സുരക്ഷിത ഭാവി​യുള്ള യുവജ​ന​ങ്ങൾ

“ഏതൊരു [ബലാൽസം​ഗ​വും] പോലെ ഭീതി​ദ​വും ബീഭത്സ​വു​മായ ഒന്ന്‌”—സമീപ​കാ​ലത്തു നടന്ന ഒരു വിചാ​ര​ണ​യ്‌ക്ക്‌ അധ്യക്ഷത വഹിച്ച ന്യായാ​ധി​പൻ ആ കുറ്റകൃ​ത്യ​ത്തെ വർണി​ച്ചത്‌ അങ്ങനെ​യാണ്‌. 14-നും 18-നുമി​ട​യ്‌ക്കു പ്രായ​മുള്ള എട്ടു പേരട​ങ്ങുന്ന കൗമാ​ര​പ്രാ​യ​ക്കാ​രു​ടെ ഒരു സംഘം, വിനോ​ദ​സ​ഞ്ചാ​രി​യായ ഒരു സ്‌ത്രീ​യെ ലണ്ടനിലെ ഒരു ഉൾനഗര പ്രദേ​ശത്തു പതിയി​രുന്ന്‌ ആക്രമി​ച്ചു. പലയാ​വർത്തി ലൈം​ഗി​ക​മാ​യി പീഡി​പ്പി​ച്ച​ശേഷം, നീന്തല​റി​യാഞ്ഞ അവളെ സമീപ​ത്തുള്ള ഒരു തോട്ടി​ലെ​റി​ഞ്ഞു. മകൻ ചെയ്‌ത​തി​നെ​ക്കു​റി​ച്ചുള്ള ടിവി റിപ്പോർട്ടു കണ്ടപ്പോൾ താനാകെ തളർന്നു​പോ​യെന്ന്‌ ആ കൗമാ​ര​പ്രാ​യ​ക്കാ​രി​ലൊ​രാ​ളു​ടെ അമ്മ പറഞ്ഞ​തെ​ന്തു​കൊ​ണ്ടെന്നു മനസ്സി​ലാ​ക്കാ​വു​ന്ന​തേ​യു​ള്ളൂ.

ദുഃഖ​ക​ര​മെ​ന്നു പറയട്ടെ, അത്‌ ഇന്നു സമൂഹ​ത്തിൽ നടക്കുന്ന സംഭവ​ങ്ങ​ളു​ടെ പ്രതി​ഫ​ല​ന​മാണ്‌. കുറ്റകൃ​ത്യ​ങ്ങ​ളി​ലോ ഭവനത്തി​ലെ അക്രമ​ത്തി​ലോ, ബാൾക്കൻസി​ലും മധ്യാ​ഫ്രി​ക്ക​യി​ലും പശ്ചിമാ​ഫ്രി​ക്ക​യി​ലും മറ്റെവി​ടെ​യും നടക്കുന്ന വംശീയ കലാപ​ങ്ങ​ളി​ലോ ആയാലും മൃഗീയത ഇന്നു സർവസാ​ധാ​ര​ണ​മാണ്‌. യുവജ​നങ്ങൾ അത്തരം അവസ്ഥക​ളി​ന്മ​ധ്യേ​യാ​ണു വളർന്നു വരുന്നത്‌. അല്ലെങ്കിൽ, മിക്ക​പ്പോ​ഴും അവർ അതേക്കു​റി​ച്ചു കേൾക്കു​ന്നുണ്ട്‌. ആ സ്ഥിതിക്ക്‌, അനേക​രും “സ്വാഭാ​വിക പ്രിയ​മി​ല്ലാത്ത” കഠിന​ഹൃ​ദ​യ​രും “ആത്മനി​യ​ന്ത്ര​ണ​മി​ല്ലാത്ത”വരും ആയിത്തീ​രു​ന്ന​തിൽ തെല്ലും അതിശ​യി​ക്കാ​നില്ല.—2 തിമൊ​ഥെ​യൊസ്‌ 3:3, NW.

‘ഉഗ്രന്മാർ’

ക്രിസ്‌തീയ അപ്പോ​സ്‌ത​ല​നായ പൗലൊസ്‌ സഹമൂ​പ്പ​നാ​യി​രുന്ന തിമൊ​ഥെ​യൊ​സിന്‌ തന്റെ രണ്ടാമത്തെ ലേഖന​മെ​ഴു​തി​യ​പ്പോൾ റോം ആയിരു​ന്നു പ്രമുഖ ലോക​ശക്തി. റോമൻ പോർക്ക​ള​ങ്ങ​ളിൽ ക്രൂര​ത​യും മ്ലേച്ഛത​യും നടമാ​ടി​യി​രു​ന്നു. എന്നിട്ടും, ഭാവി​യിൽ “ഇടപെ​ടാൻ പ്രയാ​സ​മായ” സമയങ്ങൾ ഉണ്ടാകു​മെന്നു പൗലൊസ്‌ മുന്നറി​യി​പ്പു നൽകി. (2 തിമൊ​ഥെ​യൊസ്‌ 3:1, NW) രസകര​മെന്നു പറയട്ടെ, ഈ സമയങ്ങളെ “ഇടപെ​ടാൻ പ്രയാ​സ​മായ”തെന്നു വർണി​ക്കുന്ന ഗ്രീക്കു പദത്തിൽ അവ “ഉഗ്ര”മായി​രി​ക്കു​മെന്ന ആശയവും ഉൾക്കൊ​ള്ളു​ന്നു. അതിനു 30-ലധികം വർഷം മുമ്പ്‌, യേശു​വി​ന്റെ ഭൗമിക ശുശ്രൂ​ഷ​ക്കാ​ലത്തു നടന്ന ഒരു സംഭവം അവന്റെ നാളിലെ ചില ക്രൂര​കൃ​ത്യ​ങ്ങൾക്കു പിന്നി​ലു​ണ്ടാ​യി​രു​ന്ന​തെ​ന്താ​ണെന്നു സൂചി​പ്പി​ക്കു​ന്നു.

യേശു ഗലീലാ​ക്ക​ട​ലി​ന്റെ പൂർവ തീരത്തു പടകിൽ വന്നിറ​ങ്ങി​യതേ ഉണ്ടായി​രു​ന്നു​ള്ളൂ. അവൻ തീരത്തി​റ​ങ്ങിയ ഉടനെ രണ്ടു പുരു​ഷ​ന്മാർ അവനെ​തി​രെ​വന്നു. അവരുടെ വന്യമായ ആകാര​വും ആക്രോ​ശ​വും അവർക്കു കാര്യ​മായ എന്തോ കുഴപ്പ​മു​ണ്ടെന്നു വ്യക്തമാ​ക്കി. അവർ “അത്യു​ഗ്ര​ന്മാർ,” വാസ്‌ത​വ​ത്തിൽ ഭൂത​ഗ്ര​സ്‌തർ, ആയിരു​ന്നു.a അവരുടെ ആക്രോ​ശം അവരുടെ അക്രമ പ്രവർത്ത​ന​ങ്ങളെ നിയ​ന്ത്രി​ച്ചി​രുന്ന ദുഷ്ടാ​ത്മാ​ക്ക​ളിൽനി​ന്നു വന്നതാ​യി​രു​ന്നു. “ദൈവ​പു​ത്രാ, ഞങ്ങൾക്കും നിനക്കും തമ്മിൽ എന്തു?” എന്നവർ ആക്രോ​ശി​ച്ചു. “സമയത്തി​ന്നു മുമ്പെ ഞങ്ങളെ ദണ്ഡിപ്പി​പ്പാൻ ഇവിടെ വന്നുവോ”? ഭൂതങ്ങളെ ന്യായം​വി​ധി​ക്കു​ന്ന​തിന്‌ ദൈവം നേര​ത്തേ​തന്നെ ഒരു നിശ്ചിത സമയം കൽപ്പി​ച്ചി​രി​ക്കു​ന്ന​കാ​ര്യം ആ മനുഷ്യ​രെ ബാധി​ച്ചി​രുന്ന ദുഷ്ടാ​ത്മാ​ക്കൾക്കു നന്നായി അറിയാ​മാ​യി​രു​ന്നു. അത്‌ അവരുടെ നിത്യ​നാ​ശത്തെ അർഥമാ​ക്കും. എന്നാൽ അതുവരെ ഉഗ്രമായ അക്രമങ്ങൾ ഇളക്കി​വി​ടു​ന്ന​തിന്‌ അവർ തങ്ങളുടെ അമാനുഷ കഴിവു​കൾ ഉപയോ​ഗി​ക്കാ​നി​രി​ക്കു​ക​യാ​യി​രു​ന്നു. ഭൂതങ്ങളെ പുറത്താ​ക്കാ​നുള്ള യേശു​വി​ന്റെ അത്ഭുത​ക​ര​മായ നടപടി മാത്ര​മാണ്‌ ആ പുരു​ഷ​ന്മാർക്ക്‌ ആശ്വാ​സ​മേ​കി​യത്‌.—മത്തായി 8:28-32; യൂദാ 6.

ഇന്ന്‌, യുവജ​ന​ങ്ങ​ളുൾപ്പെ​ടെ​യുള്ള ആളുകൾ ഭ്രാന്ത​മായ വിധത്തിൽ പെരു​മാ​റു​മ്പോൾ നാം ആ സംഭവം അനുസ്‌മ​രി​ക്കു​ന്നതു നന്നായി​രി​ക്കും. എന്തു​കൊണ്ട്‌? എന്തു​കൊ​ണ്ടെ​ന്നാൽ, ബൈബി​ളി​ലെ അവസാന പുസ്‌ത​ക​മായ വെളി​പ്പാ​ടു വിശദീ​ക​രി​ക്കു​ന്ന​തു​പോ​ലെ, നാം ഈ 20-ാം നൂറ്റാ​ണ്ടിൽ അതുമാ​യി ബന്ധപ്പെട്ട ഒരപക​ടത്തെ നേരി​ടു​ന്നു: “ഭൂമി​ക്കും സമു​ദ്ര​ത്തി​ന്നും അയ്യോ കഷ്ടം; പിശാചു തനിക്കു അല്‌പ​കാ​ല​മേ​യു​ള്ളു എന്നു അറിഞ്ഞു മഹാ​ക്രോ​ധ​ത്തോ​ടെ നിങ്ങളു​ടെ അടുക്കൽ ഇറങ്ങി​വ​ന്നി​രി​ക്കു​ന്നു.” (വെളി​പ്പാ​ടു 12:12) ഇനി അൽപ്പകാ​ല​മേ​യു​ള്ളു​വെന്നു സാത്താ​ന​റി​യാം. തനിക്കു സംഭവിച്ച അപമാനം നിമിത്തം അവൻ “മഹാ​ക്രോ​ധ​ത്തോ​ടെ”യാണു വരുന്ന​തെന്നു ശ്രദ്ധി​ക്കുക.

ആക്രമ​ണ​ത്തിൽ

ഈ പത്രി​ക​യിൽ പലതവണ സൂചി​പ്പി​ച്ചി​ട്ടു​ള്ള​തു​പോ​ലെ, 1914-ൽ ക്രിസ്‌തു​യേശു സ്വർഗ​ത്തിൽ ദൈവ​രാ​ജ്യ​ത്തി​ന്റെ രാജാ​വാ​യി സിംഹാ​സ​ന​സ്ഥ​നാ​യി. യേശു ഉടനടി ദൈവ​ത്തി​ന്റെ മുഖ്യ ശത്രു​വായ സാത്താ​നെ​തി​രെ നടപടി സ്വീക​രി​ച്ചു. അങ്ങനെ, പിശാ​ചും അവന്റെ ഭൂതങ്ങ​ളും സ്വർഗ​ത്തിൽനി​ന്നു പുറത്താ​ക്ക​പ്പെ​ട്ടി​രി​ക്ക​യാണ്‌. ഇപ്പോൾ അവരുടെ ശ്രദ്ധാ​കേ​ന്ദ്രം ഭൂമി​യാണ്‌. (വെളി​പ്പാ​ടു 12:7-9) തന്റെ സ്വാധീന മണ്ഡലം കാര്യ​മാ​യി പരിമി​ത​മാ​ക്ക​പ്പെ​ട്ടി​രി​ക്കു​ന്ന​തി​നാൽ സാത്താൻ “അലറുന്ന സിംഹം എന്നപോ​ലെ ആരെ വിഴു​ങ്ങേണ്ടു എന്നു തിരിഞ്ഞു ചുററി​ന​ട​ക്കു​ന്നു.” (1 പത്രൊസ്‌ 5:8) അവന്‌ എളുപ്പ​ത്തിൽ ഇരയാ​കു​ന്നത്‌ ആരാണ്‌? അതു ജീവി​ത​ത്തി​ലും മനുഷ്യ​ബ​ന്ധ​ങ്ങ​ളി​ലും അനുഭ​വ​പ​രി​ചയം കുറഞ്ഞ​വ​രാ​യി​രി​ക്കു​മെ​ന്നതു മനസ്സി​ലാ​ക്കാ​വു​ന്ന​ത​ല്ലേ​യു​ള്ളൂ? അങ്ങനെ, യുവജ​നങ്ങൾ ഇന്നു പിശാ​ചി​ന്റെ ലക്ഷ്യമാ​യി​ത്തീർന്നി​രി​ക്കു​ന്നു. തങ്ങളുടെ മിക്ക സംഗീ​ത​ങ്ങ​ളി​ലൂ​ടെ​യും ഒഴിവു​സമയ പ്രവർത്ത​ന​ങ്ങ​ളി​ലൂ​ടെ​യും അവർ ചതിയ​നായ ഈ അദൃശ്യ സൂത്ര​ധാ​രന്റെ കൈക​ളിൽ വീഴുന്നു.—എഫെസ്യർ 6:11, 12.

എങ്ങനെ​യെ​ങ്കി​ലും ജീവിതം കരുപ്പി​ടി​പ്പി​ക്കാൻ ശ്രമി​ക്കു​മ്പോ​ഴും യുവജ​ന​ങ്ങൾക്കു നിരവധി പ്രതി​ബ​ന്ധ​ങ്ങളെ നേരി​ടേ​ണ്ട​താ​യി​വ​രു​ന്നു. രണ്ടാം ലോക​മ​ഹാ​യു​ദ്ധം കഴിഞ്ഞ​തോ​ടെ, യുദ്ധത്തി​ലാ​യി​രുന്ന അനേകം രാജ്യ​ങ്ങ​ളി​ലെ​യും ജനങ്ങൾ, സമ്പദ്‌സ​മൃ​ദ്ധ​മായ ജീവി​ത​രീ​തി തങ്ങളുടെ കുടും​ബാം​ഗ​ങ്ങൾക്കു സമ്മാനി​ച്ചു​കൊ​ണ്ടു യുദ്ധകാ​ലത്തെ കുറവു നികത്താൻ ശ്രമി​ച്ചി​രി​ക്കു​ന്നു. ഭൗതിക സ്വത്തുക്കൾ, കടിഞ്ഞാ​ണി​ല്ലാത്ത ഒഴിവു​സമയ പ്രവർത്ത​നങ്ങൾ, വിനോ​ദങ്ങൾ എന്നിവ​യാ​ണു മുഖ്യ ലാക്കുകൾ. തത്‌ഫ​ല​മാ​യി, അനേകർ കുഴപ്പ​ങ്ങ​ളി​ല​ക​പ്പെ​ട്ടി​ട്ടുണ്ട്‌. “ധനിക​ന്മാ​രാ​കു​വാൻ ആഗ്രഹി​ക്കു​ന്നവർ പരീക്ഷ​യി​ലും കണിയി​ലും കുടു​ങ്ങു​ക​യും . . . മൌഢ്യ​വും ദോഷ​ക​ര​വു​മായ പല മോഹ​ങ്ങൾക്കും ഇരയാ​യി​ത്തീ​രു​ക​യും ചെയ്യുന്നു. ദ്രവ്യാ​ഗ്രഹം സകലവിധ ദോഷ​ത്തി​ന്നും മൂലമ​ല്ലോ. ഇതു ചിലർ കാംക്ഷി​ച്ചി​ട്ടു വിശ്വാ​സം വിട്ടു​ഴന്നു ബഹുദുഃ​ഖ​ങ്ങൾക്കു അധീന​രാ​യി​ത്തീർന്നി​രി​ക്കു​ന്നു” എന്നു പൗലൊസ്‌, തിമൊ​ഥെ​യൊ​സി​നു മുന്നറി​യി​പ്പു​നൽകി. (1 തിമൊ​ഥെ​യൊസ്‌ 6:9, 10) പൊതു​വേ പറഞ്ഞാൽ, ഇന്നത്തെ ഭൗതി​കത്വ സമൂഹ​ത്തിൽ ആളുകൾ സാമ്പത്തി​ക​വും പണപര​വും വൈകാ​രി​ക​വു​മാ​യി തങ്ങളെ​ത്തന്നെ കുത്തി​നോ​വി​ക്കു​ന്നതു നാം കാണുന്നു. ദൈവ​ത്തി​ന്റെ മുഖ്യ ശത്രു​വി​ന്റെ കെണി​യിൽ അകപ്പെ​ട്ടി​രി​ക്കു​ന്ന​വ​രിൽ അനേകം യുവജ​ന​ങ്ങ​ളു​മുൾപ്പെ​ടു​ന്നു.

എങ്കിലും സന്തോ​ഷ​ക​ര​മെന്നു പറയട്ടെ, ഒരു സദ്വാർത്ത​യുണ്ട്‌. അത്‌ സുരക്ഷി​ത​ഭാ​വി​യുള്ള യുവജ​ന​ങ്ങ​ളെ​ക്കു​റി​ച്ചു​ള്ള​താണ്‌. അതെങ്ങനെ സാധ്യ​മാ​കും?

അന്വേ​ഷി​പ്പിൻ കണ്ടെത്തും

ഉയർന്ന ആദർശ​ങ്ങ​ളുള്ള അനേകം യുവജ​ന​ങ്ങ​ളുണ്ട്‌. മുതിർന്ന​വർക്കി​ട​യിൽ സാധാ​ര​ണ​മാ​യി​രി​ക്കുന്ന അധമമായ നിലവാ​ര​ങ്ങളെ അവർ ത്യജി​ക്കു​ന്നു. അധികാ​ര​ക്കൊ​തി മൂത്ത രാഷ്‌ട്രീ​യ​ക്കാ​രു​ടെ​യും ബിസി​ന​സു​കാ​രു​ടെ​യും അനീതി​യി​ലും തഴമ്പിച്ച മനോ​ഭാ​വ​ത്തി​ലും അവർക്കു വിരക്തി​തോ​ന്നു​ന്നു. നിങ്ങ​ളൊ​രു യുവവ്യ​ക്തി​യാ​ണെ​ങ്കിൽ നിങ്ങൾക്കും അങ്ങനെ​യാ​യി​രി​ക്കാം തോന്നു​ന്നത്‌.

കൗമാരം വിടപ​റ​യാ​റായ സെഡ്രി​ക്കി​ന്റെ അനുഭവം പരിചി​ന്തി​ക്കുക. അത്‌ ഒറ്റപ്പെട്ട ഒന്നല്ല.b ഒരു കുട്ടി​യാ​യി​രു​ന്ന​പ്പോൾ അവൻ മരണമുൾപ്പെടെ അനേകം സംഗതി​കളെ ഭയപ്പെ​ട്ടി​രു​ന്നു. ജീവി​ത​ത്തി​ന്റെ ഉദ്ദേശ്യ​മെ​ന്താ​ണെന്ന്‌ അവൻ ചിന്തിച്ചു. 15 വയസ്സെ​ത്തി​യ​പ്പോൾ, തന്റെ ചോദ്യ​ങ്ങൾക്ക്‌ ഉത്തരങ്ങൾ കണ്ടെത്താ​നാ​കാ​തെ അവൻ ആദർശ​വാ​ദി​ക​ളായ മറ്റു യുവാ​ക്ക​ളോ​ടൊ​പ്പം ജീവി​ത​ത്തി​ന്റെ അർഥ​മെ​ന്തെന്നു വിചി​ന്ത​നം​ചെ​യ്യാൻ ഇറങ്ങി​ത്തി​രി​ച്ചു. “ഞങ്ങൾ മയക്കു​മ​രു​ന്നു കഴിച്ച്‌, മണിക്കൂ​റു​ക​ളോ​ള​മി​രു​ന്നു സംസാ​രി​ക്കു​മാ​യി​രു​ന്നു. എല്ലാവർക്കും ഒരേ ചിന്താ​ഗ​തി​യാ​യി​രു​ന്നു, എന്നാൽ ആരു​ടെ​യും പക്കൽ ഉത്തരങ്ങൾ ഉണ്ടായി​രു​ന്നില്ല,” അവൻ അനുസ്‌മ​രി​ക്കു​ന്നു.

മിക്ക യുവജ​ന​ങ്ങ​ളെ​യും​പോ​ലെ സെഡ്രി​ക്കി​നും ആവേശം പകരുന്ന പ്രവൃ​ത്തി​കൾ ഒരു ഹരമാ​യി​രു​ന്നു. കേവലം മയക്കു​മ​രു​ന്നു​പ​യോ​ഗി​ക്കു​ന്നത്‌ അവനെ തൃപ്‌ത​നാ​ക്കി​യില്ല. താമസി​യാ​തെ അവൻ മോഷ​ണ​ത്തി​ലും മയക്കു​മ​രു​ന്നു വിൽപ്പ​ന​യി​ലു​മേർപ്പെട്ടു. അതു​കൊ​ണ്ടും തൃപ്‌തി​വ​രാഞ്ഞ്‌, ആളുകൾ ആവശ്യ​പ്പെ​ട്ട​ത​നു​സ​രി​ച്ചു സാധനങ്ങൾ മോഷ്ടി​ച്ചു കൊടു​ക്കാൻ തുടങ്ങി. “എനിക്കത്‌ ആവേശം പകർന്നു” എന്ന്‌ അവൻ സമ്മതി​ക്കു​ന്നു. “എന്നാൽ ഞാൻ ഒരിക്ക​ലും സാധാ​ര​ണ​ക്കാ​രന്റെ മുതൽ മോഷ്ടി​ച്ചി​രു​ന്നില്ല. ഒരു കാർ മോഷ്ടി​ക്കു​ന്നെ​ങ്കിൽ അതിന്റെ ഉപയോ​ഗ​ത്തി​നു​ശേഷം ഒരു കേടും​വ​രു​ത്താ​തെ ഞാനത്‌ ഉപേക്ഷി​ക്കു​മാ​യി​രു​ന്നു. ഒരു കട കുത്തി​ത്തു​റ​ക്കു​ന്നെ​ങ്കിൽ അതിന്‌ ഇൻഷ്വ​റൻസു​ണ്ടെന്ന്‌ ഉറപ്പു​വ​രു​ത്തി​യി​ട്ടേ അങ്ങനെ ചെയ്യു​മാ​യി​രു​ന്നു​ള്ളൂ. എന്റെ പ്രവൃ​ത്തി​കളെ ന്യായീ​ക​രി​ക്കാൻ അതെന്നെ സഹായി​ച്ചു.” നിങ്ങൾക്ക്‌ ഊഹി​ക്കാ​വു​ന്ന​തു​പോ​ലെ, സെഡ്രിക്ക്‌ ജയിലി​ലാ​യി.

“എന്നോ​ടൊ​പ്പം തടവി​ലാ​യി​രുന്ന മാർക്ക്‌ എന്നോടു സംസാ​രി​ച്ചു. എന്റെ ഭുജത്തിൽ ഒരു വലിയ കുരിശ്‌ പച്ചകു​ത്തി​യി​രി​ക്കു​ന്നതു കണ്ട്‌ അതെന്തി​നാ​ണെന്ന്‌ അയാൾ എന്നോടു ചോദി​ച്ചു. എനിക്കത്‌ മതപര​മാ​യി വളരെ​യ​ധി​കം പ്രാധാ​ന്യ​മുള്ള ഒന്നാ​ണെന്ന്‌ അയാൾ കരുതി.” ഏതാനും വാരങ്ങൾക്കു​ശേഷം മാർക്ക്‌, നിങ്ങൾക്കു ഭൂമി​യി​ലെ പറുദീ​സ​യിൽ എന്നേക്കും ജീവി​ക്കാൻ കഴിയും എന്ന പുസ്‌തകം സെഡ്രി​ക്കി​നു നൽകി.c “‘നിങ്ങൾക്ക്‌ എന്നേക്കും ജീവി​ക്കാൻ കഴിയും’—ആ വാക്കുകൾ ഉടനടി എന്റെ ഉള്ളിൽ തട്ടി. അതേക്കു​റി​ച്ചാ​ണു ഞങ്ങൾ എല്ലായ്‌പോ​ഴും സംസാ​രി​ച്ചു​കൊ​ണ്ടി​രു​ന്നത്‌. എന്നാൽ സത്യം കണ്ടെത്താൻ ഞങ്ങൾക്കാ​യില്ല.” ജയിൽ സന്ദർശിച്ച ഒരു യഹോ​വ​യു​ടെ സാക്ഷി​യു​മാ​യി പലവട്ടം ചർച്ചകൾ നടത്തി​യ​ശേഷം, തന്റെ ആഗ്രഹം സാക്ഷാ​ത്‌ക​രി​ക്ക​പ്പെ​ടാ​വുന്ന ഒന്നാ​ണെന്നു സെഡ്രിക്ക്‌ തിരി​ച്ച​റി​ഞ്ഞു—എന്നാൽ, ദൈവിക മാർഗ​ത്തി​ലൂ​ടെ മാത്രം.

“മുൻ സുഹൃ​ത്തു​ക്ക​ളു​മാ​യുള്ള സഹവാസം ഉപേക്ഷി​ച്ച​തോ​ടെ എന്റെ പുരോ​ഗതി ത്വരി​ത​ഗ​തി​യി​ലാ​യി,” സെഡ്രിക്‌ പറയുന്നു. അവനെ സംബന്ധി​ച്ചി​ട​ത്തോ​ളം, കാര്യങ്ങൾ ഗ്രഹി​ക്കു​ന്ന​തി​ലും യഥാർഥ സന്തുഷ്ടി കണ്ടെത്തു​ന്ന​തി​ലു​മുള്ള പുരോ​ഗതി അത്ര എളുപ്പ​മാ​യി​രു​ന്നില്ല. “ഞാനി​പ്പോ​ഴും ശ്രമം തുടരു​ക​യാണ്‌,” അവൻ പറയുന്നു. “എന്റെ ചിന്താ​രീ​തി​യിൽ ജാഗ്ര​ത​പു​ലർത്തേ​ണ്ട​തുണ്ട്‌.” അതേ, ആവേശം പകരുന്ന പ്രവൃ​ത്തി​ക​ളിൽ ഏർപ്പെ​ട്ടാൽ മാത്രമേ തന്റെ ലാക്കു​ക​ളിൽ എത്തി​ച്ചേ​രാൻ സാധി​ക്കു​ക​യു​ള്ളു​വെന്നു ചിന്തി​ച്ചു​കൊണ്ട്‌ ആദർശ​വാ​ദി​യാ​യി​രു​ന്നത്‌ തന്നെ പിശാ​ചി​ന്റെ കെണി​യി​ല​ക​പ്പെ​ടു​ത്തി​യെന്നു സെഡ്രിക്ക്‌ മനസ്സി​ലാ​ക്കു​ന്നു.

സന്തോ​ഷ​ക​ര​മെ​ന്നു പറയട്ടെ, സെഡ്രിക്ക്‌ ജയിൽമോ​ചി​ത​നാ​യി​ട്ടു വളരെ​ക്കാ​ല​മാ​യി. തേടി​ക്കൊ​ണ്ടി​രു​ന്നതു കണ്ടെത്തിയ അനേക​രു​മാ​യി അവനി​പ്പോൾ ക്രമമായ സഹവാസം ആസ്വദി​ക്കു​ന്നു. ഇപ്പോൾ അവനൊ​രു യഹോ​വ​യു​ടെ സാക്ഷി​യാണ്‌. ഇവിടെ ഭൂമി​യി​ലെ പറുദീ​സ​യിൽ ജീവി​ക്കാ​നുള്ള സാക്ഷി​ക​ളു​ടെ പ്രത്യാ​ശ​യിൽ അവൻ പങ്കു​ചേ​രു​ന്നു. ഏതു കപടരൂ​പ​ത്തി​ലു​മുള്ള സാത്താ​ന്യ​സ്വാ​ധീ​നം തരിമ്പും ശേഷി​ക്കാ​തെ അവസാ​നി​ക്കുന്ന സമയത്തി​നാ​യി അവൻ നോക്കി​പ്പാർത്തു​മി​രി​ക്കു​ന്നു.

തീർച്ച​യാ​യും, സെഡ്രി​ക്കി​നെ​പ്പോ​ലെ​യുള്ള യുവജ​ന​ങ്ങൾക്കു മാത്രമല്ല സുരക്ഷിത ഭാവി ഉള്ളത്‌; ദൈവ​ഭ​ക്തി​യുള്ള മാതാ​പി​താ​ക്കൾ ബൈബിൾ സത്യ​ത്തോ​ടുള്ള സ്‌നേഹം അങ്കുരി​പ്പി​ച്ചു വളർത്തി​ക്കൊ​ണ്ടു​വന്ന വേറെ​യും യുവജ​ന​ങ്ങ​ളുണ്ട്‌.

ദൈവ​ഭ​ക്തി​യോ​ടെ​യുള്ള പരിശീ​ലനം പ്രതി​ഫലം കൈവ​രു​ത്തു​ന്നു

“ബാലൻ നടക്കേ​ണ്ടുന്ന വഴിയിൽ അവനെ അഭ്യസി​പ്പിക്ക; അവൻ വൃദ്ധനാ​യാ​ലും അതു വിട്ടു​മാ​റു​ക​യില്ല,” പുരാതന നാളിലെ ജ്ഞാനി​യായ ശലോ​മോൻ രാജാവ്‌ എഴുതി. (സദൃശ​വാ​ക്യ​ങ്ങൾ 22:6) ബൈബി​ളി​ന്റെ നിലവാ​രം പിൻപ​റ്റാൻ തീരു​മാ​നി​ച്ചി​രി​ക്കുന്ന ഏകാ​ഗ്ര​മ​ന​സ്സുള്ള അനേകം യുവജ​ന​ങ്ങ​ളു​ടെ കാര്യ​ത്തിൽ ഇതു വാസ്‌ത​വ​മെന്നു തെളി​ഞ്ഞി​രി​ക്കു​ന്നു.

ഷീല, ഗോർഡൻ, സേറ എന്നിവർ അതാണു ചെയ്‌തത്‌. അവരുടെ മാതാ​പി​താ​ക്കൾ, രാജ്യ​സു​വാർത്ത പ്രസം​ഗി​ച്ചു​കൊണ്ട്‌ ആളുകളെ ‘ശിഷ്യ​രാ​ക്കു​വിൻ’ എന്ന ക്രിസ്‌തു​വി​ന്റെ കൽപ്പന അനുസ​രി​ക്കു​ന്ന​തി​നു വളരെ​യേറെ പ്രാധാ​ന്യം കൽപ്പി​ച്ചി​രു​ന്ന​താ​യി അവർ അനുസ്‌മ​രി​ക്കു​ന്നു. (മത്തായി 24:14; 28:19, 20) “ഏതു തീരു​മാ​നം എടുക്കു​മ്പോ​ഴും ‘ഇതു പ്രസം​ഗ​വേ​ലയെ എങ്ങനെ ബാധി​ക്കും?’ എന്നു ഞാനും അമ്മയും പരസ്‌പരം ചോദി​ക്കു​മാ​യി​രു​ന്നു,” ഷീല അനുസ്‌മ​രി​ക്കു​ന്നു. അവൾ ഇങ്ങനെ സമ്മതി​ക്കു​ന്നു: “അത്തരം യുക്തി​വി​ചാ​രം നിമിത്തം പല കാര്യ​ങ്ങ​ളും ഞങ്ങൾ ഉപേക്ഷി​ച്ചു. എന്നാൽ അതു​കൊ​ണ്ടു ഞങ്ങൾക്ക്‌ എന്തെല്ലാം അനു​ഗ്ര​ഹ​ങ്ങ​ളാണ്‌ ഉണ്ടായ​തെ​ന്നോ!” സുവാർത്ത​യു​മാ​യി ആളുക​ളു​ടെ ഭവനങ്ങൾ സന്ദർശിച്ച്‌ പകൽ ദീർഘ​നേരം ചെലവി​ട്ട​ശേ​ഷ​വും ഗീതങ്ങൾ പാടി​ക്കൊ​ണ്ടാ​യി​രു​ന്നു ഷീലയും അമ്മയും വീട്ടി​ലേക്കു മടങ്ങുക. “ഞാൻ തികച്ചും സന്തുഷ്ട​യാ​യി​രു​ന്നു, ഇപ്പോ​ഴും എനിക്ക​ങ്ങനെ അനുഭ​വ​പ്പെ​ടു​ന്നുണ്ട്‌,” അവൾ പറയുന്നു.

ആനന്ദദാ​യ​ക​മാ​യി​രുന്ന ഒട്ടനവധി ശനിയാഴ്‌ച സായാ​ഹ്ന​ങ്ങ​ളെ​ക്കു​റി​ച്ചു ഗോർഡൻ ഓർക്കു​ന്നു. “സഭയിലെ മൂപ്പന്മാ​രു​ടെ വീട്ടി​ലേക്ക്‌ എന്നെ ക്ഷണിക്കു​മാ​യി​രു​ന്നു. അവിടെ ഞങ്ങൾ പ്രയോ​ജ​ന​പ്ര​ദ​മായ ക്വിസ്സു​ക​ളും ചർച്ചക​ളും നടത്തു​മാ​യി​രു​ന്നു. ബൈബി​ളി​ലെ വാക്യങ്ങൾ മനപ്പാ​ഠ​മാ​ക്കാ​നും തിരു​വെ​ഴു​ത്തു വിഷയ​ങ്ങ​ളെ​ക്കു​റി​ച്ചു യഥേഷ്ടം സംസാ​രി​ക്കാ​നും പ്രസം​ഗ​വേ​ല​യി​ലെ അനുഭവം വിവരി​ക്കാ​നും രാജ്യ​വേല പുരോ​ഗ​മി​ക്കു​ന്ന​തെ​ങ്ങ​നെ​യെന്നു പഠിക്കാ​നും ഞങ്ങൾക്കു പ്രോ​ത്സാ​ഹനം ലഭിച്ചി​രു​ന്നു,” ഗോർഡൻ അനുസ്‌മ​രി​ക്കു​ന്നു. “അവയെ​ല്ലാം നല്ല അസ്‌തി​വാ​ര​മി​ടാ​നും യഹോ​വ​യാം ദൈവ​ത്തോ​ടു സ്‌നേഹം നട്ടുവ​ളർത്താ​നും എന്നെ സഹായി​ച്ചു.”

സന്ദർശ​ക​രാ​യ സാക്ഷി​ക​ളു​മൊ​ത്തു പങ്കിട്ട സായാ​ഹ്ന​ങ്ങ​ളെ​ക്കു​റി​ച്ചു സേറ മധുര​സ്‌മ​ര​ണകൾ അയവി​റ​ക്കു​ന്നു. “ഞങ്ങളൊ​രു​മിച്ച്‌ ആഹാരം കഴിക്കും. ഒടുവിൽ പിയാ​നോ വായി​ച്ചു​കൊ​ണ്ടു ദൈവ​രാ​ജ്യ​ത്തെ​ക്കു​റി​ച്ചുള്ള ഗീതങ്ങൾ പാടും. വാസ്‌ത​വ​ത്തിൽ, സംഗീതം ഞങ്ങളെ വളരെ​യ​ധി​കം സഹായി​ച്ചു. പ്രത്യേ​കി​ച്ചും സ്‌കൂൾ വർഷങ്ങ​ളിൽ. കാരണം, കുടും​ബ​മൊ​ത്തൊ​രു​മി​ച്ചു കാര്യങ്ങൾ ചെയ്യാൻ അതു ഞങ്ങൾക്ക്‌ അവസര​മേകി.”

തീർച്ച​യാ​യും, യഹോ​വയെ സന്തോ​ഷി​പ്പി​ക്കാൻ ആഗ്രഹി​ക്കുന്ന യുവജ​ന​ങ്ങൾക്കെ​ല്ലാ​മൊ​ന്നും ഉത്തമ കുടും​ബ​ചു​റ്റു​പാ​ടു​കൾ ഇല്ല. എന്നിരു​ന്നാ​ലും, സഭയിലെ മറ്റു സാക്ഷി​ക​ളു​ടെ കുടും​ബാം​ഗ​ങ്ങ​ളു​മാ​യുള്ള അടുത്ത സഹവാസം അവർക്കു സുരക്ഷി​ത​ത്വ​വും വേണ്ട​പ്പെ​ട്ട​വ​രാ​ണെന്ന തോന്ന​ലും പ്രദാനം ചെയ്യുന്നു.

ഭാവി​യി​ലേക്ക്‌ സുരക്ഷി​ത​മാ​യൊ​രു അടിസ്ഥാ​ന​മി​ടു​ക

യുവജ​ന​ങ്ങൾക്കിന്ന്‌ ഒരു തിര​ഞ്ഞെ​ടു​പ്പുണ്ട്‌. ഒന്നുകിൽ അവർക്ക്‌ യേശു മുൻകൂ​ട്ടി​പ്പറഞ്ഞ വരാനി​രി​ക്കുന്ന “മഹോ​പ​ദ്രവ”ത്തിൽ ഈ ദുഷ്ട​ലോ​ക​ത്തോ​ടൊ​പ്പം നാശത്തി​ലേക്കു കൂപ്പു​കു​ത്തി​വീ​ഴാം. അല്ലെങ്കിൽ നിശ്വസ്‌ത സങ്കീർത്ത​ന​ക്കാ​ര​നായ ആസാഫ്‌ പാടി​യ​തു​പോ​ലെ, അവർക്കു “തങ്ങളുടെ ആശ്രയം ദൈവ​ത്തിൽ വെക്കു​ക​യും . . . അവന്റെ കല്‌പ​ന​കളെ പ്രമാ​ണി​ച്ചു നടക്കയും” ചെയ്യാം. ദൈവ​ത്തോ​ടുള്ള അനുസ​രണം “തങ്ങളുടെ പിതാ​ക്ക​ന്മാ​രേ​പ്പോ​ലെ ശാഠ്യ​വും മത്സരവും ഉള്ള തലമു​റ​യാ​യി ഹൃദയത്തെ സ്ഥിരമാ​ക്കാ​തെ ദൈവ​ത്തോ​ടു അവിശ്വ​സ്‌ത​മ​ന​സ്സു​ള്ളോ​രു തലമു​റ​യാ​യി” തീരു​ന്ന​തിൽനിന്ന്‌ അവരെ തടയും.—മത്തായി 24:21, NW; സങ്കീർത്തനം 78:6-8.

യഹോ​വ​യു​ടെ സാക്ഷി​ക​ളു​ടെ ലോക​വ്യാ​പ​ക​മായ 80,000-ത്തിലധി​കം സഭകളിൽ ആദരണീ​യ​രായ നിരവധി യുവജ​ന​ങ്ങളെ നിങ്ങൾക്കു കാണാ​നാ​കും. “നന്മ ചെയ്‌വാ​നും സൽപ്ര​വൃ​ത്തി​ക​ളിൽ സമ്പന്നരാ​യി ദാനശീ​ല​രും ഔദാ​ര്യ​മു​ള്ള​വ​രു​മാ​യി . . . വരും​കാ​ല​ത്തേക്കു നല്ലോരു അടിസ്ഥാ​നം നിക്ഷേപി”ക്കാനും യുവ തിമൊ​ഥെ​യൊ​സി​നുള്ള പൗലൊ​സി​ന്റെ ബുദ്ധ്യു​പ​ദേശം അവർ പിൻപ​റ്റി​യി​രി​ക്കു​ന്നു. തത്‌ഫ​ല​മാ​യി, അവർക്കു “സാക്ഷാ​ലുള്ള ജീവനെ [മുറുകെ] പിടി”ക്കുവാൻ കഴിഞ്ഞി​രി​ക്കു​ന്നു. (1 തിമൊ​ഥെ​യൊസ്‌ 6:18, 19) ഈ വിശ്വസ്‌ത ക്രിസ്‌ത്യാ​നി​ക​ളെ​ക്കു​റിച്ച്‌, അവരുടെ യോഗ​ങ്ങ​ളിൽ ഹാജരാ​യി​ക്കൊ​ണ്ടു കൂടുതൽ കാര്യങ്ങൾ മനസ്സി​ലാ​ക്കുക. അങ്ങനെ​യെ​ങ്കിൽ നിങ്ങൾക്കും ഒരു സുരക്ഷിത ഭാവി പ്രത്യാ​ശി​ക്കാൻ കഴിയും.

[അടിക്കു​റി​പ്പു​കൾ]

[7-ാം പേജിലെ ചിത്രം]

യേശു സൗഖ്യ​മാ​ക്കിയ “അത്യു​ഗ്രന്മാ”രായി​രുന്ന പുരു​ഷ​ന്മാ​രെ ബാധി​ച്ചി​രു​ന്നതു ദുഷ്ടാ​ത്മാ​ക്ക​ളാ​യി​രു​ന്നു

[8-ാം പേജിലെ ചിത്രം]

“വരും​കാ​ല​ത്തേക്കു നല്ലോരു അടിസ്ഥാ​നം” പണിയു​ന്നു