രോഗാ​ണു​ക്ക​ളു​ടെ പകവീട്ടൽ

ഇരുപ​താം നൂറ്റാണ്ട്‌ വൈദ്യ​ശാ​സ്‌ത്ര​ത്തിൽ അത്ഭുത​ക​ര​മായ മുന്നേ​റ്റങ്ങൾ കണ്ടിരി​ക്കു​ന്നു. വാസ്‌ത​വ​ത്തിൽ, മാരക രോഗാ​ണു​ക്ക​ളാ​ലുള്ള കഠോ​ര​ദ​ണ്ഡ​ന​ത്തി​നെ​തി​രെ ആയിര​ക്ക​ണ​ക്കി​നു വർഷങ്ങ​ളോ​ളം മനുഷ്യർ നിസ്സഹാ​യ​രാ​യി​രു​ന്നു. എന്നാൽ 1930-കളുടെ മധ്യത്തിൽ, ശാസ്‌ത്ര​ജ്ഞൻമാർ സൾഫനി​ലാ​മൈഡ്‌ കണ്ടുപി​ടി​ച്ച​തോ​ടെ സംഗതി​കൾക്കു മാറ്റം സംഭവി​ച്ചു തുടങ്ങി. രോഗി​ക്കു കാര്യ​മായ ഉപദ്രവം ഏൽപ്പി​ക്കാ​തെ ബാക്ടീ​രി​യയെ തോൽപ്പി​ക്കാൻ കഴിഞ്ഞ ആദ്യത്തെ വസ്‌തു​വാ​യി​രു​ന്നു അത്‌.a

പിൻവന്ന വർഷങ്ങ​ളിൽ, സാം​ക്ര​മിക രോഗ​ങ്ങ​ളോ​ടു മല്ലിടു​ന്ന​തിന്‌ ശാസ്‌ത്ര​ജ്ഞൻമാർ ശക്തി​യേ​റിയ പുതിയ മരുന്നു​കൾ ഉത്‌പാ​ദി​പ്പി​ച്ചെ​ടു​ത്തു—മലമ്പനി​യെ ആക്രമി​ക്കു​ന്ന​തി​നുള്ള ക്ലോ​റോ​ക്വി​നും ശ്വാസ​കോശ വീക്കം (pneumonia), സാം​ക്ര​മി​ക​വി​ഷ​ജ്വ​രം (scarlet fever), ക്ഷയം എന്നിവയെ കീഴ്‌പെ​ടു​ത്തു​ന്ന​തി​നുള്ള ആൻറി​ബ​യോ​ട്ടി​ക്കു​ക​ളും ഉദാഹ​ര​ണ​ങ്ങ​ളാണ്‌. 1965 ആയപ്പോ​ഴേ​ക്കും 25,000-ത്തിലധി​കം വ്യത്യസ്‌ത ആൻറി​ബ​യോ​ട്ടിക്‌ ഉത്‌പ​ന്നങ്ങൾ ഉത്‌പാ​ദി​പ്പി​ക്ക​പ്പെട്ടു. ബാക്ടീ​രി​യാ സംബന്ധ​മായ രോഗങ്ങൾ മേലാൽ വളരെ ഉത്‌ക​ണ്‌ഠാ​ജ​ന​ക​മോ ഗവേഷണ താത്‌പ​ര്യ​മു​ള്ള​തോ അല്ലെന്ന്‌ പല ശാസ്‌ത്ര​ജ്ഞൻമാ​രും നിഗമനം ചെയ്‌തു. അപ്പോൾപ്പി​ന്നെ, പെട്ടെ​ന്നു​തന്നെ നീക്ക​പ്പെ​ടാ​നി​രുന്ന ആ രോഗ​ങ്ങ​ളെ​ക്കു​റിച്ച്‌ എന്തിനു പഠിക്കണം?

ലോക​ത്തി​ലെ വികസിത രാജ്യ​ങ്ങ​ളിൽ, പുതിയ വാക്‌സി​നു​കൾ അഞ്ചാം​പ​നി​യു​ടെ​യും മുണ്ടി​നീ​രി​ന്റെ​യും ജർമൻ മീസൽസി​ന്റെ​യും നിരക്ക്‌ നാടകീ​യ​മാ​യി കുറയ്‌ക്കു​ക​യു​ണ്ടാ​യി. 1955-ൽ തുടങ്ങിയ, വലിയ തോതി​ലുള്ള പിള്ളവാത (polio) വാക്‌സി​നേഷൻ പ്രചാ​ര​ണ​പ​രി​പാ​ടി വളരെ​യ​ധി​കം വിജയ​പ്ര​ദ​മാ​യി​രു​ന്നു. തന്മൂലം, പശ്ചിമ യൂറോ​പ്പി​ലെ​യും വടക്കേ അമേരി​ക്ക​യി​ലെ​യും പിള്ളവാത കേസു​ക​ളു​ടെ എണ്ണം 1955-ൽ 76,000 ആയിരു​ന്ന​തിൽനിന്ന്‌ 1967-ൽ 1,000-ത്തിൽ താഴെ​യാ​യി കുത്തനെ കുറയു​ക​യു​ണ്ടാ​യി. ഒരു പ്രമുഖ കൊല​യാ​ളി രോഗ​മാ​യി​രുന്ന വസൂരി ലോക​വ്യാ​പ​ക​മാ​യി തുടച്ചു​നീ​ക്ക​പ്പെട്ടു.

ഈ നൂറ്റാണ്ട്‌ ഇല​ക്ട്രോൺ മൈ​ക്രോ​സ്‌കോ​പ്പി​ന്റെ കണ്ടുപി​ടി​ത്ത​ത്തി​നും സാക്ഷി​യാ​യി. ഒരു മനുഷ്യ​ന്റെ കൈവി​ര​ലി​ലെ നഖത്തെ​ക്കാ​ളും പത്തു ലക്ഷം മടങ്ങു ചെറിയ വൈറ​സു​കളെ കാണാൻ ശാസ്‌ത്ര​ജ്ഞൻമാ​രെ പ്രാപ്‌ത​മാ​ക്കുന്ന വളരെ ശക്തി​യേ​റിയ ഒരു ഉപകര​ണ​മാണ്‌ അത്‌. അത്തരം സൂക്ഷ്‌മ​ദർശി​നി​ക​ളും അതോ​ടൊ​പ്പം മറ്റു സാങ്കേ​തിക മുന്നേ​റ്റ​ങ്ങ​ളും മുമ്പൊ​രി​ക്ക​ലും കഴിഞ്ഞി​ട്ടി​ല്ലാത്ത വിധത്തിൽ സാം​ക്ര​മിക രോഗ​ങ്ങളെ മനസ്സി​ലാ​ക്കു​ന്ന​തും അവയോ​ടു മല്ലിടു​ന്ന​തും സാധ്യ​മാ​ക്കി​യി​രി​ക്കു​ന്നു.

വിജയം ഉറപ്പാ​യി​രി​ക്കു​ന്ന​താ​യി തോന്നി

ഈ കണ്ടുപി​ടി​ത്ത​ങ്ങ​ളു​ടെ​യെ​ല്ലാം ഫലമായി വൈദ്യ സമൂഹ​ത്തി​നു പൂർണ ഉറപ്പാ​യി​രു​ന്നു. സാം​ക്ര​മിക രോഗ​ങ്ങ​ളു​ടെ രോഗാ​ണു​ക്കൾ ആധുനിക വൈദ്യ​ശാ​സ്‌ത്ര​ത്തി​ന്റെ ആയുധ​ങ്ങ​ളു​ടെ മുന്നിൽ തോറ്റു തുന്നം​പാ​ടി. രോഗാ​ണു​ക്ക​ളു​ടെ മേലുള്ള ശാസ്‌ത്ര​ത്തി​ന്റെ വിജയം തീർച്ച​യാ​യും, ശീഘ്ര​വും സുനി​ശ്ചി​ത​വും പൂർണ​വും ആയിരി​ക്കു​മാ​യി​രു​ന്നു! ഒരു പ്രത്യേക രോഗ​ത്തി​നുള്ള പ്രതി​വി​ധി അതി​നോ​ടകം ലഭ്യമാ​യി​ട്ടി​ല്ലെ​ങ്കിൽ അത്‌ ഉടൻതന്നെ ലഭ്യമാ​കു​മാ​യി​രു​ന്നു.

1948 ആയപ്പോൾത്തന്നെ യു.എസ്‌. സംസ്ഥാന സെക്ര​ട്ട​റി​യായ സി. മാർഷൽ, സകല സാം​ക്ര​മിക രോഗ​ങ്ങ​ളു​ടെ​യും കീഴടക്കൽ ആസന്നമാ​ണെന്നു വീമ്പി​ളക്കി. പെട്ടെ​ന്നു​തന്നെ ഏഷ്യൻ മലമ്പനി “മേലാൽ വലിയ പ്രാധാ​ന്യ​മി​ല്ലാത്ത” ഒരു രോഗ​മാ​യി​ത്തീ​രു​മെന്ന്‌ മൂന്നു വർഷം കഴിഞ്ഞ​പ്പോൾ ലോകാ​രോ​ഗ്യ സംഘടന (ഡബ്ലിയു​എച്ച്‌ഒ) ഉറപ്പിച്ചു പറഞ്ഞു. സാം​ക്ര​മിക രോഗ​ങ്ങ​ളെ​ക്കു​റി​ച്ചുള്ള പുസ്‌തകം അടച്ചു​വെ​ക്കേണ്ട സമയമാ​യി​രി​ക്കു​ന്നെന്ന്‌ യു.എസ്‌. സർജൻ ജനറലായ വില്ല്യം എച്ച്‌. സ്റ്റിവർട്ട്‌ ആരോഗ്യ ഉദ്യോ​ഗ​സ്ഥ​രോ​ടു പറയത്ത​ക്ക​വണ്ണം, മാരക​വ്യാ​ധി​ക​ളു​ടെ​യും മഹാമാ​രി​ക​ളു​ടെ​യും യുഗം പൊയ്‌പോ​യി എന്ന വിശ്വാ​സം, 1960-കളുടെ മധ്യമാ​യ​പ്പോ​ഴേ​ക്കും അത്രകണ്ടു വ്യാപ​ക​മാ​യി​രു​ന്നു.

പഴയ രോഗങ്ങൾ മടങ്ങി​യെ​ത്തു​ന്നു

എന്നാൽ, സാം​ക്ര​മിക രോഗ​ങ്ങ​ളെ​ക്കു​റി​ച്ചുള്ള പുസ്‌തകം ഒരു പ്രകാ​ര​ത്തി​ലും അടച്ചു​വെ​ക്കാൻ സമയമാ​യി​ട്ടി​ല്ലാ​യി​രു​ന്നു. ശാസ്‌ത്രം മരുന്നു​ക​ളും വാക്‌സി​നു​ക​ളും കണ്ടുപി​ടി​ച്ച​തു​കൊ​ണ്ടു മാത്രം രോഗാ​ണു​ക്കൾ ഈ ഗ്രഹത്തിൽനി​ന്നും തിരോ​ധാ​നം ചെയ്‌തില്ല. തോൽപ്പി​ക്ക​പ്പെ​ടു​ന്ന​തിൽനി​ന്നു വ്യത്യ​സ്‌ത​മാ​യി, പ്രസി​ദ്ധ​രായ കൊല​യാ​ളി രോഗാ​ണു​ക്കൾ പ്രതി​കാ​ര​ബു​ദ്ധി​യോ​ടെ മടങ്ങി​യെത്തി! അവയെ കൂടാതെ, മുമ്പു ഡോക്ടർമാർക്ക്‌ അജ്ഞാത​മാ​യി​രുന്ന മറ്റു മാരക രോഗാ​ണു​ക്ക​ളും തലപൊ​ക്കി. അങ്ങനെ, ലോക​വ്യാ​പ​ക​മാ​യി കോടി​ക്ക​ണ​ക്കി​നാ​ളു​കളെ ഭീഷണി​പ്പെ​ടു​ത്തി​ക്കൊ​ണ്ടും ക്ലേശി​പ്പി​ച്ചു​കൊ​ണ്ടും കൊ​ന്നൊ​ടു​ക്കി​ക്കൊ​ണ്ടും പുതി​യ​തും പഴയതു​മായ രോഗാ​ണു​ക്കൾ അഴിഞ്ഞാ​ടി.

ഒരിക്കൽ നിയ​ന്ത്ര​ണ​വി​ധേ​യ​മെന്നു കരുതി​യി​രുന്ന കൊല​യാ​ളി രോഗങ്ങൾ, എന്നത്തേ​തി​ലു​മ​ധി​കം മാരക​ശ​ക്തി​യോ​ടെ, മരുന്നു​കൊ​ണ്ടു ചികി​ത്സി​ക്കാൻ ഏറെ ബുദ്ധി​മു​ട്ടു​ള്ള​വ​യാ​യി വീണ്ടും തലപൊ​ക്കി. ഇതി​നൊ​രു ഉദാഹ​ര​ണ​മാ​ണു ക്ഷയരോ​ഗം (റ്റിബി). ഡബ്ലിയു​എച്ച്‌ഒ അടുത്ത​കാ​ലത്ത്‌ ഇപ്രകാ​രം പ്രസ്‌താ​വി​ച്ചു: “റ്റിബി കേസു​ക​ളും മരണങ്ങ​ളും കുത്തനെ കുറയ്‌ക്കു​ന്ന​തി​നു​വേണ്ടി 1944 മുതൽ, ജപ്പാനി​ലും വടക്കേ അമേരി​ക്ക​യി​ലും യൂറോ​പ്പി​ലും റ്റിബി ഔഷധങ്ങൾ വ്യാപ​ക​മായ തോതിൽ ഉപയോ​ഗി​ച്ചി​രി​ക്കു​ന്നു. എന്നാൽ അത്രകണ്ടു വികസി​ത​മ​ല്ലാത്ത രാജ്യ​ങ്ങ​ളി​ലെ റ്റിബി നിയന്ത്രണ ശ്രമങ്ങൾ അവഗണി​ക്ക​പ്പെ​ട്ടി​രി​ക്കു​ന്നു. . . . കൂടുതൽ അപകട​ക​ര​വും പലതരം ഔഷധ​ങ്ങളെ ചെറു​ത്തു​നിൽക്കുന്ന രൂപങ്ങ​ളി​ലും ഈ രോഗം ധനിക രാജ്യ​ങ്ങ​ളി​ലേക്കു മടങ്ങി​യെ​ത്തു​ന്ന​തിന്‌ ഇത്‌ ഇടയാ​ക്കു​ന്നു.” സാധാ​ര​ണ​മാ​യി ശ്വാസ​കോ​ശ​ങ്ങ​ളിൽ കുടി​കൊ​ള്ളുന്ന, വായു​വി​ലൂ​ടെ പകരുന്ന ബാക്ടീ​രി​യ​യാ​ലു​ണ്ടാ​കുന്ന റ്റിബി ഇന്ന്‌ ഓരോ​വർഷ​വും ഏതാണ്ട്‌ 30 ലക്ഷം പേരെ, അതായത്‌ ഓരോ ദിവസ​വും 7,000-ത്തിലധി​കം പേരെ കൊ​ന്നൊ​ടു​ക്കു​ന്നു. 2005-ാം ആണ്ടാകു​മ്പോ​ഴേ​ക്കും പ്രതി​വർഷ മരണനി​രക്ക്‌ 40 ലക്ഷമായി കുതി​ച്ചു​യർന്നേ​ക്കാം.

മറ്റു മുൻ കൊല​യാ​ളി​ക​ളും വർധി​ച്ചു​വ​രു​ക​യാണ്‌. കോളറ ഇപ്പോൾ ആഫ്രി​ക്ക​യു​ടെ​യും ഏഷ്യയു​ടെ​യും ലാറ്റിൻ അമേരി​ക്ക​യു​ടെ​യും പല ഭാഗങ്ങ​ളിൽ വ്യാപ​ക​മാണ്‌. അത്‌ ക്ലേശി​പ്പി​ക്കു​ക​യും കൊല്ലു​ക​യും ചെയ്യുന്ന ആളുക​ളു​ടെ എണ്ണം വർധി​ച്ചു​വ​രു​ക​യാണ്‌. തീർത്തും പുതു​തായ ഒരു ഇനം ഏഷ്യയിൽ ആവിർഭ​വി​ച്ചി​ട്ടുണ്ട്‌.

എയി​ഡെസ്‌ എയ്‌ജി​പ്‌റ്റി എന്ന കൊതു​കു പരത്തുന്ന സന്ധിക​സ​ന്നി​പാ​ത​വും (dengue) വളരെ വേഗം വ്യാപി​ക്കു​ന്നു; അതി​പ്പോൾ ലോക​വ്യാ​പ​ക​മാ​യി 100-ലധികം രാജ്യ​ങ്ങ​ളിൽ 250 കോടി ആളുകളെ ഭീഷണി​പ്പെ​ടു​ത്തു​ന്നു. 1950-കൾമുതൽ ഈ രോഗ​ത്തി​ന്റെ, രക്തസ്രാ​വ​ത്തോ​ടു​കൂ​ടിയ മാരക​മായ ഒരു പുതിയ രൂപം ആവിർഭ​വി​ക്കു​ക​യും ഉഷ്‌ണ​മേ​ഖ​ല​ക​ളി​ലു​ട​നീ​ളം വ്യാപി​ക്കു​ക​യും ചെയ്‌തി​രി​ക്കു​ന്നു. അത്‌ ഓരോ വർഷവും ഏകദേശം 20,000 പേരെ കൊ​ന്നൊ​ടു​ക്കു​ന്ന​താ​യി കണക്കാ​ക്ക​പ്പെ​ടു​ന്നു. മിക്ക വൈറസ്‌ രോഗ​ങ്ങ​ളെ​യും പോ​ലെ​തന്നെ, ഈ രോഗ​ത്തി​നെ​തി​രെ സംരക്ഷണം നൽകുന്ന വാക്‌സി​നോ അതിനെ ഭേദമാ​ക്കുന്ന മരുന്നോ ഇല്ല.

തുടച്ചു​നീ​ക്കാ​മെന്നു ശാസ്‌ത്രം ഒരിക്കൽ പ്രത്യാ​ശി​ച്ചി​രുന്ന മലമ്പനി ഇപ്പോൾ ഓരോ വർഷവും ഏതാണ്ട്‌ 20 ലക്ഷം ആളുകളെ കൊ​ന്നൊ​ടു​ക്കു​ന്നു. മലമ്പനി​യു​ടെ പരാദ​ങ്ങ​ളെ​യും അവയെ വഹിക്കുന്ന കൊതു​കു​ക​ളെ​യും കൊല്ലു​ന്നതു കൂടുതൽ വിഷമ​ക​ര​മാ​യി​ത്തീർന്നി​രി​ക്കു​ക​യാണ്‌.

പുതിയ രോഗ​ങ്ങളെ നിർമൂ​ല​മാ​ക്കൽ

മനുഷ്യ​വർഗത്തെ ദുരി​ത​ത്തി​ലാ​ഴ്‌ത്തു​ന്ന​തി​നാ​യി അടുത്ത​കാ​ലത്തു തലപൊ​ക്കി​യി​ട്ടുള്ള പുതിയ രോഗ​ങ്ങ​ളിൽവെച്ച്‌ ഒരുപക്ഷേ ഏറ്റവും നന്നായി അറിയ​പ്പെ​ടു​ന്നതു മാരക​മായ എയ്‌ഡ്‌സാ​യി​രി​ക്കാം. ഭേദമാ​ക്കാ​നാ​വാത്ത ഈ രോഗ​ത്തി​നു നിദാ​ന​മായ വൈറ​സി​നെ​ക്കു​റിച്ച്‌ അറിവു ലഭിച്ചിട്ട്‌ ഏതാണ്ട്‌ ഒരു ഡസൻ വർഷങ്ങളേ ആയിട്ടു​ള്ളൂ. എന്നിട്ടും, 1994-ന്റെ ഒടുവി​ലാ​യ​പ്പോൾ ലോക​വ്യാ​പ​ക​മാ​യി ഈ വൈറസ്‌ ബാധി​ച്ച​വ​രു​ടെ എണ്ണം 130 ലക്ഷത്തി​നും 150 ലക്ഷത്തി​നും ഇടയ്‌ക്കാ​യി​രു​ന്നു.

മുമ്പു തിരി​ച്ച​റി​യാ​തി​രുന്ന മറ്റു സാം​ക്ര​മിക രോഗ​ങ്ങ​ളിൽ ഉൾപ്പെ​ടു​ന്ന​താണ്‌ ഹാന്റ​വൈ​റസ്‌ ശ്വാസ​കോശ സാകല്യം. വയൽ എലികൾ വഴി പകരുന്ന ആ രോഗം തെക്കു​പ​ടി​ഞ്ഞാ​റൻ ഐക്യ​നാ​ടു​ക​ളിൽ പ്രത്യ​ക്ഷ​മാ​കു​ക​യും റിപ്പോർട്ടു​ചെ​യ്യ​പ്പെട്ട പകുതി​യി​ല​ധി​കം കേസു​ക​ളി​ലും മാരക​മെന്നു തെളി​യു​ക​യും ചെയ്‌തു. തെക്കേ അമേരി​ക്ക​യിൽ രണ്ടു തരത്തി​ലുള്ള രക്തസ്രാവ പനികൾ—രണ്ടും പുതി​യ​തും മാരക​വു​മാണ്‌—വികാസം പ്രാപി​ച്ചി​ട്ടുണ്ട്‌. ലാസ, റിഫ്‌റ്റ്‌ വാലി, ഓറോ​പൂഷ്‌, റോസി, ക്യു. ഗ്വാനാ​റി​റ്റോ, വിഇഇ, മങ്കി​പോ​ക്‌സ്‌, ചികു​ങ്കു​നിയ, മോ​കോല, ഡൂഫൻഹാച്ച, ലഡാ​ന്റെക്‌, ക്യാസ​നുർ ഫോറസ്റ്റ്‌ മസ്‌തിഷ്‌ക്ക വൈറസ്‌, സെംലി​കി ഫോറസ്റ്റ്‌ ഏജൻറ്‌, ക്രിമീൻ-കൊങ്കൊ, ഒന്യൊ​ങ്‌ന്യൊങ്‌, സിൻഡ്‌ബിസ്‌, മാർബർഗ്‌, ഇബോല എന്നിങ്ങനെ വിചി​ത്ര​വും അസാധാ​ര​ണ​വു​മായ പേരു​ക​ളുള്ള വൈറ​സു​കൾ പരത്തുന്ന ഭയാന​ക​മായ മറ്റു രോഗ​ങ്ങ​ളും തലപൊ​ക്കി​യി​ട്ടുണ്ട്‌.

പുതിയ രോഗ​ങ്ങ​ളു​ടെ ആവിർഭാ​വം എന്തു​കൊണ്ട്‌?

ആധുനിക വൈദ്യ​ശാ​സ്‌ത്രം സ്വായ​ത്ത​മാ​ക്കി​യി​രി​ക്കുന്ന പരിജ്ഞാ​ന​വും നേട്ടങ്ങ​ളും എല്ലാം ഉണ്ടായി​രു​ന്നി​ട്ടും കൊല​യാ​ളി രോഗാ​ണു​ക്കളെ പരാജ​യ​പ്പെ​ടു​ത്തു​ന്നത്‌ ഇത്ര പ്രയാ​സ​ക​ര​മെന്നു തെളി​ഞ്ഞി​രി​ക്കു​ന്നത്‌ എന്തു​കൊ​ണ്ടാണ്‌? ഇന്നത്തെ സമുദാ​യ​ത്തി​ന്റെ വർധിച്ച സഞ്ചാര​ക്ഷ​മ​ത​യാണ്‌ ഒരു കാരണം. ആധുനിക ഗതാഗ​ത​ത്തിന്‌ ഒരു പ്രദേ​ശത്തെ പകർച്ച​വ്യാ​ധി​യെ പെട്ടെന്ന്‌ ആഗോ​ള​വ്യാ​പ​ക​മാ​ക്കി​ത്തീർക്കാൻ കഴിയും. രോഗ​ബാ​ധി​ത​നായ ഒരു വ്യക്തി​യു​ടെ​യു​ള്ളിൽ സ്വസ്ഥമാ​യി കഴിഞ്ഞു​കൂ​ടുന്ന മാരക​മായ ഒരു രോഗം മണിക്കൂ​റു​കൾക്കു​ള്ളിൽ ലോക​ത്തി​ന്റെ ഒരു ഭാഗത്തു​നി​ന്നു മറ്റേ​തെ​ങ്കി​ലും ഭാഗ​ത്തേക്ക്‌ സംക്ര​മി​ക്കു​ന്ന​തിന്‌ ജെറ്റ്‌ യാത്ര എളുപ്പ​മാ​ക്കി​ത്തീർക്കു​ന്നു.

രോഗാ​ണു​വി​ന്റെ വ്യാപ​ന​ത്തിന്‌ ഇടയാ​ക്കുന്ന രണ്ടാമത്തെ കാരണം ലോക​ജ​ന​സം​ഖ്യ​യു​ടെ സ്‌ഫോ​ട​നാ​ത്മ​ക​മായ വർധന​വാണ്‌—പ്രത്യേ​കി​ച്ചു നഗരങ്ങ​ളിൽ. നഗരങ്ങ​ളിൽ തീർച്ച​യാ​യും ചപ്പുചവർ ഉത്‌പാ​ദി​പ്പി​ക്ക​പ്പെ​ടു​ന്നുണ്ട്‌. പുതിയ മഴവെള്ളം നിറഞ്ഞ പ്ലാസ്റ്റിക്‌ പാത്ര​ങ്ങ​ളും ടയറു​ക​ളും ഈ ചപ്പുച​വ​റു​ക​ളു​ടെ കൂട്ടത്തിൽ പെടുന്നു. ഉഷ്‌ണ​മേ​ഖ​ല​ക​ളിൽ ഇത്‌ മലമ്പനി, പിത്തപ്പ​കർച്ച​പ്പനി, സന്ധിക​സ​ന്നി​പാ​തം തുടങ്ങിയ കൊല​യാ​ളി രോഗ​ങ്ങ​ളു​ടെ വാഹി​ക​ളായ കൊതു​കു​ക​ളു​ടെ പെരു​ക​ലിന്‌ ഇടയാ​ക്കു​ന്നു. മാത്രമല്ല, ഒരു ഇടതൂർന്ന വനം തീ ആളിപ്പ​ട​രാൻ ഇടയാ​ക്കു​ന്ന​തു​പോ​ലെ​തന്നെ ഉയർന്ന ജനസാ​ന്ദ്രത ക്ഷയത്തി​ന്റെ​യും ഇൻഫ്‌ളു​വൻസാ​യു​ടെ​യും വായു​വി​ലൂ​ടെ പകരുന്ന മറ്റു രോഗ​ങ്ങ​ളു​ടെ​യും വേഗത്തി​ലുള്ള വ്യാപ​ന​ത്തിന്‌ അനു​യോ​ജ്യ​മായ ചുറ്റു​പാ​ടു​കൾ പ്രദാനം ചെയ്യുന്നു.

രോഗാ​ണു​വി​ന്റെ തിരി​ച്ചു​വ​ര​വി​നുള്ള മൂന്നാ​മത്തെ കാരണം മനുഷ്യ​ന്റെ സ്വഭാ​വ​ത്തി​ലുള്ള മാറ്റങ്ങ​ളാണ്‌. 20-ാം നൂറ്റാ​ണ്ടി​ന്റെ രണ്ടാം പകുതി​യു​ടെ സവി​ശേ​ഷ​ത​യാ​യി​രി​ക്കുന്ന, ബഹു പങ്കാളിത്ത ലൈം​ഗിക ബന്ധങ്ങളു​ടെ അഭൂത​പൂർവ​മായ തോതു നിമിത്തം ലൈം​ഗി​ക​മാ​യി പകരുന്ന രോഗാ​ണു​ക്കൾ തഴച്ചു​വ​ള​രു​ക​യും വ്യാപി​ക്കു​ക​യും ചെയ്‌തി​രി​ക്കു​ന്നു. എയ്‌ഡ്‌സി​ന്റെ വ്യാപനം ഇതി​നൊ​രു ഉദാഹ​രണം മാത്ര​മാണ്‌.b

കൊല​യാ​ളി രോഗാ​ണു​ക്കളെ തോൽപ്പി​ക്കാൻ ഇത്രയും പ്രയാ​സ​മാ​യി​രി​ക്കു​ന്ന​തി​ന്റെ നാലാ​മ​ത്തെ​കാ​രണം മനുഷ്യൻ വനങ്ങളി​ലും മഴക്കാ​ടു​ക​ളി​ലും അതി​ക്ര​മി​ച്ചു കടന്നി​രി​ക്കു​ന്നു എന്നുള്ള​താണ്‌. ദ ഹോട്ട്‌ സോൺ എന്ന തന്റെ പുസ്‌ത​ക​ത്തിൽ എഴുത്തു​കാ​ര​നായ റിച്ചർഡ്‌ പ്രെസ്റ്റൻ ഇപ്രകാ​രം പ്രസ്‌താ​വി​ക്കു​ന്നു: “എയ്‌ഡ്‌സി​ന്റെ​യും ഇബോ​ല​യു​ടെ​യും മഴക്കാ​ടു​ക​ളി​ലെ മറ്റനേകം ഏജന്റു​മാ​രു​ടെ​യും ആവിർഭാ​വം ഉഷ്‌ണ​മേ​ഖലാ ജീവമ​ണ്ഡ​ല​ത്തി​നു സംഭവിച്ച നാശത്തി​ന്റെ സ്വാഭാ​വിക പ്രത്യാ​ഘാ​ത​മാ​യി കാണ​പ്പെ​ടു​ന്നു. ഈ വൈറ​സു​കൾ തലപൊ​ക്കു​ന്നതു പാരി​സ്ഥി​തി​ക​മാ​യി ക്ഷതം സംഭവിച്ച ഭൂഭാ​ഗ​ങ്ങ​ളിൽനി​ന്നാണ്‌. അവയിൽ പലതും ഉഷ്‌ണ​മേ​ഖലാ മഴക്കാ​ടി​ന്റെ താറു​മാ​റാ​യി​ക്കി​ട​ക്കുന്ന അറ്റങ്ങളിൽനി​ന്നാ​ണു വരുന്നത്‌ . . . ലോക​ത്തി​ലെ സസ്യ ജന്തു വർഗങ്ങ​ളിൽ മിക്കതി​നെ​യും ഉൾക്കൊ​ള്ളുന്ന ഉഷ്‌ണ​മേ​ഖലാ മഴക്കാ​ടു​കൾ ഈ ഗ്രഹത്തി​ലെ ജീവന്റെ വൻ കലവറ​ക​ളാണ്‌. ജീവനു​ള്ള​തെ​ല്ലാം വൈറ​സു​കളെ വഹിക്കു​ന്ന​തു​കൊണ്ട്‌ ഈ മഴക്കാ​ടു​കൾ ഗ്രഹത്തി​ലെ, വൈറ​സു​ക​ളു​ടെ ഏറ്റവും വലിയ കലവറ​കൂ​ടി​യാണ്‌.”

വൈറ​സു​കൾ നിരു​പ​ദ്ര​വ​ക​ര​മാ​യി കഴിഞ്ഞു​കൂ​ടു​ക​യും പുനരു​ത്‌പാ​ദനം നടത്തു​ക​യും ചാകു​ക​യും ചെയ്യുന്ന പ്രാണി​ക​ളും ഉഷ്‌ണ രക്തമുള്ള മൃഗങ്ങ​ളു​മാ​യി മനുഷ്യർ അങ്ങനെ കൂടുതൽ അടുത്ത ബന്ധത്തിൽ വന്നിരി​ക്കു​ന്നു. എന്നാൽ ഒരു വൈറസ്‌ മൃഗത്തിൽനി​ന്നു മനുഷ്യ​നി​ലേക്കു “ചാടു”മ്പോൾ അതു മാരക​മാ​യി​ത്തീർന്നേ​ക്കാം.

വൈദ്യ​ശാ​സ്‌ത്ര​ത്തി​ന്റെ പരിമി​തി​കൾ

സാം​ക്ര​മിക രോഗങ്ങൾ തിരി​ച്ചു​വ​രവു നടത്തു​ന്ന​തി​ന്റെ മറ്റു കാരണങ്ങൾ വൈദ്യ​ശാ​സ്‌ത്ര​ത്തോ​ടു​തന്നെ ബന്ധപ്പെ​ട്ട​താണ്‌. ഒരിക്കൽ ആൻറി​ബ​യോ​ട്ടി​ക്കു​കൾ മൂലം നശിച്ചി​രുന്ന പല ബാക്ടീ​രി​യ​ക​ളും ഇപ്പോൾ അവയെ വെല്ലു​വി​ളി​ക്കു​ക​യാണ്‌. വിരോ​ധാ​ഭാ​സ​മെന്നു പറയട്ടെ, ആൻറി​ബ​യോ​ട്ടി​ക്കു​കൾ തന്നെ ഈ സ്ഥിതി​വി​ശേ​ഷ​ത്തി​നി​ട​യാ​ക്കി​യി​രി​ക്കു​ന്നു. ഉദാഹ​ര​ണ​ത്തിന്‌, ഒരു ആൻറി​ബ​യോ​ട്ടിക്ക്‌ രോഗ​ബാ​ധി​ത​നായ ഒരാളി​ലെ ഉപദ്ര​വ​കാ​രി​യായ ബാക്ടീ​രി​യ​യു​ടെ 99 ശതമാ​നത്തെ മാത്രമേ കൊല്ലു​ന്നു​ള്ളൂ​വെ​ങ്കിൽ ആൻറി​ബ​യോ​ട്ടി​ക്കി​നെ ചെറു​ത്തു​നിൽക്കുന്ന, അതിജീ​വി​ക്കുന്ന ഒരു ശതമാ​ന​ത്തിന്‌ ഇപ്പോൾ, പുതു​താ​യി ഉഴുത നിലത്തി​ലെ ശക്തി​യേ​റിയ ഇനം കളക​ളെ​പ്പോ​ലെ വളർന്നു പെരു​കാൻ കഴിയും.

ഡോക്ടർ കുറി​ച്ചു​കൊ​ടു​ക്കുന്ന ആൻറി​ബ​യോ​ട്ടി​ക്കു​ക​ളു​ടെ കോഴ്‌സ്‌ പൂർത്തി​യാ​ക്കാത്ത രോഗി​കൾ പ്രശ്‌നത്തെ വലുതാ​ക്കു​ന്നു. സുഖം​തോ​ന്നി തുടങ്ങി​യാ​ലു​ടൻതന്നെ രോഗി​കൾ ഗുളി​കകൾ കഴിക്കു​ന്നതു നിർത്തി​യേ​ക്കാം. ഒട്ടും കരുത്തി​ല്ലാത്ത രോഗാ​ണു​ക്കൾ ചത്തേക്കാ​മെ​ങ്കി​ലും ഏറ്റവും കരുത്തു​ള്ളവ അതിജീ​വി​ക്കു​ക​യും നിശബ്ദം പെരു​കു​ക​യും ചെയ്യുന്നു. ഏതാനും ആഴ്‌ച​യ്‌ക്കു​ള്ളിൽ രോഗം വീണ്ടും ഉണ്ടാകു​ന്നു, എന്നാൽ ഇത്തവണ രോഗത്തെ മരുന്നു​കൾക്കൊ​ണ്ടു ഭേദ​പ്പെ​ടു​ത്തുക ബുദ്ധി​മു​ട്ടാ​യി​രി​ക്കും, അല്ലെങ്കിൽ അസാധ്യ​മാ​യി​രി​ക്കും. ഔഷധ പ്രതി​രോ​ധ​ശ​ക്തി​യുള്ള ഈ രോഗാ​ണു ഇനങ്ങൾ മറ്റു മനുഷ്യ​രെ ആക്രമി​ക്കു​മ്പോൾ ഗുരു​ത​ര​മായ ഒരു പൊതു​ജന ആരോഗ്യ പ്രശ്‌നം ഉടലെ​ടു​ക്കു​ന്നു.

ഡബ്ലിയു​എ​ച്ച്‌ഒ-യിലെ വിദഗ്‌ധർ അടുത്ത​കാ​ലത്ത്‌ ഇപ്രകാ​രം പ്രസ്‌താ​വി​ച്ചു: “[ആൻറി​ബ​യോ​ട്ടി​ക്കു​ക​ളോ​ടും മറ്റു രോഗാ​ണു​വി​രുദ്ധ ഏജൻറു​ക​ളോ​ടും ഉള്ള] ചെറു​ത്തു​നിൽപ്പ്‌ പല രാജ്യ​ങ്ങ​ളി​ലും പടർന്നു​പി​ടി​ക്കു​ന്നു, പലയിനം മരുന്നു​ക​ളോ​ടുള്ള ചെറു​ത്തു​നിൽപ്പു നിമിത്തം വാസ്‌ത​വ​ത്തിൽ ഡോക്ടർമാർക്ക്‌ രോഗ​ങ്ങ​ളു​ടെ വർധി​ച്ചു​വ​രുന്ന എണ്ണത്തിന്റെ ചികി​ത്സ​യി​ലെ കരുനീ​ക്ക​ത്തി​നു വഴിമു​ട്ടി​പ്പോ​യി​രി​ക്കു​ക​യാണ്‌. ആശുപ​ത്രി​ക​ളിൽ തന്നെ, ലോക​വ്യാ​പ​ക​മാ​യി ഓരോ ദിവസ​വും പത്തു ലക്ഷം ബാക്ടീ​രി​യാ ബാധകൾ ഉണ്ടാകു​ന്ന​താ​യി കണക്കാ​ക്ക​പ്പെ​ടു​ന്നു, ഇവയിൽ മിക്കതും ഔഷധ പ്രതി​രോ​ധ​ശ​ക്തി​യു​ള്ള​വ​യാണ്‌.”

രണ്ടാം ലോക​യു​ദ്ധം​മു​ത​ലുള്ള രക്തപ്പകർച്ച​ക​ളു​ടെ വർധിച്ച അളവി​ലുള്ള ഉപയോ​ഗ​വും സാം​ക്ര​മിക രോഗ​ങ്ങ​ളു​ടെ വ്യാപ​ന​ത്തി​നു സഹായി​ച്ചു. രക്തത്തെ മാരക രോഗാ​ണു​വി​മു​ക്ത​മാ​യി സൂക്ഷി​ക്കാ​നുള്ള ശാസ്‌ത്ര​ത്തി​ന്റെ ശ്രമങ്ങൾ ഉണ്ടായി​രു​ന്നി​ട്ടും ഹെപ്പ​റ്റൈ​റ്റിസ്‌, സൈ​റ്റോ​മെ​ഗാ​ലോ​വൈ​റസ്‌, ആൻറി​ബ​യോ​ട്ടി​ക്കി​നോട്‌ പ്രതി​രോ​ധ​ശ​ക്തി​യുള്ള ബാക്ടീ​രി​യകൾ, മലമ്പനി, പിത്തപ്പ​കർച്ച​പ്പനി, നിദ്രാ​രോ​ഗം, എയ്‌ഡ്‌സ്‌ എന്നിവ​യു​ടെ​യും ഭയജന​ക​മായ മറ്റു പല രോഗ​ങ്ങ​ളു​ടെ​യും വ്യാപ​ന​ത്തി​നു രക്തപ്പകർച്ചകൾ ഗണ്യമായ രീതി​യിൽ സംഭാവന ചെയ്‌തി​രി​ക്കു​ന്നു.

ഇന്ന്‌ കാര്യ​ങ്ങ​ളു​ടെ കിടപ്പ്‌

ഈ നൂറ്റാ​ണ്ടിൽ വൈദ്യ​ശാ​സ്‌ത്രം പരിജ്ഞാ​ന​ത്തി​ന്റെ ഒരു സ്‌ഫോ​ട​ന​ത്തി​നു സാക്ഷ്യം വഹിച്ചി​ട്ടു​ണ്ടെ​ങ്കി​ലും അനേകം രഹസ്യങ്ങൾ ഇനിയും ചുരു​ള​ഴി​യാൻ കിടക്കു​ന്നു. അമേരി​ക്ക​യു​ടെ ഏറ്റവും പ്രധാന പൊതു​ജ​നാ​രോ​ഗ്യ ലബോ​റ​ട്ട​റി​യായ രോഗ​നി​യ​ന്ത്രണ കേന്ദ്ര​ങ്ങ​ളിൽ സി. ജെ. പീറ്റേ​ഴ്‌സ്‌ അപകട​കാ​രി​ക​ളായ രോഗാ​ണു​ക്ക​ളെ​ക്കു​റി​ച്ചു പഠിക്കു​ക​യാണ്‌. 1995 മേയിൽ നടത്തിയ ഒരു അഭിമു​ഖ​ത്തിൽ ഇബോ​ല​യെ​ക്കു​റിച്ച്‌ അദ്ദേഹം ഇങ്ങനെ പറഞ്ഞു: “അതു മനുഷ്യർക്ക്‌ ഇത്ര മാരക​മാ​യി​രി​ക്കു​ന്ന​തെ​ന്തു​കൊ​ണ്ടെന്നു ഞങ്ങൾക്ക്‌ അറിയില്ല. ഈ പകർച്ച​വ്യാ​ധി​കൾക്ക്‌ ഇടയാ​ക്കാ​ത്ത​പ്പോൾ അത്‌ എന്താണു ചെയ്യു​ന്നത്‌ [അല്ലെങ്കിൽ] അത്‌ എവി​ടെ​യാണ്‌ എന്നു ഞങ്ങൾക്ക്‌ അറിയില്ല. ഞങ്ങൾക്ക്‌ അതിനെ കണ്ടെത്താൻ കഴിയു​ന്നില്ല. ഞങ്ങൾക്ക്‌ ഇത്രയ​ധി​കം അജ്ഞാത​മായ . . . മറ്റൊരു വൈറസ്‌ കുടും​ബ​വു​മില്ല.”

രോഗ​വു​മാ​യി മല്ലിടു​ന്ന​തി​നു ഫലപ്ര​ദ​മായ വൈദ്യ പരിജ്ഞാ​ന​വും മരുന്നു​ക​ളും വാക്‌സി​നു​ക​ളും ഉള്ളപ്പോൾപ്പോ​ലും ആവശ്യ​ക്കാ​രിൽ അവ പ്രയോ​ഗി​ക്കാൻ പണം ആവശ്യ​മാണ്‌. കോടി​കൾ ദാരി​ദ്ര്യ​ത്തി​ലാ​ണു കഴിയു​ന്നത്‌. ഡബ്ലിയു​എച്ച്‌ഒ-യുടെ ലോകാ​രോ​ഗ്യ റിപ്പോർട്ട്‌ 1995 (ഇംഗ്ലീഷ്‌) ഇപ്രകാ​രം പ്രസ്‌താ​വി​ക്കു​ന്നു: “കുഞ്ഞു​ങ്ങൾക്കു വാക്‌സി​നേഷൻ എടുക്കാ​ത്ത​തി​നും ശുദ്ധജ​ല​വും ശുചി​ത്വ​വും നൽകാ​ത്ത​തി​നും രോഗം ഭേദമാ​ക്കുന്ന മരുന്നു​ക​ളും മറ്റു ചികി​ത്സ​ക​ളും ലഭ്യമ​ല്ലാ​ത്ത​തി​നു​മുള്ള മുഖ്യ കാരണം ദാരി​ദ്ര്യ​മാണ്‌ . . . വികസ്വര ലോകത്ത്‌ ഓരോ വർഷവും 5 വയസ്സിനു താഴെ​യുള്ള 1 കോടി 22 ലക്ഷം കുട്ടികൾ മരണമ​ട​യു​ന്നു, ഓരോ കുട്ടി​ക്കും വേണ്ടി ഏതാനും യുഎസ്‌ സെന്റുകൾ മാത്രം ചെലവ​ഴി​ച്ചി​രു​ന്നെ​ങ്കിൽ തടയാ​മാ​യി​രുന്ന കാരണ​ങ്ങ​ളാണ്‌ ഇവയിൽ മിക്കതി​നും പിന്നി​ലു​ള്ളത്‌. അവർ മരിക്കു​ന്നതു മുഖ്യ​മാ​യും ലോക​ത്തി​ന്റെ അനാസ്ഥ നിമി​ത്ത​മാണ്‌. എന്നാൽ സർവോ​പരി, അവർ മരിക്കു​ന്നതു ദാരി​ദ്ര്യം നിമി​ത്ത​മാണ്‌.”

1995 ആയപ്പോ​ഴേ​ക്കും ലോക​ത്തി​ലെ ഏറ്റവും വലിയ കൊല​യാ​ളി​കൾ സാം​ക്ര​മിക രോഗ​ങ്ങ​ളും പരാദ​ങ്ങ​ളും ആയിരു​ന്നു. അവ ഓരോ വർഷവും 164 ലക്ഷം പേരുടെ ജീവൻ കവർന്നെ​ടു​ക്കു​ന്നു. ദുഃഖ​ക​ര​മെന്നു പറയട്ടെ, മാരക രോഗാ​ണു​ക്ക​ളു​ടെ ആവിർഭാ​വ​ത്തി​നും വ്യാപ​ന​ത്തി​നും ഏറ്റവും പറ്റിയ സാഹച​ര്യ​ങ്ങ​ളി​ലാണ്‌ അസംഖ്യം കോടി​ക​ളും ജീവി​ക്കു​ന്നത്‌. ഇന്നത്തെ ശോച്യാ​വസ്ഥ പരിചി​ന്തി​ക്കുക. 100 കോടി​യി​ലേറെ ആളുകൾ കൊടും ദാരി​ദ്ര്യ​ത്തി​ലാ​ണു കഴിയു​ന്നത്‌. ലോക​ജ​ന​സം​ഖ്യ​യു​ടെ പകുതിക്ക്‌ വൈദ്യ ചികി​ത്സ​യോ അനിവാ​ര്യ​മായ മരുന്നു​ക​ളോ ക്രമമായ അടിസ്ഥാ​ന​ത്തിൽ ലഭിക്കു​ന്നില്ല. ഉപേക്ഷി​ക്ക​പ്പെട്ട ലക്ഷക്കണ​ക്കി​നു കുട്ടികൾ മലിനീ​കൃ​ത​മായ വൻ നഗരങ്ങ​ളു​ടെ തെരു​വു​ക​ളിൽ അലഞ്ഞു​തി​രി​യു​ന്നു. അവരിൽ പലരും മയക്കു​മ​രു​ന്നു കുത്തി​വ​യ്‌ക്കു​ന്ന​വ​രും പതിവാ​യി വേശ്യാ​വൃ​ത്തി​യി​ലേർപ്പെ​ടു​ന്ന​വ​രും ആണ്‌. ലക്ഷക്കണ​ക്കിന്‌ അഭയാർഥി​കൾ വൃത്തി​കെട്ട ക്യാമ്പു​ക​ളിൽ കോള​റ​ക്കും അതിസാ​ര​ത്തി​നും മറ്റു രോഗ​ങ്ങൾക്കും നടുവിൽ വലയുന്നു.

മനുഷ്യ​നും രോഗാ​ണു​വും തമ്മിലുള്ള യുദ്ധത്തിൽ സാഹച​ര്യ​ങ്ങൾ വർധിച്ച അളവിൽ രോഗാ​ണു​വിന്‌ അനുകൂ​ല​മാ​യി​രി​ക്കു​ന്നു.

[അടിക്കു​റി​പ്പു​കൾ]

[6-ാം പേജിലെ ആകർഷ​ക​വാ​ക്യം]

“ആശുപ​ത്രി​ക​ളിൽ തന്നെ, ലോക​വ്യാ​പ​ക​മാ​യി ഓരോ ദിവസ​വും പത്തു ലക്ഷം ബാക്ടീ​രി​യാ ബാധകൾ ഉണ്ടാകു​ന്ന​താ​യി കണക്കാ​ക്ക​പ്പെ​ടു​ന്നു, ഇവയിൽ മിക്കതും ഔഷധ പ്രതി​രോ​ധ​ശ​ക്തി​യു​ള്ള​വ​യാണ്‌.” ലോകാരോഗ്യ സംഘടന

[7-ാം പേജിലെ ചതുരം]

രോഗാണുക്കൾ തിരി​ച്ച​ടി​ക്കു​മ്പോൾ

ബാക്ടീ​രി​യം എന്നറി​യ​പ്പെ​ടുന്ന ഒരു ചെറിയ രോഗാ​ണു​വി​ന്റെ “ഭാരം 0.00000000001 ഗ്രാ​മേ​യു​ള്ളൂ. ഒരു നീലത്തി​മിം​ഗ​ല​ത്തി​ന്റെ ഭാരം ഏകദേശം 10,00,00,000 ഗ്രാമാണ്‌. എങ്കിലും ഒരു ബാക്ടീ​രി​യ​ത്തിന്‌ ഒരു തിമിം​ഗ​ലത്തെ കൊല്ലാൻ കഴിയും.”—ബർനാർഡ്‌ ഡിക്‌സൻ, 1994.

ആശുപ​ത്രി​യിൽ കണ്ടുവ​രുന്ന ഏറ്റവും ഭയാന​ക​മായ ബാക്ടീ​രി​യ​ക​ളിൽ പെടു​ന്ന​താണ്‌ ഔഷധ പ്രതി​രോ​ധ​ശ​ക്തി​യുള്ള സ്റ്റഫലോ​കോ​ക്കസ്‌ ഔറി​യസ്‌ ഇനങ്ങൾ. ഈ ഇനങ്ങൾ, രക്തത്തിലെ മാരക​മായ രോഗ​ബാ​ധ​കൾക്കും ശ്വാസ​കോ​ശ​വീ​ക്ക​ത്തി​നും ബാക്ടീ​രി​യാ വിഷബാ​ധ​മൂ​ല​മുള്ള ജീവൽപ്ര​വർത്ത​ന​ങ്ങ​ളു​ടെ മന്ദീഭാ​വ​ത്തി​നും ഇടയാ​ക്കി​ക്കൊണ്ട്‌ രോഗി​ക​ളെ​യും ദുർബ​ല​രെ​യും ക്ലേശി​പ്പി​ക്കു​ന്നു. ഒരു മൊത്ത​ക്ക​ണക്ക്‌ അനുസ​രിച്ച്‌ സ്റ്റഫ്‌ ഐക്യ​നാ​ടു​ക​ളിൽ ഓരോ വർഷവും ഏതാണ്ട്‌ 60,000 പേരെ കൊല്ലു​ന്നു—കാറപ​ക​ട​ങ്ങ​ളിൽ മരിക്കു​ന്ന​വ​രു​ടെ എണ്ണത്തെ​ക്കാൾ കൂടുതൽ. അനേക​വർഷ​ങ്ങൾക്കൊണ്ട്‌ ഈ ബാക്ടീ​രി​യകൾ ആൻറി​ബ​യോ​ട്ടി​ക്കു​ക​ളോട്‌ അങ്ങേയറ്റം പ്രതി​രോ​ധ​ശ​ക്തി​യു​ള്ള​വ​യാ​യി​ത്തീർന്നു. 1988 ആയപ്പോ​ഴേ​ക്കും അവയ്‌ക്കെ​തി​രെ ഫലപ്ര​ദ​മായ ഒരു ആൻറി​ബ​യോ​ട്ടിക്‌ മാത്രമേ ഉണ്ടായി​രു​ന്നു​ള്ളൂ—വങ്ക​മൈ​സിൻ. എന്നാൽ പെട്ടെ​ന്നു​തന്നെ വങ്ക​മൈ​സനെ ചെറു​ത്തു​നിൽക്കുന്ന ഇനങ്ങ​ളെ​ക്കു​റി​ച്ചുള്ള റിപ്പോർട്ടു​കൾ ലോക​ത്തി​നു ചുറ്റു​നി​ന്നും വന്നു തുടങ്ങി.

ആൻറി​ബ​യോ​ട്ടി​ക്കു​കൾ അവയുടെ കൃത്യം നിർവ​ഹി​ക്കു​മ്പോൾപ്പോ​ലും മറ്റു പ്രശ്‌നങ്ങൾ തലപൊ​ക്കി​യേ​ക്കാം. 1993-ന്റെ മധ്യത്തിൽ ജോൺ റേ ഒരു സാധാരണ ശസ്‌ത്ര​ക്രി​യ​യ്‌ക്കു​വേണ്ടി ഐക്യ​നാ​ടു​ക​ളി​ലെ ഒരു ആശുപ​ത്രി​യിൽ പോയി. ഏതാനും ദിവസ​ങ്ങൾക്കു​ള്ളിൽ വീട്ടിൽ തിരി​ച്ചു​വ​രാ​മെന്ന്‌ അവൾ പ്രതീ​ക്ഷി​ച്ചു. എന്നാൽ അതിനു​പ​കരം, അവൾക്ക്‌ 322 ദിവസം ആശുപ​ത്രി​യിൽ കിട​ക്കേ​ണ്ട​താ​യി വന്നു, ശസ്‌ത്ര​ക്രി​യാ​ന​ന്തരം ഉണ്ടായ രോഗ​ബാ​ധ​ക​ളാ​യി​രു​ന്നു മുഖ്യ പ്രശ്‌നം. വങ്ക​മൈ​സിൻ ഉൾപ്പെ​ടെ​യുള്ള ആൻറി​ബ​യോ​ട്ടി​ക്കു​ക​ളു​ടെ വലിയ ഡോസു​കൾ നൽകി​ക്കൊണ്ട്‌ ഡോക്ടർമാർ രോഗ​ബാ​ധ​ക​ളോ​ടു മല്ലടിച്ചു. എന്നാൽ രോഗാ​ണു​ക്കൾ തിരി​ച്ച​ടി​ച്ചു. ജോൺ ഇപ്രകാ​രം പറയുന്നു: “എനിക്ക്‌ എന്റെ കൈകൾ ഉപയോ​ഗി​ക്കാൻ കഴിഞ്ഞില്ല. പാദങ്ങൾ ഉപയോ​ഗി​ക്കാൻ കഴിഞ്ഞില്ല. . . . ഒരു പുസ്‌തകം കയ്യി​ലെ​ടുത്ത്‌ വായി​ക്കാൻ പോലും കഴിഞ്ഞി​രു​ന്നില്ല.”

മാസങ്ങ​ളോ​ളം ആൻറി​ബ​യോ​ട്ടിക്‌ ചികിത്സ നടത്തി​യി​ട്ടും ജോണി​ന്റെ രോഗം മാറാ​ത്ത​തെ​ന്തു​കൊ​ണ്ടെന്നു കണ്ടുപി​ടി​ക്കാ​നാ​യി ഡോക്ടർമാർ കിണഞ്ഞു പരി​ശ്ര​മി​ച്ചു. അവളുടെ ശരീര​വ്യ​വ​സ്ഥ​യിൽ സ്റ്റഫ്‌ ബാധക്കു​പു​റമേ വങ്ക​മൈ​സിൻ-പ്രതി​രോധ എന്റെ​റൊ​കോ​ക്കസ്‌ എന്ന മറ്റൊരു തരം ബാക്ടീ​രിയ കൂടി​യു​ണ്ടെന്ന്‌ ലബോ​റ​ട്ടറി പ്രവർത്തനം പ്രകട​മാ​ക്കി. പേരു സൂചി​പ്പി​ക്കു​ന്ന​തു​പോ​ലെ​തന്നെ ഈ ബാക്ടീ​രി​യക്ക്‌ വങ്ക​മൈ​സിൻ ഉപദ്ര​വ​മേൽപ്പി​ച്ചില്ല; മറ്റെല്ലാ ആൻറി​ബ​യോ​ട്ടി​ക്കു​ക​ളോ​ടും അതിനു പ്രതി​രോ​ധ​ശ​ക്തി​യു​ള്ള​താ​യും കാണ​പ്പെട്ടു.

തങ്ങളെ അമ്പരപ്പിച്ച എന്തോ ഒന്ന്‌ അപ്പോൾ ഡോക്ടർമാർ മനസ്സി​ലാ​ക്കി. ആ ബാക്ടീ​രി​യയെ കൊ​ല്ലേ​ണ്ടി​യി​രുന്ന മരുന്നു​കളെ അതു ചെറു​ത്തു​നി​ന്നെന്നു മാത്രമല്ല, അവരുടെ പ്രതീ​ക്ഷ​യ്‌ക്കു വിരു​ദ്ധ​മാ​യി, അതു വാസ്‌ത​വ​ത്തിൽ വങ്ക​മൈ​സിൻ ഉപയോ​ഗിച്ച്‌ അതിജീ​വി​ക്കു​ക​യും ചെയ്‌തു! ഒരു സാം​ക്ര​മിക രോഗ വിദഗ്‌ധ​നായ, ജോണി​ന്റെ ഡോക്ടർ ഇപ്രകാ​രം പറഞ്ഞു: “[ആ ബാക്ടീ​രി​യക്ക്‌] പെരു​കാൻ വങ്ക​മൈ​സിൻ ആവശ്യ​മാണ്‌, അതി​ല്ലെ​ങ്കിൽ അവ വളരു​ക​യില്ല. അതു​കൊണ്ട്‌ ഒരർഥ​ത്തിൽ അവ വങ്ക​മൈ​സി​നെ ആഹാര​മാ​യി ഉപയോ​ഗി​ക്കു​ക​യാണ്‌.”

ജോണി​നു വങ്ക​മൈ​സിൻ കൊടു​ക്കു​ന്നതു ഡോക്ടർമാർ നിർത്തി​യ​പ്പോൾ ബാക്ടീ​രിയ ചാകു​ക​യും ജോൺ സുഖം പ്രാപി​ച്ചു തുടങ്ങു​ക​യും ചെയ്‌തു.

[8-ാം പേജിലെ ചിത്രം]

രോഗികൾ അനുചി​ത​മാ​യി ആൻറി​ബ​യോ​ട്ടി​ക്കു​കൾ ഉപയോ​ഗി​ക്കു​മ്പോൾ രോഗാ​ണു​ക്കൾ തഴച്ചു​വ​ള​രു​ന്നു

[9-ാം പേജിലെ ചിത്രം]

രക്തപ്പകർച്ചകൾ മാരക രോഗാ​ണു​ക്കളെ വ്യാപി​പ്പി​ക്കു​ന്നു