Pât wahwisa piua ra smalkanka sinskira nani hilp wan munaia sip ba

1, 2. ¿Trabil nani mapara bapi buaia dukiara yawan dîa daukaia sip sa? (Lilka ba sin kaiks).

¿MAN kasakkam lukan lâka tâwan, pamalikam ba mampara buisa apia kaka ninam bliki rau mai sauhkisa ki? ¿Kasak apia lâka tâwan pât wahwisma ki? ¿Siknis saura kum mapara apia kaka almuk lâka trabilka nani mapara aiklabisma ki? ¿Apia kaka uplikam latwankira kum pruan ba mita sari lâka tara wahwisma ki? Yawan nu sa Jehova ai uplika nani sut ra latwan pali kaikisa, ban sakuna wan rayaka ra “trabil nani” ailal brisa (Law. 90:10).

² Wan trabilka nani ba Jehova nahki kaiki ba baku yawan kaikisa kaka, mapara buaia sip kabia. ¿Naha daukaia ba dîa muni tânka tara brisa? Nahara luki kaiks: Yawan truk wakisa piua ra, yabal ra kaina prakanka manis kaikaia sip sa, wan rayaka trabilka nani ba sim baku sa. Dîa sât trabilka wan kainara takbia bara luki, yawan sip sa wahbi sakaia tnaya ku luaia, kau tawa wakaia, apia kaka wira takaskaia. Kuna, wahbi sakanka pain kum briaia dukiara, tânka tara brisa kaina prakanka ba param kaikaia. Wan trukka glaska ba tâski brisa kaka, yawan diara nani pain kaikbia apia. Sim tnatka ra, trabil nani mapara bapi buaia dukiara wan trabilka nani ba Jehova nahki kaiki ba baku yawan sin kaikaia sa. Naha stadika ra laki kaikbia 1) Jehova wan trabilka nani ba nahki kaikisa, 2) Jehova lukanka nina blikras sa kaka dîa wan takaia sip sa, bara 3) trabil nani brisa piua ra yawan dîa daukaia sa.

JEHOVA WAN TRABILKA NANI NAHKI KAIKI BA BAKU KAIKAIA SA

3. ¿Dîa muni yawan naha tasbaya ra trabil nani ban bri kabia?

³ Yawan naha tasba ra trabil ban bri kabia. Yawan mistikkira sa bara Sitan ba naha tasba tâ bri ba mita, yawan trabil nani ban bri kabia. Baku sin, naha tasba tnata aimakaia kau baila ba ra, wan rayaka ba kau karna kabia, ban kra tasba sauhkanka nani tâka apia kaka upla saurka lâka tâka mita (Mt. 24:8; 2 Ti. 3:13). Jehova naha trabilka nani ba naiwa piua ra wapni ra mangkbia kaka, talia kabia witin Sitan ra tâ baikisa naha tasba ban tâ bri kabia dukiara. Yawan kaiki ba baku, Sitan naha tasba ban tâ bri kabia piua ra, yawan ban pât wahwi kabia (Smas. 9:12).

4. ¿Dîa tâka wala mita sin yawan pât wahwisa?

⁴ Yawan kristian banhwi ba mita pât wahwisa. Jisas ba aima ailal ra ai disaipilka nani ra win ai kasak lukanka lâka tawan ai nina bliki rau sauhkbia (Mt. 24:9; Jn 16:2). Naha nu kaia ba hilp wan munisa nina bliki rau munan lâka piua ra, wan kasakka lukan lâka dutki briaia (1 Tes. 3:3, 4). Ban kasak sa kaka, yawan kasak lukaia sip sa raya ban kaia yabalka bâk ban wapisa. Baku sin marikisa, yawan Jehova ra mayunaia wahbi sakan sa, kan witin ba tâ brabrira yamnikira kum sa bara Sitan ba lika kuninkira sa. Baku sin, Sitan ba wisa upla nani ba rait pali Gâd ra latwan kaikras sa, bara ai dukia daukisa kan diara yamni pana briaia want sa ba mita. Bara naha kuninka ba kasak sa marikaia dukiara, Sitan ba Gâd uplika nani mapara karna pali buisa (Job 1:9-11). Yawan latwan lâka mita Jehova ra kasak sa piua ra, witin kupia ba lilia daukisa (S.L. 27:11).

5. ¿Smasmalkra 7:13, 14 wina yawan dîa lan takaia sip sa? (Lilka nani ba sin kaiks).

⁵ Gâd ba swisa yawan pât wahbia. Witin ba lukanka saura wal diara nani daukras sa, bara diara saura nani ba wal wan traika kaikras sa (Je. 1:13). Ban sakuna, King Salaman ba win piua saura nani ba sin “Gâd wina sa” (Smasmalkra 7:13, 14 ba aisi kaiks). Naha bîla nani ba tânka apia sa Gâd ba daukisa diara saura nani takbia, kuna wan marikisa witin ba swi sa baha nani ba takbia. Baku sa kaka, ¿King Salaman dîa aisan ba wina yawan dîa lan takaia sip sa? Yawan tânkira kaia sa bara wan dara walaia sa Sitan tasbaya ra iwi ba mita, aima kum kum ra wan yua nani ba yamni kabia bara piu wala nani ra trabil nani bribia. Yawan ra “diara yamni” wan takbia piua ra, baha yamnika wal lilia kaia sa, Gâd wina prisant kum baku kaikaia bara wan tingkika lâka marikaia sa. Baku sin, Salaman ba wan kupia kraukisa upla nani ba “sip ai dahra walbia apia, ai kainara dîa brih aula ba”, wibia sa kaka yawan nu âpu sa ahkia yua ba yamni kabia apia kaka trabil bribia sapa. Upla kasakkira nani bara kasak apia nani sin naha trabilka nani wina sip swakwi takras.

6. ¿Dîa muni Jehova swisa yawan pât wahbia? (Hibru 12:7, 11).

⁶ Yawan pât wahwisa piua ra, Jehova wan smalkisa yawan silp wan karnika ra kasak lukaia watlika ra witin ra tniwaia sa. Witin ba wan lukisa bara yawan pât wahwisa piua ra, sari ai dara walisa. Baku sin, yawan “il bîla kau tihmu bâk” taukisa piua ra, witin ba wan tapahkisa, ai latwanka lâka ba wan marikisa, bara bapi buaia dukiara, karnika ba sin wankisa (Law. 23:4). Trabil nani ba sin hilp wan munisa wan swapnika nani ba param kaikaia bara Gâd hilpka ba wal, daukanka pain nani pakaia (Hibru 12:7, 11 ba aisi kaiks). Tânka kum baku, Job ba bawan lâka kau pakaia nit kan. Jehova witin pât wahbia daukras kan, kuna swin takbia bara baha nani yus munan witin ra smalkanka tara nani lan daukaia dukiara (Job 42:1-6). Dîa wan takbia kra sin kasak lukaia sip sa yawan pât wahbia Jehova swisa kaka, ban kasak kaia witin hilp wan munbia, bara blisin wan munbia (Ro. 8:35-39).

7. ¿Wan nina bliki rau wan sauhkisa piua ra, dîa muni yawan lilia kaia sip sa?

⁷ Wan nina bliki rau wan sauhkisa piua ra sin lilia kaia sip sa. Kasak lukankam lâka tawan ninam bliki rau mai sauhkisa kaka, lukaia apia sma Jehova yamni mai kaikras sa. Kau ni, baha nani ba marikisa witin yamni pali mai kaiki ba (Mt. 5:10-12). Trabil nani ba Jehova kaiki ba baku kaikisma kaka, hilp mai munbia lilia damra walaia, apastil nani ra takan baku (Ap.St. 5:40-42). Baku sin, ban kasak sma kaka, upla wala nani ra hilp munaia sip sma kasak tânka ba lan takbia bara “Gâd ra mayuni kabia” (1 Pi. 2:12). Josep sturka ra luki kaiks. Witin pât wahwi kan piua ra baman Jehova blisin munras kan, baha nani danh takan piua ra sin ai blisinka yaban. Bara yawan ra sim sât takaia sip sa (Bla.St. 39:3, 23).

8. ¿Dîa tânka wala mita sin yawan traika kaikanka nani mapara bapi buaia sa?

⁸ Tisku pali wan trabilka nani ba danh âpu kabia. Naha tânka ba Job sturka ba wina lan takaia sip sa, witin traika kaikanka nani luan ningkara Jehova blisin kau ailal nani yaban. Baibil ba wisa: “Gâd bui Job ra ai yamnika ailal yaban kan kau siknis takras kan ba kainara, sakuna nanara kau ai yamnika tara yan” (Job 42:12). Jehova naha sim dukia pramis wan munisa, naiwa piua ra naha tasbaya ra trabil ailal brisa, kuna naika ra tasba raya ra witin blisin wan munbia. Bara naha ba wan kupia bukisa tnata kat bapi buaia dukiara (Mt. 24:13).

WAN TRABILKA KAU TARA DAUKI LUKANKA NANI

9. ¿Ani lukanka nani ba yawan briaia apia sa, bara dîa muni?

⁹ Yawan dîa dîa trabilka nani bâk lui kabia piua ra, Gâd luki ba baku lukras sa kaka, wan trabilka ba kau tara takaia sip sa. Tânka kum baku, yawan sip sa lukaia Jehova mita daukisa yawan baha trabilka ba bribia. Naha sika piua kum ra Job ra takan, baha sât lukanka nani bri kan ba mita “Job ban aisi kan witin ba pâtkas sa, bara Gâd ra ni pâtkira saki kan” (Job 32:2). Baku sin, Noemí ba tâura luki kan ai trabilka nani ba Jehova wina balan (Rt. 1:13, 20, 21). Job bara Noemí baha sât lukanka nani ban bri kan kata, Jehova wal pânika lâka bri kan ba sauhkaia sip kan (S.L. 19:3). Ban sakuna, Jehova witin nani ra hilp munan ai dara walaia ai trabilka nani ba witin wina balras sa bara ban kasak banhwi kan ba mita, witin nani ra blisin munan.

10. ¿Trabil nani brisa piua ra, dîa ba silp wan makabi walaia sip sa?

¹⁰ Wan trabilka nani ba Jehova wina balras sa yawan kasak luki kabia kra sin, aima kum kum ra silp wan makabi walaia sip sa witin ba yawan ra lukisa sapa. Naha sât lukanka ba wan swapkaia sip sa (S.L. 24:10). King Debit bara prapit Abakuk ba trabil ailal nani mapara bapi buan bara aima kum kum ra silp makabi wali kan rait pali Jehova witin nani pura sunra wali kan sapa (Law. 10:1; Ab. 1:2). Ban sakuna, witin nani ba ban ai pura suni kan. Jehova marikan witin naha waitnika kasakkira nani lamara kan ba bara naiwa piua ra man wal sim sât daukbia (Law. 10:17).

11. ¿Wan trabilka nani ba Jehova kaiki ba baku kaikras sa kaka, dîa wan takaia sip sa?

¹¹ Wan trabilka nani ba Jehova kaiki ba baku kaikras sa kaka, yawan naku lukaia sip sa: Jehova swiaia apia sa yang pât wahwamna. Bara baku lukisa kaka diara saura kum wan takbia piua ra tâ iwbia (1 Pi. 4:12). Jisas disaipilka nani ra luki kaiks. Witin nani ra Jisas nahki pât wauhbia ba ai tânka briaia karna munan (Lk 18:33, 34). Jisas ba nahki pât wauhbia ba dukiara witin nani ra klir pali tânka ba marikan, kuna apastil Pita ba lukan Gâd ba swibia apia baku pât wahbia. Jisas ba nu kan Gâd kupia lâka sa witin pât wahbia bara prubia, bara Pita lukanka ba witin mapara traika kaikanka kum kaia sip kan. Baha mita, lawi dauki wapnika ra mangkan (Mk 8:31-33). Jisas pruan ningkara sin, ai disaipilka nani ra karna muni kan ai tânka briaia dîa muni witin ba pruan. Kuna Jisas ba witin nani ra ban hilp muni kan. Kli buan ningkara witin nani wal aisan taim, ai pruanka tânka ba klir marikaia dukiara, witin nani ra “Ulbanka nani tânka saki” smalkan (Lk. 24:25-27, 32, 44-48). Jisas dîa smalkan ba ra tihu luki kaikaia ba witin nani ra hilp munai kan tisku pât wauhbia ba dukiara ridi kaia. Yawan nina bliki rau munan lâka dukiara Baibil dîa smalki ba ra tihu luki kaikaia sa bara baku tnatka ra, traika kaikanka nani balbia piua ra, ridi kabia.

12. ¿Diara nani ba Jehova kaiki ba baku kaikras sa kaka, dîa lukaia sip sa?

¹² Diara nani ba Jehova kaiki ba baku kaikras sa kaka, yawan lukaia sip sa kasak apia lâka tâka mita pât wahwisa apia kaka, wan trabilka ba uba pali karna sa. Tânka kum baku, asla takanka bilara muihni lakri kum kum ba lukaia sip sa wark kum yabras ba mita apia kaka swiaia nit ba mita, witin nani ra saura munisa. Jisas wark tatakra nani maprika lilkika ra dîa aisan ba wina kaisa smalkanka kum ra luki kaikaia. Naha wark tatakra nani ba ai kupia baiki kan, kan luki kan ai warkka mana dîa yabi kan ba aitani apia kan, kuna insla dawanka bui witin nani ra win: “Upliki, yang bui man ra watawi kumi sin mai munras” (Mt. 20:10-13). Raitka ba wark tatakra nani ra diara saura kumi sin munras kan, kuna witin nani ba brukwi aisi kan, kan dîa yabi kan ba wina kau bîla kaiki kan bamna. Yawan ra sim sât wan takbia want apia sa, baha mita kaisa laki kaikaia dîa daukaia sip sa piu karna nani ra Jehova diara nani kaiki ba baku yawan sin kaikaia dukiara.

TRABIL NANI BRISA PIUA RA YAWAN DÎA DAUKAIA SIP SA

13. ¿Trabil kum mapara aiklabisa piua ra, dîa wan takaia sip sa?

¹³ Yawan Jehova uplika nani baku pain nu sa pât wahwanka dukiara Baibil dîa smalki ba. Bara upla wala nani ba pât wahwisa piua ra, Baibil tikska nani aisi kaiki yabisa ai kupia bukaia dukiara. Kuna wan rayaka ra trabil kum mapara aiklabisa piua ra, ban kra Jehova diara nani nahki kaiki ba baku yawan sin kaikaia karna wan munaia sip sa. Tânka kum baku, ban kra yawan lukaia sip sa Gâd ba klala wankisa apia kaka wan pura sunra nani ba walras. Baku lukaia tâ krikisa kaka, ¿dîa daukaia sip sa?

14. ¿Pât wahwisa piua ra, pura sunra bâk dîa sin makabaia sip sa? (Pilipai 4:13).

¹⁴ Jehova hilp wan munbia makabi kap. Kaisa wan Aisa latwankira ra wiaia dîa sât trabilka bâk lui ba bara nahki wan dara wali ba. Baku sin, yawan sip sa makabaia nahki tnatka ra hilp wan munbia yawan want sa. Baku sin, yamni kabia makabaia ai spiritka holikira bâk karnika bara sinska lâka ba wankbia. Kuna wan kupia kraukaia sa, yawan bîla kaiki tnatka ra lika ban kra witin ansa wan munbia apia (Epe. 3:20). Baku sin, ban kra ai hilpka ba insal nani apia kaka muihni lakri nani bâk wankbia (Law. 34:7). Baha mita, Jehova ai hilpka nahki tnatka ra wanki ba yawan aman kaikaia sa bara briaia sa. Man kasak lukaia sip sma traika kaikanka mapara bapi buma dukiara Jehova spiritka holikira nit sma ba sut maikaia want sa (Pilipai 4:13 ba aisi kaiks).

15. ¿Pât wahwanka nani bâk lui kabia piua ra, yawan dîa ban dauki kaia sa? (Lilka ba sin kaiks).

¹⁵ Spirit lainka ra warkka nani ba ban dauki bas. Ban kra kainara yawan dîa daukaia sip kan ba nanara sip daukras sa, kuna nawas dîa dauki ba wan kupia aiska ni daukaia sa. Yawan Jehova lukanka ba wan sinska ra briaia sa, kau pali “trabil saura, pât tara sin” bâk luisa piua ra (Law. 119:143). Baha mita, piu bani Baibil aisi kaikaia sa bara dîa laki kaiki ba ra tihu luki kaikaia. Sip ba kat smalkaia warkka ba daukaia sa, asla aidrubaia sa, bara wan aisanka nani ba wal sin tâ baikaia sa. Wala nani wina laihura takaia lukanka mapara aiklabaia sa bara wan muihni lakri nani aikuki taim luaia sa (S.L. 18:1).

16. ¿Diara saura kum wan takisa piua ra, dîa ba namhpa lukaia sip sa bara nahki baha lukanka nani ba wapni ra mangkaia sip sa? (2 Korint 10:4, 5).

¹⁶ Baibil ba yus munaia sa wan lukanka ba chens munaia dukiara. Wan rayaka ra diara saura kum wan takisa piua ra, yawan silp apia kaka Jehova dukiara namhpa namhpa lukanka nani ba briaia sip sa (2 Korint 10:4, 5 ba aisi kaiks). Baha piua nani ra, ¿yawan dîa daukaia sip sa baha lukanka nani ba wan sinska wina sakaia dukiara? Baha piua ra, yawan “Gâd tânka”wibia sa kaka Baibil bara wan ulbi sakanka nani ra smalki ba yus munaia sa. Tânka kum baku, Jehova danh yamni wan kaikras lukisa kaka, apastil Pal rayaka sturka ba stadi takaia sa. Witin Gâd warkka dauki kan piua ra, trabil sât sât mapara aiklaban. Ban sakuna, baha nani ba witin ra param marikan Gâd bara Jisas ba witin ra yamni kaiki kan ba (2 Ko. 11:23-27). Bara piu luan ra saurka nani daukan ba dukiara Jehova padin wan munan sapa namhpa lukisa kaka, Baibil ra plikaia sa ani tikska nani ba marikisa Jehova padin wan muni sa (Ais. 43:25). Baha nani ulbi brisa ningkara aisi kaikaia sa bara aman luki kaikaia (Law. 119:97). Bara diara saura kum takan ba mita, Gâd ai uplika nani ra kaina kahbia pramiska ra namhpa namhpa lukaia maikisa kaka, wan ulbi sakanka nani ra tânka pliki kaiks dîa muni witin swisa pât wahwanka bâra kabia bara nahki piu sut ra spirit lainka ra wan kaina kahbisa (Law. 91:9-12). Baku sin, ai rayaka ra trabil karna nani bâk luan muihni lakri nani sturka nani ba aisi kaikaia sip sa.a

17. ¿Traika kaikanka kum balbia piua ra, yawan dîa daukaia sa?

¹⁷ Ban kra nawas ramyaka ra trabil karna nani bâk luras sma. Baku sa kaka, Jehova ra tingki wis bara sanska brisma ba yus muns witin dîa yamni maiki ba ra tihu luki kaikaia dukiara (Smas. 7:14). Kuna piua karna nani balbia taim, karna trai muns Jehova diara nani kaiki ba baku kaikaia dukiara bara kupiam aiska ni witin ra kasak lukaia. Jehova ai uplika kasakkira nani ra naku pramis munisa: “traika kaikanka bri banhma ba ra, Gâd mita baha ba wina swak takaia karnika sin maikbia” (1 Ko. 10:13). Baku ba ra, wan muihni lakri nani ba trabil karna kum bâk luisa piua ra, ¿yawan nahki hilp munaia sip sa? Stadika aula ra naha tânka dukiara lan takbia.