Sebã ẽnpirimg tʋʋm-teed sẽn tʋmd sõma sẽn sõngd to-to tɩ ‘neb buud fãa’ tõe n bãng Wẽnnaam

Wẽnnaam a Zeova ratame tɩ “nebã buud fãa . . . paam bãngr hakɩɩk sɩdã zugu.” (1 Tɩmote 2:3, 4) La d tẽed-n-taasã la neb nins d sẽn moond koɛɛgã gomda buud-goam wʋsgo. Yʋʋmd fãa, d ẽnpirimda sẽn ta sɛb milyaar a yiib buud-gom-kãens pʋsẽ. Bõe la d maand sẽn na yɩl n yiis sɛb buud-goam toor-toor pʋsẽ, la d ra sãam ligd ning y sẽn kõtã me?

Sɛbã ẽnpirimg zĩis boogame, la b tʋʋm-teedã sõmblem paasame

Yʋʋmd 1980 wã, d ra ẽnpirimda sɛb tẽns pis-naas la zak pʋsẽ. Bilf bilfã, d wa toeema d sẽn ẽnpirimd sɛbã to-to wã tɩ kɩt tɩ lebg tẽns a wɛ bal pʋsẽ la d ra ẽnpirimd sɛbã. Wakat kãng me, d sẽn da segd n yiis sɛbã buud-goam nins pʋsẽ sõorã paasame n yɩɩd pĩndã naoor a yoobe. Wãn to la d tõe n ẽnpirim sɛb buud-goam wʋsg pʋsẽ ne masĩn-dãmb sõor sẽn pa waooge? Bũmb a ye sẽn sõngd tõnd yaa d sẽn da tar ẽnpirimg tʋʋm-teed sẽn tʋmd sõma wã.

B sẽn yiis masĩn-paal sẽn tar pãngã yĩnga, d tõogdame n ẽnpirimd sɛb wʋsg wakat bilf pʋgẽ. D pĩnd masĩn-dãmbã sẽn da yaa kʋdã yĩnga, kɩtame tɩ d sã n da ẽnpirim sebr n sa n dat n sɩng a to, d rɩkda sẽk wʋsgo. Masã, d sẽn paam masĩn-dãmb sẽn tʋmd sõma wã, d tõe n toeema ẽnpirimgã tʋʋm-teed tʋʋl-tʋʋle, tɩ kɩt tɩ d tõe n ẽnpirim sɛb wʋsg baa buud-goam nins neb wʋsg sẽn pa gomdã pʋsẽ. Sẽn na yɩl n tõog n tʋm tʋʋm-kãensã fãa yɩɩ tɩlɛ tɩ d toeem d ẽnpirimgã tʋʋm-teed kẽere. Yʋʋmd ning sẽn loogã pʋgẽ, d yiisa sẽn ta dolaarã milyõ a yiib n da tʋʋm-te-kãense.a D sã n dat n ẽnpirim sɛb sõor sẽn pa wʋsgo, d tʋmda ne masĩn kẽer sẽn pa baood tɩ d toeem ẽnpirimgã tʋʋm-te-kãens ye. Woto sõngame tɩ d pa kẽesd ligd wʋsg seb-kãens yiisg pʋgẽ, tɩ kɩt tɩ d tõog n kẽgsd ligd me.

Yʋʋm a tãabã sẽn loogã, dũniyã gill zugu, d yiisa dolaarã milyõ piig la zak sẽn na yɩl n da masĩn-dãmb sẽn tar pãnga, sɛbã ẽnpirimd yĩnga. Bɩ d ges d sẽn tʋmd ne tʋʋm-te-kãens to-to sẽn na yɩl n yiis Biibl-dãmba. Pĩndã, Biibl a ye ẽnpirimg poore, saam-biisã ra segd n maana bũmb toor-toor n paase, sẽn na yɩl n tõog n yiis Biiblã. Bõn-kãens ra taa bãmb pis-naas la zaka. Wala makre, sɛbã sẽebo, b wãabo, maan tɩ sɛb-vãadã zems taaba, la bũmb a taaba. B sã n da sa tʋʋmde, b ra segd n dɩka Biibl-dãmbã ne nus n tall n kẽng tʋʋm ning sẽn pʋgdã zĩigẽ. Masã bũmb toor-toorã d sẽn segd n maanã zemsa piig bala, bala masĩn-dãmbã tõe n tʋma tʋʋm wʋsgo. Sẽn paase, masĩn-dãmbã tusda Biibl-dãmbã tɩ kẽng tʋʋmd ning sẽn pʋgdã zĩigẽ. Rẽ kɩtame tɩ tʋʋm nins saam-biisã sẽn da tʋmd sẽn na yɩl n yiis Biibl-dãmbã boog pʋɩ-sʋka. Wala makre, pĩndã Zapõ filiyallã ra yiisda Biibl-dãmb tus a yiib lɛɛr a nii fãa pʋgẽ. Masã, b yiisda na maan Biibl-dãmb tus-pis-tã la a nu lɛɛr a nii wã pʋgẽ.

D kẽgsa ligdi d sẽn pa le bĩngd sɛb wʋsg sɛbã bĩngr zĩisã yĩnga

Tʋʋm-teedã sõmblem sẽn paasã sõng-d lame tɩ d tõog n kẽgs ligd ning nebã sẽn kõtã. Wala makre, masã d tõngd n yiisda sɛb sõor sẽn pa waooge. D sã n ẽnpirim sebr n sa n dat n sɩng a to me, d pa le rɩkd sẽk wusg ye. Woto kɩtame, tɩ d pa le bĩngd sɛb wʋsgã d sẽn ẽnpirimdã d sɛbã bĩngr zĩisẽ ye. A Gary sẽn tʋmd Etazĩni filiyallẽ wã yeelame yaa: “Sɩngrẽ wã, b sẽn yeel tɩ d ẽnpirim sɛb sõor sẽn pa waoog naoor wʋsgã, d da getame tɩ pa yam tʋʋmde ye. Ra wõnda, d sã ẽnpirim sɛb sõor sẽn yaa wʋsg naoora wãn bal n são.” A paasame yaa: “Yʋʋmd ning d sẽn sɩng sɛb sõor sẽn pa waoogã ẽnpirimgã, ligd ning d sẽn kẽes ẽnpirimgã tʋʋm-teed la bũmb a taab pʋgẽ wã paasa sẽn ta dolaarã tus-pis-yoob n yɩɩd pĩndã. La yʋʋm-kãnga, d sẽn da pa le bĩngd sɛb wʋsg sɛbã ẽnpirimg zĩisẽ wã yĩnga, ligd ning d sẽn kẽgsã yɩɩda dolaarã milyõ a ye la pʋɩ-sʋka!” D rɩkda ligd-kãng n maan bũmb a taab sẽn tar yõodo, wala makre rĩungã rot meebo wall n sõng neb nins sabab-wẽns sẽn paamã.

D sẽn da pa le bĩngd sɛb wʋsg filiyall-dãmb kẽer pʋsẽ wã kɩtame tɩ d paam vɩʋʋg bũmb a taab yĩnga. Betɛll-dãmb a taab tõe n tʋma tʋʋm kẽer zĩ-kãens pʋsẽ. Sẽn paase, d sẽn pa le ẽnpirimd sɛbã tẽns wʋsg pʋsẽ wã, kɩtame tɩ d met Betɛll-dãmb sẽn pa bɛda. Yʋʋmd 2018 wã, Eropsãntrall filiyallã la zĩis a taab b sẽn ẽnpirimd sɛbã, n da ẽnpirimd sɛb nins Gãrãnd Bertayn filiyallã sẽn da ẽnpirimdã. Woto sõngame tɩ d tõog n kẽgs dollarã milyõ-rãmb wʋsgo d sẽn wa n me Betɛll-paall Chelmsford sẽn be Ãngeletɛɛrã.

“Fo tẽega m yelle!”

D sẽn toeem d sẽn ẽnpirimd sɛbã to-to wã kɩtame tɩ d tõog n sõng neb wʋsg tɩ b lebg a Zeova zo-rãmba. Masã, d ẽnpirimda sɛb buud-goam wʋsg pʋsẽ baa buud-goam nins neb wʋsg sẽn pa gomdã pʋsẽ. Wala makre, Nuvɛll Kaledoni, Wallis la Futuna tẽnsã sẽn naag taab pʋsẽ wã, yaa sẽn zems neb tus-pis-tã la a nu bal n gomd wallisien buud-gomdã. La yʋʋmd 2024 sa-sik kiuugã pʋgẽ, d yiisa Dũni-paalgã lebgre tõr wallisien buud-gomdã pʋgẽ. A Selafina yaa koe-moond sẽn gomd wallisien buud-gomdã. A yeelame yaa: “M sã n da karemd Biiblã ne farende, m da pa wʋmd gomd biis kẽer võor ye. Rẽ n so tɩ d sẽn wa n paam Biiblã ne Wallisien buud-gomdã, m sũur yɩ noog wʋsg hal tɩ m raag nintãm. M pʋʋs a Zeova n yeela yaa: ‘Zeova, fo tẽega m yelle. Fo sɩd pa bakd ned ye.’”

Kõngo tẽngẽ wã, neb nins sẽn gomd Sanga buud-gomdã sõor pa ta neb tus-kobs-nu ye. La baa ne rẽ b yiisa Vɩɩmd-y wakat sẽn kõn sa! sebrã buud-gom-kãng pʋgẽ. A Josué sẽn be Sanga buud-gomd tiging pʋgẽ wã yeelame yaa: “M da rɩkda sẽk wʋsg n na n sõng m Biibl karen-biisã tɩ b wʋm gom biis kẽer võore. La baa ne rẽ, wakat ninga, m Biibl karen-biisã da pa wʋmd sebrã sẽn yet bũmb ningã võor sõma ye. Dẽnd yɩɩ bark tɛkẽ, d sẽn paam sebrã ne Sanga buud-gomdã. Masã, mam Biibl karen-biisã wʋmda sebrã sẽn yet bũmb ningã võor sõma. M pa le rɩkd sẽk wʋsg me n bilgd sebrã goamã võor ye.”

Masã, d yiisda sɛb la bũmb a taab nebã sẽn tõe n paam buud-goam wʋsg pʋsẽ. Y kũun toor-toorã y sẽn kõta, wala makre, kũun nins y sẽn kõt donate.jw.org pʋgẽ wã n sõngd tɩ d tõogd n maand woto fãa. D pʋʋsd-y la bark wʋsgo y sẽn sak n kõt kũunã yĩnga.