കാണാൻ കഴിയുന്ന ഭാഷ!

നിങ്ങൾ എങ്ങനെ​യാണ്‌ നിങ്ങളു​ടെ മാതൃ​ഭാഷ പഠിച്ചത്‌? ഒരുപക്ഷേ കൊച്ചു​കു​ട്ടി ആയിരു​ന്ന​പ്പോൾ നിങ്ങളു​ടെ കുടും​ബാം​ഗ​ങ്ങ​ളും സുഹൃ​ത്തു​ക്ക​ളും ഒക്കെ സംസാ​രി​ക്കു​ന്നതു കേട്ടാ​യി​രി​ക്കാം. മിക്ക ആളുക​ളും ഭാഷ പഠിക്കു​ന്നത്‌ കേട്ടാണ്‌, മറ്റുള്ള​വ​രു​മാ​യി ആശയവി​നി​യമം നടത്തു​ന്ന​താ​കട്ടെ സംസാ​ര​ത്തി​ലൂ​ടെ​യും. ശ്രവണ​ശക്തി ഉള്ളവർ മനസ്സിൽ ആശയ, ധാരണാ രൂപീ​ക​രണം നടത്തു​മ്പോൾ പറയാൻ പോകുന്ന പദങ്ങളും പ്രയോ​ഗ​ങ്ങ​ളും സ്വത​വേ​തന്നെ സംസാ​ര​ഭാ​ഷ​യിൽ ഒന്നു മനസ്സിൽ പറഞ്ഞു​നോ​ക്കു​ന്നു. എന്നാൽ ബധിര​നാ​യി ജനിക്കുന്ന ഒരു കുട്ടിക്ക്‌ മറ്റേ​തെ​ങ്കി​ലും വിധത്തിൽ മനസ്സിൽ ചിന്താ രൂപീ​ക​രണം നടത്താ​നാ​കു​മോ? യാതൊ​രു ശബ്ദവും പുറ​പ്പെ​ടു​വി​ക്കാ​തെ അമൂർത്ത​വും സമൂർത്ത​വു​മായ ആശയങ്ങൾ കൈമാ​റാൻ കഴിയുന്ന ഒരു ഭാഷയു​ണ്ടോ?

കാണാ​വു​ന്ന​തെ​ങ്കി​ലും കേൾക്കാൻ പറ്റാത്തത്‌

ഭാഷാ​പ്രാ​പ്‌തി​യും സാഹച​ര്യ​ങ്ങൾക്ക്‌ അനുസ​രിച്ച്‌ ഭാഷയെ അനുരൂ​പ​പ്പെ​ടു​ത്താ​നുള്ള പ്രാപ്‌തി​യും മനുഷ്യ മനസ്സിന്റെ അത്ഭുത​ങ്ങ​ളിൽ ഒന്നാണ്‌. എന്നാൽ ശ്രവണ​ശക്തി ഇല്ലാത്ത ഒരാൾ ഭാഷ പഠിക്കു​ന്നത്‌ കാതു​കൊണ്ട്‌ ആയിരി​ക്കില്ല, പകരം കണ്ണു​കൊണ്ട്‌ ആയിരി​ക്കും. സന്തോ​ഷ​ക​ര​മെന്നു പറയട്ടെ, ആശയവി​നി​യമം നടത്തു​ന്ന​തി​നുള്ള ഉത്‌ക​ട​മായ ആഗ്രഹം മനുഷ്യ മനസ്സിൽ കുടി​കൊ​ള്ളു​ന്നു. തന്മൂലം പ്രകട​മായ ഏതൊരു പ്രതി​ബ​ന്ധ​ത്തെ​യും മറിക​ട​ക്കാൻ നമുക്കു കഴിയു​ന്നു. ഈ ആഗ്രഹം നിമിത്തം ബധിരർ ലോക​മെ​മ്പാ​ടു​മാ​യി പല ആംഗ്യ​ഭാ​ഷകൾ വികസി​പ്പി​ച്ചെ​ടു​ത്തി​രി​ക്കു​ന്നു. ബധിരർ, സ്വന്തം ബധിര കുടും​ബ​ത്തിൽ വെച്ചോ ബധിര വിദ്യാ​ല​യ​ങ്ങ​ളിൽ വെച്ചോ സമൂഹ​ത്തിൽ വെച്ചോ മറ്റു ബധിര​രു​മാ​യി സമ്പർക്ക​ത്തിൽ വന്നിരി​ക്കു​ന്ന​തി​ന്റെ ഫലമായി കണ്ടു മനസ്സി​ലാ​ക്കാൻ കഴിയുന്ന സുവി​ക​സി​ത​മായ ഒരു ഭാഷാ സമ്പ്രദാ​യം വികാസം പ്രാപി​ച്ചി​രി​ക്കു​ന്നു—അതാണ്‌ ആംഗ്യ​ഭാഷ.

ഐക്യ​നാ​ടു​ക​ളിൽ പാർക്കുന്ന കാളിനെ സംബന്ധി​ച്ചി​ട​ത്തോ​ളം ഈ ഭാഷ ബധിര​രായ മാതാ​പി​താ​ക്ക​ളിൽ നിന്നുള്ള ഒരു ദാനമാ​യി​രു​ന്നു.a ജന്മനാ ബധിരൻ ആയിരു​ന്നെ​ങ്കി​ലും വളരെ ചെറു​പ്പ​ത്തിൽ തന്നെ അവന്‌ അമേരി​ക്കൻ ആംഗ്യ​ഭാഷ ഉപയോ​ഗിച്ച്‌ താൻ ഉദ്ദേശി​ക്കുന്ന സാധനങ്ങൾ ഏതൊക്കെ ആണെന്ന്‌ കാണി​ക്കാ​നും ആംഗ്യ​ങ്ങളെ തമ്മിൽ കൂട്ടി​യി​ണ​ക്കാ​നും അമൂർത്ത ആശയങ്ങൾ പ്രകടി​പ്പി​ക്കാ​നും കഴിയു​മാ​യി​രു​ന്നു. ആംഗ്യ​ഭാഷ ഉപയോ​ഗി​ക്കുന്ന ബധിര​രായ മാതാ​പി​താ​ക്ക​ളു​ടെ ബധിര​രായ കുഞ്ഞു​ങ്ങ​ളിൽ അധിക​വും 10-ഉം 12-ഉം മാസം ഉള്ളപ്പോൾ മുതൽ ആംഗ്യങ്ങൾ കാണിച്ചു തുടങ്ങു​ന്നു. ബധിര ലോക​ത്തേക്ക്‌ ഒരു യാത്ര (ഇംഗ്ലീഷ്‌) എന്ന പുസ്‌തകം ഇങ്ങനെ വിശദീ​ക​രി​ക്കു​ന്നു: “ഒരു ഭാഷ സ്വാഭാ​വി​ക​മായ രീതി​യിൽ ആർജി​ച്ചെ​ടു​ക്കാ​നും തങ്ങളുടെ കുട്ടി​ക​ളി​ലേക്ക്‌ അതു കൈമാ​റാ​നും ഉള്ള പ്രാപ്‌തി മസ്‌തി​ഷ്‌ക​ത്തിൽ രൂഢമൂ​ല​മാണ്‌ എന്ന്‌ ഭാഷാ​ശാ​സ്‌ത്ര വിദഗ്‌ധർ ഇപ്പോൾ തിരി​ച്ച​റി​യു​ന്നു. ഈ രീതി​യിൽ ആർജി​ച്ചെ​ടുത്ത്‌ കൈമാ​റു​ന്നത്‌ ആംഗ്യ​ഭാ​ഷ​യാ​ണോ സംസാ​ര​ഭാ​ഷ​യാ​ണോ എന്നത്‌ തീർത്തും അപ്രധാ​ന​മാണ്‌.”

മൂന്നു തലമു​റ​ക​ളാ​യി ബധിര​ത​യുള്ള ഒരു കുടും​ബ​ത്തി​ലാണ്‌ റഷ്യക്കാ​രി​യായ സ്‌ഫി​യെറ്റ ജനിച്ചത്‌. തന്റെ ബധിര സഹോ​ദ​ര​നോ​ടൊ​പ്പം അവൾ റഷ്യൻ ആംഗ്യ​ഭാഷ സ്വായ​ത്ത​മാ​ക്കി. മൂന്നാം വയസ്സിൽ, സ്‌കൂ​ളിൽ പോകാൻ പ്രായ​മാ​കാത്ത ബധിര​രായ കുട്ടി​കൾക്കു വേണ്ടി​യുള്ള വിദ്യാ​ല​യ​ത്തിൽ ചേർന്ന​പ്പോ​ഴേ​ക്കും സ്വാഭാ​വിക രീതി​യിൽ ആർജി​ച്ചെ​ടുത്ത അവളുടെ ആംഗ്യ​ഭാ​ഷാ പ്രാപ്‌തി​കൾ നല്ലവണ്ണം വികാസം പ്രാപി​ച്ചി​രു​ന്നു. സ്‌ഫി​യെറ്റ ഇങ്ങനെ പറയുന്നു: “ബധിര​രായ മറ്റു കുട്ടി​കൾക്ക്‌ ആംഗ്യ​ഭാഷ അറിഞ്ഞു​കൂ​ടാ​യി​രു​ന്നു. അവർ എന്നിൽ നിന്ന്‌ അത്‌ പഠിക്കു​മാ​യി​രു​ന്നു.” ബധിര​രായ പല കുട്ടി​കൾക്കും ആംഗ്യ​ഭാഷ ഉപയോ​ഗി​ക്കാത്ത, ശ്രവണ​ശ​ക്തി​യുള്ള മാതാ​പി​താ​ക്കൾ ആയിരു​ന്നു ഉണ്ടായി​രു​ന്നത്‌. പലപ്പോ​ഴും സ്‌കൂ​ളി​ലെ ബധിര​രായ മുതിർന്ന കുട്ടികൾ ആംഗ്യ​ഭാഷ ഉപയോ​ഗി​ക്കു​ന്നതു കണ്ടാണ്‌ ചെറിയ കുട്ടികൾ അത്‌ പഠിച്ചി​രു​ന്നത്‌. അങ്ങനെ അവർക്ക്‌ അനായാ​സം ആശയവി​നി​യമം നടത്താൻ കഴിഞ്ഞു.

ഇന്ന്‌, തങ്ങളുടെ കുട്ടി​ക​ളു​മാ​യി ആശയവി​നി​യമം നടത്തു​ന്ന​തി​നാ​യി ആംഗ്യ​ഭാഷ പഠിക്കുന്ന ശ്രവണ​ശ​ക്തി​യുള്ള മാതാ​പി​താ​ക്ക​ളു​ടെ എണ്ണം കൂടി​വ​രി​ക​യാണ്‌. അതിന്റെ ഫലമായി, സ്‌കൂ​ളിൽ പോകു​ന്ന​തി​നു മുമ്പു തന്നെ ഫലപ്ര​ദ​മാ​യി ആശയവി​നി​യമം നടത്തു​ന്ന​തിന്‌ ബധിര​രായ ഈ കുട്ടി​കൾക്കു കഴിയു​ന്നു. കാനഡ​യി​ലുള്ള ആൻഡ്രൂ​വി​ന്റെ കാര്യ​ത്തിൽ ഇത്‌ സത്യമാ​യി​രു​ന്നു. അവന്റെ മാതാ​പി​താ​ക്കൾ ശ്രവണ​ശ​ക്തി​ക്കു തകരാ​റൊ​ന്നും ഇല്ലാത്ത​വ​രാണ്‌. എങ്കിലും അവർ ആംഗ്യ​ഭാഷ പഠിക്കു​ക​യും വളരെ ചെറു പ്രായ​ത്തിൽ തന്നെ അത്‌ ഉപയോ​ഗിച്ച്‌ അവനു​മാ​യി ആശയവി​നി​യമം നടത്തു​ക​യും ചെയ്‌തു. അങ്ങനെ അവർ അവന്‌ ഭാഷാ​പ​ര​മാ​യി ഒരു അടിസ്ഥാ​നം ഇട്ടു​കൊ​ടു​ത്തു. വരും വർഷങ്ങ​ളിൽ അവന്‌ അതു വികസി​പ്പി​ക്കാൻ കഴിയു​മാ​യി​രു​ന്നു. ഇപ്പോൾ ആ മുഴു കുടും​ബ​ത്തി​നും ആംഗ്യ​ഭാഷ ഉപയോ​ഗിച്ച്‌ ഏതു വിഷയ​ത്തെ​ക്കു​റി​ച്ചും അന്യോ​ന്യം ആശയവി​നി​യമം നടത്താൻ കഴിയും.

ബധിരർക്ക്‌ സംസാര ഭാഷയിൽ ചിന്തി​ക്കാ​തെ തന്നെ അമൂർത്ത​വും സമൂർത്ത​വു​മായ ചിന്തകൾ രൂപീ​ക​രി​ക്കാൻ കഴിയും. നാം ഓരോ​രു​ത്ത​രും നമ്മുടെ സ്വന്തം ഭാഷയിൽ ചിന്തകൾ രൂപീ​ക​രി​ക്കു​ന്ന​തു​പോ​ലെ ബധിര​രായ പലയാ​ളു​ക​ളും അവരുടെ ആംഗ്യ​ഭാ​ഷ​യിൽ ചിന്തി​ക്കു​ന്നു.

ഭാഷാ വൈവി​ധ്യം

ലോക​മെ​മ്പാ​ടു​മുള്ള ബധിര സമൂഹങ്ങൾ സ്വന്തമാ​യി ആംഗ്യ​ഭാഷ വികസി​പ്പി​ച്ചെ​ടു​ക്കു​ക​യോ മറ്റ്‌ ആംഗ്യ​ഭാ​ഷ​ക​ളു​ടെ സവി​ശേ​ഷ​തകൾ കടം​കൊ​ള്ളു​ക​യോ ആണ്‌ ചെയ്‌തി​രി​ക്കു​ന്നത്‌. ഇന്ന്‌ നിലവി​ലുള്ള അമേരി​ക്കൻ ആംഗ്യ​ഭാ​ഷ​യി​ലെ ആംഗ്യ​ങ്ങ​ളിൽ ചിലത്‌ 180 വർഷം മുമ്പ്‌ ഫ്രഞ്ച്‌ ആംഗ്യ​ഭാ​ഷ​യിൽനിന്ന്‌ ഉരുത്തി​രി​ഞ്ഞു വന്നവയാണ്‌. പ്രസ്‌തുത ആംഗ്യങ്ങൾ ഐക്യ​നാ​ടു​ക​ളിൽ ഉപയോ​ഗ​ത്തിൽ ഉണ്ടായി​രുന്ന ആംഗ്യ​ങ്ങ​ളു​മാ​യി സംയോ​ജി​പ്പി​ക്ക​പ്പെ​ടു​ക​യും അങ്ങനെ ഇന്നത്തെ അമേരി​ക്കൻ ആംഗ്യ​ഭാഷ രൂപം​കൊ​ള്ളു​ക​യും ചെയ്‌തു. ആംഗ്യ​ഭാ​ഷകൾ പല വർഷങ്ങൾകൊ​ണ്ടാണ്‌ വികാസം പ്രാപി​ക്കു​ന്നത്‌, ഓരോ തലമുറ കഴിയു​ന്തോ​റും മെച്ച​പ്പെ​ടു​ക​യും ചെയ്യുന്നു.

സാധാ​ര​ണ​ഗ​തി​യിൽ ഒരു രാജ്യത്തെ ആംഗ്യ​ഭാ​ഷ​യ്‌ക്ക്‌ അവിടെ സംസാ​രി​ക്ക​പ്പെ​ടുന്ന ഭാഷയു​മാ​യി ബന്ധമു​ണ്ടാ​കില്ല. ഉദാഹ​ര​ണ​ത്തിന്‌, പോർട്ടോ​റി​ക്കോ​യി​ലെ സംസാര ഭാഷ സ്‌പാ​നിഷ്‌ ആണ്‌, എന്നാൽ അവിടു​ത്തെ ആംഗ്യ​ഭാഷ അമേരി​ക്കൻ ആംഗ്യ​ഭാ​ഷ​യാണ്‌. ഇംഗ്ലണ്ടി​ലെ​യും ഐക്യ​നാ​ടു​ക​ളി​ലെ​യും സംസാര ഭാഷ ഇംഗ്ലീഷ്‌ ആണെങ്കി​ലും ഇംഗ്ലണ്ടിൽ ബ്രിട്ടീഷ്‌ ആംഗ്യ​ഭാ​ഷ​യാണ്‌ ഉപയോ​ഗി​ക്കു​ന്നത്‌. അത്‌ അമേരി​ക്കൻ ആംഗ്യ​ഭാ​ഷ​യിൽനി​ന്നു വളരെ വ്യത്യ​സ്‌ത​മാണ്‌. അതു​പോ​ലെ​തന്നെ മെക്‌സി​ക്കൻ ആംഗ്യ​ഭാഷ ലാറ്റിൻ അമേരി​ക്ക​യി​ലെ പല ആംഗ്യ​ഭാ​ഷ​ക​ളിൽനി​ന്നും വ്യത്യ​സ്‌ത​മാണ്‌.

ആംഗ്യ​ഭാ​ഷ പഠിക്കു​മ്പോൾ അതിന്റെ ശരിക്കും സങ്കീർണ​മായ വശങ്ങളും ഭാവസ​മ്പ​ന്ന​ത​യും ഒരുവ​നിൽ മതിപ്പ്‌ ഉളവാ​ക്കു​ന്നു. മിക്ക വിഷയ​ങ്ങ​ളും ആംഗ്യ​ഭാഷ ഉപയോ​ഗിച്ച്‌ വിശദീ​ക​രി​ക്കാൻ കഴിയും. ചിന്തക​ളു​ടെ​യും ആശയങ്ങ​ളു​ടെ​യും കാര്യ​ത്തി​ലും അത്‌ അതു​പോ​ലെ​തന്നെ ഭാവസ​മ്പ​ന്ന​മാണ്‌. കഥകൾ പറയാ​നും കവിത ചൊല്ലാ​നും ചരിത്ര വിവര​ണങ്ങൾ നൽകാ​നും ബൈബിൾ സത്യം പഠിപ്പി​ക്കാ​നും സ്വാഭാ​വിക ആംഗ്യ​ഭാഷ ഉപയോ​ഗ​പ്പെ​ടു​ത്തി​ക്കൊണ്ട്‌ ബധിരർക്കു​വേണ്ടി സാഹി​ത്യ​ങ്ങ​ളു​ടെ വീഡി​യോ കാസെ​റ്റു​കൾ തയ്യാറാ​ക്കു​ന്ന​തി​നുള്ള വർധിച്ചു വരുന്ന പ്രവണത കാണു​ന്നു​വെ​ന്നത്‌ സന്തോ​ഷ​ക​ര​മായ ഒരു സംഗതി​യാണ്‌. ആംഗ്യ​ഭാഷ അറിയാ​വു​ന്ന​വ​രു​ടെ എണ്ണം പല രാജ്യ​ങ്ങ​ളി​ലും വർധിച്ചു വരിക​യാണ്‌.

ഒരിക്ക​ലും കേട്ടി​ട്ടി​ല്ലാത്ത കാര്യങ്ങൾ വായിക്കൽ

കേൾവി​ശക്തി ഉള്ളവർക്ക്‌ വായി​ക്കുന്ന സമയത്ത്‌ സാധാ​ര​ണ​ഗ​തി​യിൽ പദങ്ങളു​ടെ ഉച്ചരി​ച്ചു​കേട്ട ശബ്ദങ്ങൾ ഓർമ​വ​രു​ന്നു. ശ്രവണ​സ്‌മരണ ഉള്ളതു​കൊ​ണ്ടാണ്‌ ഇതു സാധ്യ​മാ​കു​ന്നത്‌. അവർക്ക്‌ വായി​ക്കു​ന്ന​തിൽ അധിക​പ​ങ്കും മനസ്സി​ലാ​കു​ന്നത്‌ ആ കാര്യങ്ങൾ മുമ്പ്‌ കേട്ടി​ട്ടു​ള്ള​തി​നാ​ലാണ്‌. മിക്ക ഭാഷക​ളി​ലും പദങ്ങളു​ടെ ലിഖിത രൂപങ്ങൾക്ക്‌ അവ ദ്യോ​തി​പ്പി​ക്കുന്ന ആശയങ്ങ​ളോട്‌ സാദൃ​ശ്യ​മു​ണ്ടാ​കില്ല. ശ്രവണ​ശ​ക്തി​യുള്ള പലരും ഈ അവ്യവ​സ്ഥിത സമ്പ്രദാ​യം അല്ലെങ്കിൽ ലിഖിത വ്യവസ്ഥ പഠി​ച്ചെ​ടു​ക്കു​ന്നത്‌ അതിനെ ഉച്ചരിച്ചു കേട്ട ശബ്ദങ്ങളു​മാ​യി ബന്ധപ്പെ​ടു​ത്തി​യാണ്‌. അങ്ങനെ അവർക്ക്‌ വായി​ക്കുന്ന കാര്യങ്ങൾ മനസ്സി​ലാ​കു​ന്നു. എന്നാൽ, ജീവി​ത​ത്തിൽ ഒരിക്കൽ പോലും ഒരു ശബ്ദമോ പദമോ ഭാഷയോ ഉച്ചരി​ക്കു​ന്നതു കേട്ടി​ട്ടി​ല്ലാ​ത്ത​വ​രെ​ക്കു​റിച്ച്‌ ഒന്നു സങ്കൽപ്പി​ച്ചു നോക്കൂ! കേൾക്കാൻ കഴിയാത്ത ഒരു ഭാഷയു​ടെ കാര്യ​ത്തിൽ അവ്യവ​സ്ഥിത ലിഖിത സമ്പ്രദാ​യം പഠിക്കു​ന്നത്‌ ദുഷ്‌ക​ര​വും വിഫല​വും ആയിരി​ക്കാ​വു​ന്ന​താണ്‌. അത്തര​മൊ​രു ഭാഷ വായി​ക്കു​ന്നത്‌ ബധിരർക്ക്‌, പ്രത്യേ​കി​ച്ചും തീരെ ചെറു​പ്പ​ത്തി​ലേ കേൾവി​ശക്തി പൂർണ​മാ​യി നഷ്ടപ്പെ​ട്ട​വർക്ക്‌ അല്ലെങ്കിൽ ജന്മനാ ബധിര​രാ​യി​ട്ടു​ള്ള​വർക്ക്‌, വലിയ വെല്ലു​വി​ളി ആയിരി​ക്കു​ന്ന​തിൽ ഒട്ടും അതിശ​യി​ക്കാ​നില്ല!

ലോക​മെ​മ്പാ​ടു​മുള്ള പല ബാല-ബധിര ബോധന കേന്ദ്ര​ങ്ങ​ളും കുട്ടികൾ ഭാഷ പഠിച്ചു തുടങ്ങുന്ന ഘട്ടത്തിൽത്തന്നെ ആംഗ്യ​ഭാഷ ഉപയോ​ഗി​ക്കു​ന്ന​തി​ന്റെ പ്രയോ​ജ​നങ്ങൾ കണ്ടെത്തി​യി​രി​ക്കു​ന്നു. (20, 22 എന്നീ പേജു​ക​ളി​ലെ ചതുരങ്ങൾ കാണുക.) ബധിര​നായ കൊച്ചു​കു​ട്ടി​യെ സ്വാഭാ​വിക ആംഗ്യ​ഭാ​ഷ​യു​മാ​യി സമ്പർക്ക​ത്തിൽ വരാൻ അനുവ​ദി​ക്കു​ന്ന​തും ഭാഷാ​പ​ര​മായ ഒരു അടിസ്ഥാ​നം ഇടുന്ന​തും വിദ്യാ​ഭ്യാ​സ രംഗത്തും സാമൂ​ഹിക രംഗത്തും അതു​പോ​ലെ​തന്നെ പിൽക്കാ​ലത്ത്‌ ലിഖിത ഭാഷ ആർജി​ച്ചെ​ടു​ക്കു​ന്ന​തി​ലും മികച്ച നേട്ടം കൈവ​രി​ക്കു​ന്ന​തി​നുള്ള അടിസ്ഥാ​ന​മി​ടു​മെന്ന്‌ അത്തരം കേന്ദ്രങ്ങൾ കണ്ടെത്തി​യി​രി​ക്കു​ന്നു.

ഐക്യ​രാ​ഷ്‌ട്ര വിദ്യാ​ഭ്യാ​സ ശാസ്‌ത്രീയ സാംസ്‌കാ​രിക സംഘട​ന​യു​ടെ ബധിര വിദ്യാ​ഭ്യാ​സ കമ്മീഷൻ ഇങ്ങനെ പ്രസ്‌താ​വി​ച്ചു: “ആംഗ്യ​ഭാ​ഷയെ അവഗണി​ക്കു​ന്ന​തോ ബധിര ബോധന പരിപാ​ടി​ക​ളി​ലെ അതിന്റെ വികസ​ന​ത്തിൽ സജീവ​മായ പങ്കു വഹിക്കാ​തി​രി​ക്കു​ന്ന​തോ മേലാൽ സ്വീകാ​ര്യ​മല്ല.” മാതാ​പി​താ​ക്കൾ തങ്ങളുടെ ബധിര​നായ കുട്ടി​ക്കു​വേണ്ടി ഏതു തരം വിദ്യാ​ഭ്യാ​സം തിര​ഞ്ഞെ​ടു​ത്താ​ലും കുട്ടി​യു​ടെ പുരോ​ഗ​തി​യിൽ അവർ രണ്ടു പേരും പൂർണ പങ്കു വഹി​ക്കേ​ണ്ടത്‌ അതി​പ്ര​ധാ​ന​മാ​ണെന്നു പറയേ​ണ്ടി​യി​രി​ക്കു​ന്നു.—1996 നവംബർ 8 ലക്കം ഉണരുക!യിലെ “എന്റെ കുട്ടി​യു​മാ​യി ആശയവി​നി​യമം നടത്താൻ ഞാൻ മറ്റൊരു ഭാഷ പഠിച്ചു” എന്ന ലേഖനം കാണുക.

ബധിര ലോകത്തെ മനസ്സി​ലാ​ക്കൽ

ബധിര​രായ കുട്ടികൾ മുതിർന്നു കഴിയു​മ്പോൾ പലപ്പോ​ഴും, തങ്ങൾ മാതാ​പി​താ​ക്ക​ളിൽനിന്ന്‌ ഏറ്റവു​മ​ധി​കം ആഗ്രഹി​ച്ചത്‌ അവരു​മാ​യുള്ള ആശയവി​നി​മ​യ​മാ​ണെന്ന്‌ പറയാ​റുണ്ട്‌. ബധിര​നായ ജാക്ക്‌ തന്റെ അമ്മ പ്രായം​ചെന്ന്‌ മരിക്കാ​റാ​യ​പ്പോൾ അവരു​മാ​യി ആശയവി​നി​യമം നടത്താൻ ആഗ്രഹി​ച്ചു. അമ്മയ്‌ക്ക്‌ മകനോട്‌ എന്തോ പറയണ​മെന്ന്‌ ഉണ്ടായി​രു​ന്നു. എന്നാൽ അവർക്ക്‌ അത്‌ എഴുതി കാണി​ക്കാൻ ആകുമാ​യി​രു​ന്നില്ല. ആംഗ്യ​ഭാഷ അറിഞ്ഞും കൂടാ​യി​രു​ന്നു. തുടർന്ന്‌ അവർ അബോ​ധാ​വ​സ്ഥ​യി​ലാ​കു​ക​യും പിന്നീട്‌ മരിക്കു​ക​യും ചെയ്‌തു. നിരാ​ശാ​ജ​ന​ക​മായ ആ അന്ത്യ നിമി​ഷ​ങ്ങ​ളെ​ക്കു​റി​ച്ചുള്ള ഓർമ ജാക്കിന്റെ മനസ്സിനെ മഥിച്ചു. തന്റെ അനുഭവം ബധിര​രായ കുട്ടി​ക​ളുള്ള മാതാ​പി​താ​ക്കൾക്ക്‌ ഈ ഉപദേശം നൽകാൻ ജാക്കിനെ പ്രേരി​പ്പി​ച്ചു: “നിങ്ങളു​ടെ ബധിര​നായ കുട്ടി​യു​മാ​യി ഒഴു​ക്കോ​ടെ ആശയവി​നി​യമം നടത്താ​നും ആശയങ്ങ​ളും വികാ​ര​ങ്ങ​ളും ചിന്തക​ളും സ്‌നേ​ഹ​വും അർഥവ​ത്താ​യി കൈമാ​റാ​നും നിങ്ങൾ ആഗ്രഹി​ക്കു​ന്നെ​ങ്കിൽ ആംഗ്യ​ഭാഷ ഉപയോ​ഗി​ക്കുക. . . . അത്‌ എന്റെ കാര്യ​ത്തിൽ വളരെ വൈകി​പ്പോ​യി. നിങ്ങളു​ടെ കാര്യ​ത്തി​ലോ?”

പലരും ബധിര​രെ​ക്കു​റിച്ച്‌ വർഷങ്ങ​ളാ​യി തെറ്റി​ദ്ധാ​ര​ണകൾ വെച്ചു​പു​ലർത്തി​യി​രി​ക്കു​ന്നു. ബധിരർക്ക്‌ യാതൊ​ന്നും കേൾക്കാൻ കഴിയാ​ത്ത​തു​കൊണ്ട്‌ അവർക്ക്‌ ഒന്നും​തന്നെ അറിഞ്ഞു​കൂ​ടെന്ന വീക്ഷണ​മാണ്‌ ചിലർക്കു​ള്ളത്‌. മാതാ​പി​താ​ക്കൾ, ബധിര​രായ തങ്ങളുടെ കുട്ടി​കൾക്ക്‌ അമിത സംരക്ഷണം നൽകു​ക​യും അവരെ പുറം ലോക​ത്തേക്കു വിടാൻ ഭയക്കു​ക​യും ചെയ്‌തി​രി​ക്കു​ന്നു. ചില സംസ്‌കാ​ര​ങ്ങ​ളിൽ ബധിരരെ “മൂകർ” അല്ലെങ്കിൽ “ഊമർ” ആയി തെറ്റായി ചിത്രീ​ക​രി​ച്ചി​രി​ക്കു​ന്നു. എന്നാൽ ബധിരർക്ക്‌ സാധാ​ര​ണ​ഗ​തി​യിൽ സംസാര വൈക​ല്യം ഇല്ലെന്ന​താണ്‌ വാസ്‌തവം. അവർക്ക്‌ ശ്രവണ​ശക്തി ഇല്ലെന്നേ ഉള്ളൂ. മറ്റു ചിലർ ആംഗ്യ​ഭാ​ഷയെ പ്രാകൃ​ത​വും സംസാര ഭാഷ​യെ​ക്കാൾ തരംതാ​ണ​തും ആയി വീക്ഷി​ക്കു​ന്നു. അത്തരം അവഗണ​ന​യു​ടെ ഫലമായി ബധിര​രായ ചില വ്യക്തി​കൾക്ക്‌ തങ്ങൾ അടിച്ച​മർത്ത​പ്പെ​ടു​ന്ന​താ​യും തെറ്റി​ദ്ധ​രി​ക്ക​പ്പെ​ടു​ന്ന​താ​യും തോന്നു​ന്ന​തിൽ അത്ഭുത​മില്ല.

ഐക്യ​നാ​ടു​ക​ളിൽ വളർന്നു​വന്ന ജോസഫ്‌ 1930-കളിൽ ഒരു കൊച്ചു​കു​ട്ടി​യാ​യി​രി​ക്കെ ബധിര വിദ്യാ​ല​യ​ത്തിൽ ചേർന്നു. എന്നാൽ ആ വിദ്യാ​ല​യ​ത്തിൽ ആംഗ്യ​ഭാഷ ഉപയോ​ഗി​ക്കു​ന്നത്‌ വിലക്കി​യി​രു​ന്നു. അവനും അവന്റെ സഹപാ​ഠി​കൾക്കും അധ്യാ​പകർ പറയു​ന്ന​തൊ​ന്നും മനസ്സി​ലാ​യി​രു​ന്നി​ല്ലെ​ങ്കിൽ കൂടി ആംഗ്യ​ഭാഷ ഉപയോ​ഗി​ച്ച​തി​ന്റെ പേരിൽ അധ്യാ​പകർ പലപ്പോ​ഴും അവരെ ശിക്ഷിച്ചു. മനസ്സി​ലാ​ക്കാ​നും മനസ്സി​ലാ​ക്ക​പ്പെ​ടാ​നും അവർ എത്രമാ​ത്രം ആഗ്രഹി​ച്ചെ​ന്നോ! ബധിര​രായ കുട്ടി​കൾക്ക്‌ പരിമി​ത​മായ വിദ്യാ​ഭ്യാ​സം മാത്രം ലഭിക്കുന്ന രാജ്യ​ങ്ങ​ളി​ലെ ചില കുട്ടി​കൾക്ക്‌ തീരെ കുറച്ച്‌ ഔപചാ​രിക വിദ്യാ​ഭ്യാ​സമേ ലഭിക്കു​ന്നു​ള്ളൂ. ഉദാഹ​ര​ണ​ത്തിന്‌ പശ്ചിമാ​ഫ്രി​ക്ക​യി​ലെ ഉണരുക! ലേഖകൻ ഇങ്ങനെ പറയുന്നു: “ആഫ്രി​ക്ക​യി​ലെ ഭൂരി​പക്ഷം ബധിര​രു​ടെ​യും ജീവിതം ക്ലേശപൂർണ​വും പരിതാ​പ​ക​ര​വു​മാണ്‌. വൈക​ല്യം ഉള്ളവരിൽ ഏറ്റവും കൂടുതൽ അവഗണി​ക്ക​പ്പെ​ടു​ന്ന​തും ഏറ്റവും കുറച്ച്‌ മനസ്സി​ലാ​ക്ക​പ്പെ​ടു​ന്ന​തും ഒരുപക്ഷേ ബധിരർ ആയിരി​ക്കാം.”

നാമെ​ല്ലാം മറ്റുള്ളവർ നമ്മെ മനസ്സി​ലാ​ക്ക​ണ​മെന്ന്‌ ആഗ്രഹി​ക്കു​ന്ന​വ​രാണ്‌. എന്നാൽ സങ്കടക​ര​മെന്നു പറയട്ടെ, ചിലർ ബധിര​നായ ഒരാളെ കാണു​മ്പോൾ അയാളു​ടെ കുറവു​ക​ളെ​ക്കു​റി​ച്ചു മാത്രമേ ചിന്തി​ക്കു​ന്നു​ള്ളൂ. പ്രത്യ​ക്ഷ​ത്തിൽ തോന്നുന്ന പ്രാപ്‌തി​ക്കു​റ​വു​കൾക്ക്‌ ബധിര​നായ ഒരു വ്യക്തി​യു​ടെ യഥാർഥ പ്രാപ്‌തി​കളെ മൂടി​ക്ക​ള​യാ​നാ​വും. നേരേ​മ​റിച്ച്‌, ബധിര​രായ പല വ്യക്തി​ക​ളും തങ്ങളെ​ത്തന്നെ കഴിവു​ള്ളവർ ആയിട്ടാണ്‌ കാണു​ന്നത്‌. അന്യോ​ന്യം ഒഴു​ക്കോ​ടെ ആശയവി​നി​യമം നടത്താ​നും ആത്മാഭി​മാ​നം വളർത്തി​യെ​ടു​ക്കാ​നും വിദ്യാ​ഭ്യാ​സ​പ​ര​മാ​യും സാമൂ​ഹി​ക​മാ​യും ആത്മീയ​മാ​യും നേട്ടങ്ങൾ കൈവ​രി​ക്കാ​നും അവർ പ്രാപ്‌ത​രാണ്‌. സങ്കടക​ര​മെന്നു പറയട്ടെ, ബധിര​രായ പലർക്കും മറ്റുള്ള​വ​രിൽനിന്ന്‌ മോശ​മായ പെരു​മാ​റ്റം അനുഭ​വി​ക്കേണ്ടി വന്നിട്ടു​ള്ളതു നിമിത്തം അവരിൽ ചിലർ ശ്രവണ​ശക്തി ഉള്ളവരെ അവിശ്വ​സി​ക്കു​ന്നു. എന്നാൽ, ശ്രവണ​ശക്തി ഉള്ളവർ ബധിര സംസ്‌കാ​ര​വും സ്വാഭാ​വിക ആംഗ്യ​ഭാ​ഷ​യും മനസ്സി​ലാ​ക്കു​ന്ന​തിൽ ആത്മാർഥ​മായ താത്‌പ​ര്യം കാണി​ക്കു​ക​യും ബധിരരെ കഴിവു​ള്ള​വ​രാ​യി കാണു​ക​യും ചെയ്യു​മ്പോൾ അത്‌ എല്ലാവർക്കും പ്രയോ​ജ​ന​ക​ര​മാണ്‌.

നിങ്ങൾ ഒരു ആംഗ്യ​ഭാഷ പഠിക്കാൻ ആഗ്രഹി​ക്കു​ന്നെ​ങ്കിൽ നാം ചിന്തി​ക്കുന്ന കാര്യ​ങ്ങ​ളും വിശക​ലനം നടത്തുന്ന ആശയങ്ങ​ളും ആണ്‌ ഭാഷയാ​യി പുറത്തു വരുന്നത്‌ എന്ന കാര്യം ഓർമി​ക്കുക. ഒരു ആംഗ്യ​ഭാഷ നന്നായി പഠിക്ക​ണ​മെ​ങ്കിൽ നാം ആ ഭാഷയിൽ ചിന്തി​ക്കേ​ണ്ട​തുണ്ട്‌. ഒരു ആംഗ്യ​ഭാ​ഷാ നിഘണ്ടു​വിൽ നോക്കി ആംഗ്യങ്ങൾ പഠിച്ച​തു​കൊ​ണ്ടു മാത്രം ആ ഭാഷ നന്നായി കൈകാ​ര്യം ചെയ്യാ​നാ​വി​ല്ലാ​ത്തത്‌ അതു​കൊ​ണ്ടാണ്‌. നിത്യ​ജീ​വി​ത​ത്തിൽ ആംഗ്യ​ഭാഷ ഉപയോ​ഗി​ക്കു​ന്ന​വ​രിൽനിന്ന്‌, അതായത്‌ ബധിര​രിൽനിന്ന്‌, അത്‌ പഠിക്ക​രു​തോ? ഒരു ഭാഷ പഠിക്കാൻ ആഗ്രഹി​ക്കു​ന്നെ​ങ്കിൽ ആ ഭാഷ സ്വന്തം ഭാഷ ആയിട്ടു​ള്ള​വ​രിൽനിന്ന്‌ അത്‌ പഠിക്കു​ന്നത്‌ വ്യത്യ​സ്‌ത​വും സ്വാഭാ​വി​ക​വു​മായ രീതി​യിൽ ചിന്തി​ക്കാ​നും ആശയ രൂപീ​ക​രണം നടത്താ​നും നിങ്ങളെ സഹായി​ക്കും.

സമ്പന്നമായ ഒരു ആംഗ്യ​ഭാ​ഷ​യു​ടെ ഉപയോ​ഗ​ത്തി​ലൂ​ടെ ലോക​മെ​മ്പാ​ടു​മുള്ള ബധിരർ തങ്ങൾക്കു ചെയ്യാ​നാ​കുന്ന കാര്യ​ങ്ങ​ളു​ടെ സീമകൾ വിപു​ല​മാ​ക്കി​ക്കൊ​ണ്ടി​രി​ക്കു​ക​യാണ്‌. അവർ ആംഗ്യ​ഭാഷ ഉപയോ​ഗി​ക്കു​ന്നത്‌ നേരിൽ കാണൂ.

[അടിക്കു​റിപ്പ്‌]

[20-ാം പേജിലെ ചതുരം]

“ബധിരരെ ആംഗ്യ​ഭാ​ഷ​യിൽ കാര്യങ്ങൾ പഠിപ്പി​ക്കാ​നും പിന്നെ ഇംഗ്ലീഷ്‌ പഠിപ്പി​ക്കാ​നും ന്യൂ​യോർക്ക്‌ ഒരുങ്ങു​ന്നു”

1998 മാർച്ച്‌ 5-ലെ ദ ന്യൂ​യോർക്ക്‌ ടൈം​സി​ന്റെ ഒരു മുഖ്യ തലക്കെ​ട്ടാ​യി​രു​ന്നു അത്‌. ഫെലിഷ്യ ആർ. ലി ഇങ്ങനെ എഴുതി: “എല്ലാ അധ്യാ​പ​ക​രും, മുഖ്യ​മാ​യും ആംഗ്യ​ഭാഷ—ചിഹ്നങ്ങ​ളെ​യും ചേഷ്ടക​ളെ​യും അടിസ്ഥാ​ന​പ്പെ​ടു​ത്തി​യു​ള്ളത്‌—പഠിപ്പി​ക്ക​ത്ത​ക്ക​വണ്ണം നഗരത്തി​ലെ ഏക ബധിര പൊതു​വി​ദ്യാ​ലയം അതിന്റെ പാഠ്യ​പ​ദ്ധതി പരിഷ്‌ക​രി​ക്കു​ന്ന​താ​യി​രി​ക്കും. ബധിര വിദ്യാർഥി​ക​ളു​ടെ വിദ്യാ​ഭ്യാ​സ​ത്തിൽ വരുന്ന ആ മാറ്റം ഒരു നാഴി​ക​ക്ക​ല്ലാ​യി വാഴ്‌ത്ത​പ്പെ​ടു​ന്നു.” “ബധിര​രു​ടെ പ്രാഥ​മിക ഭാഷ വാചി​കമല്ല, പകരം ദൃശ്യ​മാ​ണെ​ന്നും അമേരി​ക്കൻ ആംഗ്യ​ഭാഷ ഉപയോ​ഗി​ക്കുന്ന സ്‌കൂ​ളു​കൾ മറ്റു സ്‌കൂ​ളു​ക​ളെ​ക്കാൾ നന്നായി വിദ്യാർഥി​കളെ പഠിപ്പി​ക്കു​ന്നു​വെ​ന്നും ഗവേഷണം തെളി​യി​ക്കു​ന്നു​വെന്ന്‌” പല വിദ്യാ​ഭ്യാ​സ പ്രവർത്ത​ക​രും “പറയുന്ന”തായി അവർ വിശദീ​ക​രി​ക്കു​ന്നു.

“ബധിര വിദ്യാർഥി​കളെ വൈക​ല്യ​മു​ള്ള​വ​രാ​യി​ട്ടല്ല, പകരം രണ്ടു ഭാഷ പഠിക്കുന്ന വിദ്യാർഥി​ക​ളാ​യി കാണണ​മെന്ന്‌ അവർ പറയുന്നു.”

ബോസ്റ്റ​ണി​ലെ നോർത്ത്‌-ഈസ്റ്റേൺ യൂണി​വേ​ഴ്‌സി​റ്റി​യി​ലെ പ്രൊ​ഫസർ ഹാർലൻ ലെയ്‌ൻ ഇങ്ങനെ പറഞ്ഞു: “[ന്യൂ​യോർക്ക്‌ സ്‌കൂൾ] ഒരു സംരം​ഭ​ത്തി​ന്റെ മുൻനി​ര​യി​ലാണ്‌ എന്നു ഞാൻ കരുതു​ന്നു.” ഒരു ദ്വിതീയ, വായനാ ഭാഷയാ​യി ഇംഗ്ലീഷ്‌ പഠിപ്പി​ക്കുക എന്നതാണ്‌ ആത്യന്തിക ലക്ഷ്യ​മെന്ന്‌ അദ്ദേഹം ഉണരുക!യോട്‌ പറഞ്ഞു.

[21-ാം പേജിലെ ചതുരം/ചിത്രങ്ങൾ]

അത്‌ ഒരു ഭാഷതന്നെ!

ശ്രവണ​ശ​ക്തി​യുള്ള ചിലർ, ആംഗ്യ​ഭാഷ മൂകാ​ഭി​ന​യ​ത്തി​ന്റെ ഒരു സങ്കീർണ രൂപമാ​ണെന്ന തെറ്റായ നിഗമ​ന​ത്തിൽ എത്തി​ച്ചേർന്നി​ട്ടുണ്ട്‌. അത്‌ ഒരു ചിത്ര​ഭാഷ ആണെന്നു പറയു​ന്ന​വ​രും ഉണ്ട്‌. ആംഗ്യ​ഭാഷ ഉപയോ​ഗി​ക്കു​ന്നവർ മുഖവും ശരീര​വും കൈക​ളും ചുറ്റു​മുള്ള ഇടവും ഒക്കെ ഫലപ്ര​ദ​മാ​യി ഉപയോ​ഗ​പ്പെ​ടു​ത്തു​ന്നു എങ്കിലും മിക്ക ആംഗ്യ​ങ്ങൾക്കും അവ ദ്യോ​തി​പ്പി​ക്കുന്ന ചിന്തക​ളോട്‌ തീരെ കുറച്ചു സാദൃ​ശ്യ​മേ ഉള്ളൂ, അല്ലെങ്കിൽ ഒട്ടും സാദൃ​ശ്യം ഇല്ല. ഉദാഹ​ര​ണ​ത്തിന്‌, അമേരി​ക്കൻ ആംഗ്യ​ഭാ​ഷ​യിൽ “ഉണ്ടാക്കുക” എന്ന ആശയം ദ്യോ​തി​പ്പി​ക്കു​ന്ന​തിന്‌ മുഷ്ടികൾ ചുരു​ട്ടി​യിട്ട്‌ ഒന്ന്‌ മറ്റേതി​ന്റെ മുകളിൽ വെച്ച്‌ തിരി​ക്കു​ന്ന​താ​യി കാണി​ക്കു​ന്നു. സാധാരണ ഉപയോ​ഗ​ത്തി​ലു​ള്ളത്‌ ആണെങ്കി​ലും ആംഗ്യ​ഭാഷ അറിയി​ല്ലാ​ത്ത​വർക്ക്‌ ഈ ആംഗ്യം കൊണ്ട്‌ ഉദ്ദേശി​ക്കുന്ന അർഥം വ്യക്തമാ​യി പിടി​കി​ട്ടു​ക​യില്ല. റഷ്യൻ ആംഗ്യ​ഭാ​ഷ​യിൽ “ആവശ്യ​പ്പെ​ടുക” എന്നതിനെ കുറി​ക്കു​ന്ന​തിന്‌ രണ്ടു കൈക​ളും കൊണ്ടുള്ള ആംഗ്യ​മാണ്‌ ഉപയോ​ഗി​ക്കു​ന്നത്‌. അതായത്‌ ഓരോ തള്ളവി​ര​ലും മൂന്നാ​മത്തെ വിരലി​നെ സ്‌പർശി​ക്കും വിധത്തിൽ പിടി​ച്ചു​കൊണ്ട്‌ കൈകൾ സമാന്തര വൃത്താ​കൃ​തി​യിൽ ചലിപ്പി​ക്കു​ന്നു. (ഈ പേജിലെ ഫോ​ട്ടോ​കൾ കാണുക.) പല അമൂർത്ത ആശയങ്ങൾ ആംഗ്യ​ഭാ​ഷ​യി​ലൂ​ടെ ദ്യോ​തി​പ്പി​ക്ക​പ്പെ​ടു​ന്ന​തി​നാൽ അത്‌ ചിത്ര​രൂ​പ​ത്തിൽ ആശയ പ്രകാ​ശനം നടത്തുന്ന ഒരു ഭാഷയാ​യി​രി​ക്കുക സാധ്യമല്ല. വർണനാ​ത്മ​ക​മായ സമൂർത്ത വസ്‌തു​ക്കളെ വർണി​ക്കാൻ ഉപയോ​ഗി​ക്കുന്ന ആംഗ്യങ്ങൾ മാത്രമേ ഇതിന്‌ അപവാ​ദ​മാ​യു​ള്ളൂ. “വീടി​നെ​യോ” “ശിശു​വി​നെ​യോ” വർണി​ക്കാ​നാ​യി ഉപയോ​ഗി​ക്കുന്ന ആംഗ്യങ്ങൾ ഉദാഹ​ര​ണ​ങ്ങ​ളാണ്‌.—ഈ പേജിലെ ഫോ​ട്ടോ​കൾ കാണുക.

ഭാഷയു​ടെ മറ്റൊരു മാനദണ്ഡം സമൂഹം അംഗീ​ക​രി​ക്കുന്ന ഒരു പദക്രമം വാക്യ​ങ്ങൾക്ക്‌ ഉണ്ടായി​രി​ക്കും എന്നതാണ്‌. ആംഗ്യ​ഭാ​ഷ​കൾക്കും അത്തരം വ്യാകരണ ഘടനയുണ്ട്‌. ഉദാഹ​ര​ണ​ത്തിന്‌, അമേരി​ക്കൻ ആംഗ്യ​ഭാ​ഷ​യിൽ ഒരു വാചക​ത്തി​ന്റെ പ്രതി​പാ​ദ്യ വിഷയ​മാണ്‌ സാധാ​ര​ണ​ഗ​തി​യിൽ ആദ്യം പറയു​ന്നത്‌. പിന്നെ​യാണ്‌ അതിന്റെ വിശദീ​ക​രണം നൽകു​ന്നത്‌. അതു​പോ​ലെ​തന്നെ, സംഭവ​ങ്ങളെ അവ നടക്കുന്ന ക്രമം അനുസ​രിച്ച്‌ പറയു​ന്നത്‌ പല ആംഗ്യ​ഭാ​ഷ​ക​ളു​ടെ​യും ഒരു അടിസ്ഥാന സവി​ശേഷത ആണ്‌.

ഇതിനു പുറമേ, പല മുഖഭാ​വ​ങ്ങ​ളും വ്യാകരണ ധർമം നിർവ​ഹി​ക്കു​ന്നു. അതായത്‌ ചോദ്യ​വും ആജ്ഞയും തമ്മിലുള്ള വ്യത്യാ​സം എടുത്തു കാട്ടു​ന്ന​തി​നും സോപാ​ധിക പ്രസ്‌താ​വ​ന​യെ​യും സാധാരണ പ്രസ്‌താ​വ​ന​യെ​യും വേർതി​രി​ച്ചു കാണി​ക്കു​ന്ന​തി​നും അവ സഹായി​ക്കു​ന്നു. ആംഗ്യ​ഭാ​ഷ​യു​ടെ ദൃശ്യ​സ്വ​ഭാ​വം നിമിത്തം ഇവയും അതുല്യ​മായ മറ്റ്‌ അനേകം സവി​ശേ​ഷ​ത​ക​ളും അതു വികസി​പ്പി​ച്ചെ​ടു​ത്തി​രി​ക്കു​ന്നു.

[ചിത്രങ്ങൾ]

അമേരിക്കൻ ആംഗ്യ​ഭാ​ഷ​യിൽ “ഉണ്ടാക്കുക” എന്നതിനെ ദ്യോ​തി​പ്പി​ക്കുന്ന ആംഗ്യം

റഷ്യൻ ആംഗ്യ​ഭാ​ഷ​യിൽ “ആവശ്യ​പ്പെ​ടുക” എന്നതിനെ കുറി​ക്കുന്ന ആംഗ്യം

അമേരിക്കൻ ആംഗ്യ​ഭാ​ഷ​യിൽ “വീടിനെ” കാണി​ക്കാ​നാ​യി ഉപയോ​ഗി​ക്കുന്ന ആംഗ്യം

അമേരിക്കൻ ആംഗ്യ​ഭാ​ഷ​യിൽ “ശിശു​വി​നെ” വർണി​ക്കാ​നാ​യി ഉപയോ​ഗി​ക്കുന്ന ആംഗ്യം

[22-ാം പേജിലെ ചതുരം]

യഥാർഥ ഭാഷകൾ

“പൊതു​വേ ആളുകൾ വിശ്വ​സി​ക്കു​ന്ന​തു​പോ​ലെ ആംഗ്യ​ഭാ​ഷകൾ മൂകാ​ഭി​ന​യ​മോ വെറും അംഗവി​ക്ഷേ​പ​ങ്ങ​ളോ വിദ്യാ​ഭ്യാ​സ പ്രവർത്ത​ക​രു​ടെ കണ്ടുപി​ടി​ത്ത​ങ്ങ​ളോ തദ്ദേശീ​യർ ഉപയോ​ഗി​ക്കുന്ന സംസാര ഭാഷയു​ടെ പ്രതീ​ക​ങ്ങ​ളോ അല്ല. ബധിര സമൂഹം ഉള്ളിട​ത്തൊ​ക്കെ ആംഗ്യ​ഭാ​ഷ​ക​ളും ഉണ്ട്‌. ലോക​മെ​മ്പാ​ടു​മുള്ള സംസാര ഭാഷക​ളിൽ കണ്ടുവ​രുന്ന തരം വ്യാകരണ വ്യവസ്ഥ​യുള്ള, വ്യതി​രി​ക്ത​മായ, ഒരു സമ്പൂർണ ഭാഷയാണ്‌ അവ ഓരോ​ന്നും.”

“[ബധിര​രായ] കുട്ടി​കളെ അധരചലന ഗ്രഹണ​വും സംസാ​ര​വും പഠിപ്പി​ക്കു​ന്ന​തിൽ ശ്രദ്ധ കേന്ദ്രീ​ക​രിച്ച” നിക്കരാ​ഗ്വ​യി​ലെ “സ്‌കൂ​ളു​ക​ളിൽ, അതേ രീതി പരീക്ഷിച്ച മറ്റേ​തൊ​രു സ്‌കൂ​ളി​ന്റെ​യും കാര്യ​ത്തി​ലെ​ന്ന​പോ​ലെ, ഫലങ്ങൾ മോശ​മാ​യി​രു​ന്നു. എന്നാൽ അതൊരു പ്രശ്‌ന​മാ​യി​രു​ന്നില്ല. കളിസ്ഥ​ല​ങ്ങ​ളിൽ വെച്ചും സ്‌കൂൾ ബസ്സുക​ളിൽ വെച്ചും ഒക്കെ കുട്ടികൾ അവരു​ടേ​തായ ആംഗ്യ വ്യവസ്ഥ വികസി​പ്പി​ച്ചെ​ടു​ത്തു . . . താമസി​യാ​തെ ആ വ്യവസ്ഥ ലെങ്വാ​ച്ചെ ദെ സിഗ്നോസ്‌ നിക്കാ​രാ​ഗ്വെൻസെ എന്ന്‌ ഇപ്പോൾ വിളി​ക്ക​പ്പെ​ടുന്ന ആംഗ്യ​ഭാ​ഷ​യാ​യി വികാസം പ്രാപി​ച്ചു.” ബധിര​രായ കുട്ടി​ക​ളു​ടെ ഇളം തലമുറ ഇപ്പോൾ കൂടുതൽ ഒഴുക്കുള്ള ഒരു ഭാഷ വികസി​പ്പി​ച്ചെ​ടു​ത്തി​രി​ക്കു​ക​യാണ്‌. അതിന്റെ പേര്‌ ഇഡ്യോ​മാ ദെ സിഗ്നോസ്‌ നിക്കാ​രാ​ഗ്വെൻസെ എന്നാണ്‌.—സ്റ്റിവൻ പിങ്കർ എഴുതിയ ഭാഷാ വാസന (ഇംഗ്ലീഷ്‌).

[23-ാം പേജിലെ ചിത്രങ്ങൾ]

“അദ്ദേഹം കടയിൽ പോയ ശേഷം ജോലി​ക്കു പോയി” എന്ന്‌ അമേരി​ക്കൻ ആംഗ്യ​ഭാ​ഷ​യിൽ കാണി​ക്കുന്ന ഒരു വിധം

1. കടയിൽ

2. അദ്ദേഹം

3. പോകു​ന്നു

4. കഴിഞ്ഞ്‌

5. പോകു​ന്നു

6. ജോലിക്ക്‌