Tall-y tagsg sẽn zems zu-loeesã zugu

1-2. Bõe la d tõe n maan tɩ sõng-d tɩ d tõog toog zu-loees sasa? (Ges-y fotã me.)

A ZEOVA nonga a nin-buiidã. Baa ne rẽ, b sʋkã neb wʋsg vɩɩm pida ne zu-loees la sũ-sãamse. Kẽer yaa b zakã rãmb wall b tẽngã taoor dãmb n namsd-b b tũudmã yĩnga. Sãnda yaa bãag wall kʋʋlmã sẽn wat ne zu-loees ninsã n namsd-ba. La kẽer ned n maan kaalem wall yel-beed a to n paam-b tɩ namsd-ba. Yãmb me tara zu-loɛɛg tɩ namsd-y wʋsg bɩ?—Yɩɩn. 90:10.

² D sã n wa tar zu-loeese, d segd n talla tagsg sẽn zems zu-loeesã zug sẽn na yɩl n tõog toogo. Bõe yĩnga? Bala d sã n get d zu-loeesã wa a Zeova sẽn get-b to-to wã, na n sõng-d lame tɩ d bãng d sẽn segd n maanega. Yaa wa y sẽn wẽnd mobilli. Mobillã vɩtr sã n yaa rẽgdo, y pa na n tõog n yã bũmb sẽn be sorã zug ye. Vɩtrã sã n yaa yɩlemde y nee sõma n miẽ y sẽn tõe n kẽn to-to tɩ yell ra paam-y ye. Sõs-kãngã pʋgẽ, d na n bao n bãnga tall tagsg sẽn zems zu-loeesã zugã sẽn dat n yɛɛlga, tall tagsg sẽn pa zems zu-loeesã zugã sẽn tõe n wã-d to-to, la bũmb kẽer d sẽn tõe n maan zu-loees sasa.

TAGSG SẼN ZEMS ZU-LOEESÃ ZUGU

3. Bõe yĩng tɩ d pa tõe n pa paam zu-loees rũndã-rũndã?

³ D pa tõe n pa paam zu-loees dũni-kãngã pʋgẽ ye. D sã n ket n yaa neb sẽn pa zems zãnga, t’a Sʋɩtãan me ket n yaa dũniyã naaba, zu-loeesã na n namsda d fãa. Sẽn paase, dũni-kãngã saabã sẽn kolgdã, zu-loeesã na n tara paasgo. Tõe n yaa sabab-wẽns wall ninsaalbã tʋʋm-beedã n na n kɩt tɩ d namse. (Mat. 24:8; 2 Tɩm. 3:13) A Zeova na n wa kɩtame tɩ zu-loe-kãens fãa sa. La a pa na n maan woto rũndã-rũndã ye. Sã n pa rẽ, na n yɩɩ wa a sõngda a Sʋɩtãan sẽn yaa dũni-kãngã naabã. Dũni-kãngã pʋgẽ, d pa tõe tɩ “yel-beed” pa paam-d ye.—Koɛ. 9:12.

4. Bõe yĩng me tɩ d namsdẽ?

⁴ D sẽn yaa kiris-nebã me kɩtame tɩ d namsdẽ. A Zeezi yeela a karen-biisã naoor wʋsg tɩ b na n nams-b-la b tũudmã yĩnga. (Mat. 24:9; Zã 16:2) D sẽn mi rẽ wã kɩtame tɩ b sã n wa namsd-d bɩ d pa na n bas tɩ d tẽebã pãng boog ye. (1 Tes. 3:3, 4) D sã n ket n maand sɩd ne a Zeova baa zu-loe-kɛgems sasa, d tõe n basa d yam tɩ d ket n bee sor ning sẽn tar n dabd vɩɩm sẽn ka sɛtã zugu. Sẽn paase, d wilgdame tɩ d yãka yam n tũud a Zeova, d sẽn kɩs sɩd t’a rɩta a naamã sõma wã yĩnga. D wilgdame me t’a Sʋɩtãan yaa pʋ-yagda. A Sʋɩtãan yagda ziri n yetẽ tɩ ninsaalbã tũuda Wẽnnaam bũmb nins a sẽn kõt-bã yĩnga. Rẽ n so t’a Sʋɩtãan namsda a Zeova nin-buiidã, n dat n wilg tɩ b pa na n kell n maand sɩd ne-a toog wakat ye. (Zoob 1:9-11) D sã n kell n tõog toog d sẽn nong a Zeova wã yĩnga, noogda a sũuri.—Yel. 27:11.

5. Koɛɛg soab 7:13, 14 goamã wilgda tõnd bõe? (Ges-y fot-rãmbã me.)

⁵ A Zeova basdame tɩ d paamd zu-loeese. A Zeova zɩ n maan wẽnga, la a pa makd ned me t’a maan wẽng ye. (Zak 1:13) La rĩm a Salomo yeelame tɩ “toog daar” yaa Wẽnnaam tʋʋmde. (Karm-y Koɛɛg soab 7:13, 14.) A gomdã pa rat n yeel tɩ yaa a Zeova n kɩtd tɩ yel-beedã maandẽ ye. Rat n yeelame bal t’a basdame tɩ bõn-kãens maandẽ. Woto wã, yam-bʋg la d tõe n dɩk a Salomo goam nins sẽn be Koɛɛg soab 7:13, 14 pʋgẽ wã. Pipi, d segd n sak n deegame t’a Sʋɩtãan dũniyã pʋgẽ, wakat ninga d yɛlã na n yaa sõma, tɩ wakat ning bɩ d tar zu-loeese. D yɛlã sã n wa yaa sõma bɩ d pʋʋs a Zeova barka bala bõn-sõma fãa yita a nengẽ. Yiibu, a Salomo tẽega tõnd tɩ d pa tõe n ‘bãng bũmb ning sẽn na n paam-d beoog ye.’ Tõe n yɩɩ bõn-sõngo, wall bõn-wẽnga. Yel-lingd paamda nin-tɩrsã ne nin-wẽnsã fãa.

6. Tõe tɩ bõe n mi n kɩt t’a Zeova bas tɩ d paam zu-loeese? (Ebre-rãmbã 12:7, 11)

⁶ D sã n wa tar zu-loeese, a Zeova tõe n tũnuga ne rẽ n wilg tɩ d segd n teega yẽ, la tɩ d pa segd n teeg d meng ye. D sã n wa namsdẽ a Zeova neeme tɩ pa noom-a ye. A pʋlmame t’a na n sõng-d lame. Baa d sã n wa kẽnd “long sẽn yaa lik bida pʋgẽ,” a na n ket n wilgd-d-la sore, n dat tɩ d bas d yam t’a nong-d lame la t’a na n kõ-d-la pãng tɩ d tõog toogo. (Yɩɩn. 23:4) Zu-loeesã tõe n sõng-d lame tɩ d bãng pãn-komsem d sẽn tare, n bɩɩs zʋg-sõma ne Wẽnnaam sõngre. (Karm-y Ebre-rãmb 12:7, 11.) Wala makre, a Zoob ra segd n bɩɩsa sik-m-meng n paase. Pa a Zeova n kɩt t’a Zoob paam zu-loeesã ye. La a basame t’a namse, n tũnug ne rẽ n sõng-a t’a bãng bũmb toor-toor sẽn tar yõodo. (Zoob 42:1-6) La sẽn wa n yaa a soab fãa, d miime t’a Zeova pa na n bas tɩ bũmb paam tõnd tɩ pa tar tɩɩm ye. D sã n tõog toog n kell n maan sɩd ne a Zeova, d paamda “tõogr hakɩɩka.”—Rom. 8:35-39.

7. Bõe yĩng tɩ d tõe n maan sũ-noog baa b sã n wa namsd tõnd d tũudmã yĩnga?

⁷ B sã n wa namsd tõnd d tũudmã yĩnga, d tõe n maana sũ-noogo. B sã n wa namsd yãmb y tũudmã yĩng bɩ y ra tags tɩ rat n yeelame tɩ y pa le tat a Zeova yam ye. Namsg a woto pʋd n wilgdame tɩ y tata a Zeova yam. (Mat. 5:10-12) D tagsg sã n yaa woto, b sã n wa namsd tõndo, d tõe n paama sũ-noog la d ket n nand d meng wa tẽn-tʋmdbã. (Tʋʋ. 5:40-42) D sã n kell n maan sɩd ne a Zeova namsgã sasa, tõe n sõnga neb a taabã tɩ b bao n bãng sɩdã la b “waoog Wẽnnaam.” (1 Pɩy. 2:12) Tẽeg-y-yã a Zozɛf yelle. Baa a sẽn wa n namsdẽ wã, a Zeova ra sõngd-a lame. A pa gũ t’a namsgã sa t’a yaool n ning-a bark ye. A Zeova tõe n sõnga tõnd me woto.—Sɩng. 39:3, 23.

8. Bõe me n kɩt tɩ d rat n kell n tõog toog zu-loees sasa?

⁸ D zu-loeesã na n wa saame. A Zoob kibarã wilgda tõnd tɩ d zu-loeesã tara tɛka. Sɩd me, “a Zeova ninga a Zoob bark a vɩɩmã baasgẽ n yɩɩg a sɩngrẽ.” (Zoob 42:12) Woto me, a Zeova na n ninga tõnd bark dũni-paalgã pʋgẽ, hal tɩ d pa tõe n bãng n bilg ye. Rũndã-rũndã d vɩɩmã pida ne zu-loeese, n leb n yaa koɛɛga. Sẽn yɩɩd fãa d sã n dɩk rẽ n mak ne vɩɩm sẽn kõn sa wã d sẽn na n paam ka la bilfã. Woto pa kɩt tɩ ned kam fãa rat n kell n tõog toog n tãag saabã sɩda?—Mat. 24:13.

TALL TAGSG SẼN PA ZEMS ZU-LOEESÃ ZUGÃ SẼN TÕE N WÃ-D TO-TO

9. D sã n tar tagsg sẽn pa zems zu-loeesã zugu, wãn to la tõe n wã-do?

⁹ D sã n wa tar zu-loees n pa tall tagsg sẽn zems b zugu, tõe n maneg n zẽna yɛlã. Wala makre, d tõe n wa tagsame tɩ yaa a Zeova n kɩt tɩ d namsdẽ. A buud paama a Zoobe. Wakat n zĩnd t’a ra tagsdẽ tɩ yaa Wẽnnaam n kɩt t’a namsdẽ. Rẽ kɩtame t’a “mak n na n wilg tɩ yẽ n yaa tɩrga, la pa Wẽnnaam” ye. (Zoob 32:2) Woto me, a Naomi namsgã sɩngr poore, a yeelame tɩ yaa a Zeova n kɩt t’a namsdẽ. (Rut 1:13, 20, 21) A Zoob ne a Naomi sã n da kell n tall tags-kɛg a woto, ra tõe n kɩtame tɩ b puug b sũur ne a Zeova, n bas a tũubu. (Yel. 19:3) A Zeova sõng-b lame tɩ b rems b tagsa wã, la a ning-b bark b sẽn kell n maan sɩd ne-a wã yĩnga.

10. D sã n tar zu-loeese, d tõe n wa sãmbda ne bõe?

¹⁰ Baa d sã n kɩs sɩd tɩ pa a Zeova n kɩt tɩ d namsdẽ, d tõe n wa sãmbda ne d yell sã n sɩd pak-a lame. Tags-kɛg a woto tõe n komsa d raoodo. (Yel. 24:10) Rĩm a Davɩɩd ne no-rɛɛs a Habakuk fãa paama zu-loeese. Rẽ kɩtame tɩ b wa sokd b mens a Zeova sã n sɩd kelgda b pʋʋsgã. (Yɩɩn. 10:1; Hab. 1:2) Baa ne rẽ, b pa bas a Zeova pʋʋsg ye. A sõng-b lame tɩ b bas b yam t’a bee ne-ba, n na n sõng yãmb me woto.—Yɩɩn. 10:17.

11. D sã n tar tags-kɛg d zu-loeesã zugu, bõe n tõe n maane?

¹¹ D sã n pa tar tagsg sẽn zems zu-loeesã zugu, d sã n wa paam zu-loeese tõe n ling-d lame, tɩ d tagsdẽ t’a Zeova ra pa segd n bas tɩ d nams ye. (1 Pɩy. 4:12) A Zeezi karen-biisã ra pa wʋmd a sẽn segd n namsã võor ye. (Luk 18:33, 34) Baa ne a Zeezi sẽn togs-b vẽeneg t’a na n namsame wã, tẽn-tʋmd a Pɩyɛɛr ra pa rat n sak n deeg tɩ na n yɩɩ woto ye. A Zeezi ra miime t’a Zeova raabã yaa a sak n nams la a ki, n da rat n maan dẽ. A sã n da get yɛlã wa a Pɩyɛɛr sẽn get-b to-to wã, ra na n yɩɩ toog t’a maan Wẽnnaam daabã. Rẽ n so t’a rems a Pɩyɛɛre. (Mark 8:31-33) Baa a Zeezi kũumã poore, ra ket n yaa toog ne a karen-biisã tɩ b wʋm yɛlã võore. La a Zeezi pa bas b sõngr ye. A vʋʋgrã poore, a ‘bilg-b-la Gʋls-sõamyã võor sõma,’ n sõng-b tɩ b wʋm bũmb ning sẽn kɩt t’a ra segd n namsã võore. (Luk 24:25-27, 32, 44-48) B sã n da bʋgs bũmb nins a Zeezi sẽn zãms-bã zugu, ra na n sõng-b lame tɩ b segl b mens namsgã b sẽn da na n paam rẽ poor bilfã yĩnga. Tõnd me tõe n bʋgsa Biiblã sẽn yet bũmb ning namsgã zugã, n segl d meng d sẽn tõe n wa paam zu-loeesã yĩnga.

12. D sã n pa tall tagsg sẽn zems zu-loeesã zugu, tõe n waa ne bõe me?

¹² D tõe n wa tagsdame tɩ d yɛlã yaa wẽns n yɩɩd b sẽn yaa to-to wã. A Zeezi wilga bũmb a ye sẽn tõe n kɩt tɩ d wa tagsdẽ tɩ d yɛlã yaa wẽns wʋsg tɩ yaool n pa woto ye. Yɩɩ a sẽn wa n wẽ yel-bũnd n gom tʋm-tʋmdb sẽn tʋmd viyn pʋʋgẽ yellã. Tʋm-tʋmdb kẽer sũy sãama wʋsgo, bala b ra tagsdame tɩ b sẽn yao-b ligd ningã pa zems ye. La pʋʋgã soab yeela b nin-yend yaa: “M zoa, mam pa zãmb foo ye.” (Mat. 20:10-13) Tʋm-tʋmdbã ra tagsdame tɩ pʋʋgã soab zãmb-b lame. La pa woto ye. Yaa bãmb n da rat bũmb b sẽn pa segd ne. Rũndã-rũndã me, a Zeova Kaset rãmb kẽer tõe n wa tagsdame tɩ b maand-b-la pãnga. Wala makre, b sã n pa kõ nina tʋʋmde, wall b sã n deeg tʋʋmd n bas-a, a tõe n tagsame tɩ pa zems ye. La bõe la d tõe n maan tɩ sõng-d tɩ d tall tagsg sẽn zems zu-loeesã zugu?

BŨMB KẼER D SẼN TÕE N MAAN ZU-LOEES SASA

13. D sã n wa tar zu-loeese, bõe n tõe n maane?

¹³ Tõe tɩ y mii Biiblã sẽn yet bũmb ning namsgã wɛɛngẽ wã. Tõe meng tɩ y tũnuga ne rẽ n sõng neb a taab tɩ b tõog toog zu-loees sasa. La yãmb mengã sã n wa tar zu-loeese, tõe n yɩɩ toog tɩ y kell n tall tagsg sẽn zemse. Wala makre, y tõe n tagsame tɩ yaa a Zeova n sɩbgd-y-yã, wall t’a pa kelgd y pʋʋsgã ye. Sã n wa yaa woto, bõe la y tõe n maan tɩ sõng-y tɩ y kell n tall tagsg sẽn zemse?

14. Y sã n wa tar zu-loeese, bõe la y tõe n pʋʋs a Zeova n kose? (Filip rãmbã 4:13)

¹⁴ Kos-y-yã a Zeova t’a sõng-yã. Togs-y-yã a Zeova y yɛlã sẽn yaa to-to wã, la rẽ sẽn namsd-y to-to. Y tõe n togs-a-la y sẽn dat t’a sõng-y to-to wã takɩ. Y tõe n kos-a-la a vʋʋsem sõngã, t’a kõ-y pãng la yam tɩ y tõog toogo. La tẽeg-y t’a Zeova tõe n leoka y pʋʋsgã tɩ pa yɩ wa y sẽn da tagsdã ye. (Efɛɛ. 3:20) Sẽn paase, a Zeova tõe n tũnuga ne malɛgsã wall y tẽed-n-taasã n sõng-yã. (Yɩɩn. 34:7) Woto wã, gũusd-y n get-y-yã a Zeova sẽn sõngd-y to-to wã, n pʋʋsd-a bark rẽ yĩnga. Bas-y y yam t’a Zeova tõe n kõ-y-la a vʋʋsem sõngã tɩ sek y na tõog toogo, baa y zu-loeesã sẽn wa n yaa to-to.—Karm-y Filip rãmb 4:13.

15. Y sã n wa tar zu-loeese, bõe la y segd n ket n maandẽ? (Ges-y fotã me.)

¹⁵ Ket-y n maand-y bũmb nins sẽn paasd y tẽebã pãngã. Baa y sã n pa le tõe n maan bũmb kẽer wa pĩndã bɩ y ket n maand y sẽn tõe. Yaa “toog la zu-loees” wakat la d segd n tagsd a Zeova goamã yell n yɩɩda. (Yɩɩn. 119:143) Rẽ n so tɩ y segd n ket n karemd Biiblã wakat fãa, n zãmsd-a la y bʋgsdẽ. Moond-y koɛɛgã wa y sẽn tõe, n kẽnd tigissã la y kẽesd y toogo. Baood-y y tẽed-n-taasã zĩiga. Ra nong-y n yaa y yembr ye.—Yel. 18:1.

16. Y sã n wa tar zu-loeese, y tõe n wa sãmbda bõe wɛɛngẽ, la bõe la y segd n maane? (2 Korẽnt rãmbã 10:4, 5)

¹⁶ Modg-y n bas-y sãmbsã. Y sã n wa tar zu-loeese, y tõe n wa tara tags-kɛg y mengã wall a Zeova zugu, tɩ d tõe n mak tags-kɛgã ne ‘bũmb sẽn vigl kãn-kãe’ y sẽn segd n lubi. (Karm-y 2 Korẽnt rãmb 10:4, 5.) Y sã n maan vaeesg Biiblã la siglgã sɛb pʋsẽ, tõe n sõng-y lame tɩ y rems y tagsa wã. Wala makre, y sã n tagsd tɩ y pa le tat a Zeova yam, y tõe n karma tẽn-tʋmd a Poll kibarã. A sẽn wa n moond koɛɛgã, a paama zu-loe-kɛgemse. La zu-loe-kãens pa kɩt t’a bas koɛɛgã mooneg ye. Pʋd n kɩtame t’a kɩs sɩd t’a tata a Zeova ne a Zeezi yam. (2 Kor. 11:23-27) Y sãmbda a Zeova sã n kõ-y-la sugr yel-wẽn y sẽn maan pĩnd yĩng bɩ? Sã n yaa woto bɩ y bao sebr n gʋlsd Biiblã vɛrse-rãmb sẽn wilgd t’a Zeova sɩd kõta sugr n bĩngdẽ. (Eza. 43:25) Mi-y n lebgd-y n karemd-y vɛrse-kãens la y bʋgsdẽ. (Yɩɩn. 119:97) Yel-beed n maan tɩ y sokd y meng a Zeova sã n kogenda neb nins sẽn tũud-a wã bɩ? Maan-y vaeesg tõnd sɛbã pʋsẽ n bao sõss sẽn gomd bũmb ning sẽn kɩt tɩ Wẽnnaam bas tɩ namsgã bee wã yelle, sõss sẽn na n kɩt tɩ y bas y yam tɩ baa sẽn wa n yaa a soaba, a Zeova na n sõng-d lame. (Yɩɩn. 91:9-12) Y leb n tõe n karma kibay sẽn wilgd d tẽed-n-taas sẽn mao ne zu-loe-kɛgems n kell n sak a Zeova ne sũ-noogo.a

17. Y sã n wa tar zu-loeese, bõe la y segd n maane?

¹⁷ Rũndã-rũndã, y yɛlã yaa sõma tɩ y pa tar zu-loe-kɛgeng bɩ? Sã n yaa woto bɩ y pẽg a Zeova la y pʋʋs-a bark bõn-sõma nins a sẽn kõt-yã yĩnga. (Koɛ. 7:14) La y sã n wa tar zu-loees bɩ y kell n tall tagsg sẽn zemse, la y teeg a Zeova ne y sũur fãa. Y sã n maan woto, a Zeova na n “tuka sor tɩ y tõog toogo.” (1 Kor. 10:13) La d tẽed-n-taag sã n wa tar zu-loe-kɛgemse, bõe la y tõe n maan n sõng-a? D na n goma rẽ yell sõsg ning sẽn pʋgdã pʋgẽ.