അവയുടെ സുഗമ​മായ പറക്കലിന്‌ ആവശ്യ​മാ​യി​രി​ക്കു​ന്നത്‌ എന്ത്‌?

“മാന്യ യാത്ര​ക്കാ​രേ, ന്യൂ​യോർക്ക്‌ നഗരത്തി​ലെ ജോൺ എഫ്‌. കെന്നഡി അന്താരാ​ഷ്‌ട്ര വിമാ​ന​ത്താ​വ​ള​ത്തി​ലേക്കു സ്വാഗതം.” ഹൃദ്യ​മായ ഈ സ്വാഗ​താ​ശം​സയെ തുടർന്ന്‌ യാത്ര​ക്കാർ വെളി​യിൽ ഇറങ്ങി​ക്ക​ഴി​യു​മ്പോൾ വിമാ​ന​ത്തി​ന്റെ അകത്തും പുറത്തും തിരക്കിട്ട പ്രവർത്ത​നങ്ങൾ ആരംഭി​ക്കു​ക​യാ​യി. ഈ ഘട്ടത്തിൽ വിമാ​ന​ത്തിന്‌ എന്തെല്ലാ​മാ​ണു സംഭവി​ക്കു​ന്നത്‌ എന്നു നിങ്ങൾ എപ്പോ​ഴെ​ങ്കി​ലും ചിന്തി​ച്ചി​ട്ടു​ണ്ടോ?

യാത്ര​ക്കാ​രെ​യും​കൊണ്ട്‌ പോയാൽ അല്ലെങ്കിൽ ചരക്കുകൾ കയറ്റി​ക്കൊണ്ട്‌ പോയാൽ മാത്രമേ വാണിജ്യ വിമാ​ന​ങ്ങൾക്കു പണം ഉണ്ടാക്കാൻ സാധിക്കൂ. അതു​കൊണ്ട്‌ തങ്ങളുടെ വിമാ​നങ്ങൾ പരമാ​വധി ഉപയോ​ഗ​പ്പെ​ടു​ത്തുക എന്നതാണു വിമാ​ന​ക്ക​മ്പ​നി​ക​ളു​ടെ ലക്ഷ്യം. യാത്ര​ക്കാർ തങ്ങളുടെ ലഗേജി​നു വേണ്ടി കാത്തു​നിൽക്കവെ അടുത്ത യാത്ര​യ്‌ക്കാ​യി വിമാനം ത്വരി​ത​ഗ​തി​യിൽ സജ്ജീക​രി​ക്ക​പ്പെ​ടു​ക​യാ​യി​രി​ക്കും. കഴിഞ്ഞ യാത്ര​യി​ലെ ജീവന​ക്കാർ യന്ത്രസം​ബ​ന്ധ​മായ എന്തെങ്കി​ലും പ്രശ്‌നങ്ങൾ രേഖ​പ്പെ​ടു​ത്തി​വെ​ച്ചി​ട്ടു​ണ്ടോ എന്ന്‌ അറിയു​ന്ന​തി​നാ​യി മെക്കാ​നി​ക്കു​കൾ സഞ്ചാര​വി​വ​ര​ക്കു​റി​പ്പു പുസ്‌ത​ക​ത്തി​ലൂ​ടെ കണ്ണോ​ടി​ക്കു​ന്നു. വിമാ​ന​ത്തി​ന്റെ സുരക്ഷി​ത​ത്വ​ത്തെ ബാധി​ക്കുന്ന ഏതൊരു പ്രശ്‌ന​വും അവർ പരിഹ​രി​ക്കും.

വിമാ​ന​ത്തി​ന്റെ ചക്രങ്ങ​ളും ടയറു​ക​ളും ബ്രേക്കു​ക​ളും എഞ്ചിൻ ഓയി​ലി​ന്റെ നിരപ്പും എല്ലാം ചുമത​ല​പ്പെ​ട്ടവർ പരി​ശോ​ധി​ക്കും. ശുചീ​കരണ ജോലി​ക്കാർ യാത്ര​ക്കാർ ഇരിക്കു​ന്നി​ടം വൃത്തി​യാ​ക്കു​ന്നു. അടുക്ക​ള​യിൽ, ആവശ്യ​മായ ഭക്ഷണവും പാനീ​യ​ങ്ങ​ളും വീണ്ടും ശേഖരി​ച്ചു വെക്കുന്നു. ചിറകു​ക​ളി​ലുള്ള ടാങ്കു​ക​ളി​ലേക്ക്‌ ഇന്ധനം പമ്പു​ചെ​യ്യു​ന്നു. വിമാനം വീണ്ടും പുറ​പ്പെ​ടു​ന്ന​തി​നു മുമ്പ്‌ ഫ്‌​ളൈറ്റ്‌ ജീവന​ക്കാർ സുരക്ഷയെ പ്രതി​കൂ​ല​മാ​യി ബാധി​ച്ചേ​ക്കാ​വുന്ന തകരാ​റു​കൾ എന്തെങ്കി​ലു​മു​ണ്ടോ എന്നു വിമാ​ന​ത്തി​നു ചുറ്റും നടന്ന്‌ പരി​ശോ​ധി​ക്കു​ന്നു.

ദിവസ​വും ആയിര​ക്ക​ണ​ക്കി​നു വിമാ​ന​ങ്ങ​ളിൽ, യാത്ര​യ്‌ക്കു മുമ്പ്‌ പെട്ടെ​ന്നുള്ള ഇത്തരം പരി​ശോ​ധ​ന​ക​ളും തത്‌ക്ഷണ അറ്റകു​റ്റ​പ്പ​ണി​ക​ളും നടത്തു​ന്നുണ്ട്‌. എന്നാൽ ഇത്‌, ഒരു വലിയ യാത്രാ​വി​മാ​നം സുരക്ഷി​ത​മാ​യി പറക്കു​ന്ന​തിന്‌ ആവശ്യ​മായ സംഗതി​ക​ളു​ടെ ചെറിയ ഒരംശം മാത്രമേ ആകുന്നു​ള്ളൂ. മോ​ട്ടോർ വാഹന​ങ്ങൾക്ക്‌ ഇടയ്‌ക്കി​ടെ സർവീ​സിങ്‌ ആവശ്യ​മാ​യി​രി​ക്കു​ന്ന​തു​പോ​ലെ വിമാ​ന​ങ്ങൾക്കു ക്രമമായ അടിസ്ഥാ​ന​ത്തിൽ വിപു​ല​മായ തോതി​ലുള്ള ചെല​വേ​റിയ പരി​ശോ​ധ​നകൾ—പരി​ശോ​ധ​ന​ക​ളു​ടെ ഒരു പരമ്പര തന്നെ—ആവശ്യ​മാണ്‌. വിമാ​ന​ത്തി​ന്റെ ഈ സർവീ​സിങ്‌ ചെയ്യു​ന്നത്‌ ആരാണ്‌? ഈ ജോലി എങ്ങനെ​യാ​ണു നിർവ​ഹി​ക്ക​പ്പെ​ടു​ന്നത്‌?

വിമാ​നങ്ങൾ സഞ്ചാര​യോ​ഗ്യ​മാ​യി നിലനി​റു​ത്ത​പ്പെ​ടുന്ന വിധം

യു.എസ്‌. എയർ ട്രാൻസ്‌പോർട്ട്‌ അസ്സോ​സി​യേഷൻ പറയു​ന്ന​ത​നു​സ​രിച്ച്‌, അതിന്റെ അംഗങ്ങ​ളായ വിമാ​ന​ക്ക​മ്പ​നി​കൾ ആണ്‌ ഐക്യ​നാ​ടു​ക​ളി​ലെ വ്യോ​മ​ഗ​താ​ഗ​ത​ത്തി​ന്റെ—യാത്രാ വിമാ​ന​ങ്ങ​ളു​ടെ​യും ചരക്കു വിമാ​ന​ങ്ങ​ളു​ടെ​യും രൂപത്തിൽ—95 ശതമാ​ന​ത്തി​ല​ധി​ക​വും നിർവ​ഹി​ക്കു​ന്നത്‌. 1997-ൽ ആ വിമാ​ന​ക്ക​മ്പ​നി​കൾക്ക്‌ ഏതാണ്ട്‌ 65,500 മെക്കാ​നി​ക്കു​കൾ ഉണ്ടായി​രു​ന്നു. എഞ്ചിനീ​യർമാർക്കും മറ്റു മെയി​ന്റ​നൻസ്‌ ജീവന​ക്കാർക്കും ഒപ്പം വിമാന മെക്കാ​നി​ക്കി​ന്റെ ദൗത്യം വിമാ​നത്തെ സഞ്ചാര​യോ​ഗ്യ​മാ​ക്കി നിലനി​റു​ത്തു​ക​യും യാത്ര​ക്കാർക്കു സുഖ​പ്ര​ദ​മായ യാത്ര ഉറപ്പു​വ​രു​ത്തു​ക​യു​മാണ്‌. അതിനാ​യി അവർ വിമാ​ന​ത്തി​ന്റെ ഒട്ടനവധി പ്രത്യേക ഭാഗങ്ങൾ—യന്ത്രത്തി​ന​കത്തെ യന്ത്രങ്ങൾa—പരി​ശോ​ധിച്ച്‌ ആവശ്യ​മായ നടപടി​കൾ സ്വീക​രി​ക്കു​ന്നു. നിർദിഷ്ട പട്ടിക പ്രകാരം നടത്തുന്ന അത്തരം അറ്റകു​റ്റ​പ്പ​ണി​ക​ളിൽ നാലു ടണ്ണില​ധി​കം വരുന്ന ജെറ്റ്‌ എഞ്ചിനു​കൾ പരി​ശോ​ധിച്ച്‌ കേടു​പോ​ക്കു​ന്നതു മുതൽ ക്യാബി​നി​ലെ കാർപ്പ​റ്റു​കൾ മാറ്റി​യി​ടു​ന്ന​തു​വരെ ഉൾപ്പെ​ടു​ന്നു.

യന്ത്രസം​ബ​ന്ധ​മാ​യ പ്രശ്‌ന​ങ്ങൾക്കെ​ല്ലാം​തന്നെ തത്‌ക്ഷണ ശ്രദ്ധ ലഭിക്കും. എന്നാൽ, മറ്റുചില അറ്റകു​റ്റ​പ്പ​ണി​കൾ നിർവ​ഹി​ക്ക​പ്പെ​ടു​ന്നത്‌ യാത്രാപരിവൃത്തികളുടെയോb വിമാനം ഉപയോ​ഗി​ക്ക​പ്പെട്ട മാസങ്ങ​ളു​ടെ​യോ എണ്ണവും പറന്ന മണിക്കൂ​റു​ക​ളു​ടെ എണ്ണവും അടിസ്ഥാ​ന​മാ​ക്കി​യാണ്‌, അല്ലാതെ സഞ്ചരിച്ച മൊത്തം ദൂരം കണക്കാ​ക്കി​യല്ല. ആദ്യം​തന്നെ വിമാന നിർമാ​താവ്‌ വിമാ​ന​ക്ക​മ്പ​നിക്ക്‌ അറ്റകു​റ്റ​പ്പ​ണി​കൾക്കു വേണ്ട നിർദേ​ശങ്ങൾ നൽകുന്നു. ഈ നിർദേ​ശങ്ങൾ നടപ്പാ​ക്കാൻ ഗവൺമെ​ന്റി​ന്റെ ഏവി​യേഷൻ അധികൃ​ത​രു​ടെ അനുമതി ലഭിക്കണം. ഓരോ വിമാ​ന​ത്തി​നും അറ്റകു​റ്റ​പ്പ​ണി​കൾ സംബന്ധിച്ച്‌ പ്രത്യേക ആവശ്യ​ങ്ങൾക്ക്‌ അനു​യോ​ജ്യ​മായ തരത്തി​ലുള്ള പരിപാ​ടി​കൾ ഉണ്ട്‌. അതായത്‌, ലഘുവായ തോതി​ലു​ള്ള​തോ വളരെ വിപു​ല​മായ തോതി​ലു​ള്ള​തോ അല്ലെങ്കിൽ രണ്ടിനും ഇടയ്‌ക്കു വരുന്ന​തോ ആയ തരത്തി​ലുള്ള പരി​ശോ​ധ​നകൾ ഉണ്ട്‌. ഈ പരിപാ​ടി​കൾ എ, ബി, സി, ഡി, എൽ, ക്യു എന്നീ അക്ഷരങ്ങ​ളാൽ സൂചി​പ്പി​ക്ക​പ്പെ​ടു​ന്നു.

ഒരു 747-200 വിമാനം ഏതാണ്ട്‌ എട്ടു വർഷം കൊണ്ടാണ്‌ 36,000-ത്തോളം മണിക്കൂർ പറന്നത്‌. അതിനു​ശേഷം അത്‌ ഡി ചെക്ക്‌ എന്നും ചില​പ്പോൾ അറിയ​പ്പെ​ടുന്ന വിപു​ല​മായ പരി​ശോ​ധ​ന​യ്‌ക്കാ​യി വിമാ​ന​ശാ​ല​യിൽ എത്തി. വളരെ​യ​ധി​കം സമയം ആവശ്യ​മായ ഈ സങ്കീർണ പരി​ശോ​ധ​നയെ കുറിച്ച്‌ ഏവി​യേഷൻ നിയ​ന്ത്രണം സംബന്ധിച്ച ഒരു മാസി​ക​യായ നവീക​രി​ക്ക​ലും കേടു​പോ​ക്ക​ലും (ഇംഗ്ലീഷ്‌) ഇങ്ങനെ പറഞ്ഞു: “മുഴു വിമാ​ന​ത്തെ​യും പരമാ​വധി പൂർവ​സ്ഥി​തി​യി​ലേക്കു കൊണ്ടു​വ​രിക എന്നതാണ്‌ അതിന്റെ ഉദ്ദേശ്യം. . . . ഒരു ഡി ചെക്കിന്‌ 15,000 മുതൽ 35,000 വരെ മണിക്കൂർ നേരത്തെ അധ്വാനം ആവശ്യ​മാണ്‌. ഈ പരി​ശോ​ധ​ന​യ്‌ക്ക്‌ 15 മുതൽ 30 വരെ അല്ലെങ്കിൽ അതിലും കൂടുതൽ ദിവസം വേണ്ടി​വ​രും. ഇതിന്‌ മൊത്തം 4 കോടി രൂപ മുതൽ 8 കോടി രൂപ വരെ ശരാശരി ചെലവു വരും.” “ഒരു സാധാരണ ഡി ചെക്കിന്‌ ആവശ്യ​മായ തുകയു​ടെ 70 ശതമാനം ജോലി​ക്കാർക്കും 30 ശതമാനം സാധന​ങ്ങൾക്കും വേണ്ടി​യാ​ണു ചെലവാ​കു​ന്നത്‌” എന്ന്‌ ഒരു എയ്‌റോ​സ്‌പേസ്‌ മാനേ​ജ്‌മെന്റ്‌ കൺസൽട്ടിങ്‌ സ്ഥാപന​മായ ദ കാനൻ ഗ്രൂപ്പി​ലെ ഹാൽ ക്രിസ്‌മൻ പറഞ്ഞു. ചെലവ​ഴി​ക്ക​പ്പെ​ടുന്ന ആ പണത്തിന്റെ ഒരു ഭാഗം നിങ്ങളു​ടെ ഫ്‌​ളൈറ്റ്‌ ടിക്കറ്റിൽനിന്ന്‌ ഈടാ​ക്കു​ന്നുണ്ട്‌.

ഒരു ഡി ചെക്കിൽ ഉൾപ്പെ​ട്ടി​രി​ക്കു​ന്നത്‌

വിമാ​ന​ശാ​ല​യി​ലേക്കു—വിമാനം സർവീസ്‌ ചെയ്യുന്ന ഇടങ്ങളും സർവീ​സി​ങ്ങിന്‌ ആവശ്യ​മായ സാധന​ങ്ങ​ളും സേവന​ങ്ങ​ളും പ്രദാനം ചെയ്യുന്ന ഡിപ്പാർട്ടു​മെ​ന്റു​ക​ളും സ്റ്റോർമു​റി​ക​ളും ഒക്കെയുള്ള ഒരു കൂറ്റൻ കെട്ടി​ട​ത്തി​ലേക്കു—വിമാനം കൊണ്ടു​വന്നു കഴിഞ്ഞാൽ മെയി​ന്റ​നൻസ്‌ സംഘം തങ്ങളുടെ പണി ആരംഭി​ക്കു​ക​യാ​യി. വിമാ​ന​ത്തി​ന്റെ കയ്യെത്താത്ത ഭാഗങ്ങ​ളി​ലുള്ള പണികൾക്കാ​യി പ്ലാറ്റ്‌ഫോ​മു​ക​ളും കയറി​നി​ന്നു പണിയാ​നുള്ള തട്ടുക​ളും പണിയു​പ​ക​ര​ണങ്ങൾ വെക്കു​ന്ന​തി​നുള്ള മേശക​ളും കൊണ്ടു​വ​രു​ന്നു. സൂക്ഷ്‌മ പരി​ശോ​ധന സാധ്യ​മാ​ക്കു​ന്ന​തിന്‌ വിമാ​ന​ത്തി​ലെ ഇരിപ്പി​ട​ങ്ങ​ളും തറയും ചുവരും സീലി​ങ്ങും അടുക്ക​ള​യും കക്കൂസു​മെ​ല്ലാം അഴിച്ചു മാറ്റുന്നു. ഫലത്തിൽ വിമാ​ന​ത്തി​ന്റെ എല്ലാ ഭാഗങ്ങ​ളും വേർപെ​ടു​ത്തി​യെ​ടു​ക്കു​ന്നു. വിമാ​ന​ത്തി​ന്റെ ലോഹ​നിർമിത ഭാഗങ്ങൾ തുരു​മ്പി​ക്കു​ക​യോ അവയിൽ വിള്ളലു​കൾ ഉണ്ടാകു​ക​യോ ചെയ്‌തി​ട്ടു​ണ്ടോ​യെന്ന്‌ പരി​ശോ​ധി​ക്കാൻ പടിപ​ടി​യാ​യി നൽക​പ്പെ​ട്ടി​രി​ക്കുന്ന നിർദേ​ശങ്ങൾ ജോലി​ക്കാർ പിൻപ​റ്റു​ന്നു. വിമാ​ന​ത്തി​ന്റെ ലാൻഡിങ്‌ ഗിയറും ഹൈ​ഡ്രോ​ളിക്‌ സംവി​ധാ​ന​ങ്ങ​ളും എഞ്ചിനു​ക​ളും മുഴു​വ​നാ​യി മാറ്റി​വെ​ക്കേ​ണ്ടി​വ​ന്നേ​ക്കാം. ഡി ചെക്കി​നാ​യി എഞ്ചിനീ​യർമാ​രെ​യും സാങ്കേ​തിക രേഖക​ളും നടപടി​ക്ര​മ​ങ്ങ​ളും എഴുതി​യു​ണ്ടാ​ക്കു​ന്ന​വ​രെ​യും ഗുണനി​ല​വാര നിയന്ത്രണ പരി​ശോ​ധ​ക​രെ​യും ഏവി​യോ​ണി​ക്‌സ്‌ വിദഗ്‌ധരെയുംc ലോഹ​ത്ത​കി​ടു​പ​ണി​ക്കാ​രെ​യും എയർ​ഫ്രെ​യിം, പവർ-പ്ലാന്റ്‌ എന്നിവ​യു​മാ​യി ബന്ധപ്പെട്ട മെക്കാനിക്കുകളെയുംd ആവശ്യ​മാണ്‌. ഇവരിൽ മിക്കവ​രും ഗവൺമെന്റ്‌ ലൈസൻസ്‌ ഉള്ളവരാണ്‌. ക്യാബി​നി​ലെ ഉപകര​ണ​ങ്ങ​ളു​ടെ മെക്കാ​നി​ക്കു​ക​ളെ​യും പെയി​ന്റർമാ​രെ​യും ശുചീ​കരണ ജോലി​ക്കാ​രെ​യും കൂടെ കൂട്ടി​യാൽ ഒരു ദിവസത്തെ മൊത്തം മെയി​ന്റ​നൻസ്‌ ജോലി​ക്കാ​രു​ടെ എണ്ണം 100-ലധികം വരും. അനിവാ​ര്യ​മായ സജ്ജീക​ര​ണ​ങ്ങ​ളും ഭാഗങ്ങ​ളും സാങ്കേ​തിക നിർദേ​ശ​ങ്ങ​ളും പ്രദാനം ചെയ്യുന്ന മറ്റ്‌ കുറേ പേരു​മുണ്ട്‌.

വിമാനം പറക്കു​മ്പോൾ ഉണ്ടാകുന്ന കമ്പനങ്ങ​ളു​ടെ​യും അതിന്റെ ഉടൽഭാ​ഗത്ത്‌ ഉണ്ടാകുന്ന മർദ വ്യതി​യാ​ന​ങ്ങ​ളു​ടെ​യും ആയിര​ക്ക​ണ​ക്കി​നു തവണ പറന്നു​യ​രു​ക​യും പറന്നി​റ​ങ്ങു​ക​യും ചെയ്യു​മ്പോ​ഴു​ണ്ടാ​കുന്ന കുലു​ക്ക​ത്തി​ന്റെ​യും ഫലമായി കുറേ കാലം കഴിയു​മ്പോൾ അതിന്റെ ലോഹ​നിർമിത ഭാഗങ്ങ​ളിൽ വിള്ളലു​കൾ ഉണ്ടാകു​ന്നു. ഈ പ്രശ്‌നം കൈകാ​ര്യം ചെയ്യാൻ വൈദ്യ​ശാ​സ്‌ത്ര രോഗ​നിർണയ രീതി​യു​ടെ അതേ തത്ത്വങ്ങ​ളാണ്‌ ഏവി​യേഷൻ ഉപയോ​ഗി​ക്കു​ന്നത്‌. ഇരു മേഖല​ക​ളി​ലും, റേഡി​യോ​ളജി, അൾട്രാ​സോ​ണി​ക്‌സ്‌, എൻഡോ​സ്‌കോ​പ്പി എന്നിവ ഉപയോ​ഗി​ച്ചാണ്‌ മനുഷ്യ നേത്ര​ങ്ങൾക്കു ഗോച​ര​മ​ല്ലാത്ത പ്രശ്‌നങ്ങൾ കണ്ടുപി​ടി​ക്കു​ന്നത്‌.

ഒരു രോഗി സാധാ​ര​ണ​രീ​തി​യി​ലുള്ള ഒരു എക്‌സ്‌റേ പരി​ശോ​ധ​ന​യ്‌ക്കു വിധേ​യ​മാ​കു​മ്പോൾ ഫിലിം ഷീറ്റി​നും എക്‌സ്‌റേ കിരണ​ങ്ങൾക്കും ഇടയ്‌ക്കാ​യി അയാളെ കിടത്തു​ന്നു. ലാൻഡിങ്‌ ഗിയറി​ന്റെ​യും ചിറകു​ക​ളു​ടെ​യും എഞ്ചിനു​ക​ളു​ടെ​യും എക്‌സ്‌റേ എടുക്കാൻ മെയി​ന്റ​നൻസ്‌ പരി​ശോ​ധകർ സമാന​മായ രീതി​യാണ്‌ ഉപയോ​ഗി​ക്കു​ന്നത്‌. ഉദാഹ​ര​ണ​ത്തിന്‌, എഞ്ചിനു പുറത്താ​യി അനു​യോ​ജ്യ​മായ ഭാഗത്ത്‌ ഒരു എക്‌സ്‌റേ ഫിലിം ഷീറ്റ്‌ വെക്കും. അടുത്ത​താ​യി, എഞ്ചിനിൽ വിലങ്ങനെ സ്ഥാപി​ച്ചി​രി​ക്കുന്ന പൊള്ള​യായ ഷാഫ്‌റ്റി​ന​കത്ത്‌ ഒരു നീണ്ട ലോഹ കുഴൽ വെക്കുന്നു. അവസാ​ന​മാ​യി, എക്‌സ്‌റേ ഫിലി​മി​നെ അനാവൃ​ത​മാ​ക്കാ​നാ​യി (expose), എഴുത്തു മായ്‌ക്കുന്ന റബറിന്റെ വലിപ്പ​മുള്ള, റേഡി​യോ ആക്‌ടീ​വ​ത​യുള്ള ഇറിഡി​യം 192—ഇത്‌ ശക്തി​യേ​റിയ ഒരു ഐസ​ടോ​പ്പാണ്‌—ഗുളിക ആ കുഴലി​നു​ള്ളി​ലേക്കു കടത്തി​വെ​ക്കു​ന്നു. ഡെവലപ്പ്‌ ചെയ്‌ത ഫിലി​മിൽനിന്ന്‌ എഞ്ചിനി​ലുള്ള വിള്ളലു​ക​ളും മറ്റു പ്രശ്‌ന​ങ്ങ​ളും കണ്ടുപി​ടി​ക്കാൻ കഴിയും. അതിൻപ്ര​കാ​രം എഞ്ചിന്റെ കേടു​പോ​ക്കു​ന്നു, അല്ലെങ്കിൽ പഴയതു മാറ്റി പുതി​യതു സ്ഥാപി​ക്കു​ന്നു.

ഡി ചെക്കിന്റെ സമയത്ത്‌ വിമാ​ന​ത്തി​ലെ ഇന്ധനത്തി​ന്റെ​യും ഹൈ​ഡ്രോ​ളിക്‌ ദ്രാവ​ക​ങ്ങ​ളു​ടെ​യും സാമ്പി​ളു​കൾ ലബോ​റ​ട്ടറി പരി​ശോ​ധ​ന​യ്‌ക്കാ​യി അയയ്‌ക്കു​ന്നു. ഇന്ധനത്തി​ന്റെ സാമ്പി​ളിൽ സൂക്ഷ്‌മാ​ണു​ക്കളെ കണ്ടെത്തു​ക​യാ​ണെ​ങ്കിൽ ആന്റിബ​യോ​ട്ടി​ക്‌സ്‌ കുറി​ച്ചു​കൊ​ടു​ക്കും. വിമാ​ന​ത്തി​ന്റെ ഇന്ധന ടാങ്കി​ലുള്ള കീടങ്ങളെ—വായു​വി​ലൂ​ടെ​യും വെള്ളത്തി​ലൂ​ടെ​യും ഇന്ധനത്തി​ലൂ​ടെ​യും ഇന്ധന ടാങ്കി​ന​കത്തു കടന്നു​കൂ​ടുന്ന ഫംഗസി​നെ​യും ബാക്‌ടീ​രി​യ​യെ​യും—നശിപ്പി​ക്കാൻ ഒരു തരം ആന്റിബ​യോ​ട്ടി​ക്കായ ജൈവ​നാ​ശി​നി ഉപയോ​ഗി​ക്കു​ന്നു. ഈ പ്രക്രിയ പ്രാധാ​ന്യ​മേ​റിയ ഒന്നാണ്‌. കാരണം, സൂക്ഷ്‌മാ​ണു​ക്കൾ വളരു​ന്നതു മൂലം ഉണ്ടാകുന്ന ഉപോ​ത്‌പ​ന്നങ്ങൾ ടാങ്കു​ക​ളു​ടെ പ്രതല​ത്തി​ലെ സംരക്ഷക ആവരണങ്ങൾ ദ്രവി​ക്കു​ന്ന​തിന്‌ ഇടയാ​ക്കും. ടാങ്കു​ക​ളി​ലെ പ്രോ​ബു​ക​ളെ​യും ഇതു ബാധി​ക്കും. അങ്ങനെ​യാ​കു​മ്പോൾ ഇന്ധനമാ​പി​നി വൈമാ​നി​കർക്കു തെറ്റായ അളവാ​യി​രി​ക്കും കാട്ടി​ക്കൊ​ടു​ക്കുക.

തേയ്‌മാ​ന​ങ്ങ​ളും കമ്പനങ്ങ​ളും ഉണ്ടാകു​ന്ന​തി​ന്റെ​യും ടാങ്കിന്റെ ഉൾഭാ​ഗത്തെ സീൽ ദ്രവി​ക്കു​ന്ന​തി​ന്റെ​യും ഫലമായി ഇന്ധന ടാങ്കു​കൾക്കു ചോർച്ച സംഭവി​ച്ചേ​ക്കാം. അവിടെ നിൽക്കുന്ന ഡി-ചെക്ക്‌ ജോലി​ക്കാ​രിൽ ഒരാ​ളോട്‌ ഒരു സൂപ്പർ​വൈസർ ചോദി​ക്കു​ന്നു, “ആർക്കെ​ങ്കി​ലും ഒരു ‘ഡൈവർ’ ആകണ​മെ​ന്നു​ണ്ടോ?” ദുഷ്‌ക​ര​മെ​ങ്കി​ലും അനിവാ​ര്യ​മായ ആ ജോലി ചെയ്യാ​നുള്ള കുറി വീണത്‌ ഇന്ന്‌ ജോണി​നാണ്‌. ഫ്‌ളി​പ്പ​റു​കൾ—മുൻഭാ​ഗം തുഴ​പോ​ലെ പരന്ന റബർ ഷൂസ്‌—ഇല്ലാത്ത ഒരു സ്‌കൂബാ ഡൈവ​റു​ടെ അഥവാ ഒരു മുങ്ങൽവി​ദ​ഗ്‌ധ​ന്റേ​തു​പോ​ലെ​യാണ്‌ അദ്ദേഹ​ത്തി​ന്റെ വേഷം. പരുത്തി​കൊ​ണ്ടുള്ള പ്രത്യേക വസ്‌ത്ര​ങ്ങ​ളാണ്‌ അദ്ദേഹം ധരിച്ചി​രി​ക്കു​ന്നത്‌. ശുദ്ധവാ​യു​വി​ന്റെ ശേഖര​വു​മാ​യി ബന്ധിപ്പി​ച്ചി​ട്ടുള്ള ഒരു ശ്വസ​നോ​പ​ക​രണം അദ്ദേഹം ശരീര​ത്തിൽ ഘടിപ്പി​ച്ചി​രി​ക്കു​ന്നു. ഒരു സുരക്ഷാ ലൈറ്റും ചില ഉപകര​ണ​ങ്ങ​ളും ചോർച്ച അടയ്‌ക്കാ​നുള്ള വസ്‌തു​ക്ക​ളും അദ്ദേഹം കൈയിൽ കരുതി​യി​ട്ടുണ്ട്‌. വിമാ​ന​ത്തി​ന്റെ ചിറകി​ന​ടി​യി​ലുള്ള ഒരു ചെറിയ പ്രവേശന ദ്വാര​ത്തി​ലൂ​ടെ അദ്ദേഹം വിമാ​ന​ച്ചി​റ​കി​ലെ ഇന്ധനം നീക്കം ചെയ്‌ത ടാങ്കി​ലേക്ക്‌ ഒരുത​ര​ത്തിൽ കടന്നു​കൂ​ടു​ന്നു, ടാങ്കിൽ ചോർച്ച​യുള്ള ഭാഗം കണ്ടുപി​ടിച്ച്‌ അത്‌ അടയ്‌ക്കു​ന്നു.

ഒരു 747 വിമാ​ന​ത്തി​ന്റെ ചിറകു​ക​ളി​ലാ​യി സ്ഥിതി ചെയ്യുന്ന ഇന്ധന ടാങ്കുകൾ ചെറിയ പ്രവേശന ദ്വാര​ങ്ങ​ളാൽ പരസ്‌പരം ബന്ധിക്ക​പ്പെ​ട്ടി​രി​ക്കുന്ന വിവിധ അറകളു​ടെ ഒരു സമാഹാ​ര​മാണ്‌. ഇന്ധന ടാങ്കു​ക​ളി​ലേക്കു കടക്കുന്ന ഈ പണി ക്ലോസ്‌​ട്രോ​ഫോ​ബിയ അഥവാ ഏകാന്ത സ്ഥലങ്ങളെ ഭയപ്പെ​ടു​ന്ന​വർക്കു പറ്റിയതല്ല. ഒരു 747-400 വിമാ​ന​ത്തി​ന്റെ ഇന്ധന ടാങ്കു​ക​ളിൽ മൊത്തം 2,10,000 ലിറ്ററി​ലേറെ ഇന്ധനം കൊള്ളും. ഇത്രയും ഇന്ധനം സംഭരി​ക്കാ​നുള്ള അതിന്റെ ശേഷി​യാണ്‌ വളരെ ദൂരം—ഉദാഹ​ര​ണ​ത്തിന്‌, യു.എസ്‌.എ.-യിലെ കാലി​ഫോർണി​യ​യി​ലുള്ള സാൻ ഫ്രാൻസി​സ്‌കോ​യിൽനിന്ന്‌ ഓസ്‌​ട്രേ​ലി​യ​യി​ലെ സിഡ്‌നി വരെ 12,000 കിലോ​മീ​റ്റർ—നിറു​ത്താ​തെ പറക്കാൻ അതിനെ പര്യാ​പ്‌ത​മാ​ക്കു​ന്നത്‌.

ഒരു മൂന്നു​നില കെട്ടി​ട​ത്തി​ന്റെ അത്രയും ഉയരത്തി​ലാ​യി ഫ്‌​ളൈറ്റ്‌ ഡെക്കിൽ ഒരു ഏവി​യോ​ണി​ക്‌സ്‌ വിദഗ്‌ധൻ, ടിവി പോലെ തോന്നി​ക്കുന്ന, കാലാ​വസ്ഥാ സൂചക റഡാർ സംവി​ധാ​ന​ത്തി​ന്റെ ടെസ്റ്റ്‌-പാറ്റേൺ പരി​ശോ​ധി​ക്കു​ന്നു. 500 കിലോ​മീ​റ്റർ പോലും അകലെ​യുള്ള ഇടിമി​ന്ന​ലും വിക്ഷു​ബ്ധ​ച്ചു​ഴി​ക​ളും കണ്ടെത്തു​ന്ന​തി​നും അവ ഒഴിവാ​ക്കി യാത്ര ചെയ്യു​ന്ന​തി​നും ഈ ഉപകരണം വൈമാ​നി​കരെ സഹായി​ക്കു​ന്നു. റഡാർ സ്‌ക്രീ​നിൽ വിക്ഷു​ബ്ധ​ച്ചു​ഴി കാണു​മ്പോ​ഴാ​യി​രി​ക്കാം വൈമാ​നി​കൻ “സീറ്റ്‌ ബെൽറ്റ്‌ ധരിക്കു”ന്നതിനുള്ള നിർദേശം നൽകു​ന്നത്‌. എന്നാൽ പരിക്കു​കൾ ഒഴിവാ​ക്കു​ന്ന​തിന്‌, വൈമാ​നി​കൻ “സീറ്റ്‌ ബെൽറ്റ്‌ ധരിക്കാ​നുള്ള” നിർദേശം നൽകു​മ്പോൾ മാത്രമല്ല, ഇരിപ്പി​ട​ത്തി​ലാ​യി​രി​ക്കു​മ്പോൾ ഒക്കെയും യാത്ര​യി​ലു​ട​നീ​ളം അതു ധരിക്കാൻ പല വിമാ​ന​ക്ക​മ്പ​നി​ക​ളും യാത്ര​ക്കാ​രോട്‌ അഭ്യർഥി​ക്കു​ന്നു. വൈമാ​നി​കർ നിർദേശം നൽകു​ന്ന​തി​നു മുമ്പു​തന്നെ വിമാനം റഡാർ സ്‌ക്രീ​നു​ക​ളിൽ ദൃശ്യ​മ​ല്ലാത്ത തരത്തി​ലുള്ള വിക്ഷു​ബ്ധ​ച്ചു​ഴി​ക​ളിൽ അകപ്പെ​ട്ടു​പോ​കാ​റുണ്ട്‌.

ഡി ചെക്കിന്റെ സമയത്ത്‌ എമർജൻസി ലൈറ്റു​ക​ളും ലൈഫ്‌ ജാക്കറ്റു​ക​ളും പോലുള്ള സുരക്ഷാ സജ്ജീക​ര​ണങ്ങൾ പരി​ശോ​ധി​ക്കു​ന്നു, ആവശ്യ​മെ​ങ്കിൽ പഴയവ മാറ്റി പുതിയവ വെക്കുന്നു. അടിയ​ന്തിര ഘട്ടങ്ങളിൽ യാത്ര​ക്കാർക്ക്‌ ഉപയോ​ഗി​ക്കു​ന്ന​തി​നുള്ള ഓക്‌സി​ജൻ സംവി​ധാ​ന​ത്തി​ന്റെ പരി​ശോ​ധന നടക്കുന്ന സമയത്ത്‌ ഓക്‌സി​ജൻ മാസ്‌കു​കൾ തൂങ്ങി​ക്കി​ട​ക്കു​ന്നതു കണ്ടാൽ ചില്ലക​ളിൽ ഓറഞ്ച്‌ തൂങ്ങി​ക്കി​ട​ക്കു​ന്ന​തു​പോ​ലെ തോന്നും. ജെറ്റ്‌ വിമാ​നങ്ങൾ എപ്പോ​ഴും നിലത്തു​നിന്ന്‌ 6-11 കിലോ​മീ​റ്റർ ഉയരത്തി​ലാ​ണു പറക്കു​ന്നത്‌. ജീവൻ നിലനിർത്താൻ ആവശ്യ​മാ​യത്ര ഓക്‌സി​ജ​നും അന്തരീക്ഷ മർദവും അവി​ടെ​യില്ല. ഈ പ്രശ്‌നം എങ്ങനെ​യാ​ണു പരിഹ​രി​ക്ക​പ്പെ​ടു​ന്നത്‌? വിമാ​ന​ത്തി​ന്റെ മർദ ക്രമീ​കരണ സംവി​ധാ​നം പുറത്തു​നിന്ന്‌ വായു വലി​ച്ചെ​ടു​ക്കു​ന്നു. എന്നിട്ട്‌ അതിനെ സാന്ദ്രീ​ക​രി​ക്കു​ന്നു. ഒടുവിൽ ഈ വായു​വി​നെ അനു​യോ​ജ്യ​മായ താപനി​ല​യി​ലാ​ക്കി ക്യാബി​നി​ലേക്കു കടത്തി​വി​ടു​ന്നു. ക്യാബി​നി​ലെ വായു​വി​ന്റെ മർദം സുരക്ഷാ നിരപ്പിൽനി​ന്നു താഴു​മ്പോൾ മുകളി​ലുള്ള അറകളിൽനിന്ന്‌ ഓക്‌സി​ജൻ മാസ്‌കു​കൾ താനേ താഴോ​ട്ടു വരും. അങ്ങനെ, അടിയ​ന്തിര ഓക്‌സി​ജൻ സംവി​ധാ​ന​ത്തി​ന്റെ ആവശ്യ​മി​ല്ലാത്ത നിരപ്പി​ലേക്കു വിമാനം താഴു​ന്ന​തു​വരെ ആവശ്യ​മായ ഓക്‌സി​ജൻ യാത്ര​ക്കാർക്കു ലഭിക്കു​ന്നു. ചില വിമാ​ന​ങ്ങ​ളിൽ ഓക്‌സി​ജൻ മാസ്‌കു​കൾ യാത്ര​ക്കാ​രു​ടെ ഇരിപ്പി​ട​ത്തി​നു പുറകി​ലുള്ള അറകളി​ലാ​ണു വെച്ചി​രി​ക്കു​ന്നത്‌. അതു​കൊണ്ട്‌, ഓക്‌സി​ജൻ മാസ്‌ക്‌ ഉള്ളത്‌ എവി​ടെ​യാ​ണെന്നു വിവരി​ക്കുന്ന നിർദേ​ശങ്ങൾ വിമാനം പുറ​പ്പെ​ടു​ന്ന​തി​നു മുമ്പ്‌ നൽകു​മ്പോൾ അത്‌ ശ്രദ്ധി​ക്കേ​ണ്ടതു പ്രധാ​ന​മാണ്‌.

പ്രസ്‌തു​ത പരി​ശോ​ധ​ന​യു​ടെ സമയത്ത്‌ ക്യാബി​ന​കത്ത്‌ പുതിയ ചുവരു​ക​ളും സീലിങ്‌ പാനലു​ക​ളും പിടി​പ്പി​ക്കും. പഴയ കാർപ്പെ​റ്റു​ക​ളും കർട്ടനു​ക​ളും കുഷ്യൻ കവറു​ക​ളും മാറ്റി പുതിയവ ഇടും. കൂടാതെ, അടുക്ക​ള​യു​ടെ ഭാഗങ്ങൾ അഴിച്ച്‌ വൃത്തി​യാ​ക്കി അണുവി​മു​ക്ത​മാ​ക്കു​ക​യും ചെയ്യും.

പറക്കാൻ തയ്യാർ

56 ദിവസത്തെ വിപു​ല​മായ പരി​ശോ​ധ​ന​യ്‌ക്കും അറ്റകു​റ്റ​പ്പ​ണി​കൾക്കും ശേഷം വിമാനം വീണ്ടും യാത്ര​യ്‌ക്കു റെഡി​യാ​യി കഴിഞ്ഞി​രി​ക്കു​ന്നു. അറ്റകു​റ്റ​പ്പ​ണി​ക​ളു​ടെ ഒരു ചെറിയ അംശം മാത്ര​മാണ്‌ ഇവിടെ വിവരി​ച്ചി​രി​ക്കു​ന്നത്‌. വിമാനം വീണ്ടും പറപ്പി​ക്കു​ന്ന​തി​നു മുമ്പായി എല്ലാം ശരിയാ​യി പ്രവർത്തി​ക്കു​ന്നു​വെന്ന്‌ ഉറപ്പു​വ​രു​ത്താൻ ജീവന​ക്കാ​രു​ടെ ഒരു പ്രത്യേക സംഘം പരീക്ഷ​ണാർഥം അതു പറപ്പി​ച്ചു​നോ​ക്കി​യേ​ക്കാം. നിങ്ങൾ യാത്ര ചെയ്യുന്ന വിമാനം നല്ല നിലയി​ലാ​ണെന്ന്‌ ഉറപ്പു വരുത്തു​ന്ന​തിന്‌ എത്ര വിദഗ്‌ധ ശ്രമങ്ങ​ളും സാങ്കേ​തിക നടപടി​ക​ളും ഉൾപ്പെ​ട്ടി​ട്ടു​ണ്ടെന്ന്‌ ഹ്രസ്വ​മാ​യി പരിചി​ന്തി​ക്കു​ന്നത്‌ ധൈര്യം നൽകും.

എന്നുവ​രി​കി​ലും, വിമാ​നത്തെ സഞ്ചാര​യോ​ഗ്യ​മാ​ക്കു​ന്ന​തിന്‌ പറ്റിയ ഏറ്റവും നല്ല ഉപകരണം, മനുഷ്യ​ഘ​ടകം—സൂക്ഷ്‌മ ദൃഷ്ടി​യും ജാഗരൂ​ക​മായ മനസ്സും—ആണെന്നു പറയ​പ്പെ​ടു​ന്നു. പരിശീ​ലനം സിദ്ധിച്ച ഈ ജീവന​ക്കാർ തങ്ങളുടെ ജോലി​യെ വളരെ ഗൗരവ​ത്തോ​ടെ​യാ​ണു വീക്ഷി​ക്കു​ന്നത്‌. മെയി​ന്റ​നൻസ്‌ പരിപാ​ടി​യു​ടെ നിലവാ​രം കുറഞ്ഞു​പോ​യാൽ അത്‌ ഗുരു​ത​ര​മായ പ്രശ്‌നങ്ങൾ സൃഷ്ടി​ക്കു​മെന്ന്‌ അവർക്ക്‌ അറിയാം. സുഖ​പ്ര​ദ​മായ യാത്ര സാധ്യ​മാ​ക്കുന്ന, സുരക്ഷി​ത​മാ​യി നിങ്ങളെ ലക്ഷ്യസ്ഥാ​നത്ത്‌ എത്തിക്കുന്ന ആശ്രയ​യോ​ഗ്യ​മായ ഒരു വിമാനം ലഭ്യമാ​ക്കുക എന്നതാണ്‌ അവരുടെ ലക്ഷ്യം.—ഒരു യു.എസ്‌. ഏവി​യേഷൻ സുരക്ഷാ പരി​ശോ​ധകൻ സംഭാവന ചെയ്‌തത്‌.

[അടിക്കു​റി​പ്പു​കൾ]

[12-ാം പേജിലെ ചിത്ര​ത്തിന്‌ കടപ്പാട്‌]

Courtesy of Pan Am Historical Foundation

Archives and Special Collections, University of Miami Library

[13-ാം പേജിലെ ചിത്ര​ത്തിന്‌ കടപ്പാട്‌]

Courtesy of United Airlines

Courtesy of United Airlines

Courtesy of United Airlines