Sins lâka yamni ba mariks bara diara sut yamni man takbia

1, 2. ¿Sins lâka yamni marikaia ba dîa tânka sa, bara nahki hilp wan munisa?

SAM TAIM wan rayaka ra daukanka pain nani marikaia ba karna kaia sip sa, kan upla nani ba rispik lâka wan marikras apia kaka bîla kaiki tnatka kat wan munras sa. Ban kra, upla kum yawan dukiara saura lukisa apia kaka saura wan munisa. Bara baha piua ra, daukanka pain nani marikaia apia kaka upla ra pana pain ansa munaia ba isi apia sa. Baku sa kaka, ¿dîa ba hilp wan munaia sip sa? Baibil ba wisa sins lâka yamni marikaia ba hilp wan munbia.

² Yawan sins lâka yamni marikisa taim, wan nakra ni dîa kaiki wal baman wahbi sakanka nani daukras sa. Kau ni, trai munisa wan tânka briaia dîa muni diara kum kum baku takisa sapa. Baha ra tingki yawan sip sa kau tânkira kaia. Tânka kum baku, sins lâka yamni ba hilp wan munisa wan bîla aisanka nani ba alki takaskaia, wan dara walaia ani piua ra kau pain kabia sâp takaskaia, bara wan kupia baiwanka ba alki takaskaia sin. Baku sin, hilp wan munisa wala nani ra padin munaia, dîa kupia kraukanka nani wanki ba sin alki bri daukaia (Law. 4:4; S.L. 10:19, 19:20). Sins lâka yamni marikisa taim, Jehova kupia lilia daukisa, baku sin yawan bara wan kaina kir uplika nani ra yamni munisa. Naha daukanka ba painkira sa kau pali saura wan dara walisa apia kaka wan kupia baikisa piua ra, kan hilp wan munisa wan bîla aisanka bara nahki wan dara wali ba alki takaskaia. Kaisa Baibil sturka yumhpa laki kaikaia bara lan takbia nahki sins lâka yamni marikaia ba hilp wan munisa bawikira kaia, wan kupia alki takaskaia bara Jehova ra wan kupia aiska ni kasak lukaia dukiara.

BAWAN LÂKA MARIKS, TARA PULAN LÂKA LIKA APIA

3. ¿Naamán ba ya kan ki?

³ Diara yamni daukaia dukiara yawan bawan lâka ba marikaia sa (1 Pi. 5:5). ¿Baku daukaia dukiara sins lâka yamni marikaia ba nahki hilp wan munisa? Naamán sturka ra luki kaiks. ¿Witin ba ya kan ki? Naha waitnika ba kulkanka tara bri kan, Siria suldawika nani wihtika kan, naha nisanka ba Israel yahbra tani tasbaya nani ra kan. Ban sakuna, Naamán ba liparkira kan, naha ba siknis aihka saura kum sa upla taya ra alki ba (2 Ki. 5:1).

4. ¿Naamán ba nahki sins lâka yamni ba marikan?

⁴ Naamán maya mairin ba Israel wina tuktan mairin kum ai albika baku bri kan. Naha tuktika mairin ba ai dawanka mairin ra win, Israel tasbaya ra prapit kum bâra kan ai maya waitna ra ai sikniska wina rakaia sip kan ba (2 Ki. 5:2, 3). Naamán ba naku lukaia sip kan: “¡Kuna witin tuktan kum baman sa! ¿Alba kum nahki yang ra hilp ai munbia ki? ¡Bara purkara ai nisanka ba yang nani wal waihla sa!” Ban sakuna, Naamán ba purak taya baman kaikras kan. Tara pulan lâka ba sait ra swi si, bawan lâka wal naha tuktika mairin bîla ba walan. Bara Siria kingka ra makaban Israel tasbaya kat impaki baha prapitka ra plikaia sanska yabia, bara king ba waia adarka yan (2 Ki. 5:4, 5).

5. ¿Naamán Israel kat impakan taim, witin ra dîa takan?

⁵ Naamán ba Israel kat impakan bara king Joram mawan kat buan; ban kra witin lilia pali ai dara wali kan, kan ai sikniska wina mahka rawaia sip kan bamna. Ban sakuna, Joram ba lukan Siria kingka ba witin mapara war aiklabaia dukiara tnatka kum pliki kan. Prapit Ilaidsa baha walan taim, Joram ra makaban Naamán ra blîkbia witin wal aisaia dukiara (2 Ki. 5:6-9). Kuna Naamán dîa luki kan ba kat diara nani takras kan, Ilaidsa ba witin wal aisaia dukiara ai watla wina takras kan. Kau ni, sturi twatwilkra kum ra blikan bara maisa pakan rawaia dukiara dîa daukaia kan ba (2 Ki. 5:10).

6. a) ¿Dîa muni Naamán ba sturi twatwilkra bîla nani ba alki daukaia want apia kan? b) ¿Naamán albika nani ba nahki sins lâka yamni ba marikan, bara las kat dîa takan? (2 King Nani 5:13, 14).

⁶ Tâura, Naamán ba sturi twatwilkra bîla nani walan taim, ai kupia sauhkan. Baibil ba wisa, witin ba ai kupia kasak sauhki baha wina mahka wan (2 Ki. 5:11, 12). ¿Kuna dîa muni? Ban kra witin lukan Siria suldawika wihtika kan ba mita, witin ra kau rispik lâka marikaia kan. Baku sin, Ilaidsa maisa pakanka nani walan taim, ban kra lukan witin ba Siria tawanka ra mâyara kulki kan. Nahki kabia sin, Naamán ba Siria ra mahka tawaia wilin kan. Ban sakuna, ai albika nani ba sins lâka yamni marikan witin nani ai dawanka ra bik taki makaban diara nani pain luki kaikbia dukiara. Naamán ba tara pulan lâka ba tnaya ra swi si, Ilaidsa maisa pakanka ba bawan lâka wal alki brih daukan, bara baku sip kan ai sikniska ba wina rawaia (2 King Nani 5:13, 14 ba aisi kaiks).

7. ¿Naamán sturka wina yawan dîa lan takisa? (Sins Lâka 22:4; lilka nani ba sin kaiks).

⁷ ¿Naha sturka wina yawan dîa lan takisa? Sins lâka yamni marikisa piua ra, yawan purak taya baman kaikbia apia, kau ni diara kum daukras kainara aman pali luki kaikbia. Baku sin, nahki wan dara wali ba alki takaskaia hilp wan munisa. Sins lâka yamni ba sin wan kupia bukisa bawan lâka marikaia dukiara, kan wan tânka brisa yawan diara sut mapara lika sinskira apia sa bara upla wala hilpka ba nit sa, kau pali Jehova hilpka ba. ¿Naamán ba nahki sins lâka yamni ba marikan? Witin ba Gâd dukia dadaukra apia kan, ban sakuna bawikira kan bara Israel tuktika mairin bara ai albika nani bîla walan. Bara kau tânka tara bri ba sika, Jehova napakanka Ilaidsa dîa win ba kat witin alki daukan. Naamán ba tara pulan lâka ba sait ra swin, baha ra tingki witin sip kan wahbi sakanka yamni kum daukaia bara ai sikniska wina rawaia. Baha mita, diara kum daukras kainara takaski aman luki kaikaia sa. Tânka kum baku, upla kum mita kupia kraukanka kum wankan ba wal pain wan dara walras sa apia kaka Jehova asla takanka wina maisa pakanka kum brin ba wan tânka briras sa kaka, luki kaikaia sa: “¿Yang aisanki nani bara dîa daukisna ba wal bawan lâka marikisna ki apia kaka tara pulan lâka ba?” (Sins Lâka 22:4 ba aisi kaiks).

KUPIAM SAUHKPARA, KAU NI ALKI TAKASKS

8. ¿Ani piua nani ra wan kupia alki takaskaia karna wan munaia sip sa?

⁸ Yawan sut diara kum tâka mita wan kupia sauhkaia sip sa, kuna sins lâka yamni ba hilp wan munbia diara kum aisaras apia kaka daukras kainara wan kupia ba alki takaskaia. Sam taim, yawan wan kupia sauhkaia raitka brisa, ban kra upla kum saura wan munan apia kaka kasak apia lâka tâka mita (Epe. 4:26). Kaisa laki kaikaia nahki Debit bara Abigail ba trabil tara kum takan piua ra sins lâka yamni mariki banhwan ba.

9. ¿Nabal ba Debit ra nahki munan?

⁹ Nahara luki kaiks: Debit bara ai suldawika nani ba king Saúl sîa plapi, upla iwras tasbaya ra takaski kan (1 Sa. 25:1). Bahara witin nani ba waitna yuyakira kum nina Nabal sîpka nani bara ai main kakairika nani ra kaina kahbi kan (1 Sa. 25:15, 16). Sîp nani taya irbaia piua balan taim, Debit ba ai albika nani ra blikan wan, Nabal ra lakula yabaia bara rispik lâka wal plun blîkbia makabaia (1 Sa. 25:6-8). Kuna Debit bara ai suldawika nani daukan warkka ba dukiara ai tingkika lâka marikaia watlika ra, Nabal ba witin nani mapara saura pali aisan (1 Sa. 25:10, 11).

10. ¿Debit bara Abigail ba nahki sins lâka yamni marikan? (1 Samuil 25:32, 33; lilka ba sin kaiks).

¹⁰ Man Debit katma kaka, ¿nahki damra walaia kapram ki? Witin dîa muni Nabal wal ai kupia sauhkan ba wan tânka briaia isi pali sa. Debit ba Nabal wal ai kupia baikan bara ikaia want kan (1 Sa. 25:13, 21, 22). Kuna Debit bara ai suldawika nani ba Nabal ra ikaia auya kan piua ra, mairin sinskira kum nina Abigail, Nabal maya kata ba, witin nani ra alki takaskan. ¿Abigail ba nahki sins lâka yamni ba marikan? Witin ba ai tânka brin dîa muni Debit ba ai kupia sauhkan, nu kan witin kupia pain bri waitnika kum kan. Baha mita, karna trai munan witin ra alki takaskaia, prisant ailal brih wan bara bawan lâka ni kupia kraukanka nani yaban (1 Sam. 25:18, 23-31). Debit ba sin sins lâka yamni marikan, kan Abigail ra aman walan, bara ai tânka brin naha mairka dîa aisi kan ba Jehova lukanka mariki kan. Bara las kat, Debit ba ai kupia alki takaskan bara saurka tara kum daukras kan (1 Samuil 25:32, 33 ba aisi kaiks).

11. ¿Diara kum apia kaka upla kum tâka mita wan kupia sauhkisa piua ra, sins lâka yamni marikaia ba nahki hilp wan munisa? (Sins Lâka 19:11).

¹¹ ¿Naha sturka wina yawan dîa lan takisa? Sins lâka yamni marikisa piua ra, yawan wan kupia sauhkaia raitka bri kabia kra sin, wan kupia alki takaskaia sip sa. Baku sin, dîa aisi ba bara dîa dauki ba wina dîa saura takaia sip ba ra luki kaikaia sip sa (Sins Lâka 19:11 ba aisi kaiks). Abigail ba Jehova lukanka ba Debit ra kupia kraukan taim, ai kupia alki takaskan. Yawan diara kum tâka wan kupia sauhkisa apia kaka uba wari takisa piua ra, wan kupia baikaia watlika ra diara kum daukras kainara pain aman luki kaikaia sa (Je. 1:19). Jehova ra wan pura sunaia sa bara wiaia sa nahki wan dara wali ba. Baku sin, dîa trabil taki luki ba dukiara Gâd lukanka ba plikaia sa. Baku daukbia kaka, wan kupia alki takaskaia sip kabia.

12. Wan kupia alki takaskaia bara tânkira lâka marikaia dukiara, ¿wala nani ba nahki hilp wan munaia sip sa?

¹² Debit ba ai âuyapah kabia bara diara nani pain laki kaikbia dukiara Jehova Abigail ra yus munan ba baku, wala nani ra yus munaia sip sa sins lâka yamni marikaia hilp wan munbia dukiara. Baha mita, diara kum tâka wan kupia sauhkisa piua ra, yamni kabia spirit lainka ra pâwan kristianka kum wal aisaia. Witin ba hilp wan munbia Jehova nahki luki ba yawan sin nina blîkbia dukiara (S.L. 12:15; 20:18). Baku sin, Debit ra takan baku, wan pânika kum ra ai kupia alki takaskaia karna munisa kaka, yawan sip sa Abigail daukanka ba nina bliki, witin ra marikaia Jehova dîa luki ba. Yawan wala nani ra sins lâka yamni marikaia bara ai kupia alki takaskaia hilp munaia dukiara karna trai munisa kaka, kasak lukaia sip sa Jehova blisin wan munbia.

SIBRIN BRIMA PIUA RA, JEHOVA RA KASAK LUKS

13. ¿Sibrin lâka pura luaia dukiara sins lâka yamni ba nahki hilp wan munisa?

¹³ Wan rayaka ra sibrin ra wan dingki dukia kum kum takisa. Kuna, sins lâka yamni ba hilp wan munisa wan kupia kraukaia, ani dukia apia kaka ani uplika sibrin ra wan dingki ba purkara, Jehova kau karnika tara brisa (Law. 27:1). Yawan trabil tara nani bâk lui kabia kra sin, Jehova hilp wan munaia sip sa. Jona sturka ra luki kaikaia sip sa. Witin ba spirit lainka ra pâwan waitnika kum kan, kuna Jehova wark kum daukbia yaban piua ra, witin sins lâka yamni kau marikaia nit kan.

14. Jehova Jona ra wark kum yaban piua ra, ¿dîa muni witin sibrin lukan?

¹⁴ Jehova Jona ra diara sibrinkira kum daukaia blikan: Ninibi uplika nani ra wih maisa pakaia, Gâd mita witin nani ra sauhki tikbia (Jon. 1:1, 2). Man Jona katma kaka, ¿nahki damra walaia kapram ki? Luki kaiks, Israel tawanka wina Ninibi tawanka ba kat wapi waia dukiara kati kum baku bilkara impakaia kan. Baku sin, Asiria ra iwi kan nani ba upla saurakira nani baku kakaira kan. Baibil ba wisa Ninibi ba “tala lalaikra tawanka” kum kan (Nah. 3:1, 7). ¿Jona ba dîa daukan? Jehova bîla walaia watlika ra, witin ba plapan (Jon. 1:3).

15. ¿Jehova ra kau kasak lukaia dukiara Jona ra dîa ba hilp munan? (Jona 2:6-9).

¹⁵ Jona ba Ninibi tawanka wina laihura waia dukiara duri tara kum ra ulan. Ningkara, witin ra kabu ra lulkan, bara Jehova tnatka aihka painkira kum ra witin ra swaki sakan. Baha piua ra, Jona ba Jehova karnika tara bri kan ba dukiara ai kupia kraukan (Jon. 1:15, 17). Jona ba lan takan Jehova witin ra diara sut wina kaina kahbaia sip kan ba mita, Ninibi uplika nani dukiara sibrin lukaia apia kan (Jona 2:6-9 ba aisi kaiks). Jehova witin ra chans wala yaban, bara naha trip, ¿Jona ba dîa daukan? Witin Jehova bîla walan bara Ninibi kat impakan. Bara baha ra diara sut pain takan, kan upla manis ba witin ra walan (Jon. 3:5).

16. ¿Sibrin ra wan dingki trabilka nani pura luaia dukiara sins lâka yamni marikaia ba nahki hilp wan munisa? (Sins Lâka 29:25; lilka nani ba sin kaiks).

¹⁶ ¿Naha sturka wina yawan dîa lan takisa? Jehova warkka daukaia dukiara upla ra sibrin briaia lâka ba alki wan takaskbia yawan want apia sa (Sins Lâka 29:25 ba aisi kaiks). Sins lâka yamni marikaia ba Jona ra hilp munan ai kupia kraukaia Jehova ai lamara kan ba bara witin ra kaina kahbia ba. Yawan sin, dîa wan takbia ba dukiara sibrin lukaia watlika ra, wan kupia kraukaia sa Jehova nahki ban hilp wan muni ba. Bara nahki tnatka nani ra wan kaina kahbi aula ba. Baku sin, piua karna nani ra muihni lakri nani ba kasak lukan lâka marikan ba mita nahki Jehova witin nani ra hilp munan sturka nani ra yawan luki kaikaia sip sa (Hib. 13:6). Wan kupia aiska ni Jehova ra kasak lukaia sa bara wala nani ba sim baku daukbia hilp munaia sa. Baku daukbia kaka, yawan sins lâka yamni ba marikbia.

PIU BANI SINS LÂKA YAMNI MARIKAIA TRAI MUNPI

17. Sins lâka yamni ban mariki kaia dukiara, ¿yawan dîa daukaia sip sa?

¹⁷ Laki kaikan baku, sins lâka yamni ba hilp wan munisa trabil karna nani pura luaia dukiara. Kuna, ¿yawan dîa daukaia sa sins lâka yamni ban mariki kaia dukiara? Jehova baku upla kau sinskira wala âpu sa, bara witin naha daukanka painkira pakaia dukiara hilp wan munisa. ¿Nahki daukisa ki? Wahbi sakanka pain nani briaia bara wan kupia alki takaskaia dukiara witin ai Bîla Baibil bâk kupia kraukanka nani wankisa. Baha mita, yawan Baibil ra dîa aisi kaiki ba tihu luki kaikaia sa (Law. 119:97-101). Baku sin, ai spiritka holikira wankisa yawan sins lâka yamni marikbia dukiara, baha mita namhpa lukraskira witin ra ban makabi kaia sa (Nih. 9:20; Law. 32:8). Naha hilpka nani yawan alki brisa kaka, piua karna nani mapara aiklabi kabia taim, Jehova lukanka ba nina blîkbia bara daukanka pain nani marikbia (S.L. 21:11).

18. ¿Man dîa daukaia wilin sma ki?

¹⁸ Sins lâka yamni ba diara manakira kum sa, baha mita Jehova ra ban wanki kabia makabaia sa (Law. 14:2). Baku daukbia kaka, sins lâka yamni ban mariki kabia (S.L. 21:16). Dîa takbia kra sin, yawan wilin kaia sa naha daukanka ba ban marikaia. Bara baku ¡Jehova kupia lilia daukbia!