D Rĩungã rot yell gesgo

A Nicole sẽn yaa saam-bi-poak sẽn be Kolõmbi wã yeelame yaa: “Mam nonga tõnd Rĩungã roog wʋsgo. Be, m tõe n paam n zĩnda ne m saam-biisã la m saam-bi-pogsã.” Yãmb me tagsda wa a Nicole bɩ?

Dũniyã gill zugu, a Zeova Kaset rãmbã tigimda taab Rĩung rot tus pis-yoob la a tãab pʋsẽ, n waoogd Wẽnnaam. Yaa zĩis sẽn be yamleoogo. A David sẽn yaa wakat fãa so-pakd n be Kolõmbi wã yeelame: “Tõnd Rĩungã rot sẽn yaa neebã kɩtame tɩ nebã rat n wa kelg zãmsgã b sẽn kõt be wã. Neb wʋsg sẽn wat tõnd tigissã sũur nooma d sẽn zãad d Rĩungã rot sõma wã yĩnga.” Sɩd me, d maanda modgr wʋsg n nedgd d Rĩungã rot la d get b yelle. Wãn to la d get d Rĩungã rot yelle?

Bõe la d maand sẽn na yɩl ges d Rĩungã rot yelle?

Yaa tiging fãa n segd ges a Rĩung roog yelle. Rẽ n so tɩ saam-biisã la saam-bi-pogsã yẽesd-b wakat fãa, n get-b yell la b manegd bũmb nins sẽn dat manegrã.

Sẽn na yɩl n sõng tigimsã tɩ b tõog n get b Rĩungã rot yell sõma, Betɛllã biru ning sẽn get rotã meeb yellã (LDC) yãkda saam-biisi, n wilg-b b sẽn tõe n ges Rĩungã rot yell to-to. Saam-biig fãa geta Rĩung rot a yoob bɩ sẽn zems bãmb piig yelle. A kaagda tiging fãa, n wilgd koe-moondbã b sẽn tõe n ges b Rĩungã roog yell to-to. Yʋʋm a tãab fãa a lebgd n tɩ gesa Rĩungã rot sã n pa rat manegre.

Saam-biisã la saam-bi-pogsã sũur nooma ne zãmsg ning b sẽn paamdã. Saam-bi-poak a Indhumathi sẽn be Ẽndã yeelame yaa: “Zãmsg ning b sẽn kõt tõnd Rĩungã rot gesg wɛɛngẽ wã yɩ-m-la noog wʋsgo”. A Evan sẽn be Kenya wã yeelame yaa: “D bãngame tɩ sẽn na yɩl n da maan depãens-rãmb wʋsg Rĩungã rot gesg wɛɛngẽ, d segd n manegda b yel-bõonesã sẽn na yɩl tɩ ra wa lebg yel-kãsems ye.”

Yɛ la d paamd ligd sẽn na yɩl n ges d Rĩungã rot yelle?

Yʋʋmd fãa, d yiisda ligd wʋsg sẽn na yɩl n ges d Rĩungã rot yelle. Ligd ning d sẽn kẽesd Rĩung roog yell gesg wɛɛngẽ wã bee ne a sẽn be zĩig ningã, b sẽn me-a wakat ningã, la tigims nins sõor sẽn tigimd beenẽ wã. Yɛ la d paamd ligd sẽn na yɩl n ges d Rĩungã rot yelle?

Yaa kũun nins y sẽn kõtã n sõngd tɩ d get d Rĩungã rot yelle. A Alexander sẽn vɩ Kazagstã wã yeelame yaa: “Ligd ning y sẽn kõtã sõngdame tɩ d maand ẽntɛrnetã, koomã la kʋʋrã wã depãens-rãmbã. Ligd-kãng me le sõngdame tɩ d tõogd n daad teedo, wala makre saase, gã-rãmb la tʋʋm-teed a taab sẽn na yɩl n paam n ges Rĩungã roog yelle.” B yãkda kũun ning y sẽn kõtã me n teel tʋʋmdã d sẽn tʋmd dũniyã gill zugã. Woto sõngdame tɩ d tõogd n manegd Rĩung rot nins sẽn sãam wʋsgã.

D sẽn maand to-to n paamd ligd n manegd Rĩung rot nins sẽn sãam wʋsgã

Sã n wa yaa tɩlɛ tɩ b yiis ligd wʋsg sẽn na yɩl n maneg Rĩung roogo, kãsem-dãmbã kota LDC wã sõngre. LDC wã sã n kõ sore, yaa ligd ning y sẽn kõt n teend tʋʋmdã d sẽn tʋmd dũniyã gill zugã la b yãkd n maneg Rĩungã roogo. Yʋʋmd 2023 pʋgẽ, yɩɩ Rĩung rot tus a nii la kobs-yopoe la pis-wɛ la a tãab la b maneg-yã. Ligd ning b sẽn rɩk n maneg Rĩungã ro-kãens yɩɩda dolaarãa milyõ pis-yopoe la a yoobe. Bɩ d gom Rĩung rot a yiib d sẽn maneg yelle.

Ãngola, Rĩung roog a ye n da sãam wʋsgo. B sẽn me-a wã taa yʋʋm piig la a nu. Rĩungã roog kʋʋrã wã filles ra kʋdgame, tɩ lalsã pusi. Yagsã meng ra yetame tɩ Rĩungã roog koom zoet n kẽeda b zagsẽ wã. LDC wã rɩka seglse, n na n maneg bũmb nins sẽn sãamã. Ligd ning b sẽn dɩk n maneg Rĩungã roog taa dolaarã tus a wɛ la kobs-yi la pis-nii la a nu. Yagsã sũur yɩɩ noogo. Sẽn paase, b pẽga saam-biisã sẽn tʋm tʋʋmdã to-to wã.

Poloyn, Rĩung roog a ye n da yũund t’a tapɩ wã sãam zãng me. LDC wã kõo sor tɩ b maneg Rĩungã roogo. B yiisa dolaarã tus a wɛ la kobs-yopoe la pis-nu la a yopoe n maneg Rĩungã roogo. B sẽn maan woto wã, na n kaoosa yʋʋm tɩ b yaool n le n kẽes ligd wʋsg n maneg Rĩungã roogo.

D sã n get d Rĩungã rot yelle, waoogda a Zeova yʋʋrã

D sã n get d Rĩungã rot yell sõma, sõngdame tɩ d kẽgs ligd ning y sẽn kõtã. Leb n sõngdame tɩ d waoogd a Zeova yʋʋrã. Saam-biig a Shaun sẽn be Tõnga wã yeelame yaa: “D sẽn get d Rĩungã rotã yell sõma wã kɩtame tɩ d waoogd a Zeova zĩig sẽn yaa yɩlemde, la b sẽn maneg tɩ yaa sõma pʋgẽ. Woto kɩtame tɩ nebã pẽgd a Zeova yʋʋrã. Yaa ne sũ-noog la d boond nebã tɩ b wa d Rĩungã roogẽ.”

Bõe la y tõe n maan n sõnge?

D fãa tõe n sõng n gesa d Rĩungã roog yelle. A Marino sẽn yaa saam-biig sẽn tʋmd ne LDC wã sẽn be Ostrali wã yeelame yaa: “D fãa tõe n kẽesa d toog d Rĩungã rot gesg yell pʋgẽ. D sã n maand woto, na n sõnga siglgã t’a kẽgs ligd wʋsgo. D tallda ligd-kãng n maand bũmb a taab sẽn tar yõodo.”

A Joel sẽn yaa saam-biig sẽn be Ẽndã nong n sõngd n geta b Rĩungã roog yelle. A yeelame yaa: “M sã n naag m saam-biisã la m saam-bi-pogsã n tʋmdẽ, sõngda maam tɩ m mamsd m yamẽ vɩɩmã sẽn na n yɩ to-to dũni-paalgã pʋgẽ.” A Nicole sẽn yaa saam-bi-poak ning yell d sẽn zoe n gomã yeelame yaa: “Sẽn nan pa kaoose, saam-biis n da manegd bũmb kẽer sẽn sãam Rĩungã roog ko-soalsgẽ, tɩ mam da yẽesd ko-soalsgã. Baa ne mam sẽn pa sõng n maneg bũmb ning sẽn sãamã, mam sẽn maan bũmb ningã tõe n sõngame tɩ sãmpogr ra zĩnd ye.”

Yãmb me sã n dat n sõng n ges y Rĩungã roog yelle, bɩ y togs y kãsem-dãmbã. Sẽn paase, y sã n kõ kũuni sõngdame tɩ d get y Rĩung roogã yelle, la Rĩung rot a taabã sẽn be dũniyã gill zugã yelle. Y tõe n ninga y kũunã kogendã sẽn be Rĩungã roogẽ wã pʋgẽ, wall y kẽ donate.jw.org n kõ y kũunã. D pʋʋsd-y-la bark wʋsg ne kũun toor-toorã y sẽn kõtã.