അടുക്കള രസകര​മാ​യി​രി​ക്കാൻ കഴിയും

“അടുക്ക​ള​യിൽ നിന്നു പുറത്തു​ക​ടക്ക്‌!” വിശപ്പു​കാ​രണം സമയത്തി​നു​മു​മ്പേ അത്താഴ​ത്തി​ലൽപ്പം കഴിക്കാൻ ചെല്ലുന്ന മിക്ക കുട്ടി​കൾക്കും ഇത്തര​മൊ​രു താക്കീതു കിട്ടി​യി​ട്ടു​ണ്ടാ​കും. എന്നിരു​ന്നാ​ലും, കുട്ടി​കളെ പുറത്തു​വി​ടു​ന്ന​തി​നു പകരം മാതാ​പി​താ​ക്കൾക്ക്‌ അവരെ അടുക്ക​ള​യി​ലേക്കു ക്ഷണിക്കാൻ മതിയായ കാരണ​മുണ്ട്‌. എന്തു​കൊണ്ട്‌? എന്തു​കൊ​ണ്ടെ​ന്നാൽ അടുക്കള, ഫലത്തിൽ, ആകർഷ​ക​മായ ഒരു ക്ലാസ്സു​മു​റി​യാണ്‌.

കുട്ടി​കൾക്കു സർഗാ​ത്മ​ക​ത​യും പ്രശ്‌ന പരിഹാര വൈദ​ഗ്‌ധ്യ​വും വളർത്തി​യെ​ടു​ക്കാൻ പറ്റിയ ഇടമാണ്‌ അടുക്കള. മറ്റുള്ള​വരെ സേവി​ക്കാ​നും ഒരു ടീമിന്റെ ഭാഗ​മെ​ന്ന​നി​ല​യിൽ പ്രവർത്തി​ക്കാ​നും പഠിക്കാൻ അവർക്കു കഴിയു​ന്നി​ടം; ഹൃദയത്തെ സ്‌പർശി​ക്കുന്ന അർഥവ​ത്തായ ആശയവി​നി​മ​യങ്ങൾ സ്വാഭാ​വി​ക​മാ​യി ഉളവാ​കു​ന്നി​ടം; വില​യേ​റിയ തത്ത്വങ്ങൾ അവരറി​യാ​തെ​തന്നെ മനസ്സിൽ പതിപ്പി​ക്കാ​വു​ന്നി​ടം. അതേ, ഓരോ അടുക്ക​ള​യു​ടെ​യും തിങ്ങി​നി​റഞ്ഞ അലമാ​ര​ക​ളി​ലും മേശവ​ലി​പ്പു​ക​ളി​ലും തട്ടുക​ളി​ലും വളരെ​യേറെ അമൂല്യ പാഠങ്ങൾ അടങ്ങി​യി​രി​ക്കു​ന്നു—അടുത്ത തവണ ആഹാരം തയ്യാറാ​ക്കു​മ്പോൾ ജീവൻവെ​ക്കാൻ തയ്യാറാ​യി.

സാങ്കേ​തി​ക​വി​ദ്യ​ക​ളു​ടെ​യും വിജ്ഞാ​ന​ത്തി​ന്റെ​യും ഈ യുഗത്തിൽ, കുട്ടി​കൾക്കു പരിശീ​ലനം കൊടു​ക്കാ​നുള്ള സ്ഥലമായി എന്തിനാണ്‌ അടുക്കള ഉപയോ​ഗി​ക്കു​ന്നത്‌? ഉത്തരം സമയലാ​ഭം എന്നതാണ്‌. തങ്ങളുടെ കുട്ടി​ക​ളോ​ടൊ​ത്തു സമയം—അതും ധാരാളമായിa—ചെലവ​ഴി​ക്കു​ന്ന​തി​നു ബദലായി മറ്റൊ​ന്നും​തന്നെ ഇല്ലെന്നു മിക്ക മാതാ​പി​താ​ക്ക​ളും തിരി​ച്ച​റി​യു​ന്നു! അതെവി​ടെ കണ്ടെത്തും എന്നതാണു പ്രശ്‌നം. ഭവനത്തി​ലും ചുറ്റു​പാ​ടു​മാ​യി ചെയ്യുന്ന പതിവു ജോലി​കളെ തങ്ങളുടെ കുട്ടി​ക​ളു​മൊ​ത്തു കാര്യങ്ങൾ ചെയ്യു​ന്ന​തി​നും അവരെ പഠിപ്പി​ക്കു​ന്ന​തി​നു​മുള്ള അവസര​മാ​യി കാണാൻ ചില ആധികാ​രിക ഉറവി​ടങ്ങൾ മാതാ​പി​താ​ക്കളെ പ്രോ​ത്സാ​ഹി​പ്പി​ക്കു​ന്നു. ഇതു പുരാതന ഇസ്രാ​യേൽ ജനതയി​ലെ മാതാ​പി​താ​ക്കൾക്കു ദൈവം നൽകിയ ഒരു കൽപ്പന​യോ​ടു യോജി​പ്പി​ലാണ്‌: “ഇന്നു ഞാൻ നിന്നോ​ടു കല്‌പി​ക്കുന്ന ഈ വചനങ്ങൾ നിന്റെ ഹൃദയ​ത്തിൽ ഇരി​ക്കേണം. നീ അവയെ നിന്റെ മക്കൾക്കു ഉപദേ​ശി​ച്ചു​കൊ​ടു​ക്ക​യും നീ വീട്ടിൽ ഇരിക്കു​മ്പോ​ഴും വഴി നടക്കു​മ്പോ​ഴും കിടക്കു​മ്പോ​ഴും എഴു​ന്നേ​ല്‌ക്കു​മ്പോ​ഴും അവയെ​ക്കു​റി​ച്ചു സംസാ​രി​ക്ക​യും വേണം.”—ആവർത്ത​ന​പു​സ്‌തകം 6:6, 7.

ഏതായാ​ലും നാം അടുക്ക​ള​യിൽ പതിവാ​യി സമയം ചെലവ​ഴി​ക്കേ​ണ്ടി​യി​രി​ക്കു​ന്നു എന്നതി​നാൽ, കുടും​ബ​ത്തി​ന്റെ കൂട്ടായ പ്രവർത്ത​ന​ങ്ങൾക്ക്‌ അനു​യോ​ജ്യ​മായ ഒരു സ്ഥലമായി അതു കാണ​പ്പെ​ട്ടേ​ക്കാം. പ്രത്യേ​കി​ച്ചൊ​രു ഉല്ലാസ​യാ​ത്ര പോക​ണ​മെ​ന്നു​വെ​ച്ചാൽ അതിനാ​വ​ശ്യ​മായ സമയവും ഊർജ​വും പണവും എല്ലാം ഒത്തുവ​രു​ന്ന​തു​വരെ മിക്ക​പ്പോ​ഴും നമുക്കു കാത്തി​രി​ക്കേ​ണ്ടി​വ​രു​ന്നു. എന്നാൽ അതു​പോ​ലെയല്ല ആരോ​ഗ്യാ​വ​ഹ​മായ വിശപ്പ്‌. അതു നീട്ടി​വെ​ക്കാ​നാ​വില്ല. മാത്രമല്ല, കുട്ടി​കൾക്കു പ്രകൃ​ത്യാ അടുക്ക​ള​യോ​ടൊ​രു ആകർഷ​ണ​മുണ്ട്‌. എന്തൊ​ക്കെ​യാ​യാ​ലും, മറ്റെവി​ടെ​വെ​ച്ചാണ്‌ അവർ കത്തികൾ സൂക്ഷ്‌മ​ത​യോ​ടെ ഉപയോ​ഗി​ക്കാ​നും മറ്റു വീട്ടു​സാ​മാ​നങ്ങൾ കൈകാ​ര്യം ചെയ്യാ​നും പരിശീ​ലി​പ്പി​ക്ക​പ്പെ​ടു​ന്നത്‌? രസത്തി​നു​വേണ്ടി കുട്ടികൾ വല്ലപ്പോ​ഴും ഒരു നേരത്തേ ഭക്ഷണം​പോ​ലും ഉണ്ടാക്കി​യേ​ക്കാം! എങ്കിലും, അടുക്ക​ള​യ്‌ക്ക്‌ ഏതുതരം പാഠങ്ങ​ളാ​ണു വാഗ്‌ദാ​നം ചെയ്യാൻ കഴിയുക?

അടുക്കള “ക്ലാസ്സു​മു​റി​യിൽ”നിന്നു പഠിക്കൽ

നാലു​വ​യ​സ്സു​കാ​രായ വിദ്യാർഥി​ക​ളു​ടെ ഇടയിൽ ബിസ്‌ക്കറ്റ്‌ ആൻറി എന്ന്‌ അറിയ​പ്പെ​ടുന്ന ലെവിസ്‌ സ്‌മിത്ത്‌ ചെറിയ കുട്ടി​കളെ പാചകം പഠിപ്പി​ക്കു​ന്ന​തി​ലെ തന്റെ 17 വർഷത്തെ അനുഭ​വ​പ​രി​ച​യത്തെ അടിസ്ഥാ​ന​പ്പെ​ടു​ത്തി ഇങ്ങനെ അഭി​പ്രാ​യ​പ്പെ​ടു​ന്നു: “ആഹാരം ഒരു മികച്ച പഠനോ​പാ​ധി​യാണ്‌, കാരണം എല്ലാ കുട്ടി​ക​ളും മനസ്സി​ലാ​ക്കുന്ന ഒന്നാണത്‌. മണക്കാ​നും രുചി​ക്കാ​നും സ്‌പർശി​ക്കാ​നും ഉള്ള കഴിവ്‌ ചെറു​പ്രാ​യ​ത്തിൽ വളരെ സൂക്ഷ്‌മ മായതി​നാൽ അവർ അതിൽ പൂർണ​മാ​യും മുഴു​കി​പ്പോ​കു​ന്നു. എന്നുത​ന്നെയല്ല, വായന, കണക്ക്‌, പ്രശ്‌ന പരിഹാര വൈദ​ഗ്‌ധ്യ​ങ്ങൾ എന്നിവ പഠിപ്പി​ക്കു​ന്ന​തി​നും നിങ്ങൾക്കു കഴിയും.” ഊറ്റൽ, പൊടി​ക്കൽ, തൊലി പൊളി​ക്കൽ, അരിക്കൽ, ഇളക്കൽ, പരത്തൽ തുടങ്ങി​യ​വ​യെ​ല്ലാം കുട്ടി​ക​ളു​ടെ ശാരീ​രിക വൈദ​ഗ്‌ധ്യ​ങ്ങ​ളും കണ്ണും കൈയും ഏകോ​പി​പ്പി​ച്ചു പ്രവർത്തി​ക്കു​ന്ന​തി​നുള്ള കഴിവു​ക​ളും വളർത്തി​യെ​ടു​ക്കാൻ സഹായി​ക്കു​ന്നു. തരംതി​രി​ക്ക​ലും (ഉണക്കമു​ന്തി​രി​യും അണ്ടിപ്പ​രി​പ്പും വെവ്വേറെ കൂമ്പാ​ര​മാ​ക്കു​ന്നത്‌) ക്രമാ​നു​സ​രണം വെക്കലും (പല വലുപ്പ​ത്തി​ലുള്ള പാത്രങ്ങൾ ഒന്നിനു​ള്ളിൽ ഒന്നായി യഥാ​ക്രമം അടുക്കു​ന്നത്‌) കണക്കിന്റെ ആദ്യപാ​ഠ​ങ്ങ​ളാ​യി വർത്തി​ക്കുന്ന ആശയങ്ങൾ പഠിപ്പി​ക്കാ​നു​ത​കു​ന്നു. ഒരു പാചക​ക്കു​റി​പ്പു പിൻപ​റ്റു​ന്നത്‌ സംഖ്യ​ക​ളും അളവു​ക​ളും സമയം കണക്കാ​ക്ക​ലും യുക്തി​യും ഭാഷയും ഉപയോ​ഗി​ക്കു​ന്ന​തി​നുള്ള ഒരു അഭ്യാ​സ​മാ​യി വർത്തി​ക്കു​ന്നു. കൂടാതെ, സുരക്ഷ, ഉത്തരവാ​ദി​ത്വം, വ്യക്തി​പ​ര​മായ സംഘാ​ടനം, ടീം എന്നനി​ല​യ്‌ക്കുള്ള പ്രവർത്തനം എന്നിവ​യെ​പ്പറ്റി എന്തെങ്കി​ലു​മൊ​ക്കെ പഠിക്കാ​തെ അടുക്ക​ള​യെന്ന സങ്കീർണ​വും അപകടം നിറഞ്ഞ​തു​മായ ലോക​ത്തി​ലേക്ക്‌ ഇറങ്ങി​ത്തി​രി​ക്കാൻ ഒരുവനു സാധ്യമല്ല.

പാചകം പഠിക്കു​ന്ന​തി​ന്റെ മൂല്യ​വും വിസ്‌മ​രി​ക്കാ​വു​ന്നതല്ല. അടുക്ക​ള​യിൽ സഹായി​ച്ചു​കൊ​ണ്ടു തുടക്കം​കു​റി​ക്കുന്ന കുട്ടികൾ കൗമാ​ര​ത്തി​ലെ​ത്തു​മ്പോ​ഴേ​ക്കും ഒരു നേരത്തെ ആഹാരം മുഴുവൻ പരസഹാ​യം കൂടാതെ പാകം ചെയ്യാൻ പ്രാപ്‌ത​രാ​കു​ന്നത്‌ അസാധാ​ര​ണമല്ല. ഇടയ്‌ക്കൊ​ക്കെ അത്തര​മൊ​രു സഹായം തിരക്കു​പി​ടിച്ച മാതാ​പി​താ​ക്ക​ളിൽ ഏതൊ​രാ​ളാ​ണു സ്വാഗതം ചെയ്യു​ക​യി​ല്ലാ​ത്തത്‌? മാത്രമല്ല, പാചകം ആത്മവി​ശ്വാ​സ​വും സ്വയം പര്യാ​പ്‌ത​ത​യും—മുതിർന്ന​വ​രെന്ന നിലയിൽ, വിവാഹം ചെയ്‌താ​ലും ഇല്ലെങ്കി​ലും, പിന്നീട്‌ ഉത്തരവാ​ദി​ത്വ​ങ്ങൾ ഏറ്റെടു​ക്കു​മ്പോൾ പ്രയോ​ജനം കൈവ​രു​ത്തുന്ന ഗുണങ്ങൾ—വളർത്തി​യെ​ടു​ക്കാൻ യുവജ​ന​ങ്ങളെ സഹായി​ക്കു​ന്നു.—1 തിമൊ​ഥെ​യൊസ്‌ 6:6 താരത​മ്യം ചെയ്യുക.

തന്റെ 30-കളുടെ തുടക്കം​വരെ ഏകാകി​യാ​യി​രുന്ന ലി ഇങ്ങനെ അനുസ്‌മ​രി​ക്കു​ന്നു: “എനിക്ക്‌ ഏകദേശം ആറു വയസ്സു​ണ്ടാ​യി​രു​ന്ന​പ്പോൾമു​തൽ അമ്മ എന്നെ ചെറിയ ചെറിയ അടുക്കള ജോലി​കൾ പരിശീ​ലി​പ്പി​ച്ചു​തു​ടങ്ങി. ആദ്യ​മൊ​ക്കെ ബിസ്‌ക്ക​റ്റു​ക​ളും കേക്കു​ക​ളും മറ്റു മധുര​പ​ല​ഹാ​ര​ങ്ങ​ളു​മൊ​ക്കെ ഉണ്ടാക്കു​ന്ന​തി​ലാ​യി​രു​ന്നു എനിക്കു കൂടുതൽ താത്‌പ​ര്യം. എങ്കിലും, ഒമ്പതു വയസ്സാ​യ​പ്പോ​ഴേ​ക്കും ഞങ്ങളുടെ കുടും​ബ​ത്തി​നു​വേണ്ട ഒരു നേരത്തെ ആഹാരം മുഴുവൻ പരസഹാ​യം കൂടാതെ ശരിയാ​യി ആസൂ​ത്രണം ചെയ്‌തു പാകം​ചെ​യ്യാൻ എനിക്കു കഴിഞ്ഞു. എന്നുത​ന്നെയല്ല, ഞാനതു പതിവാ​യി ചെയ്യാ​റു​മു​ണ്ടാ​യി​രു​ന്നു. പിൽക്കാ​ലത്ത്‌, മുതിർന്ന ഒരു അവിവാ​ഹി​ത​നെന്ന നിലയിൽ പാചക​മുൾപ്പെ​ടെ​യുള്ള, വ്യത്യസ്‌ത ഗാർഹിക ഉത്തരവാ​ദി​ത്വ​ങ്ങൾ കൈകാ​ര്യം ചെയ്യേ​ണ്ട​തെ​ങ്ങ​നെ​യെന്ന അറിവ്‌ ജീവിതം കൂടുതൽ സുകര​മാ​ക്കി​ത്തീർത്തു എന്നു ഞാൻ കണ്ടെത്തി. ഇപ്പോൾ വിജയ​പ്ര​ദ​മായ ഒരു ദാമ്പത്യ​ജീ​വി​തം ആസ്വദി​ക്കു​ന്ന​തിൽ അത്‌ ഒരു വലിയ പങ്കുവ​ഹി​ച്ചി​രി​ക്കു​ന്നു എന്നു ഞാൻ തീർച്ച​യാ​യും പറയും.”

പാചകം ആസ്വാ​ദ്യ​മാണ്‌!

കുട്ടി​കൾക്ക്‌ അടുക്ക​ള​യിൽ പരിശീ​ലനം കൊടു​ക്കു​ന്ന​തി​നു മാതാ​വി​നോ പിതാ​വി​നോ സമയം കണ്ടെത്താൻ കഴിയു​ന്ന​തെ​ങ്ങനെ? ശ്രദ്ധാ​ശൈ​ഥി​ല്യ​ങ്ങൾ ഏറ്റവും കുറവാ​യി​രി​ക്കുന്ന ഒരു സമയം പട്ടിക​പ്പെ​ടു​ത്തുക എന്നതാണ്‌ ഒരു മാതാ​വി​ന്റെ നിർദേശം. നിങ്ങൾക്ക്‌ ഒന്നില​ധി​കം കുട്ടി​ക​ളു​ണ്ടെ​ങ്കിൽ, തുടക്ക​ത്തിൽ ഒരു സമയത്ത്‌ ഒരു കുട്ടി​യോ​ടൊ​പ്പം ജോലി​ചെ​യ്യാൻ നിങ്ങൾ താത്‌പ​ര്യ​പ്പെ​ട്ടേ​ക്കാം. ഇതു ചെയ്യു​ന്ന​തിന്‌, മറ്റു കുട്ടികൾ ഉറങ്ങു​ക​യോ സ്‌കൂ​ളി​ലാ​യി​രി​ക്കു​ക​യോ ചെയ്യുന്ന ഒരു സമയം തിര​ഞ്ഞെ​ടു​ക്കുക. നിങ്ങൾ തനിയെ പാചകം ചെയ്യു​മ്പോൾ എടുക്കു​മാ​യി​രു​ന്ന​തി​നെ​ക്കാൾ കൂടുതൽ സമയം ആസൂ​ത്രണം ചെയ്യുക. അടുക്ക​ള​ജോ​ലി രസകര​മാ​ക്കാൻ തയ്യാറാ​യി​രി​ക്കുക!

നിങ്ങളു​ടെ ആദ്യത്തെ സെഷനു​വേണ്ടി, നിങ്ങൾ കുട്ടിയെ, താൻ കഴിക്കാൻ ഇഷ്ടപ്പെ​ടുന്ന എന്തെങ്കി​ലും തിര​ഞ്ഞെ​ടു​ക്കാൻ അനുവ​ദി​ച്ചേ​ക്കാം.b എളുപ്പം ചെയ്‌തു​തീർക്കാ​വുന്ന ലളിത​മായ ഏതെങ്കി​ലും പാചക​വി​ധി കിട്ടു​മോ എന്നു നോക്കുക. അതിൽ അവനു വിജയ​ക​ര​മാ​യി ചെയ്‌തു​തീർക്കാ​നാ​വുന്ന തരം ജോലി​കൾ ഉണ്ടെന്ന്‌ ഉറപ്പു​വ​രു​ത്തുക. നിങ്ങളു​ടെ കുട്ടി കുസൃ​തി​കാ​ട്ടു​ക​യോ അവനു മുഷി​പ്പ​നു​ഭ​വ​പ്പെ​ടു​ക​യോ ചെയ്യാ​തി​രി​ക്കാൻ ആദ്യ​മേ​തന്നെ ആവശ്യ​മുള്ള ചില ചേരു​വ​ക​ളും പാത്ര​ങ്ങ​ളും എടുത്തു​വെ​ക്കാൻ അവനെ ഏൽപ്പി​ക്കുക. സെഷൻ വല്ലാതെ നീണ്ടു​പോ​കു​ന്ന​തും ക്ഷീണി​പ്പി​ക്കു​ന്ന​തു​മാ​കാ​തി​രി​ക്കാൻ ഒരുപക്ഷേ നിങ്ങൾ ചില ചേരു​വകൾ ഭാഗി​ക​മാ​യി മുന്നമേ തയ്യാറാ​ക്കു​ക​പോ​ലും ചെയ്‌തേ​ക്കാം.

ജോലി​ക​ളോ​രോ​ന്നും ചെയ്യു​ന്ന​തെ​ങ്ങ​നെ​യെന്നു കാണി​ച്ചു​കൊണ്ട്‌, കുട്ടി​യോ​ടൊത്ത്‌ പാചക​വി​ധി വായി​ക്കുക. അടുക്ക​ള​യിൽ കുട്ടിക്കു സ്വന്തമാ​യി ഒരു സ്ഥലം—ഒരുപക്ഷേ, ഏതാനും കോപ്പ​ക​ളും കുറച്ചു പാത്ര​ങ്ങ​ളും സഹിതം ഒരു മേശവ​ലിപ്പ്‌—കൊടു​ക്കുക. കൂടാതെ, ഒരു ഏപ്രണും അവനു കൊടു​ക്കുക. ആൺകു​ട്ടി​യെ സ്‌ത്രീ​ക​ളു​ടെ ഏപ്രൺ ധരിപ്പി​ക്കു​ന്ന​തി​നെ​ക്കാൾ നന്ന്‌, ഒരു പാചക​ക്കാ​ര​നു​വേ​ണ്ടി​യുള്ള ഒന്ന്‌ നിങ്ങള​വനു സംഘടി​പ്പി​ച്ചു കൊടു​ക്കു​ന്ന​താ​വും. തുടക്കം മുതലേ, സുരക്ഷ​യു​ടെ പ്രാധാ​ന്യം സംബന്ധിച്ച്‌ ഊന്നി​പ്പ​റ​യു​ക​യും അടുക്ക​ള​യ്‌ക്കു​വേണ്ടി ജ്ഞാനപൂർവ​ക​മായ നിയമങ്ങൾ വെക്കു​ക​യും ചെയ്യുക.—“ആദ്യപാ​ഠം—സുരക്ഷ” എന്ന തലക്കെ​ട്ടോ​ടു​കൂ​ടിയ 18-ാം പേജിലെ ചതുരം കാണുക.

എല്ലാറ്റി​ലു​മു​പരി, അതു രസകര​മാ​ക്കാൻ ശ്രമി​ക്കുക. നിങ്ങൾ ചെയ്യു​ന്നതു കണ്ടു​കൊ​ണ്ടു വെറുതെ ഇരിക്കാൻ കുട്ടിയെ അനുവ​ദി​ക്കാ​തെ അവനോ​ടും കൈ കഴുകി​വന്നു ഭക്ഷണം പാകം​ചെ​യ്യു​ന്ന​തിൽ ഉൾപ്പെ​ടാൻ ആവശ്യ​പ്പെ​ടുക. നിരീ​ക്ഷ​ണ​ങ്ങ​ളും പരീക്ഷ​ണ​ങ്ങ​ളും നടത്തു​ന്ന​തി​നും ചോദ്യ​ങ്ങൾ ചോദി​ക്കു​ന്ന​തി​നും ഉള്ള അവസരം അവനു നൽകുക. ഉണ്ടാക്കിയ വിഭവം അത്ര ശരിയാ​യി​ല്ലെ​ങ്കിൽ വിഷമി​ക്കേ​ണ്ട​തില്ല. നിങ്ങളു​ടെ കുട്ടി തന്നെത്താൻ ഉണ്ടാക്കി​യ​താ​ണെ​ങ്കിൽ സാധ്യ​ത​യ​നു​സ​രിച്ച്‌ അവൻ അതു കഴിച്ചു​കൊ​ള്ളും.

കുടും​ബം ഒത്തൊ​രു​മിച്ച്‌

അടുക്ക​ള​യിൽ നിന്ന്‌ ഉത്‌പാ​ദി​ത​മാ​കുന്ന ഏറ്റവും മഹത്തായ പ്രയോ​ജ​ന​ങ്ങ​ളിൽ കുടുംബ ഐക്യ​വും മൂല്യ​ങ്ങ​ളും ഉൾപ്പെ​ടു​ന്നു എന്നതിനു സംശയ​മില്ല. ഇന്നു ചില ഭവനങ്ങ​ളിൽ, കുടും​ബാം​ഗങ്ങൾ പരസ്‌പരം വലിയ ബന്ധമൊ​ന്നു​മി​ല്ലാ​തെ തങ്ങളുടെ വ്യത്യസ്‌ത പ്രവർത്ത​ന​ങ്ങ​ളു​മാ​യി തിരക്കു​പി​ടിച്ച ഒരു ജീവിതം നയിക്കു​ന്നതു നിങ്ങൾ നിരീ​ക്ഷി​ച്ചി​ട്ടു​ണ്ടാ​കും. അത്തരം സാഹച​ര്യ​ങ്ങ​ളിൽ, വീട്‌ ഒരു താത്‌കാ​ലിക ഇടത്താ​വളം, ഇന്ധനം നിറയ്‌ക്കാ​നുള്ള ഒരു സ്ഥലം എന്നതി​നെ​ക്കാൾ ഏറെ​യൊ​ന്നും ആകുന്നില്ല. അതിനു വിപരീ​ത​മാ​യി, ഒരുമി​ച്ചു ഭക്ഷണം പാകം​ചെ​യ്യുന്ന ഒരു കുടും​ബം ഒരുമി​ച്ചു ഭക്ഷണം കഴിക്കു​ന്ന​തി​നും ഒരുമി​ച്ചു വൃത്തി​യാ​ക്കു​ന്ന​തി​നും കൂടുതൽ സാധ്യ​ത​യുണ്ട്‌. ഇത്തരം പ്രവർത്ത​നങ്ങൾ ആശയവി​നി​യമം നടത്തു​ന്ന​തി​നും പരസ്‌പരം വർത്തി​ക്കു​ന്ന​തി​നും ബന്ധപ്പെ​ടു​ന്ന​തി​നു​മുള്ള ക്രമമായ അവസരങ്ങൾ പ്രദാനം ചെയ്യുന്നു. “എന്റെ ആൺമക്ക​ളു​മാ​യി ഞാൻ നടത്തി​യി​ട്ടുള്ള ഏറ്റവും നല്ല ചില ചർച്ചകൾ അടുക്ക​ള​യി​ലെ സിങ്കി​ന​ടു​ത്തു​വെ​ച്ചാ​യി​രു​ന്നു” എന്ന്‌ ഒരു മാതാവ്‌ അനുസ്‌മ​രി​ക്കു​ന്നു. ഒരു ക്രിസ്‌തീയ പിതാ​വായ ഹെർമ​നും ഇങ്ങനെ കൂട്ടി​ച്ചേർക്കു​ന്നു: “നിരവധി വർഷങ്ങൾ ഞങ്ങൾ മനപ്പൂർവം പാത്രങ്ങൾ കഴുകാ​നുള്ള യന്ത്രം വാങ്ങാ​തെ​യി​രു​ന്നു. തന്മൂലം പാത്രങ്ങൾ കൈ​കൊ​ണ്ടു​തന്നെ കഴുകി​ത്തു​ട​യ്‌ക്കേ​ണ്ടി​യി​രു​ന്നു. ഊഴമ​നു​സ​രി​ച്ചു പാത്രം തുടയ്‌ക്കാൻ ഞങ്ങളുടെ ആൺമക്കൾക്കു നിയമനം കൊടു​ത്തു. സ്വാഭാ​വിക സംഭാ​ഷ​ണ​ങ്ങൾക്ക്‌ അതി​നെ​ക്കാൾ മെച്ചപ്പെട്ട സമയം വേറെ​യി​ല്ലാ​യി​രു​ന്നു.”

അതേ, നിങ്ങൾ അടുക്ക​ള​യിൽ കുട്ടി​ക​ളോ​ടൊ​ത്തു ചെലവ​ഴി​ക്കുന്ന സമയം—ഓരോ ആഴ്‌ച​യും ഓരോ വർഷവും കഴിയും​തോ​റും—ആത്മീയ മൂല്യ​ങ്ങ​ളും ദൈവിക ഗുണങ്ങ​ളും വളർത്തി​യെ​ടു​ക്കു​ന്ന​തി​നുള്ള ഒരു അടിസ്ഥാ​നം പ്രദാനം ചെയ്യുന്നു. പിരി​മു​റു​ക്ക​മി​ല്ലാത്ത, ഒത്തൊ​രു​മ​യു​ടെ അത്തരം നിമി​ഷ​ങ്ങ​ളി​ലാ​ണു സ്വാഭാ​വി​ക​മാ​യും, മാതാ​പി​താ​ക്ക​ളും കുട്ടി​യും ഹൃദയം തുറന്നുള്ള സംഭാ​ഷ​ണ​ത്തിൽ ഏർപ്പെ​ടു​ന്നത്‌. മാതാ​പി​താ​ക്ക​ളു​ടെ മാതൃക സാവധാ​നം കുട്ടി​യു​ടെ ഹൃദയത്തെ സ്വാധീ​നി​ക്കു​ക​യും ചെയ്യുന്നു. അത്തരം പരിശീ​ല​ന​ത്തിന്‌ ഒരു കുട്ടിക്കു ജീവി​ത​കാ​ലം മുഴുവൻ നിലനിൽക്കുന്ന പ്രയോ​ജ​നങ്ങൾ കൈവ​രു​ത്താൻ കഴിയും. കാരണം, സദൃശ​വാ​ക്യ​ങ്ങൾ 22:6 ഇങ്ങനെ പറയുന്നു: “ബാലൻ നടക്കേ​ണ്ടുന്ന വഴിയിൽ അവനെ അഭ്യസി​പ്പിക്ക; അവൻ വൃദ്ധനാ​യാ​ലും അതു വിട്ടു​മാ​റു​ക​യില്ല.”

അതു​കൊണ്ട്‌, മാതാ​പി​താ​ക്ക​ളിൽ ഒരാളെന്ന നിലയിൽ കുട്ടി​ക​ളു​മൊ​ത്തു കൂടുതൽ സമയം ചെലവ​ഴി​ക്കാൻ നിങ്ങൾ ശ്രമി​ച്ചു​കൊ​ണ്ടി​രി​ക്കു​ക​യാ​ണെ​ങ്കിൽ, ഒരു കേക്കോ ഒരു നേരത്തെ ആഹാരം മുഴു​വ​നോ തയ്യാറാ​ക്കാൻ നിങ്ങളെ സഹായി​ക്കാൻ അവരെ ക്ഷണിക്ക​രു​തോ? അവരു​മൊത്ത്‌ അടുക്ക​ള​യിൽ ജോലി​ചെ​യ്യു​ന്നത്‌, നിങ്ങളു​ടെ കുടും​ബത്തെ ഒരേസ​മയം പോഷി​പ്പി​ക്കു​ന്ന​തി​നും പരിപാ​ലി​ക്കു​ന്ന​തി​നു​മുള്ള ഒരു ഉപാധി​യാ​ണെന്നു നിങ്ങൾ കണ്ടെത്തി​യേ​ക്കാം.

[അടിക്കു​റി​പ്പു​കൾ]

[18-ാം പേജിലെ ചതുരം]

ആദ്യപാഠം—സുരക്ഷ

സുരക്ഷ സംബന്ധി​ച്ചു ജാഗ്ര​ത​പാ​ലി​ക്കുക

• ഗൗരവ​ത്തോ​ടെ എന്നാൽ ഭയപ്പെ​ടു​ത്താ​ത്ത​വി​ധ​ത്തിൽ, അടുക്ക​ള​യിൽ ജോലി​ചെ​യ്യു​മ്പോൾ ഉണ്ടാകാ​വുന്ന അപകടങ്ങൾ വിശദീ​ക​രി​ക്കുക. തിര​ക്കേ​റിയ ഒരു തെരു​വി​ലെ ട്രാഫി​ക്കി​ന്റെ അപകടങ്ങൾ നിങ്ങൾ എങ്ങനെ വിശദീ​ക​രി​ക്കു​മോ, അതു​പോ​ലെ. നിങ്ങൾതന്നെ ഒരു നല്ല മാതൃക വെക്കുക.

• കുട്ടികൾ അടുക്ക​ള​യിൽ ജോലി​ചെ​യ്യു​മ്പോ​ഴൊ​ക്കെ മുതിർന്ന ഒരാളു​ടെ മേൽനോ​ട്ട​ത്തി​നു ക്രമീ​ക​രി​ക്കുക. ഒരു പാത്ര​മോ ഉപകര​ണ​മോ, പ്രത്യേ​കിച്ച്‌ വൈദ്യു​തി ഉപയോ​ഗി​ച്ചു പ്രവർത്തി​പ്പി​ക്കു​ന്ന​താ​ണെ​ങ്കിൽ, സുരക്ഷി​ത​മാ​യി പ്രവർത്തി​പ്പി​ക്കാൻ പഠിക്കു​ന്ന​തു​വരെ ഉപയോ​ഗി​ക്കാൻ കുട്ടിയെ അനുവ​ദി​ക്കാ​തി​രി​ക്കുക.

• നിങ്ങളു​ടെ അടുക്കള വെടി​പ്പു​ള്ള​താ​ക്കി നിലനിർത്തുക. തൂകി​പ്പോ​കു​ന്നവ വൃത്തി​യാ​ക്കു​ന്ന​തും ചിതറി​ക്കി​ട​ക്കു​ന്നവ നീക്കം​ചെ​യ്യു​ന്ന​തും എല്ലാം താമസം കൂടാതെ ചെയ്യണം. നിങ്ങൾ പാചകം ചെയ്യു​മ്പോൾ ഓമന​മൃ​ഗ​ങ്ങ​ളെ​യും മറ്റു ശല്യങ്ങ​ളെ​യും അടുക്ക​ള​യ്‌ക്കു പുറത്തു നിർത്തുക.

വിരലുകൾ സംരക്ഷി​ക്കു​ക

• വൈദ്യു​ത ഗ്രൈൻഡ​റു​ക​ളും മിക്‌സി​ക​ളും മുതിർന്ന ഒരാളു​ടെ മേൽനോ​ട്ട​ത്തിൽ മാത്രം ഉപയോ​ഗി​ക്കുക. കുട്ടി ഒരു സ്‌പൂൺ പാത്ര​ത്തിൽ ഇടുന്ന​തി​നു​മു​മ്പേ ഉപകരണം ഓഫാ​ക്കു​ക​യോ വൈദ്യു​തി ബന്ധം വിഛേ​ദി​ക്കു​ക​യോ ചെയ്‌തു എന്ന്‌ ഉറപ്പു​വ​രു​ത്തണം.

• കത്തികൾക്കു നല്ല മൂർച്ച​യു​ണ്ടാ​യി​രി​ക്കണം. കാരണം, മൂർച്ച​യി​ല്ലാത്ത ഒരു കത്തി കൂടുതൽ ബലം പ്രയോ​ഗി​ക്കേ​ണ്ട​താ​വ​ശ്യ​മാ​ക്കി​ത്തീർക്കു​ന്നു. അതു​കൊ​ണ്ടു​തന്നെ തെന്നി​പ്പോ​കാൻ കൂടുതൽ സാധ്യ​ത​യുണ്ട്‌.

• നിങ്ങളു​ടെ കുട്ടി ഒരു കത്തി ഉപയോ​ഗി​ക്കാൻ പഠിക്കു​മ്പോൾ പിൻവ​രുന്ന പടികൾ പിൻപ​റ്റട്ടെ: (1) കത്തിയു​ടെ പിടി​യിൽ പിടി​ച്ചു​കൊ​ണ്ടെ​ടു​ക്കുക, (2) കത്തി ഭക്ഷണപ​ദാർഥ​ത്തി​ന്മേൽ വെക്കുക, (3) മറ്റേ കൈ കത്തിയു​ടെ മുകളിൽ പിടി​ക്കുക, (4) ഭക്ഷണപ​ദാർഥം മുറി​ക്കാൻ ആവശ്യ​മായ ബലം പ്രയോ​ഗി​ക്കുക.

• ഒരു കട്ടിങ്‌ ബോർഡ്‌ ഉപയോ​ഗി​ക്കുക. കുട്ടി പച്ചക്കറി​കൾ മുറി​ക്കാൻ ശ്രമി​ക്കു​മ്പോൾ അവ ഉരുണ്ടു​പോ​കാ​തി​രി​ക്കാൻ രണ്ടായി മുറിച്ച്‌, പരന്ന ഭാഗം കട്ടിങ്‌ ബോർഡി​ന്മേൽ വരത്തക്ക​വി​ധം വെക്കുക.

പൊള്ളലേൽക്കാതെ സൂക്ഷി​ക്കു​ക

• സ്റ്റോവി​ന്റെ ബർണറും അവ്‌ന്റെ സ്വിച്ചു​ക​ളും ഉപയോ​ഗി​ക്കാ​ത്ത​പ്പോ​ഴൊ​ക്കെ ഓഫാക്കി വെക്കുക. തൂവാ​ല​ക​ളും പാചക​വി​ധി​പു​സ്‌ത​ക​ങ്ങ​ളും ചൂടു​പാ​ത്രങ്ങൾ കൈകാ​ര്യം ചെയ്യാ​നുള്ള തുണി​ക​ളും ബർണറു​ക​ളു​ടെ​യ​ടു​ത്തു​നി​ന്നും മാറ്റി​വെ​ക്കുക.

• പാനുകൾ സ്റ്റോവിൽ വെക്കു​മ്പോൾ പിടി​യിൽ തട്ടിമ​റി​ഞ്ഞു സാധനങ്ങൾ എളുപ്പ​ത്തിൽ തൂകി​പ്പോ​കാ​ത്ത​വി​ധം വെക്കുക.

• നിങ്ങൾ സ്റ്റോവ്‌ ഉപയോ​ഗി​ക്കാൻ കുട്ടിയെ അനുവ​ദി​ക്കു​ന്നെ​ങ്കിൽ, അവൻ പരുപ​രു​ത്ത​തും ഉറപ്പു​ള്ള​തു​മായ ഒരു പ്രതല​ത്തി​ലാ​ണു നിൽക്കു​ന്ന​തെന്ന്‌ ഉറപ്പു​വ​രു​ത്തുക.

• ചൂടുള്ള ഒരു വസ്‌തു, ഇറക്കി വെക്കാ​നുള്ള സ്ഥലം കണ്ടെത്തി​യ​ശേഷം മാത്രം എടുക്കുക. ചൂടുള്ള ഒരു സാധനം എടുത്തു​കൊ​ണ്ടു​പോ​കു​മ്പോൾ അടുക്ക​ള​യി​ലുള്ള മറ്റുള്ള​വ​രും അതറി​യു​ന്നു​ണ്ടെന്ന്‌ ഉറപ്പു​വ​രു​ത്തുക. പ്രത്യേ​കിച്ച്‌, നിങ്ങൾ അവരുടെ പുറകി​ലാ​യി​ട്ടാ​ണു നടക്കു​ന്ന​തെ​ങ്കിൽ.