Karnika Sut Bri Gâdka ra kasak lukpi

1. ¿Job rayaka ra dîa sât trabilka saura nani takan?

JOB rayaka ra diara saura manis takan: ai luhpia nani sut pruan, ai daiwra nani ba implikan bara kum kum ra ikan, ai albika aihkika nani ba pruan, bara las kat siknis aihka saura kum mapara aiklabaia kan. Baku sin naha tâka mita, Job ra rispik muni kan uplika nani ba nanara tawi sin kaikras kan. Ai “pânika nani” ba witin ra wih kaikan taim kupia bukaia watlika ra, saura ai dara walbia yaban. Baha purkara ai maya mairin ba uba sari pali kan ba mita, Job ra naku win: “Dawan mapara saura aisi si, mahka prus” (Job 2:9; 15:4, 5; 19:1-3). Upla kum rayaka ra baha sât trabilka saura nani takisa taim, lukaia sip sa Gâd ba witin ra lukras bara hilp munbia apia. Baha mita ban kra Job ba lukaia sip kan Jehova ai uplika nani ra kaina kahbras sa.

2, 3. a) ¿Pât wahwisa taim, yawan dîa lukaia sip sa? b) ¿Job sturka ba wina yawan dîa lan takisa?

² Job ra takan baku, yawan ra sin Jehova ra kasak lukanka lâka bri ba traika kaikbia, kan Baibil ba wisa yawan sut ba “piua karna nani” ra iwisa (2 Ti. 3:1). Kau pali trabil ailal wan rayaka ra takisa taim, yawan lukaia sip sa baha nani sip pura lubia apia. Baha piua nani ra upla kum kum lukaia sip sa Jehova witin nani ra danh latwan kaikras sa bara hilp munaia want apia sa.

³ Man sin aima kum ra baku damra walram sa kaka, sari takpara. Job ba lan takan Jehova ai pânika kasakkira nani ra aima kumi ra sin lulki swiras sa. Yawan sut kasak lukaia sip sa wan Aisa latwankira ba wan lamara ban kabia. Baha dukiara, Job sturka ba laki kaikbia, bara smalkanka wâl ra wan sinska mangkbia: 1) Jehova ai karnika ba yus munbia ai bîla aisanka nani ba aimakbia dukiara. 2) Nahki Jehova wan kaina kahbaia dukiara, spirit lainka ra dîa nit ba sut wankisa witin wal pânika lâka bri ba ban dutki kabia dukiara.

JEHOVA BARA INSAL NANI MAWAN RA SITAN BA WIH BUAN

4. ¿Jehova insal nani ba wal asla takan taim dîa takan?

⁴ Baibil ba wisa: “yu kumi, laih pura tasbaya uplika nani ba Dawan [Jehova] mawanra wih buaia wan” bara naku sin aisisa: “bara witin nani wal sin dahra kwakwahkra [Sitan] insalka ba wan” (Job 1:6). Baha piua ra, Sitan ba Gâd luhpia kasakkira nani tilara danh apia kan. Witin ba Jehova bara ai uplika nani heven ra bara tasba ra bri ba wal waihla takan. Blasi Sturka 3:15 ra mariki ba baku Sitan ba “mairin” daknika tilara danh apia kan, wibia sa kaka heven ra Jehova ai pamalika bri ba tilara. Naha wina sika mairin kiamka ba bal takai kan.

5. ¿Heven ra dîa takan ba wina yawan dîa lan takaia sip sa?

⁵ Diara kum kum wan smalkaia dukiara, Jehova heven ra dîa takan ba Baibil ra ulbia yaban. Yawan lan takisa Sitan dîa aisan ba wal marikisa witin ba kuninkira sa bara saurakira sa (Job 1:9; Param Marikanka 12:10 ba wal praki kaiks). Baku sin, wan smalkisa nahki Jehova ai karnika aiska ba kasak lâka bara wapni lâka ra yus munisa. Bara naha nu kaia ba âuyapah lâka wankisa. Baku sin wan marikisa, Karnika Sut Bri Gâdka ba wala nani dîa dauki ba alki takaskaia karnika brisa.

JEHOVA WALA NANI DÎA DAUKI BA ALKI TAKASKAIA SIP SA

6. ¿Jehova nahki marikan witin karnika sut bri ba? (Job 1:7, 8).

⁶ (Job 1:7, 8 ba aisi kaiks). Heven ra dîa takan ba marikisa Jehova diara sut pain tâ bri kan ba. Witin ba Sitan ra makabi walan: “¿Man naipakan Job ba kaikatma ki?”. Witin nu kan Sitan ba naha waitnika ra kaikan bara saura munaia want kan ba. Kaisa kaikaia nahki Jehova Job ra hilp munaia dukiara ai karnika yus munan ba.

7. Job 1:10, 11 ra wi ba baku, ¿Sitan dîa aisan ba wal upla nani dukiara dîa marikaia want kan?

⁷ (Job 1:10, 11 ba aisi kaiks). Jehova wan Papaskra Tara sa bara Karnika Sut Bri Gâdka sa. Witin ba wahbi sakisa nahki ai karnika ba yus munbia (Jir. 32:17; Dan. 4:35). Ban sakuna, Sitan ba win Jehova ai karnika ba saura yus muni kan, witin ba upla mayunra ba atki kan, Job wal dauki kan baku. Witin ra diara pain nani yabi kan ai warkka daukbia dukiara. Baku sin marikan, upla nani ba diara pain nani brin dauki ba mita Gâd ra mayunisa. ¿Baha sut walan taim Jehova dîa daukan?

8, 9. ¿Jehova Sitan ra dîa adarka yaban, bara dîa muni? (Job 1:12; lilka ba sin kaiks).

⁸ (Job 1:12 ba aisi kaiks). Jehova swin Sitan ba marikbia Job dukiara dîa aisi kan ba rait kan sapa. Kuna, adar klir pali kum yaban: “Witin pali wîna ra lika saura munpara”. Sitan ba baha adarka pura luaia karnika âpu kan ba mita Jehova bîla walaia kan. Bara naiwa piua ra ban baku sa. Yawan kaikan baku, Jehova ai karnika ba yus munan Job rayaka ba kaina kahbaia dukiara, bara marikan witin ba Gâd latwankira bara kasakkira kum sa.

⁹ Sitan dîa daukaia luki kan ba sut saura takan. Job ba ai Aisa latwankira ra kasak kan ba marikan (Job 1:22). Kuna, Jehova nu kan Sitan ba Job ra traika kaikaia dukiara tnatka wala plikbia.

10. ¿Dîa muni Jehova swin Sitan ba Job ra kli traika kaikbia? (Job 2:2-6).

¹⁰ (Job 2:2-6 ba aisi kaiks). Sitan ba diara kau saura kum ba wal traika kaikaia balan. Sitan win, Job ba ai rayaka swaki sakaia dukiara Gâd ra danh mayunbia apia. Witin dîa aisan ba kunin sa marikaia dukiara, Jehova swin Job wîna tara ra kangbia. Kuna, kli Sitan ra adarka kum yaban: “Ai rayaka ba lika tikpara”. Witin ba baha adarka bîla walaia kan. Yawan kaiki ba baku, Karnika Sut Bri Gâdka ba Job traika kaikanka piua ra, diara sut pain tâ bri kan ba kli marikan. Kan Sitan Jehova adarka nani ba pura luaia sip apia kan.

JEHOVA JOB PÂT WAHWANKA BA ÂPU DAUKISA

11. Job 42:10-13 ra wi ba baku, ¿Jehova Job ra nahki blisin munan?

¹¹ (Job 42:10-13 ba aisi kaiks). Job ba, kasakkira kabia marikan ningkara, Jehova mita Sitan traika kaikanka nani ba alki takaskan, bara Job pât wahwanka ba âpu daukan. Naha piua ra sin, Sitan ba Jehova dîa wahbi sakan ba pura luaia karnika âpu kan. Witin ba danh sip apia kan Jehova napakanka latwankira Job ra ban traika kaiki kaia.

12. ¿Witin karnika ra kasak luki kan uplika nani ra Jehova nahki hilp munan sa?

¹² Naha lâs yua nani ra, Jehova uplika nani ba kaikan sa nahki witin nani ra swaki sakaia dukiara ai karnika yus munisa. Tânka kum baku, 1945 mânka ra suldawa nani ba, Alemania silak watla wina Jehova witniska 230 nani ra ikaia dukiara kabu kat brih wan, kuna sut ba swakwi takan. Baha ningkara ai rayaka ra dîa takan ba dukiara witin nani naku ulban: “Jehova Hibru wahmika yumhpa ra kubus lapta klauhi ba wina swaki sakan baku, yawan ra sin swaki wan sakan. Naha witniska nani ba traika kaikanka tara kum mapara buan, kuna ai kasak lukanka lâka ba kau karna takan. Jehova witin nani ra karnika yaban. Baku sin, witin nani ai dara walan Jehova Daniel ra layan nani watla wina swaki sakan baku, witin nani ra sin swaki sakan. Baha piua wina witin nani swer takan Jehova ra ban kaia ra mayunaia”. Bara naku sin aisan: “Jehova warkka ba ban kaia ra dauki kaia ba wina mana tara wala kum kau âpu sa” (Daniel 3:27; 6:22 ba wal praki kaiks).

13. Man trabil nani bâk luisma piua ra, ¿dîa kasak lukaia sip sma? (Lilka nani ba sin kaiks).

¹³ Aima kum kum ra sin yawan trabil karna nani tâka mita pât wahwaia sip sa (1 Pi. 5:8-10). Bara sari wan dara walaia sip sa, kan ban kra lukisa wan trabilka nani ba danh takbia apia. Baha piua ra, Job sturka ba wan kupia kraukaia yamni sa. Yawan kasak lukaia sip sa Jehova yawan dîa pât wahwi ba sut âpu daukaia karnika brisa, naiwa piua ra bara tasba raya ra sin. Witin ba Sitan tasbaya sauhki tikaia yua ba pat wahbi sakan sa bara piua kat daukbia.

JEHOVA AI UPLIKA KASAKKIRA NANI RA LATWAN KAIKISA

14, 15. ¿Jehova ai uplika kasakkira nani dukiara dîa daukaia want sa, bara dîa muni? (Job 14:15; lilkika ba sin kaiks).

¹⁴ (Job 14:15 ba aisi kaiks). Wan Aisa latwankira ba kasak sa ya witin ra kasak lâka mariki ba wal. Witin ba baha nani ra uba pali latwan kaikisa bara kum pruisa taim, ai brinka pali sa ai rayaka ba kli yabaia. Tasba raya ra witin prura latwanka ba, kli buan lâka liliaka wal chens munbia (Ais. 65:17).

¹⁵ Job pât wahwanka ba danh takan, ban sakuna witin Sitan tasbaya ra ban iwi kan. Kuna Baibil ba wisa Jehova Job ra tnatka pranakira kum ra blisin munan. Witin ra kli ai wîna tara yamni yaban bara dîa bri kan ba wina diara kau ailal pura praki yaban. Kuna naika piua ra, Jehova Job dukiara diara kau ailal daukbia. Jehova marikan sa witin ai brinka sa ai uplika kasakkira nani ba rayaka liliakira kum bribia. Baha mita, ya kasak banhwi kabia nani ba tasba raya ra iwaia bara saurka luha kaia sanska yabisa (Par.M. 21:3, 4). Witin Karnika Sut Bri Gâdka ba mita, baku daukaia karnika bara brinka brisa. ¡Trabil nani brisa piua ra, nahara lukaia ba wan maisa nihkisa!

16. ¿Dîa tânka wala mita sin yawan Karnika Sut Bri Gâdka ra kasak lukaia sip sa?

¹⁶ Job ba rayaka yari kum brin ningkara pruan kuna Jehova wan Papaskra Tara bara Karnika Sut Bri Gâdka ba mita, sip sa witin ra kli ai rayaka ba yabaia (Kli.S. 32:39). Witin latwan kaiki uplika nani ra kli ai rayaka ba yabaia dukiara upla kumi sin alki takaskaia sip apia sa, bara ai piua kat daukbia (Ro. 8:38, 39).

WAN KUPIA AISKA NI JEHOVA RA KASAK LUKPI

17. ¿Yawan nahki nu sa Sitan ba Gâd uplika nani ra sip sauhki tikras sa?

¹⁷ Job sturka ba wan marikan sa dîa muni Jehova ra kasak lukaia sip sa. Yawan witin ra tingki lukisa, kan swiras sa Sitan ba ai uplika nani ra sauhki tikbia. Naiwa piua ra Jehova witniska 9 milian kau pura nani ba param marikan sa wan Papaskra Tara ba nahki karnika tara brisa. Piu bani yawan kaikisa nahki Gâd uplika nani mapara Sitan dîa daukaia trai muni ba sut saura takisa (Ais. 54:17). Gabamint bara rilidian tâ brabrira manis ba trai munan sa, yawan Jehova ra danh mayunbia apia bara smalkaia warkka ba alki takaskaia, kuna sip apia sa. Kan Jehova hilp wan munisa bamna. Diara kum sin alki wan takaskras sa, yawan upla nani ra ban smalkisa Jehova sika Gâd aihwa sa. Bara Sitan ba kuninkira sa bara âikra kum sa. Prura kat sin alki wan takaskras sa, kan nu sa Jehova ya witin ra kasak ba ra kli bukbia (Os. 13:14).

18. ¿Naika piua ra dîa takbia kra sin, dîa muni yawan sibrin lukaia apia sa?

¹⁸ Job sturka ra luki kaikaia ba wan kasak lukanka lâka dutki daukisa, kan kasak lukaia sip sa naika piua ra dîa dîa takbia kra sin yawan sibrin briaia apia sa kan, Jehova wan lamara kabia. Pât tara tâ krikan kabia piua ra, Sitan bara ai uplika nani ba lukbia Gâd uplika nani ba yakan sa bara wan mapara bubia. Kuna Job yua nani ra takan baku, Jehova diara sut pain tâ bri kabia bara swibia apia Sitan ba, ban kaia ra Gâd napakanka nani ra sauhki tikbia. Tisku pali Jehova bui Sitan tâka mita pât wahwanka nani bâra ba sut sauhki tikan kabia. Jisas ba Dibil bara ai lasika nani ra tihu tara ra mani 1.000 bilkara lulkan kabia (Lk 8:31; Par.M. 20:1-3). Bara baha piua lubia ningkara, Sitan bara Gâd mapara bui nani sut ra sauhki tikan kabia (Par.M. 20:10). Diara sut Jehova aisan baku aimakbia (Bla.St. 3:15; Ro. 16:20).

19. ¿Witin ra kasak luki nani ra Jehova nahki yamni munbia? (Lilka ba sin kaiks).

¹⁹ Tasba raya balbia wan kupia aiska ni bîla kaikisa, bahara yawan saurka luha kabia bara lilia lâka rait aihwa ba bribia. Wan rayaka ba aihka painkira kabia yawan dîa luki ba wina kau purkara. Jehova naku pramis munisa: “Kaiks, nanara yang diara nani ba sut raya daukisni” (Par.M. 21:5). ¿Naha bîla nani ba dîa tânka sa? Eden giadinka piua wina tasba raya aimakbia piua ba kat, pas trip yawan kaikbia nahki Sitan bara ai lasika nani ba kli upla nani ra saura munaia sip apia kabia. Baha piua ba painkira kabia, kan las kat âuyapah lâka bribia. Naha tasba trabilka nani tâka mita kli wari takbia apia. Bara ya Armagedan wina raya bal takbia ba sain tara nani kaikbia, bara wan uplika latwankira nani pruan ba kli buan kabia. Baha piua ra Jehova pramis wan munan rayaka ba yawan bribia.

20. ¿Man dîa daukaia wilin sma ki?

²⁰ Naha las tnata yua nani ra ban kra trabil kau ailal mapara aiklabia bara kasak kaia dukiara kupia karna lâka marikaia nit kabia. Baha mita yawan want sa Jehova ra wan kupia aiska ni ban kasak luki kaia, wan kingka baku ai bîla walaia. Yawan ban marikaia want sa, wan Aisa Jehova ra latwan kaiki ba bara Sitan ba Jehova bara ai uplika nani dukiara dîa aisi ba kunin sa. Kasak lukaia sip sa yawan Jehova ra kasak sa kaka, naika piua painkira kum bribia, kan witin ai brinka sa ai uplika kasakkira nani ra blisin munaia bara baku daukbia.