ഒരു ഷെരീഫിന്റെ ക്ഷമാപണം
“മുമ്പിലുള്ള പരിശോധനകളെ നേരിടാൻ ശക്തീകരിക്കപ്പെട്ടു” എന്ന 1996 ഡിസംബർ 22 ലക്കം ഉണരുക!-യിലെ ലേഖനത്തിൽ എഡ്വാർഡ് മിഹാലെക് പ്രതിപാദിച്ച ഷെരീഫ്, ടോം വിൽ ലെയിൻ ആയിരുന്നു. അനുഭവകഥയിൽ മിഹാലെക് ഇങ്ങനെ വിവരിച്ചിരുന്നു:
“യു.എസ്.എ.-യിലെ ടെക്സാസിലുള്ള വൊർടനിലെ ഷെരീഫ് കോപംകൊണ്ടു ജ്വലിക്കുകയായിരുന്നു. നാലാം പ്രാവശ്യവും എന്നെ ജയിലിലേക്കു കൊണ്ടുപോകവേ അയാൾ അലറി: “‘തനിക്ക് എന്തുകൊണ്ട് കൽപ്പനകൾ അനുസരിച്ചുകൂടാ?”’
“‘എനിക്ക് ഇതു ചെയ്യാനുള്ള പൂർണ അവകാശമുണ്ട്,’ ഞാൻ തിരിച്ചടിച്ചു. ഇതു ഷെരീഫിനെ ഒന്നുകൂടെ രോഷംകൊള്ളിച്ചു. അയാൾ എന്നെ ഒരു ബ്ലാക്ക്ജാക്കുകൊണ്ട് അടിക്കാൻ തുടങ്ങി. മറ്റ് ഉദ്യോഗസ്ഥന്മാരും അയാളോടൊപ്പം കൂടി. തങ്ങളുടെ തോക്കിന്റെ പാത്തികൊണ്ട് അവർ എന്നെ അടിച്ചു.”
1960-കളുടെ ആരംഭത്തിൽ ഷെരീഫ് ലെയിനുവേണ്ടി ജോലി ചെയ്തിരുന്ന മേരി പെറെസ് എന്ന സ്ത്രീ അടുത്തയിടെ ഇപ്രകാരം എഴുതുകയുണ്ടായി: “ഞാൻ ഒരു യഹോവയുടെ സാക്ഷിയാണെന്ന് അദ്ദേഹത്തിന് അറിയാമായിരുന്നു. എഡ് മിഹാലെകിനെ പീഡിപ്പിച്ച വിധം അദ്ദേഹം എന്നോടു പറഞ്ഞു. തന്റെ പ്രവൃത്തികളെക്കുറിച്ച് അദ്ദേഹം ഖേദിക്കുന്നതായി മറ്റു സാക്ഷികളോടു പറയാൻ എന്നോട് അഭ്യർഥിച്ചു. സാക്ഷികൾ നല്ലവരും നിയമം അനുസരിക്കുന്നവരുമാണെന്ന വസ്തുത തനിക്ക് അറിയില്ലായിരുന്നെന്ന് അദ്ദേഹം പറഞ്ഞു. അദ്ദേഹത്തിന് ആത്മാർഥമായ ഖേദമുണ്ടായിരുന്നു.”
മേരി കൂട്ടിച്ചേർത്തു: “ഏതാനും വർഷം മുമ്പ് ഷെരീഫ് മരിച്ചെങ്കിലും അദ്ദേഹം നടത്തിയ ക്ഷമാപണം ഈ കത്തിലൂടെ അറിയിക്കാനാകുമെന്ന് ഞാൻ പ്രതീക്ഷിക്കുന്നു.”
പിന്നെ താൻ എങ്ങനെയാണ് ഒരു സാക്ഷിയായത് എന്ന് അവർ വിവരിച്ചു: “മിഹാലെക് സഹോദരൻ പീഡിപ്പിക്കപ്പെട്ടത് 1940-കളുടെ ആരംഭത്തിലാണ്. അതുകൊണ്ട് സാക്ഷികൾ എന്റെ വീട്ടുവാതിൽക്കൽ വന്നപ്പോൾ അവർ പറയുന്നതു കേൾക്കണമെന്ന് ഞാൻ നിശ്ചയിച്ചു. താമസിയാതെ ഞങ്ങൾ ബൈബിൾ പഠിക്കാൻ തുടങ്ങി. ഞാനും ഭർത്താവും 1949-ൽ സ്നാപനമേറ്റു.”
ക്രിസ്തീയ തത്ത്വങ്ങൾക്കു വേണ്ടിയുള്ള ഒരു വ്യക്തിയുടെ നിലപാട് മറ്റുള്ളവരുടെ ജീവിതത്തിൽ എത്ര വ്യാപകമായ ഫലങ്ങൾ ഉളവാക്കിയേക്കാം എന്നതിന് മറ്റൊരു ഉദാഹരണം മാത്രമാണ് ഇത്. ദൃഷ്ടാന്തത്തിന്, ഒന്നാം നൂറ്റാണ്ടിൽ പത്രൊസും മറ്റ് അപ്പോസ്തലൻമാരും കൈക്കൊണ്ട ധീരമായ നിലപാട് എത്ര പേരെ ആഴത്തിൽ സ്വാധീനിക്കുകയുണ്ടായി?—പ്രവൃത്തികൾ 5:17-29.
[31-ാം പേജിലെ ചിത്രങ്ങൾ]
എഡ് മിഹാലെക്കും മേരി പെറെസും 1940-കളിൽ