Misbara mai kaikbia kra sin dîa muni man lilia kaia sip sma

1. ¿Lilia lâka dukiara Jisas ba dîa tânka param aisan?

JISAS il purara upla nani ra smalkan taim, naku aisan: “Liliam bas man nani upla nani misbara mai kaiki ba ra” (Lk. 6:22). Naha bîla nani walan uplika nani ba tâ iwan kaia sa. Kan upla kumi sin laik apia sa, upla wala mita misbara kaikbia. Baku sa kaka, ¿dîa muni Jisas ba baha bîla nani aisan? Naha makabi walanka ra ansa munaia ba kristian nani sut mapara tânka tara brisa, kan upla manis ba misbara wan kaikisa. Naha stadika ra laki kaikbia dîa muni upla nani ba misbara wan kaikisa, bara dîa muni baku kabia kra sin lilia kaia sip sa.

DÎA MUNI UPLA NANI BA MISBARA WAN KAIKISA

2, 3. ¿Dîa tâka mita kristian rait aihwa nani ra nina blikisa, bara naha tânka nu kaia ba mapara babura nani dukiara dîa luki ba nahki chens takisa? (Jan 16:2, 3).

² Yawan Jehova ra mayuni ba mita upla nani ba misbara wan kaikisa. Jisas ba win upla nani ba ai nina blablikra nani ra nina bliki rau sauhkbia bara ikbia. Witin ba baha uplika nani dukiara win: “Aisiki ra kakaira apia sa” (Jan 16:2, 3 ba aisi kaiks). ¿Ya mita daukisa wala nani ba Gâd uplika nani ra misbara kaikbia? Sitan sika daukisa. Witin ba “naha tasba gâdka” sa (2 Ko. 4:3, 4). Sitan ba upla nani Jehova dukiara tânka kasak ba lan takbia apia dukiara alki takaskisa. Bara baha nani ra kupia bukisa, Gâd ra kakaira sa bara latwan kaiki uplika nani mapara bubia dukiara (Jn. 8:42-44). ¿Mapara babura nani dukiara naha nu kaia ba nahki hilp wan munisa? Yawan wan tânka brisa Sitan mita witin nani ra kunin munan ba bara baha hilp wan munisa misbara kaikaia apia dukiara.

³ Kaisa Pavela sturka ba laki kaikaia, ai kuntrika ra Jehova witniska nani ba smalkaia warkka daukaia adarka âpu sa. Witin ba Jehova warkka ban dauki kan ba mita, silak ra dingkan, rau sauhkan bara upla kumi sin witin ra kaikbia apia dukiara, kati ailal bilkara yakan rum kum ra dingkan. Nanara witin naku aisisa: “Pain nu sna nini bliki rau ai sauhki ba sika, Sitan bara ai lasika nani sa. Witin nani ba swapraskira mayunra rait aihwa mapara buisa. Yang ra dîa ai takan ba wal kaikri sa silak watla ra wark taki uplika nani ba, Jehova witniska nani mapara apia sa. Witin nani ai warkka baman daukisa”. Croacia kuntrika ra kristian waitna kum mapara ai aisa yapti nani ba karna pali buan bara witin naku aisisa: “Daira walri sa waihli pali ba sika Sitan sa, aisiki nani lika apia” (Epe. 6:12).

4. ¿Jisas bara Stiben sturka wina yawan dîa lan takisa? (Lilka ba sin kaiks).

⁴ Kristian nani ba wan nina bliki rau wan sauhki uplika nani ra misbara kaikras sa. Kau ni, witin nani dukiara wan pura sunisa (Mt. 5:44). Kaisa Jisas bara Stiben sturka ba laki kaikaia. Roman suldawika nani ba Jisas ra dus ra paman taim, witin ba naku ai pura sunan: “Aisa, naha pâtka na witin nani ra ban swih tiks” (Lk. 23:34). Witin ba Jehova ra makabi kan baha suldawika nani pâtka ba swih tikbia, kan witin nani ba adar yaban ba baman bîla wali kan. Baku sin, ban kra baha piua ra Jisas ba witin ra ikbia makabi kan uplika nani dukiara sin luki kan kaia sa, kan naha nani ba rilidian uplika nani ba baku daukaia ai kupia buki kan. Jisas ba ai tânka bri kan baha uplika nani ba dîa dauki kan sapa ai tânka briras kan. Stiben ba sin baku daukan, witin ra walpa ni sabi kan uplika nani dukiara ai pura suni Gâd ra makaban padin munbia (Ap.St. 7:58-60). ¿Jisas bara Stiben pura sunra nani ba Jehova ansa munan ki? Âu, Jisas lâka daukan bara ikan uplika manis ba ai kupia lakan, witin ra kasak lukan bara tahbi daukan lâka brin (Ap.St. 2:36-41). Bara Stiben ra ikaia tâ baikan uplika nani tila wina kumi pan ai kupia laki kristian takan. Baha sika Saulo Tarso wina ba, witin ba Gâd ra pain kakaira apia kan ba mita, dîa dîa saura daukan ba dukiara sari pali ai dara walan (1 Ti. 1:13).

5. ¿César sturka wina man dîa lan takisma?

⁵ Naiwa piua ra sin wan nina bliki rau wan sauhki uplika nani dukiara wan pura sunisa piua ra, Jehova ansa wan munisa. Kaisa César sturka ba laki kaikaia, witin ba Venezuela kuntrika ra iwisa. Ai aisa ba tânka kasak mapara bui kan. César ba naku aisisa: “Yaptiki ba, maya mairin bara yapti painkira kum kaia dukiara karna trai muni kan. Witin Gâd Kingka lâka ba ai rayaka ra pas tâura mangki kan, ban sakuna piu bani aisiki ra sin main kaiki kan. Yaptiki ba muihki bara laikra nani ra wan smalkan aisiki ba Jehova smalkanka mapara diara kum yawan daukbia wan makabras sa kaka, witin ra ban rispik munaia bara bîla walaia sa”. Piu luan ba wal, César aisika ba chens takan. César ba wisa: “Yu kum, kupi aiska ni Jehova ra pura sunra kum daukri bara ningkara aisiki ra makabi walri yang wal Baibil stadi takaia want sa sapa. Witin âu ai win taim lilia pali daira walri”. Piu luan ba wal, César aisika ba tahbi daukan lâka brin. Rait sa tânka kasak mapara bui uplika nani sut ba lika ai kupia lakbia apia. Kuna upla kum kum ba lika, yawan nahki rispik muni ba bara wan daukanka painkira nani ba kaiki ai kupia lakaia wilin takisa. ¡Bara baha ba lilia pali wan sakisa! Wan brinka sa Jehova umpira kaikan lâka mariki “tasba aiska wihtka tara” ba, baha nani ra hilp munbia witin lamara kau waia dukiara (Bla.St. 18:25).

6. Mark 13:13 ra wi ba baku, ¿dîa tâka wala mita sin upla nani ba misbara wan kaikisa?

⁶ Jisas ra tâ baiki ba mita, upla nani ba misbara wan kaikisa. Aima kum ra Jisas ai disaipilka nani ra win: “upla sut yang tâiwan misbara mai kaikbia” (Mark 13:13 ba aisi kaiks). Wibia sa kaka, Jisas nina tâwan. ¿Kuna Jisas “nina” wisa taim, dîa tânka sa? Naha ba tânka marikisa witin dîa sât uplika sa, ai daukanka painkira nani bara Gâd Kingka lâka kingka kaia raitka bri ba. Naha tasba tâ bri nani ra kasak luki uplika nani ba, kristian rait aihwa nani ra misbara kaikisa. Kan naha uplika nani ba tâ briaia dukiara Jehova bâk sakan uplika ra kasak lukras sa. Jisas ba 1914 mânka wina king aimakaia tâ krikan, bara tisku pali naha tasba wihtka nani ai karnika mununhtara bawaia want apia nani sut ra sauhki tikbia.

7, 8. ¿Dîa tâka mita sin upla nani ba misbara wan kaikisa? (Jan 15:18-20; lilka nani ba sin kaiks).

⁷ Sitan tasbaya tilara kaia want apia ba mita, upla nani ba misbara wan kaikisa. Jisas ba win upla nani ba ai nina blablikra nani ra misbara kaikbia kan “naha tasba wina uplika apia [sa]” bamna (Jan 15:18-20 ba aisi kaiks). Pas kristianka nani daukan ba baku, yawan sin naha tasba uplika nani lukanka, daukanka bara aisanka nani ba nina blikras sa. Baha mita, muihni lakri manis ba ai warkka pliska ra apia kaka skul watla ra, upla nani ba ai lawaska kikisa (1 Pi. 4:3, 4). Ban sakuna uba lilia wan sakisa kaikaia, nahki piu lui ba wal upla kum kum ba ai daukanka ba chens munisa bara rispik wan muni banhwisa.

⁸ Centroamérica tasbaya pîska wina kristian waitna kum nina Ignacio sturka ba kaisa kaikaia. Witin ba Gâd smalkanka lâka nani alki bri dauki kan ba mita, mani ailal bilkara ai skulka watla ra ai smasmalkrika kum ba ai lawaska kiki kan. Ban sakuna, ai skulka tnata prakras kainara ai smasmalkrika ba naku makabi walan: ¿Upla nani lamwaska kikbia kra sin, man nahki sip kapram Gâd smalkanka lâka nani ba ramyaka ra ban alki daukaia? Ignacio ba witin ra pana naku ansa munan: Kan Gâd smalkanka lâka nani ba kaina kahbanka kum sa. Bara ningkara asla aidrubanka kum ra witin ra paiwan. Ignacio ba tâ iwan kan ai smasmalkrika ba asla aidrubanka watla ra wan. Naha waitnika ba kaikan nahki kangrigisan bilara muihni lakri nani ba latwan lâka ni witin ra yamni brin, baha mita ban asla aidrubi kan. Piu luan ba wal witin Baibil stadi takaia tâ krikan, bara ai rayaka ra sin mapara buan lâka trabilka ba brin. Ban sakuna, spirit lainka ra pâwan bara tahbi daukan lâka brin.

9, 10. a) ¿Dîa tnatka wala ra sin yawan Sitan uplika nani ba wal sât wala sa? b) ¿Apastil Pal sturka wina yawan dîa lan takisa?

⁹ Baku sin, yawan Sitan tasbaya uplika nani ba wal sât wala sa kan pulitik bara war aiklabanka bisniska tilara dimras sa (Jan 18:36). Roman 13:1 ra wi ba baku, yawan kuntri lâka nani ba bîla walisa. Ban sakuna, pulitik bisniska tilara dimras sa. Gabamint bilara wihta warkka alkaia dukiara sin, wan nina mangkras sa bara iliksan piua ra upla kumi dukiara sin but munras. Yawan Gâd Kingka lâka ra bara ai kingka Jisas Kraist ra sin kasak banhwisa. Jehova witniska manis ba ai kasak lukanka lâka tâwan mita silak ra dingkisa, kuna witin nani ban smalki banhwisa. Naha muihni lakri nani ba, apastil Pal daukanka nani ba nina blikisa. Witin ba silak ra kan piua ra, mani ailal bilkara sturi yamni ba smalki kan (Ap.St. 24:27; 28:16, 30). Witin ba upla sut ra smalkan, baha tilara silak watla main kakairika nani ra, lâ watla tara ra wark taki kan nani ra, wihta nani, king nani, bara ban kra Roman kingka Nerón wark tatakrika nani ra kat sin (Ap.St. 9:15).

¹⁰ Naiwa piua ra sin, muihni lakri nani silak ra banhwi ba walaia wilin uplika nani ra smalki banhwisa. Baha tilara wihta nani, gabamint ra wark taki nani, bara silak watla main kakairika nani ra sin. Ai kasak lukanka lâka tâwan mani 6 bilara silak ra kan kristian waitna kum ba wisa, baha piua ba klala kum brin baku kaikras sa. Kau ni, Jehova wina chanska kum kan kupia pain bri uplika nani ra pliki sakaia dukiara. Jehova sturi yamni nani ba baha uplika nani ra smalkaia dukiara yus wan munisa kaka, lilia wan dara walaia sip sa (Kol. 4:3). Jehova warkka dauki ba mita upla nani misbara wan kaiki kabia kra sin, kaisa laki kaikaia dîa tânka wala mita sin yawan lilia kaia sip sa.

MISBARA WAN KAIKI KABIA KRA SIN, DÎA MUNI BAN LILIA KAIA SIP SA

11. ¿Wan nina bliki rau wan sauhkisa piua ra, dîa muni wan kasak lukanka lâka ba kau karna takisa? Tânka kum wal mariks.

¹¹ Yawan param kaikisa Baibil ra dîa aisan ba aimakisa. Baibil ra pas prapit dahra aisanka ra, Jehova win Sitan bara ai kiamka ba, wibia sa kaka Sitan ra tâ baiki uplika nani ba, Jehova ra latwan kaiki uplika nani ra misbara kaikbia (Bla.St. 3:15). Baku sin, Jisas ba Gaspil ulbanka walhwal nani ra misbara lâka tâka mita Gâd uplika nani nahki pât wahbia dukiara aisan (Mt. 10:22; Mk. 3:9-12; Lk. 6:22, 23; Jn. 15:20). Bara Baibil âiulbra wala nani ba sin naha dukiara ulban (2 Ti. 3:12; Je. 1:2; 1 Pi. 4:12-14; Jud. 3, 17-19). Baha mita wan nina bliki rau wan sauhkisa piua ra, tâ iwras sa. Kau ni, lilia wan daukisa kaikaia nahki prapit aisanka nani ba aimakisa, kan baha nani param wan marikisa yawan rait aihwa Gâdka warkka ba daukisa. Smalkaia warkka daukaia adar âpu kuntrika kum ra iwi kristian mairin kum ba wisa: “Jehova ra rayaki yabri piua ra, nu kapri yu kum nina bliki rau munan lâka mapara buamna. Baha mita, traika kaikanka nani bali kan kaiki kapri taim, sirang ai ikras kan”. Ai maya waitna ba sin ai mapara buan bara Witin ra saura pali muni kan, Baibil bara wauhkataya wala nani ba pauta ra lulki kan. Kuna witin ba ai ninara tawras kan, kau ni ai kasak lukanka lâka ba kau karna takan (Hib. 10:39). Witin ba wisa: “Baibil ra pat ulban kan nina bliki rau munan lâka ba ra kabia. Baha mita ai takbia nu kapri. Wîni kat baha pâtka wahwaia ba ai marikan yang rilidian rait aihwa ra sna ba”.

12. ¿Nina bliki rau munan lâka mapara bapi buaia dukiara kristian waitna kum ra dîa ba hilp munan?

¹² Yawan nu sa wan nina bliki rau wan sauhkbia, ban sakuna baha mapara bapi buaia ba isi apia kabia. Silak watla ra kan piua dukiara, kristian waitna kum ba naku aisan: “Sam taim, uba pali sari daira wali kapri bara uba ini kapri”. ¿Bapi buaia dukiara witin ra dîa hilp munan ki? Witin naku aisan: “Piu bani puri suni kapri. Titan bani pas dauki kapri ba sika puri sunaia. Yu aiska ra trabil kum taki kan taim, Jehova wal aisi kapri. Bara kasak apia lâka ai muni kan piua ra, kupi baiki kapri taim, tailit ra wih durki praki puri suni kapri”. Witin ba patitara piua ra bara naiwa piua ra sin, Jehova uplika nani ba nahki kasak banhwi kan sturka nani ra tihu luki kaiki kan. Baha ba witin ra hilp munan nina bliki rau munan lâka mapara bapi buaia bara Jisas ai disaipilka nani ra kupia kumi lâka yabia pramis munan ba ai dara walaia (Jn. 14:27; 16:33).

13. ¿Misbara lâka pura luaia dukiara dîa ba hilp wan munbia ki?

¹³ Wan latwanka lâka ba kau tara sa misbara lâka ba wal. Jisas pruaia baila kan piua ra sin, ai kupia aiska ni ai Aisa ra latwan kaikan. Bara ai pânika nani ra sin witin latwan kaikan (Jn. 13:1; 15:13). Yawan Jehova bara wan muihni lakri nani dukiara baha sât latwanka lâka pakisa kaka, yawan sin misbara lâka ba pura luaia sip kabia. Kaisa naha lukanka ba apastil Pal sturka ba wal sitnika kat laki kaikaia.

14. ¿Witin ra ikai kan piua ra sin Jehova ra ban kasak kaia dukiara, Pal ra dîa ba hilp munan?

¹⁴ Pal ra ikras kainara, witin ai pânika latwankira Timoti ra naku win: “Kan Gâd mita si briaia spiritka lika wankras sa; sakuna, ai Spiritka ba mita karnika tara wankisa, latwan lâka bara wan sinska yamni bri kaia ba sin” (2 Ti. 1:7). ¿Naha dîa tânka sa? Naha ba marikisa kristian kum ba Jehova ra uba pali latwan kaiki ba mita, wilin sa traika kaikanka karna nani mapara bapi buaia, bara ai muihni lakri nani dukiara ai rayaka kat sin tikaia (2 Ti. 1:8). Áquila bara Priscila ba naha sât latwanka lâka ba Pal ra marikan (Ro. 16:3, 4). Param sa, Pal ba Jehova ra latwan kaiki kan bara muihni lakri nani wina latwanka lâka brin ba, witin ra hilp munan kupia karna lâka marikaia bara ai rayaka tikbia kra sin kasak kaia (Ap.St. 20:22-24).

15. ¿Muihni lakri nani ba nahki marikisa pana pana latwan kaiki ba? (Lilka ba sin kaiks).

¹⁵ Nina bliki rau munan lâka mapara kasak banhwi muihni lakri nani ra yawan uba pali latwan kaikisa. Áquila bara Priscila Pal wal daukan baku kristian manis ba muihni lakri nani dukiara ai rayaka pât ra dingkaia wilin sa. (Ro. 16: 3, 4). Tânka kum baku, Rusia kuntrika ra silak ra dingkan muihni lakri nani ra kupia bukaia dukiara, manis ba lâ watla ra wih banhwisa. Kristian mairin kum ra lâ mawanra brih wan taim, kaikan muihni lakri daknika tara kum bâra kan ba, witin ba uba pali lilia takan. witin nani latwanka lâka ba nit kan piua ra, ai kupia bukan. Wan latwanka lâka ba kau tara sa misbara lâka ba wal, bara baha ba lilia pali wan sakisa.

16. ¿Dîa muni apastil Pita ba win Gâd warkka dauki ba mita nina bliki rau munan lâka bri nani ba lilia kaia sip sa? (1 Pita 4:14).

¹⁶ Misbara lâka tilara bapi buisa kaka, Gâd mita yamni wan kaikbia (1 Pita 4:14 ba aisi kaiks). Apastil Pita ba win yawan Gâd warkka dauki ba mita, wan mapara buisa kaka lilia kaia sip sa. ¿Dîa muni? Kan mapara buan lâka ba marikisa yawan Gâd spiritka holikira ba brisa. Pita ba ai rayaka ra dîa takan ba wal nu kan nina bliki rau munan lâka tilara kabia kra sin Jehova witin ra yamni kaiki kan ba. Mani 33 Pentikus piua luan ningkara, prias watla suldawika nani ba Pita bara apastil wala nani ra smalki banhwi kan ba mita, priski alkan. Kuna Pita ba kupia karna lâka ni ai kasak lukanka lâka tâwan aisan (Ap.St. 5:24-29). Ningkara witin nani ra rau sauhkan, kuna Pita bara apastil wala nani ba smalkaia warkka swiaia watlika ra lilia pali ai dara walan, kan “Gâd mita adar yan kata, witin nani ba Jisas nina tâwan swira bara pât wahwaia sin”. Yawan sin traika kaikanka nani bâk luisa piua ra, lilia wan dara walaia sip sa (Ap.St. 5:40-42).

17. ¿Jisas pruras kainara, ai disaipilka nani ra dîa win?

¹⁷ Jisas pruras kainara ai disaipilka nani ra win: “Latwan ai kaiki uplika ra, Aisiki latwan kaikbia, bara yang sin latwan kaikamna” (Jn. 14:21). Wan brinka pali sa tasba aiska ra latwan lâka ba ra kabia bara Gâd warkka dauki ba mita upla kumi sin misbara wan kaikbia apia yua ba aimakbia (2 Tes. 1:6-8). Bîla kaiki ba ra, wan kupia kraukaia sa misbara lâka tilara yawan dîa muni lilia kaia sip sa. Baha ba wan maisa nihkbia bara karnika wankbia.