അവൻ ദിവ്യ മാർഗ​നിർദേശം കൈ​ക്കൊ​ണ്ടു

പരിപൂർണ​നായ ഒരു കുട്ടിയെ നിങ്ങളു​ടെ സംരക്ഷ​ണ​യിൽ ഏല്‌പി​ക്കു​ക​യും ഉചിത​മാ​യി പോറ​റി​വ​ളർത്താൻ നിങ്ങളിൽനി​ന്നു പ്രതീ​ക്ഷി​ക്കു​ക​യും ചെയ്യു​ന്നു​വെ​ന്നി​രി​ക്കട്ടെ. എന്തോരു പ്രയാ​സ​മേ​റിയ സംരംഭം! ഒരു അപൂർണ മനുഷ്യന്‌ എങ്ങനെ അതിനു കഴിയും? ദിവ്യ മാർഗ​നിർദേശം കൈ​ക്കൊ​ള്ളു​ക​യും ദൈനം​ദിന ജീവി​ത​ത്തിൽ അതു ബാധക​മാ​ക്കു​ക​യും ചെയ്യു​ന്ന​തി​ലൂ​ടെ മാത്രം.

അതുത​ന്നെ​യാ​ണു യേശു​വി​ന്റെ വളർത്തു​പി​താ​വായ യോ​സേഫ്‌ ചെയ്‌ത​തും. യോ​സേ​ഫി​നെ​ക്കു​റി​ച്ചുള്ള വിശദ​മായ ഉത്തര കാനോ​നിക പാരമ്പ​ര്യ​ങ്ങൾക്കു വിപരീ​ത​മാ​യി, യേശു​വി​ന്റെ ഭൗമിക ജീവി​ത​ത്തിൽ അദ്ദേഹ​ത്തി​നു​ണ്ടാ​യി​രുന്ന പങ്കി​നെ​ക്കു​റി​ച്ചു ബൈബിൾ ഒന്നും​തന്നെ പറയു​ന്നില്ല. യോ​സേ​ഫും ഭാര്യ മറിയ​യും യേശു​വി​നെ​യും വേറെ നാലു പുത്രൻമാ​രെ​യും പുത്രി​മാ​രെ​യും വളർത്തി​ക്കൊ​ണ്ടു​വ​ന്നെന്നു നമുക്ക​റി​യാം.—മർക്കൊസ്‌ 6:3.

ഇസ്രാ​യേ​ലി​ന്റെ രാജാ​വാ​യി​രുന്ന ദാവീ​ദിന്‌ ശലോ​മോ​ന്റെ വംശാ​വ​ലി​യി​ലൂ​ടെ പിറന്ന ഒരു പിൻഗാ​മി​യാ​യി​രു​ന്നു യോ​സേഫ്‌. അവൻ യാക്കോ​ബി​ന്റെ പുത്ര​നും ഹേലി​യു​ടെ മരുമ​ക​നു​മാ​യി​രു​ന്നു. (മത്തായി 1:16; ലൂക്കൊസ്‌ 3:23) ഗലീല​യിൽ നസറെത്ത്‌ എന്ന പട്ടണത്തിൽ ഒരു തച്ചനായി വേല ചെയ്‌തി​രുന്ന യോ​സേ​ഫി​നു പരിമിത സാമ്പത്തിക വരുമാ​ന​ങ്ങളേ ഉണ്ടായി​രു​ന്നു​ള്ളൂ. (മത്തായി 13:55; ലൂക്കൊസ്‌ 2:4, 24; താരത​മ്യം ചെയ്യുക: ലേവ്യ​പു​സ്‌തകം 12:8.) എങ്കിലും അദ്ദേഹം ആത്മീയ​മാ​യി സമ്പന്നനായിരുന്നു. (സദൃശ​വാ​ക്യ​ങ്ങൾ 10:22) അദ്ദേഹം ദിവ്യ മാർഗ​നിർദേശം കൈ​ക്കൊ​ണ്ട​താണ്‌ ഇതിനു കാരണ​മെ​ന്നതു തീർച്ച​യാണ്‌.

ദൈവ​വി​ശ്വാ​സ​വും ശരിയാ​യതു ചെയ്യാ​നാ​ഗ്ര​ഹ​വു​മുള്ള സൗമ്യ​ത​യും താഴ്‌മ​യു​മുള്ള ഒരു യഹൂദ​നാ​യി​രു​ന്നു യോ​സേഫ്‌ എന്നതിൽ സംശയ​മില്ല. അവന്റെ ജീവി​ത​ത്തെ​ക്കു​റി​ച്ചു തിരു​വെ​ഴു​ത്തു​ക​ളിൽ രേഖ​പ്പെ​ടു​ത്തി​യി​ട്ടുള്ള ഏതാനും സംഭവങ്ങൾ അവൻ എല്ലായ്‌പോ​ഴും യഹോ​വ​യു​ടെ കൽപ്പനകൾ അനുസ​രി​ക്കു​ന്ന​വ​നാ​യി​രു​ന്നു എന്നു കാണി​ക്കു​ന്നു. അവ ന്യായ​പ്ര​മാ​ണ​ത്തിൽ ഉൾപ്പെ​ട്ടി​രു​ന്ന​താ​ണെ​ങ്കി​ലും ശരി യോ​സേ​ഫി​നു ദൂതൻമാ​രിൽനി​ന്നു നേരിട്ടു ലഭിച്ച​താ​ണെ​ങ്കി​ലും ശരി, അതിനു മാററ​മു​ണ്ടാ​യി​രു​ന്നില്ല.

പ്രശ്‌ന​ങ്ങ​ളു​ണ്ടാ​യി​രുന്ന ഒരു നീതി​മാ​നായ മനുഷ്യൻ

ഗുരു​ത​ര​മായ ഒരു പ്രശ്‌നത്തെ അഭിമു​ഖീ​ക​രി​ക്കു​മ്പോൾ ഒരു ദൈവിക വ്യക്തി എന്താണു ചെയ്യേ​ണ്ടത്‌? എന്തിന്‌, അയാൾ ‘തന്റെ ഭാരം യഹോ​വ​യു​ടെ​മേൽ’ വയ്‌ക്കു​ക​യും ദിവ്യ മാർഗ​നിർദേശം പിൻപ​റ​റു​ക​യും വേണം! (സങ്കീർത്തനം 55:22) അതാണു യോ​സേഫ്‌ ചെയ്‌തത്‌. മറിയ​യു​മാ​യുള്ള വിവാഹം നിശ്ചയി​ച്ചി​രി​ക്കു​മ്പോൾ അവൾ, “അവർ കൂടി​വ​രു​മ്മു​മ്പേ പരിശു​ദ്ധാ​ത്മാ​വി​നാൽ ഗർഭി​ണി​യാ​യി എന്നു കണ്ടു.” യോ​സേഫ്‌ ‘നീതി​മാ​നാ​ക​കൊ​ണ്ടും അവൾക്കു ലോകാ​പ​വാ​ദം വരുത്തു​വാൻ അവന്നു മനസ്സി​ല്ലാ​യ്‌ക​കൊ​ണ്ടും അവളെ ഗൂഢമാ​യി ഉപേക്ഷി​പ്പാൻ ഭാവിച്ചു.’ യോ​സേഫ്‌ കാര്യാ​ദി​ക​ളെ​ക്കു​റി​ച്ചു ചിന്തി​ച്ചി​രി​ക്കു​മ്പോൾ യഹോ​വ​യു​ടെ ദൂതൻ അവനു സ്വപ്‌ന​ത്തിൽ പ്രത്യ​ക്ഷ​നാ​യി, “ദാവീ​ദി​ന്റെ മകനായ യോ​സേഫേ, നിന്റെ ഭാര്യ​യായ മറിയയെ ചേർത്തു​കൊൾവാൻ ശങ്കി​ക്കേണ്ടാ; അവളിൽ ഉല്‌പാ​ദി​ത​മാ​യതു പരിശു​ദ്ധാ​ത്മാ​വി​നാൽ ആകുന്നു. അവൾ ഒരു മകനെ പ്രസവി​ക്കും; അവൻ തന്റെ ജനത്തെ അവരുടെ പാപങ്ങ​ളിൽനി​ന്നു രക്ഷിപ്പാ​നി​രി​ക്ക​കൊ​ണ്ടു നീ അവന്നു യേശു എന്നു പേർ ഇടേണം” എന്നു പറഞ്ഞു. യോ​സേഫ്‌ ഉറക്കമു​ണർന്ന​പ്പോൾ, “കർത്താ​വി​ന്റെ [“യഹോ​വ​യു​ടെ,” NW] ദൂതൻ കല്‌പി​ച്ച​തു​പോ​ലെ ചെയ്‌തു. മകനെ പ്രസവി​ക്കും​വരെ അവൻ അവളെ പരി​ഗ്ര​ഹി​ച്ചില്ല. മകന്നു അവൻ യേശു എന്നു പേർ വിളിച്ചു.” (മത്തായി 1:18-25) യോ​സേഫ്‌ ദിവ്യ മാർഗ​നിർദേശം കൈ​ക്കൊ​ണ്ടു.

ജനം തങ്ങളുടെ സ്വന്തം പട്ടണങ്ങ​ളിൽ പേർ ചാർത്ത​ണ​മെന്ന്‌ ഔഗു​സ്‌തൊസ്‌ കൈസർ കൽപ്പന പുറ​പ്പെ​ടു​വി​ച്ചു. അതനു​സ​രി​ച്ചു യോ​സേ​ഫും മറിയ​യും യെഹൂ​ദ്യ​യി​ലുള്ള ബേത്‌ല​ഹേ​മി​ലേക്കു പോയി. അവി​ടെ​വച്ചു മറിയ യേശു​വി​നു ജൻമം നൽകി. അവനെ ഒരു പുൽത്തൊ​ട്ടി​യിൽ കിട​ത്തേ​ണ്ടി​വന്നു, കാരണം വേറെ താമസ​സൗ​ക​ര്യ​മൊ​ന്നും ലഭ്യമാ​യി​രു​ന്നില്ല. ഈ പ്രത്യേക ജൻമം സംബന്ധിച്ച്‌ അന്നു രാത്രി ദൂതൻമാ​രു​ടെ പ്രഖ്യാ​പനം കേൾക്കാ​നി​ട​യായ ആട്ടിട​യൻമാർ ശിശു​വി​നെ​ക്കാ​ണാൻ എത്തി​ച്ചേർന്നു. ഏതാണ്ടു 40 ദിവസം കഴിഞ്ഞു യോ​സേ​ഫും മറിയ​യും ന്യായ​പ്ര​മാ​ണം അനുശാ​സി​ക്കു​ന്ന​പ്ര​കാ​രം യാഗത്തി​നുള്ള വസ്‌തു സഹിതം യേശു​വി​നെ യെരു​ശ​ലേം ദേവാ​ല​യ​ത്തിൽ സമർപ്പി​ച്ചു. യേശു ചെയ്യാൻപോ​കുന്ന മഹത്തായ കാര്യങ്ങൾ സംബന്ധി​ച്ചു പ്രായം ചെന്ന ശിമ​യോ​ന്റെ പ്രാവ​ച​നിക വാക്കുകൾ കേട്ട​പ്പോൾ അവർ രണ്ടു​പേ​രും അതിശ​യി​ച്ചു.—ലൂക്കൊസ്‌ 2:1-33; താരത​മ്യം ചെയ്യുക: ലേവ്യ​പു​സ്‌തകം 12:2-4, 6-8.

യേശു​വി​നെ സമർപ്പി​ച്ചു​ക​ഴിഞ്ഞ ഉടനെ യോ​സേ​ഫും മറിയ​യും നസറെ​ത്തി​ലേക്കു പോ​യെന്നു ലൂക്കൊസ്‌ 2:39 സൂചി​പ്പി​ക്കു​ന്നു​വെന്നു തോന്നി​യേ​ക്കാ​മെ​ങ്കി​ലും ഈ വാക്യം, സംക്ഷേ​പിച്ച ഒരു വിവര​ണ​ത്തി​ന്റെ ഒരു ഭാഗമാണ്‌. ആലയത്തിൽ സമർപ്പി​ച്ച​ശേഷം ഏറെ നാളുകൾ കഴിഞ്ഞാ​ണു കിഴക്കു​നി​ന്നുള്ള ജോത്സ്യൻമാർ (വിദ്വാൻമാർ) യോ​സേ​ഫി​നെ​യും മറിയ​യെ​യും ബേത്‌ല​ഹേ​മി​ലുള്ള ഒരു വീട്ടിൽ സന്ദർശി​ച്ചത്‌ എന്നു വെളി​പ്പെ​ടു​ന്നു. ഈ സന്ദർശനം യേശു​വി​ന്റെ മരണത്തിൽ കലാശി​ക്കു​ന്ന​തിൽനി​ന്നു ദിവ്യ ഇടപെടൽ തടഞ്ഞു​നിർത്തി. ജ്യോ​ത്സ്യൻമാർ പോയ​ശേഷം യഹോ​വ​യു​ടെ ദൂതൻ യോ​സേ​ഫിന്‌ ഒരു സ്വപ്‌ന​ത്തിൽ പ്രത്യ​ക്ഷ​നാ​യി അവനോട്‌, “ഹെരോ​ദാ​വു ശിശു​വി​നെ നശിപ്പി​ക്കേ​ണ്ട​തി​ന്നു അവനെ അന്വേ​ഷി​പ്പാൻ ഭാവി​ക്കു​ന്നു” എന്നു പറഞ്ഞു. പതിവു​പോ​ലെ യോ​സേഫ്‌ ദിവ്യ മാർഗ​നിർദേശം കൈ​ക്കൊ​ള്ളു​ക​യും കുടുംബ സമേതം ഈജി​പ്‌തി​ലേക്കു പോവു​ക​യും ചെയ്‌തു.—മത്തായി 2:1-14.

ഹെരോ​ദാ​വി​ന്റെ മരണ​ശേഷം ദൂതൻ ഈജി​പ്‌തിൽവച്ചു യോ​സേ​ഫി​നു സ്വപ്‌ന​ത്തിൽ പ്രത്യ​ക്ഷ​പ്പെട്ട്‌, “ശിശു​വി​ന്നു പ്രാണ​ഹാ​നി വരുത്തു​വാൻ നോക്കി​യവർ മരിച്ചു​പോ​യ​തു​കൊ​ണ്ടു നീ എഴു​ന്നേ​ററു ശിശു​വി​നെ​യും അമ്മയെ​യും കൂട്ടി​ക്കൊ​ണ്ടു യിസ്രാ​യേൽദേ​ശ​ത്തേക്കു പോക” എന്നു പറഞ്ഞു. ഹെരോ​ദാ​വി​ന്റെ മകനായ അർക്കെ​ല​യൊസ്‌ പിതാ​വി​ന്റെ സ്ഥാനത്തു വാഴു​ന്നു​വെന്നു കേട്ടതി​നാൽ യഹൂദ്യ​യി​ലേക്കു പോകാൻ യോ​സേഫ്‌ ഭയപ്പെട്ടു. സ്വപ്‌ന​ത്തിൽ ലഭിച്ച ദിവ്യ മുന്നറി​യി​പ്പു പിൻപ​ററി അവൻ ഗലീല പ്രദേ​ശ​ങ്ങ​ളി​ലേക്കു പോയി നസറെത്ത്‌ എന്ന പട്ടണത്തിൽ ചെന്നു പാർത്തു.—മത്തായി 2:15-23.

ഒരു ആത്മീയ മനുഷ്യൻ

തന്റെ കുടും​ബം ദിവ്യ​നി​യമം അനുസ​രി​ക്കു​ക​യും ആത്മീയ​മാ​യി പോഷി​പ്പി​ക്ക​പ്പെ​ടു​ക​യും ചെയ്യു​ന്നു​വെന്നു യോ​സേഫ്‌ ഉറപ്പു​വ​രു​ത്തി. ഓരോ വർഷവും പെസഹാ ആഘോ​ഷി​ക്കാൻ തന്നോ​ടൊ​പ്പം അവൻ മുഴു കുടും​ബ​ത്തെ​യും യെരു​ശ​ലേ​മി​ലേക്കു കൊണ്ടു​പോ​കു​മാ​യി​രു​ന്നു. ഇത്തര​മൊ​രു സന്ദർഭ​ത്തിൽ യോ​സേ​ഫും മറിയ​യും നസറെ​ത്തി​ലേക്കു തിരി​ച്ചു​പോ​കു​ക​യാ​യി​രു​ന്നു. യെരു​ശ​ലേ​മിൽനിന്ന്‌ ഒരു ദിവസത്തെ ദൂരം പിന്നി​ട്ട​ശേ​ഷ​മാ​ണു 12 വയസ്സുള്ള യേശു തങ്ങളോ​ടൊ​പ്പ​മി​ല്ലെന്ന്‌ അവർ തിരി​ച്ച​റി​യു​ന്നത്‌. യെരു​ശ​ലേ​മി​ലേക്കു തിരികെ പോയി അവർ അവനെ ഊടു​പാ​ടു തിരഞ്ഞു. ഒടുവിൽ, അവൻ ഉപദേശകൻമാർ പറയു​ന്നതു ശ്രദ്ധി​ച്ചും അവരോ​ടു ചോദ്യ​ങ്ങൾ ചോദി​ച്ചും ദേവാ​ല​യ​ത്തിൽ ഇരിക്കു​ന്ന​താ​യി കണ്ടെത്തി.—ലൂക്കൊസ്‌ 2:41-50.

ചില കാര്യ​ങ്ങ​ളിൽ മുൻകൈ എടുക്കു​ന്ന​തി​നു യോ​സേഫ്‌ ഭാര്യയെ അനുവ​ദി​ച്ച​താ​യി തോന്നു​ന്നു. ദൃഷ്ടാ​ന്ത​ത്തിന്‌, അവർ യെരു​ശ​ലേ​മിൽ തിരി​ച്ചെത്തി, യേശു ദേവാ​ല​യ​ത്തിൽ ഇരിക്കു​ന്നതു കണ്ടപ്പോൾ മറിയ​യാ​ണു മകനോ​ടു അതേപ്പ​ററി സംസാ​രി​ച്ചത്‌. (ലൂക്കൊസ്‌ 2:48, 49) “തച്ചന്റെ മകൻ” എന്ന നിലയിൽ വളർന്നു​വ​രവേ യേശു​വിന്‌ ആത്മീയ പ്രബോ​ധ​ന​വും ലഭിച്ചി​രു​ന്നു. യോ​സേഫ്‌ അവനെ ആശാരി​പ്പ​ണി​യും പഠിപ്പി​ച്ചി​രു​ന്നു. അതു​കൊ​ണ്ടാണ്‌ അവനെ ‘മറിയ​യു​ടെ മകനായ . . . തച്ചൻ’ എന്നു വിളി​ച്ചി​രു​ന്നത്‌. (മത്തായി 13:55; മർക്കൊസ്‌ 6:3) ദൈവിക മാതാ​പി​താ​ക്കൾ തങ്ങളുടെ കുട്ടി​കളെ, പ്രത്യേ​കി​ച്ചും ആത്‌മീയ പരിശീ​ലനം നൽകി​ക്കൊണ്ട്‌, പ്രബോ​ധി​പ്പി​ക്കു​വാൻ അത്തരം അവസരങ്ങൾ പൂർണ​മാ​യും പ്രയോ​ജ​ന​പ്പെ​ടു​ത്തണം.—എഫെസ്യർ 6:4; 2 തിമൊ​ഥെ​യൊസ്‌ 1:5; 3:14-16.

യോ​സേ​ഫി​ന്റെ പ്രത്യാ​ശ​കൾ

യോ​സേ​ഫി​ന്റെ മരണം സംബന്ധി​ച്ചു തിരു​വെ​ഴു​ത്തു​കൾ ഒന്നും സൂചി​പ്പി​ക്കു​ന്നില്ല. എങ്കിലും മർക്കൊസ്‌ 6:3-ൽ യേശു​വി​നെ യോ​സേ​ഫി​ന്റെ മകനെന്നല്ല “മറിയ​യു​ടെ മക”നെന്നു വിളി​ക്കു​ന്നതു ശ്രദ്ധേ​യ​മാണ്‌. യോ​സേഫ്‌ അപ്പോൾ മരിച്ചു​പോ​യി​രു​ന്നു എന്ന്‌ ഇതു സൂചി​പ്പി​ക്കു​ന്നു. കൂടാതെ, യോ​സേഫ്‌ പൊ.യു. (പൊതു​യു​ഗം) 33 വരെ ജീവി​ച്ചി​രി​പ്പു​ണ്ടാ​യി​രു​ന്നെ​ങ്കിൽ ക്രൂശി​ലാ​യി​രുന്ന യേശു മറിയയെ അപ്പോ​സ്‌ത​ല​നായ യോഹ​ന്നാ​ന്റെ സംരക്ഷ​ണ​യിൽ ഏൽപ്പി​ച്ചു​കൊ​ടു​ക്കാൻ യാതൊ​രു സാധ്യ​ത​യു​മില്ല.—യോഹ​ന്നാൻ 19:26, 27.

മനുഷ്യ​പു​ത്ര​ന്റെ ശബ്ദം കേട്ട്‌ പുനരു​ത്ഥാ​ന​ത്തി​ലേക്കു വരുന്ന​വ​രിൽ യോ​സേ​ഫും ഉൾപ്പെ​ടും. (യോഹ​ന്നാൻ 5:28, 29) നിത്യ​ജീ​വ​നു​വേ​ണ്ടി​യുള്ള യഹോ​വ​യു​ടെ കരുത​ലു​ക​ളെ​ക്കു​റി​ച്ചു മനസ്സി​ലാ​ക്കി​ക്കൊ​ണ്ടു യോ​സേഫ്‌ നിസ്സം​ശ​യ​മാ​യും ആ കരുത​ലു​കൾ പൂർണ​മാ​യി പ്രയോ​ജ​ന​പ്പെ​ടു​ത്തും. 1,900 വർഷം മുമ്പു ദിവ്യ മാർഗ​നിർദേശം സ്വീക​രി​ച്ച​തു​പോ​ലെ അവൻ വലിയ സ്വർഗീയ രാജാ​വായ യേശു​ക്രി​സ്‌തു​വി​ന്റെ അനുസ​ര​ണ​മുള്ള പ്രജക​ളിൽ ഒരുവ​നാ​യി​രി​ക്കു​ക​യും ചെയ്യും.

[31-ാം പേജിലെ ചിത്രം]

യോസേഫ്‌ യേശു​വിന്‌ ആത്മീയ മാർഗ​നിർദേശം പ്രദാനം ചെയ്യു​ക​യും അവനെ ആശാരി​പ്പണി പഠിപ്പി​ക്കു​ക​യും ചെയ്‌തു