മറക്കുക, പൊറു​ക്കുക—അത്‌ സാധ്യ​മോ?

അത്‌ അരങ്ങേ​റി​യിട്ട്‌ അര നൂറ്റാ​ണ്ടി​ല​ധി​കം കഴിഞ്ഞി​രി​ക്കു​ന്നു. അതേ, 1945-ൽ അവസാ​നിച്ച രണ്ടാം ലോക മഹായു​ദ്ധം. ഇന്നോളം നടന്നി​ട്ടുള്ള യുദ്ധങ്ങ​ളിൽ വെച്ച്‌ ഏറ്റവും കിരാ​ത​വും വിനാ​ശ​ക​വു​മായ ഒന്നായി​രു​ന്നു ആ ആഗോള യുദ്ധം.

രണ്ടാം ലോക മഹായു​ദ്ധം ആറു വർഷം നീണ്ടു​നി​ന്നു. സൈനി​കേ​തരർ ഉൾപ്പെടെ അഞ്ചു കോടി​യോ​ളം ആളുക​ളു​ടെ ജീവൻ അത്‌ അപഹരി​ച്ചു, മറ്റു നിരവധി പേർക്ക്‌ ശാരീ​രി​ക​വും മാനസി​ക​വും വൈകാ​രി​ക​വു​മായ വൈക​ല്യ​ങ്ങൾ വരുത്തി​വെച്ചു. ആ വിനാശക യുദ്ധകാ​ലത്തു ജീവിച്ച പലരെ​യും സംബന്ധി​ച്ചി​ട​ത്തോ​ളം ആ കൊടും ക്രൂര​ത​ക​ളെ​യും കൊല്ല​പ്പെട്ട പ്രിയ​പ്പെ​ട്ട​വ​രെ​യും കുറി​ച്ചുള്ള വേദനി​പ്പി​ക്കുന്ന ഓർമകൾ ഇന്നും മാഞ്ഞു​പോ​യി​ട്ടില്ല.

ലക്ഷക്കണ​ക്കി​നു നിരപ​രാ​ധി​കളെ കൂട്ടക്കു​രു​തി ചെയ്‌ത​തുൾപ്പെടെ നാസികൾ കാട്ടി​ക്കൂ​ട്ടിയ കൊടും ക്രൂര​ത​ക​ളും ആളുക​ളു​ടെ ഓർമ​യി​ലുണ്ട്‌. യൂറോ​പ്പി​ലും ഏഷ്യയി​ലും ശത്രു സൈന്യ​ങ്ങൾ സാധാ​ര​ണ​ക്കാ​രായ ആളുകളെ കൊ​ന്നൊ​ടു​ക്കി​യും ബലാൽസം​ഗം ചെയ്‌തും കൊള്ള​യ​ടി​ച്ചും വിറപ്പി​ച്ചും​കൊണ്ട്‌ കൊടും ക്രൂര​തകൾ കാട്ടി. ഇതിനു പുറമേ വിമാ​നാ​ക്ര​മ​ണങ്ങൾ നിരപ​രാ​ധി​ക​ളായ നിരവധി സ്‌ത്രീ​പു​രു​ഷ​ന്മാ​രു​ടെ​യും കുട്ടി​ക​ളു​ടെ​യും ജീവിതം തകർത്തു, അനേകർക്കു പരു​ക്കേറ്റു, ഒട്ടേറെ പേർ മരിച്ചു. ലോക​ത്തി​നു ചുറ്റു​മുള്ള വിവിധ പോർക്ക​ള​ങ്ങ​ളിൽവെച്ച്‌ സൈനി​കർക്കും കൊടിയ കഷ്ടതകൾ സഹി​ക്കേ​ണ്ടി​വന്നു.

മാനസി​ക​വും വൈകാ​രി​ക​വു​മായ മുറി​വു​കൾ

ഇന്നു ജീവി​ച്ചി​രി​ക്കു​ന്ന​വ​രും രണ്ടാം ലോക മഹായു​ദ്ധം കണ്ടവരു​മായ പലരു​ടെ​യും കാര്യ​ത്തിൽ അന്ന്‌ അരങ്ങേ​റിയ ഭീകര സംഭവങ്ങൾ ഏൽപ്പിച്ച മാനസി​ക​വും വൈകാ​രി​ക​വു​മായ മുറി​വു​ക​ളിൽ പലതും മാഞ്ഞു​പോ​യി​ട്ടില്ല. തങ്ങളുടെ മനസ്സിൽനിന്ന്‌ ബീഭത്സ​മായ, കയ്‌പേ​റിയ ആ ഓർമ​ക​ളെ​ല്ലാം മായ്‌ച്ചു കളയാൻ അവർക്ക്‌ ആഗ്രഹ​മുണ്ട്‌. എന്നാൽ അവർക്ക്‌ അതിനു സാധി​ക്കു​ന്നില്ല. ചിലരെ സംബന്ധി​ച്ചി​ട​ത്തോ​ളം ആ ഓർമകൾ ഒരു കരിനി​ഴ​ലാ​യി അവരെ വിടാതെ പിന്തു​ട​രു​ന്നു.

എന്നാൽ ചിലർ അവ മറക്കാൻ ആഗ്രഹി​ക്കു​ന്നില്ല. അത്‌ അവർ പ്രതി​കാ​രം ചെയ്യാൻ ആഗ്രഹി​ക്കു​ന്ന​തു​കൊ​ണ്ടാ​കാം അല്ലെങ്കിൽ മരിച്ച​വരെ കുറി​ച്ചുള്ള ഓർമകൾ വെച്ചു​പൂ​ജി​ക്കാൻ ആഗ്രഹി​ക്കു​ന്ന​തു​കൊ​ണ്ടാ​കാം. അതിനു പുറമേ, കഴിഞ്ഞ​കാ​ല​ങ്ങ​ളിൽ നടമാ​ടിയ കൊടും ക്രൂര​തകൾ ഒരിക്ക​ലും ആവർത്തി​ക്ക​രു​തെന്ന ആശയിൽ അവ മാനവ​കു​ടും​ബ​ത്തി​ന്റെ ഓർമ​യിൽ കെടാതെ കാത്തു​സൂ​ക്ഷി​ക്ക​ണ​മെന്ന്‌ പരക്കെ അഭി​പ്രാ​യ​മുണ്ട്‌.

ഏതാനും വർഷം മുമ്പ്‌, അതായത്‌ 1994-95-ൽ, ഡി ദിനത്തി​ന്റെ​യും (1944 ജൂണിൽ സഖ്യ കക്ഷികൾ നോർമാൻഡി​യിൽ വന്നിറ​ങ്ങിയ ദിവസം) രണ്ടാം ലോക മഹായു​ദ്ധ​ത്തിൽ യൂറോ​പ്യൻ മേഖല​യി​ലെ യുദ്ധം അവസാ​നി​ച്ച​തി​ന്റെ​യും (1945 മേയിൽ) 50-ാം വാർഷി​കാ​ഘോഷ സമയത്തെ അന്തരീക്ഷം, ആ സംഭവ​ങ്ങൾക്കു ദൃക്‌സാ​ക്ഷി​ക​ളാ​യി​രുന്ന പലരെ​യും സംബന്ധി​ച്ചി​ട​ത്തോ​ളം അവ മറക്കാ​നും പൊറു​ക്കാ​നും വളരെ ബുദ്ധി​മു​ട്ടാ​ണെന്നു വെളി​പ്പെ​ടു​ത്തി. മിക്ക​പ്പോ​ഴും മുൻ ശത്രുക്കൾ തമ്മിലുള്ള അനുര​ഞ്‌ജ​ന​ത്തി​ന്റേ​തായ ഏതൊരു നീക്കവും തടസ്സ​പ്പെ​ടു​ന്നു. അതു​കൊണ്ട്‌, നോർമാൻഡി​യിൽ സഖ്യക​ക്ഷി​കൾ കാലു​കു​ത്തി​യ​തി​ന്റെ സ്‌മാ​ര​കാ​ഘോ​ഷ​ത്തിന്‌ ജർമൻ പ്രതി​നി​ധി​കളെ ക്ഷണിക്കാൻ ബ്രിട്ടീഷ്‌ ഭടന്മാർ വിസമ്മ​തി​ച്ചു.

രണ്ടാം ലോക മഹായു​ദ്ധ​ത്തിൽ നാസികൾ ചെയ്‌തു കൂട്ടിയ കൊടും ക്രൂര​തകൾ മറക്കു​ക​യും പൊറു​ക്കു​ക​യും ചെയ്യു​ന്ന​തി​ലുള്ള ബുദ്ധി​മു​ട്ടി​നെ കുറിച്ച്‌ എഴുത്തു​കാ​ര​നായ വ്‌ളാ​ഡി​മിർ ഷാങ്കാ​ലാ​വിച്ച്‌ ഇങ്ങനെ പറഞ്ഞു: “അത്തരം ഘോര​മായ കുറ്റകൃ​ത്യ​ത്തി​ന്റെ കാര്യ​ത്തിൽ, സ്വാഭാ​വിക പ്രവണത . . . രോഷം​കൊ​ള്ളാ​നും മറക്കാ​തി​രി​ക്കാൻ കഠിന​മാ​യി ശ്രമി​ക്കാ​നും നൂറൻബർഗ്‌ വിചാ​ര​ണ​യി​ലെ ന്യായാ​ധി​പ​ന്മാർ വാഗ്‌ദാ​നം ചെയ്‌ത​തു​പോ​ലെ കുറ്റവാ​ളി​കളെ ഭൂമി​യു​ടെ അറ്റങ്ങൾവ​രെ​യും പിന്തു​ട​രാ​നും ആണ്‌.” അതേ എഴുത്തു​കാ​രൻ തുടർന്ന്‌ ഇപ്രകാ​രം പറഞ്ഞു: “വിശുദ്ധ ലൂക്കൊ​സി​ന്റെ സുവി​ശേ​ഷ​ത്തിൽ രേഖ​പ്പെ​ടു​ത്തി​യി​രി​ക്കുന്ന, ദൈവ​ത്തോ​ടുള്ള യേശു​വി​ന്റെ പ്രാർഥ​ന​യി​ലെ വരികൾ നമുക്ക്‌ നേരെ തിരിച്ച്‌ ഇങ്ങനെ പറയാൻ സാധി​ക്കും: “കർത്താവേ ഇവർ ചെയ്യു​ന്നത്‌ എന്താ​ണെന്ന്‌ ഇവർക്ക്‌ അറിയാ​വു​ന്ന​തു​കൊണ്ട്‌ ഇവരോട്‌ ക്ഷമിക്ക​രു​തേ.”—ലൂക്കൊസ്‌ 23:34 താരത​മ്യം ചെയ്യുക.

സങ്കടക​ര​മെന്നു പറയട്ടെ, 1945 തുടങ്ങി ഇന്നുവരെ കംബോ​ഡിയ, റുവാണ്ട, ബോസ്‌നിയ തുടങ്ങി പല സ്ഥലങ്ങളി​ലും നടന്നതു​പോ​ലുള്ള കൊടും ക്രൂര​തകൾ ഭൂമി​യിൽ രക്തപ്പു​ഴകൾ ഒഴുക്കി​യി​രി​ക്കു​ന്നു. ഈ കൊടും ക്രൂര​തകൾ കോടി​ക്ക​ണ​ക്കിന്‌ ആളുക​ളു​ടെ ജീവൻ അപഹരി​ച്ചി​രി​ക്കു​ന്നു, എണ്ണമറ്റ വിധവ​മാ​രെ​യും അനാഥ​രെ​യും സൃഷ്ടി​ച്ചി​രി​ക്കു​ന്നു, ജീവി​തങ്ങൾ പിച്ചി​ച്ചീ​ന്തി​യി​രി​ക്കു​ന്നു, ആളുക​ളിൽ ബീഭത്സ​മായ ഓർമകൾ അവശേ​ഷി​പ്പി​ച്ചി​രി​ക്കു​ന്നു.

ഈ 20-ാം നൂറ്റാണ്ട്‌ അഭൂത​പൂർവ​മായ ക്രൂര​ത​യു​ടെ കാലമാ​ണെ​ന്നു​ള്ള​തിന്‌ സംശയ​മില്ല. ഈ യുഗ​ത്തെ​ക്കു​റിച്ച്‌ ബൈബിൾ ദീർഘ​കാ​ലം മുമ്പു​തന്നെ കൃത്യ​മാ​യി പ്രവചി​ച്ച​തു​പോ​ലെ മനുഷ്യർ “ഉഗ്രന്മാ​രും” “സൽഗു​ണ​ദ്വേ​ഷി​ക​ളും” ആണെന്നു തെളി​ഞ്ഞി​രി​ക്കു​ന്നു.—2 തിമൊ​ഥെ​യൊസ്‌ 3:1-5; വെളി​പ്പാ​ടു 6:4-8.

നാം ചെയ്യേ​ണ്ടത്‌ എന്താണ്‌?

ഇത്തരം മൃഗീ​യ​ത​കളെ നേരി​ടു​മ്പോൾ ആളുകൾ വ്യത്യ​സ്‌ത​മാ​യി പ്രതി​ക​രി​ക്കു​ന്നു. എന്നാൽ നമ്മുടെ കാര്യ​മോ? നാം ഓർക്ക​ണ​മോ, അതോ മറക്കണ​മോ? ഓർക്കുക എന്നതു​കൊണ്ട്‌ അർഥമാ​ക്കു​ന്നത്‌ മറക്കാൻ വിസമ്മ​തി​ച്ചു​കൊണ്ട്‌ ഒരുവന്റെ മുൻ ശത്രു​ക്കൾക്കു നേരെ കൊടിയ ശത്രുത വെച്ചു​പു​ലർത്തു​ന്ന​തി​നെ​യാ​ണോ? അതു​പോ​ലെ​തന്നെ പൊറു​ക്കുക എന്നതു​കൊണ്ട്‌ അർഥമാ​ക്കു​ന്നത്‌ വേദനി​പ്പി​ക്കുന്ന ഓർമ​കളെ പാടേ തുടച്ചു മാറ്റി​ക്കൊണ്ട്‌ മറക്കു​ന്ന​തി​നെ​യാ​ണോ?

നമ്മുടെ കാലത്തും കഴിഞ്ഞ കാലത്തും അരങ്ങേ​റി​യി​ട്ടുള്ള ഘോര​മായ കുറ്റകൃ​ത്യ​ങ്ങ​ളെ​ക്കു​റിച്ച്‌ മനുഷ്യ​വർഗ​ത്തി​ന്റെ സ്രഷ്ടാ​വായ യഹോ​വ​യാം ദൈവം എന്താണ്‌ വിചാ​രി​ക്കു​ന്നത്‌? കുറ്റവാ​ളി​ക​ളോട്‌ അവൻ പൊറു​ക്കു​മോ? കൊടും ക്രൂര​തകൾ മൂലം മരണമടഞ്ഞ ഇരകൾക്കാ​യി പകരം ചോദി​ക്കാൻ ദൈവം വളരെ താമസി​ച്ചു​പോ​യി​ല്ലേ? കൊടും ക്രൂര​തകൾ എന്നെങ്കി​ലും അവസാ​നി​ക്കും എന്ന്‌ ഉറച്ചു വിശ്വ​സി​ക്കാൻ സാധി​ക്കു​മോ? ഈ സങ്കീർണ പ്രശ്‌നങ്ങൾ സർവശ​ക്ത​നായ ദൈവം എങ്ങനെ​യാ​ണു നേരെ​യാ​ക്കുക?

[4-ാം പേജിലെ ചിത്രം]

കൂട്ടക്കുരുതിക്ക്‌ ഇരയാ​യ​വ​രു​ടെ മക്കൾ അഭയാർഥി ക്യാമ്പിൽ

[കടപ്പാട്‌]

UN PHOTO 186797/J. Isaac

[3-ാം പേജിലെ ചിത്ര​ത്തിന്‌ കടപ്പാട്‌]

U.S. Navy photo