JUNIO 8-14, 2026
LAWANA 8 Jehova, wan yukuwaika watla sa
“Jehova pramiska nani ra ban kasak lukaia sip sma”
“Man swaki ai sakram sa, Jehova, man kasak tânka Gâdka sma” (LAW. 31:5, TNM).
DÎA LAKI KAIKBIA BA:
Dîa muni yawan kasak lukaia sip sa Jehova pramis munan dukia nani sut ba aimakbia bara ai Kingka Lâka ba Sitan bara ai kuninka nani sut ba sauhki tikan kabia.
1. Lawana Nani 31:2-5 ra wi ba baku, ¿dîa muni yawan Jehova ra kasak lukaia sip sa ki?
SITAN tasbaya ra iwi ba mita, upla manis ba kunin aisisa. Aima kum kum ra ya ra kasak lukaia sip sa sapa nu takaia karna wan munaia sip sa. Tânka kum baku, kampani manis ba kunin lâka ra ai bisniska nani daukisa. Baku sin upla manis ba diara atkaia dukiara kunin aisisa. Upla kum kum ba ai dara walan sa ai pânika nani ra kat sin kasak lukaia sip apia sa, kan witin nani dîa pramis muni ba alki daukras sa. ¡Kuna Jehova lika sât wala sa! Witin ba “kasak tânka Gâdka” sa, yawan piu bani witin ra kasak lukaia sip sa (Lawana Nani 31:2-5 ba aisi kaiks, TNM).a Jehova kunin aisaras sa, witin dîa aisi ba sut kasak sa. Baha mita, kasak lukaia sip sa witin dîa pramis munan ba sut alki daukbia.
2. ¿Naha stadika ra yawan dîa laki kaikbia?
2 Naha stadika ra yawan laki kaikbia dîa muni wan kupia aiska ni Jehova ra kasak lukaia sip sa. Baku sin lan takbia kasak tânka Gâdka ba, Sitan bara ai tasbaya sauhki tikaia dukiara dîa daukbia, bara naiwa piua ra ai kupia lâka aimakbia dukiara dîa daukisa. Naha ba hilp wan munbia kupia karna lâka ni sîa briras kira tânka kasak ba dukiara aisaia.
DÎA MUNI YAWAN KASAK TÂNKA GÂDKA RA KASAK LUKAIA SIP SA
3. ¿Dîa muni yawan wan kupia aiska ni Jehova ra kasak lukaia sip sa?
3 Yawan Jehova ra kasak lukaia sip sa, kan witin sika wan Papaskra sa. Gâd ba kasbrika, tasba bara upla nani ra paskan (Bla.St. 1:1; Law. 36:9; Par.M. 4:11). Baku sin, tasba paskan piua ra, upla nani dîa nit ba sut wal daukan. Witin ba diara sut pain tâ brisa bara ban bri kabia. Jehova sinskira sa bara ai karnika ba tnata âpu ba mita, namhpa lukraskira wan rayaka bara wan naika piua ba witin mihta ra swiaia sip sa.
4. ¿Yawan nahki nu sa Jehova latwan wan kaiki ba?
4 Yawan Jehova ra kasak lukaia sip sa, kan witin latwan wan kaikisa bamna. Gâd ba raya kaia prisantka sir munaia want kan ba mita, upla nani ra paskan. Baku sin, witin ai lilkika talia pali ba kat wan paskan (Bla.St. 1:26). Witin ba yawan silp diara nani wahbi sâkbia prika lâka wankan bara plis painkira kum ra iwaia sanska ba sin (Law. 115:16). Gâd ba Adam bara Iv ra wark painkira kum yaban, paradais ba tasba aiska ra sin lakaia (Bla.St. 1:28; 2:15). Witin nani ra win lilia kaia dukiara tasba ra dîa bâra ba sut yus munaia sip kan. Param sa, Jehova “kupia latwanka lâka ba, ban kaia ra bâra sa” (Law. 103:17).
5. a) ¿Jehova dîa daukan Adam bara Iv ai mapara buan taim? b) ¿Ani pramiska nani ba Jehova aimakbia yaban sa? (“Gâd bîla nani ba kasak sa” bakska ba sin kaiks).
5 Yawan Jehova ra kasak lukaia sip sa kan witin dîa pramis muni ba alki daukisa. Witin tasba paskan ba dukiara Baibil ba naku wisa: “Bilara diara âpu kaia dukiara paskras kan, sakuna upla nani bâra iwi kaia” (Ais. 45:18, 19). Kuna, Adam bara Iv ba Gâd mapara buan bara pruan. Baku sa kaka, ¿Jehova kupia lâka ba wal dîa takan? ¿Danh aimakaia sip apia kan ki? Baku apia sa, kan diara kumi sin Jehova kupia lâka aimakbia alki takaskaia sip apia sa (Ais. 46:10, 11). Witin ba tâura wina want kan tasba aiska ra upla kasakkira nani iwbia bara baha ba chens takras sa. Baha mita, swin Adam bara Iv ba luhpa ailal bribia. Bara ai kiamka ra swaki sakaia dukiara Jisas ra blikan, baku tnatka ra ban kaia ra iwaia sanska pranakira ba yaban (Jan 3:16).
AI PRAMISKA NANI AIMAKBIA DUKIARA JEHOVA DÎA DAUKI AULA BA
6. ¿Adam bara Iv ai mapara buan ningkara Jehova dîa takbia win?
6 ¿Ya mita Adam bara Iv ra tukban Gâd mapara bubia dukiara? “Witin sika piuta almuk ba, nina dibil bara Sitan mâki ba” (Par.M. 12:9; Bla.St. 3:4, 5; Jn 8:44).b Jehova Sitan lâka aisi daukan piua ra, witin ra sauhki tikan kabia win (Bla.St 3:15). Baku sin win baha piua aimakras kainara upla manis ba Sitan ra nina blîkbia bara ai daukanka nani ba sin. Ban sakuna, upla kum kum nani ba lika Jehova bîla walbia bara witin ra kasak kabia.
7. ¿Ya nani ba Sitan ra nina blikisa bara witin nani ra dîa takbia?
7 ¿Ya nani ba Sitan ra nina blikisa ki? Jehova mapara buan insalka nani bara upla kiamapara nani ba sin. Sitan baku witin nani ba sin Gâd kupia lâka mapara buisa bara baha mita, witin nani ba Gâd ai asla takanka heven ra bara tasba ra bri ba tilara apia sa. Kuna Jehova, Sitan bara ai nina blablikra nani ra sauhki tikaia yua ba pat wahbi sakan sa (Dn. 2:44; Ro. 16:20).
8. ¿1914 mânka ra Jisas ba dîa daukan? (Lilka nani ba sin kaiks).
8 Yawan kasak lukaia sip sa Jehova, Sitan bara ai nina blablikra nani ra sauhki tikbia pramiska daukan ba aimakbia. ¿Dîa muni? Nahara luks. 1914 mânka ra, Jehova Jisas ra king baku mangkan bara baha piua wina Jisas ba Sitan bara ai lasika nani mapara aiklabaia tâ krikan. Witin nani ra pura luan ningkara tasba ra lulkan (Par.M. 12:7-9). Baha war aiklabanka ba heven ra takan, ban sakuna baha tâka upla nani ba tasba ra pât wahwisa. 1914 mânka wina, Sitan ba karna pali wark takisa upla nani ba ai nina blîkbia dukiara bara baha tâka mita tasba aiska ba kau saura taki aula sa. Baha mita sika Baibil ba wisa: “Tasba ra bara kabu ra iwi nani ba mapara lika alai pali kabia, kan dibil ba man nani ra iwan sa, ai kupia sin baikan sa, kan witin kaikisa kau piua wiria baman brisa bamna” (Par.M. 12:12). Tisku pali, Jisas ba 1914 mânka ra dîa tâ krikan ba tnata mangki pura luanka aiska pali bribia. Sitan bara ai nina blablikra nani ra sauhki tikan kabia (Par.M. 6:2). Jehova nina ba holikira kulkan kabia bara param marikbia Jehova sika kasak tânka Gâdka sa (Law. 45:4-6; Isi. 38:23).
Primera Guerra Mundial: U.S. National Archives photo; bomba: USAF photo; pandemia: blvdone/stock.adobe.com; disturbios: inhauscreative/E+ via Getty Images
1914 mânka wina, tasba aiska ra diara nani ba kau saura takan sa. (Baiki sakanka 8 ba kaiks).
KASAK TÂNKA GÂDKA BA YA NANI KASAK TÂNKA RA LATWAN KAIKI NANI RA ASLA DAUKISA
9. ¿Naiwa piua ra Jehova ya nani ra asla daukisa?
9 Baha piua aimakras ba ra, Jehova mita daukisa “paskanka aiska ba asla takbia ba ra, Kraist lika baha sut lal kabia, diara nani kasbrika purara ba bara tasba ra ba sut sin” (Epe. 1:10). “Diara nani kasbrika purara” wisa taim, tânka sa bâk sakan kristianka nani, witin nani ra sika Jehova wahbi sakan sa heven ra Kraist wal king aimakbia dukiara. Bara “diara nani [...] tasba ra ba” wisa taim, tânka sa tasba na paradais kum ra lakan kabia piua ra iwbia uplika nani ba. Gâd napakanka nani sut ba karna wark takisa kasak tânka ba upla nani ra smalkaia dukiara bara mariki banhwisa Sitan ba kuninkira sa.
10. ¿Kasak tânka lan takbia dukiara Jehova upla nani ra nahki hilp munisa? (Param Marikan 14:6, 7).
10 Jehova smalkaia warkka bâk kasak tânka ra latwan kaiki uplika nani ra asla daukisa (Param Marikan 14:6, 7 ba aisi kaiks). Sturi yamni ba smalkaia dukiara witin ba upla nani ra yus munisa bara insal nani ba sin kasak tânka ra latwan kaiki uplika nani ra pliki sakaia bara kangrigisan ra brih waia dukiara tâ baikisa. Sitan ba patitara piua wina Babilon tara, wibia sa kaka tasba aiska ra rilidian kuninkira nani asla takanka bâk Jehova dukiara kunin nani aisan sa, kuna smalkaia warkka ra tingki baha nani ba param takan sa (Par.M. 18:2, 4). Tisku pali, rilidian kuninkira nani ra sut sauhki tikan kabia bara kasak tânka Gâdka ra latwan kaiki nani ba prana bara kulkanka ba Jehova ra yabia (Par.M. 17:16).
11. ¿Yawan nahki nu takaia sip sa ya nani rait pali Jehova uplika nani banhwisa?
11 Jehova tasba aiska wina upla sât sât ra ai asla takanka bilara brih balisa (Par.M. 7:9, 10). Witin nani ba “sturi yamni ba” walisa taim, ai dara walisa kasak tânka ba sakan sa bara wilinkira Gâd uplika kum takisa (Mk 13:10). Piu lui ba wal, kau param kaikaia sip sa ya nani ba Gâd kupia lâka kat ai warkka dauki ba, bara ya nani lika apia. Prapit Malaquías ba naku aisan: “Bara man nani aima wala ra tânka brima yamni ba saura ba wal tânka aihka ba, Gâd ra mayuni ba, Gâd ra mayunras ba tânka” (Mal. 3:18). Jehova uplika nani ba ai daukanka nani bara dîa smalki ba wal mariki banhwisa witin nani kasak tânka Gâdka ra mayuni banhwi ba.
12. Jehova kupia lâka aimakbia dukiara, ¿smalkaia warkka ba nahki tâ baikisa?
12 Yawan “King Lâka sturka yamni” smalkisa piua ra Jisas bîla nani ba alki daukisa, bara sim piua ra prapit aisanka kum aimakbia dukiara tâ baikisa (Mt. 24:14; 28:18-20). Naha warkka ra tingki, tasba aiska wina upla sât sât nani ba Jisas nina blablikra nani takisa bara ban kaia ra kasak tânka Gâdka ra mayunaia bîla kaikanka ba brisa. Baku tnatka ra, yawan sut ba Gâd kupia lâka aimakbia dukiara tâ baikisa. Naha ba ¡prana tara kum sa!
YAWAN KASAK LUKAIA SIP SA JEHOVA AI PRAMISKA NANI SUT BA AIMAKBIA YABIA
13. ¿Ya nani pali mapara Sitan ba buisa, bara dîa muni?
13 Sitan ba ai kupia baikan pali sa “kan witin kaikisa kau piua wiria baman brisa” bara ai tasbaya ba sauhki tikan kabia (Par.M. 12:12, 13). ¿Kuna ya nani pali mapara Sitan ba buisa? Bâk sakan kristianka nani, witin nani ba “Gâd lâka nani wali dauki ba, bara Jisas ra sin ban kasak luki nani ba” (Par.M. 12:17; 14:12). Sitan ba sin, naha kristianka nani ra tâ baiki uplika nani mapara buisa.
14. ¿Sitan ba Gâd uplika nani mapara bubia ningkara dîa takbia? (Wauhkataya mawan lilkika ba sin kaiks).
14 Babilon tara ba sauhki tikan kabia ningkara, Sitan ra tâ baiki nani ba Gâd uplika nani mapara karna pali bubia. Baha piua ra, Armagedan war aiklabanka ba tâ krikbia (Par.M. 16:13, 14, 16). Jisas bara ai insalka nani ba Jehova uplika nani ra swaki sakan kabia bara Sitan tasbaya ba aiska pali sauhki tikbia (Par.M. 19:19-21). Baha piua ra saurakira nani bara kuninkira nani ba danh âpu kabia (Par.M. 21:8). Bara tasba aiska ba nu takbia Gâd ba kasakkira sa bara piu bani kasak tânka ba aisisa.
Armagedan war aiklabanka ra Jisas bara ai insalka nani ba Gâd waihla nani mapara aiklabisa. (Baiki sakanka 14 ba kaiks).
15. ¿Dîa muni yawan kasak lukaia sip sa Jehova pramiska nani sut ba aimakbia? (Aiseya 65:16, 17; lilka ba sin kaiks).
15 Naiwa piua ra tasba aiska ra upla nani ba tar baiwan lâka ra iwisa. Kuna Jehova hilpka ba wal, ai uplika nani ba asla lâka ra sa. Witin ba kasak tânka ra latwan kaiki nani ra asla daukisa bara diara kumi sin alki takaskaia sip apia sa ai uplika nani ra bara ai warkka ba blisin munbia dukiara (Aiseya 65:16, 17 ba aisi kaiks). Yawan kasak lukaia sip sa witin dîa pramis muni ba alki daukbia. Apastil Pal Roman 8:38, 39 ra ulban bîla nani ra kasak lukaia sip sa: “Prura mita, raya kaia ba mita, insal nani ba, karnika bri nani ba bara spirit lâka mapara karnika bri nani ba sapa, diara nani nanara ba, bara diara nani naika balaia ba, purara ba, tihu pali ra ba sin apia, bara diara wala sut Gâd daukan ba mita sin, sip apia sa. ¡Gâd ai latwanka lâka wan Dawan Kraist Jisas param wan marikan ba wina dakbi wan sakaia dukia kumi sin âpu sa!”.
Tasba raya ra naiwa piua trabilka nani ba wan kupia kraukbia apia. (Baiki sakanka 15 ba kaiks).
16. ¿Dîa muni man kupiam aiska ni Jehova ra kasak lukisma ki?
16 Yawan diara manis tâwan Jehova, kasak tânka Gâdka ra kasak lukaia sip sa. Witin ba wan Papaskra sa. Latwan pali wan kaikisa. Witin daukisa piua bani kwâra tara ba kau pâwbia, bara tasba aiska wina upla sât sât nani ra mayunra rait aihwa ra brih balisa (Ais. 60:22; Sak. 8:23). Kasak lukaia sip sa Jehova ai kupia lâka ba aimakbia yabia bara yawan nu sa tisku pali Sitan bara ai kuninka nani sut ba âpu daukbia. Baha mita, yawan sin Debit aisan bîla nani ra kasak lukisa, witin ba win: “Gâd ba yamni pali sa, […] witin yakan man sika diara tara nani daukisa; yamni pali win kabia ai nina pranakira ba. ¡Tasba aiska ba prana ni banhbia! ¡Baku kabia!” (Law. 72:18, 19).
LAWANA 2 Jehova sika ninam
a Lawana Nani 31:2-5 naku wisa: 2 Puri sunra na wals; isti bal pât wina swaki ai sâks! Man yang yukuwaiki walpaya bas, ¡ai yukuks, kaini kahbi swaki ai sâks! 3 ¡Man ba yang wailpaya sma, waitla karnika! ¡Taipahki bara kaini kahbi ai brih was, ninam yamni kulkaia ba tâwan! 4 ¡Yang mini priski alkaia tân kahban ba wina ai sâks; man sika yang kaini kahbaika sma bamna! 5 Man mihtam kat yang spiritki mangkisni; Man swaki ai sakram sa, Jehova, man kasak tânka Gâdka sma.
b Baibil ra naha insalka saura nina pali ba wiras sa. Kuna witin dukiara naha nina nani ba yus munisa Dibil (tânka sa “dahra kwakwahkra”) bara Sitan (tânka sa “mapara babura”).