Benaías: Kupia karna lâka bara kasak lâka marikpi

Benaías war aiklaklabra kupia karna si briras waitnika kum kan, king Debit bara Salaman warkka dadaukra kan. Witin ba prîs kum luhpia kan. Prîs bara libait nani ba Jehova war aiklabanka nani ra aiklabaia lâka âpu kan, kuna Benaías lika daukan bara kupia karna lâka marikan. Tânka kum baku, witin tasba unta kum ra iwi layan kum ikan bara war aiklaklabra tara yari pâwan kum ra ikan. King Debit Benaías ra uba kasak luki kan ba mita war aiklabaia daknika wihta baku mangkan (2 Sa. 23:20-23).

Adonías bara Absalón King Debit mapara buan piua ra, Benaías ba lika kasak lâka marikan (2 Sa. 8:18; 15:18; 1 Ki. 1:8). Debit ba pat almuk kan piua ra, Benaías ba witin ra tâ baikan, Salaman ra king baku mangkaia dukiara (1 Ki. 1:32-40). Witin Jehova ra bara king baku bâk sakan uplika nani ra kasak lâka ba marikan, wala nani baku daukras kan piua ra sin.

Yawan sin kupia karna lâka marikaia nit sa wan waihla Sitan bara ai uplika nani mapara buaia dukiara. Bara wilin kaia sa Jehova smalkanka nani wan rayaka ra alki daukaia (Epe. 6:11; 1 Pi. 5:8, 9). Bara wala nani Jehova wina laihura takbia kra sin, yawan lika witin ra ban kasak kabia, kan yawan kasak lukisa witin yamni wan munbia (2 Sa. 22:26).