പ്രവർത്ത​നങ്ങൾ ആസക്തമാ​യി​ത്തീ​രു​മ്പോൾ

വസ്‌തു​ക്ക​ളോ​ടുള്ള ആസക്തി​യും പ്രവർത്ത​ന​ങ്ങ​ളോ​ടുള്ള ആസക്തി​യും, ഒരേ പാളത്തിൽ, ഒരേ ദിശയിൽ ഓടുന്ന രണ്ടു ട്രെയി​നു​കൾ പോ​ലെ​യാണ്‌.a രണ്ടിനും ഒരേ ലക്ഷ്യവും ഉദ്ദേശ്യ​വു​മാ​ണു​ള്ളത്‌. അതായത്‌, മാനസി​കാ​വ​സ്ഥ​കൾക്കു മാററം വരുത്തു​ക​യും വേദനാ​ക​ര​മായ വികാ​ര​ങ്ങളെ മറച്ചു​വ​യ്‌ക്കു​ക​യും ചെയ്യുക എന്നത്‌. പ്രവർത്ത​ന​ങ്ങ​ളോ​ടുള്ള ആസക്തി​യു​ടെ ചില ഉദാഹ​ര​ണങ്ങൾ നമുക്കു പരി​ശോ​ധി​ക്കാം.

ജോലി​യോ​ടുള്ള ആസക്തി

ജോലി​യോ​ടുള്ള ആസക്തി ആദരണീ​യ​മായ ഒരു ആസക്തി​യെന്നു വിളി​ക്ക​പ്പെ​ട്ടി​രി​ക്കു​ന്നു. വാസ്‌ത​വ​ത്തിൽ, ജോലി​യിൽ ആസക്തരാ​യവർ നല്ല ജോലി​ക്കാ​രാണ്‌. എന്നാൽ, അവരുടെ ഉള്ളിൽ ചാരി​താർഥ്യ​ബോ​ധം തോന്നാ​തി​രു​ന്നേ​ക്കാം. ജോലി​ക്കു വേദനാ​ക​ര​മായ തോന്ന​ലു​ക​ളിൽനി​ന്നു ശ്രദ്ധയ​ക​റ​റുന്ന ഒന്നോ അംഗീ​കാ​ര​ത്തി​നു വേണ്ടി​യുള്ള അടങ്ങാത്ത ദാഹമോ ആയിത്തീ​രാൻ കഴിയും.

സ്‌കേ​റ​റിങ്‌ നടത്തുന്ന ഒരുവനെ വെള്ളത്തിൽ മുങ്ങി​ച്ചാ​കാ​തെ മഞ്ഞുപാ​ളി സംരക്ഷി​ക്കു​ന്നു; തൊഴി​ലി​നോട്‌ ഉൻമത്ത​നായ ഒരുവനെ വികാ​ര​ങ്ങ​ളിൽ മുങ്ങി​ച്ചാ​കു​ന്ന​തിൽനി​ന്നു പ്രവർത്ത​നങ്ങൾ സംരക്ഷി​ക്കു​ന്നു. ജോലി​യോട്‌ ആസക്തി​യുള്ള ഒരുവനു സ്‌കേ​റ​റിങ്‌ നടത്തുന്ന ഒരുവ​നെ​പ്പോ​ലെ ഉജ്ജ്വല പ്രകടനം കാഴ്‌ച​വ​യ്‌ക്കാ​നാ​കും. എന്നാൽ അതെല്ലാം പുറമേ മാത്ര​മാണ്‌. പലപ്പോ​ഴും ഉള്ളിൽ മറഞ്ഞു​കി​ട​ക്കു​ന്നത്‌ എന്താണ്‌? മാനസി​കാ​രോ​ഗ്യ ഉപദേ​ഷ്ട​ക​യായ ലിൻഡ ററി. സാൻഫോർഡ്‌ ഇപ്രകാ​രം എഴുതു​ന്നു: “ജോലി​യോട്‌ ആസക്തി​യുള്ള ഒരു വ്യക്തി ജോലി​യിൽ പൂർണ​മാ​യി ആമഗ്നമാ​കാ​തി​രി​ക്കു​മ്പോൾ അവനോ അവളോ വിഷാദം, ഉത്‌കണ്‌ഠ, കോപം, നിരാശ, ശൂന്യത എന്നിവ​യു​ടെ ഭയങ്കര​മായ വികാ​ര​ങ്ങ​ളാൽ അടി​ച്ചൊ​ഴു​ക്ക​പ്പെ​ടു​ന്നു.”

ജോലി​യോട്‌ ആസക്തി​യുള്ള അനേക​രു​ടെ​യും ആഴത്തിൽ പതിഞ്ഞ പ്രേര​ണാ​ഘ​ടകം അതൊരു ദീർഘ​കാല സ്വഭാ​വ​വി​ശേ​ഷ​മാ​ണെന്നു സൂചി​പ്പി​ക്കു​ന്നു. സാധ്യ​ത​യ​നു​സ​രിച്ച്‌ അത്‌ ഒരുവൻ വളർന്നു​വന്ന വിധത്തി​ലാ​ണു വേരൂ​ന്നി​യി​രി​ക്കു​ന്നത്‌. ഒരു സ്‌ത്രീ​യു​ടെ കാര്യ​ത്തിൽ ഇതു സത്യമാ​യി​രു​ന്നു, അവളെ നമുക്കു മേരി എന്നു വിളി​ക്കാം. ആറു വയസ്സു​ള്ള​പ്പോൾ മുതൽ പാചക​വും ഗൃഹ​ജോ​ലി​യും ചെയ്‌ത്‌ മദ്യാ​സ​ക്ത​നായ തന്റെ അച്ഛന്റെ സ്‌നേഹം നേടാൻ അവൾ ശ്രമിച്ചു. അവൾ പറയുന്നു: “അതു നിർബ​ന്ധ​മാ​യി​ത്തീർന്നു. കൂടുതൽ ചെയ്‌താൽ അല്ലെങ്കിൽ ഏറെ മെച്ചമാ​യി ചെയ്‌താൽ അദ്ദേഹം എന്നെ സ്‌നേ​ഹി​ക്കു​മെന്നു ഞാൻ വിചാ​രി​ച്ചു. എന്നാൽ എനിക്കു തിരികെ ലഭിച്ച​തോ വിമർശനം മാത്ര​വും.”

ഒരു മുതിർന്ന വ്യക്തി​യെന്ന നിലയിൽ ഈ തെററായ ചിന്ത​യോട്‌ മേരി ഇപ്പോ​ഴും മല്ലിടു​ന്നു. “ഞാൻ ഒന്നിനും കൊള്ളാ​ത്ത​വ​ളാ​ണെന്ന്‌ എനിക്കു തോന്നു​ന്നു. ഞാൻ സ്‌നേഹം നേടേ​ണ്ട​താ​ണെന്ന്‌, എന്തെങ്കി​ലും നേടാ​ത്ത​പക്ഷം ഞാൻ ഒന്നിനും കൊള്ളാ​ത്ത​വ​ളാ​ണെന്ന്‌ എനിക്ക്‌ ഇപ്പോ​ഴും തോന്നു​ന്നു. സാമൂ​ഹിക കൂടി​വ​ര​വു​ക​ളു​ടെ സമയത്ത്‌ ആഹാര​മു​ണ്ടാ​ക്കു​ക​യും ഭക്ഷണം വിളമ്പു​ക​യും ചെയ്‌തു​കൊണ്ട്‌ ഞാൻ തളരുന്നു. അതു ഞാൻ ചെയ്യു​ന്നത്‌, അവിടെ ആയിരി​ക്കാ​നുള്ള എന്റെ അവകാശം നേടാൻ ശ്രമി​ക്കു​ന്നതു പോ​ലെ​യാണ്‌” എന്ന്‌ അവൾ തുറന്നു​പ​റ​യു​ന്നു.

മേരി​യെ​പ്പോ​ലു​ള്ള​വർക്ക്‌, ജോലി​യെ സംബന്ധിച്ച സമനി​ല​യോ​ടെ​യുള്ള ഒരു വീക്ഷണം അത്യാ​വ​ശ്യ​മാണ്‌. കഠിനാ​ധ്വാ​നത്തെ ബൈബിൾ പ്രശം​സി​ക്കു​ന്നു. (സദൃശ​വാ​ക്യ​ങ്ങൾ 6:6-8; 2 തെസ്സ​ലൊ​നീ​ക്യർ 3:10, 12) യഹോ​വ​യാം ദൈവം​തന്നെ ധാരാളം പ്രവർത്ത​നങ്ങൾ ചെയ്യുന്നു. (സങ്കീർത്തനം 104:24; യോഹ​ന്നാൻ 5:17) എന്നാൽ അവിടുന്ന്‌ ഒരിക്ക​ലും അനിയ​ന്ത്രി​ത​മാ​യി വേല ചെയ്യു​ന്ന​വനല്ല. തന്റെ സൃഷ്ടി​ക്രി​യകൾ നല്ലത്‌ എന്നു യഹോവ കണ്ടു. അവ പൂർത്തി​യാ​യ​പ്പോൾ മാത്രമല്ല, സൃഷ്ടി പ്രക്രി​യകൾ നടന്നു​കൊ​ണ്ടി​രുന്ന സമയത്തു​പോ​ലും.—ഉല്‌പത്തി 1:4, 12, 18, 21, 25, 31; താരത​മ്യം ചെയ്യുക: സഭാ​പ്ര​സം​ഗി 5:18.

അതു​പോ​ലെ യഹോ​വ​യാം ദൈവ​ത്തി​ന്റെ വിദഗ്‌ധ വേലക്കാ​ര​നായ അവിടു​ത്തെ പുത്രൻ യേശു​വും തന്റെ വേലയിൽ വ്യക്തി​പ​ര​മായ സംതൃ​പ്‌തി പ്രതി​ഫ​ലി​പ്പി​ച്ചു. (സദൃശ​വാ​ക്യ​ങ്ങൾ 8:30, 31) തന്നോ​ടൊ​ത്തു പ്രവർത്തി​ക്കു​ന്ന​തിൽ തന്റെ അനുഗാ​മി​ക​ളും ഉൻമേഷം കണ്ടെത്തു​മെന്ന്‌ യേശു വാഗ്‌ദത്തം ചെയ്‌തു. അവരൊ​ന്നിച്ച്‌ മുന്തിയ പ്രാധാ​ന്യ​മുള്ള ഒരു വേലയിൽ പങ്കുപ​ററി. എന്നാൽ വിശ്ര​മി​ക്കു​ന്ന​തിൽനിന്ന്‌ ഇത്‌ അവരെ തടഞ്ഞില്ല.—മത്തായി 11:28-30; മർക്കൊസ്‌ 6:31; താരത​മ്യം ചെയ്യുക: സഭാ​പ്ര​സം​ഗി 4:6.

നിങ്ങളു​ടെ മൂല്യം കാര്യങ്ങൾ ചെയ്യാ​നുള്ള നിങ്ങളു​ടെ കാര്യ​ക്ഷ​മ​തയെ ആശ്രയി​ച്ചി​രി​ക്കു​ന്നു​വെ​ന്നോ സ്‌നേ​ഹി​ക്ക​ണ​മെ​ങ്കിൽ അത്‌ ആർജി​ക്ക​ണ​മെ​ന്നോ ഒരുപക്ഷേ മാതാ​പി​താ​ക്ക​ളി​ലൊ​രാൾ സൂചി​പ്പി​ച്ചേ​ക്കാം. യഹോ​വ​യു​ടെ വീക്ഷണ​മ​നു​സ​രിച്ച്‌ നല്ല മാതാ​പി​താ​ക്കൾ അങ്ങനെ ചെയ്യു​ക​യില്ല എന്നറി​യു​ന്ന​തിൽ നിങ്ങൾക്ക്‌ ആശ്വാസം തോന്നും. അവിടു​ത്തെ വചനം ഇപ്രകാ​രം ബുദ്ധ്യു​പ​ദേ​ശി​ക്കു​ന്നു: “പിതാ​ക്കൻമാ​രേ, നിങ്ങളു​ടെ കുട്ടി​കളെ പ്രകോ​പി​പ്പി​ക്ക​രുത്‌. പ്രകോ​പി​പ്പി​ച്ചാൽ അവർ നിരുൻമേ​ഷ​രാ​കും [“തങ്ങൾ അപ്രധാ​ന​രാ​യി അവർക്കു തോന്നും,” ദി ആംപ്ലി​ഫൈഡ്‌ ബൈബിൾ].” (കൊ​ലൊ​സ്സ്യർ 3:21, പി.ഒ.സി. ബൈബിൾ) സ്‌നേ​ഹ​ത്തി​നു യോഗ്യത നേടു​ന്ന​തു​വരെ അതു കൊടു​ക്കാ​തി​രി​ക്കു​ന്ന​വനല്ല യഹോവ. അവിടു​ത്തെ സ്‌നേ​ഹി​ക്കാ​നും സേവി​ക്കാ​നും തുടങ്ങി​യ​ശേഷം മാത്രം നൽകുന്ന ഒന്നല്ല അവിടു​ത്തെ സ്‌നേഹം. തീർച്ച​യാ​യും, അവിടുന്ന്‌ ‘നമ്മെ ആദ്യം സ്‌നേ​ഹി​ച്ചു’ എന്ന്‌ ബൈബിൾ നമ്മോടു പറയുന്നു. അതേ, “നാം പാപികൾ ആയിരി​ക്കു​മ്പോൾ തന്നേ” നമ്മെ സ്‌നേ​ഹി​ക്കു​ന്ന​തിൽ ദൈവം മുൻകൈ എടുത്തു. (1 യോഹ​ന്നാൻ 4:19; റോമർ 5:6-8) മാത്രമല്ല, യഹോ​വ​യു​ടെ ഇഷ്ടം ചെയ്യാ​നുള്ള നമ്മുടെ ആത്മാർഥ ശ്രമങ്ങളെ അവിടുന്ന്‌ വിമർശി​ക്കു​ന്നില്ല. അതു​കൊണ്ട്‌, അവിടു​ത്തോ​ടുള്ള നമ്മുടെ സേവനം അവിടു​ത്തോ​ടുള്ള സ്‌നേ​ഹ​ത്തി​ന്റെ ആത്മാർഥ​മായ ഒരു പ്രകട​ന​മാ​യി​ത്തീ​രു​ന്നു.

ടെലി​വി​ഷൻ ആസക്തി

അളവിൽക്ക​വിഞ്ഞ്‌ ടിവി കാണു​ന്ന​തി​നെ ആസക്തി​യെന്നു ചിലർ വിളി​ക്കു​ന്നു. “മയക്കു​മ​രു​ന്നു​ക​ളോ ലഹരി​പ​ദാർഥ​മോ പോ​ലെ​തന്നെ ടെലി​വി​ഷൻ കാഴ്‌ച അതിന്റെ ഭാഗഭാ​ക്കാ​കുന്ന ഒരുവനെ യഥാർഥ ലോകത്തെ വിസ്‌മ​രി​ക്കാ​നും സുഖ​ലോ​ലു​പ​വും കർമര​ഹി​ത​വു​മായ ഒരു മാനസി​കാ​വ​സ്ഥ​യിൽ കടക്കാ​നും ഇടയാ​ക്കു​ന്നു” എന്ന്‌ മേരി വിൻ ദ പ്ലഗ്‌-ഇൻ ഡ്രഗ്ഗിൽ പ്രസ്‌താ​വി​ക്കു​ന്നു.

തീർച്ച​യാ​യും, ജീവി​ത​ത്തി​ലെ ഉത്തരവാ​ദി​ത്വ​ങ്ങ​ളിൽനിന്ന്‌ താത്‌കാ​ലി​ക​മാ​യി ശ്രദ്ധ പതറി​ക്ക​പ്പെ​ടു​ന്നത്‌ തെററല്ല. എന്നാൽ ചില നിരീ​ക്ഷകർ ഒരിക്ക​ലും യഥാർഥ്യ​ത്തി​ലേക്കു തിരി​ച്ചു​വ​രാ​റില്ല. ടെലി​വി​ഷൻ സെററ്‌ പൊട്ടി​പ്പോ​യ​പ്പോൾ പൊടു​ന്നനെ ടിവി കാണാൻ കഴിയാ​തെവന്ന ഒരു ഭർത്താവ്‌ ഇപ്രകാ​രം തുറന്നു​പ​റഞ്ഞു: “ആ വർഷങ്ങ​ളി​ലെ​ല്ലാം എന്റെ മനസ്സ്‌ പൂർണ​മാ​യും നിർജീ​വ​മാ​യി​പ്പോ​യ​തു​പോ​ലെ എനിക്കു തോന്നു​ന്നു. ഞാൻ അതി​നോട്‌ ഒട്ടി​ച്ചേർന്നു​പോ​യി, ഒരു​പ്ര​കാ​ര​ത്തി​ലും അതിൽനി​ന്നു വിട്ടു​പോ​രാൻ എനിക്കു കഴിഞ്ഞില്ല.” കൈ എന്നു പേരുള്ള ഒരു യുവ​പ്രാ​യ​ക്കാ​രൻ സമാന​മായ അനിയ​ന്ത്രിത പ്രേര​ണാ​ശ​ക്തി​യെ വർണി​ക്കു​ന്നു: “ഞാൻ ടെലി​വി​ഷൻ കാണുന്ന അത്രയും സമയം അതു കാണാൻ ഞാനാ​ഗ്ര​ഹി​ക്കു​ന്നില്ല. എന്നാൽ എനിക്കു നിയ​ന്ത്രി​ക്കാ​നാ​വു​ന്നില്ല. അത്‌ എന്നെ നിയ​ന്ത്രി​ക്കു​ന്നു.”

അളവിൽക്ക​വിഞ്ഞ്‌ ടിവി കാണു​ന്നത്‌ ചിന്താ​പ്രാ​പ്‌തി​യെ മുരടി​പ്പി​ക്കു​ന്നു. ധ്യാന​നി​ര​ത​മായ വിചി​ന്തനം നടത്താൻ ബൈബിൾ ശുപാർശ ചെയ്യുന്നു. അതിനു കുറച്ച്‌ ഏകാന്തത ആവശ്യ​മാണ്‌. (യോശുവ 1:8; സങ്കീർത്തനം 1:2, 3; 145:5; മത്തായി 14:23; ലൂക്കൊസ്‌ 4:42; 5:16; 1 തിമൊ​ഥെ​യൊസ്‌ 4:15) ഇതു പലരെ​യും ഭയപ്പെ​ടു​ത്തു​ന്നു. നിശബ്ദത അവരെ പൊതി​യു​മ്പോൾ അവർ അങ്ങേയ​ററം ഭയവി​ഹ്വ​ല​രാ​കു​ന്നു. തങ്ങളുടെ സ്വന്തം ചിന്തക​ളു​മാ​യി ഏകാന്ത​രാ​യി കഴിയാൻ അവർ ഭയപ്പെ​ടു​ന്നു. ശൂന്യത നികത്താൻ അവർ ഭ്രാന്ത​മാ​യി എന്തിനു​വേ​ണ്ടി​യും പരതുന്നു. ടിവി പെട്ടെ​ന്നുള്ള ഒരു പരിഹാ​ര​മാർഗ​മാ​യി​ത്തീ​രു​ന്നു. എന്നാൽ, ഏററവും മെച്ചമാ​യി​രി​ക്കു​മ്പോൾ പോലും ടിവി യാഥാർഥ്യ​ത്തിൽനിന്ന്‌ ഒരുവനെ അകററു​ക​യാ​ണു ചെയ്യു​ന്നത്‌.

നിർബ​ന്ധ​പൂർവ​മുള്ള ചൂതാട്ടം

ചൂതാട്ടം വേരൂ​ന്നി​യി​രി​ക്കു​ന്നത്‌ അത്യാ​ഗ്ര​ഹ​ത്തി​ലാണ്‌. എന്നാൽ നിർബ​ന്ധ​പൂർവ​മായ ചൂതാട്ടം പണമു​ണ്ടാ​ക്കുന്ന ഒരു കാര്യ​ത്തെ​ക്കാൾ കവിഞ്ഞ ഒന്നാണ്‌.b “യാഥാർഥ്യ​ത്തിൽനി​ന്നു രക്ഷപെ​ടാൻ ‘പൂസാ​കേ​ണ്ടത്‌’ എനിക്ക്‌ ആവശ്യ​മാ​യി​രു​ന്നു. അതു കൃത്യ​മാ​യും മയക്കു​മ​രുന്ന്‌ കഴിക്കു​ന്ന​തു​പോ​ലെ​യാണ്‌” എന്നാണു നൈജൽ പറയു​ന്നത്‌. നിർബന്ധ ചൂതാ​ട്ട​ക്ക​ളി​ക്കാ​രനെ സംബന്ധി​ച്ചി​ട​ത്തോ​ളം, ചൂതാ​ട്ട​പ്ര​ക്രി​യ​തന്നെ മിക്ക​പ്പോ​ഴും ഒരു പ്രതി​ഫ​ല​മാണ്‌. പരിണ​ത​ഫ​ല​ങ്ങൾക്കു പ്രസക്തി​യില്ല. നൈജ​ലി​നു സ്‌നേ​ഹി​തരെ നഷ്ടമായി. മററു​ചി​ലർക്കു തങ്ങളുടെ കുടും​ബ​ങ്ങളെ നഷ്ടപ്പെ​ടു​ന്നു. പലർക്കും തങ്ങളുടെ ആരോ​ഗ്യം നഷ്ടപ്പെ​ടു​ന്നു. ഫലത്തിൽ എല്ലാവർക്കും പണം നഷ്ടമാ​കു​ന്നു. ആരും ചൂതാട്ടം നിർത്തു​ന്നില്ല, കാരണം ജയിക്കു​ന്ന​തോ തോൽക്കു​ന്ന​തോ അല്ല പ്രധാനം. കളിക്കുന്ന ആ പ്രക്രിയ ആണ്‌ മാനസി​കാ​വ​സ്ഥയെ മാററി​മ​റി​ക്കു​ന്ന​തും മയക്കു​മ​രു​ന്നു പോ​ലെ​തന്നെ ഒരു ഉന്നതഭാ​വം ഉളവാ​ക്കു​ന്ന​തും.

ജീവി​ത​പ്ര​ശ്‌ന​ങ്ങ​ളിൽനി​ന്നു ശ്രദ്ധയെ വ്യതി​ച​ലി​പ്പി​ക്കുന്ന ഒന്നായി​രി​ക്കാം ചൂതാട്ടം. എന്നാൽ അതു പ്രശ്‌ന​ങ്ങളെ അകററി​ക്ക​ള​യു​ന്നില്ല. ഗുരു​ത​ര​മാ​യി മുറി​വേററ ഒരു മനുഷ്യന്‌ വേദനാ​സം​ഹാ​രി​യെ​ക്കാ​ള​ധി​കം ആവശ്യ​മാണ്‌. അയാളു​ടെ മുറി​വു​കൾ ചികി​ത്സി​ക്കേ​ണ്ട​തുണ്ട്‌. ഒരു വ്യക്തിയെ ചൂതാ​ട്ട​ത്തി​ലേക്കു നയിച്ചി​ട്ടുള്ള മുറി​വു​ക​ളു​ണ്ടെ​ങ്കിൽ അയാൾ അവയെ തിരി​ച്ച​റി​യു​ക​യും ചികി​ത്സി​ക്കു​ക​യും വേണം. അതിനു ധൈര്യ​മാ​വ​ശ്യ​മാണ്‌. എന്നാൽ ഒടുവിൽ അതു പ്രതി​ഫ​ല​ദാ​യ​ക​മാണ്‌.

രക്ഷപെ​ടു​ക

ഏതുതരം ആസക്തി​യിൽനി​ന്നും മോചനം നേടു​ന്ന​തിന്‌, ആസക്തിക്കു പലപ്പോ​ഴും പ്രേര​ക​മാ​യി വർത്തി​ക്കുന്ന ആന്തരിക വേദനയെ അവഗണി​ക്കാ​വു​ന്നതല്ല. ആസക്തി​യുള്ള വ്യക്തി ഈ പ്രശ്‌ന​ത്തി​ന്റെ മൂലകാ​ര​ണത്തെ ചികി​ത്സി​ക്കാൻ ശ്രമി​ക്കണം. ഇതൊരു വെല്ലു​വി​ളി​യാണ്‌. “മദ്യവും മയക്കു​മ​രു​ന്നും 30 വർഷം നിരന്തരം ഉപയോ​ഗി​ച്ച​ശേഷം അതു പെട്ടെ​ന്നങ്ങു നിർത്താ​നാ​വില്ല. പ്രത്യേ​കി​ച്ചും നിങ്ങളു​ടെ ആസക്തി ആഴമായ ഒരു പ്രശ്‌നത്തെ മറച്ചി​രു​ന്നെ​ങ്കിൽ” എന്ന്‌ ഒരു മുൻ ആസക്തൻ പറയുന്നു.

എന്നാൽ ആസക്തി​യിൽനി​ന്നു മോചനം നേടു​ന്നത്‌ ശ്രമത്തി​നു​തക്ക മൂല്യ​മു​ള്ള​താണ്‌. നേരത്തെ പരാമർശിച്ച നിർബന്ധ ജോലി​ക്കാ​രി​യായ മേരി അതിനെ ശരിക്കും വർണി​ക്കു​ന്നു. അവൾ പറയുന്നു: “വർഷങ്ങ​ളാ​യി നേരി​ടാൻ ഭയപ്പെ​ട്ടി​രുന്ന കാര്യ​ങ്ങ​ളിൽനി​ന്നു ഞാൻ ഓടി​യ​ക​ലു​ക​യാ​യി​രു​ന്നു. എന്നാൽ ഇപ്പോൾ ആ കാര്യ​ങ്ങളെ ഞാൻ നേരി​ട്ടി​രി​ക്കു​ന്നു. അവ എത്ര ചെറു​താ​യി​ത്തീർന്നി​രി​ക്കു​ന്നു​വെ​ന്നത്‌ വിസ്‌മ​യാ​വ​ഹ​മാണ്‌.”

ആസക്തിയെ വിജയ​പ്ര​ദ​മാ​യി തരണം ചെയ്‌തി​ട്ടുള്ള അനേക​രു​ടെ​യും അനുഭവം ഇതാണ്‌. “നാശക​ര​മായ ശീലങ്ങ​ളു​ടെ അടിമകൾ” ആയിരി​ക്കു​ന്ന​തി​നു പകരം, ആസക്തിയെ ജയിച്ച​ട​ക്കു​ക​യെന്ന വെല്ലു​വി​ളി​യെ വിജയ​പ്ര​ദ​മാ​യി നേരി​ടാൻ “സാധാ​ര​ണ​യിൽ കവിഞ്ഞ ശക്തി”ക്കു വേണ്ടി അവർ പ്രാർഥി​ച്ചി​രി​ക്കു​ന്നു.—2 പത്രോസ്‌ 2:19, ററു​ഡേ​യ്‌സ്‌ ഇംഗ്ലീഷ്‌ വേർഷൻ; 2 കൊരി​ന്ത്യർ 4:7, NW.

[അടിക്കു​റി​പ്പു​കൾ]

[9-ാം പേജിലെ ആകർഷ​ക​വാ​ക്യം]

‘ആസാക്ഷി​കൾ എന്ന പദപ്ര​യോ​ഗം എല്ലാത്തരം നിർബന്ധ പെരു​മാ​റ​റ​ത്തി​നും ബാധക​മാ​ക്കാ​വു​ന്ന​താണ്‌.’—ഡോ. ജെ. പാട്രിക്‌ ഗാനൺ.

[10-ാം പേജിലെ ചിത്രം]

ജോലിയോട്‌ ആസക്തനായ ഒരുവനെ സംബന്ധി​ച്ചി​ട​ത്തോ​ളം, ജോലി കുടും​ബ​ത്തെ​ക്കാൾ പ്രധാ​ന​മാ​യി തോന്നു​ന്നു

[10-ാം പേജിലെ ചിത്രം]

ചൂതാട്ടത്തിന്‌ ഒരുവന്റെ മാനസി​കാ​വ​സ്ഥയെ മാററി​മ​റി​ക്കാ​നും മയക്കു​മ​രു​ന്നു​പോ​ലെ ഒരു ഉൻമത്താ​വ​സ്ഥ​യ്‌ക്ക്‌ ഇടയാ​ക്കാ​നും കഴിയും