Maisa nihkra Gâdka wina lan taki kap

1. ¿Dîa muni yawan wala nani ra maisa nihkaia sa?

YAWAN sut maisa nihkra nit sa, kan wan rayaka ra “traika kaikanka ailal pâtka” wahwisa (1 Pi. 1:6). Yawan lilia wan dara walisa pât wahwisa piua ra wala nani wan maisa nihkisa taim. Baha mita pana baku daukaia ba yamni sa (Mt. 7:12). Jehova sika “maisa nanihkra Gâdka sa” bara “pât nani sut yawan wahwi ba tilara witin yawan wan maisa nihkisa”. Baku witin wan smalkisa nahki pana pana wan maisa nihkaia sip sa (2 Ko. 1:3, 4; 1 Tes. 4:18). Yawan wan muihni lakri nani ra latwan kaiki ba mita maisa nihkisa, bara naha ba taiban lâka ra daukras sa. Naha stadika ra yawan laki kaikbia 1) Baibil ra maisa nihkra dukiara aisisa taim, dîa tânka sa, 2) yawan nahki sip sa wala nani ra maisa nihkaia, bara 3) maisa nihkra nit sa taim, yawan dîa daukaia sa.

BAIBIL RA “MAISA NIHKAIA” TÂNKA BA

2. Baibil ra wala nani ra maisa nihkaia wisa taim, ¿dîa tânka sa?

² Baibil ra, Grik bîla wina “maisa nihkaia” bîla lakaia dukiara tânka sât sât yus munan sa. Naha bîla dukiara wiaia sip sa “kupia bukaia”, “kupia kraukanka nani yabaia”, bara “diara kum daukbia uplika ra kupia bukaia” (Ro. 12:8). Naha bîla ba tânka sa upla kum “upla wala ra ai lamara balbia bik takisa ai hilpka yabia dukiara”. Naha kau pain tânka briaia dukiara, luki kaiks upla kum ai pânika pât wahwisa kaikisa taim, isti pali hilp munaia dukiara ai lamara wisa. Naha uplika ba tnatka sât sât ra ai pânika ra hilp munaia sip sa, bara trai munisa witin ba kau pain ai dara walbia.

3. ¿Bernabé wina yawan dîa lan takaia sip sa? (Lilka ba sin kaiks).

³ Kaisa Baibil ra taki uplika kum sturka ba laki kaikaia. Kristian kum nina Josep, witin ba upla nani ra kupia bukaia bara maisa nihkaia lan kan ba mita, apastil nani ba nina raya wala kum mâki yaban. Naha sika Bernabé, tânka ba “maisa nanihkra luhpia” (Ap.St. 4:36). Naha nina ba ai daukanka nani param mariki kan ba mita, witin dukiara aisisa taim, Baibil ba Josep nina ba yus munras sa. Witin ba aima ailal ra ai nina tânka ba param marikan muihni lakri nani ra hilp muni kan piua ra. Tânka kum baku, Saulo kristian takan ningkara Jerusalem kat impakan disaipil wala nani wal prawaia dukiara. Ban sakuna, witin kristian nani ra nina bliki rau sauhki kan ba mita, apastil nani ba sibrin luki kan. ¿Bara Bernabé ba dîa daukan? Saulo ra kasak lukan bara apastil nani mawanra brih wan (Ap.St. 9:26-28).

WALA NANI RA NAHKI MAISA NIHKAIA SIP SA

4. ¿Wala nani ra maisa nihkaia tnatka nani tila wina ani ba kau yamni sa? (Roman 1:11, 12).

⁴ Sip sa kaka, witin nani ra wih kaikaia. Jehova wala nani ra maisa nihkaia dukiara ai uplika nani ra yus munisa. Tânka kum baku, aima kum ra prapit Ilayas ba sari pali ai dara wali kan bara Jehova ai insalka kum ra blikan witin kupia bukaia dukiara (1 Ki. 19:4-7). Baku sin, apastil Pal ba param kaikan wala nani ra kupia bukaia dukiara wih kaikaia ba karnika tara brisa (Roman 1:11, 12 ba aisi kaiks). Upla kum ra maisa nihkaia dukiara wih kaikaia ba “naksa bara aisabi” wiaia ba wal aitani apia sa; yawan uplika wal taim luaia nit sa (1 Ko. 16:7). ¿Bara uplika watla kat waia sip apia wan munisa kaka? Wan kupia kraukaia sa telepon apia kaka wauhkataya kum bâk diara kum ulbi blikaia bara winaia ba, witin kupia bukaia sip sa. Baku sa kaka, ¿man swima ki Jehova yus mai munbia wala nani ra kupia bukaia dukiara?

5. ¿Dîa muni sam taim karna wan munaia sip sa wan muihni lakri nani ra maisa nihkaia?

⁵ Las tnata yua nani ra iwi ba mita, wan rayaka ba piu bani kau karna kabia. Baha mita, wan muihni lakri nani ra maisa nihkan lâka nit kabia piua ra, wih kaikaia ba karna wan munaia sip sa. Pal Rom tawanka ra silak ra kan piua ra, kristian waitna kum Epesus tawanka wina nina Onesíforo ba, wih kaikaia dukiara ai rayaka ba pât ra dingkaia wilin kan (2 Ti. 1:16-18). Bara Rusia kuntrika wina muihni lakri nani ba naha waitnika daukanka nina blikisa. Ai kasakka lukan lâka tâwan witnis kum ra lâ ra dingkisa taim, witin ra kupia bukaia dukiara muihni lakri nani ba lâ watla kat wi banhwisa. Witin nani nu sa ai prika lâka ba lus tiwaia sip sa. Ban sakuna, wilinkira daukisa. Naha kristianka nani daukan baku, ¿muihni lakri nani ra kupia bukaia ridi takaia dukiara man dîa daukaia sip sma? Sip sma patitara piua ra bara naiwa piua ra sin Gâd uplika nani pana pana ai kupia bukaia dukiara dîa daukan ba stadi takaia, bara lan taks nina bliki rau sauhkan piua ra, witin nani dîa daukan ban lilia kaia dukiara.

6. Wala nani ra maisa nihkisa piua ra, ¿yawan nahki sip sa Jehova daukanka ba nina blikaia? (Lilka ba sin kaiks).

⁶ Witin nani ra aman walaia sa. Prapit Ilayas ba ai rayaka pât ra kan ai dara walan taim, ai kupia aiska ni Jehova ra ai pura sunan bara witin latwan lâka ni aman pali walan. Naha prapitka ba aima ailal ra ai trabilka dukiara aisan. Jehova nu kan witin dîa bâk lui kan ba, ban sakuna swapraskira aman walan (1 Ki. 19:9, 10, 14). Baku sin, Abakuk sturka ra luki kaikaia sip sa. Witin ba aima kum ra dîa wari taki kan ba dukiara Jehova ra aisan bara rispik lâka marikras kan talia kan, kuna Gâd ba witin wal ai kupia baikras kan (Ab. 1:2, 3). Naiwa piua ra sin, Jehova nu sa yawan dîa nit ba, ban sakuna aman pali wan walisa. ¿Yawan nahki sip sa witin daukanka ba nina blikaia? Wan muihni lakri nani ra rispik lâka wal aman walaia sa. Witin nani diara kum dukiara wan aisi kabia piua ra, yawan ba “walaia dukiara ridi kaia [sa]” (Je. 1:19). Witin nani aisisa taim, bîla dakbaia apia sa. Bara lukraskira diara kum wibia kaka, witin nani wal wan kupia sauhkaia apia sa (Smas. 7:9).

7. ¿Pât wahwi uplika kum dîa nit sa nu takaia dukiara yawan dîa daukaia sip sa?

⁷ Uplika dîa nit ba wan tânka briaia trai munaia sa. Jehova upla dîa ai kupia ra bri ba nu takaia sip sa, kuna yawan lika apia. Baha mita, upla kum ra nahki maisa nihkaia sip sa nu takaia dukiara yawan aman walaia sa. Lukaia apia sa baha uplika dîa nit ba yawan pat nu sa, kan ban kra man dîa lukisma ba wina ai nitka ba sât wala sa kaia sa. Kupiam krauks, upla kumi bani ba sât wala sa. Kau yamni kabia wan taimka saki uplika ra aman walaia. Witin nahki ai dara wali ba bara dîa nit ba nu takaia dukiara, tânkira lâka wal makabi walanka nani daukaia (S.L. 20:5).

8. ¿Jisas ba Marta bara Meri ra nahki maisa nihkan, bara baha wina yawan dîa lan takaia sip sa? (Lilka nani ba sin kaiks).

⁸ Jisas Lasarus pruan taim, Marta bara Meri ra nahki maisa nihkan ba dukiara luki kaiks. Naha mairka wâl ba sari lâka tara wahwi kan, bara Jisas ba tnatka sât sât ra witin nani ra hilp munan. Marta witin wal aisan ningkara, Jisas ba kli buan lâka ba dukiara smalkan bara naha ba Marta kasakka lukan lâka ba kau karna daukan. Bara Meri ba lika Jisas lamara wan taim, witin ba ini kan bara talia sa Jisas ba kli buan lâka ba dukiara aisaras kan, kau ni Jisas ba witin wal inan bara makabi walan Lasarus wîna tara ba anira kan sapa (Jn. 11:20-35). ¿Naha sturka wina yawan dîa lan takisa? Maisa nihkra yabaia dukiara tnatka sât sât bâra sa. Baha mita, upla kumi bani dîa nit ba nu takaia trai munaia sa.

9. ¿Wala nani ra maisa nihkaia dukiara Baibil ba nahki hilp wan munaia sip sa? (Roman 15:4, 5).

⁹ Baibil ba yus munaia sa. Upla kum ra Baibil tikska kum aisi kaiki yabisa piua ra, witin kaikisa nahki “Ulbanka nani mita wan maisa nihki ba” bara bîla kaikanka bri ba kau karna daukisa (Roman 15:4, 5 ba aisi kaiks). Baha bîla kaikanka ba witin ra kupia bukisa bara maisa nihkisa (Ais. 40:31). ¿Kuna uplika ra ani Baibil tikska ba marikaia sip sa? Muihni lakri kum kum ra hilp munan sa Baibil tikska kum kum nani ridi bri kaia, tânka kum baku Textos bíblicos para la vida cristiana ulbi sakanka wina “Consuelo” lalka ra taki Baibil tikska nani ba. Baku sin, yamni kabia Jehova ra makabaia hilp wan munbia ai Bîla ba kau pain yus munaia dukiara. Ai spiritka holikira hilpka ba wal yawan sip kabia Baibil tikska yuskira nani ba wan kupia kraukaia (Jn. 14:26).

10. ¿Dîa muni yawan wala nani ra maisa nihkisa piua ra, kupia yamni lâka marikaia ba tânka tara brisa?

¹⁰ Kupia yamni lâka wal aisas. Yawan kaikan baku Grik bîla wina “maisa nihkaia” bîla lakaia dukiara naku sin wiaia sip sa: “Kupia kraukanka nani yabaia” bara “diara kum daukbia uplika ra kupia bukaia”. Bara sam taim wan pânika nani ra maisa nihkaia dukiara, nit kabia witin ra hilp munaia ai trabilka dukiara dîa luki ba chens munbia dukiara. Baha piua ra, yawan diara kum aisaras kainara pain luki kaikaia sa, kan want sa uplika ba kau pain ai dara walbia, ai kupia batakaia lika wan brinka apia sa (S.L. 12:18). Bara yawan, Jehova Ilayas ra nahki hilp munan ba wina lan takaia sip sa. Ilayas ba luki kan prapit baku ai warkka ba pain daukras kan bara witin baman Israel tasbaya ra Gâd warkka dauki kan. Latwan lâka wal Jehova Ilayas lukanka ba wapni ra mangkan bara ai mistikka ba param sakras kan (1 Ki. 19:15-18). Yawan sin diara kum aisaras kainara pain luki kaiki, kupia yamni lâka wal aisabia kaka, wan muihni lakri nani ra hilp munaia sip kabia. Aidrubanka nani ra aisanka nani yabi kabia piua ra, yawan latwan lâka bara lilia lâka marikaia sa. Baku tnatka ra, wan muihni lakri nani ra kupia bukbia bara karnika yabia.

11. ¿Aima ailal ra pât wahwi uplika kum kum ba dîa nit sa ki? (1 Jan 3:18).

¹¹ Hilpka lâka yabaia dukiara tnatka kum plikaia. Aima ailal ra pât wahwi uplika nani ra hilp munaia dukiara maisa nihkra bîla nani yabaia wal baman aitani apia kabia (1 Jan 3:18 ba aisi kaiks). Naha dukiara Bernabé ba tânka painkira kum wan marikan, witin ba tasba pîs kum bri kan ba wahwi atkan bara lalah takan ba apastil nani ra yaban, muihni lakri kau umpira nani ra tâ baikaia dukiara (Ap.St. 4:36, 37). Naiwa piua ra sin, muihni lakri nani ailal ba ai latwanka lâka ba marikisa wala nani ra tâ baikaia dukiara. Polonia kuntrika wina kristian mairin kum nina Gabriela, witin sari ai dara walan, kan lisamra kum ai watla ba sauhkan ba mita. Witin ba naku wisa: “Yang aisiki nani wal iwi kapri bara yawan sut uba wari taki bara sibrin luki kan. Silp maikabi wali kapri nahki daukamna waitla ba kli paskaia dukiara. Bara laimara iwi muihni lakri nani kum kum ba balan bara yua kum bilara waitla ba kli paskaia dukiara diara ailal dauki banhwan. Yang ra dîa ai takan ba kasak lukanki lâka ba karna daukan bara ai marikan Jehova ai uplika nani ra yus munisa pât wahwi uplika nani ra maisa nihkaia dukiara”.

12. ¿Yawan trabil nani mapara bapi buisa taim, muihni lakri nani ba nahki ai kupia bukisa?

¹² Trabil nani mapara ban bapi buaia. Apastil Pal ba Tesalonaika kristianka nani ra win, ai kasakka lukan lâka kat ban bapi bui kan ba mita, witin ra maisa nihkan. Bara witin nani ba Jehova warkka ban dauki kan ba mita, lilia ai dara walan (1 Tes. 3:5-8). Pal ba sin nu kan witin trabil nani bri kabia kra sin, Jehova ra ban kasak kan kaka, muihni lakri nani ra ai kupia bukaia sip kan Jehova ra ban kasak kaia dukiara (Kol. 2:1, 2). Naiwa piua ra sin, muihni lakri nani ba trabil nani tilara bapi buaia sip kabia dukiara nahki Jehova hilp wan munisa kaiki sa taim ai kupia bukisa.

13. Wala nani ra maisa nihkisa piua ra, ¿dîa wala sin yawan marikaia nit sa?

¹³ Wihka bîla kaiki. Ban kra upla kum ra maisa nihkisa piua ra minitka ra witin ba yamni ai dara walbia apia. Sakuna Baibil ba naha kupia kraukanka ba wankisa: “pana pana tâm baiki bas”. Naha tânka sa wan walka ra ban kupia buki kaia (1 Tes. 5:11). Baha mita, wala nani ra maisa nihkisa piua ra, yawan ban wihka bîla kaikan lâka ba marikaia sa (1 Tes. 5:14). Sakuna, sam taim yawan maisa nihkra lâka nit kabia. ¿Baku takbia taim, yawan dîa daukaia sip sa?

MAISA NIHKRA NIT KABIA TAIM, YAWAN DÎA DAUKAIA SA

14, 15. ¿Yawan uba trabil taki lukisa kaka dîa daukaia sa?

¹⁴ Jehova ra wan pura sunaia sa. Yawan uba wari takisa apia kaka sari wan dara walisa piua ra, Jehova ra wan pura suni makabaia sip sa wan maisa nihkbia (Law. 94:19). Bara nahki wan dara wali ba dukiara sitnika kat witin ra param aisaia sa (Law. 62:8). Wan pura sunras kainara Jehova pat nu sa nahki wan dara wali ba. Sakuna Gâd ra wan kupia kwâkisa piua ra, marikisa witin ra kasak luki ba. Jehova ani uplika witin ra kasak luki ai pura suni ba ra hilp munaia dukiara diara kum daukbia (Mk. 11:24). Pilipai 4:6, 7 naku wan kupia kraukisa: “Gâd ra puram sunra nani ra wis, makabi bas […] Bara Gâd ai kupia kumi lâka bara upla tânka briaia praiska sut pura lui ba, witin maikbia; bara naha kupia kumi lâka na, man kupiam nani lukanka nani sin main kaiki kabia”.

¹⁵ Hilpka lâka makabaia sa. Yawan spirit lainka ra pâwan pânika kum apia kaka kangrigisan almukka kum ra nahki wan dara wali ba dukiara aisaia sa. Muihni lakri nani ba maisa nihkra tara wankaia sip sa, kuna yawan nahki wan dara wali ba apia kaka dîa nit ba aisaras kaka hilp wan munaia sip apia kabia (S.L. 14:10). Baha mita, witin nani ra makabaia sa aman wan walbia, apia kaka witin nani ra maisa nihkra yaban Baibil tikska, apia kaka ulbi sakanka kum wan marikbia makabaia sip sa.

16. ¿Wala nani wan maisa nihkisa piua ra dîa takaia sip sa, kuna yawan dîa wan kupia kraukaia sa?

¹⁶ Wihka bîla kaiki padin munaia sa. Muihni lakri nani ba wan maisa nihkisa piua ra, ban kra mistik kum kum daukbia kaia sa. Tânka kum baku, witin nani dîa aisi ba apia kaka, dîa dauki ba wal nahki wan dara wali kan purkara kau saura wan dara walbia wankaia sip sa. Baku takisa kaka, yawan witin nani ra wihka bîla kaikan lâka marikaia sa (1 Ko. 13:4, 7). Wan kupia kraukaia sa Jems 3:2 bîla nani ra: “Ya ai bîla aisi ba wal watawi kumi sin daukras kaka, baha ba upla wapni sa”. Baha mita, muihni lakri nani ba nahki hilp wan munaia trai muni ba ra wan sinska mangkaia sa, bara naha bîla nani ba wan kupia kraukaia sa “spiritkam ba wilin sa, sakuna wînam ba lika swapni sa” (Mt. 26:41).

17. ¿Yawan dîa daukaia trai munaia sa?

¹⁷ Yawan sut wan maisa nihkbia bara wan kupia bukbia nit sa. Bara naha nitka ba piu bani kau tara kabia, kan las tnata yua nani ra iwi ba mita wan rayaka ba kau karna sa, bara Gâd waihla nani ba wan mapara kau karna bubia. Baha mita, yawan karna trai munaia sa piu bani pana pana wan maisa nihkaia.