ശക്തനായ യൂറേഷ്യൻ കഴുകൻ
ബ്രിട്ടനിലെ ഉണരുക! ലേഖകൻ
യൂറേഷ്യൻ കഴുകൻ കൊക്കുമുതൽ വാലുവരെ 120 സെൻറീമീറ്റർ നീളമുള്ള ഒരു പ്രതാപശാലിയായ പക്ഷിയാണ്. അത് യൂറോപ്പിലെയും ആഫ്രിക്കയിലെയും പർവതനിരകൾക്കു മുകളിലൂടെയും ചിലപ്പോൾ എട്ടു കിലോമീറ്റർ വരെ ഉയരത്തിൽ ഹിമാലയത്തിലും അതിന്റെ മൂന്നു മീറ്റർ വിരിവുള്ള ചിറകുകൊണ്ട് അനായാസം ഉയർന്നുപറക്കുന്നതു കാണാം. ഓറഞ്ചുനിറമുള്ള നെഞ്ചും കഴുത്തും കറുപ്പും വെളുപ്പുമുള്ള തലയുമുള്ള, വലിപ്പംകൊണ്ടു പ്രൗഢിയേറിയ ഈ ജീവിയുടെ കീഴ്കൊക്കിൽനിന്നു തൂവലുകൾ തൂങ്ങിക്കിടക്കുന്നു. ഈ പ്രത്യേകതകളിൽനിന്നും അതിന്റെ മറ്റൊരു പേര് ഉത്ഭവിക്കുന്നു, ദീക്ഷയുള്ള കഴുകൻ. എത്തിപ്പെടാൻ കഴിയാത്ത തരിശുഭൂമിയിൽ ജീവിക്കുന്ന അത് തന്നെത്തന്നെ പോറ്റുവാൻ എന്തു ഭക്ഷണം കണ്ടെത്തും?
ചെറുമാനുകൾ, ചെമ്മരിയാട്ടിൻ കുട്ടികൾ, കോലാട്ടിൻ കുട്ടികൾ, മുയലുകൾ, ചെറിയ നാൽക്കാലികൾ തുടങ്ങിയവയെ ഈ കഴുകൻ ഇരയാക്കുന്നതായി ചില പ്രമാണഗ്രന്ഥങ്ങൾ ഉറപ്പിച്ചുപറയുന്നു, എന്നാൽ മറ്റു പ്രാമാണികർ വിയോജിക്കുന്നു. മറ്റു പക്ഷികൾ, മാംസമെല്ലാം ദഹിപ്പിച്ചശേഷം പുറംതള്ളുന്ന ചർമ ഉരുളകൾ ഇവ തിന്നുന്നതായി അറിയപ്പെടുന്നുവെങ്കിലും “ഈ പക്ഷി ജീവനുള്ള മൃഗങ്ങളെ എപ്പോഴെങ്കിലും ആക്രമിക്കുന്നതായി സ്ഥിരീകരിക്കപ്പെട്ട ഒരു രേഖയുമില്ല” എന്ന് ദ വേൾഡ് അറ്റ്ലസ് ഓഫ് ബേർഡ്സ് പ്രസ്താവിക്കുന്നു. അപ്പോൾപ്പിന്നെ എന്താണ് ഇതു ഭക്ഷിക്കുന്നത്?
ഹിംസ്ര മൃഗങ്ങളാൽ കൊല്ലപ്പെട്ട അല്ലെങ്കിൽ മറ്റുപ്രകാരത്തിൽ ചത്ത മൃഗങ്ങളുടെ അസ്ഥികൾ പ്രസ്തുത കഴുകൻ വളരെ ഉയരത്തിലേക്കു കൊണ്ടുപോയിട്ട് താഴെയുള്ള പാറകളിലേക്ക് ഇടുന്നു. അത് ഇപ്രകാരം അസ്ഥികൾ എറിഞ്ഞു പൊട്ടിക്കുന്നത് അസ്ഥിമജ്ജ കിട്ടാൻ വേണ്ടി മാത്രമാണെന്ന് എല്ലായ്പോഴും സങ്കൽപ്പിക്കപ്പെട്ടിരിക്കുന്നു. ഈ പക്ഷിയുടെ ജീവനുള്ളതും മൃതവുമായ സാമ്പിളുകളെക്കുറിച്ചുള്ള സമഗ്ര പരിശോധനയെത്തുടർന്നു വ്യത്യസ്തമായൊരു വിശദീകരണം നൽകാൻ സ്കോട്ട്ലൻഡിലെ ഗ്ലാസ്ഗോ യൂണിവേഴ്സിറ്റിയിൽനിന്നുമുള്ള ഗവേഷകർ ഇപ്പോൾ പ്രാപ്തരാണെന്നു ദി ഇക്കോണമിസ്റ്റ് റിപ്പോർട്ടുചെയ്യുന്നു.
25 സെൻറീമീറ്റർ നീളവും 4 സെൻറീമീറ്റർ വീതിയും വരെയുള്ള എല്ലുകഷണങ്ങൾ ഈ കഴുകൻ വിഴുങ്ങുന്നു. എന്നാൽ തങ്ങളെ അതിശയിപ്പിക്കുമാറ്, ഇതിന്റെ ദഹിക്കാനാവാത്ത ആഹാരത്തെ നേരിടുന്നതിന്, രണ്ടാം ആമാശയംപോലുള്ള പ്രത്യേക ദഹനവ്യൂഹം ഈ പക്ഷിക്ക് ഇല്ലെന്നു ഗവേഷകർ കണ്ടെത്തി. അസാധാരണമായ ഏക സവിശേഷത എല്ലുകഷണങ്ങളെ കടന്നുപോകാൻ പ്രാപ്തമാക്കുന്ന അത്യന്തം ഇലാസ്തികമായ ഇസോഫാഗസാണ്. എന്നിരുന്നാലും, ഈ കഴുകന്റെ ഉദരം കൂടുതൽ കാര്യങ്ങൾ പറയുന്നു.
ബാറ്ററി ആസിഡിനെക്കാൾ കടുത്ത, അസാധാരണമാംവിധം ശക്തമായൊരു ആസിഡ് സ്രവിക്കുന്ന അനേകം കോശങ്ങൾ ഉദരത്തിൽ കണ്ടെത്തിയതു ശാസ്ത്രജ്ഞൻമാരെ അതിശയിപ്പിച്ചു. അവ അസ്ഥിയിലെ കാൽസ്യത്തെ ദ്രവീകരിക്കുന്നു, അങ്ങനെ പ്രോട്ടീനെയും മജ്ജക്കൊഴുപ്പിനെയും മോചിപ്പിക്കുന്നു. ഈ ഭക്ഷണം, അതേതൂക്കം മാംസാഹാരത്തെക്കാൾ ഉയർന്ന കലോറി ഊർജം പ്രദാനം ചെയ്യുന്നു. അത്തരത്തിലുള്ള ഒരു ആസിഡ് പരിതഃസ്ഥിതിയിൽ ദഹന എൻസൈമുകൾ കാണപ്പെടുന്നുവെന്നതാണ് കൂടുതൽ ആശ്ചര്യകരം. അതുകൊണ്ട് ഈ ശക്തനായ ജീവി 90 ശതമാനം അസ്ഥി അടങ്ങിയ അത്തരം മാംസശുഷ്ക്കാഹാരത്താൽ പരിപോഷിപ്പിക്കപ്പെടുന്നത് എങ്ങനെയാണെന്നുള്ള രഹസ്യം ഇപ്പോൾ വ്യക്തമാക്കപ്പെട്ടിരിക്കുന്നു, സൃഷ്ടിയിലെ മറ്റൊരു അത്ഭുതം.
[25-ാം പേജിലെ ചിത്രത്തിന് കടപ്പാട്]
© Nigel Dennis, Photo Researchers