കീടനാ​ശി​നി​കൾ—വെറും കീട നാശി​നി​ക​ളോ?

ബ്രസീലിലെ ഉണരുക! ലേഖകൻ

“നോക്കി​ക്കേ, യാതൊ​രു കുഴപ്പ​വു​മില്ല,” ദക്ഷിണ ബ്രസീ​ലി​ലുള്ള തന്റെ മരച്ചീനി തോട്ട​ത്തി​ലേക്കു നോക്കി​ക്കൊണ്ട്‌ കർഷക​നായ ഡോമീ​ങോസ്‌ ദോസ്‌ സാന്റോസ്‌ പറഞ്ഞത്‌ അങ്ങനെ​യാണ്‌. സംതൃ​പ്‌തൻ ആയിരി​ക്കാൻ അദ്ദേഹ​ത്തി​നു കാരണ​മുണ്ട്‌. അവയുടെ ഇലകൾ ഉപദ്ര​വ​കാ​രി​ക​ളായ കീടങ്ങ​ളു​ടെ ആക്രമണ ബാധ​യേൽക്കാ​ത്ത​താ​യി കാണ​പ്പെട്ടു. കീടനാ​ശി​നി​ക​ളു​ടെ മറ്റൊരു നേട്ടം, അല്ലേ? അല്ല. “കഴിഞ്ഞ വർഷവും ഈ വർഷവും ഒരു തുള്ളി കീടനാ​ശി​നി പോലും എനിക്കു വാങ്ങേ​ണ്ടി​വ​ന്നില്ല,” ഡോമീ​ങോസ്‌ പറയുന്നു.

തങ്ങളുടെ വിള സംരക്ഷി​ക്കു​ന്ന​തി​നു രാസ കീടനാ​ശി​നി​കൾ ഉപയോ​ഗി​ക്കാൻ വിസമ്മ​തി​ക്കുന്ന കർഷക​രു​ടെ എണ്ണം വർധി​ച്ചു​വ​രു​ന്നു, അതിൽ ഡോമീ​ങോ​സും പെടും.a പകരം, രാസ വിഷങ്ങ​ളു​ടെ ഉപയോ​ഗം ഒഴിവാ​ക്കുന്ന അല്ലെങ്കിൽ ഉപയോ​ഗം കുറയ്‌ക്കുന്ന രീതി​ക​ളാണ്‌ അവർ അവലം​ബി​ക്കു​ന്നത്‌. “എന്തു രീതികൾ?” ബ്രസീ​ലി​ലെ സാവൊ പൗലോ നഗര പ്രാന്ത​ത്തി​ലുള്ള ഒരു നാരക​ത്തോ​പ്പിൽ ചില പരീക്ഷ​ണങ്ങൾ നടത്തു​ക​യാ​യി​രുന്ന കൃഷി വിദഗ്‌ധ​നായ സാഡ്രൂ മ്യുള്ള​റോ​ടു ഞാൻ ചോദി​ച്ചു. “കീടനാ​ശി​നി​ക​ളു​ടെ ഉപയോ​ഗം കുറയ്‌ക്കാൻ കർഷകരെ പ്രേരി​പ്പി​ക്കു​ന്നത്‌ എന്താണ്‌?”

കീടനാ​ശി​നി പരിവൃ​ത്തി

രാസ കീടനാ​ശി​നി​കൾ ഉപയോ​ഗി​ക്കു​ന്ന​തി​ന്റെ ഒരു മോശ​മായ ഫലം വ്യക്തമാ​ക്കാ​നാ​യി സാഡ്രോ പറയുന്നു: “ഒരു പൊലീസ്‌ സംഘം ഒരു കൂട്ടം ബാങ്കു കൊള്ള​ക്കാ​രു​ടെ പിന്നാലെ പായു​ന്ന​താ​യി വിചാ​രി​ക്കുക. രക്ഷപ്പെ​ടാ​നാ​യി കൊള്ള​ക്കാർ വളരെ തിരക്കുള്ള ഒരു ഓഫീസ്‌ കെട്ടി​ട​ത്തി​ലേക്കു പാഞ്ഞു​ക​യ​റു​ന്നു. കൊള്ള​ക്കാർ ജനക്കൂ​ട്ട​ത്തിൽ മറഞ്ഞതു​കൊണ്ട്‌, ഒരു ഹെലി​കോ​പ്‌റ്റ​റിൽ എത്തുന്ന പൊലീസ്‌ ആ കെട്ടി​ട​ത്തിൽ വാതക ബോംബു വർഷി​ക്കു​ന്നു. അതു കൊള്ള​ക്കാ​രെ മാത്രമല്ല നിഷ്‌ക​ള​ങ്ക​രായ ഓഫീസ്‌ ജീവന​ക്കാ​രെ​യും കെട്ടി​ട​ത്തി​നു കാവൽ നിൽക്കു​ന്ന​വ​രെ​യും കൊല്ലു​ന്നു. ഒരു കർഷകൻ തന്റെ വിളയിൽ കൂടെ​ക്കൂ​ടെ ശക്തിയുള്ള കീടനാ​ശി​നി തളിക്കു​മ്പോൾ സംഭവി​ക്കു​ന്നത്‌ ഏറെക്കു​റെ ഇതി​നോ​ടു സമാന​മാണ്‌. ഉപദ്ര​വ​കാ​രി​ക​ളായ കീടങ്ങളെ അഥവാ കൊള്ള​ക്കാ​രെ അവർ കൊല്ലു​ന്നു, എന്നാൽ കുഴപ്പ​ക്കാ​ര​ല്ലാത്ത കീടങ്ങ​ളും—കാവൽക്കാ​രും—കൊല്ല​പ്പെ​ടു​ന്നു.”

“അതു ശരിയാ​യി​രി​ക്കാം, പക്ഷേ വിളവു നശിക്കു​ക​യി​ല്ല​ല്ലോ,” ഞാൻ പറഞ്ഞു. എന്നാൽ വിവേ​ച​ന​യി​ല്ലാ​തെ കീടനാ​ശി​നി ഉപയോ​ഗി​ക്കു​മ്പോൾ ഉപദ്ര​വ​ക​ര​മായ ഒരു പരിവൃ​ത്തി​ക്കു തിരി​കൊ​ളു​ത്തു​ക​യാ​ണു ചെയ്യു​ന്നത്‌ എന്ന്‌ സാഡ്രോ വ്യക്തമാ​ക്കു​ന്നു. അതെങ്ങനെ? ചില കീടങ്ങൾ ചില കീടനാ​ശി​നി​കൾക്കെ​തി​രെ പ്രതി​രോ​ധം നേടി​ക്കൊണ്ട്‌ അതിജീ​വി​ക്കു​ന്നു. തുടർന്ന്‌ അവയുടെ വിളയാ​ട്ട​മാണ്‌. കാരണം കർഷകന്റെ കീടനാ​ശി​നി പ്രയോ​ഗ​ത്തി​ന്റെ ഫലമായി ‘സുരക്ഷാ​പാ​ലകർ’ അഥവാ ഉപകാ​രി​ക​ളായ കീടങ്ങൾ നശിച്ചു​പോ​യ​ല്ലോ.

ധാരാളം ഭക്ഷണവും അതു​പോ​ലെ​തന്നെ പ്രകൃതി ശത്രു​ക്ക​ളു​ടെ അഭാവ​വും നിമിത്തം കീടനാ​ശി​നി​കൾക്കെ​തി​രെ പ്രതി​രോധ ശേഷി​യുള്ള കീടങ്ങ​ളു​ടെ എണ്ണം പതിന്മ​ടങ്ങു വർധി​ക്കു​ന്നു. അതു വീണ്ടും കീടനാ​ശി​നി പ്രയോ​ഗി​ക്കാൻ കർഷകനെ പ്രേരി​പ്പി​ക്കു​ന്നു, ഒരുപക്ഷേ വീര്യം കൂടിയ ഒന്നായി​രി​ക്കാം ഇത്തവണ അദ്ദേഹം പ്രയോ​ഗി​ക്കു​ന്നത്‌. തെക്കേ അമേരി​ക്ക​യി​ലെ ചില പയർ തോട്ട​ങ്ങ​ളിൽ ആഴ്‌ച​തോ​റും കർഷകർ മരുന്ന​ടി​ക്കു​ന്നു. അതിന്റെ പരിണത ഫലമോ? “നിങ്ങൾ കീടനാ​ശി​നി വിതച്ചാൽ കൊയ്യു​ന്നതു വിഷം ആയിരി​ക്കും” എന്ന്‌ ഒരു കർഷകൻ പറഞ്ഞു.

കീടനാ​ശി​നി​കൾ ഉപയോ​ഗി​ക്കാ​തി​രി​ക്കു​ന്നത്‌ ഏറെ ദോഷം വരുത്തു​മോ?

കീടങ്ങളെ തുരത്താ​നാ​യി രാസവി​ഷങ്ങൾ പ്രയോ​ഗി​ക്കുന്ന വ്യക്തി അയാ​ളെ​ത്തന്നെ വിഷലി​പ്‌ത​നാ​ക്കു​ന്നു എന്നു ഗവേഷണം സൂചി​പ്പി​ക്കു​ന്നു. ബ്രസീ​ലിൽ മാത്രം ഓരോ വർഷവും ഏതാണ്ട്‌ 7,00,000 ആളുകൾക്ക്‌—ഓരോ 45 സെക്കൻഡി​ലും ശരാശരി ഒരാൾക്കു—കീടനാ​ശി​നി​ക​ളിൽനി​ന്നു വിഷബാധ ഏൽക്കു​ന്നെന്നു ഗിയ റൂറാൽ എന്ന മാസിക റിപ്പോർട്ടു ചെയ്‌തു! അപകട​കാ​രി​ക​ളായ കീടനാ​ശി​നി​ക​ളു​മാ​യി സമ്പർക്ക​ത്തിൽ വരുന്ന​തു​മൂ​ലം ലോക​വ്യാ​പ​ക​മാ​യി ഓരോ വർഷവും 2,20,000 ആളുകൾ മരിക്കു​ന്നെന്നു ലോകാ​രോ​ഗ്യ സംഘടന റിപ്പോർട്ടു ചെയ്യുന്നു. ഇതിനു​പു​റമേ, കീടനാ​ശി​നി​കൾ നമ്മുടെ പരിസ്ഥി​തി​യെ​യും ദോഷ​ക​ര​മാ​യി ബാധി​ക്കു​ന്നു.

രാസവി​ഷ​ത്തി​ന്റെ ഒരു പാത്രം തുറക്കു​ന്നതു പ്രശ്‌ന​ങ്ങ​ളു​ടെ ഒരു ഭണ്ഡാര​പ്പെട്ടി തുറക്കു​ന്നതു പോലെ ആണ്‌ എന്നു ചിലർ കരുതു​ന്നു. എന്നാൽ മറ്റു ചിലരു​ടെ അഭി​പ്രാ​യ​ത്തിൽ അതു പ്രയോ​ഗി​ക്കാ​തി​രി​ക്കു​ന്ന​താണ്‌ ഏറെ ദോഷം ചെയ്യു​ന്നത്‌. അവരുടെ വാദം ഇങ്ങനെ​യാണ്‌: കീടനാ​ശി​നി പ്രയോ​ഗി​ച്ചാൽ ഭക്ഷണം ഉണ്ടാകും, ഇല്ലെങ്കിൽ പട്ടിണി​യും. ജനസംഖ്യ വർധി​ക്കു​ക​യും കൃഷി​യോ​ഗ്യ​മായ ഭൂമി ചുരു​ങ്ങു​ക​യു​മല്ലേ? ഒരു ആഗോള ഭക്ഷ്യക്ഷാ​മം തടയണ​മെ​ങ്കിൽ, വിനാ​ശ​കാ​രി​ക​ളായ പ്രാണി​ക​ളിൽനി​ന്നു വിളയെ സംരക്ഷി​ക്കേ​ണ്ട​തുണ്ട്‌.

കീടങ്ങൾ ഒരു വലിയ പ്രശ്‌നം തന്നെ സൃഷ്ടി​ക്കു​ന്നുണ്ട്‌ എന്നതു വ്യക്തമാണ്‌. എന്നുവ​രി​കി​ലും സന്തോ​ഷ​ക​ര​മെന്നു പറയട്ടെ, വലിയ അളവിൽ രാസവി​ഷങ്ങൾ പ്രയോ​ഗി​ക്കു​ന്ന​തി​നെ​ക്കാൾ മെച്ചമായ ഒരു മാർഗ​മു​ണ്ടെന്നു ലോക​വ്യാ​പ​ക​മാ​യി നിരവധി കർഷകർ തിരി​ച്ച​റി​യു​ക​യാണ്‌. ഏകീകൃത കീട നിയ​ന്ത്രണം എന്നാണ്‌ ഇത്‌ അറിയ​പ്പെ​ടു​ന്നത്‌.

ഏകീകൃത കീട നിയ​ന്ത്രണം—ഒരു പകര രീതി

“എന്താണ്‌ ഏകീകൃത കീട നിയ​ന്ത്രണം?” പിറാ​സി​ക്കാ​ബ​യി​ലെ സാവൊ പൗലോ സർവക​ലാ​ശാ​ല​യി​ലെ പ്രാണി​ശാ​സ്‌ത്ര വിഭാ​ഗ​ത്തി​ന്റെ തലവനും പ്രകൃതി കീട നിയന്ത്രണ ഗവേഷ​ക​നു​മായ പ്രൊ​ഫസർ ഇവോ​നി​യൂ ബെർട്ടി ഫില്യൂ​വി​നോ​ടു ഞാൻ ചോദി​ച്ചു. കീടനാ​ശി​നി പ്രയോ​ഗം പരമാ​വധി കുറയ്‌ക്കു​ക​യും ഉപദ്ര​വ​കാ​രി​ക​ളായ കീടങ്ങളെ മാത്രം നശിപ്പി​ക്കുന്ന കീടനാ​ശി​നി​കൾ ഉപയോ​ഗി​ക്കു​ക​യും ചെയ്യു​ക​യാണ്‌ ഏകീകൃത കീട നിയ​ന്ത്ര​ണ​ത്തി​ന്റെ ലക്ഷ്യ​മെന്നു പ്രൊ​ഫസർ ബെർട്ടി വിശദീ​ക​രി​ച്ചു. രാസവി​ഷ​ങ്ങ​ളു​ടെ നിയ​ന്ത്രിത ഉപയോ​ഗ​വും അനുബന്ധ പ്രകൃ​തി​ദത്ത കീടനി​യ​ന്ത്രണ രീതി​ക​ളും ഉൾപ്പെ​ട്ട​താണ്‌ ഇത്‌.

വ്യത്യ​സ്‌ത വിളകൾ മാറി​മാ​റി കൃഷി ചെയ്യു​ന്ന​താണ്‌ അത്തരം ഒരു രീതി. ഉദാഹ​ര​ണ​ത്തിന്‌, ഒരു കർഷകൻ വർഷം തോറും ചോള​വും ബീൻസും മാറി​മാ​റി കൃഷി ചെയ്‌തേ​ക്കാം. അങ്ങനെ​യാ​കു​മ്പോൾ ബീൻസ്‌ തിന്നാ​ത്ത​തും അതേസ​മയം ചോളം തിന്നു​ന്ന​തു​മായ കീടങ്ങൾ നശിക്കും അല്ലെങ്കിൽ ചോള​മുള്ള മേഖല​ക​ളി​ലേക്ക്‌ അവ മാറും. തുടർന്ന്‌ അടുത്ത പ്രാവ​ശ്യം ചോളം കൃഷി ചെയ്യു​മ്പോൾ അതിനെ ആക്രമി​ക്കുന്ന കീടങ്ങൾ അധിക​വും അവിടെ നിന്നു മാറി​പ്പോ​യി​ട്ടു​ണ്ടാ​കും—കുറച്ചു കാല​ത്തേ​ക്കെ​ങ്കി​ലും. ചോളം ഭക്ഷണമാ​ക്കുന്ന കീടങ്ങൾ കൂട്ട​ത്തോ​ടെ വരു​മ്പോ​ഴേ​ക്കും അടുത്ത ഇനം കൃഷി ചെയ്യാ​നുള്ള സമയം ആകും, അപ്പോൾ അവ അവി​ടെ​നി​ന്നു വീണ്ടും കെട്ടു​കെ​ട്ടും.

ഏകീകൃത കീട നിയ​ന്ത്ര​ണ​ത്തി​ന്റെ മറ്റൊരു ഘടകമാ​ണു ജൈവ​നി​യ​ന്ത്രണം. കീടങ്ങ​ളു​ടെ പ്രകൃതി ശത്രു​ക്ക​ളായ പ്രാണി​കൾ, ബാക്‌ടീ​രിയ, വൈറസ്‌, ഫംഗസ്‌ തുടങ്ങി​യ​വയെ കർഷകർ വളർത്തു​ന്നത്‌ ഇതിൽ ഉൾപ്പെ​ടു​ന്നു. ഉദാഹ​ര​ണ​ത്തിന്‌, ബാക്യു​ലോ വൈറസ്‌ എന്ന ഒരു വൈറസ്‌ പിടി​പെ​ട്ട​പ്പോൾ ധാരാളം ശലഭപ്പു​ഴു​ക്കൾ ചത്തൊ​ടു​ങ്ങി​യ​താ​യി ബ്രസീ​ലി​ലെ ഗവേഷകർ നിരീ​ക്ഷി​ച്ചു. ഈ വൈറസ്‌ മനുഷ്യർക്ക്‌ ഉപദ്രവം വരുത്താ​ത്ത​തി​നാൽ, അവ കലർത്തിയ ദ്രാവകം തളിക്കു​ന്നത്‌ സോയാ​ബീ​നും മരച്ചീനി വിളയും തിന്നുന്ന ശലഭപ്പു​ഴു​ക്കൾക്ക്‌ എതി​രെ​യുള്ള ഒരു ജൈവ കീടനാ​ശി​നി​യാ​യി വർത്തി​ക്കും എന്ന്‌ അവർ കണ്ടെത്തി. അതു ഫലിക്കു​ക​തന്നെ ചെയ്‌തു. ഈ ദ്രാവകം തളിച്ച വിളകൾ തിന്ന പുഴുക്കൾ ഏതാനും ദിവസ​ങ്ങൾക്കു​ള്ളിൽത്തന്നെ ചത്തൊ​ടു​ങ്ങി. കൂടു​ത​ലായ ഒരു നേട്ട​മെന്നേ പറയേണ്ടൂ, ചത്തൊ​ടു​ങ്ങിയ ഈ പുഴുക്കൾ ഭാവി പോരാ​ട്ട​ങ്ങൾക്കുള്ള സൗജന്യ ആയുധ​ങ്ങ​ളാ​യും ഉതകുന്നു. അതെങ്ങനെ?

“ചത്തൊ​ടു​ങ്ങിയ ഈ ശലഭപ്പു​ഴു​ക്കളെ കർഷകർ ഒരു യന്ത്രത്തി​ലിട്ട്‌ അരച്ചെ​ടു​ക്കു​ന്നു. ഇത്‌ അരിച്ചു കിട്ടുന്ന ദ്രാവകം ഒരു ശീതി​ക​ര​ണി​യിൽ സൂക്ഷി​ക്കു​ന്നു” എന്നു പ്രൊ​ഫസർ ബെർട്ടി വിശദീ​ക​രി​ച്ചു. വൈറസ്‌ അടങ്ങിയ ഈ ദ്രാവകം ഉറയു​മ്പോൾ കർഷകർ അത്‌ ഉരുക്കി​യെ​ടു​ത്തു വെള്ളം ചേർത്തു വീണ്ടും വിളക​ളിൽ തളിക്കു​ന്നു.

ഈ ജൈവ കീടനാ​ശി​നി​കൾക്കു രാസവി​ഷ​ങ്ങ​ളെ​ക്കാൾ വേഗത കുറവാ​യി​രു​ന്നേ​ക്കാം. എങ്കിലും ഇതിന്‌ 90 ശതമാ​ന​ത്തോ​ളം വിജയ നിരക്ക്‌ ഉണ്ടെന്ന്‌ ഒരു ഗവേഷകൻ പറയുന്നു.

കീടങ്ങളെ നേരിടൽ—ഒരു പ്രകൃ​തി​ദത്ത മാർഗം

വിനാ​ശ​കാ​രി​ക​ളായ കീടങ്ങളെ നേരി​ടാ​നാ​യി ഉപയോ​ഗ​പ്ര​ദ​മായ കീടങ്ങളെ വളർത്തി എടുക്കു​ന്ന​താണ്‌ ജൈവ കീടനി​യ​ന്ത്ര​ണ​ത്തി​ന്റെ മറ്റൊരു പ്രധാന ഭാഗം. ഈ രീതി​യി​ലുള്ള കീടനി​യ​ന്ത്രണം സംബന്ധി​ച്ചു കർഷകരെ ബോധ​വ​ത്‌ക​രി​ക്കാൻ ശ്രമങ്ങൾ നടക്കു​ന്നു​ണ്ടെ​ങ്കി​ലും ബ്രസീ​ലി​ലും മറ്റിട​ങ്ങ​ളി​ലും ഉള്ള കർഷകർ ഈ രീതി പ്രയോ​ഗി​ക്കാൻ വിസമ്മ​തി​ക്കു​ന്നു. എന്തു​കൊണ്ട്‌? കർഷകരെ സംബന്ധി​ച്ചി​ട​ത്തോ​ളം, മനസ്സറി​ഞ്ഞു കീടങ്ങളെ വയലിൽ വിതറു​ന്നത്‌ നഗരങ്ങ​ളി​ലെ വീടു​ക​ളിൽ പാറ്റകളെ വിതറു​ന്ന​തു​പോ​ലെ വിവര​മി​ല്ലാത്ത ഏർപ്പാ​ടാണ്‌. “മിക്ക കർഷക​രു​ടെ​യും ദൃഷ്ടി​യിൽ, എല്ലാ കീടങ്ങ​ളും വിള തീനി​ക​ളാണ്‌. അതു​കൊണ്ട്‌ അവ തങ്ങളുടെ കൃഷി​യി​ട​ത്തിൽ ഉണ്ടായി​രി​ക്കാൻ അവർ ആഗ്രഹി​ക്കു​ന്നില്ല,” പ്രൊ​ഫസർ ബെർട്ടി എന്നോടു പറഞ്ഞു.

ചില കീടങ്ങൾ തങ്ങളുടെ മിത്രങ്ങൾ ആണെന്നു കർഷകർ തിരി​ച്ച​റി​യു​മ്പോൾ മാത്രമേ ജൈവ കീടനി​യ​ന്ത്രണ രീതി പ്രചാരം നേടു​ക​യു​ള്ളൂ എന്നതു വ്യക്തമാണ്‌. ഉദാഹ​ര​ണ​ത്തിന്‌, യു.എസ്‌.എ-യിലെ കാലി​ഫോർണി​യ​യിൽ ഫലോ​ത്‌പാ​ദകർ 1800-കളുടെ അവസാ​ന​ത്തിൽ ഇന്ദ്ര​ഗോ​പ​ങ്ങളെ (കീടങ്ങളെ തിന്നുന്ന പ്രാണി​കൾ) ഉപയോ​ഗ​പ്പെ​ടു​ത്തി​യി​രു​ന്നു. ആ സമയത്ത്‌, ഓസ്‌​ട്രേ​ലി​യ​യിൽനി​ന്നു യാദൃ​ച്ഛി​ക​മാ​യി വന്നെത്തിയ ഉപദ്ര​വ​കാ​രി​ക​ളായ കീടങ്ങൾ നാരക​ത്തോ​പ്പു​ക​ളെ​യും ഓറഞ്ചു തോട്ട​ങ്ങ​ളെ​യും ആക്രമിച്ച്‌ വാസ്‌ത​വ​ത്തിൽ അവയെ ഉന്മൂലനം ചെയ്‌തി​രു​ന്നെന്നു തന്നെ പറയാം. കീടങ്ങളെ നിയ​ന്ത്രി​ച്ചു​കൊണ്ട്‌ കാലി​ഫോർണി​യ​യി​ലെ നാരക​ത്തോ​പ്പു​കളെ രക്ഷിക്കു​ന്ന​തിന്‌ അവയെ തിന്നുന്ന പ്രാണി​കൾക്കു രണ്ടു വർഷത്തിൽ താഴെ മതിയാ​യി​രു​ന്നു!

വ്യതി​രിക്ത നിയന്ത്രണ രീതി

ആശ്രയ​യോ​ഗ്യ​രായ ‘സുരക്ഷാ​പാ​ലകർ’ എന്ന നിലയി​ലുള്ള (ചെറിയ ജോയാന എന്നറി​യ​പ്പെ​ടുന്ന) ഷാവു​നി​ന്യ ഇന്ദ്ര​ഗോ​പ​ത്തി​ന്റെ പങ്ക്‌ ബ്രസീ​ലി​ലെ ചില കർഷകർ ഇപ്പോൾ വീണ്ടും തിരി​ച്ച​റി​യു​ക​യാണ്‌. “ഷാവു​നി​ന്യ ഇന്ദ്ര​ഗോ​പ​ങ്ങ​ളാണ്‌ ഈ തോട്ട​ത്തി​ലെ ശത്രു കീടങ്ങളെ നശിപ്പി​ക്കു​ന്നത്‌” എന്ന്‌ തന്റെ കീഴി​ലുള്ള ഓറഞ്ചു തോട്ട​ത്തി​ലൂ​ടെ നടക്കവേ സാഡ്രൂ എന്നോടു പറഞ്ഞു. ഒരു ഓറഞ്ചു മരത്തിന്റെ അടു​ത്തെ​ത്തി​യ​പ്പോൾ അദ്ദേഹം തളിരി​ല​ക​ളുള്ള ഒരു കമ്പു താഴേക്കു വളച്ചു. പേനാ മുനയു​ടെ വലിപ്പ​മുള്ള, ചെറു സസ്യപ്പു​ഴു​ക്കൾ അഥവാ സസ്യ​പേ​നു​കൾ അനങ്ങാ​തി​രു​ന്നു സസ്യക്കറ വലിച്ചു കുടി​ക്കു​ക​യാ​യി​രു​ന്നു.

എന്നുവ​രി​കി​ലും ഈ സസ്യ​പേ​നു​കളെ ‘സുരക്ഷാ​പാ​ലകർ’ ഭക്ഷണമാ​ക്കി​ക്കൊ​ള്ളും. ചിലതരം ഇന്ദ്ര​ഗോ​പങ്ങൾ അവയുടെ ആയുസ്സിൽ 800 സസ്യ​പേ​നു​കളെ വരെ തിന്നും. അതു​പോ​രേ കാര്യാ​ദി​കളെ മാറ്റി​മ​റി​ക്കാൻ? “മതി, എന്നാൽ ഇന്ദ്ര​ഗോ​പ​ങ്ങൾക്കും മറ്റു പ്രകൃ​തി​ദത്ത ശത്രു​ക്കൾക്കും പെരു​കാൻ ഇടം നൽകും​വി​ധം ഓറഞ്ചു മരങ്ങൾക്കി​ട​യിൽ നിങ്ങൾ ധാരാളം പുല്ലും ചെടി​ക​ളും വളർത്തേ​ണ്ട​തുണ്ട്‌,” സാഡ്രൂ പറഞ്ഞു. ജൈവ കീടനി​യ​ന്ത്രണ രീതികൾ പ്രയോ​ഗി​ക്കു​ന്ന​തി​നു മുമ്പ്‌ ഈ തോട്ട​ത്തിൽ ഓരോ രണ്ടാഴ്‌ച കൂടു​മ്പോ​ഴും രാസ കീടനാ​ശി​നി​കൾ തളിക്കു​മാ​യി​രു​ന്നു എന്നും അദ്ദേഹം പറഞ്ഞു. ഇപ്പോ​ഴാ​കട്ടെ, ഇന്ദ്ര​ഗോ​പങ്ങൾ പോലുള്ള പ്രകൃ​തി​ദത്ത ശത്രുക്കൾ ഉള്ളതി​നാൽ, രണ്ടോ മൂന്നോ മാസം കൂടു​മ്പോ​ഴേ മരുന്ന്‌ അടി​ക്കേ​ണ്ട​തു​ള്ളൂ.

കർഷകർക്ക്‌ ആശ്രയി​ക്കാൻ കഴിയുന്ന പ്രകൃ​തി​ദത്ത കീടങ്ങ​ളിൽ ഒന്നു മാത്ര​മാണ്‌ ഇന്ദ്ര​ഗോ​പങ്ങൾ. 24 മണിക്കൂ​റും പ്രവർത്തി​ക്കുന്ന കീടനി​യ​ന്ത്രണ സേനയി​ലെ ഏതാനും ചില അംഗങ്ങ​ളാണ്‌ തേനീച്ച, കടന്നൽ, പക്ഷികൾ, എട്ടുകാ​ലി​കൾ, തവളകൾ, മരത്തവ​ളകൾ എന്നിവ. രാസവിഷ പ്രയോ​ഗം ഒഴിവാ​ക്കു​ന്ന​തിൽ മത്സ്യങ്ങൾ പോലും സഹായ​മേ​കു​ന്നു. എങ്ങനെ?

ചൈന​യിൽ വെള്ള​പ്പൊ​ക്കം മൂലം നെൽവ​യ​ലു​ക​ളിൽ മത്സ്യം കയറു​ക​യു​ണ്ടാ​യി. അതിനു​ശേഷം കീടനാ​ശി​നി​ക​ളു​ടെ ആവശ്യം കുറഞ്ഞ​താ​യി കിയാ​ങ്‌സൂ പ്രവി​ശ്യ​യി​ലെ നാൻകി​ങ്ങിൽ കൃഷി-വനം വകുപ്പിൽ ഗവേഷ​ക​നായ സിയാവൂ ഫാൻ റിപ്പോർട്ടു ചെയ്യുന്നു. കീടങ്ങളെ കുലുക്കി വെള്ളത്തിൽ ചാടി​ക്കാ​നാ​യി കർഷകർ നെൽച്ചെ​ടി​ക​ളു​ടെ മുകളി​ലൂ​ടെ ഒരു കയറു വലിക്കു​ന്നു. “പ്ലാന്റ്‌ ഹോ​പ്പേ​ഴ്‌സ്‌ എന്ന ഇനം കീടങ്ങൾ നെൽച്ചെ​ടി​യിൽനി​ന്നു താഴെ വീഴു​മ്പോൾ ചത്തതു​പോ​ലെ കിടക്കു​ന്നു. അതു​കൊണ്ട്‌ മത്സ്യങ്ങൾ അവയെ പെട്ടെ​ന്നു​തന്നെ വെട്ടി​വി​ഴു​ങ്ങും” എന്നു ഫാൻ വിശദീ​ക​രി​ച്ചു.

കീടനാ​ശി​നി​ക​ളു​ടെ ഉപയോ​ഗം കുറയ്‌ക്കു​ന്നത്‌ ഉപകാ​രി​ക​ളായ കീടങ്ങൾ വർധി​ക്കാൻ ഇടയാ​ക്കു​ന്നു. കീടങ്ങൾക്കെ​തി​രെ പോരാ​ടു​ന്ന​തിൽ ഈ പ്രാണി​കൾ കീടങ്ങളെ തിന്നുന്ന മത്സ്യങ്ങ​ളോ​ടൊ​പ്പം ചേരുന്നു. ജൈവ കീടനി​യ​ന്ത്രണ രീതി​യു​ടെ സഹായ​ത്താൽ, വിഷകാ​രി​ക​ളായ കീടനാ​ശി​നി​ക​ളു​ടെ ബഹുല​മായ ഉപയോ​ഗം ഒരു കഴിഞ്ഞ​കാല സംഗതി ആയി മാറി​യി​രി​ക്കു​ക​യാണ്‌. തന്മൂലം ആരോ​ഗ്യ​ത്തി​നും പരിസ്ഥി​തി​ക്കും കൈവ​രുന്ന പ്രയോ​ജ​നങ്ങൾ പ്രകട​മാണ്‌.

എന്നാൽ കർഷകർ ഏകീകൃത കീട നിയ​ന്ത്രണം സ്വീക​രി​ച്ചി​രി​ക്കു​ന്നതു പരിസ്ഥി​തി​യെ നന്നാക്കാ​നല്ല, മറിച്ച്‌ സമ്പത്തു വർധി​പ്പി​ക്കാ​നാണ്‌ എന്നതു സത്യം തന്നെ. കീടനാ​ശി​നി​ക​ളു​ടെ ഉപയോ​ഗം വെട്ടി​ക്കു​റ​യ്‌ക്കു​ന്നതു പണം ലാഭി​ക്കു​മ​ല്ലോ, ഒപ്പം കൂടുതൽ ലാഭവും. ഏതു കാലത്തും ഏതു സ്ഥലത്തും അവലം​ബി​ക്കു​ന്ന​തി​നുള്ള ഒരു പ്രേരക ഘടകവു​മാ​യി അതു വർത്തി​ക്കു​ന്നു. അതു മാത്രമല്ല, കൂടുതൽ സാമ്പത്തിക ലാഭം വിഷാം​ശം കുറഞ്ഞ വിളകൾക്കും നല്ല പരിസ്ഥി​തി​ക്കും കളമൊ​രു​ക്കു​ന്നെ​ങ്കിൽ, അപ്പോൾ ഏകീകൃത കീട നിയ​ന്ത്രണം കർഷകർക്കും ഉപഭോ​ക്താ​വി​നും അതു​പോ​ലെ​തന്നെ പരിസ്ഥി​തി​ക്കും പ്രയോ​ജ​നങ്ങൾ കൈവ​രു​ത്തു​ന്നു. ഒരു നിരീ​ക്ഷകൻ അഭി​പ്രാ​യ​പ്പെ​ട്ട​തു​പോ​ലെ, ഏകീകൃത കീട നിയ​ന്ത്ര​ണ​ത്തി​ന്റെ പ്രയോ​ഗ​ത്തി​ലൂ​ടെ “എല്ലാവ​രും പ്രയോ​ജ​നങ്ങൾ കൊയ്യു​ന്നു.”

[അടിക്കു​റി​പ്പു​കൾ]

[21-ാം പേജിലെ ചതുരം]

കീടനാ​ശി​നി ശേഖരം

ലോക​വ്യാ​പ​ക​മാ​യി ഇന്നുമു​തൽ എല്ലാ കർഷക​രും ഏകീകൃത കീട നിയ​ന്ത്രണം പ്രയോ​ഗി​ക്കാൻ തുടങ്ങി​യാ​ലും കീടനാ​ശി​നി പ്രശ്‌നം അങ്ങനെ​യൊ​ന്നും പരിഹ​രി​ക്ക​പ്പെ​ടു​ക​യില്ല. വികസ്വര രാജ്യ​ങ്ങ​ളിൽ, മിച്ചംവന്ന 1,00,000 ടണ്ണില​ധി​കം കീടനാ​ശി​നി​കൾ ശേഖരി​ച്ചു വെച്ചി​ട്ടു​ണ്ടെ​ന്നാണ്‌ ഐക്യ​രാ​ഷ്‌ട്ര ഭക്ഷ്യ-കാർഷിക സംഘടന കണക്കാ​ക്കു​ന്നത്‌. “ഈ ശേഖര​ത്തിൽ അധിക​വും സഹായ വ്യവസ്ഥ​യിൽ ലഭിച്ച കീടനാ​ശി​നി​ക​ളു​ടെ ബാക്കി​യാണ്‌” എന്ന്‌ ‘ഐക്യ​രാ​ഷ്‌ട്ര പരിസ്ഥി​തി പരിപാ​ടി’ പ്രസി​ദ്ധീ​ക​രിച്ച നമ്മുടെ ഗ്രഹം (ഇംഗ്ലീഷ്‌) എന്ന മാസിക പറയുന്നു. വിനാ​ശ​കാ​രി​ക​ളായ പാഴ്‌വ​സ്‌തു​വാ​യി ഇപ്പോൾ കണക്കാ​ക്ക​പ്പെ​ടുന്ന ഡിഡിറ്റി-യുടെ​യും മറ്റു കീടനാ​ശി​നി​ക​ളു​ടെ​യും വൻ ശേഖരം അതിൽ ഉൾപ്പെ​ടു​ന്നു. അവയെ നീക്കം ചെയ്യു​ന്നി​ല്ലെ​ങ്കിൽ “വിപത്തു പ്രതീ​ക്ഷി​ക്കാ​വു​ന്ന​താണ്‌” എന്ന്‌ നമ്മുടെ ഗ്രഹം അഭി​പ്രാ​യ​പ്പെ​ടു​ന്നു.

എന്നുവ​രി​കി​ലും അവയെ നീക്കം ചെയ്‌ത്‌ ഇല്ലാതാ​ക്കുക എന്നതു ചെല​വേ​റിയ ഒരു സംരം​ഭ​മാണ്‌. കുന്നു​കൂ​ടിയ രാസവി​ഷം നീക്കം ചെയ്യു​ന്ന​തിന്‌ ആഫ്രി​ക്ക​യിൽ മാത്രം 10 കോടി ഡോളർ വേണ്ടി​വ​ന്നേ​ക്കാം. അതിനുള്ള പണം ആരു മുടക്കും? രാസവി​ഷങ്ങൾ നൽകിയ രാജ്യ​ങ്ങൾതന്നെ അതു ചെയ്യാ​നാ​ണു ഭക്ഷ്യ-കാർഷിക സംഘടന ആഹ്വാനം ചെയ്യു​ന്നത്‌. എന്നുവ​രി​കി​ലും ഭക്ഷ്യ-കാർഷിക സംഘടന പറയു​ന്ന​ത​നു​സ​രിച്ച്‌, “അമിത​മാ​യി അല്ലെങ്കിൽ അനാവ​ശ്യ​മാ​യി ധാരാളം കീടനാ​ശി​നി പ്രദാനം ചെയ്യു​ന്ന​തിൽ മിക്ക​പ്പോ​ഴും പങ്കു വഹിച്ചി​ട്ടുള്ള കീടനാ​ശി​നി നിർമാണ കമ്പനി​ക​ളിൽനി​ന്നും സഹായം തേടേ​ണ്ട​തുണ്ട്‌.” എന്നാൽ ഇതുവരെ ഈ കമ്പനികൾ “പഴയ കീടനാ​ശി​നി ശേഖരം നീക്കം ചെയ്യു​ന്ന​തി​ലേക്കു സാമ്പത്തിക സംഭാവന ചെയ്യാൻ കൂട്ടാ​ക്കി​യി​ട്ടില്ല.”

[22-ാം പേജിലെ ചതുരം]

വ്യതിയാനം വരുത്തിയ ചെടികൾ—എന്തു​കൊണ്ട്‌ വിവാ​ദ​പരം?

കീടങ്ങൾക്ക്‌ എതി​രെ​യുള്ള പോരാ​ട്ട​ത്തി​ലെ മറ്റൊരു ആയുധ​മാണ്‌ ജൈവ സാങ്കേ​തിക വിദ്യ. ഡിഎൻഎ തന്മാ​ത്ര​യു​ടെ ആന്തര ഘടനയെ കുറി​ച്ചുള്ള മനുഷ്യ​ന്റെ അറിവു വർധി​ക്കു​ന്ന​തി​നാൽ, വ്യത്യസ്‌ത വർഗങ്ങ​ളു​ടെ ഡിഎൻഎ ഭാഗങ്ങൾ സംയോ​ജി​പ്പിച്ച്‌ കീട പ്രതി​രോ​ധ​ശേ​ഷി​യുള്ള സസ്യങ്ങൾ വികസി​പ്പി​ച്ചെ​ടു​ക്കാൻ ഗവേഷ​കർക്കു സാധി​ച്ചി​ട്ടുണ്ട്‌.

ചോള​മാണ്‌ ഒരു ഉദാഹ​രണം. മറ്റൊരു സ്രോ​ത​സ്സിൽനിന്ന്‌ എടുത്ത ഒരു ജീൻ ജനിതക എഞ്ചിനീ​യർമാർ ചോള​ത്തി​ന്റെ ഡിഎൻഎ-യിൽ സ്ഥാപിച്ചു. കീടങ്ങൾക്കു മാരക​മായ ഒരു ജീവകത്തെ ഈ ജീൻ ഉത്‌പാ​ദി​പ്പി​ച്ചു. അതിന്റെ ഫലമോ, കീടബാ​ധയെ പ്രതി​രോ​ധി​ക്കുന്ന ജനിതക വ്യതി​യാ​നം വരുത്തിയ ചോളം.

എന്നുവ​രി​കി​ലും ഇത്തരം സസ്യങ്ങൾ വിവാ​ദ​ത്തി​നു തിരി​കൊ​ളു​ത്തി​യി​രി​ക്കു​ന്നു. ഇവ ആളുകളെ രോഗി​കൾ ആക്കി​യേ​ക്കാം അല്ലെങ്കിൽ തഴച്ചു​വ​ള​രുന്ന കളകളാ​യി അവ മാറി​യേ​ക്കാം എന്നാണ്‌ ഇതിനെ എതിർക്കു​ന്നവർ പറയു​ന്നത്‌. കീടനാ​ശക ജീനോ​ടു കൂടിയ സസ്യങ്ങൾ കീടങ്ങ​ളു​ടെ പ്രതി​രോ​ധ​ശേ​ഷി​യെ വർധി​പ്പി​ച്ചേ​ക്കാം എന്നു ചില ശാസ്‌ത്രജ്ഞർ മുന്നറി​യി​പ്പു നൽകുന്നു. “ജനിതക എഞ്ചിനീ​യ​റി​ങ്ങി​നോ​ടുള്ള നമ്മുടെ അഭിനി​വേ​ശത്തെ നാം വരുതി​യിൽ നിറു​ത്തണം” എന്നാണു പ്രാണി​വി​ജ്ഞാ​നി​യായ ബെർട്ടി​യു​ടെ മുന്നറി​യിപ്പ്‌. “കീടനാ​ശി​നി​കളെ അത്ഭുത​ങ്ങ​ളെന്ന്‌ പാടി​പ്പു​ക​ഴ്‌ത്തിയ 1950-കളിൽ ജനം എത്രമാ​ത്രം ആവേശ​ഭ​രി​തർ ആയിരു​ന്നു എന്ന്‌ ഒന്നു ചിന്തി​ക്കുക. എന്നാൽ അതിന്റെ സത്യാവസ്ഥ ഇന്നു നമുക്ക്‌ അറിയാം. അത്ഭുത കീടനാ​ശി​നി​കൾ അത്യത്ഭുത പ്രാണി​കളെ സൃഷ്ടി​ച്ചി​രി​ക്കു​ന്നു. ജനിതക അത്ഭുത​ങ്ങ​ളെന്ന്‌ ഇന്നു വിശേ​ഷി​പ്പി​ക്ക​പ്പെ​ടുന്ന സസ്യങ്ങൾ എന്തൊക്കെ പ്രശ്‌നങ്ങൾ വരുത്തി​വെ​ച്ചേ​ക്കാ​മെന്ന്‌ ആർക്കറി​യാം?”

എല്ലാ ജൈവ​സം​ബന്ധ പ്രശ്‌ന​ങ്ങ​ളും പരിഹ​രി​ക്ക​പ്പെ​ട്ടാ​ലും ശാസ്‌ത്ര​ജ്ഞ​ന്മാർ ജനിതക ഘടനയിൽ കൈക​ട​ത്തു​ന്ന​തിൽ ചിലർക്കു ധാർമി​ക​മായ ഉത്‌ക​ണ്‌ഠ​യുണ്ട്‌. ജൈവ സാങ്കേ​തിക വിദ്യ പഴയ കീടനാ​ശി​നി പ്രശ്‌നങ്ങൾ പരിഹ​രി​ച്ചാ​ലും സദാചാ​ര​പ​ര​മായ പുതിയ പ്രശ്‌നങ്ങൾ തലപൊ​ക്കു​മെ​ന്നാ​ണു ചിലർ വിചാ​രി​ക്കു​ന്നത്‌.

[23-ാം പേജിലെ ചിത്രം]

ഒരു ഇന്ദ്ര​ഗോ​പം നൂറു​ക​ണ​ക്കി​നു കീടങ്ങളെ അകത്താ​ക്കി​യേ​ക്കാം