ബൈബി​ളി​ന്റെ വീക്ഷണം

ദൈവ​നാ​മം ഉച്ചരി​ക്കു​ന്നതു തെറ്റാ​ണോ?

യഹോവ എന്ന ദിവ്യ​നാ​മം ഉച്ചരി​ക്കാൻ പാടി​ല്ലാ​ത്തത്ര പവി​ത്ര​മാ​ണെ​ന്നാണ്‌ യഹൂദ​മതം നൂറ്റാ​ണ്ടു​ക​ളാ​യി പഠിപ്പി​ച്ചി​രി​ക്കു​ന്നത്‌.a (സങ്കീർത്തനം 83:18) മഹാ സ്രഷ്ടാ​വി​നെ ഇത്ര സാധാരണ രീതി​യിൽ പേരു വിളിച്ചു സംബോ​ധന ചെയ്യു​ന്നത്‌ അനാദ​ര​വാ​ണെന്ന്‌ അല്ലെങ്കിൽ അതു ദൈവ​ത്തി​ന്റെ “നാമം വൃഥാ എടുക്ക​രുത്‌” എന്ന പത്തു കൽപ്പന​ക​ളി​ലെ മൂന്നാ​മത്തെ കൽപ്പനയെ ലംഘി​ക്കു​ന്ന​താ​യി പോലും അനേകം ദൈവ​ശാ​സ്‌ത്രജ്ഞർ ന്യായ​വാ​ദം ചെയ്‌തി​ട്ടുണ്ട്‌. (പുറപ്പാ​ടു 20:7) “ദൈവ​നാ​മം, അത്‌ എഴുത​പ്പെ​ട്ടി​രി​ക്കുന്ന വിധത്തിൽ ഉച്ചരി​ക്കു​ന്ന​വനു വരുവാ​നുള്ള ലോക​ത്തിൽ യാതൊ​രു ഓഹരി​യും ഉണ്ടായി​രി​ക്കു​ക​യില്ല” എന്ന്‌ പൊ.യു. മൂന്നാം നൂറ്റാ​ണ്ടിൽ മിഷ്‌നാ പ്രഖ്യാ​പി​ച്ചു.—സൻഹെ​ദ്രീം 10:1.

ഈ യഹൂദ പാരമ്പ​ര്യ​ത്തി​ന്റെ അന്തസ്സത്ത ബൈബിൾ പരിഭാഷ നടത്തു​മ്പോൾ ക്രൈ​സ്‌തവ ലോക​ത്തി​ലെ അനേകം പണ്ഡിത​ന്മാ​രും പിന്തു​ട​രു​ന്നു എന്നതു താത്‌പ​ര്യ​ജ​ന​ക​മാണ്‌. ഉദാഹ​ര​ണ​ത്തിന്‌ ദ ന്യൂ ഓക്‌സ്‌ഫോർഡ്‌ അനോ​ട്ടേ​റ്റഡ്‌ ബൈബി​ളി​ന്റെ ആമുഖം ഇങ്ങനെ പ്രസ്‌താ​വി​ക്കു​ന്നു: “ഒരേ​യൊ​രു ദൈവമേ ഉള്ളൂ​വെ​ങ്കി​ലും, മറ്റു ദൈവങ്ങൾ ഉണ്ടെന്നും അവരിൽനി​ന്നു സത്യ​ദൈ​വത്തെ വേർതി​രി​ച്ചു നിർത്തേ​ണ്ട​തു​ണ്ടെ​ന്നും ധ്വനി​പ്പി​ക്കു​മാറ്‌ അവനു സംജ്ഞാ​നാ​മം ഉപയോ​ഗി​ക്കുന്ന രീതി ക്രിസ്‌തീയ യുഗത്തി​നു മുമ്പു​തന്നെ യഹൂദ മതവ്യ​വ​സ്ഥി​തി ഉപേക്ഷി​ച്ചു തുടങ്ങി​യി​രു​ന്നു, മാത്ര​വു​മല്ല, ദൈവ​ത്തി​നു സംജ്ഞാ​നാ​മം ഉപയോ​ഗി​ക്കു​ന്നതു ക്രിസ്‌തീയ സഭയുടെ സാർവ​ത്രിക വിശ്വാ​സ​ത്തോ​ടു ചേർച്ച​യി​ലു​മല്ല.” അതു​കൊണ്ട്‌ ആ പരിഭാ​ഷ​യിൽ ദിവ്യ​നാ​മ​ത്തി​നു പകരം “കർത്താവ്‌” എന്നാണ്‌ ഉപയോ​ഗി​ച്ചി​രി​ക്കു​ന്നത്‌.

എന്താണ്‌ ദൈവ​ത്തി​ന്റെ വീക്ഷണം?

എന്നാൽ ഈ പരിഭാ​ഷ​ക​രു​ടെ​യും ദൈവ​ശാ​സ്‌ത്ര​ജ്ഞ​രു​ടെ​യും വീക്ഷണം ദൈവ​ത്തി​ന്റെ ചിന്താ​ഗ​തി​യെ പ്രതി​ഫ​ലി​പ്പി​ക്കു​ന്നു​ണ്ടോ? എന്തായാ​ലും ദൈവം തന്റെ പേര്‌ മനുഷ്യർക്കു രഹസ്യ​മാ​ക്കി​വെ​ച്ചില്ല. പകരം അവൻ അത്‌ അവർക്കു വെളി​പ്പെ​ടു​ത്തി. സാധാ​ര​ണ​മാ​യി പഴയനി​യമം എന്നു വിളി​ക്ക​പ്പെ​ടുന്ന ബൈബി​ളി​ന്റെ എബ്രായ ഭാഗത്തു യഹോവ എന്ന ദൈവ​നാ​മം 6,800-ലധികം പ്രാവ​ശ്യം പ്രത്യ​ക്ഷ​പ്പെ​ടു​ന്നു. ദൈവ​നാ​മം അറിയു​ക​യും അത്‌ ഉപയോ​ഗി​ക്കു​ക​യും ചെയ്‌ത​വ​രിൽ ആദ്യ മനുഷ്യ ജോടി​യായ ആദാമും ഹവ്വായും ഉൾപ്പെ​ടു​ന്നെന്നു ബൈബിൾ രേഖ പ്രകട​മാ​ക്കു​ന്നു. തന്റെ ആദ്യജാ​തനു ജന്മമേ​കി​യ​ശേഷം “യഹോ​വ​യാൽ എനിക്കു ഒരു പുരു​ഷ​പ്രജ ലഭിച്ചു” എന്നു ഹവ്വാ പറഞ്ഞു.—ഉല്‌പത്തി 4:1.

നൂറ്റാ​ണ്ടു​കൾക്കു ശേഷം, ഇസ്രാ​യേൽ ജനതയെ ഈജി​പ്‌തി​ലെ അടിമ​ത്ത​ത്തിൽ നിന്നു മോചി​പ്പി​ക്കാ​നാ​യി ദൈവം മോശയെ വിളി​ച്ച​പ്പോൾ, അവൻ ദൈവ​ത്തോട്‌ ഇങ്ങനെ ചോദി​ച്ചു: “ഞാൻ യിസ്രാ​യേൽമ​ക്ക​ളു​ടെ അടുക്കൽ ചെന്നു: നിങ്ങളു​ടെ പിതാ​ക്ക​ന്മാ​രു​ടെ ദൈവം എന്നെ നിങ്ങളു​ടെ അടുക്കൽ അയച്ചി​രി​ക്കു​ന്നു എന്നു പറയു​മ്പോൾ: അവന്റെ നാമം എന്തെന്നു അവർ എന്നോടു ചോദി​ച്ചാൽ ഞാൻ അവരോ​ടു എന്തു പറയേണം.” ഏതെങ്കി​ലും പുതിയ പേരിൽ ദൈവം തന്നെത്തന്നെ വെളി​പ്പെ​ടു​ത്തു​മോ എന്നു മോശ ചിന്തി​ച്ചി​രി​ക്കാൻ ഇടയുണ്ട്‌. എന്നാൽ ദൈവം മോശ​യോട്‌ പറഞ്ഞു: “നീ യിസ്രാ​യേൽമ​ക്ക​ളോ​ടു ഇപ്രകാ​രം പറയേണം: അബ്രാ​ഹാ​മി​ന്റെ ദൈവ​വും യിസ്‌ഹാ​ക്കി​ന്റെ ദൈവ​വും യാക്കോ​ബി​ന്റെ ദൈവ​വു​മാ​യി നിങ്ങളു​ടെ പിതാ​ക്ക​ന്മാ​രു​ടെ ദൈവ​മായ യഹോവ എന്നെ നിങ്ങളു​ടെ അടുക്കൽ അയച്ചി​രി​ക്കു​ന്നു; ഇതു എന്നേക്കും എന്റെ നാമവും തലമുറ തലമു​റ​യാ​യി എന്റെ ജ്ഞാപക​വും ആകുന്നു.” (പുറപ്പാ​ടു 3:13, 15) തന്റെ ജനം ഉച്ചരി​ക്കാൻ പാടി​ല്ലാ​ത്ത​വി​ധം അത്ര പവി​ത്ര​മാണ്‌ തന്റെ പേരെന്ന്‌ സത്യ​ദൈവം കരുതി​യില്ല എന്നതു വ്യക്തമാണ്‌.

വാസ്‌ത​വ​ത്തിൽ, എല്ലാ തലമു​റ​ക​ളി​ലും പെട്ട ദൈവ​ത്തി​ന്റെ വിശ്വസ്‌ത ദാസന്മാർ സ്വാത​ന്ത്ര്യ​ത്തോ​ടെ​യും ആദര​വോ​ടെ​യും ദൈവ​നാ​മം ഉച്ചരി​ച്ചി​ട്ടുണ്ട്‌. ദൈവ​ത്തി​ന്റെ ഒരു വിശ്വസ്‌ത ദാസനാ​യി​രുന്ന ബോവസ്‌ “യഹോവ നിങ്ങ​ളോ​ടു​കൂ​ടെ ഇരിക്കട്ടെ” എന്നു പറഞ്ഞു​കൊണ്ട്‌ തന്റെ വയലിൽ പണി​യെ​ടു​ക്കു​ന്ന​വരെ പതിവാ​യി അഭിവാ​ദ്യം ചെയ്‌തി​രു​ന്നു. അതുകേട്ട ആ വേലക്കാർ ഞെട്ടി​പ്പോ​യോ? ഇല്ലേയില്ല. വിവരണം തുടരു​ന്നു: “യഹോവ നിന്നെ അനു​ഗ്ര​ഹി​ക്കട്ടെ എന്നു അവർ അവനോ​ടും പറഞ്ഞു.” (രൂത്ത്‌ 2:4) അതു ദൈവ​ത്തോ​ടുള്ള നിന്ദാ പ്രകട​ന​മാ​യി അവർ കരുതി​യി​രു​ന്നില്ല. പകരം, തങ്ങളുടെ ദൈനം​ദിന കാര്യാ​ദി​ക​ളിൽ അവനു മഹത്ത്വ​വും ബഹുമാ​ന​വും കൊടു​ക്കാ​നുള്ള ഒരു വഴിയാ​യി​ട്ടാണ്‌ അവർ അതിനെ വീക്ഷി​ച്ചി​രു​ന്നത്‌. “സ്വർഗ്ഗ​സ്ഥ​നായ ഞങ്ങളുടെ പിതാവേ, നിന്റെ നാമം വിശു​ദ്ധീ​ക​രി​ക്ക​പ്പെ​ടേ​ണമേ” എന്നു പ്രാർഥി​ക്കാൻ യേശു തന്റെ ശിഷ്യ​ന്മാ​രെ പഠിപ്പി​ച്ച​പ്പോൾ അവൻ അർഥമാ​ക്കി​യ​തും അതു തന്നെയാ​യി​രു​ന്നു.—മത്തായി 6:9.

മൂന്നാ​മത്തെ കൽപ്പന

എന്നാൽ പത്തു കൽപ്പന​ക​ളിൽ മൂന്നാ​മത്തെ കൽപ്പന​യി​ലുള്ള വിലക്കി​നെ സംബന്ധി​ച്ചോ? പുറപ്പാ​ടു 20:7 ശക്തമായി ഇങ്ങനെ പ്രസ്‌താ​വി​ക്കു​ന്നു: “നിന്റെ ദൈവ​മായ യഹോ​വ​യു​ടെ നാമം വൃഥാ എടുക്ക​രു​തു; തന്റെ നാമം വൃഥാ എടുക്കു​ന്ന​വനെ യഹോവ ശിക്ഷി​ക്കാ​തെ വിടു​ക​യില്ല.”

ദൈവ​നാ​മം “വൃഥാ” എടുക്കുക എന്ന പ്രയോ​ഗം കൃത്യ​മാ​യി എന്തർഥ​മാ​ക്കു​ന്നു? “വൃഥാ” എന്നു മുകളിൽ പരിഭാ​ഷ​പ്പെ​ടു​ത്തി​യി​രി​ക്കുന്ന എബ്രായ പദത്തിന്‌ (ലാഷ്‌-ഷാവ്‌) “വ്യാജ​മാ​യി” എന്നോ “വെറുതെ, വ്യർഥ​മാ​യി” എന്നിങ്ങ​നെ​യോ അർഥമാ​ക്കാ​നാ​കും എന്ന്‌ യഹൂദ പ്രസി​ദ്ധീ​കരണ സൊ​സൈറ്റി പുറത്തി​റ​ക്കിയ ദ ജെപി​എസ്‌ തോറാ കമന്ററി വിശദീ​ക​രി​ക്കു​ന്നു. ഈ പരാമർശ ഗ്രന്ഥം ഇങ്ങനെ തുടരു​ന്നു: “[ഈ എബ്രായ പദത്തിന്റെ] അവ്യക്തത ഒരു കോടതി വ്യവഹാ​ര​ത്തിൽ വാദി​യും പ്രതി​യും കള്ളസത്യം ചെയ്യു​ന്ന​തും വ്യാജ​മാ​യി ആണയി​ടു​ന്ന​തും ദൈവ​നാ​മം അനാവ​ശ്യ​മാ​യും ലാഘവ​ത്തോ​ടെ​യും ഉപയോ​ഗി​ക്കു​ന്ന​തും സംബന്ധിച്ച വിലക്കി​നെ അർഥമാ​ക്കി​യേ​ക്കാം.”

‘ദൈവ​നാ​മം വൃഥാ എടുക്കു​ന്ന​തിൽ’ ആ നാമം അനുചി​ത​മായ വിധത്തിൽ ഉപയോ​ഗി​ക്കു​ന്ന​തും ഉൾപ്പെ​ടു​ന്നെന്ന്‌ ഈ യഹൂദ ഭാഷ്യം കൃത്യ​മാ​യി വ്യക്തമാ​ക്കു​ന്നു. എന്നാൽ ദൈവത്തെ കുറിച്ച്‌ മറ്റുള്ള​വരെ പഠിപ്പി​ക്കു​മ്പോ​ഴും നമ്മുടെ സ്വർഗീയ പിതാ​വി​നോ​ടു പ്രാർഥി​ക്കു​മ്പോ​ഴും അവന്റെ പേര്‌ ഉച്ചരി​ക്കു​ന്നത്‌ “അനാവ​ശ്യ​മാ​യും ലാഘവ​ത്തോ​ടെ​യും” ഉള്ള ഉപയോ​ഗം ആണെന്നു പറയാ​നാ​കു​മോ? സങ്കീർത്തനം 91:14-ൽ യഹോവ തന്റെ വീക്ഷണം പ്രകട​മാ​ക്കു​ന്നു: “അവൻ എന്നോടു പററി​യി​രി​ക്ക​യാൽ ഞാൻ അവനെ വിടു​വി​ക്കും; അവൻ എന്റെ നാമത്തെ അറിക​യാൽ ഞാൻ അവനെ ഉയർത്തും.”

അതു പ്രാധാ​ന്യം അർഹി​ക്കു​ന്നു​വോ?

മോശ​യു​ടെ പഞ്ചഗ്ര​ന്ഥങ്ങൾ (ഇംഗ്ലീഷ്‌) എന്ന എവ്‌റെട്ട്‌ ഫോക്‌സി​ന്റെ ആധുനിക ഇംഗ്ലീഷ്‌ പരിഭാഷ പാരമ്പ​ര്യ​ത്തി​ന്റെ നൂലാ​മാ​ല​കളെ പൊട്ടി​ച്ചെ​റി​യു​ന്നു. പരമ്പരാ​ഗ​ത​മാ​യി ഉപയോ​ഗി​ക്കുന്ന “കർത്താവ്‌” എന്ന വാക്കിനു പകരം, “എബ്രായ ഭാഷയിൽ ഒരു വായന​ക്കാ​രൻ അത്‌ എപ്രകാ​രം വായി​ക്കു​മാ​യി​രു​ന്നു എന്നു കാണി​ക്കാ​നുള്ള ആഗ്രഹം നിമിത്തം” ദൈവ​നാ​മത്തെ പ്രതി​നി​ധീ​ക​രി​ക്കാ​നാ​യി ഈ ഭാഷാ​ന്ത​ര​ത്തിൽ “YHWH” എന്നാണ്‌ ഉപയോ​ഗി​ച്ചി​രി​ക്കു​ന്നത്‌. അദ്ദേഹം ഇങ്ങനെ ഊന്നി​പ്പ​റ​യു​ന്നു: “ബൈബി​ളി​ലെ ദൈവ​ത്തി​ന്റെ വ്യക്തി​പ​ര​മായ നാമമാ​യി ഈ ഗ്രന്ഥത്തിൽ “‘YHWH’” പ്രത്യ​ക്ഷ​പ്പെ​ടു​ന്നെന്ന്‌ വായന​ക്കാ​രൻ പെട്ടെന്നു തിരി​ച്ച​റി​യും.” ദൈവ​നാ​മം കാണു​ന്നതു വായന​ക്കാ​രന്‌ “അരോ​ചകം” ആയിരു​ന്നേ​ക്കാം എന്നും ഫോക്‌സ്‌ സമ്മതി​ക്കു​ന്നു. തന്റെ പരിഭാ​ഷ​യിൽ ദൈവ​നാ​മം മറച്ചു​പി​ടി​ക്കാ​തി​രി​ക്കാ​നുള്ള അഭിന​ന്ദ​നീ​യ​മായ പടി സ്വീക​രി​ച്ച​ശേഷം അദ്ദേഹം ഇങ്ങനെ കൂട്ടി​ച്ചേർക്കു​ന്നു: “ഉച്ചത്തിൽ വായി​ക്കു​മ്പോൾ, പരമ്പരാ​ഗ​ത​മാ​യി ഉപയോ​ഗി​ച്ചു വരുന്ന ‘കർത്താവ്‌’ എന്നതു​തന്നെ ഉപയോ​ഗി​ക്കാ​നാ​ണു ഞാൻ ശുപാർശ ചെയ്യു​ന്നത്‌. എന്നുവ​രി​കി​ലും മറ്റുള്ളവർ സ്വന്ത ഇഷ്ടപ്ര​കാ​രം വായി​ക്കാൻ താത്‌പ​ര്യ​പ്പെ​ട്ടേ​ക്കാം.” എന്നാൽ ദൈവ​നാ​മം ഉപയോ​ഗി​ക്കു​ന്നതു കേവലം വ്യക്തി​പ​ര​മായ തിര​ഞ്ഞെ​ടു​പ്പി​നോ പാരമ്പ​ര്യ​ത്തി​നോ അല്ലെങ്കിൽ സ്വന്തം ഇഷ്ടത്തി​നോ അനുസൃ​ത​മാ​യി ചെയ്യാൻ പറ്റുന്ന ഒരു സംഗതി​യാ​ണോ?

അല്ല. ദൈവ​നാ​മം ഉചിത​മാ​യി ഉപയോ​ഗി​ക്കാൻ ബൈബിൾ കേവലം പ്രോ​ത്സാ​ഹി​പ്പി​ക്കുക മാത്രമല്ല, അങ്ങനെ ചെയ്യാൻ അതു കൽപ്പി​ക്കു​ക​കൂ​ടി ചെയ്യുന്നു! യെശയ്യാ​വു 12:4-ന്റെ ആദ്യഭാ​ഗത്ത്‌ ദൈവ​നാ​മം വ്യക്തമാ​യി ഉച്ചരി​ച്ചു​കൊണ്ട്‌ ദൈവ​ജനം പിൻവ​രു​ന്ന​പ്ര​കാ​രം ഉദ്‌ഘോ​ഷി​ക്കു​ന്ന​താ​യി കാണ​പ്പെ​ടു​ന്നു: “യഹോ​വെക്കു സ്‌തോ​ത്രം ചെയ്‌വിൻ; അവന്റെ നാമത്തെ വിളി​ച്ച​പേ​ക്ഷി​പ്പിൻ.” (ചെരി​ച്ചെ​ഴു​തി​യി​രി​ക്കു​ന്നതു ഞങ്ങൾ.) കൂടാതെ, ദൈവ​ത്തി​ന്റെ പ്രതി​കൂല ന്യായ​വി​ധി​ക്കു പാത്ര​മാ​കു​ന്ന​വരെ കുറിച്ച്‌ സങ്കീർത്ത​ന​ക്കാ​രൻ ഇപ്രകാ​രം പറയുന്നു: “നിന്നെ അറിയാത്ത ജാതി​ക​ളു​ടെ​മേ​ലും നിന്റെ നാമം വിളി​ച്ച​പേ​ക്ഷി​ക്കാത്ത രാജ്യ​ങ്ങ​ളു​ടെ​മേ​ലും നിന്റെ ക്രോ​ധത്തെ പകരേ​ണമേ.” (ചെരി​ച്ചെ​ഴു​തി​യി​രി​ക്കു​ന്നതു ഞങ്ങൾ.)—സങ്കീർത്തനം 79:6; സദൃശ​വാ​ക്യ​ങ്ങൾ 18:10-ഉം സെഫന്യാ​വു 3:9-ഉം കൂടെ കാണുക.

അപ്പോൾ, മൂന്നാ​മത്തെ കൽപ്പന സംബന്ധി​ച്ചുള്ള ഒരു തെറ്റി​ദ്ധാ​ര​ണ​യു​ടെ ഫലമായി ചിലർ യഹോ​വ​യു​ടെ മഹത്ത്വ​പൂർണ​മായ നാമം വിളി​ച്ച​പേ​ക്ഷി​ക്കു​ന്നി​ല്ലെ​ങ്കി​ലും അവനെ യഥാർഥ​ത്തിൽ സ്‌നേ​ഹി​ക്കുന്ന ആളുകൾ അവന്റെ നാമം വിളി​ച്ച​പേ​ക്ഷി​ക്കു​ന്നു. അതേ, ഉചിത​മായ എല്ലാ അവസര​ങ്ങ​ളി​ലും അവർ ‘അവന്റെ നാമം ഉന്നതമാ​യി​രി​ക്കു​ന്നു എന്നു പ്രസ്‌താ​വി​ച്ചു​കൊണ്ട്‌ ജാതി​ക​ളു​ടെ ഇടയിൽ അവന്റെ പ്രവൃ​ത്തി​കളെ അറിയി​ക്കു​ന്നു!’—യെശയ്യാ​വു 12:4ബി.

[അടിക്കു​റി​പ്പു​കൾ]

[26-ാം പേജിലെ ചിത്രം]

ചാവുകടൽ ചുരു​ളു​ക​ളിൽനി​ന്നു കണ്ടെത്തിയ സങ്കീർത്തന പുസ്‌ത​ക​ത്തി​ന്റെ ഒരു ഭാഗം. ചുരു​ളി​ന്റെ മറ്റു ഭാഗങ്ങ​ളിൽ ഉപയോ​ഗി​ച്ചി​രി​ക്കു​ന്ന​തി​നെ​ക്കാൾ പുരാ​ത​ന​മായ എബ്രായ ലിപി​യി​ലാണ്‌ യഹോവ (YHWH) എന്ന ദൈവ​നാ​മം ഈ ഭാഗത്തു പ്രത്യ​ക്ഷ​പ്പെ​ടു​ന്നത്‌

[കടപ്പാട്‌]

Courtesy of the Shrine of the Book, Israel Museum, Jerusalem