wã yĩnga.—w25.01, s.n. a 3.

Ned sã n maan bũmb n sãam d sũuri, bõe la d tõe n maan tɩ sõng-d tɩ d kõ-a sugri?

D pa segd n maan wa yellã pa zabd-d ye. La d segd n sigsa d sũurã la d bas sũ-kẽka, tɩ sõng-d tɩ d ra wa lebg sũ-to-ned ye.—w25.02, s.n. 15-16.

Bõe yĩng tɩ d tõe n yeel tɩ karen-biig a Mark kõo kom-bɩɩsã mak-sõngo?

A Mark sak n tʋmame n sõng neb a taabã ne yamleoogo. Yaa vẽeneg tɩ bũmb kẽer n maan t’a sũur sãam wʋsgo. Baa ne rẽ, a pa koms raood n bas neb a taabã sõngr ye. A Mark baoo a Poll la kiris-neb a taab tẽeb sẽn bɩ zoodo.—w25.04, s.n. 27.

A Zeezi sẽn yeel t’a ‘kɩtame tɩ b bãng Wẽnnaam yʋʋrã’ võor yaa bõe? (Zã 17:26)

A Zeezi karen-biisã ra zoe n mii Wẽnnaam yʋʋrã. La a sõng-b lame tɩ b bãng a Zeova sõma n paase. Wala makre, a raabã sẽn yaa a soab ne ninsaalbã la tẽngã, a sẽn maan la a sẽn nan na n maane, la a zʋg-sõma wã.—w25.05, s.n. 20-21.

D sã n yaa sik-m-meng soaba, bõe la d na n sak n deege?

D na n sak n deegame tɩ bũmb kẽer la d pa mi. Wala makre, d pa mi dũniyã saab sẽn na n yɩ wakat ningã takɩ, pa rẽ bɩ a Zeova sẽn na n sõng-d to-to ye. D leb n pa mi sẽn wat beoogo, wall a Zeova sẽn mi-d to-to wã sõma ye.—w25.06, s.n. 15-18.

D sã n wa karemd sõsg wall d kelgd sõsg b sẽn wɛgsd nin-paalã yĩnga, bõe la d tõe n maan n dɩ a yõod sõma?

D tõe n soka d meng yaa: ‘Bõe la b yeel n na n sõng nebã tɩ b kɩs sɩd ne Biiblã sẽn yetã? Makr la b rɩk tɩ m tõe n tũnug ne rẽ n sõng ned t’a wʋm bũmb võor nana-nana bɩ? Tõe tɩ ãnda n na n dat n bãng bũmb ning yell b sẽn gomdã?’—w25.07, s.n. 19.

Wẽnnaam manesem sẽn yɩ to-to ne a Davɩɩdã wilgda tõnd bõe, a sẽn kõt sugr to-to wã wɛɛngẽ?

A Davɩɩd maana yel-wẽn-kãsemse. La a sẽn tek yam ne a sũur fãa n kos sugrã, a Zeova kõ-a-la sugri. (1 Rĩm. 9:4, 5) Wẽnnaam sã n kõ ned sugri, a pa na n sɩbg a soabã yel-wẽn nins a sẽn maan pĩndã yĩnga, wall a le tẽeg rẽ yell beoog sẽn wat ye.—w25.08, s.n. 17.

Sã n yaa toog ne Biibl karen-biig t’a wʋm bũmb võore, bõe la y tõe n maane?

Y sã n maag y yĩng n tik Biiblã n bilg-a bũmb t’a ket n pa wʋmd a võore, y tõe n basa rẽ la y zãms bũmb a to, n wa gom rẽ yell nindaare.—w25.09, s.n. 24.

Biiblã yeelame tɩ yel-wẽndã tara “pãng sẽn yaa belgre.” (Ebre. 3:13) Woto rat n yeelame tɩ bõe?

Yel-wẽndã mi n kɩtame tɩ d yam be wẽng maanego. La a mi n kɩtame me tɩ d tar sãmbse. Wala makre, tɩ d sãmbd ne Wẽnnaam sã n sɩd nong-d lame.—w25.10, s.n. 16.

Bũmb a tãab la d tõe n maan tɩ paas d pʋʋsgã sõmblem. Bãmb la bʋse?

1) D tõe n bʋgsda a Zeova zʋg-sõma wã zugu. 2) D tõe n tagsa zu-loees nins d sẽn tar rũndã-rũndã wã yelle, n pʋʋs n gom rẽ yelle. Wala makre, ned n maan-d bũmb tɩ d segd n kõ-a sugr bɩ? 3) D tõe n pʋʋsd n wogendame. Woto, na n yɩɩ nana tɩ d togs a Zeova bũmb ning sẽn be d sũurẽ wã fãa.—w25.10, s.n. 19-20.

Bõe la d tõe n maan n sõng sẽn kʋʋl-bã?

D tõe n kẽnd n kaagd-b lame, wall d boond-b ne telefõnne. B sã n wa segd n kẽng logtor yir me d tõe n yãag-b lame. D leb n tõe n naagda sẽn kʋʋl-bã n maand bũmb toor-toor koɛɛgã mooneg wɛɛngẽ.—w25.11, s.n. a 6-7.

Kiris-neb sã n dat tɩ b yi-kãadem daar tall waoogre, bõe la b segd n maane?

B segd n tũu noy nins tẽngã taoor dãmb sẽn gãneg kãadem kõom wɛɛngẽ wã. B segd n modgame tɩ bũmb fãa maan ne waoogre, tɩ wilg tɩ b bɩɩsa zug-sõma nins vʋʋsem sõngã sẽn sõngd ned t’a bɩɩsã. B segd n manega b mens ne sik-m-menga, la b zãag b mens ne minund nins sẽn pa zems ne Biiblã sẽn yetã. B sã n wa segend b yi-kãadmã daare, b segd n pelgda b pʋs n sõsd ne taaba.—w25.12, s.n. 21-24.