വിഷമി​പ്പി​ക്കുന്ന ചിന്തക​ളോ​ടു നിങ്ങൾക്കു പോരാ​ടാ​നാ​കും

1-2. പൗലോസ്‌ അപ്പോ​സ്‌ത​ലനു ചില​പ്പോ​ഴൊ​ക്കെ എങ്ങനെ തോന്നി​യി​ട്ടുണ്ട്‌, അദ്ദേഹ​ത്തി​ന്റെ മാതൃക നമ്മളെ സഹായി​ച്ചേ​ക്കാ​വു​ന്നത്‌ എന്തു​കൊണ്ട്‌? (റോമർ 7:21-24)

അപ്പോ​സ്‌ത​ല​നായ പൗലോസ്‌ എന്നു കേൾക്കു​മ്പോൾ നിങ്ങളു​ടെ മനസ്സി​ലേക്ക്‌ എന്താണു വരുന്നത്‌? ധൈര്യ​മുള്ള ഒരു മിഷനറി, വിദഗ്‌ധ​നായ ഒരു അധ്യാ​പകൻ, ഒരുപാ​ടു ബൈബിൾ പുസ്‌ത​കങ്ങൾ എഴുതിയ ആൾ എന്നൊ​ക്കെ​യാ​ണോ? ഇതെല്ലാം വളരെ ശരിയാണ്‌. എങ്കിലും നമ്മളെ​പ്പോ​ലെ പൗലോ​സി​ന്റെ മനസ്സി​നെ​യും പല വികാ​രങ്ങൾ അലട്ടി​യി​ട്ടുണ്ട്‌. അദ്ദേഹ​ത്തി​നും ചില​പ്പോ​ഴൊ​ക്കെ സങ്കടവും നിരാ​ശ​യും ഉത്‌ക​ണ്‌ഠ​യും ഒക്കെ തോന്നി.

² റോമർ 7:21-24 വായി​ക്കുക. റോമർക്ക്‌ എഴുതിയ കത്തിൽ പൗലോസ്‌ തനിക്കു തോന്നിയ ചില വികാ​ര​ങ്ങ​ളെ​ക്കു​റിച്ച്‌ പറയു​ന്നുണ്ട്‌. നമ്മളിൽ പലർക്കും ചില​പ്പോ​ഴെ​ങ്കി​ലും അങ്ങനെ​യൊ​ക്കെ തോന്നി​യി​ട്ടു​ണ്ടാ​കും. പൗലോസ്‌ വിശ്വ​സ്‌ത​നായ ഒരു ക്രിസ്‌ത്യാ​നി​യാ​യി​രു​ന്നെ​ങ്കി​ലും അദ്ദേഹ​ത്തി​ന്റെ ഉള്ളിൽ ഒരു പോരാ​ട്ട​മു​ണ്ടാ​യി​രു​ന്നു. ദൈവ​ത്തി​ന്റെ ഇഷ്ടം ചെയ്യാ​നുള്ള അതിയായ ആഗ്രഹ​വും തെറ്റു ചെയ്യാ​നുള്ള ചായ്‌വും തമ്മിലുള്ള ഒരു പോരാ​ട്ടം. അതിനു പുറമേ മുമ്പ്‌ ചെയ്‌തു​പോയ തെറ്റുകൾ ഓർത്തുള്ള വിഷമ​വും, തന്നെ വിടാതെ പിന്തു​ട​രുന്ന ഒരു പ്രശ്‌നം കാരണ​മുള്ള നിരു​ത്സാ​ഹ​വും അദ്ദേഹത്തെ ചില​പ്പോ​ഴൊ​ക്കെ ബാധിച്ചു.

3. ഈ ലേഖന​ത്തിൽ നമ്മൾ എന്തു ചർച്ച ചെയ്യും? (അടിക്കു​റി​പ്പും കാണുക.)

³ പൗലോ​സി​ന്റെ ഉള്ളിൽ ഇത്തരം വിഷമി​പ്പി​ക്കുന്ന ചിന്തകളൊക്കെa ഉണ്ടായി​രു​ന്നെ​ങ്കി​ലും അതൊ​ന്നും തന്നെ കാർന്നു​തി​ന്നാൻ അദ്ദേഹം അനുവ​ദി​ച്ചില്ല. ഈ ലേഖന​ത്തിൽ പിൻവ​രുന്ന ചോദ്യ​ങ്ങൾ നമ്മൾ ചർച്ച ചെയ്യും: തന്റേതു “പരിതാ​പ​ക​ര​മായ ഒരു അവസ്ഥയാണ്‌” എന്നു ചില​പ്പോ​ഴൊ​ക്കെ പൗലോ​സി​നു തോന്നി​യത്‌ എന്തു​കൊ​ണ്ടാണ്‌? വിഷമി​പ്പി​ക്കുന്ന ചിന്തക​ളോട്‌ അദ്ദേഹം എങ്ങനെ​യാ​ണു പോരാ​ടി​യത്‌? അത്തരം ചിന്തക​ളോ​ടു പോരാ​ടാൻ നമുക്ക്‌ എന്തു ചെയ്യാ​നാ​കും?

പൗലോ​സി​ന്റെ വിഷമി​പ്പി​ക്കുന്ന ചിന്തക​ളു​ടെ കാരണം

4. പൗലോ​സി​നു വിഷമം തോന്നാ​നുള്ള ഒരു കാരണം എന്തായി​രു​ന്നു?

⁴ പണ്ട്‌ ചെയ്‌തു​പോയ കാര്യങ്ങൾ. ശൗൽ എന്ന്‌ അറിയ​പ്പെ​ട്ടി​രുന്ന പൗലോസ്‌ ഒരു ക്രിസ്‌ത്യാ​നി​യാ​കു​ന്ന​തി​നു മുമ്പ്‌, പിന്നീട്‌ ഓർത്ത്‌ വിഷമി​ക്കുന്ന പല കാര്യ​ങ്ങ​ളും ചെയ്‌തു. ഉദാഹ​ര​ണ​ത്തിന്‌, വിശ്വ​സ്‌ത​നായ സ്‌തെ​ഫാ​നൊ​സി​നെ കല്ലെറിഞ്ഞ്‌ കൊല്ലുന്ന സമയത്ത്‌, അതിനെ അനുകൂ​ലി​ച്ചു​കൊണ്ട്‌ അദ്ദേഹം അവി​ടെ​യു​ണ്ടാ​യി​രു​ന്നു. (പ്രവൃ. 7:58; 8:1) അതു​പോ​ലെ ക്രിസ്‌ത്യാ​നി​കളെ ക്രൂര​മാ​യി ഉപദ്ര​വി​ക്കു​ന്ന​തി​നു മുന്നിൽനിന്ന ആളുമാ​യി​രു​ന്നു ശൗൽ.—പ്രവൃ. 8:3; 26:9-11.

5. മുമ്പു ചെയ്‌തു​പോയ കാര്യ​ങ്ങ​ളെ​ക്കു​റിച്ച്‌ പൗലോ​സിന്‌ എന്തു തോന്നി?

⁵ ഒരു ക്രിസ്‌ത്യാ​നി​യാ​യ​തി​നു ശേഷം അപ്പോ​സ്‌ത​ല​നായ പൗലോ​സി​നെ ആ പഴയ ഓർമകൾ ചില​പ്പോ​ഴൊ​ക്കെ അലട്ടി​യി​ട്ടുണ്ട്‌. വർഷങ്ങൾ കടന്നു​പോ​യ​പ്പോൾ ക്രിസ്‌ത്യാ​നി​കളെ ഉപദ്ര​വി​ച്ച​തി​നെ​ക്കു​റിച്ച്‌ ഓർത്തുള്ള അദ്ദേഹ​ത്തി​ന്റെ വിഷമം കൂടി​യി​ട്ടു​ണ്ടാ​കണം. ഉദാഹ​ര​ണ​ത്തിന്‌, ഏതാണ്ട്‌ എ.ഡി. 55-ൽ കൊരി​ന്ത്യർക്കുള്ള തന്റെ ആദ്യത്തെ കത്തിൽ അദ്ദേഹം ഇങ്ങനെ പറഞ്ഞു: “ദൈവ​ത്തി​ന്റെ സഭയെ ഉപദ്ര​വിച്ച ഞാൻ അപ്പോ​സ്‌തലൻ എന്നു വിളി​ക്ക​പ്പെ​ടാൻപോ​ലും യോഗ്യ​നല്ല.” (1 കൊരി. 15:9) ഏകദേശം അഞ്ചു വർഷം കഴിഞ്ഞ്‌ എഫെസ്യർക്കു കത്ത്‌ എഴുതി​യ​പ്പോൾ ‘ഞാൻ എല്ലാ വിശു​ദ്ധ​രി​ലും ഏറ്റവും ചെറി​യ​വ​നെ​ക്കാൾ താഴെ​യാണ്‌’ എന്നാണു പൗലോസ്‌ പറഞ്ഞത്‌. (എഫെ. 3:8) ഇനി തിമൊ​ഥെ​യൊ​സിന്‌ എഴുതിയ കത്തിൽ, താൻ ‘മുമ്പ്‌ ദൈവത്തെ നിന്ദി​ക്കു​ന്ന​വ​നും ദൈവ​ത്തി​ന്റെ ജനത്തെ ഉപദ്ര​വി​ക്കു​ന്ന​വ​നും ധിക്കാ​രി​യും ആയിരു​ന്നു’ എന്ന്‌ പൗലോസ്‌ എഴുതി. (1 തിമൊ. 1:13) പൗലോസ്‌ ഒരു സഭ സന്ദർശി​ച്ച​പ്പോൾ, മുമ്പ്‌ ഉപദ്ര​വി​ച്ച​വ​രെ​യോ അവരുടെ കുടും​ബാം​ഗ​ങ്ങ​ളെ​യോ കണ്ടിട്ടു​ണ്ടെ​ങ്കിൽ അദ്ദേഹ​ത്തിന്‌ എന്തു തോന്നി​യി​ട്ടു​ണ്ടാ​കും എന്നു ചിന്തി​ച്ചു​നോ​ക്കൂ.

6. പൗലോ​സി​നെ വല്ലാതെ വിഷമി​പ്പിച്ച മറ്റൊരു കാര്യം എന്താണ്‌? (അടിക്കു​റി​പ്പും കാണുക.)

⁶ ജഡത്തിലെ മുള്ള്‌. പൗലോ​സി​നെ വളരെ​യ​ധി​കം ബുദ്ധി​മു​ട്ടി​ച്ചി​രുന്ന എന്തോ ഒരു പ്രശ്‌ന​മു​ണ്ടാ​യി​രു​ന്നു. അതിനെ അദ്ദേഹം ‘ജഡത്തിലെ ഒരു മുള്ള്‌’ എന്നാണു വിളി​ച്ചത്‌. (2 കൊരി. 12:7) അത്‌ എന്താ​ണെന്നു പൗലോസ്‌ കൃത്യ​മാ​യി പറഞ്ഞി​ട്ടില്ല. പക്ഷേ ‘ജഡത്തിലെ മുള്ള്‌’ എന്നു പറഞ്ഞി​രി​ക്കു​ന്ന​തിൽനിന്ന്‌ അത്‌ അദ്ദേഹത്തെ വേദനി​പ്പി​ച്ചി​രുന്ന എന്തോ ഒരു പ്രശ്‌ന​മാ​ണെന്നു മനസ്സി​ലാ​ക്കാം. അത്‌ ഒരു അസുഖ​മോ അദ്ദേഹത്തെ വല്ലാതെ ടെൻഷൻ അടിപ്പിച്ച എന്തെങ്കി​ലും കാര്യ​മോ ആയിരു​ന്നി​രി​ക്കാം.b

7. പൗലോ​സി​നെ തന്റെ അപൂർണ​തകൾ എങ്ങനെ​യാ​ണു ബാധി​ച്ചത്‌? (റോമർ 7:18, 19)

⁷ അദ്ദേഹ​ത്തി​ന്റെ അപൂർണ​തകൾ. പൗലോസ്‌ തന്റെ അപൂർണ​ത​ക​ളു​മാ​യി പോരാ​ടി. (റോമർ 7:18, 19 വായി​ക്കുക.) പൗലോ​സി​നു ശരി ചെയ്യാൻ ആഗ്രഹ​മു​ണ്ടാ​യി​രു​ന്നെ​ങ്കി​ലും പാപം ചെയ്യാ​നുള്ള അദ്ദേഹ​ത്തി​ന്റെ ചായ്‌വ്‌ പലപ്പോ​ഴും അതിന്‌ ഒരു തടസ്സമാ​യി​രു​ന്നു. ശരിയും തെറ്റും തമ്മിലുള്ള ഈ പോരാ​ട്ടം തന്റെ ഉള്ളിൽ എപ്പോ​ഴും ഉണ്ടായി​രു​ന്ന​താ​യി പൗലോ​സു​തന്നെ സമ്മതി​ക്കു​ന്നുണ്ട്‌. എന്നാൽ മെച്ച​പ്പെ​ടാൻ പൗലോസ്‌ വളരെ​യ​ധി​കം ശ്രമിച്ചു. (1 കൊരി. 9:27) എന്നിട്ടും തന്റെ മോശം സ്വഭാ​വ​രീ​തി​കൾ വീണ്ടും പൊങ്ങി​വ​ന്ന​പ്പോൾ അദ്ദേഹ​ത്തിന്‌ എത്ര നിരാശ തോന്നി​ക്കാ​ണും!

വിഷമി​പ്പി​ക്കുന്ന ചിന്തക​ളോ​ടു പൗലോസ്‌ എങ്ങനെ പോരാ​ടി

8. തന്റെ അപൂർണ​ത​ക​ളു​മാ​യി പോരാ​ടാൻ പൗലോസ്‌ എന്തെല്ലാം ചെയ്‌തു?

⁸ തനിക്കും തന്റെ സഹവി​ശ്വാ​സി​കൾക്കും, ദൈവാ​ത്മാ​വി​ന്റെ സഹായ​ത്താൽ അപൂർണ​ചാ​യ്‌വു​ക​ളോട്‌ എങ്ങനെ പോരാ​ടി വിജയി​ക്കാ​മെന്നു പൗലോസ്‌ ഉറപ്പാ​യും ചിന്തി​ച്ചി​രു​ന്നു. അദ്ദേഹ​ത്തി​ന്റെ കത്തുകൾ നോക്കി​യാൽ അതു മനസ്സി​ലാ​കും. (റോമ. 8:13; ഗലാ. 5:16, 17) ക്രിസ്‌ത്യാ​നി​കൾ ഒഴിവാ​ക്കേണ്ട തെറ്റായ ആഗ്രഹ​ങ്ങ​ളെ​ക്കു​റി​ച്ചും സ്വഭാ​വ​രീ​തി​ക​ളെ​ക്കു​റി​ച്ചും ഒക്കെ പൗലോസ്‌ പലപ്പോ​ഴും പറഞ്ഞി​ട്ടു​മുണ്ട്‌. (ഗലാ. 5:19-21, 26) അതു​കൊണ്ട്‌ പൗലോസ്‌ സ്വന്തം ബലഹീ​ന​ത​ക​ളെ​ക്കു​റിച്ച്‌ ചിന്തി​ക്കു​ക​യും എന്തൊക്കെ മാറ്റങ്ങൾ, എങ്ങനെ​യൊ​ക്കെ വരുത്ത​ണ​മെന്നു തിരു​വെ​ഴു​ത്തു​ക​ളിൽനിന്ന്‌ മനസ്സി​ലാ​ക്കു​ക​യും ചെയ്‌തി​രു​ന്നു എന്നതിനു സംശയ​മില്ല. മറ്റുള്ള​വർക്കു കൊടുത്ത ഉപദേശം പൗലോസ്‌ സ്വന്തം ജീവി​ത​ത്തിൽ പ്രാവർത്തി​ക​മാ​ക്കി എന്ന്‌ ഉറപ്പാണ്‌.

9-10. വിഷമി​പ്പി​ക്കുന്ന ചിന്തക​ളോ​ടു പോരാ​ടാൻ പൗലോ​സി​നെ എന്താണു സഹായി​ച്ചത്‌? (എഫെസ്യർ 1:7) (ചിത്ര​വും കാണുക.)

⁹ പൗലോ​സി​നു ചില​പ്പോ​ഴൊ​ക്കെ നിരു​ത്സാ​ഹം തോന്നി​യെ​ങ്കി​ലും മിക്ക സമയങ്ങ​ളി​ലും പോസി​റ്റീ​വാ​യി ചിന്തി​ക്കാൻ അദ്ദേഹ​ത്തി​നു കഴിഞ്ഞു. ഉദാഹ​ര​ണ​ത്തിന്‌, ദൂരെ​യുള്ള സഭകളിൽനി​ന്നുള്ള നല്ല റിപ്പോർട്ടു​കൾ കേട്ട​പ്പോൾ അദ്ദേഹ​ത്തി​നു സന്തോഷം തോന്നി. (2 കൊരി. 7:6, 7) സഹോ​ദ​ര​ങ്ങ​ളു​മാ​യുള്ള നല്ല സൗഹൃദം അദ്ദേഹത്തെ സന്തോ​ഷി​പ്പി​ച്ചു. (2 തിമൊ. 1:4) അതു​പോ​ലെ യഹോ​വ​യു​ടെ അംഗീ​കാ​രം തനിക്കു​ണ്ടെ​ന്നും പൗലോ​സിന്‌ അറിയാ​മാ​യി​രു​ന്നു. “ശുദ്ധമ​ന​സ്സാ​ക്ഷി​യോ​ടെ” ദൈവത്തെ സേവി​ക്കാ​നാ​യ​തിൽ അദ്ദേഹ​ത്തി​നു സന്തോഷം തോന്നി. (2 തിമൊ. 1:3) റോമിൽ തടവി​ലാ​യി​രു​ന്ന​പ്പോൾപ്പോ​ലും പൗലോസ്‌ സഹവി​ശ്വാ​സി​ക​ളോട്‌ ‘കർത്താ​വിൽ സന്തോ​ഷി​ക്കൂ!’ എന്നാണ്‌ പറഞ്ഞത്‌. (ഫിലി. 4:4) വിഷമി​പ്പി​ക്കുന്ന ചിന്തകൾ കാരണം നിരു​ത്സാ​ഹ​പ്പെ​ട്ടി​രി​ക്കുന്ന ഒരാൾക്ക്‌ ഒരിക്ക​ലും അങ്ങനെ പറയാ​നാ​കില്ല. നെഗറ്റീവ്‌ ചിന്തകൾ ഇടയ്‌ക്കൊ​ക്കെ മനസ്സി​ലേക്കു വന്നിട്ടു​ണ്ടെ​ങ്കി​ലും അതി​നോ​ടു പോരാ​ടാ​നും വീണ്ടും പോസി​റ്റീ​വാ​യി ചിന്തി​ക്കാ​നും പൗലോ​സി​നു കഴി​ഞ്ഞെന്നു വ്യക്തമാണ്‌.

¹⁰ യേശു​ക്രി​സ്‌തു​വി​ന്റെ മോച​ന​വില തനിക്കു​വേ​ണ്ടി​യുള്ള ഒരു സമ്മാന​മാ​ണെന്നു ചിന്തി​ച്ച​തും വിഷമി​പ്പി​ക്കുന്ന ചിന്തകൾക്ക്‌ എതിരെ പോരാ​ടാൻ പൗലോ​സി​നെ സഹായി​ച്ചു. (ഗലാ. 2:20; എഫെസ്യർ 1:7 വായി​ക്കുക.) മോച​ന​വി​ല​യു​ടെ അടിസ്ഥാ​ന​ത്തിൽ യഹോവ തന്റെ പാപങ്ങൾ ക്ഷമിച്ചു​ത​രു​മെന്നു പൗലോ​സിന്‌ ഉറപ്പാ​യി​രു​ന്നു. (റോമ. 7:24, 25) അതു​കൊ​ണ്ടു​തന്നെ മുമ്പ്‌ പല തെറ്റുകൾ ചെയ്‌തു​പോ​യി​ട്ടും, തനിക്കു പല ബലഹീ​ന​ത​ക​ളു​ണ്ടാ​യി​ട്ടും സന്തോ​ഷ​ത്തോ​ടെ ദൈവ​ത്തി​നു “വിശു​ദ്ധ​സേ​വനം അർപ്പി​ക്കാൻ” പൗലോ​സി​നു കഴിഞ്ഞു.—എബ്രാ. 9:12-14.

11. പൗലോ​സി​ന്റെ ജീവിതം നമുക്ക്‌ ഒരു പ്രോ​ത്സാ​ഹ​ന​മാ​യി​രി​ക്കു​ന്നത്‌ എങ്ങനെ?

¹¹ പൗലോ​സി​നെ​പ്പോ​ലെ നമ്മുടെ ഉള്ളിലും ഒരു പോരാ​ട്ടം നടക്കു​ന്നു​ണ്ടാ​കും. നമ്മൾ ചിന്തി​ക്കു​ന്ന​തോ പറയു​ന്ന​തോ പ്രവർത്തി​ക്കു​ന്ന​തോ ആയ കാര്യ​ങ്ങ​ളോ​ടു ബന്ധപ്പെ​ട്ടാ​യി​രി​ക്കാം അത്‌. “എന്തൊരു പരിതാ​പ​ക​ര​മായ അവസ്ഥയാണ്‌ എന്റേത്‌!” എന്നു നമുക്കും തോന്നി​യേ​ക്കാം. 20-കളിലുള്ള എലീസc സഹോ​ദരി തന്റെ ചിന്തക​ളെ​ക്കു​റിച്ച്‌ ഇങ്ങനെ പറയുന്നു: “പൗലോ​സി​ന്റെ സാഹച​ര്യ​ത്തെ​ക്കു​റിച്ച്‌ ചിന്തി​ക്കു​ന്നത്‌ എന്നെ പ്രോ​ത്സാ​ഹി​പ്പി​ക്കു​ന്നു. എനിക്കു മാത്രമല്ല ഇങ്ങനെ​യൊ​ക്കെ തോന്നു​ന്ന​തെന്നു മനസ്സി​ലാ​ക്കി​യത്‌ എന്നെ ആശ്വസി​പ്പി​ച്ചു. അതു​പോ​ലെ, തന്റെ ജനം കടന്നു​പോ​കുന്ന സാഹച​ര്യ​ത്തെ​ക്കു​റിച്ച്‌ യഹോവ അറിയു​ന്നു​ണ്ടെ​ന്നും ഈ വിവരണം എന്നെ ഓർമി​പ്പി​ക്കു​ന്നു.” പൗലോ​സി​നെ​പ്പോ​ലെ ഒരു ശുദ്ധമ​ന​സ്സാ​ക്ഷി ഉണ്ടായി​രി​ക്കാ​നും വിഷമി​പ്പി​ക്കുന്ന ചിന്തക​ളു​ണ്ടെ​ങ്കി​ലും സന്തോ​ഷ​ത്തോ​ടെ​യി​രി​ക്കാ​നും നമുക്ക്‌ എങ്ങനെ കഴിയും?

വിഷമി​പ്പി​ക്കുന്ന ചിന്തക​ളോ​ടു നമുക്ക്‌ എങ്ങനെ പോരാ​ടാം

12. ആത്മീയ​കാ​ര്യ​ങ്ങൾ പതിവാ​യി ചെയ്യു​ന്നതു വിഷമി​പ്പി​ക്കുന്ന ചിന്തക​ളോ​ടു പോരാ​ടാൻ നമ്മളെ സഹായി​ക്കു​ന്നത്‌ എങ്ങനെ​യാണ്‌?

¹² ആത്മീയ​കാ​ര്യ​ങ്ങൾ പതിവാ​യി ചെയ്യുക. ആത്മീയ​കാ​ര്യ​ങ്ങൾ പതിവാ​യി ചെയ്യുന്ന ഒരു ശീലം വളർത്തി​യി​ട്ടു​ണ്ടെ​ങ്കിൽ നല്ല കാര്യ​ങ്ങ​ളിൽ ശ്രദ്ധ കേന്ദ്രീ​ക​രി​ക്കാൻ നമുക്ക്‌ എളുപ്പ​മാ​യി​രി​ക്കും. ഇതെക്കു​റിച്ച്‌ ഒന്നു ചിന്തി​ച്ചു​നോ​ക്കൂ: നിങ്ങൾ നല്ല ഭക്ഷണം കഴിക്കു​ക​യും പതിവാ​യി വ്യായാ​മം ചെയ്യു​ക​യും ആവശ്യ​ത്തിന്‌ ഉറങ്ങു​ക​യും ചെയ്യു​ന്നു​ണ്ടെ​ങ്കിൽ നല്ല ഉന്മേഷം തോന്നി​ല്ലേ? ഇതു​പോ​ലെ​ത​ന്നെ​യാണ്‌ ആത്മീയ​കാ​ര്യ​ങ്ങൾ പതിവാ​യി ചെയ്യു​മ്പോ​ഴും. എന്നും ബൈബിൾ വായി​ക്കു​ക​യും ക്രമമാ​യി ശുശ്രൂ​ഷ​യിൽ ഏർപ്പെ​ടു​ക​യും മീറ്റി​ങ്ങു​കൾക്കു പോകു​ക​യും നന്നായി തയ്യാറാ​യി അതിൽ പങ്കുപ​റ്റു​ക​യും ഒക്കെ ചെയ്യു​മ്പോൾ നിങ്ങൾക്കു സന്തോഷം കിട്ടു​ന്ന​താ​യി തോന്നി​യി​ട്ടി​ല്ലേ? അതെ, വിഷമി​പ്പി​ക്കുന്ന ചിന്തക​ളോ​ടു പോരാ​ടാൻ ഇത്തരം ആത്മീയ​പ്ര​വർത്ത​ന​ങ്ങ​ളിൽ ഏർപ്പെ​ടു​ന്നതു നിങ്ങളെ സഹായി​ക്കും.—റോമ. 12:11, 12.

13-14. ആത്മീയ​കാ​ര്യ​ങ്ങൾ പതിവാ​യി ചെയ്‌തതു ചില ക്രിസ്‌ത്യാ​നി​കളെ സഹായി​ച്ചി​രി​ക്കു​ന്നത്‌ എങ്ങനെ?

¹³ ജോണി​ന്റെ അനുഭവം നോക്കുക. 39-ാം വയസ്സിൽ അദ്ദേഹ​ത്തി​നു കാൻസ​റാ​ണെന്നു കണ്ടെത്തി. തുടക്ക​ത്തിൽ, വിഷമി​പ്പി​ക്കുന്ന ചിന്തകൾ അദ്ദേഹത്തെ വരിഞ്ഞു​മു​റു​ക്കി. ‘ഇത്ര ചെറു​പ്പ​ത്തി​ലേ എനിക്ക്‌ അസുഖം വന്നല്ലോ’ എന്നൊക്കെ അദ്ദേഹം ചിന്തിച്ചു. ആ സമയത്ത്‌ ജോണി​ന്റെ മകനു വെറും മൂന്നു വയസ്സേ ഉണ്ടായി​രു​ന്നു​ള്ളൂ. നിരു​ത്സാ​ഹ​പ്പെ​ടു​ത്തുന്ന ചിന്തക​ളോ​ടു പോരാ​ടാൻ ജോണി​നെ എന്താണു സഹായി​ച്ചത്‌? അദ്ദേഹം പറയുന്നു: “എനിക്കു നല്ല ക്ഷീണം ഉണ്ടായി​രു​ന്നെ​ങ്കി​ലും എന്റെ കുടും​ബം പതിവാ​യി ആത്മീയ​കാ​ര്യ​ങ്ങ​ളിൽ ഏർപ്പെ​ടു​ന്നു​ണ്ടെന്നു ഞാൻ ഉറപ്പു​വ​രു​ത്തി, ഞങ്ങൾ എല്ലാ മീറ്റി​ങ്ങു​ക​ളി​ലും പങ്കെടു​ത്തു, എല്ലാ ആഴ്‌ച​യും ശുശ്രൂ​ഷ​യ്‌ക്കു പോയി, പതിവാ​യി കുടും​ബാ​രാ​ധ​ന​യും നടത്തി. ഇതി​നൊ​ക്കെ സമയം കണ്ടെത്താൻ ബുദ്ധി​മു​ട്ടാ​യി​രു​ന്ന​പ്പോ​ഴും ഞങ്ങൾ അതു മുടക്കി​യില്ല.” തിരി​ഞ്ഞു​നോ​ക്കു​മ്പോൾ ജോണിന്‌ ഇങ്ങനെ​യാ​ണു തോന്നു​ന്നത്‌: “ആദ്യത്തെ ഒരു ഞെട്ടൽ മാറി​ക്ക​ഴി​യു​മ്പോൾ, അലട്ടുന്ന ചിന്തക​ളു​ടെ സ്ഥാനത്ത്‌ യഹോവ തരുന്ന ശക്തി​യെ​യും സ്‌നേ​ഹ​ത്തെ​യും കുറി​ച്ചുള്ള ചിന്തകൾ വന്നുനി​റ​യും. എന്റെ കാര്യ​ത്തിൽ ചെയ്‌ത​തു​പോ​ലെ യഹോവ നിങ്ങ​ളെ​യും ശക്തി​പ്പെ​ടു​ത്തും.”

¹⁴ മുമ്പ്‌ കണ്ട എലീസ പറയുന്നു: “ഞാൻ മീറ്റി​ങ്ങു​കൾക്കു പോകു​ക​യും വ്യക്തി​പ​ര​മാ​യി പഠിക്കു​ക​യും ചെയ്യുന്ന ഓരോ സമയത്തും യഹോവ എന്റെ പ്രാർഥന കേൾക്കു​ന്നു​ണ്ടെ​ന്നും എന്നെ ഒരുപാ​ടു സ്‌നേ​ഹി​ക്കു​ന്നു​ണ്ടെ​ന്നും എനിക്കു മനസ്സി​ലാ​കാ​റുണ്ട്‌. അത്‌ എനിക്കു സന്തോഷം തരുന്നു.” ആഫ്രി​ക്ക​യി​ലെ ഒരു സർക്കിട്ട്‌ മേൽവി​ചാ​ര​ക​നായ നോളൻ, തന്നെയും തന്റെ ഭാര്യ ഡിയാ​നി​നെ​യും എന്താണു സഹായി​ക്കു​ന്ന​തെന്നു പറയുന്നു: “നിരു​ത്സാ​ഹം തോന്നു​മ്പോൾപ്പോ​ലും ഞങ്ങൾ ആത്മീയ​ദി​ന​ചര്യ മുടക്കാ​റില്ല. ശരിയാ​യി ചിന്തി​ക്കാൻ യഹോവ ഞങ്ങളെ സഹായി​ക്കു​ന്നു​ണ്ടെന്ന്‌ ആ സമയത്ത്‌ ഞങ്ങൾക്കു വ്യക്തമാ​കും. യഹോവ ഞങ്ങളെ സഹായി​ക്കു​ക​യും അനു​ഗ്ര​ഹി​ക്കു​ക​യും ചെയ്യു​മെന്നു നിരു​ത്സാ​ഹം തോന്നു​മ്പോൾ ഞങ്ങൾ ഓർക്കാ​റുണ്ട്‌. എങ്ങനെ​യാ​യി​രി​ക്കും സഹായി​ക്കു​ന്ന​തെന്ന്‌ അറിയി​ല്ലെ​ങ്കി​ലും യഹോവ അതു ചെയ്യും എന്ന്‌ ഞങ്ങൾക്ക്‌ ഉറപ്പാണ്‌.”

15. വിഷമി​പ്പി​ക്കുന്ന ചിന്തകൾ മറിക​ട​ക്കാൻ നമ്മൾ എന്തൊക്കെ ചെയ്യേ​ണ്ട​തു​ണ്ടാ​യി​രി​ക്കാം? ഒരു ദൃഷ്ടാന്തം പറയുക.

¹⁵ വിഷമി​പ്പി​ക്കുന്ന ചിന്തകൾ മറിക​ട​ക്കാൻ നമ്മൾ ചില​പ്പോൾ അടിസ്ഥാ​ന​കാ​ര്യ​ങ്ങൾ മാത്രം ചെയ്‌താൽ പോരാ​യി​രി​ക്കും. ഉദാഹ​ര​ണ​ത്തിന്‌, നിങ്ങൾക്കു നടു​വേദന ഉണ്ടെന്നു വിചാ​രി​ക്കുക. ദിവസ​വും നടക്കു​ന്ന​തു​കൊണ്ട്‌ മാത്രം അതു മാറണ​മെ​ന്നില്ല. ആ വേദന​യു​ടെ കാരണം മനസ്സി​ലാ​ക്കാൻ നിങ്ങൾ അതെക്കു​റിച്ച്‌ കൂടുതൽ പഠിക്കു​ക​യും ഒരു ഡോക്ട​റോ​ടു സംസാ​രി​ക്കു​ക​യും ചെയ്യേ​ണ്ട​തു​ണ്ടാ​യി​രി​ക്കും. അതു​പോ​ലെ, ഇടയ്‌ക്കി​ട​യ്‌ക്കു വരുന്ന വിഷമി​പ്പി​ക്കുന്ന ചിന്തക​ളോ​ടു പോരാ​ടാൻ നമ്മൾ ബൈബി​ളും പ്രസി​ദ്ധീ​ക​ര​ണ​ങ്ങ​ളും ഗവേഷണം ചെയ്യു​ക​യും പക്വത​യുള്ള ഒരു ക്രിസ്‌ത്യാ​നി​യോ​ടു സംസാ​രി​ക്കു​ക​യും ചെയ്യേ​ണ്ടി​വ​ന്നേ​ക്കാം. നമ്മളെ സഹായി​ക്കുന്ന മറ്റു ചില നിർദേ​ശങ്ങൾ ഇനി നോക്കാം.

16. വിഷമി​പ്പി​ക്കുന്ന ചിന്തക​ളു​ടെ കാരണം എന്താ​ണെന്നു മനസ്സി​ലാ​ക്കാൻ നിങ്ങളെ എന്തു സഹായി​ക്കും? (സങ്കീർത്തനം 139:1-4, 23, 24)

¹⁶ നിങ്ങൾക്കു ശരിക്കും എന്താണ്‌ ആവശ്യ​മെന്നു മനസ്സി​ലാ​ക്കാൻ പ്രാർഥി​ക്കുക. യഹോ​വ​യ്‌ക്കു തന്നെ നന്നായി അറിയാ​മെന്നു മനസ്സി​ലാ​ക്കിയ ദാവീദ്‌ രാജാവ്‌ തന്റെ ‘ഉത്‌ക​ണ്‌ഠ​ക​ളു​ടെ’ കാരണം തിരി​ച്ച​റി​യാൻ സഹായി​ക്കണേ എന്നു പ്രാർഥി​ച്ചു. (സങ്കീർത്തനം 139:1-4, 23, 24 വായി​ക്കുക.) നിങ്ങൾക്കും അതുതന്നെ ചെയ്യാ​നാ​കും. വിഷമി​പ്പി​ക്കുന്ന ചിന്തക​ളു​ടെ കാരണം എന്താ​ണെ​ന്നും അത്‌ എങ്ങനെ മറിക​ട​ക്കാ​മെ​ന്നും മനസ്സി​ലാ​ക്കാൻ സഹായി​ക്കണേ എന്നു ദൈവ​ത്തോ​ടു പ്രാർഥി​ക്കുക. നിങ്ങൾക്ക്‌ ഇത്തരം ചില ചോദ്യ​ങ്ങ​ളും സ്വയം ചോദി​ക്കാ​നാ​കും: ‘എന്നെ ഉത്‌ക​ണ്‌ഠ​പ്പെ​ടു​ത്തുന്ന ചിന്തക​ളു​ടെ ശരിക്കുള്ള കാരണം എന്താണ്‌? എന്റെ ഉള്ളിൽ നെഗറ്റീ​വായ ചിന്തകൾ തലപൊ​ക്കാൻ ഇടയാ​ക്കുന്ന എന്തെങ്കി​ലും പ്രത്യേ​ക​കാ​ര്യ​മു​ണ്ടോ? വിഷമി​പ്പി​ക്കുന്ന ചിന്തകൾ വരു​മ്പോൾ അത്‌ അപ്പോൾത്തന്നെ തള്ളിക്ക​ള​യു​ന്ന​തി​നു പകരം ഞാൻ അതെക്കു​റി​ച്ചു​തന്നെ ചിന്തി​ച്ചു​കൊ​ണ്ടി​രി​ക്കാ​റു​ണ്ടോ?’

17. പ്രോ​ത്സാ​ഹി​പ്പി​ക്കുന്ന ചിന്തകൾകൊണ്ട്‌ മനസ്സു​നി​റ​യ്‌ക്കാൻ ഏതൊക്കെ വിഷയ​ങ്ങ​ളെ​ക്കു​റിച്ച്‌ പഠിക്കു​ന്നതു നിങ്ങളെ സഹായി​ക്കും? (ചിത്ര​വും കാണുക.)

¹⁷ വ്യക്തി​പ​ര​മായ പഠനത്തിൽ, നിങ്ങളു​ടെ സാഹച​ര്യ​ത്തി​നു​വേണ്ട കാര്യങ്ങൾ പഠിക്കുക. ഇടയ്‌ക്കി​ട​യ്‌ക്ക്‌ യഹോ​വ​യു​ടെ വ്യത്യ​സ്‌ത​ഗു​ണ​ങ്ങ​ളെ​ക്കു​റിച്ച്‌ പഠിക്കു​ന്നതു നിങ്ങൾക്കു ഗുണം ചെയ്‌തേ​ക്കും. ഉദാഹ​ര​ണ​ത്തിന്‌, മോച​ന​വി​ല​യെ​ക്കു​റി​ച്ചും യഹോവ ക്ഷമിക്കു​ന്ന​തി​നെ​ക്കു​റി​ച്ചും ചിന്തി​ച്ചത്‌ അപ്പോ​സ്‌ത​ല​നായ പൗലോ​സി​നെ വളരെ​യ​ധി​കം സഹായി​ച്ചു. നിങ്ങൾക്കും അതുതന്നെ ചെയ്യാം. യഹോ​വ​യു​ടെ സാക്ഷി​കൾക്കു​വേ​ണ്ടി​യുള്ള ഗവേഷ​ണ​സ​ഹാ​യി​യോ ക്രിസ്‌തീയ ജീവി​ത​ത്തി​നുള്ള ബൈബിൾത​ത്ത്വ​ങ്ങൾ എന്ന പുസ്‌ത​ക​മോ നിങ്ങളു​ടെ ഭാഷയി​ലുള്ള മറ്റു പ്രസി​ദ്ധീ​ക​ര​ണ​ങ്ങ​ളോ ഉപയോ​ഗിച്ച്‌ ദൈവ​ത്തി​ന്റെ കരുണ, ക്ഷമിക്കാ​നുള്ള സന്നദ്ധത, അചഞ്ചല​സ്‌നേഹം തുടങ്ങിയ ഗുണങ്ങ​ളെ​ക്കു​റി​ച്ചെ​ല്ലാം പഠിക്കാ​നാ​കും. നിങ്ങൾക്കു പറ്റിയ നല്ല ലേഖനങ്ങൾ കണ്ടെത്തി​ക്ക​ഴി​ഞ്ഞാൽ അതിന്റെ ഒരു ലിസ്റ്റ്‌ ഉണ്ടാക്കുക. എന്നിട്ട്‌ എളുപ്പം കാണാ​നാ​കുന്ന ഒരിടത്ത്‌ അതു വെക്കുക. മനസ്സ്‌ തളരു​ന്നെന്നു തോന്നി​ത്തു​ട​ങ്ങു​മ്പോൾത്തന്നെ ആ ലിസ്റ്റിലെ ലേഖനങ്ങൾ പഠിക്കാൻ ശ്രമി​ക്കുക. വായി​ക്കുന്ന കാര്യങ്ങൾ നിങ്ങളു​ടെ സാഹച​ര്യ​ത്തിൽ എങ്ങനെ പ്രയോ​ജ​ന​പ്പെ​ടു​ത്താ​മെന്നു ചിന്തി​ക്കുക.—ഫിലി. 4:8.

18. ഏതൊക്കെ വിഷയ​ങ്ങ​ളെ​ക്കു​റിച്ച്‌ പഠിച്ചതു ചില ക്രിസ്‌ത്യാ​നി​കളെ സഹായി​ച്ചി​രി​ക്കു​ന്നു?

¹⁸ മുമ്പ്‌ കണ്ട എലീസ തന്റെ വ്യക്തി​പ​ര​മായ പഠനത്തിൽ ഇയ്യോ​ബി​നെ​ക്കു​റിച്ച്‌ പഠിച്ചു. സഹോ​ദരി പറയുന്നു: “ഇയ്യോ​ബി​നെ​പ്പോ​ലെ ഒന്നിനു പുറകേ ഒന്നായി പല പ്രശ്‌നങ്ങൾ എനിക്കു നേരിട്ടു. ഇയ്യോബ്‌ ജീവി​ത​ത്തിൽ ഏറ്റവും തകർന്നി​രി​ക്കുന്ന സമയത്തു​പോ​ലും യഹോ​വ​യിൽ ആശ്രയി​ക്കു​ന്നതു നിറു​ത്തി​യില്ല; തന്റെ പ്രശ്‌ന​ങ്ങ​ളു​ടെ കാരണം എന്താ​ണെന്ന്‌ അറിയാ​തി​രു​ന്നി​ട്ടു​പോ​ലും!” (ഇയ്യോ. 42:1-6) മുമ്പ്‌ കണ്ട ഡിയാൻ പറയുന്നു: “ഞാനും ഭർത്താ​വും യഹോ​വ​യോട്‌ അടുത്ത്‌ ചെല്ലു​വിൻ എന്ന പുസ്‌തകം ഒരു പഠന​പ്രോ​ജക്ട്‌ ആയി​ട്ടെ​ടു​ത്തു. ഒരു കുശവ​നെ​പ്പോ​ലെ യഹോവ ഞങ്ങളെ മനയു​ന്ന​തിൽ ഞങ്ങൾക്ക്‌ ഒരുപാട്‌ നന്ദിയുണ്ട്‌. തെറ്റുകൾ കാരണം നിരു​ത്സാ​ഹം തോന്നുന്ന സമയത്ത്‌, യഹോവ ഞങ്ങളെ മനയു​ക​യാ​ണെ​ന്നും മെച്ചപ്പെട്ട വ്യക്തി​ക​ളാ​കാൻ സഹായി​ക്കു​ക​യാ​ണെ​ന്നും ഞങ്ങൾ ഓർക്കും. അതു ഞങ്ങളെ യഹോ​വ​യോ​ടു കൂടുതൽ അടുപ്പി​ക്കു​ന്നു.”—യശ. 64:8.

ആത്മവി​ശ്വാ​സ​ത്തോ​ടെ ഭാവി​യി​ലേക്കു നോക്കുക

19. ചില​പ്പോൾ നമുക്ക്‌ എന്തു തോന്നാ​നി​ട​യുണ്ട്‌, എന്നാൽ നമുക്ക്‌ എന്ത്‌ ഉറപ്പു​ണ്ടാ​യി​രി​ക്കാം?

¹⁹ നമ്മൾ ആത്മീയ​കാ​ര്യ​ങ്ങൾ പതിവാ​യി ചെയ്യു​ക​യും നമ്മുടെ ആവശ്യ​ങ്ങൾക്ക്‌ അനുസ​രി​ച്ചുള്ള ഒരു പഠന​പ്രോ​ജക്ട്‌ നടത്തു​ക​യും ചെയ്യു​ന്നു​ണ്ടെ​ങ്കി​ലും വിഷമി​പ്പി​ക്കുന്ന ചിന്തക​ളും വികാ​ര​ങ്ങ​ളും എല്ലാം പൂർണ​മാ​യി മാറു​മെന്നു പ്രതീ​ക്ഷി​ക്കാ​നാ​കില്ല. ജീവി​ത​ത്തിൽ ഇരുളടഞ്ഞ ദിവസങ്ങൾ ഇനിയും ഉണ്ടാ​യേ​ക്കാം. എന്നാൽ അപ്പോൾ യഹോ​വ​യു​ടെ സഹായ​ത്താൽ വിഷമി​പ്പി​ക്കുന്ന ചിന്തകളെ നിയ​ന്ത്രി​ക്കാൻ നമുക്കാ​കും. ജീവി​ത​ത്തി​ലെ മിക്ക ദിവസ​ങ്ങ​ളി​ലും സന്തോ​ഷ​ത്തോ​ടെ​യി​രി​ക്കാ​നും ഒരു ശുദ്ധമ​ന​സ്സാ​ക്ഷി​യോ​ടെ ദൈവത്തെ സേവി​ക്കാ​നും നമുക്ക്‌ കഴിയു​മെന്നു ഉറപ്പു​ണ്ടാ​യി​രി​ക്കാം.

20. എന്താണു നിങ്ങളു​ടെ തീരു​മാ​നം?

²⁰ നമ്മുടെ മുൻകാ​ല​തെ​റ്റു​ക​ളോ ഇപ്പോ​ഴത്തെ പ്രശ്‌ന​ങ്ങ​ളോ നമ്മു​ടെ​തന്നെ അപൂർണ​ത​ക​ളോ ഒന്നും നമ്മുടെ സന്തോഷം കെടു​ത്തി​ക്ക​ള​യാൻ ഒരിക്ക​ലും അനുവ​ദി​ക്ക​രുത്‌. അവയെ​ക്കു​റി​ച്ചുള്ള വിഷമി​പ്പി​ക്കുന്ന ചിന്തകൾ നിയ​ന്ത്രി​ക്കാൻ യഹോവ നമ്മളെ സഹായി​ക്കും. (സങ്കീ. 143:10) പോസി​റ്റീ​വാ​യി ചിന്തി​ക്കാൻ ആർക്കും ഒരു ബുദ്ധി​മു​ട്ടും തോന്നാത്ത ഒരു കാലമാ​ണു നമുക്കു മുന്നിൽ വരാനി​രി​ക്കു​ന്നത്‌. അന്നു നമ്മൾ ഓരോ ദിവസ​വും ഉണർന്നെ​ഴു​ന്നേൽക്കു​ന്നതു ഭാര​പ്പെ​ടു​ത്തുന്ന ചിന്തക​ളോ​ടെ ആയിരി​ക്കില്ല, പകരം സ്‌നേ​ഹ​വാ​നായ യഹോ​വയെ സേവി​ക്കു​ന്ന​തി​ന്റെ സന്തോ​ഷ​ത്തോ​ടെ ആയിരി​ക്കും.