Sẽn kʋʋl-bã ket n tara yõod wʋsg tigingã pʋgẽ

Tõe tɩ yãmb me kʋʋlame, n pa le tõe n maan bũmb kẽer ye. Baa ne y sẽn mi tɩ y tũu a Zeova ne y sũur fãa n maan yʋʋm wʋsgã, y sã n dɩk bũmb nins y sẽn maand rũndã-rũndã wã n mak ne y sẽn da maand pĩndã, tõe n komsa y raoodo. Sã n yaa woto, bõe la y tõe n maan n kell n tall sũ-noogo?

TAGS-Y-YÃ A ZEOVA SẼN DAT TƖ Y MAANÃ YELLE

Sok-y y meng yaa: ‘Bõe la a Zeova rat tɩ m maane?’ Y sã n tags Tõod 6:5 goamã yelle, tõe n bels-y lame. Be b yetame: “Yãmb segd n nonga a Zeova sẽn yaa yãmb Wẽnnaamã ne y sũurã fãa, ne y sɩɩgã fãa, la ne y pãngã fãa.”

Vɛrse-kãngã wilgame t’a Zeova ratame tɩ y tũ-a ne y sũurã fãa, ne y sɩɩgã fãa, la ne y pãngã fãa. A goamã tõe n sõng-y lame tɩ y ra mak bũmb nins y sẽn tõe n maanã ne neb a taabã, wall y sẽn maand rũndã-rũndã wã ne y sẽn da maand pĩndã ye.

Tags-y n ges-y-yã: Y sẽn wa n yaa bi-bɩɩgã, bõe la y ra kõt a Zeova? D fãa la bal na n yeelame tɩ d ra maanda d sẽn tõe fãa a tʋʋmdã pʋgẽ. Y sẽn wa n yaa bi-bɩɩgã, y ra maanda y sẽn tõe fãa wakat kãnga. La bõe la y kõt a Zeova masã? Tõe tɩ y ket n maanda y sẽn tõe rũndã-rũndã, tɩ zems ne y yɛlã sẽn yaa to-to wã. Y sã n tags rẽ yelle, tõe tɩ y bãng tɩ y sẽn kõt a Zeova bũmb ning rũndã-rũndã wã yaa a ye ne y sẽn da kõt pĩndã. Y ra maanda y sẽn tõe, n ket n maand woto rũndã-rũndã.

Y TÕE N SÕNGA NEB A TAABÃ WƲSGO

Ra tagsd-y bũmb nins y sẽn pa le tõe n maan y sẽn kʋʋlã yĩngã yell ye. Tagsd-y rẽ sẽn pak sor tɩ y tõe n maan bũmb ninsã yelle. Sɩd me, y sẽn yaa kiris-ned sẽn kʋʋlã, bũmb kẽer la y tõe n maan rũndã-rũndã, n da pa tõe n maan rẽ y sẽn wa n yaa bi-bɩɩgã ye. Wala makre, ad bũmb y sẽn tõe n maane:

Togs-y neb a taabã bũmb nins y sẽn bãngã. Bʋgs-y Biiblã sẽn yet bũmb ning vɛrse nins sẽn pʋgdã zugu:

Rĩm a Davɩɩde: “Mam da yaa bi-bɩɩga, la masã mam kʋʋlame, la mam zɩ n yã tɩ b raag nin-tɩrg n base, wall nin-tɩrg kamb sẽn bõosd rɩɩb ye.”—Yɩɩn. 37:25.

A Zozuwe: “La ade! Mam kolga kũum masã, la yãmb mensã mii ne y sũur fãa la ne y sɩɩgã fãa tɩ kãab-nood nins fãa yãmb Wẽnnaam a Zeova sẽn da pʋlem yãmbã baa a ye pa vaal ye. B fãa pidsa yãmb neer yĩnga. Gomd baa a ye pa vaal ye.”—Zoz. 23:14.

Tõe tɩ y zoe n goma goam sẽn wõnd woto. A Davɩɩd ne a Zozuwe goma bũmb nins sẽn paam bãmb mensã yelle. Nin-kãens sẽn maan sɩd ne a Zeova wã yĩnga, b sẽn gom bũmb nins b sẽn yã la b wʋm yʋʋm wʋsg pʋgẽ wã yellã kɩtame tɩ b goamã tar pãnga.

Y sã n sɩng n tũuda a Zeova hal sẽn kaoose, yãmb me tõe n tika bũmb nins y sẽn yã la y wʋmã, n yeel t’a Zeova tũubã wata ne bark toor-toore. Tõe tɩ y yãa a Zeova sẽn maan bũmb sẽn yaa toor zall n sõng a nin-buiidã, tɩ y mi n tẽegdẽ tɩ noom-yã. Sã n yaa woto bɩ y gomd rẽ yell ne neb a taabã. Rẽ tõe n kenga y raoodo. Tõe tɩ y zoe n yãame tɩ sɩd yaa woto. Y sã n nong n gomd bũmb nins sẽn yɩ yãmb noog a Zeova tũubã pʋgẽ wã yell ne neb a taabã, y tõe n kenga b raood wʋsgo.—Rom. 1:11, 12.

Bũmb a to y sẽn tõe n maan n keng y taabã raood yaa y sẽn na n kẽnd Rĩungã roogẽ n maand tigissã wa y sẽn tõe. Y sã n kẽnge, tõe n nafa yãmb ne y tẽed-n-taasã. A Koni sẽn yaa saam-bi-poak ning yell d sẽn zoe n gomã yeelame: “Mam sẽn kẽnd tigissã sõngdame tɩ m pa komsd raood ye. Saam-biisã la saam-bi-pogsã sẽn wilgd tɩ b nong-m-la wʋsg Rĩungã roogẽ wã, m sũur yɩta wãn n sãame? M wae n kõta m tẽed-n-taasã kũun bilf sẽn na yɩl n wilg tɩ m sũur nooma ne b sẽn maand n kõt-mã. M na n ket n maanda m sẽn tõe fãa n naagd m tẽed-n-taasã n tʋmd a Zeova tʋʋmã.”

A ZEOVA SŨUR NOOMA NE BŨMB NINS FÃA Y SẼN ZOE N MAAN N KÕ-A WÃ

Biiblã gomda neb wʋsg a Zeova sẽn da nong yelle, tɩ yaool n yaa neb sẽn da pa le tõe n tʋm wʋsg a tũudmã pʋgẽ ye. Tẽeg-y-yã a Sɩmeyõ yelle. A Zeezi rogmã sasa t’a ra kʋʋla wʋsgo. A Sɩmeyõ sã n da kẽng wẽnd-doogẽ wã, tõe t’a ra geta kom-bɩɩsã sẽn be be n tʋmd tʋʋm sẽn tar yõodã. La a tagsg ra yaa wãna? Tõe t’a ra tagsdame t’a pa tar yõod wʋsg a Zeova nifẽ, bala a pa le tõe n tʋm wa kom-bɩɩsã ye. La a Zeova tagsgã ra yaa toor fasɩ. A yãame t’a Sɩmeyõ “yaa nin-tɩrg la wẽn-zoɛta,” n kɩt t’a yã a Zeezi sẽn wa n yaa bi-pɛɛlgã, tɩ rẽ yaa zu-zẽkre. A Zeova pʋd n vẽnega a Sɩmeyõ t’a togs bãngr-gomd bi-pɛɛlgã sẽn da na n wa lebg Mesi wã zugu. (Luk 2:25-35) Vẽenega, a Zeova pa ges a Sɩmeyõ sẽn da kʋʋlã ye. A gesa a tẽebã sẽn da tar pãngã. Sẽn paase, “vʋʋsem sõngã ra bee a zugu.”

Yãmb me tõe n basa y yam t’a Zeova sũur nooma ne y sẽn maand sɩd ne-a wã, baa ne y sẽn pa le tõe n maan bũmb wʋsg a tũudmã pʋgẽ wã. Maoong sẽn tat a Zeova yam yaa maoong ned sẽn “kõ wa sẽn zems a sẽn tare, la pa wa sẽn zems a sẽn pa tar ye.”—2 Kor. 8:12.

Woto wã, tagsd-y bũmb nins y sẽn tõe n maanã yelle. Wala makre, tagsd-y bũmb nins y sẽn tõe n maan koɛɛgã mooneg pʋgẽ wã yelle, baa y sã n pa tõe n moon n kaoose. Y leb n tõe n boonda y tẽed-n-taasã ne telefõn wall y gʋlsd-b lɛta n kengd b raoodo. Ned sã n maan baa yaa bõn-kɩdg n wilg t’a nonga a tẽed-n-taasã, tõe n kenga b raood wʋsgo. Sẽn yɩɩd fãa, sã n yaa ned sẽn sɩng n tũud a Zeova hal sẽn kaoose.

Baa sẽn kʋʋl-bã sẽn pa le tõe n maan bũmb kẽerã, b ket n tõe n maana bũmb wʋsg a Zeova yĩnga. Wala makre, ges-y kibar ning sẽn zĩnd Afirik delɛst tɩ b gomd a yell sõs-kãngã zĩ-gũbrã pʋgẽ wã. A gom-zugã yaa: “A fãaga a vɩɩmã.”

Tẽeg-y tɩ y sẽn maand sɩd ne a Zeova hal yʋʋm wʋsg la y ket n tar tẽebã tõe n kenga neb a taabã raood wʋsgo. Y sẽn tõogd toogã yaa mak-sõngo, tɩ y tõe n bas y yam tɩ “Wẽnnaam yaa tɩrlem soaba, n pa na n yĩm yãmb tʋʋmdã ne y sẽn wilg tɩ y nonga a yʋʋrã, y sẽn sõng nin-sõamyã wã la y ket n sõngd-bã ye.”—Ebre. 6:10.

MAAND-Y BŨMB NINS Y SẼN TÕE WÃ

Bãngdbã vaeesame n wilg tɩ neb wʋsg sẽn kʋʋl n yaool n sõngd b taabã wae n tara laafɩ, n tagsd sõma la b vɩ n kaoosdẽ n yɩɩda.

La yaa vẽeneg tɩ maan neb a taabã neer pa kɩtd tɩ zu-loees nins kʋʋlmã sẽn wat ne wã fãa sa ye. Yaa Wẽnnaam Rĩungã bal n tõe n kɩt tɩ bũmb ning sẽn wat ne kʋʋlmã la kũumã sa, rat n yeel tɩ yel-wẽndã d sẽn dogd ne d sẽn yaa a Ãdem yagensã yĩngã.—Rom. 5:12.

La y sã n maand bũmb nins a Zeova sẽn dat tɩ y maanã, wala makre n sõngd neb a taabã tɩ b bãngd-a, tõe n sõngame tɩ y ket n tẽed manegre. Leb n tõe n paasa y yĩngã laafɩ menga. D tẽed-n-taas sẽn kʋʋle, bãng-y t’a Zeova nanda bũmb nins y sẽn maand a tũudmã pʋgẽ wã, la tɩ tigingã neb a taabã sũur nooma wʋsg ne y sẽn kõt mak-sõng tẽebã wɛɛngẽ wã.